#Local_News
Published_28 October 2022

ပြည်ထောင်စုကောင်းကျိုးဆောင်ပါတီကို ဖျက်သိမ်းခွင့်ပြုလိုက်ကြောင်း ရွေးကောက်ပွဲကော်မရှင်မှ အောက်တိုဘာ ၂၇ ရက်နေ့စွဲဖြင့် အသိပေးထုတ်ပြန်ထားသည်။

၂၀၂၂ ခုနှစ်၊ အောက်တိုဘာ ၁၁ ရက်တွင် ပါတီဖျက်သိမ်းရန်တင်ပြချက်နှင့်စပ်လျဉ်း၍ ကော်မရှင်မှ အောက်တိုဘာ ၂၅ ရက်နေ့တွင် ပြုလုပ်ခဲ့ပြီး အစည်းအဝေးဆုံးဖြတ်ချက်အရ ပြည်ထောင်စုကောင်းကျိုးဆောင်ပါတီကို မှတ်ပုံတင်ထားခြင်းကနေ ပယ်ဖျက်ခြင်းဖြစ်ကြောင်းသိရသည်။

ပြည်ထောင်စုကောင်းကျိုးဆောင်ပါတီကို ၂၀၁၉ ခုနှစ် ဧပြီ ၂၅ ရက်နေ့တွင် ပါတီမှတ်ပုံတင်ခွင့်ပြုခဲ့ခြင်းဖြစ်သည်။

သူရဦးရွှေမန်းကပြည်ထောင်စုကောင်းကျိုးဆောင်ပါတီဝင်တွေသည် ပါတီနိုင်ငံရေးဆက်လုပ်ရန် ဆန္ဒမရှိတော့ခြင်း၊ ပါတီခေါင်းဆောင်တွေ အသက်အရွယ်ကြီးရင့်လာခြင်း၊ ကျန်းမာရေးချို့တဲ့သူများရှိနေခြင်း အစရှိသည့် တခြားအခက်အခဲတွေကြောင့် ပါတီဖျက်သိမ်းရန် တင်ပြရခြင်းဖြစ်ကြောင်း ပြောကြားထားသည်။

#ymg/sth
#Yangon_Media_Group

#Local_News
Published _28 October 2022

သမားရိုးကျ စာကြည့်တိုက်အရင်းအမြစ်များ တည်ဆောက်မှုဆိုင်ရာ ကန့်သတ်ချက်များကို ကျော်လွှားပြီး ဒစ်ဂျစ်တယ်စာပေအရင်းအမြစ်များကို ဖန်တီးရန် အတွက်'မြန်မာနိုင်ငံဒစ်ဂျစ်တယ်စာကြည့်တိုက်တည်ဆောက်ရေးနှင့် စီမံခန့်ခွဲရေးဆိုင်ရာမွမ်းမံသင်တန်း'ဖွင့်လှစ်ခဲ့ကြောင်း မြန်မာနိုင်ငံဆိုင်ရာ တရုတ်သံရုံးမှ သိရသည်၊၊

အဆိုပါ သင်တန်းကို တရုတ်နိုင်ငံ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ ကြီးမှူးကျင်းပ၍ ယဉ်ကျေးမှုနှင့် ခရီးသွားလာရေး စီမံခန့်ခွဲမှု ဗဟိုအကယ်ဒမီမှ တာဝန်ခံကျင်းပပေးပြီးမြန်မာ သင်တန်းသား(၁၅)ဦးတက်ရောက်လျက်ရှိသည်၊၊

သင်တန်းကို အောက်တိုဘာလ( ၂၆ )ရက်နေ့တွင် အွန်လိုင်းမှ တစ်ဆင့်ဖွင့်လှစ်ခဲ့ပြီးသင်တန်းကာလ (၁၄)ရက်သတ်မှတ်ထားကာ စမတ်စာကြည့်တိုက်တည်ဆောက်မှု၊ တက္ကသိုလ်စာကြည့်တိုက်ဂေဟစနစ်တည်ဆောက်မှု စသည့်သင်ခန်းစာများ ပါဝင်မည်ဟုဆိုသည်၊၊

သင်တန်းဖွင့်ပွဲအခမ်းအနားတွင် မြန်မာနိုင်ငံဆိုင်ရာတရုတ်သံရုံး စီးပွားရေးသံမှူး Mr. Tan Shufu က"" ဒစ်ဂျစ်တယ်စာကြည့်တိုက်တည်ဆောက်ခြင်းသည် နိုင်ငံဖွံ့ဖြိုးတိုးတက်ရေးအတွက် ကြီးမားသော လက်တွေ့ကျသည့်အရေးပါမှု ဖြစ်ကြောင်း၊ ၎င်းသည် အသိပညာစီးပွားရေးအတွက် အရေးပါမှုဖြစ်ပြီး နိုင်ငံ၏ သတင်းအချက်အလက် အခြေခံအဆောက်အအုံ၏ အရေးပါအစိတ်အပိုင်းတစ်ခုဖြစ်ကာ အနာဂတ် စာကြည့်တိုက်များ ဖွံ့ဖြိုးတိုးတက်ရေး၏ ဦးတည်ချက်လားရာကြီး ဖြစ်ကြောင်း၊ မြန်မာနိုင်ငံသည် ရှည်လျားသောသမိုင်းကြောင်းရှိသည့် ရှေးဟောင်းယဉ်ကျေးမှုနိုင်ငံဖြစ်ပြီး ယဉ်ကျေးမှုအရင်းအမြစ်များ ကြွယ်ဝကာ ဂန္တဝင်စာပေများ များပြားလှကြောင်း၊ ဒစ်ဂျစ်တယ်စာကြည့်တိုက် ထူထောင်ခြင်းဖြင့် မြန်မာနိုင်ငံတွင် သမားရိုးကျစာကြည့်တိုက်အရင်းအမြစ်များ တည်ဆောက်မှုဆိုင်ရာ ကန့်သတ်ချက်များကို ကျော်လွှားပြီး ဒစ်ဂျစ်တယ်စာပေအရင်းအမြစ်များကို ဖန်တီးရန် အထောက်အကူဖြစ်စေကြောင်း၊ တရုတ်နိုင်ငံသည် မြန်မာနိုင်ငံအပါအဝင် ဖွံ့ဖြိုးဆဲနိုင်ငံများနှင့်အတူ ဒစ်ဂျစ်တယ်စာကြည့်တိုက် တည်ဆောက်ရေးနှင့် စီမံခန့်ခွဲရေး အတွေ့အကြုံများကို မျှဝေလိုပြီး နှစ်နိုင်ငံအကြား ယဉ်ကျေးမှုကူးလူးဖလှယ်ရေးနှင့် ဖွံ့ဖြိုးတိုးတက်ရေးကို အတူတကွမြှင့်တင်ရန် ဆန္ဒရှိကြောင်း "ပြောကြားခဲ့သည်။

မြန်မာနိုင်ငံ စီမံကိန်းနှင့် ဘဏ္ဍာရေးဝန်ကြီးဌာန၊ သာသနာရေးနှင့် ယဉ်ကျေးမှုဝန်ကြီးဌာန၊ ပြန်ကြားရေးဝန်ကြီးဌာန စသည့်ဝန်ကြီးဌာနများမှ သင်တန်းသား ၁၅ ဦး ဖွင့်ပွဲအခမ်းအနားသို့ တက်ရောက်ခဲ့ကြောင်းသိရသည်၊၊

ဒစ်ဂျစ်တယ်စာကြည့်တိုက်တည်ဆောက်ရေးနှင့် စီမံခန့်ခွဲရေးဆိုင်ရာ ခေတ်မီအတွေးအခေါ်များနှင့် အကောင်အထည်ဖော်မှုအတွေ့အကြုံများကို မျှဝေပေးသည့်အတွက် တရုတ်နိုင်ငံအား ကျေးဇူးတင်ရှိကြောင်း၊ သေသေချာချာ လေ့လာသင်ယူအသုံးချသွားမည်ဖြစ်ကြောင်း မြန်မာနိုင်ငံမှ သင်တန်းသားများက ပြောကြားခဲ့ကြောင်း မြန်မာနိုင်ငံဆိုင်ရာ တရုတ်သံရုံး၏ ထုတ်ပြန်ချက်အရသိရသည်၊၊

#ymg/tthl
#Yangon_Media_Group

#Local_News
Published_28 October2022

အာဆီယံနိုင်ငံခြားရေးဝန်ကြီးများ၏ အထူးအစည်းအဝေးတွင် မြန်မာနိုင်ငံက ပါဝင်ခြင်းမရှိဘဲ အာဆီယံ(၉)နိုင်ငံဖြင့်သာ ဆွေးနွေးသဘော တူညီခဲ့ခြင်းများမှာအာဆီယံပဋိညာဉ်စာတမ်းပါမူများနှင့်အညီ အဖွဲ့ဝင်နိုင်ငံ အားလုံး၏ တူညီဆန္ဒအရ ဆောင်ရွက်ခဲ့ခြင်း မဟုတ်သည့်အတွက် မြန်မာနိုင်ငံအနေနှင့် လိုက်ပါဆောင်ရွက်မည် မဟုတ်ကြောင်း နိုင်ငံခြားရေးဝန်ကြီးဌာနက ထုတ်ပြန်လိုက်သည်။

အင်ဒိုနီးရှားနိုင်ငံ၊ ဂျကာတာမြို့တွင် ၂၀၂၂ ခုနှစ်၊ အောက်တိုဘာလ ၂၇ ရက်နေ့က ကျင်းပခဲ့သည့် အာဆီယံနိုင်ငံခြားရေးဝန်ကြီးများ၏အထူးအစည်းအဝေးသို့ မြန်မာနိုင်ငံက နိုင်ငံရေးအရ ကိုယ်စား မပြုသည့် ပုဂ္ဂိုလ်ကိုသာ အာဆီယံဥက္ကဋ္ဌ ကမ္ဘောဒီးယားနိုင်ငံက ဖိတ်ကြားခဲ့ခြင်းဖြစ်ရာ ယင်းမှာ အာဆီယံပဋိညာဉ်စာတမ်း အပိုဒ်(၅)ပါ ပြဋ္ဌာန်းချက်ဖြစ်သည့် အဖွဲ့ဝင်နိုင်ငံများ အကြား အဆင့်တူတန်းတူ ကိုယ်စားပြုရေးမူနှင့် သွေဖည်နေသည့်အတွက် မတက်ရောက်ခဲ့ကြောင်းလည်း ယင်းထုတ်ပြန်ချက်တွင် ဖော်ပြထားသည်။

အာဆီယံပဋိညာဉ်စာတမ်းအရ အာဆီယံ အဖွဲ့ဝင်နိုင်ငံ အားလုံး တန်းတူ ညီတူ ကိုယ်စားပြုရေး “မူ” နှင့် တစ်နိုင်ငံ၏ ပြည်တွင်းရေးကို ဝင်ရောက် မစွက်ဖက်ရေး “မူ”တို့ကို မြန်မာနိုင်ငံအနေနှင့် ခိုင်မာစွာ လိုက်နာလျက်ရှိသော်လည်း ယခုကဲ့သို့ ခွဲခြားဆက်ဆံသည့် လုပ်ရပ်များကို လက်ခံနိုင်ခြင်းမရှိကြောင်းလည်း ဖော်ပြထားသည်။

အာဆီယံသည် စည်းမျဉ်းကို အခြေခံသည့် အဖွဲ့အစည်း ဖြစ်၍ အာဆီယံ ပဋိညာဉ်စာတမ်းတွင် ဖော်ပြထားသည့် ပြဋ္ဌာန်း ချက်များကို တိတိကျကျ လေးစားလိုက်နာရန် လိုအပ်ပြီး အဖွဲ့ဝင်နိုင်ငံများ၏ ဂုဏ်သိက္ခာနှင့် အချုပ်အခြာအာဏာကို လေးစားကာ နိုင်ငံတစ်နိုင်ငံ၏ ပြည်တွင်းရေးကို တစ်နိုင်ငံက ဝင်ရောက်မစွက်ဖက်ရန် အထူးလိုအပ်ကြောင်းလည်း ယင်းထုတ်ပြန်ချက်တွင် ရေးသားထားသည်။

နစက အနေဖြင့် ၂၀၂၁ ခုနှစ် ဖေဖော်ဝါရီလ တစ်ရက်နောက်ပိုင်းကပင် ရှေ့လုပ်ငန်းစဉ်(၅)ရပ် ချမှတ်၍ ဒီမိုကရေစီ ပြန်လည်ဖော်ဆောင်ရေးအတွက် ကြိုးပမ်းဆောင်ရွက်လျက်ရှိသည့်အပြင် အာဆီယံ၏ တာဝန်သိအဖွဲ့ဝင်နိုင်ငံတစ်နိုင်ငံအဖြစ် တူညီဆန္ဒ(၅)ချက် အကောင်အထည်ဖော်ခြင်းကို အာဆီယံ ဥက္ကဋ္ဌ၏ အထူးကိုယ်စားလှယ်နှင့် အပြုသဘော နီးကပ်စွာ ပူးပေါင်းဆောင်ရွက်လျက်ရှိကြောင်း၊တိုင်းရင်းသား လက်နက်ကိုင်အဖွဲ့များ၊ နိုင်ငံရေးပါတီများ၊ ငြိမ်းချမ်းရေးကို လိုလားသည့်အဖွဲ့အစည်းများနှင့် တွေ့ဆုံကာ ပွင့်လင်းစွာ ဆွေးနွေးလျက်ရှိကြောင်းလည်း ထုတ်ပြန်ချက်က ဆိုသည်။

လက်ရှိတွင် မြန်မာနိုင်ငံ၏ ရှေ့လုပ်ငန်းစဉ်(၅)ရပ်ကို အကောင်အထည်ဖော်ရာတွင်သိသာထင်ရှားသည့် တိုးတက်မှုများ ရရှိလျက်ရှိသည့်အပြင် အာဆီယံ တူညီဆန္ဒ(၅)ချက်တွင် ပါဝင်သည့် လူသားချင်းစာနာထောက်ထားမှု အကူအညီများ ပေးအပ်ရေး ကိစ္စပထမအဆင့်ကိုလည်း AHA စင်တာကို ပူးပေါင်းပံ့ပိုးလျက်ရှိပြီး အကူအညီလိုအပ်နေသူများ ထံသို့ခွဲခြားမှုမရှိဘဲ မျှတစွာရရှိရေးနှင့် အကူအညီပေးအပ်သည့် စေတနာ့ဝန်ထမ်းများ၏ ဘေးကင်းလုံခြုံရေးကို အလေးထား၍ ဆောင်ရွက်လျက်ရှိကာ ဒုတိယအဆင့် အကူအညီများ ပံ့ပိုးနိုင်ရေးအတွက် လျက်မြန်စွာဆက်လက်ဆောင်ရွက်သွားမည်ဟုလည်း သိရသည်။

ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စုစနစ်ကို တည်ဆောက်ရန် ကြိုးပမ်းနေမှုအပေါ် တစ်ဖက်က အဖျက်အမှောင့်လုပ်ရပ်များ၊ အကြမ်းဖက်လုပ်ရပ်များ လုပ်ဆောင်၍ ဖျက်ဆီးလျက်ရှိနေသော်လည်း မြန်မာနိုင်ငံအနေဖြင့် အာဆီယံတူညီဆန္ဒ (၅)ချက်ကို အကောင်အထည်ဖော် လျက်ရှိကြောင်း၊ ယင်းသို့ အကောင်အထည်ဖော်သည့်လုပ်ငန်းကိုလုပ်ဆောင်နေသည့်အပေါ် အချိန်ကန့်သတ်ချက်ဖြင့် ဖိအားပေး၊ အကြပ်ကိုင် သည့် ချဉ်းကပ်မှုမျိုးလုပ်ဆောင်ခြင်းမှာ အကျိုးမရှိနိုင်သည့်အပြင်၊ ဆိုးကျိုးသက်ရောက်မှုများကိုပင် ဦးတည်သွားစေနိုင်ကြောင်းလည်း အဆိုပါ ထုတ်ပြန်ချက်တွင် ဖော်ပြထားသည်။

လက်ရှိတွင် အင်အားကြီးနိုင်ငံများ၏ အားပြိုင်မှု၊ ပထဝီနိုင်ငံရေးနှင့် ပထဝီစီးပွားရေးဆိုင်ရာ ကိစ္စများအားပြိုင်မှုများ အရှိန်မြှင့်တက်နေသော်လည်း အာဆီယံအနေဖြင့် ခိုင်မာသော အဖွဲ့ အစည်းအဖြစ် တည်ရှိရန် အာဆီယံ၏ စည်းလုံးညီညွတ်မှုနှင့် အချက်အခြာကျမှုတို့ကို ထိန်းသိမ်းရန် အရေးတကြီးလိုအပ်ကြောင်းလည်း ဖော်ပြထားသည်။

#ymg/mt
#Yangon_Media_Group

#Local_News
Published_27 October 2022

ရန်ကုန်တိုင်းဒေသကြီး၊ သီလဝါဆိပ်ကမ်းရှိ Terminal တွေမှာ စက်သုံးဆီဂါလန် ၆ သန်းကျော် ဆိပ်ကမ်းချထားပြီး ဂါလန်၁၄ သန်းကျော်ကို ဆီချခြင်းလုပ်ငန်းဆက်လက် ဆောင်ရွက်သွားမယ်လို့ စက်သုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီကနေ သိရပါတယ်။

#Yangon_Media_Group

#Local_News
Published_27 October 2022

စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက စားအုန်းဆီတင်သွင်းတဲ့သူတွေကို တစ်ဒေါ်လာ (၂,၄၀၃) ကျပ် သတ်မှတ်ပေးထားတယ်လို့ သိရပါတယ်။

#Yangon_Media_Group

#Local_News
Published _27 October 2022

မီးရထားလမ်းတွေ အဆင့်မြှင့်တင်တဲ့လုပ်ငန်းတွေ ဆောင်ရွက်နေပြီး နှစ်လမ်းသွားကို တစ်လမ်းပြုပြင်နေပြီး ပြုပြင်နေချိန်မှာ တစ်လမ်းထဲကပဲ အသုံးပြုသွားလာမှာဖြစ်တယ်လို့ သိရပါတယ်၊၊

#Yangon_Media_Group