ကမ္ဘာကျော် ဘာစီလိုနာ ယူ-၁၂ လူငယ်ဘောလုံးအသင်းနှင့် မြန်မာ ယူ-၁၂ လူငယ်အသင်းတို့ ယှဉ်ပြိုင်ကစားရာတွင် မြန်မာလူငယ်အသင်း ရှုံးနိမ့်

ဘာစီလိုနာနဲ့ မြန်မာအသင်းတို့ ယနေ့  ဩဂုတ် (၂၄)ရက် နံနက်ပိုင်းတွင် အုပ်စုအဖွင့် ပွဲဦးထွက်ယှဉ်ပြိုင်
Yangon_Times/MY
#Local_News
#Published_ 24 August 2023
#YMG #Yangon_Times

အလုပ်သမားဝန်ကြီးဌာနမှ ဖွင့်လှစ်သည့် ဒေသဆိုင်ရာ လမ်းညွှန်သင်တန်းဟုဆိုကာ မန္တလေးတွင် လိမ်လည်ဖွင့်လှစ်ပြီး သင်တန်းကြေးငွေများ ကောက်ယူနေ

အလုပ်သမားတစ်ဦးကို သင်တန်း ၂ရက်ကြာ သင်ကြားပေးကာ သင်တန်းကြေးအဖြစ် ကျပ် ၃သိန်းမှ ၃သိန်းခွဲ ထိကောက်ယူပြီး အစိုးရ ရုံးပိတ်ရက်ကလွဲလို့ နေ့စဉ်သင်တန်း ဖွင့်လှစ် သင်ကြားပေးနေတယ်လို့ သိရပါတယ်။
Yangon_Times/LW
#Local_News
#Published_ 24 August 2023
#YMG #Yangon_Times

24 August 2023

အမေရိကန်ပြည်ထောင်စုက မြန်မာနိုင်ငံသားလုပ်ငန်းရှင် (၂)ဦးနှင့် သူတို့ရဲ့ ကုမ္ပဏီ(၃)ခုကို စီးပွားရေးအရေးယူ ကန့်သတ်   ပိတ်ဆို့မှုအသစ်တွေထပ်မံပြုလုပ်လိုက်တယ်လို့ အမေရိကန်အစိုးရ ဘဏ္ဍာရေးဝန်ကြီးဌာနက ဩဂုတ် ၂၃ ရက်က သတင်းထုတ်ပြန်လိုက်ပါတယ်။

ဂျက်လေယာဉ်ဆီတွေတင်သွင်းမှုတွေပြုလုပ်ခဲ့တယ်ဆိုတဲ့စွပ်စွဲချက်နှင့် အမေရိကန်အစိုးရရဲ့ စီးပွားရေးကန့်သတ် အရေးယူမှုခံရတဲ့ မြန်မာလုပ်ငန်းရှင်နှစ်ဦးက ဒေါ်ခင်ဖြူဝင်းနှင့် ဦးဇော်မင်းထွန်းတို့ဖြစ်ကြပါတယ်။ အဲဒီအပြင် သူတို့ ထိန်းချုပ်ထားတယ်လို့ဆိုတဲ့  Shoon Energy PTE. LTD၊ PEIA PTE. LTD.နှင့်  P.E.I Energy PTE. LTD တို့ကိုလည်း ပိတ်ဆို့ ကန့်သတ်မှုစာရင်းထဲထည့်သွင်းလိုက်တယ်လို့ သတင်းထုတ်ပြန်ချက်မှာဖော်ပြထားပါတယ်။ အဲဒီကုမ္ပဏီတွေ  အားလုံးဟာ စင်္ကာပူအခြေစိုက်ကုမ္ပဏီတွေဖြစ်ကြတယ်လို့လည်း ဆိုပါတယ်။

ဒီနေ့စီးပွားရေးပိတ်ဆို့ကန့်သတ်မှုပြုလုပ်ခံရတဲ့လူပုဂ္ဂိုလ်တွေနှင့် ကုမ္ပဏီတွေဟာ မြန်မာတပ်မတော်ကို ဂျက်လေယာဉ် လောင်စာဆီတင်သွင်းရောင်းချဖြန့်ဖြူးရာမှာပါဝင်ပတ်သက်တယ်လို့ အမေရိကန်အစိုးရကစွပ်စွဲခဲ့တာဖြစ်ပါတယ်။

Published_ 24 August 2023

U-12 Junior Soccer World Challenge 2023 ပြိုင်ပွဲတွင်  အုပ်စု ဒုတိယပွဲစဥ်အဖြင့် ဂျပန်ကလပ်အသင်း(JEF United Chiba )နှင့် မြန်မာအသင်းတို့ ယှဉ်ပြိုင်ကစားကြရာ သုံးဂိုး တစ်ဂိုးဖြင့် ထပ်မံရှုံးနိမ့်ခဲ့သည်ဟု ပွဲစဉ်အပြီးရလာဒ်ကို MFF က ထုတ်ပြန်သည်။

မြန်မာလူငယ်အသင်းအနေဖြင့် အဆိုပါအုပ်စုဒုတိယပွဲစဥ်ကို ယနေ့ နံနက် မြန်မာ စံတော်ချိန် (၁၀) နာရီအချိန်တွင် ကစားခဲ့ကြခြင်းဖြစ်သည်။

အုပ်စုပွဲစဉ်အရ တစ်ရက်တည်းတွင် နှစ်ပွဲဆက်တိုက်ကစားခဲ့ရသည့် မြန်မာလူငယ်ဘောလုံးအသင်းအနေဖြင့် ရှုံးနိမ့်ခဲ့သော်လည်း စုဖွဲ့မှုကောင်းကောင်းဖြင့်  ကြိုးစားကစားနိုင်ခဲ့ကြသည်ကိုတွေ့မြင်ရသည်။

မြန်မာအသင်းအနေဖြင့် ယနေ့ နံနက်ပိုင်းကလည်း အုပ်စု အဖွင့်ပွဲစဉ်ကို ဘာစီလိုနာ ယူ ၁၂ အသင်းနှင့် ကစားခဲ့ရာ  လေးဂိုး ဂိုးမရှိဖြင့် ရှုံးနှိမ့်ထားသေးသည်။

မြန်မာ့လက်ရွေးစင် ယူ-၁၂ လူငယ်‌ဘော လုံးအသင်း၏ အုပ်စု နောက်ဆုံးပွဲစဥ်ကို Daiwa House Dream အသင်းနှင့် ဩဂုတ် (၂၅)ရက် (မနက်ဖြန်) မြန်မာစံတော်ချိန် နံနက် (၇) နာရီ (၄၅)မိနစ် အချိန်တွင် ယှဥ်ပြိုင် ကစားသွားရဦးမည် ဖြစ်သည်။
Yangon Times/my
#Local_News
#YMG #Yangon_Times

အခုရက်ပိုင်းအတွင်း မြန်မာနိုင်ငံအထက်ပိုင်းနှင့် အလယ်ပိုင်းဒေသများ မိုးသည်းမည်

‘မြန်မာနိုင်ငံ အထက်ပိုင်းဒေသတွေဖြစ်တဲ့ ကချင်ပြည်နယ်၊စစ်ကိုင်းတိုင်းအထက်ပိုင်းနဲ့ မြန်မာနိုင်ငံ အလယ်ပိုင်းဒေသတွေဖြစ်တဲ့ နေပြည်တော်၊မန္တလေး၊မကွေးစတဲ့ ဒေသတွေမှာမိုးကြီးနိုင်တယ်။’..... ဦးလှထွန်း၊ညွှန်ကြားရေးမှူး မိုးလေဝသနှင့်ဇလဗေဒညွှန်ကြားမှုဦးစီးဌာန
Yangon_Times/tthl
#Local_News
#Published_ 24 August 2023
#YMG #Yangon_Times

Published_ 24 August 2023

ထိုင်းနိုင်ငံ စမုဆွန်ခါခရိုင်၊ စမုဆွန်ခရာမြို့ရမဲခေါင်မြစ်ခွဲအတွင်း၌ ပြုပြင်ထိန်းသိမ်းမှုများ ဆောင်ရွက်ရန်အတွက် ရပ်နားထားသော Smoosh Sea C-22 ဆီတင်သင်္ဘော မီးလောင်ပေါက်ကွဲရာ တွင် သေဆုံးသွားသောမြန်မာ အလုပ်သမား များ အတွက် နစ်နာကြေး ကို ကျန်ရစ်သူမိသားစုများထံ ပေးအပ်ခဲ့ကြောင်း ထိုင်းနိုင်ငံရှိ မြန်မာနိုင်ငံဆိုင်ရာအလုပ်သမားသံရုံး မှ သိရသည်။

smoosh Sea C-22 ဆီတင်သင်္ဘောသည် ၁၇-၁-၂၀၂၃ ရက်နေ့၊ နံနက် ၁၀:၀၀ နာရီအချိန်ခန့်တွင် အလုပ်သမား ၃၀ ဦးခန့်ဖြင့် ဆီပိုက်လိုင်းများ ဂဟေဆော်သည့် လုပ်ငန်းများဆောင်ရွက်နေစဉ်ပိုက်လိုင်းအတွင်းရှိဆီလက်ကျန်များမှတစ်ဆင့် ပေါက်ကွဲမှုဖြစ်ပွားခဲ့ပြီး မြန်မာနိုင်ငံသား အလုပ်သမား ၇ ဦး သေဆုံးခဲ့ကြောင်း သိရသည်။

အဆိုပါသေဆုံးသူ အလုပ်သမား ၇ ဦး၏ ကျန်ရစ်သူမိသားစုများအနက်မှ စာရွက်စာတမ်းနှင့် အချက်အလက်များ ပြည့်စုံသော မိသားစု ၄ စု၏ မိခင် ၃ ဦးနှင့် ကလေး ၂ ဦးတို့ား ၂၂-၈-၂၀၂၃ ရက်နေ့တွင် စမုစခွန်ခရိုင်၊ လူမှုဖူလုံရေးရုံး၌ နစ်နာကြေးငွေများကို ထိုက်သင့်သည့်ပမာဏ အလိုက် ပေးခဲ့ပြီး ကျန်ရှိသည့် မိသားစု ၃ စုအတွက်လည်း နစ်နာကြေးများ အမြန်ဆုံးရရှိနိုင်ရန် ဆက်လက်ဆောင်ရွက်လျက်ရှိပါကြောင်း သိရသည်။
Yangon Time/LW
#Local_News
#YMG #Yangon_Times

Pubulish_ 24 August 2023

ကုန်ဈေးနှုန်းတည်ငြိမ်စေရေးအတွက် သယ်ယူစရိတ်လျှော့ချနိုင်မည့်နည်းလမ်းများရှာဖွေခြင်း၊ကုန်ဈေးနှုန်း တည်ငြိမ်မှုပျက်ပြားစေမည့်ကိစ္စရပ်များကို ဥပဒေနှင့်အညီကြပ်မတ်ခြင်းများဆောင်ရွက်သွားမည်ဖြစ်ကြောင်း သိရသည်။

ယင်းကဲ့သို့ဆောင်ရွက်မည့်အကြောင်းကို ပြည်ထောင်စုကုန်ဈေးနှုန်းတည်ငြိမ်ရေးကော်မတီဥက္ကဋ္ဌ၊ ဒုတိယဝန်ကြီးချုပ်နှင့် စီမံကိန်းနှင့် ဘဏ္ဍာရေး ဝန်ကြီးဌာန၊ပြည်ထောင်စုဝန်ကြီးဦးဝင်းရှိန်က ပြည်ထောင်စုကုန်ဈေးနှုန်းတည်ငြိမ်ရေးကော်မတီအစည်းအဝေး၌ထည့်သွင်းပြောကြားခဲ့ခြင်းဖြစ်သည်။

ပြည်ထောင်စုဝန်ကြီးက ‘ကုန်ဈေးနှုန်းတည်ငြိမ်စေရန် ကုန်ပစ္စည်းထွက်ရှိရာ ဒေသများမှ စားသုံးသည့်ဒေသများ သို့သယ်ဆောင်ရာတွင် သယ်ယူစရိတ်ကြီးမြင့်စေသည့် စက်သုံးဆီဈေးနှုန်းမြင့်တက်ခြင်း၊ ကြားခံအဆင့်များပြား ခြင်းကို လျှော့ချနိုင်မည့် နည်းလမ်းများရှာဖွေခြင်း၊ ကုန်စည်အဝင်/အထွက် မျှတမှု ရှိ-မရှိနှင့် ဝိသမလောဘ သမားများ၏ ဈေးကစားမှု ရှိ - မရှိကို စုံစမ်းစိစစ်ခြင်းများ ဆောင်ရွက်နိုင်ရေးညှိ နှိုင်းဆောင်ရွက်ပေးရန်လိုအပ် ကြောင်း၊ ကုန်ဈေးနှုန်းတည်ငြိမ်မှုပျက်ပြားစေမည့်ကိစ္စရပ်များအား ဥပဒေနှင့်အညီ ကြီးကြပ်ဆောင်ရွက်ရန်၊ သဘာဝဘေးအန္တရာယ်ကြောင့် အခြေခံစားသောက်ကုန်နှင့် ဆေးဝါးဈေးနှုန်း မြင့်တက်ခြင်း၊ ဈေးကစားခြင်းနှင့် ဈေးကွက်အတွင်းပစ္စည်းပြတ်လပ်ခြင်းများ မဖြစ်ပေါ်စေရေး ကြိုတင် စီမံဆောင်ရွက်ထားရန်လည်း လိုအပ်ကြောင်း’ထည့်သွင်းပြောကြားခဲ့သည်။

ဒေသအလိုက်ကုန်ဈေးနှုန်းများတည်ငြိမ်စေရန်အတွက် ဆောင်ရွက်ရမည့်ကိစ္စရပ်များကို ပြည်ထောင်စုနှင့် တိုင်းဒေသကြီးနှင့် ပြည်နယ် အစိုးရအဖွဲ့အစည်းများအားလုံးပူးပေါင်းပြီး ကြပ်မတ်ဆောင်ရွက်ကြမည်ဟုဆိုသည်။

လက်ရှိဆန်ဈေး၊ စားအုန်းဆီဈေးနှုန်းများမြင့်တက်နေခြင်းကို စနစ်တကျ စိစစ်သုံးသပ်လေ့လာပြီး ထိထိရောက် ရောက် စီမံကြပ်မတ်ဆောင်ရွက်ကြမည်ဖြစ်သလို တစ်ဖက်တွင်လည်း အခြေခံစားကုန်ထုတ်လုပ်ရာတွင် အဓိက ကျသည့်လယ်ယာကဏ္ဍနှင့် မွေးမြူရေးကဏ္ဍတို့တွင် ထုတ်လုပ်မှုတိုးတက် လာစေရန်အတွက် လိုအပ်သည့်ပံ့ပိုးမှု များပေးခြင်း၊ တစ်ပိုင်တစ်နိုင်စိုက်ပျိုးရေးနှင့်မွေးမြူရေးတို့ကို အားပေးခြင်းစသည့်စည်းရုံးရေးနှင့် စီးပွားရေး နည်းလမ်းများဖြင့် ဆွဲဆောင်မှုပေးခြင်းများလည်းဆောင်ရွက်သွားမည်ဖြစ်ကြောင်းလည်းသိရသည်။
Yangon Times/tthl
#Local_News
#YMG #Yangon_Times

Published_ 24-August 2023

လူငယ်အများစု ဝင်ရောက်ယှဉ်ပြိုင်မည့် ဒုတိယအကြိမ်မြောက် Stand For Love ပြိုင်ပွဲကို လာမည့် ဩဂုတ် (၂၆)ရက်နှင့် (၂၇)ရက် တို့တွင် မြန်မာပလာဇာ၌ ကျင်းပပြုလုပ်သွားမည်ဖြစ်ကြောင်း သိရသည်။

အဆိုပါ Stand For Love အမည်ရှိ ပြိုင်ပွဲကို ပြိုင်ပွဲဝင်ပေါင်း (၁၂၀)က ဝင်ရောက်ယှဉ်ပြိုင်ခွင့်ရှိမည်ဖြစ်ကြောင်း  သိရသည်။

ပြိုင်ပွဲတွင် ပထမဆု ကျပ် (၁၅)သိန်း၊ ဒုတိယဆု ကျပ် (၁၀)သိန်းနှင့် တတိယဆုကျပ် (၅)သိန်းတို့ကို ချီးမြှင့်သွားမည့် အပြင် စိန်နန်းတော်၊ D&C၊ Canal+၊ ERKEနှင့် One Finesses တို့ ကလည်းဆုများထပ်မံချီးမြှင့်သွားမည်ဖြစ်သည်။

ဝင်‌ရောက်ယှဉ်ပြိုင်ရမည့် ပြိုင်ပွဲပုံစံမှာ ပြိုင်ပွဲအတွင်းရှိ ကားပေါ်မှ သတ်မှတ်ထားသောနေရာအား လက်ဖြင့် ငါးနာရီကြာထိထားနိုင်သူ သုံးဦးကိုရွှေးချယ်၍ ဆုချီးမြှင့်သွားမည်ဖြစ်ကြောင်း သိရသည်။

ပြိုင်ပွဲဝင်ရောက်သူများအနေဖြင့် နှစ်ကြိမ်ဝင်ရောက်ယှဉ်ပြိုင်ရမည်ဖြစ်ပြီး၊
ပထမတစ်ကြိမ်တွင် ကားအတွင်းရှိသတ်မှတ်ထားသော လက်ပုံစံနေရာအား ခြေစုံရပ်၍ လက်ဖြင့်ထိထားရမည်ဖြစ်သည်ဟုဆိုသည်။

ဒုတိယ‌အကြိမ်တွင် ခြေတစ်ဘက်သာရပ်၍ သတ်မှတ်ထားသော လက်ပုံစံနေရာအား လက်ဖြင့်ထိထားရမည်ဖြစ်ပြီး ၊ ပထမအကြိမ်နှင့်ဒုတိယအကြိမ်အကြား ၁၀မိနစ်သာနားခွင့်ရှိမည်ဖြစ်ကြောင်း သိရသည်။

ဝင်ရောက်ယှဉ်ပြိုင်သူများအနက် သုံးဦးကိုသာရွေးချယ်သွားမည်ဖြစ်သော်လည်း သုံးဦးထက်ပိုပါက မြန်မာပလာဇာ စီမံခန့်ခွဲရေးဌာနက ပြိုင်ပွဲဝင်အားလုံးအရှေ့တွင် မဲနှိုက်၍ မဲပေါက်သူကို ဆုချီးမြှင့်သွားမည်ဟု  အသိပေးထားသည်။

ပြိုင်ပွဲအတွင်း ဝင်ရောက်ယှဉ်ပြိုင်သူအနေဖြင့် အဖော်ပြုပေးမည့်သူ တစ်ယောက် ခေါ်လာခွင့်ရှိကာ ကျန်းမာရေးနှင့်ပတ်သက်၍ တစ်စုံတရာဖြစ်ပွားပါက ပြိုင်ပွဲဝင်၏ တာဝန်သာဖြစ်ကြောင်း အသိပေးထုတ်ပြန်ထားသည်။
Yangon Times/MY
#Local_News
#YMG #Yangon_Times

Published_ 24 August 2023

ရခိုင်ပြည်နယ် ၊ နတ်မြစ်အတွင်း မြန်မာ-ဘင်္ဂလားဒေ့ရှ် နှစ်နိုင်ငံ နယ်ခြားစောင့်တပ်ဖွဲ့များအကြား ဟန်ချက်ညီရေကြောင်းကင်းလှည့်မှုတစ်ခုကို ယမန်နေ့ ဩဂုတ်(၂၃)ရက်က ပြုလုပ်ခဲ့ကြောင်း ဒေသတွင်း မီဒီယာတစ်ခုတွင် ရေးသားဖော်ပြထားသည်။

အဆိုပါ ဟန်ချက်ညီ ရေကြောင်းကင်းလှည့်ခြင်းကို နှစ်နိုင်ငံနယ်ခြားစောင့်တပ်ဖွဲ့များ ပူးပေါင်း၍ လစဉ်ပြုလုပ်လျက်ရှိကြောင်း သိရသည်။

ယခု ဩဂုတ်လအတွင်း သုံးကြိမ်ဆောင်ရွက်ခဲ့ပြီး၊ ဩဂုတ်လ(၁၉) ရက်တွင်တစ်ကြိမ်၊ ဩဂုတ်(၂၂) ရက်တွင်တစ်ကြိမ် နှင့် ဩဂုတ်(၂၃ )ရက်တွင် တစ်ကြိမ် ပြုလုပ်ခဲ့ခြင်းဖြစ်သည်။

ကင်းလှည့်ခြင်းအတွက် နှစ်နိုင်ငံနယ်ခြားစောင့်တပ်ဖွဲ့မှ အရာရှိဦးစီး ကိုယ်စား လှယ်အဖွဲ့ဖြင့် အောင်ဗလချောင်းဝအနီးမှ မကျီးချောင်းဝအနီးထိ နတ်မြစ်တစ်လျှောက်ဆောင်ရွက်ခဲ့ပြီး နှစ်ဖက်ကင်းလှည့်မှုအခြေအနေများကို မှတ်တမ်းတွင် လက်မှတ်ရေးထိုးခဲ့ကြကြောင်း သိရသည်။

ဓာတ်ပုံ-ရခိုင်နေ့စဉ်
Yangon Times/my
#Local_News
#YMG #Yangon_Times

Published_ 24 August 2023

အိန္ဒိယအာကာသယာဥ်တစ်စင်းဟာ ဗုဒ္ဓဟူးနေ့က လရဲ့ ကြမ်းတမ်းပြီး မစူးစမ်းရသေးတဲ့ တောင်ဝင်ရိုးစွန်းပေါ်သို့ ပထမဆုံးအကြိမ် ဆင်းသက်နိုင်ခဲ့ပြီး လကမ္ဘာစူးစမ်းရှာဖွေခြင်းမစ်ရှင်နဲ့ အိန္ဒိယနိုင်ငံရဲ့ အာကာသနည်းပညာ အဆင့်အတန်းကို မြင်တွေ့လိုက်ရပါတယ်။

ဒီအခိုက်အတန့်ဟာ ဘယ်တော့မှ မမေ့နိုင်စရာဖြစ်စဥ်ဖြစ်ပြီး အိန္ဒိယအတွက် အောင်ပွဲတစ်ခုဖြစ်ကြောင်း ဝန်ကြီးချုပ် နရန်ဒရာမိုဒီက တောင်အာဖရိကမှာ ကျင်းပတဲ့ BRICS ထိပ်သီးအစည်းအဝေး တက်ရောက်ရင်း အိန္ဒိယအလံဝေ့ယမ်းကာ အာကာသယာဉ်ဆင်းသက်မှုကို ကြည့်ရှုပြီး ပြောကြားခဲ့ပါတယ်။

အာကာသယာဥ်ဆင်းသက်ချိန်မှာ သိပ္ပံပညာရှင်တွေနဲ့ အရာရှိတွေ လက်ခုပ်တီးကာ အချင်းချင်း ပွေ့ဖက်ခဲ့ကြသလို အိန္ဒိယပြည်သူတွေကလည်း လမ်းတွေမှာ မီးရှူးမီးပန်းဖောက်၊ ကခုန်အောင်ပွဲခံခဲ့ကြပါတယ်။

အိန္ဒိယဟာ လကမ္ဘာပေါ် ရောက်ခဲ့ပြီလို့ အိန္ဒိယအာကာသ သုတေသန အဖွဲ့အစည်း(ISRO)မှ အကြီးအကဲ ဆိုမာနက်က ဆိုလိုက်ပါတယ်။

ယခုဆင်းသက်နိုင်ခဲ့တဲ့ အာကာသယာဥ်က ချန်ဒရာယန်-၃ ယာဉ်ဖြစ်ပြီး အမေရိကန်၊ တရုတ်၊ ယခင်ဆိုဗီယက်ပြည်ထောင်စု နောက်ပိုင်း လကမ္ဘာပေါ်သို့ အောင်မြင်စွာဆင်းသက်နိုင်ခဲ့တဲ့ စတုတ္ထမြောက်နိုင်ငံ ဖြစ်လာပါတယ်။

အာကာသယာဥ်မှ ပုံရိပ်တွေကို ISRO မှ မျှဝေဖော်ပြရာမှာ လကမ္ဘာရဲ့မျက်နှာပြင်နဲ့ အာကာသယာဥ်ရဲ့ ခြေတိုင်၊ အရိပ်တို့ကို တွေ့မြင်ရပါတယ်။

လရဲ့ တောင်ဝင်ရိုးစွန်းဟာ ဆင်းသက်ဖို့ ခက်ခဲကြမ်းတမ်းပေမယ့် ထိုဒေသရဲ့ အေးခဲခြင်းကြောင့် လောင်စာ၊ စွမ်းအင်တို့ ရရှိနိင်သလို့ အနာဂတ်မစ်ရှင်များအတွက်လည်း သောက်သုံးရေ ရရှိနိုင်ပါတယ်။

ရုရှားသမ္မတ ဗလာဒီမာပူတင်က အိန္ဒိယနိုင်ငံကို ဂုဏ်ပြုကြောင်း မိုဒီထံ စာပေးပို့ခဲ့ပါတယ်။

နာဆာ (NASA)ကြီးကြပ်ရေးမှူး ဘီလ်နယ်လ်ဆင်ကလည်း လကမ္ဘာပေါ် ဆင်းသက်နိုင်ခဲ့တဲ့အတွက် ISRO ကို ဂုဏ်ပြုလိုက်ပါတယ်။

ချန်ဒရာယန်-၃ အာကာသယာဥ်လွှတ်တင်ဖို့ကို အိန္ဒိယဟာ ကာလကြာရှည်စွာ စီစဥ်နေခဲ့ပြီး ၂၀၂၃ ဇူလိုင် ၁၄ ရက်နေ့က လွှတ်တင်ရန် စီစဉ်ထားခဲ့ပါတယ်။

ဒါဟာ လကမ္ဘာပေါ် လွှတ်တင်ရာမှာ အိန္ဒိယတို့ရဲ့ ဒုတိယအကြိမ်မြောက် ကြိုးပမ်းမှုဖြစ်ပြီး ရုရှားနိုင်ငံမှ လူနာ-၂၅ မစ်ရှင် မအောင်မြင်ခဲ့ပြီးနောက် တစ်ပတ်မကြာခင်မှာ အိန္ဒိယက လွှတ်တင်အောင်မြင်ခဲ့တာ ဖြစ်ပါတယ်။

ယခု ချန်ဒရာယန်-၃ ဟာ နှစ်ပတ်ကြာတဲ့အထိ ဆက်လက်လုပ်ဆောင်နေဦးမှာ ဖြစ်ပါတယ်။

ယခုလို ဆင်းသက်နိုင်ခြင်းကြောင့် မားစ်ဂြိုဟ်နဲ့ ဗီးနပ်စ်ဂြိုဟ်တို့အထိပါ ဆက်လက်ချဲ့ထွင်နိုင်ဖို့ ယုံကြည်ချက်တွေ ရှိလာပါတယ်။

လပေါ်သို့ မဆင်းသက်မီ အိန္ဒိယနိုင်ငံရဲ့ သတင်းတွေမှာ ထိုသတင်းသာ နေရာယူထားခဲ့ပါတယ်။

နိုင်ငံတဝှမ်းမှာ ဆုတောင်းမျှော်မှန်းနေကြပြီး အာကာသယာဥ်ဆင်းသက်မှုကို တိုက်ရိုက်ကြည့်ရှုခဲ့ကြပါတယ်။

အိန္ဒိယဟာ စီးပွားရေးမှာသာမက သိပ္ပံနဲ့ နည်းပညာပိုင်းမှာလည်း တိုးတက်မှုတွေ ရှိလာပါပြီလို့ စွမ်းအင်ဝန်ကြီးက သတင်းထောက်တွေကို ပြောကြားခဲ့ပါတယ်။
Source: Reuters
#World_News
#အိန္ဒိယ #ချန်ဒရာယန်-၃အာကာသယာဥ်း #လကမ္ဘာပေါ်သို့ပထမဆုံးအကြိမ်ဆင်းသက်
#YMG #Yangon_Times

Published_ 24 August 2023

ခန္ဓာကိုယ်အတွက် အကောင်းဆုံး အရွက်တွေထဲမှာ ကန်စွန်းရွက်က အပါအဝင်ဖြစ်ကြောင်း ဗိုက်တာမင်နဲ့ သတ္တုဓာတ်ပါဝင်မှုအပေါ် CDC က တွက်ချက်ထားတာ ဖြစ်ပါတယ်။

အသီးအနှံနဲ့ ပတ်သက်လာရင်တော့ ကျန်းမာရေးနဲ့ အညီညွတ်ဆုံးက ခရမ်းချဥ်သီး ဖြစပါတယ်။

ရုက္ခဗေဒနည်းအရ စဥ်းစားရင် ခရမ်းချဥ်သီးက အသီးမျိုးနွယ်ဖြစ်ပါတယ်။

ခရမ်းချဥ်သီးမှာ ဓာတ်တိုးဆန့်ကျင်ပစ္စည်း အများအပြား ပါဝင်ပါတယ်။

ဓာတ်တိုးခြင်းကို ဖြစ်စေပြီး ကင်ဆာ၊ ဆီးချို၊ နှလုံးရောဂါ၊ အခြားနာတာရှည်ရောဂါများဖြစ်စေတဲ့ ပစ္စည်းတွေမှ ကင်းဝေးစေပါတယ်။

CDC မှ အာဟာရဓာတ် တွက်ချက်ရာမှာ ဟင်းသီးဟင်းရွက်နဲ့ အသီးအနှံတိုင်းရဲ့ ၁၀၀ ကယ်လိုရီမှာ ပါဝင်တဲ့ အာဟာရဓာတ် ၁၇ မျိုး ပါဝင်မှုအပေါ် အခြေခံတာဖြစ်ပါတယ်။

ဟင်းသီးဟင်းရွက်တွေက အသီးအနှံတွေထက် ကယ်လိုရီပါဝင်မှု နည်းပါးတာကြောင့် ဟင်းသီးဟင်းရွက်ကို ပိုစားပေးရပါတယ်။

ခရမ်းချဥ်သီးက ၁၂ ကယ်လိုရီနဲ့ ကာဗိုဟိုက်ဒရိတ် ၃ ဂရမ်အောက်သာ ပါဝင်ပြီး အနီရောင်သမ်းစေတဲ့ အရေးကြီးအာဟာရဓာတ် လိုင်ကိုပင်းလည်း ပါဝင်ပါတယ်။

ခရမ်းချဥ်သီးနဲ့ ခရမ်းချဥ်သီးဖြင့် ပြုလုပ်ထားတဲ့ စားစရာတွေ စားသုံးခြင်းဖြင့် ကင်ဆာနဲ့ နှလုံးရောဂါဖြစ်ခြင်းတို့မှ ကာကွယ်ပေးနိုင်ပါတယ်။

၂၀၂၁ အမ်ဘရဲလား လေ့လာချက်အရ ခရမ်းချဥ်သီးနဲ့ လိုင်ကိုပင်စားသုံးခြင်းဖြင့် နှလုံးသွေးကြောကျဥ်းရောဂါ၊ အစာအိမ်ကင်ဆာ၊ ဆီးကျိတ်ကင်ဆာ၊ ဦးနှောက်သွေးကြောရောဂါတို့ကို ကာကွယ်ပေးနိုင်မှာ ဖြစ်ပါတယ်။

ဒါ့အပြင် ခရမ်းချဥ်သီးမှာ ဗိုက်တာမင်-အေနဲ့စီလည်း ကြွယ်ဝစွာပါဝင်ပါတယ်။

အကောင်းဆုံးကတော့ သဘာဝအတိုင်း ရင့်မှည့်လာတဲ့ ခရမ်းချဥ်သီးကို အသုံးပြုဖို့ပဲ ဖြစ်ပါတယ်။

ခရမ်းချဥ်သီးကို ချက်ပြုတ်လိုက်ပါက လိုင်ကိုပင်းဓတ် မြင့်မားစေနိုင်တာကြောင့် ဟင်းချက်ရာမှာ ထည့်သွင်းအသုံးပြုသင့်ပါတယ်။

ခရမ်းချဥ်သီးကို ကျန်းမာရေးနဲ့ညီညွတ်တဲ့ အဆီများနဲ့ တွဲဖက်အသုံးပြုခြင်းကလည်း လိုင်ကိုပင်းစုပ်ယူခြင်းကို အားပေးပါတယ်။
Source: delish
#World_Health
ခရမ်းချဥ်သီး #ကျန်းမာရေးနှင့်အညီညွတ်ဆုံးအသီး #ပညာရှင်များဆို
#YMG #Yangon_Times

Published_ 24 August 2023

ကချင်ပြည်နယ်၊ ဝိုင်းမော်မြို့၊ ရပ်ကွက် (၅) တွင် နေအိမ် တစ်အိမ်ဓားပြတိုက်ခံရ၍ ငွေကျပ်သိန်းပေါင်း ငါးထောင်ကျော် ပါသွားကြောင်း ဒေသခံများထံမှ သိရသည်။

သြဂုတ်လ ၂၃ ရက် ညနေ ၅ နာရီခွဲခန့်အချိန်က အဆိုပါနေအိမ်သို့ ဆိုင်ကယ်များစီး၍ Mask တပ်ထားသည့် လူငယ် ၆ ဦးက သေနတ်များကိုင်ဆောင်လျက် ဝင်ရောက်ကာ ဓားပြတိုက်ခဲ့ခြင်း ဖြစ်ကြောင်း သိရသည်။

ယင်းတို့က အိမ်သားများနှင့် ဧည့်သည့်များအား ကြိုးဖြင့် တုတ်ပြီးနောက် ငွေနှင့် ပစ္စည်းများကို ယူဆောင် ထွက်ပြေးသွားခြင်းဖြစ်ကြောင်း၊ဓားပြတိုက်ခံရသည့်နေအိမ်ပိုင်ရှင်မှာ ဦးမိုးကျော်ထွန်း ဆိုသူ၏ နေအိမ် ဖြစ်ကြောင်းသိရသည်။

ဓားပြအတိုက် ခံရသောကြောင့် မြန်မာငွေ ကျပ်သိန်း ၅၀၀၀၊ တရုတ်ငွေ ယွမ် ၇၀၀၀၀၊ လက်စွပ်တစ်ကွင်း၊ ဆိုင်ကယ် တစ်စီးနှင့် ဖုန်း ၇ လုံးလည်းပါသွားခဲ့ကြောင်းလည်း ဒေသခံ သတင်းရင်းမြစ်များက ပြောသည်။

လက်ရှိတွင် လုံခြုံရေးအဖွဲ့များက အဆိုပါ ဖြစ်စဉ်အပေါ် လိုက်ပါဆောင်ရွက်နေကြကြောင်းလည်း သိရသည်။
Yangon_Times/PP
#Local_News
#YMG #Yangon_Times