#DailyNews
Published - 18 May 2022

၁။ ဘတ်စ်ကားမှတ်တိုင်တွင်ရပ်သည့် City Taxi များကို အရေးယူနေပြီ။

၂။ Tourist Visa ဖွင့်ပြီးနောက် အနောက်နိုင်ငံခရီးသွားများထက် အာရှနှင့်အာဆီယံခရီးသွားများသာ ဦးစွာ ပြန်ဝင်လာနိုင်ခြေရှိ။

၃။ နေ့စဉ်မိုးလေဝသသတင်း။

၄။ မွေးရပ်မြေတွင်စိုက်ထူပြသထားသည့် မာဂရက်သက်ချာ၏ရုပ်ထုအား ဆန္ဒပြသူတစ်ဦးကကြက်ဥဖြင့်ပစ်ပေါက် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published - 18 May 2022

သီတဂူဆရာတော်ကြီး ခန္တီးမြို့ရှိ သီတဂူမျက်စိဆေးရုံအတွက် အမေရိကန်ဒေါ်လာ ၁ သိန်း ၃ သောင်းဖိုးလှူဒါန်းပေးခဲ့တယ်လို့ သိရပါတယ်။

အဆိုပါ လှူဒါန်းပေးအပ်မှုအခမ်းအနားကို မေလ ၁၇ ရက်နေ့က ခန္တီးမြို့ရှိ သီတဂူမျက်စိဆေးရုံမှာ ပြုလုပ်ခဲ့တာပါ။

ခန္တီးမြို့သို့ရောက်ရှိနေသည့် သီတဂူဆရာတော်ဘုရားကြီးသည် မျက်စိဆေးရုံသုံး ပစ္စည်းကရိယာများ တပ်ဆင်ပြီးသော သီတဂူခန္တီးဆေးရုံကို ကြည့်ရှုစစ်ဆေးခြင်းတို့ကိုလည်း ဆောင်ရွက်ခဲ့တယ်လို့ ဆိုပါတယ်။

ထိုမျက်စိဆေးရုံအတွက် လိုအပ်သော ကရိယာပစ္စည်းများကို တန်းဖိုးအားဖြင့် အမေရိကန် ဒေါ်လာတစ်သိန်းသုံးသောင်းဖိုး လှူဒါန်းထားပြီး မကြာမီ သီတဂူခန္တီးမျက်စိဆေးရုံဖွင့်လှစ်မှာဖြစ်တယ်လို့ သီတဂူသတင်းထုတ်ပြန်ရေးအဖွဲ့မှ သိရပါတယ်။

ဓါတ်ပုံ - သီတဂူစတား

ymg/kg
#Yangon_Media_Group

#LocalNews
Published - 18 May 2022

မေလ(၁၈)ရက် နံနက်ပိုင်း(၆)နာရီကျော်အချိန်က ကျိုင်းတုံမြို့အနီး အင်အားရစ်တာစကေး (၅.၀)အဆင့်ရှိ မြေငလျင်လှုပ်ရှားသွားတယ်လို့ မိုးလေဝသနှင့် ဇလဗဒညွှန်ကြားမှုဦးစီးဌာန၊ မြေငလျင်ဌာနခွဲမှ သိရပါတယ်၊၊

နမ့်စန်မြေငလျင်စခန်းမှ အရှေ့မြောက်ဘက် (၆၅) မိုင်ခန့်ကွာဝေးတဲ့ မြန်မာနိုင်ငံပြည်တွင်းကျိုင်းတုံမြို့ရဲ့ အနောက်-အနောက်မြောက်ဘက် (၆၂) မိုင်ခန့်အကွာမှာ ဗဟိုပြုပြီး အင်အား ရစ်(ခ်)တာစကေး (၅.၀)အဆင့်ရှိ အင်အားအသင့်အတင့်ရှိသော မြေငလျင်တစ်ခု လှုပ်ရှားသွားတယ်လို့ ထုတ်ပြန်ချက်မှာ ဖော်ပြပါရှိပါတယ်၊၊

မြန်မာနိုင်ငံမှာ ယခုကာလအတွင်း အင်အားအနည်းငယ်ရှိတဲ့ မြေငလျင်တွေသာလှုပ်ခတ်မှုရှိခဲ့တာဖြစ်ပြီး အခုပထမဦးဆုံးအနေနဲ့ အင်အားအသင့်အတင့်ရှိတဲ့ အင်အားရစ်တာစကေး(၅.၀)အဆင့်ရှိတဲ့ မြေငလျင်ဟာ ကျိုင်းတုံမြို့အနီးလှုပ်ခတ်သွားတာဖြစ်တယ်လို့ သိရပါတယ်၊၊

ymg/tthl
#Yangon_Media_Group

#Local_News
Published_ 18 May 2022

Myancopharm ကိုဗစ်-၁၉ ရောဂါကာကွယ်ဆေးသည် အသက်(၅)နှစ်အရွယ်မှ စတင်ထိုးနှံနိုင်ပြီး ကိုယ်ဝန်ဆောင်နှင့် နို့တိုက်မိခင်များကိုပါ ဘေးကင်းစိတ်ချစွာ ထိုးနှံနိုင်သည့် ကာကွယ်ဆေးဖြစ်ကြောင်း သိရပါတယ်။

epu စက်မှုဝန်ကြီးဌာနဝန်ကြီး ဒေါက်တာချာလီသန်းသည် မနေ့ကနံနက်ပိုင်းတွင် ရန်ကုန်တိုင်းဒေသကြီး လှည်းကူးမြို့နယ်ရှိ ဆေးဝါးစက်ရုံခွဲ (ရွာသာကြီး)သို့ သွားရောက်ကြည့်ရှု စစ်ဆေးစဉ်ပြောကြားခဲ့တာ ဖြစ်ပါတယ်။

ဝန်ကြီးက Myancopharm ကိုဗစ်-၁၉ ရောဂါကာကွယ်ဆေးများအား ကျန်းမာရေးဝန်ကြီးဌာနသို့ သတ်မှတ်အချိန်တွင် သတ်မှတ်အရေအတွက်အတိုင်း ဖြန့်ဖြူးနိုင်ရေး အလေးထားဆောင်ရွက်ရန် မှာကြားခဲ့ပါတယ်။

ထို့ပြင် ကျန်းမာရေးဝန်ကြီးဌာနက သတ်မှတ်ထားတဲ့ ဦးတည်အုပ်စုဝင်အားလုံးအား ကိုဗစ်-၁၉ ရောဂါကာကွယ်ဆေးများ အမြန်ဆုံးထိုးနှံနိုင်ရေး ကြိုးစားဆောင်ရွက်ရန်၊ ကိုဗစ်-၁၉ ရောဂါကာကွယ်ဆေးများ ဖြည့်သွင်းထုတ်လုပ်နေတဲ့ လုပ်ငန်းစဉ်များ အရှိန်အဟုန်မပြတ် ဆောင်ရွက်နိုင်ရေးအတွက် Bulk များ အချိန်မီရောက်ရှိစေရေး ကြိုတင်ညှိနှိုင်းထားဖို့ ပြောကြားခဲ့ပါတယ်။

Myancopharm ကိုဗစ်-၁၉ ရောဂါကာကွယ်ဆေးသည် အသက် ၁၈ နှစ်နှင့်အထက် ပြည်သူများကိုလည်း ထပ်ဆောင်းကာကွယ်ဆေးအဖြစ် ဘေးကင်းစိတ်ချစွာ အသုံးပြု ထိုးနှံနိုင်ကြောင်း သိရှိရပါတယ်။

ymg-mnn
#Yangon_Media_Group

#LocalNews
Published - 18 May 2022

ကုန်းအတက်တွင် နောက်ပြန်လိမ့်သည့် (၁၂)ဘီးယာဥ်ကြောင့် ဆိုင်ကယ်စီးနင်းသူတစ်ဦး သေဆုံးခဲ့ရသည့် ဖြစ်စဥ်တစ်ခု ကချင်ပြည်နယ်၊ ဗန်းမော်မြို့၊ ခွန်သာရပ်ကွက်၊ ခွန်သာ-တပ်ကလေးလမ်းတွင် ဖြစ်ပွားခဲ့တယ်လို့ သိရပါတယ်။

အဆိုပါ ဖြစ်စဥ်ဟာ မေလ ၁၇ ရက်နေ့က ဖြစ်ပွားခဲ့ခြင်းဖြစ်ပြီး ခွန်သာ-တပ်ကလေးလမ်းတွင် ၁၂ ဘီး(ဖြူ/ပြာ) ရောင်ယာဉ်တစ်စီးသည် ခွန်သာကုန်းအတက်တွင် မတက်နိုင်ဘဲ နောက်ပြန်လိမ့်စဉ် ၄င်းယာဥ်နောက်မှကပ်ပါလာသော ဆိုင်ကယ်အား တိုက်မိမှုဖြစ်ပွားခဲ့တာဖြစ်ပါတယ်။

ယာဥ်တိုက်မှုဖြစ်ပွားရာသို့ ဗန်းမော်ခရိုင်မီးသတ်စခန်းမှ ရှာဖွေကယ်ဆယ်ရေးယာဉ်(၁)စီး၊ သန္ဓေမီးသတ်တပ်ဖွဲ့ဝင်များဖြင့် ရှာဖွေကယ်ဆယ်ရေးလုပ်ငန်းများ သွားရောက်ကူညီဆောင်ရွက်ပေးခဲ့ရပြီး အဆိုပါဖြစ်စဉ်ကြောင့် ဆိုင်ကယ်ယာဉ်မောင်းနှင်သူ အမျိုးသားတစ်ဦးသေဆုံးခဲ့ရတယ်လို့ ဆိုပါတယ်။

ယာဥ်တိုက်မှုကြောင့် သေဆုံးခဲ့သူ၏ (DB)ကိုလည်း ဗန်းမော်မြို့နယ် နာရေးကူညီမှုအသင်းမှ ယာဉ်ဖြင့် ဗန်းမော်မြို့နယ်ပြည်သူ့ဆေးရုံသို့ ကူညီပို့ဆောင်ပေးခဲ့တယ်လို့လည်း မီးသတ်တပ်ဖွဲ့က သတင်းထုတ်ပြန် ထားပါတယ်။

Photo - MFSD
ymg/kg
#Yangon_Media_Group

#LocalNews
Published - 18 May 2022

လက်ရှိကာလတွင် ပြည်တွင်းကား စျေးနှုန်းတွေဟာ ငွေကျပ် သိန်း ၂၀မှ ငွေကျပ်သိန်း ၃၀ ကျော်အထိ မြင့်တက်နေပြီး စျေးကွက်အတွင်းမှာလည်း အရောင်းအဝယ်တွေအေးနေတယ်လို့ သိရပါတယ်။

ယခုလို ပြည်တွင်းကားစျေးနှုန်းတွေ အမြင့်တန်းမှာ ရောက်ရှိနေတာဟာ ဒေါ်လာစျေးနှင့်စက်သုံးဆီဂယက်ကြောင့် ဖြစ်တယ်လို့လည်း ကားဝယ်ရောင်းလုပ်ကိုင်သူတွေက ဆိုပါတယ်။

"ပြည်တွင်းကားစျေးက မူလပေါက်စျေးထက် စျေးတွေတက်နေတာပေါ့။ ကားမျိုးအစားအပေါ် မူတည်ပြီး သိန်း ၂၀ ကျော်၊ သိန်း ၃၀ ကျော်အထိ မြင့်တက်နေတာပေါ့။ ပြောရရင် စျေးကွက် အ နေအထားကလည်း အေးတယ်။ အခုဆို ကျောင်းဖွင့်ရာသီ ပုံမှန်ကျောင်းဖွင့်ရာသီ အခုလိုအချိန်မျိုးဆို ကားတွေရောင်းနေရပြီ။ ဒီနှစ်ကျပါးတယ် ပြောရမယ်။ အတော်လေးပါးတယ်။ ကြိုက် ရောင်း၊ ကြိုက်ဝယ်အနည်းငယ် လောက်ပဲရှိတယ်။

ဒီနှစ်တစ်နှစ်လုံးတော့ ဒီလိုပုံစံနဲ့ပဲ သွားနေအုံးမယ်ထင်ပါတယ်။ စျေးကွက်က ထူးထူးခြားခြားကြီး ပြောင်းလဲသွားတာမျိုးတော့ မရှိနိုင်ဘူးထင်တယ်။ ဘာလိုလဲဆိုတော့ ကားမူဝါဒတွေကမ ပြောင်းလဲဘူး၊ အသစ်မထွက်ဘူး ဒီအတိုင်းပဲ ဆက်ရှိနေတော့ ပြည်တွင်းကား စျေးကွက်က ကား စျေးတွေတက်နေပေမဲ့ ဒီလိုပုံစံနဲ့ပဲ ဆက်သွားနေအုံးမှာပါ။"လို့ ကားဝယ်ရောင်းလုပ်ငန်းရှင်တစ်ဦးက ပြောပြခဲ့ပါတယ်။

ဒါ့အပြင် လာမည့် ကာလများတွင်လည်း ပြည်တွင်းကား စျေးနှုန်းက အမြင့်ပိုင်းသာရှိ နေမယ်လို့ ကားဝယ်ရောင်းလုပ်ကိုင်သူတွေက ခန့်မှန်းထားကြတာပါ။

ယခင်က သိန်း ၁၀၀ ကျော်ဖြင့် ဝယ်ယူလို့ရတဲ့ ဟွန်ဒါဖစ်ဟာ ယခုကာလမှာတော့ ကျပ်သိန်း ၂၀၀ ကျော်အထိ ပေါက်စျေးရှိ နေတာဖြစ်ပါတယ်။

ထို့အပြင် ရန်ကုန်ကားဝိုင်းအတွင်းမှာတော့ မော်ဒယ်မြင့်ကားများထက် တပတ်နွမ်းဂျပန်ကားများသာ ပိုမိုအရောင်းအဝယ်ဖြစ်နေတယ်လို့လည်း သိရပါတယ်။

ymg/kg
#Yangon_Media_Group