#LocalNews
Published _24 March 2023

ဦးကိုကိုကြီး ဦးဆောင်သည့် ပြည်သူ့ပါတီ(PP) အနေဖြင့် နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ ၂၅ အရ ယနေ့ မတ်လ ၂၄ ရက်တွင် ပြည်ထောင်စုရွေးကောက်ပွဲကော်မရှင်ထံ ပါတီမှတ်ပုံတင်လျှောက်ထားခဲ့ကြောင်း သိရသည်။

"လက်ရှိ ပြဿနာတွေကို နိုင်ငံရေးနည်းလမ်းနဲ့ ဖြေရှင်းရမယ်လို့ ယုံကြည်တယ်၊နိုင်ငံရေးနည်းလမ်းနဲ့ ဖြေရှင်းဖို့ဆိုတာက နိုင်ငံရေးပါတီတွေ မရှိမဖြစ်လိုအပ်တယ်။ဒါကြောင့် နိုင်ငံရေးပါတီအဖြစ်မှတ်ပုံတင်လျှောက်ထားတာ ဖြစ်ပါတယ်"ဟု ပြည်သူ့ပါတီ(PP) ဥက္ကဌ ဦးကိုကိုကြီးက YMG ကို ပြောသည်။

လက်ရှိတွင် ပါတီစုံဒီမိုကရေစီအထွေထွေရွေးကောက်ပွဲတွင် ဝင်ရောက်ယှဉ်ပြိုင်ရန်အတွက် ဖေဖော်ဝါရီလ ၁ ရက်မှ မတ်လ ၂၃ ရက်ထိ နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ ၃ အရ လျှောက်ထားသောပါတီ ၈ ပါတီရှိပြီး နိုင်ငံရေးပါတီများမှတ်ပုံတင်ခြင်းဥပဒေ ပုဒ်မ ၂၅ အရ လျှောက်ထားသောပါတီ ၃၂ ပါတီဖြစ်၍ စုစုပေါင်း ၄၀ ပါတီ ရှိပြီ ဖြစ်ကြောင်း၊ ယင်း ၄၀ ပါတီတွင် ပြည်ထောင်စုတစ်ဝန်းလုံး စည်းရုံးမည့်ပါတီ ၁၀ ပါတီနှင့် တိုင်းဒေသကြီး သို့မဟုတ် ပြည်နယ်တစ်ခုအတွင်း၌သာ စည်းရုံးမည့်ပါတီ ၃၀ ပါတီရှိပြီး အဆိုပါ ပါတီများကို တည်ထောင်ခွင့်နှင့် မှတ်ပုံတင်ခွင့်ပြုနိုင်ရေး ပြည်ထောင်စုရွေးကောက်ပွဲကော်မရှင်က ဆက်လက်စိစစ်ဆောင်ရွက်လျက်ရှိကြောင်း သိရသည်။

ယနေ့ မတ်လ ၂၄ ရက် တွင် ပြည်သူ့ပါတီ(PP) နှင့်အတူ အခြား မည်သည့်ပါတီများ ပြည်ထောင်စုရွေးကောက်ပွဲကော်မရှင်ထံ ပါတီမှတ်ပုံတင်လျှောက်ထားကြသည်ကိုမူ အသေးစိတ် မသိရသေးပေ။

ymg/mt
#Yangon_Media_Group

#LocalNews
Published _24 March 2023

ရန်ကုန်တိုင်းဒေသကြီး၊ သန်လျင်မြို့နယ်၊ အမှုထမ်းရပ်ကွက်၊ ဖွံ့ဖြိုးရေးလမ်း (ဖွံ့ဖြိုးရေးလမ်းဆုံအနီး)တွင် ယနေ့ မတ်လ ၂၄ ရက် မွန်းလွဲ ၁၂ နာရီ ၃၅ မိနစ်အချိန်ခန့်က ဥပဒေအကြံပေးတစ်ဦး သေနတ်ဖြင့် ၁၄ ချက် ပစ်ခတ်ခံရကြောင်း ရဲတပ်ဖွဲ့နှင့် နီးစပ်သည့် အသိုင်းအဝိုင်းက သိရသည်။

ပစ်ခတ်ခံရသူမှာ သန်လျင်မြို့နယ်၊ အမှုထမ်းရပ်ကွက်၊ ဖွံ့ဖြိုးရေး-၆ လမ်းနေ အသက် ၅၂ နှစ်အရွယ် ဥပဒေအကြံပေး ဦးမင်းတေဇာညွန့်တင် ဖြစ်ပြီး SUZUKI EXTIGA အညိုရောင်ယာဉ်ဖြင့် နေအိမ်သို့ ပြန်လာစဉ် အခင်းဖြစ်ရာအရောက်တွင် လမ်းလျှောက်လာသူ ၂ ဦးက သေနတ်ဖြင့် ပစ်ခတ်ခဲ့ခြင်းဖြစ်ကြောင်း သိရသည်။

ပစ်ခတ်ခံရသောကြောင့် ဦးမင်းတေဇာညွန့်တင်၏ လက်ယာဘက် လက်ဖျံထိမှန်ဒဏ်ရာ (၃) ချက် ၊ လက်ဝဲဘက်လက်ဖျံ ထိမှန်ဒဏ်ရာ (၃) ချက်၊ လက်ယာလက်ခုံ ထိမှန်ဒဏ်ရာ (၂) ချက်၊ လက်ဝဲဘက် နံဘေး ထိမှန်ဒဏ်ရာ (၁) ချက်၊ လက်ဝဲဘက်ခါးစောင်း ထိမှန်ဒဏ်ရာ (၂) ချက်၊ ကျောကုန်း ထိမှန်ဒဏ်ရာ (၂) ချက်တို့ ရရှိခဲ့ကြောင်း၊ယင်းကို ဆေးရုံသို့ ပို့ဆောင်စဉ် ရရှိဒဏ်ရာများကြောင့် သေဆုံးခဲ့ကြောင်းသိရသည်။

အဆိုပါ ပစ်ခတ်မှုဖြစ်ပွားသည့်နေရာမှ SIG SAUER ကျည်အိမ် (၁) ခု၊ ၉ မမ ကျည်ခွံ (၁၄) ခုတို့အားတွေ့ရှိခဲ့ပြီး လုံခြုံရေးတပ်ဖွဲ့များက ပြစ်မှုကျူးလွန်သူများကို ဖမ်းဆီးရမိရေးဆောင်ရွက်လျက်ရှိကြောင်းသိရသည်။

ymg/mt
#Yangon_Media_Group

#LocalNews
Published _24 March 2023

(၅၈) ကြိမ်မြောက် မြန်မာ့ကျောက်မျက်ရတနာပြပွဲအတွင်း ကျောက်စိမ်း ၁၅၄၄ တွဲ၊ ပုလဲအတွဲ၂၉၀ နှင့် ကျောက်မျက်၇၇ တွဲ ရောင်းချနိုင်ခဲ့ကြောင်း ပြပွဲကော်မတီက ထုတ်ပြန်လိုက်သည်။

နေပြည်တော်ရှိ မဏိရတနာကျောက်စိမ်းခန်းမ၌ မတ်လ ၁၇ ရက်က မတ်လ ၂၃ ရက်ထိ အိတ်ဖွင့်တင်ဒါစနစ်ဖြင့် ပုလဲအတွဲပေါင်း ၂၉၅ တွဲ၊ ကျောက်မျက်အတွဲပေါင်း ၁၂၀ နှင့် ကျောက်စိမ်းအတွဲပေါင်း ၂၁၅၀ တွဲတို့ကို ပြည်တွင်း၊ ပြည်ပ ရတနာကုန်သည်များအား ပြသရောင်းချခဲ့ခြင်း ဖြစ်သည်။

ပြပွဲတွင် ပုလဲအတွဲပေါင်း ၂၉၅ တွဲကို မတ်လ ၁၈ ရက်မှ ၁၉ ရက်အထိ လည်းကောင်း၊ ကျောက်မျက်အတွဲပေါင်း ၁၂၀ ကို မတ်လ ၂၀ ရက်တွင် လည်းကောင်း၊ ကျောက်စိမ်းအတွဲပေါင်း ၂၁၅၀ ကို မတ်လ ၁၇ ရက်မှ ၂၁ ရက်အထိ လည်းကောင်း ရောင်းချပေးခဲ့ခြင်းဖြစ်ကြောင်း သိရသည်။

ယခုပြပွဲတွင် ပုလဲအတွဲများကို အမေရိကန်ဒေါ်လာဖြင့် အခြေခံဈေးထားရှိပြီး တန်ဖိုးငွေပေးချေရာတွင် ပြည်ပကုန်သည်များသည် အမေရိကန်ဒေါ်လာ၊ ယူရို၊ ယွမ် နှင့် ထိုင်းဘတ်ငွေတို့ဖြင့်လည်းကောင်း၊ ပြည်တွင်းကုန်သည်များသည် မြန်မာကျပ်ငွေဖြင့်လည်းကောင်း၊ ကျောက်မျက်နှင့် ကျောက်စိမ်းအတွဲများကို ယူရိုငွေဖြင့် အခြေခံဈေးထားရှိပြီး ကျောက်မျက်အတွဲများအတွက် တန်ဖိုးငွေပေးချေရာတွင် ပြည်ပ ကုန်သည်များသည် အမေရိကန်ဒေါ်လာ သို့မဟုတ် ယွမ်ငွေ သို့မဟုတ် ထိုင်းဘတ်ငွေတို့ဖြင့်လည်းကောင်း၊ ပြည်တွင်းကုန်သည်များသည် မြန်မာကျပ်ငွေဖြင့်လည်းကောင်း၊ကျောက်စိမ်းအတွဲများအတွက် တန်ဖိုးငွေပေးချေရာတွင် နိုင်ငံခြားငွေဖြင့်သာပေးချေရမည့် ကျောက်စိမ်းအတွဲများအတွက် ပြည်တွင်း၊ ပြည်ပကုန်သည်များသည် အမေရိကန်ဒေါ်လာ သို့မဟုတ် ယွမ်ငွေ သို့မဟုတ် ထိုင်းဘတ်ငွေတို့ဖြင့် လည်းကောင်း၊ နိုင်ငံခြားငွေ သို့မဟုတ် မြန်မာကျပ်ငွေဖြင့်ပေးချေရမည့် ကျောက်စိမ်းအတွဲများအတွက် ပြည်တွင်းကုန်သည်များသည် မြန်မာကျပ်ငွေဖြင့်လည်းကောင်း၊ ပြည်ပကုန်သည်များသည် အမေရိကန် ဒေါ်လာ သို့မဟုတ် ယွမ်ငွေ သို့မဟုတ် ထိုင်းဘတ်ငွေတို့ဖြင့်လည်းကောင်း ပေးချေခဲ့ကြကြောင်း သိရသည်။

ကျောက်မျက်ရတနာပြပွဲများကို ၁၉၆၄ ခုနှစ်မှစတင်၍ ကျင်းပခဲ့ရာ ယခုကျင်းပပြုလုပ်ခဲ့ခြင်းဖြစ်ကြောင်း သိရသည်။

ymg/mt
#Yangon_Media_Group

#LocalNews
Published-24 March 2023

အပြည်ပြည်ဆိုင်ရာ မြန်မာလေကြောင်းလိုင်း (MAI) အနေဖြင့် ယခု မတ်လကုန်ပိုင်းမှ စ၍ စင်ကာပူနိုင်ငံသို့ လေကြောင်းခရီးစဉ်များ တိုးချဲ့ပျံသန်းမည်ဖြစ်ကြောင်း သိရသည်။

လက်ရှိတွင် ရန်ကုန်အပြည်ပြည်ဆိုင်ရာ လေဆိပ်မှ စင်ကာပူနိုင်ငံသို့ လေကြောင်းခရီးစဉ်များကို တစ်ပတ်လျှင် ခုနစ်ကြိမ် ပျံသန်းပေးလျက်ရှိပြီး မတ်လ ၂၈ ရက်မှစ၍ အပတ်စဉ် အင်္ဂါ၊ ကြာသပတေးနှင့် စနေနေ့တို့တွင် နောက်ထပ် လေကြောင်းခရီးစဉ် သုံးကြိမ် တိုးချဲ့ပျံသန်းမည်ဖြစ်ကြောင်း သိရသည်။

ယင်းကြောင့် မတ်လ ၂၈ ရက် နောက်ပိုင်းတွင် MAI အနေဖြင့် စင်ကာပူနိုင်ငံသို့ ပြေးဆွဲမည့် ခရီးစဉ်မှာ တစ်ပတ်လျှင် ၁၀ ကြိမ်ရှိလာမည်ဖြစ်ကြောင်း ၊စင်ကာပူသို့ သွားရောက်သည့် ခရီးသည်အများစုမှာ စီးပွားရေးကိစ္စနှင့် အလည်အပတ် သွားရောက်ကြသူများကြောင်းလည်း သိရသည်။

ယခုအခါ MAI အနေဖြင့် Airbus A320 လေယာဉ်များဖြင့် အာရှတိုက် လေကြောင်းခရီးစဉ်များ၊ ဒူဘိုင်းလေကြောင်း ခရီးစဉ်များကို အဓိကထား ပျံသန်းပေးလျက်ရှိပြီး အိန္ဒိယနိုင်ငံ ဒေလီမြို့သို့လည်း တနင်္လာ၊ ဗုဒ္ဓဟူးနှင့် သောကြာနေ့တို့တွင် တစ်ပတ်လျှင် သုံးကြိမ် ပျံသန်းပေးလျက်ရှိကြောင်း၊ယင်းအပြင် ကမ္ဘောဒီးယားနိုင်ငံရှိ ဖနွမ်းပင်လေဆိပ်၊ ဗီယက်နမ်နိုင်ငံရှိ ဟနွိုင်းလေဆိပ်နှင့် ဟိုချီမင်းလေဆိပ်၊ ထိုင်းနိုင်ငံရှိ ဖူးခက်လေဆိပ်၊ ချင်းမိုင်လေဆိပ်နှင့် ဗန်ကောက်လေဆိပ်တို့သို့လည်း ပျံသန်းပေးလျက်ရှိကြောင်း သိရသည်။

ymg/mt
#Yangon_Media_Group

#LocalNews
Published-24 March 2023

မြန်မာနိုင်ငံ၏ သတင်းမှန်ကို အမှန်တကယ်လိုအပ်ကြောင်း မလေးရှားနိုင်ငံ၊ နိုင်ငံခြားရေးဝန်ကြီးဌာန၊ Human Rights and Humanitarian Division မှ Principal Assistant Secretary ဖြစ်သူ Mr. Neermal Shunmugam က ပြောသည်။

မလေးရှားနိုင်ငံ၊ နိုင်ငံခြားရေးဝန်ကြီးဌာန၊ Human Rights and Humanitarian Division မှ Principal Assistant Secretary နှင့် ကွာလာလမ်ပူမြို့မှ မလေးရှားနိုင်ငံဆိုင်ရာ မြန်မာသံရုံး၊ သံရုံးယာယီတာဝန်ခံ၊သံအမတ် တို့ မတ်လ ၂၂ ရက်က တွေ့ဆုံစဉ် အထက်ပါအတိုင်း ပြောကြားခဲ့ခြင်းဖြစ်သည်။

မလေးရှားနိုင်ငံအနေဖြင့် အနောက်နိုင်ငံများ၏ မီဒီယာများပေါ်တွင်သာ သတင်းမှီခိုနေရသည့်အတွက် မြန်မာနိုင်ငံ၏ သတင်းမှန်ကို အမှန်တစ်ကယ် လိုအပ်ကြောင်း၊ သို့မှသာ မြန်မာနိုင်ငံကိစ္စအပေါ် မျှတစွာ စဉ်းစားပေးနိုင်မည်ဖြစ်ကြောင်း၊ မြန်မာနိုင်ငံကိစ္စသည် အတူတကွ ဖြေရှင်းရမည့် ကိစ္စဖြစ်ကြောင်းဖြင့် ဆွေးနွေးပြောကြားခဲ့ကြောင်း နိုင်ငံခြားရေးဝန်ကြီးဌာနက ထုတ်ပြန်ထားသည်။

ymg/mt
#Yangon_Media_Group

#LocalNews
Published_ 24 March 2023

တရားမဝင်လျှပ်စစ်ဓာတ်အားသုံးစွဲသူများနှင့် ဓာတ်အားခိုးယူသုံးစွဲများအား ကွင်းဆင်းစစ်ဆေးပြီး လျှပ်စစ်ဥပဒေအရအရေးယူမည်ဖြစ်ကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်းမှမတ်လ(၂၄)ရက်ထုတ်ပြန်ကြေငြာလိုက်သည်၊၊

ယင်းကဲ့သို့ ကျူးလွန်သူများကို ဓာတ်အားဖြတ်တောက်ခြင်း ၊ လျော်ကြေးငွေကို တပ်ဆင်ဝန်အားအရ တွက်ချက်တောင်းခံခြင်းများအပြင် ၂၀၁၄ ခုနှစ် လျှပ်စစ်ဥပဒေအရတရားစွဲဆိုမည်ဖြစ်ပြီး ပြစ်မှုထင်ရှားစီရင်ခြင်းခံရပါက ငွေဒဏ်အပြင် အနည်းဆုံးငါးနှစ်မှ အများဆုံးဆယ်နှစ်အထိထောင်ဒဏ်ချမှတ်ခံရမည်ဟုထုတ်ပြန်ချက်တွင်ဖော်ပြပါရှိသည်၊၊

ထုတ်ပြန်ချက်တွင် နိုင်ငံတော်အစိုးရသည် အများပြည်သူများ၏ လူမှုရေး ၊စီးပွားရေးနှင့် လုံခြုံရေးများအတွက် လျှပ်စစ်ဓာတ်အားကို ထုတ်လုပ်သယ်ပို့ဖြန့်ဖြူးရောင်းချခြင်းများ ဆောင်ရွက်လျက်ရှိရာ တရားဝင် ဓာတ်အားသုံးစွဲခွင့်ပြုထားသော ပြည်သူအချို့နှင့် တရားဝင်ဓာတ်အားသုံးစွဲခွင့်မရရှိသေးသော ပြည်သူအချို့သည် မသမာသောနည်းဖြင့် လျှပ်စစ်ဓာတ်အားကို တရားမဝင်သုံးစွဲမှုများ ပြုလုပ်လျက်ရှိသည်ဟုဆိုသည်၊၊

တရားမဝင်ဓာတ်အားသုံးစွဲမှုများအနေဖြင့် အောက်ပါနည်းလမ်းတစ်ခုခုဖြင့် ပြုလုပ်သုံးစွဲခြင်းဖြစ်သည်၊၊
(က) လျှပ်စစ်ဓာတ်အားကိုခိုးယူသုံးစွဲခြင်း
(၁) မီတာမရှိဘဲတိုက်ရိုက်ခိုးယူခြင်း ။
(၂) မီတာရှိသော်လည်း မီတာမတက်အောင် ပြုလုပ်သုံးစွဲခြင်း ၊ မီတာမရောက်မီ အဝင်မှသုံးစွဲခြင်း( By Pass )၊ မီတာအဝင်ကြိုး ၊ အထွက်ကြိုး ခွထောက်သုံးစွဲ ခြင်း ၊ မီတာအဝင်ကြိုးနှင့်အထွက်ကြိုးပြောင်းပြန်တပ်ဆင်ခြင်း။
(ခ) ဆင့်ပွားဓာတ်အားဆက်သွယ်အသုံးပြုခြင်း ။
(ဂ) အထွေထွေအိမ်သုံးမီတာ ၊ အိမ်တွင်းသုံးပါဝါမီတာမှစီးပွားရေးလုပ်ငန်းလုပ်ကိုင်ခြင်း။
(ဃ) အသေးစားစက်မှုလက်မှု၊ စက်မှုလက်မှုနှင့်တစ်လုံးတစ်ခဲတည်း မီတာမှခွင့်ပြုဝန်အားထက် ပိုမိုသုံးစွဲခြင်း။
(င) မီတာအမျိုးမျိုးအား ပြုပြင်၍ဓာတ်အားခိုးယူသုံးစွဲခြင်း ( မီတာရှန့်လင့်များဖြုတ်ခြင်း ၊ မီတာ၏အတွင်းအစိတ်အပိုင်းအား ပြုပြင်ထားခြင်း၊ မီတာရှိဝက်အူ( Serew )များ လျော့ခြင်း။
(စ) စက်မှုလက်မှုလုပ်ငန်းများ လျှပ်စစ်ဓာတ်အားအသုံးမပြုရန် ကန့်သတ်တားမြစ်ထား သည့်အချိန်( ၁၇:၀၀ )နာရီမှ( ၂၃:၀၀ )နာရီအတွင်း လျှပ်စစ်ဓာတ်အားရယူ၍ စက်မှုလက်မှုလုပ်ငန်းများ အသုံးပြုခြင်း ၊ လျှပ်စစ်ဓာတ်အား မလုံလောက်မှုကြောင့် အလှည့်ကျ ဓာတ်အားပိတ်ထားသောအချိန်တွင် မိမိသဘောဖြင့် လျှပ်စစ်ဓာတ်အား ကို ရယူ၍ စက်မှုလက်မှုလုပ်ငန်းများ အသုံးပြုခြင်း။
(ဆ) လျှပ်စစ်ဓာတ်အားမလုံလောက်မှုကြောင့် အလှည့်ကျဓာတ်အားပိတ်ထားသောအချိန် တွင် မိမိသဘောဖြင့် လျှပ်စစ်ဓာတ်အားကိုရယူ အသုံးပြုခြင်း။
(ဇ) ဓာတ်အားလိုင်း( ၂ )လိုင်းနှင့် ဓာတ်အားလိုင်း( ၂ )လိုင်း အထက်ဆွဲထားခြင်း ။
(ဈ) အထွေထွေအိမ်သုံး ၊ အိမ်တွင်းပါဝါအသေးစားစက်မှုလက်မှု ၊ စက်မှုလက်မှု တစ်လုံး တစ်ခဲတည်း မီတာများတွင် ချို့ယွင်းမှုများ( Tampered )တရားမဝင်ပြုလုပ်ခြင်း ။
(ည) မီတာနှင့်တွဲဖက်သုံးစွဲထားသော Current Transformer ၊ Voltage Transformer များကိုလည်းကောင်း၊ မီတာနှင့် Current Transformer ၊ Voltage Transformer များကိုဆက်သွယ်ထားသော လျှပ်စစ်ပတ်လမ်း ( Electric Circuit ) ကိုလည်းကောင်း မူလအနေအထားမှ ပျက်ယွင်းအောင်ပြုပြင်မှု( Tampered )ပြုလုပ်ခြင်း ။
(ဋ) မီတာနှင့်တွဲဖက်သုံးစွဲထားသော Current Transformer ၊ Voltage Transformer များကိုလည်းကောင်း ၊ မီတာနှင့် Current Transformer ၊ Voltage Transformer များကို ဆက်သွယ်ထားသော လျှပ်စစ်ပတ်လမ်း( Electric Circuit )ကိုလည်းကောင်း၊ Tampered ပြုလုပ်ခြင်း မဟုတ်သည့် မီးသုံးသူ၏ ပယောဂမပါရှိဘဲ အကြောင်းတစ်စုံ တစ်ခုခုကြောင့် အားနည်းမှု ၊ ချို့ယွင်းမှု ၊ ပျက်စီးမှုဖြစ်ခြင်း ။

အထက်ပါ မသမာသောနည်းဖြင့် ဓာတ်အားသုံးစွဲသူများကြောင့် ဓာတ်အားပျောက်ဆုံးမှုများ ၊ ဗို့အားကျဆင်းမှုများ ၊ ထရန်စဖော်မာများမှာ ဝန်အားမနိုင်နင်းမှုကြောင့် လောင်ကျွမ်းပျက်စီးမှုများ ၊ ဓာတ်လိုက်မှုအန္တရာယ်များ ၊ မီးဘေးအန္တရာယ်များနှင့် နိုင်ငံတော်၏ လျှပ်စစ်ကဏ္ဍတွင် ဝင်ငွေ လျော့နည်းကျဆင်းမှုများ ဖြစ်ပေါ်နေသည့်အပြင် တရားမဝင် ဓာတ်အားသုံးစွဲသူ ပြည်သူများအတွက်လည်း အနှောင့်အယှက်ဖြစ်ပေါ်စေမည်ဖြစ်သည်ဟုဖော်ပြထားသည်၊၊

သို့ဖြစ်၍ " သက်ဆိုင်ရာမြို့နယ်များမှလည်း အဖွဲ့ဖြင့် ကွင်းဆင်းစစ်ဆေးမည်ဖြစ်ပြီး " အထက်အပိုဒ်( ၂ )ပါ တရားမဝင်ဓာတ်အား သုံးစွဲမှုနည်းလမ်းတစ်ခုခုကို ဖောက်ဖျက်ကျူးလွန် ကြောင်း စစ်ဆေးဖော်ထုတ်တွေ့ရှိပါက မီးသုံးစွဲသူကာယကံရှင်နှင့်အတူ ပူးပေါင်းကြံစည်ပါဝင် လုပ်ဆောင်သူများအား ဓာတ်အားဖြတ်တောက်ခြင်း ၊ လျော်ကြေးငွေကို တပ်ဆင်ဝန်အားအရ တွက်ချက်တောင်းခံခြင်းများ အရေးယူခံရမည်ဖြစ်သည့်အပြင် ( ၂၀၁၄ ) ခုနှစ် လျှပ်စစ်ဥပဒေပုဒ်မ ( ၅၂ )၊( ၅၃ )အရ အမှုဖွင့်တရားစွဲဆိုခြင်းခံရမည်ဖြစ်ပြီး ပြစ်မှုထင်ရှား စီရင်ခြင်းခံရလျှင် ငွေဒဏ်အပြင် အနည်းဆုံးငါးနှစ် မှ အများဆုံးဆယ်နှစ်အထိ ထောင်ဒဏ်ချမှတ်ခံရမည်ဖြစ်ကြောင်း ကြိုတင်အသိပေးအပ်ကြောင်း ထုတ်ပြန်ချက်တွင်ဖော်ပြထားသည်၊၊
ymg/tthl
#Yangon_Media_Group