#LocalNews
Published -22 Feb 2022
ရန်ကုန်တိုင်းဒေသကြီး မင်္ဂလာဒုံမြို့နယ် ဇေကမ္ဘာဝင်းအတွင်းရှိ ပုဂ္ဂလိကရှေးဟောင်းပြတိုက် ဇေကမ္ဘာ Museum သို့ မြန်မာနိုင်ငံဆိုင်ရာ နိုင်ငံတကာသံအမတ်များ ယနေ့ ဖေဖော်ဝါရီလ ၂၂ ရက်တွင် လာရောက်လေ့လာခဲ့ကြကြောင်း သိရသည်။
"ရုရှားသံအမတ်ကြီးက ဦးဆောင်ပြီးတော့ လာကြတာဖြစ်ပါတယ်။ ကိုရီးယားနိုင်ငံသံအမတ်ကြီး၊အင်ဒိုနီးရှားသံရုံးယာယီတာဝန်ခံ၊ကမ္ဘောဒီးယားသံအမတ်ကြီး၊ထိုင်းနိုင်ငံသံအမတ်ကြီး၊မလေးရှားသံအမတ်ကြီး၊ဘရူနိုင်းသံအမတ်ကြီး၊ဆော်ဒီနိုင်ငံ သံအမတ်ကြီးနဲ့ ဒုတိယသံအမတ်ကြီးတို့ လာကြတာပါ။ပြတိုက်မှာ ပြသထားတဲ့ ရှေးဟောင်းလက်ရာတွေ၊ရှေးဟောင်းပစ္စည်းတွေကို စိတ်ဝင်စားကြတယ်"ဟု အဆိုပါ ပြတိုက်တာဝန်ရှိသူက YMG ကို ပြောသည်။
ဇေကမ္ဘာ Museum မှာ မြန်မာနိုင်ငံတွင် ပထမဆုံး ပုဂ္ဂလိကရှေးဟောင်းပြတိုက်ဖြစ်ပြီး ပြတိုက်၏ မြေညီထပ်တွင် နှစ်သန်းပေါင်းများစွာက ကမ္ဘာလိပ်များ၏ ကျောက်ဖြစ်ရုပ်ကြွင်းများ၊ ပုံတောင်ပုံညာ လူသားဖြစ်စဉ်ပြကွက်ဖြစ်သည့် ကျောက်ခေတ်၊ ကြေးခေတ်၊ သံခေတ်၊ ပျူခေတ်တို့တွင် လူသားများ ရှင်သန်နေထိုင်ပုံပြကွက်များ၊ ခေတ်အလိုက်အသုံးပြုခဲ့ကြသည့် လက်နက်နှင့် အသုံးအဆောင်ပစ္စည်းများကို ပြသထားသည်။
ယင်းအပြင် ကြေးခေတ်က လူ့အလောင်း ၂ လောင်း ၊ ပျူခေတ်က လူ့အလောင်း ၁ လောင်းတို့ကိုလည်း ပြကွက်တစ်ခုအဖြစ် သီးသန့်ပြသထားကြောင်း၊ဆင် ၅ မျိုးပြခန်း၊ မိကျောင်း ကျောက်ဖြစ်ရုပ်ကြွင်းပြခန်း၊ တောင်ဆိတ် ဦးချိုပြခန်း၊ လိပ်၊ ခရု စသည့် ရေသတ္တဝါ ကျောက်ဖြစ်ရုပ်ကြွင်းပြခန်းများနှင့် ကမ္ဘာ့ ပယင်းလောကတွင် ဘားမိုက် (Burmite) ဟု နာမည်ကျော်ကြားသည့် ကချင်ပြည်နယ်၊ ဟူးကောင်းဒေသထွက် မြန်မာ့ပယင်းများပါသည့် ပယင်းပြခန်းတို့ကိုလည်း ပြသထားသည်။
အဆိုပါပြတိုက်ကြီးကို ရန်ကုန်တိုင်းဒေသကြီး မင်္ဂလာဒုံမြို့နယ် မင်္ဂလာဒုံဂေါက်ကွင်းရှေ့ မြေ ၅ ဧကပေါ်တွင် စတုရန်းပေ ၁၆၀,၀၀၀ ကျယ်ဝန်းသည့် လေးထပ်အဆောက်အအုံအဖြစ် အမေရိကန်ဒေါ်လာ ၁၀ သန်းခန့် သုံးစွဲတည် ဆောက်နေခြင်းလည်း ဖြစ်သည်။
ymg/mt
#Yangon_Media_Group
#Local_news
Published_ 22 Feb 2022
တောင်ကိုရီးယားနိုင်ငံ ဆိုလ်းမြို့မှ မြန်မာအပြည်ပြည်ဆိုင်ရာလေကြောင်းလိုင်း (MAI) ကယ်ဆယ်ရေးလေယာဉ်ဖြင့် မြန်မာနိုင်ငံသား ၅၆ ဦးအား ဒီကနေ့ ဖေဖော်ဝါရီ ၂၂ ရက်တွင် ပြန်လည်ပို့ဆောင်ပေးခဲ့ကြောင်း သိရပါတယ်။
ကိုဗစ်-၁၉ ကူးစက်ရောဂါဖြစ်ပွားနေသည့်ကာလအတွင်း မြန်မာနိုင်ငံသို့ ပြန်လည် ထွက်ခွာ/ သွားရောက်ရန် စောင့်ဆိုင်းနေကြသည့် မြန်မာနိုင်ငံသားများနှင့် နိုင်ငံခြားသားများအတွက် မြန်မာသံရုံး၊ ဆိုးလ်မြို့မှ တစ်ပတ်လျှင်တစ်ကြိမ် ကယ်ဆယ်ရေးလေယာဉ် ပျံသန်းပြေးဆွဲနိုင်ရေး စီစဉ်ပေးလျက်ရှိရာတွင် မြန်မာအပြည်ပြည်ဆိုင်ရာ လေကြောင်းလိုင်း (MAI) ဖြင့် (၉၇) ကြိမ်မြောက် ကယ်ဆယ်ရေးလေယာဉ် ပျံသန်းပြေးဆွဲရန် စီစဉ်ပေးခဲ့ခြင်းဖြစ်တယ်လို့ ဆိုပါတယ်။
အဆိုပါလေယာဉ်သည် အင်ချွန်းအပြည်ပြည်ဆိုင်ရာလေဆိပ်မှ ရန်ကုန် အပြည်ပြည်ဆိုင်ရာလေဆိပ်သို့ ဒေသစံတော်ချိန် ၄ နာရီခွဲခန့်တွင် ထွက်ခွာခဲ့ပြီး၊ ဘရာဇီးမှ (၃) ဦး၊ ကနေဒါမှ (၂) ဦး၊ အမေရိကန်ပြည်ထောင်စုမှ (၁၄) ဦး၊ ကိုရီးယား သမ္မတနိုင်ငံမှ မြန်မာနိုင်ငံသား (၃၇) ဦး၊ စုစုပေါင်း (၅၆) ဦးတို့ စီးနင်းလိုက်ပါခဲ့ပါတယ်။
လိုက်ပါမယ့် ခရီးသည်များ လေဆိပ်မှာ အခက်အခဲတစ်စုံတစ်ရာမရှိစေရေးအတွက် မြန်မာသံရုံး၊ ဆိုးလ်မြို့မှ သံရုံးဝန်ထမ်းများက လေဆိပ်သို့သွားရောက်၍ လိုအပ်သည်များ ကူညီဆောင်ရွက်ပေးခဲ့ကြတယ်လို့ ဆိုပါတယ်။
ymg-mnn
#Yangon_Media_Group
#Local_News
Published_ 22 Feb 2022
တိုင်းရင်းဆေးကို အသုံးပြုပြီး ကိုဗစ်-၁၉ ရောဂါကို ကာကွယ်ကုသနိုင်ဖို့အတွက် သုတေသနဆောင်ရွက်ရာမှာ တိုးတက်မှုတွေရရှိနေတယ်လို့ နစကဥက္ကဋ္ဌက ‘မြန်မာနိုင်ငံကျန်းမာရေးဆိုင်ရာ သုတေသနညီလာခံ' အမှာစကားမှာ ထည့်သွင်းပြောကြားခဲ့ပါတယ်။
သုတေသနပြုလုပ်ပြီး တိကျခိုင်မာတဲ့ အချက်အလက်တွေ ထွက်ပေါ်လာခဲ့ရင် တိုင်းရင်းဆေးကိုအသုံးပြုပြီး ကိုဗစ်-၁၉ ရောဂါကို ကာကွယ်ကုသနိုင်မှာဖြစ်ပြီး မိမိတို့ပြည်သူများအတွက် များစွာအကျိုးရှိမှာဖြစ်ပါတယ်လို့ ဗိုလ်ချူပ်မှူးကြီးမင်းအောင်လှိုင်က ပြောကြားခဲ့ပါတယ်။
သုတေသီတွေကိုယ်တိုင်ကလည်း မိမိတို့ သုတေသနရလဒ်တွေရဲ့ အရေးပါပုံကို သေချာစွာ သိရှိနားလည်ပြီး သုတေသနကျင့်ဝတ်တွေကို တိကျစွာ လိုက်နာဆောင်ရွက်ဖို့ လိုအပ်တယ်ဆိုတာကို အမြဲမပြတ် သတိပြုရမှာဖြစ်တယ်လို့ ၎င်းကဆိုပါတယ်။
တိုင်းရင်းဆေးသုတေသနတွေက ပြည်သူတွေ လက်တွေ့အကျိုးရှိစေရေးနှင့် တိုင်းရင်းဆေးဝါးတွေကို နိုင်ငံတာကာ အထိ ထိုးဖောက်ရောက်ရှိရေးအတွက် တိကျခိုင်မာတဲ့ သုတေသနပြုအချက်အလက်တွေ ပိုမိုရရှိဖို့ တိုင်းရင်းဆေးပညာဦးစီးဌာနဟာ တိုင်းရင်းဆေးပညာရှင်တွေနှင့် ပူးပေါင်းဆောင်ရွက်သင့်တယ်လို့လည်း သူကအကြံပြုပါတယ်။
ကိုဗစ်တတိယလှိုင်းကာလမှာ တရုတ်နိုင်ငံနှင့် ထိုင်းနိုင်ငံတို့ကထုတ်လုပ်တဲ့ ယင်းတို့ရဲ့တိုင်းရင်းဆေးတွေဟာ မြန်မာနိုင်ငံဈေးကွက်ထဲကို ရောက်ရှိလာခဲ့ပြီး ရောဂါခံစားရသူတွေ သုံးစွဲခဲ့ကြတာတွေရှိခဲ့ပါတယ်။ဒါပေမယ့် အဲဒီဆေးတွေရဲ့အကျိုးအာနိသင်နှင့် ဘေးထွက်ဆိုးကျိုးများနှင့်ပတ်သက်တဲ့ နောက်ဆက်တွဲ သတင်းအချက်အလက်များကိုတော့ မသိရှိခဲ့ကြရပါဘူး။
၂၀၂၀ ပြည့်နှစ် မတ် ၂၃ ရက်နေ့မှာ ကိုဗစ်-၁၉ ရောဂါပိုး မြန်မာနိုင်ငံကို စတင်တွေ့ရှိပြီးချိန်မှစလို့ ဆေးသုတေသနဦးစီးဌာနအနေနဲ့ ဗိုင်းရပ်စ်ပိုးရဲ့ မျိုးရိုးဗီဇ အစီအစဉ်တစ်ခုလုံးကို လေ့လာနိုင်ရေး ကြိုးပမ်းဆောင်ရွက်ခဲ့ကြောင်း သိရပါတယ်။
ymg-mnn
#Yangon_Media_Group
#LocalHealth
Published -22 Feb 2022
ရခိုင်ပြည်နယ်၊ ကျောက်ဖြူမြို့မှ လေယာဉ်စီးနင်းလိုက်ပါမယ့် ခရီးသည်များကို ကိုဗစ် ရောဂါပိုးရှိ/မရှိ R.D.T test kit နဲ့ ဖေဖော်ဝါရီလ ၂၁ ရက်မွန်းလွဲပိုင်းက ခရိုင်ပြည်သူ့ကျန်းမာရေးဦးစီးဌာနရုံးဝင်းတွင်စစ်ဆေးရာ ခရီးသည်လေးဦးတွင် ကိုဗစ်ရောဂါပိုးတွေ့ရှိခဲ့တယ်လို့ သိရပါတယ်။
ဖေဖော်ဝါရီ ၂၁ ရက်နေ့ ယနေ့တွင် ကျောက်ဖြူမြို့မှ လေကြောင်းလိုင်းနဲ့ လိုက်ပါမယ့်ခရီးသည် (၃၈) ဦးအား စစ်ဆေးပေးခြင်းဖြစ်ပြီး ၎င်းတို့အထဲမှ အမျိုးသားနှစ်ဦးနှင့် အမျိုးသမီးနှစ်ဦးတို့မှာ ရောဂါပိုးတွေ့ရှိခဲ့တာကြောင့် ခရိုင်ပြည်သူ့ဆေးရုံကြီးရှိ ပိုးတွေ့လူနာဆောင်သို့ ကြက်ခြေနီတပ်ဖွဲ့ဝင်များမှ လိုက်ပါပို့ဆောင်ပေးခဲ့တယ်လို့ သိရပါတယ်။
ရောဂါပိုးမတွေ့ရှိသူများအား ကိုဗစ်-၁၉ ရောဂါကင်းရှင်းကြောင်း အသိအမှတ်ပြုလက်မှတ်များ ပေးအပ်ခဲ့တယ်လို့ ခရိုင်ပြည်သူ့ကျန်းမာရေးဦးစီးဌာနမှူးရုံးမှ တာဝန်ရှိသူတစ်ဦးက ပြောပါတယ်။
"ယခုရက်ပိုင်းမှာ လေယာဥ်စီးခရီးသည်တွေ ပုံမှန်စစ်ဆေးတာတွေလုပ်နေပါတယ် ပိုးတွေသူတွေကိုတော့ ဆေးရုံတက်ရောက်စေပြီး မတွေ့သူတွေကို ရောဂါကင်းရှင်းကြောင်းလက်မှတ်ထိုးပြီး လေယာဥ်နဲ့ လိုက်ပါခွင့်ပြုပါတယ်"လို့ ခရိုင်ကျန်းမာရေးဦးစီးဌာနက တာဝန်ရှိသူတစ်ဦးက ပြောပါတယ်။
ကျောက်ဖြူမြို့တွင်၂၀၂၁ ခုနှစ်ဇူလိုင်လ ၃ ရက်နေ့မှ ၂၀၂၂ ခုနှစ်ဖေဖော်ဝါရီလ ၂၁ ရက်နေ့အထိ ပိုးတွေ့လူနာ ကျား (၃၆၆) ဦး၊ မ(၂၃၉) ဦး၊ စုစုပေါင်းပိုးတွေ့လူနာ ၆၁၅ ဦးရှိပြီး သေဆုံးသူ ၆၃ ဦးရှိတယ်လို့ သိရပါတယ်။
ကျောက်ဖြူမြို့မှ လေယာဉ်စီးနင်းလိုက်ပါကြမယ့် ခရီးသည်များကို ခရိုင်ပြည်သူ့ကျန်းမာရေးဦးစီးဌာနမှူးရုံးတွင် လေယာဉ်မထွက်မီ တစ်ရက်ကြိုတင်၍ မွန်းလွဲ ၁ နာရီမှ ၃ နာရီအတွင်း ကျန်းမာရေးစစ်ဆေးမှုများကို ပြုလုပ်ပေးနေတာဖြစ်ပါတယ်။
ymg/hm
#Yangon_Media_Group
#LocalNews
Published - 22 Feb 2022
ကချင်ပြည်နယ်၊ ပူတာအိုမြို့တွင် စက်သုံးဆီများပြတ်လပ်နေပြီး ဓါတ်ဆီ တစ်လီတာလျှင် ၈,၀၀၀ မှ ၁၀,၀၀၀ အထိ ပေါက်စျေးရှိနေတယ်လို့ သိရပါတယ်။
အဆိုပါ ပူတာအိုဒေသတွင် စက်သုံးဆီများ ပြတ်လပ်နေမှုကြောင့် ဒေသခံများအခက်ကြုံနေရပြီး လုပ်ငန်းအချို့ကိုလည်း ရပ်ဆိုင်းထားရတယ်လို့ ပူတာအိုမြို့ဒေသခံတွေက ဆိုပါတယ်။
"ကားတွေရပ်နေပြီ ဆိုင်ကယ်တွေရပ်နေပြီ ဓါတ်ဆီမရှိလို့ တော်တော်လေး အခက်အခဲရှိတယ် ဟိုတလောက ဓါတ်ဆီပြတ်တယ်။ အခု နောက်ပိုင်းလမ်းပိတ်တယ်လို့ ကြေညာတော့ ပိုဆိုး၊ပိုကြပ်သွားတာပေါ့၊ စားရေးသောက်ရေးတွေ အတော်လေး အခက်အခဲရှိပါတယ်။
အခု ဓါတ်ဆီပြတ်နေတာက တစ်လ လောက်ရှိပြီ၊ ပူတာအိုမှာ ဓါတ်ဆီ တစ်လီတာဆိုရင် ၈,၀၀၀ ၁၀,၀၀၀ လောက်ရှိတယ်။ ဒါတောင်ဝယ်မရပါဘူး။ လုံးဝ မရောင်းဘူး။ ဓါတ်ဆီကုန်နေတာ ဘာကြောင့်လဲဆိုရင် မြစ်ကြီးနားနဲ့ ပူတာအိုကြားမှာ ဓါတ်ဆီကားလာလို့မရဘူး။ နှစ်ဘက်စလုံးက ပိတ်လိုက်တော့ ဓါတ်ဆီကို တင်တဲ့ကားတွေက လာလို့မရဘူး။ နောက် ပူတာအိုနဲ့ မြစ်ကြီးနားကြားမှာ တိုက်ပွဲတွေဖြစ်နေတာ သူတို့က ဓါတ်ဆီတင်တဲ့ကားကို တားမြစ်တာ၊ လုံးဝ အဝင်မခံတာပေါ့။"လို့ ပူတာအိုမြို့ဒေသခံတစ်ဦးက YMG ကို ပြောပြခဲ့ပါတယ်။
ပူတာအိုမြို့တွင် စက်သုံးဆီများ ပြတ်လပ်နေသည်မှာ တစ်လခန့်ရှိနေပြီး မြို့၏ မည်သည့်နေရာတွင်မှ စက်သုံးဆီကို ဝယ်ယူလို့မရတာဖြစ်တယ်လို့လည်း ဒေသခံတွေက ပြောပါတယ်။
"စက်သုံးဆီက လုံးဝပြတ်နေတယ်။ မြို့မှာလည်း လုံးဝဝယ်မရဘူး၊ တချို့လုပ်ငန်းတွေဆိုရင် ရပ်ထားရတယ်။ စက်သုံးဆီမရှိတော့ ဆိုင်ကယ်ဆီဖြည့်ဖို့ကအစ အတော်လေး အခက်ကြုံနေရပါတယ်။ လမ်းပေါ်မှာဆို ကားတစ်စီးတစ်လေ၊ ဆိုင်ကယ်တစ်စီးတစ်လေလောက်ပဲ တွေ့ရတယ်။"လို့ ၄င်းက ဆက်လက်ပြောပြခဲ့ပါတယ်။
ဒါ့အပြင် ပူတာအိုဒေသမှာ တိုက်ပွဲတွေဖြစ်ပွားနေပြီး လမ်းပန်းဆက်သွယ်ရေး အခြေအနေကလည်း အရင်လို ကောင်းမွန်ခြင်းမရှိသည့်အတွက် စက်သုံးဆီများတင်ပို့ဖို့က အခက်အခဲများရှိနေပြီး အခြားသော ကုန်စည်စီးဆင်းမှု တွေအတွက်လည်း နှောင့်နှေးကြန့်ကြာမှုတွေ ရှိနေတာဖြစ်တယ်လို့ သိရပါတယ်။
ထို့အပြင် ဒီကနေ့မှစတင်ပြီး မြစ်ကြီးနား-ဆွမ်ပရာဘွန်-ပူတာအို ကားလမ်းကိုလည်း နှစ်ဖက်တပ်တွေက စစ်ရေးအ ခြေအနေတွေကြောင့် ပိတ်ထားတယ်လို့လည်း သိရပါတယ်။
Photo - CJ
ymg/kg
#Yangon_Media_Group
#LocalNews
Published - 22 Feb 2022
မော်လမြိုင်ဆေးရုံကြီးမှ ကိုဗစ်အတည်ပြုလူနာ(၄)ဦးဟာ ဒီကနေ့( ဖေဖော်ဝါရီလ ၂၂ )ရက်မှာ သေဆုံးသွားခဲ့တယ်လို့ သိရပါတယ်။
ဒီကနေ့ သေဆုံးသွားသည့် လူနာများသည် မုဒုံမြို့မှ အသက်(၈၈)နှစ်အရွယ် အမျိုးသားလူနာတစ်ဦး၊ ပေါင်မြို့နယ်မှ အသက်(၅၃)နှစ်အရွယ် အမျိုးသားလူနာတစ်ဦး၊ မော်လမြိုင်မြို့မှ အသက်(၅၂)နှစ်အရွယ် အမျိုးသားလူနာတစ်ဦးနှင့် မုတ္တမြို့မှ အသက်(၆၅)နှစ်အရွယ် အမျိုးသမီးလူနာတစ်ဦးတို့ ဖြစ်ကြတယ်လို့ မော်လမြိုင်မြို့ရှိ ဒေသခံလူမှုကူညီ ရေးအသင်းတစ်ခုက ထုတ်ပြန်ထားတာပါ။
ကျန်းမာရေးဝန်ကြီးဌာန၏ ထုတ်ပြန်မှုအရ မွန်ပြည်နယ်အတွင်းမှာ ယခု ဖေဖော်လဝါရီလ ၂၀ ရက်နေ့အထိ ပိုးတွေ့သူလူနာစုစုပေါင်းက (၁၁၉)ဦးအထိရှိ နေတာလည်းဖြစ်ပါတယ်။
ယခုဖေဖော်ဝါရီလ ပထမပတ်ကစလို့ မြန်မာနိုင်ငံအတွင်းမှာ အိုမီခရွန်ကူးစက်ခံရတဲ့ လက္ခဏာရှိသူတွေ အများစု ဖြစ်လာတာကြောင့် ပြည်တွင်းမှာ အိုမီခရွန်ကူးစက်ခံရမှုတွေဟာ အဆမတန်များပြားနေသလို ရောဂါပိုးကလည်း အလျင်အမြန် ကူးစက်ပြန့်နှံ့နေတာဖြစ်ပါတယ်။
မြန်မာတစ်နိုင်ငံလုံးအတိုင်းအတာအရ ကိုဗစ်ရောဂါပိုးတွေ့ရှိမှုရာခိုင်နှုန်းဟာ အရင်လတွေက ၁ ရာခိုင်နှုန်းကျော်ပဲ ရှိခဲ့ရာကနေ အခုဆိုရင် ၁၀ ရာခိုင်နှုန်းကျော်အထိ ပြန်လည်မြင့်တက်လာခဲ့တာလည်းဖြစ်ပါတယ်။
ဒါကြောင့်လည်း အများပြည်သူအနေနဲ့ ကျန်းမာရေးအသိရှိပြီး သတ်မှတ်စည်းကမ်းတွေကို လိုက်နာကြဖို့ ကျန်းမာရေးဝန်ကြီးဌာနက တိုက်တွန်းနှိုးဆော်ထားပါတယ်။
ထို့အပြင် ကိုဗစ် - ၁၉ ရောဂါ စောင့်ကြပ်ကြည့်ရှုမှုနှင့် ပတ်သက်၍ ဖေဖော်ဝါရီလ ၂၁ ရက်၊ ည ၈ နာရီအချိန်
အထိ နောက်ဆုံးထုတ်ပြန်ထားသော ကိန်းဂဏန်းများအရ စစ်ဆေးသူ ၂၈,၄၈၀ ဦးတွင် ဓါတ်ခွဲအတည်ပြုလူနာ
ပိုးတွေ့သူ စုစုပေါင်းက ၂,၈၉၇ ဦးရှိခဲ့ပြီး ပိုးတွေ့ရာနှုန်းက ၁၀.၁၇ ရာခိုင်နှုန်းရှိခဲ့တာပါ။
ဒါကြောင့် ယနေ့အထိ မြန်မာနိုင်ငံမှာ ပိုးတွေ့သူစုစုပေါင်းက ၅၆၈,၅၆၄ ဦးအထိ ရှိလာခဲ့ပြီဖြစ်ပါတယ်။
ဒါ့အပြင် ယနေ့အထိ ဆေးရုံဆင်းသူရာနှုန်းက ၉၂.၃၂ ရာခိုင်နှုန်းအထိရှိခဲ့ပြီး ဆေးရုံဆင်းသူစုစုပေါင်းက ၅၂၄,၈၈၀ ဦးအထိ ရှိခဲ့တာဖြစ်ပါတယ်။
သေဆုံးမှုကလည်း ယမန် နေ့ ဖေဖော်ဝါရီလ ၂၁ ရက်နေ့တွင် သေဆုံးသူ ၇ ဦးရှိခဲ့သဖြင့် သေဆုံးရာနှုန်း ၃.၄၀ ရာခိုင်နှုန်းနှင့် ယနေ့အထိ သေဆုံးသူစုစုပေါင်း ၁၉,၃၃၈ ဦးရှိခဲ့ပြီဖြစ်တယ်လို့ သိရပါတယ်။
"ပိုးတွေ့နှုန်းလည်း ၁၀ ရာခိုင်နှုန်းကျော်လာပြီ။ သေသူကလဲများလာပြီ။ မိမိ မိသားစုထဲမှာ ကာကွယ်ဆေးလုံးဝမထိုးထားသူများ အသက် ၇၅ နှစ်အထက်ရှိသူများ နောက်ခံရောဂါရှိသူများ အန္တရာယ်အရှိဆုံးဖြစ်ပါတယ်။ ဂရုစိုက်ကြပါ။ အိုမီခရွန်က စိုးရိမ်ဖွယ်ရာ ဗီဇမျိုးကွဲဖြစ်ပါတယ်။ မပေါ့ဆပါနှင့်"လို့ ကျန်းမာရေးပညာရှင် ဒေါက်တာခင်ခင်ကြီးက ၄င်း၏ လူမှုကွန်ရက်ကနေ အသိပေးရေးသားထားပါတယ်။
ymg/kg
#Yangon_Media_Group
#LocalNews
Published -22 Feb 2022
နိုင်ငံရေး အထွေထွေအကျပ်အတည်းဖြေရှင်းနိုင်ဖို့ အားလုံးပါဝင်တဲ့ နိုင်ငံရေးဆွေးနွေးပွဲတွေကနေ ဖက်ဒရယ်ပြည်ထောင်စုတည်ဆောက်ရေးကို ကြိုးပမ်းဆောင်ရွက်သွားမယ်လို့ ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST)ရဲ့ခေါင်းဆောင် နိုင်အောင်မင်းကပြောဆိုလိုက်ပါတယ်။
ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) အစည်းအဝေး ဖေဖော်ဝါရီ ၂၂၊ ၂၃ ရက်တို့တွင် Video Conferencing ဖြင့် နှစ်ရက်တာ ကျင်းပနေပြီး ယင်းအစည်းအဝေးတွင် PPST ဦးဆောင်မှုအလုပ်အဖွဲ့ခေါင်းဆောင် နိုင်အောင်မင်းရဲ့ အဖွင့်မိန့်ခွန်းပြောကြားခဲ့ရာ အထက်ပါအတိုင်း ပြောကြားခဲ့တာဖြစ်ပါတယ်။
“ လက်ရှိနိုင်ငံရေး အထွေထွေအကျပ်အတည်း ဖြေရှင်းနိုင်ရေးကို အားလုံးပါဝင်တဲ့ နိုင်ငံရေးဆွေးနွေးပွဲများ ကျင်းပခြင်းမှတဆင့် ဖက်ဒရယ်ပြည်ထောင်စုတည်ဆောက်ရေးကို မိမိတို့ PPST အနေနဲ့ တတ်နိုင်တဲ့နည်းလမ်းများဖြင့် ကြိုးပမ်းဆောင်ရွက်သွားမှာ ဖြစ်ပါတယ်။ နိုင်ငံရေးဆွေးနွေးပွဲ ပုံစံအသစ်ကို ဆွေးနွေးညှိနှိုင်း ချမှတ်သွားမှာဖြစ်ပါတယ်” ဟု နိုင်အောင်မင်းက ပြောကြားပါတယ်။
ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) ရဲ့ နှစ်ရက်တာအစည်းအဝေးမှာ လက်ရှိနိုင်ငံရေး၊ စစ်ရေး၊ ငြိမ်းချမ်းရေးအပါအဝင် အခြားအရေးကြီးတဲ့ ကိစ္စရပ်တွေကို ဆွေးနွေးညှိနှိုင်းပြီး သဘောထား ချမှတ်သွားမည်ဖြစ်ကာ (၇၅)နှစ်ပြည့် စိန်ရတုပြည်ထောင်စုနေ့ အခမ်းအနားအခင်းအကျင်း၊ တပ်မတော်၏ ငြိမ်းချမ်းရေးအကြိုညှိနှိုင်းဆွေးနွေးပွဲ ဖိတ်ကြားခြင်းကိစ္စ၊ ပြည်သူ့ညီလာခံ (People Assembly) အခြေအနေ၊ မကြာမီ ပြည်တွင်းသို့လာရောက်မည့် အာဆီယံအထူးကိုယ်စားလှယ်ရဲ့ ခရီးစဉ်အနေအထားတို့ကို ဆွေးနွေးသွားရန် စီစဉ်ထားပြီး တိကျတဲ့ ရှေ့လုပ်ငန်းစဉ်များကို ချမှတ်သွားမယ်လို့ သိရပါတယ်။
ဒါ့အပြင် PPST ရဲ့စုဖွဲ့မှုအသစ်အခင်းအကျင်းနဲ့ EAO များ၏ ညီလာခံကျင်းပသွားနိုင်ရေးဆွေးနွေးခြင်း၊ PPST ၏ နိုင်ငံရေးဦး တည်ချက် (၇)ရပ်ကို အခြေခံပြီး လမ်းပြမြေပုံ (၇)ဆင့်အတွက် ဆွေးနွေးညှိနှိုင်းနေသည့် PPST အကြံပေး စဝ်ဟန်ယောင်ဟွေ ဦးစီးဆောင်ရွက်ပြုလုပ်နေတဲ့ PPST အလုပ်ရုံဆွေးနွေးပွဲ အခြေအနေကိုလည်း ဆွေးနွေးတင်ပြခြင်းနှင့် အလုပ်ရုံရှေ့လုပ်ငန်းစဉ်အတွက် သဘောထားချမှတ်ခြင်း၊ တိုက်ပွဲများကြောင့် အတိဒုက္ခ အမျိုးမျိုးကြုံတွေ့နေရသည့် ပြည်သူလူထု စစ်ဘေးရှောင်များအတွက် ထိထိရောက်ရောက် ဆက်လက်အကူအညီပေးနိုင်ရေးနှင့် သဘောထားချမှတ်ခြင်းများ ဆောင်ရွက်မယ်လို့ မိန့်ခွန်းမှာ ထည့်သွင်းပြောကြားခဲ့ပါတယ်။
ymg/hm
#Yangon_Media_Group
Page 1686 of 1723