#DailyNews
Published _ 27 October 2022

၁။ ထိတွေ့တိုက်ပွဲများအပြီး မြဝတီနယ်စပ်ကုန်သွယ်ရေး ပုံမှန်လည်ပတ်လျက်ရှိနေ

၂။ မီးရထားလမ်းများအဆင့်မြှင့်တင်နေ၊ ပြုပြင်နေချိန်တွင် နှစ်လမ်းသွားကိုတစ်လမ်းပဲ အသုံးပြုသွားလာမည်ဟုဆို

၃။ စားအုန်းဆီတင်သွင်းသူတွေကို တစ်ဒေါ်လာ (၂,၄၀၃) ကျပ် သတ်မှတ်ပေးထား

၄။ လျှပ်စစ်မော်တော်ကားများအတွက် တရုတ်နိုင်ငံအနှံ အားသွင်းနေရာအများအပြား တည်ဆောက်လာ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published_27 October 2022

ကျိုက်ထီးရိုးဘုရားဖူးတွေကို တန်ဆောင်တိုင်အတွက် အတွက် နေစားငြိမ်း နှစ်ရက်သတ်မှတ်ထားပါတယ်။

#Yangon_Media_Group

#Local_News
Published_ 27 October 2022

တရုတ်နိုင်ငံကို ပြောင်းတင်ပို့ခွင့်ရရှိထားသည့် မြန်မာကုမ္ပဏီပေါင်း ၁၀၀ ကျော်မှ (၉)လအတွင်း ပြောင်းဖူးတန်ချိန် (၁၀၀၀) ကျော်ကို တင်ပို့ရောင်းချခဲ့ကြောင်း တရုတ်သံရုံးက ထုတ်ပြန်ထားသည်။

တရုတ်အကောက်ခွန် ထွေ/အုပ်အာဏာပိုင်အဖွဲ့(GACC) နှင့် စိုက်ပျိုးရေးဝန်ကြီးဌာန(မြန်မာ)တို့အကြား ယခုနှစ် ဇန်နဝါရီလတွင် Plant Quarantine Protocol ကို နှစ်နိုင်ငံအစိုးရအချင်းချင်း လက်မှတ်ရေးထိုးခဲ့ပြီးနောက် တင်ပို့ခွင့်ရရှိခဲ့သည့် တန်ချိန်ပမာဏဖြစ်ကြောင်း သိရသည်။

စီးပွား/ကူးသန်း၏ ဖော်ပြထားသည့်စာရင်းတွေအရ ၂၀၂၀-၂၀၂၁ ခုနှစ်တွင် တရုတ်နိုင်ငံကို မြန်မာနိုင်ငံမှ လယ်ယာထွက်ကုန်ပစ္စည်း၊ တိရိစ္ဆာန် ထွက်ပစ္စည်းနှင့် ရေထွက်ပစ္စည်းတင်ပို့မှုအနေဖြင့်ကန်ဒေါ်လာသန်း ၅ ဒသမ ၄ ဘီလီယံကျော် တင်ပို့နိုင်ခဲ့ကြောင်း သိရသည်။

မြန်မာ့ပြောင်းတွေကို ထိုင်းနိုင်ငံအပါအဝင် အခြားနိုင်ငံတွေကို တင်ပို့နေပြီးယခုနှစ် ပြောင်းရာသီတွင် တရုတ်နိုင်ငံအကောက်ခွန် အထွေထွေအုပ်ချုပ်မှု အာဏာပိုင်အဖွဲ့(GACC) မှာ မှတ်ပုံတင်ထာသည့် ပြောင်းတွေကို နယ်စပ်ဒေသမှတစ်ဆင့် တရုတ်နိုင်ငံကို တင်ပို့ခြင်းဖြစ်ကြောင်း သိရသည်။

#ymg/sth
#Yangon_Media_Group

#Local_News
Published_27 October 2022

ပြင်ပဈေးကွက်အတွင်း နိုင်ငံခြားငွေလဲလှယ်နှုန်းမှာ တစ်ဒေါ်လာကို ကျပ် ၃၀၀၀ ဝန်းကျင်ဖြင့် ဈေးငြိမ်နေကြောင်းငွေကြေးဈေးကွက်အတွင်းမှ သိရသည်။

ပြီးခဲ့သည့် ရက်ပိုင်းအတွင်းက လှုပ်လှုပ်ခတ်ခတ်ဖြစ်သွားခဲ့သည့် ဒေါ်လာဈေးကွက်သည် ပြန်လည်တည်ငြိမ်လာပြီး ဈေးကွက်အတွင်း အရောင်းအဝယ် ရှိခဲ့ကြောင်း သိရသည်။

ယနေ့ အောက်တိုဘာလ ၂၇ ရက်တွင်ပြင်ပ ဈေးကွက်မှာတစ်ဒေါ်လာကို အဝယ်ဈေး ကျပ် ၂၉၇၀ ကျပ်ဖွင့်လှစ်ခဲ့ပြီး အရောင်းဈေးမှာတော့ ၃၀၂၀ ကျပ်ဖြင့်ဈေးကွက်ဖွင့်လှစ်ခဲ့ကြောင်း သိရသည်။

မြန်မာအနေဖြင့် နိုင်ငံတကာ ငွေကြေးဈေးကွက်၏ အမည်ပျက်စာရင်းမှာ ထည့်သွင်းခံရပြီးနောက် ပြည်တွင်းဒေါ်လာငွေလဲလှယ်နှုန်း ကမောက်ကမဖြစ်ခဲ့ပြီး ဈေးကွက်အတွင်း ဒေါ်လာဈေးဟာလည်း မြင့်တက်ခဲ့ခြင်းဖြစ်သည်။

လက်ရှိတွင်လည်း ဗဟိုဘဏ်အနေဖြင့် အမည်ပျက်စာရင်းသွင်းခံရမှုအပေါ်စိုးရိမ်မှုမလွန်ကဲစေရန်နှင့် ၎င်းကိုအကြောင်းပြု၍ ဈေးကစားခြင်းပြုလုပ်ပါက အရေးစယူဆောင်ရွက်မည်ဖြစ်ကြောင်း အသိပေးထုတ်ပြန်ထားသည်။

#ymg/sth
#Yangon_Media_Group

#Local_News
Published_ 27 October 2022

ကျေးလက်နေပြည်သူများ လူနေမှုအဆင့်အတန်း မြင့်မားလာရေးနှင့် ကျေးလက်စီးပွားရေး မြင့်မားလာစေရေးအတွက် SMART Village စီမံကိန်းကို ယခုနှစ်တွင် မြို့နယ်(၄၂)မြို့နယ်ရှိ ကျေးရွာ(၄၄)ရွာ၌ တိုးချဲ့ ဆောင်ရွက်လျက်ရှိကြောင်း သမဝါယမ နှင့် ကျေးလက်ဖွံ့ဖြိုးရေးဝန်ကြီး ဦးလှမိုးရဲ့ ပြောကြားချက်အရ သိရပါတယ်။

ကျေးလက်ဒေသ ဖွံ့ဖြိုးတိုးတက်ရေး ဦးစီးဌာန၏ ၂၀၂၂-၂၀၂၃ ဘဏ္ဍာရေးနှစ် ပထမ(၆)လပတ် လူမှုစီးပွားဖွံ့ဖြိုးရေးလုပ်ငန်းများ ညှိနှိုင်းအစည်းအဝေးတွင် ဝန်ကြီးက ပြောကြားခဲ့တာပါ။ ထို့ပြင် ဦးစီးဌာနက ဆောင်ရွက်ပေးနေတဲ့ ကျေးလက်ရေရရှိရေး၊ ကျေးလက် မီးလင်းရေး၊ ကုန်ထုတ်လမ်း၊ တံတားလုပ်ငန်းများ၊ ကျေးရွာဖွံ့ဖြိုးရေးစီမံကိန်း (VDP)၊ Cash for Work စီမံကိန်းများသည် ကျေးလက်နေပြည်သူများ လူနေမှု အဆင့်အတန်းမြင့်မားရေးအတွက်အဓိကအရေးပါတဲ့လုပ်ငန်းများဖြစ်တယ်လို့ ဆိုပါတယ်။

ထို့ပြင်ဝန်ကြီးက မြစိမ်းရောင်ကျေးရွာစီမံကိန်း၊ ကျေးလက်စီးပွားမြင့်မားရေး စီမံကိန်း၊ ကျေးလက် အသက်မွေးဝမ်းကျောင်း သင်တန်းများသည်လည်း ကျေးလက်နေ ပြည်သူများ မိသားစုဝင်ငွေတိုးပွားရေးနှင့် ကျေးလက်စီးပွားမြင့်မားရေးကို ဖော်ဆောင်ပေးနိုင်သည့်အတွက် ပိုမိုအောင်မြင်အောင် ဆောင်ရွက်ကြဖို့ တိုက်တွန်းခဲ့ပါတယ်။

ထို့နောက်ဝန်ကြီးက ကျေးလက်ဒေသ ဖွံ့ဖြိုးရေးဆိုင်ရာလုပ်ငန်း လမ်းညွှန်ချက် များကို အမြန်ဆုံးပြီးမြောက် အောင်မြင်စွာ အကောင်အထည်ဖော် ဆောင်ရွက်နိုင်ခဲ့တဲ့ ရှမ်းပြည်နယ် (တောင်ပိုင်း) ဦးစီးမှူးနှင့် မြစိမ်းရောင်ကျေးရွာစီမံကိန်း အကောင်အထည် ဖော် ဆောင်ရွက်နိုင်မှု ပထဆုရရှိ သည့် ပဲခူးတိုင်းဒေသကြီး ဦးစီးမှူးတို့ကို လည်းကောင်း၊ ဒုတိယဝန်ကြီးက မြစိမ်းရောင်ကျေးရွာ စီမံကိန်း အကောင်အထည်ဖော် ဆောင်ရွက်နိုင်မှု ဒုတိယဆုရရှိရသည့် ဧရာဝတီတိုင်းဒေသကြီး ဦးစီးမှူးနှင့် တတိယဆု ရရှိတဲ့ ကရင်ပြည်နယ်ဦးစီးမှူးတို့ကို ဂုဏ်ပြုဆုတံဆိပ်များ ပေးအပ်ချီးမြှင့်ခဲ့ပါတယ်။

#ygm_mnn
#Yangon_Media_Group

#Local_News
Published _ 27 october 2022

ရခိုင်ပြည်နယ်၊ စစ်တွေပွိုင့်ကမ်းခြေမှာ ရေနစ်ပျောက်ဆုံးခဲ့သည့် ကလေးငယ် ၃ဦးအနက် နောက်ဆုံးကျန်ရှိသည့် ကလေးငယ်ရဲ့ ရုပ်အလောင်းကို ယနေ့ အောက်တိုဘာလ ၂၇ရက်မှာ ပြန်လည်တွေ့ရှိခဲ့ကြောင်း မေတ္တာရောင်ခြည်ဖောင်ဒေးရှင်းမှ သိရှိရသည်။

ပြီးခဲ့သည့် အောက်တိုဘာလ ၂၂ရက်က စစ်တွေမြို့ရှိ စစ်တွေပွိုင့်ကမ်းခြေအနီးမှာ ရေနစ်ပျောက်ဆုံးသွားခဲ့သည့် ကလေးငယ် ၃ဦးဖြစ်တဲ့ မောင်အောင်လင်းသူ၊ မောင်ဟိန်းထက်ဝင်းနိုင်နှင့် မောင်ဇွဲဘုန်းပြည့်တို့အား ရှာဖွေကယ်ဆယ်ရေးလုပ်ငန်းများ ဆောင်ရွက်ခဲ့ခြင်းဖြစ်သည်။

ယနေ့ အောက်တိုဘာလ ၂၇ရက် နေ့လည် ၁၂နာရီဝန်းကျင်ခန့်၌ နောက်ဆုံးကျန်ရှိတဲ့ ကလေးငယ် မောင်အောင်လင်းသူရဲ့ ရုပ်အလောင်းကို ကျေးတောပိုက်ဆိပ်အနီးမှာ ရှာဖွေတွေ့ရှိခဲ့ကြောင်း အသင်းထံမှသိရသည်။

ရေနစ်ပျောက်ဆုံးသွားပြီး ပြန်လည်တွေ့ရှိခဲ့သည့် မောင်အောင်လင်းသူရဲ့ ရုပ်အလောင်းကို စစ်တွေဆေးရုံသို့ ပို့ဆောင်ခဲ့ပြီး ပြီးခဲ့သော အောက်တိုဘာလ ၂၄ရက်တွင်လည်း ရေနစ်ပျောက်ဆုံးခဲ့ကြသည့် မောင်ဇွဲဘုန်းပြည့်နှင့် မောင်ဟိန်းထက်ဝင်းနိုင်တို့၏ ရုပ်အလောင်းများအား ရှာဖွေတွေ့ရှိခဲ့ကြောင်း သိရှိရသည်။

#ymg/NN
#Yangon_Media_Group