1 December 2023

ဗိုလ်တထောင်စေတီတော်သို့ လာရောက်ဖူးမြော်သည့် ပြည်ပဧည့်ဝင်ကြေးကို ဇန်နဝါရီလ(၁)ရက်မှစတင်ပြီး တိုးမြှင့်ကောက်ခံမည်ဖြစ်ပြီး ယခုလအတွင်းတော့ ကျပ်တစ်သောင်းဖြင့်ဝင်ရောက်နိုင်သေးကြောင်း စေတီတော် ဂေါပကအဖွဲ့ထံမှသိရသည်။

ဗိုလ်တထောင်ကျိုက်ဒေးအပ်ဆံတော်ဦးစေတီတော်ကြီးသို့ လာရောက်ဖူးမြော်သည့် နိုင်ငံခြားသားခရီးသွားများ အနေဖြင့်၂၀၂၄ခုနှစ်ဇန်နဝါရီလ၁ရက်မှစတင်ပြီး ဧည့်ဝင်ကြေး၁၅၀၀၀ကျပ်အဖြစ်ပြောင်းလဲသတ်မှတ်ကောက်ခံ မည်ဖြစ်သည်ဟုဆိုသည်။

အဆိုပါစေတီတော်ကြီးတွင် ဧည့်ဝင်ကြေးကျပ်တစ်သောင်းနှုန်းဖြင့် ကောက်ခံနေရာမှ ယခု၁၅၀၀၀အဖြစ် ပြောင်းလဲကောက်ခံတော့မည်ဖြစ်ပြီး နိုင်ငံခြားငွေလဲလှယ်မှုတန်ဖိုးများအရ ရွှေတိဂုံစေတီတော်နှင့် အခြားယဉ်ကျေးဇုန်များ၊ ယဉ်ကျေးမှုပြတိုက်များတွင်လည်း ပြည်ပဧည့်ဝင်ကြေးများကို တိုးမြှင့် ကောက်ခံလျက်ရှိကြောင်းသိရသည်။

ဗိုလ်တထောင်စေတီတော်ကြီးကို ထိုင်းအဖွဲ့လိုက်ခရီးသွားများ၊ဗီယက်နမ်အဖွဲ့လိုက်ခရီးသွားများနှင့် နိုင်ငံတကာ မှခရီးသွားဝင်ရောက်မှုများများပြားလျက်ရှိပြီး ရန်ကုန်မြို့တွင်ခရီးသွားလာရောက်မှုအများဆုံး စေတီတော်ကြီး တစ်ဆူလည်းဖြစ်ကြောင်း သိရသည်။
Yangon Time/tthl
#Local_News
#Yangon_Times #Yangon_Media_Group #YMG_News

၁ ဒီဇင်ဘာ ၂၀၂၃

ကာလရှည်ကြာ နှောင့်နှေးနေခဲ့တဲ့ တက်စ်လာရဲ့ ဆိုင်ဘာထရပ် Cybertruck လျှပ်စစ်ကားကို တက္ကဆပ်ပြည်နယ် ဩစတင်မှာ ကြာသပတေးနေ့က ထုတ်ဖော်ပြသလိုက်ပါတယ်။ အဲဒီကားဟာ ဈေးနှုန်း အမေရိကန်ဒေါ်လာ ၆၀,၉၉၀ကနေ ၉၉,၉၉၀ ကြားရှိမယ်လို့ တက်စ်လာပိုင်ရှင် အီလွန်မတ်စ်ကပြောပါတယ်။ အဲဒီဈေးနှုန်းဟာ ၂၀၁၉တုန်းက သူပြောဖူးထက်ဈေးထက်များနေပါတယ်။

ဆိုက်ဘာထရပ်ကို တောက်ပြောင်တဲ့ သံမဏိနှင့်တည်ဆောက်ထားပါတယ်။ မှန်တွေက သံချပ်ကာကားမှန်က အမြန်နှုန်း တစ်နာရီ မိုင်၇၀နှင့်လာတဲ့ ဘေ့စ်ဘောတစ်လုံးကို ခံနိုင်ရည်ရှိပြီး ကလပ်စ်ဖိုးအသံလုံမှန်က ကားအတွင်းခန်းထဲမှာ အာကာသထဲရောက်နေရသလို တိတ်ဆိတ်အေးချမ်းစေမယ်လို့ တက်စ်လာက ဆိုထားပါတယ်။ကားရဲ့ ပုံစံက ၁၉၇၇ခုနှစ် ဂျိမ်းစ်ဘွန်းရုပ်ရှင် "The Spy Who Loved Me” ဇာတ်ကားထဲက ကားကနေ ရေငုပ်သင်္ဘောဖြစ်သွားတဲ့ ဒီဇိုင်းကို ခံစားပုံစံထုတ်ထားတာဖြစ်တယ်လို့ မတ်စ်က ဆက်ပြောပါတယ်။

အသုံးပြုတဲ့ သတ္တုအမျိုးအစားနှင့် သမားရိုးကျမဟုတ်ဘဲ ရှေ့ပြေးလှတဲ့ စတိုင်တွေကြောင့် ပိုရှုပ်ထွေးပြီး ထုတ်လုပ်မှုစရိတ်တွေ ပိုတက်လာ တာဖြစ်ပါတယ်လို့ ကျွမ်းကျင်သူတွေကပြောပါတယ်။

ဒါပေမယ့် မတ်စ်ကတော့ သူ့ရဲ့ ဆိုက်ဘာထရပ်ကားဟာထရပ်ကားတစ်စီးထက်ပိုတယ်။ ပြိုင်ကားတစ်စီးထက်ပိုမြန်တယ်” လို့ ပြောဆိုပါတယ်။

ဆိုက်ဘာထရပ်ဟာ အားတစ်ကြိမ်အပြည့်သွင်းပြီးရင် မိုင်၃၄၀ခန့် မောင်းနှင့်နိုင်ပါတယ်။ ဘက်ထရီအပိုထပ်တပ်ရင် မိုင်၄၇၀ အထိမောင်းနှင်နိုင်အောင်လုပ်ထားပါတယ်။ ၂၀၁၉တုန်းကတော့ အီလွန်မတ်စ်ကဒီကားကို မိုင်၅၀၀အထိမောင်းနိုင်မယ်ပြောထားတာပါ။

ဆိုက်ဘာထရပ်ဟာ လေးနှစ်နီးပါးအတွင်း တက်ဆ်လာရဲ့ ပထမဆုံးထွက်ပေါ်လာတဲ့ မိုဒယ်အသစ်ဖြစ်ပါတယ်။

 Source Reuters/Tesla website

Published 1 December 2023

ကရင်ပြည်နယ် ကော့ကရိတ် တွင် တိုက်ပွဲ ဖြစ်ပွားနေသောကြောင့် ကော့ကရိတ်မြို့အနီး အာရှ လမ်း ပေါ်တွင် ကုန်တင်ယာဉ်များနှင့် ခရီးသွား ပြည်သူ အချို့ပိတ်မိနေကြောင်း ဒေသခံ ပြည်သူများထံ က သိရသည်။

ယနေ့ နံနက် ၈ နာရီ ခန့် က စပြီး ကော့ကရိတ် မြို့ အနီး မြ၀တီ-ကော့ကရိတ် အာရှလမ်းကြီး ဖြတ်သန်းခွင့် မရတော့ဘဲ ကားများ ကို လမ်းပေါ်တွင် ရပ်ထားရက ပြည်သူအချို့ မှာ လမ်းဘေးရှိ ဘေးကင်းသည့် နေရာတွင် နေထိုင်နေရကြောင်း သိရသည်။

'' ညကတည်း အသံ တွေကြားရတယ် အခုမနက် ကျတော့ ကော့ကရိတ် နား ကနေ ဖြတ်လို့ မရတော့ဘူး ကျွှန်တော်တို့ ကုန်ကားလဲ ပိတ်မိနေတာ လမ်းပေါ်မှာတော့ ကုန်ကားတွေကော ခရီးသွားကားတွေကော များတယ်''ဟု ကုန်တင်ယာဉ်မောင်းသူတစ်ဦးက ပြောသည်။

ထို့ပြင် မြ၀တီကျောက် လုံးကြီး မှ တစ်ဆင့် ထိုင်းနိုင်ငံ သို့ သွားရောက်မည့် MOU အလုပ်သမားများ လဲ လမ်းပေါ်တွင် ပိတ်မိနေကြောင်း အေဂျင်စီများ ထံ က သိရသည်။

'' ညီမ တို့ ရုံး က ကား ၃စီး လာတာ ၂စီး ကတော့ လွတ်သွားတယ်၊တစ်စီးက ပိတ်မိနေသေးတယ်၊အခု ၁၁နာရီ အထိ တော့ ပစ်ခတ်သံတွေ ကြားနေရ သေးတယ်၊လမ်းတော့ မဖွင့်သေးဘူး၊ထမင်းစားနားချိန်တော့ ပြန်ဖွင့်ပေးမယ် ကြားတယ် ဖွင့်မဖွင့်တော့မသိဘူး''ဟု အေဂျင်စီ မှ တာဝန်ရှိသူတစ်ဦးကပြောသည်။

တိုက်ပွဲများကြောင့် ကော့ကရိတ် မြို့ အတွင်းရှိ ဒေသခံ ပြည်သူအများ စု မှာ ယခင် ကတည်းက ပြောင်းရွှေ့နေထိုင်ကျမှု များ သဖြင့် လက်ရှိ တိုက်ပွဲ အခြေနေကြောင့် မြို့ အတွင်း ပိတ်မိနေသည့် ဒေသခံ ပြည်သူ အနည်းငယ်သာ ရှိကြောင်း သိရသည်။
Yangon Time/LW
#Local_News
#Yangon_Times #Yangon_Media_Group #YMG_News

Published_ 1 December 2023

မြန်မာ-ရုရှား နည်းပညာကဏ္ဍ ပိုမိုပူးပေါင်း ဆောင်ရွက်နိုင်ရေး “Aquarius Day” ဖိုရမ်ကို နိုဝင်ဘာ ၃၀ ရက်တွင် နေပြည်တော် မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန-၂ ၌ ကျင်းပပြုလုပ်ခဲ့ပါတယ်။

ဖိုရမ်ကို ဒစ်ဂျစ်တယ်အသွင်ကူးပြောင်းရေး၊ ဒစ်ဂျစ်တယ် စီးပွားရေး၊ e-Government စနစ်ဖွံ့ဖြိုးတိုးတက်ရေး၊ ဆိုက်ဘာလုံခြုံရေးနှင့် သတင်း အချက်အလက် နည်းပညာကဏ္ဍများတွင် ပူးပေါင်းဆောင်ရွက်နိုင်ရေးနှင့် Aquarius နည်းပညာကုမ္ပဏီ၏ ထုတ်ကုန်များအား ပိုမိုနားလည်စေရန်ရည်ရွယ်ပြီး ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေးဝန်ကြီးဌာနနှင့် Aquarius နည်းပညာကုမ္ပဏီတို့ပူးပေါင်း၍ ကျင်းပတာ ဖြစ်ပါတယ်။

အခမ်းအနားတွင် နစကအဖွဲ့ဝင်၊ ဒုတိယဝန်ကြီးချုပ်နှင့် ပြည်ထောင်စုဝန်ကြီး ဗိုလ်ချုပ်ကြီးမြထွန်းဦးက ယနေ့ “Aquarius Day” ဖိုရမ်အခမ်းအနားကို မြန်မာနိုင်ငံ၏ ဒစ်ဂျစ်တယ်အသွင်ကူးပြောင်းရေးနှင့် e-Government စနစ်ဖွံ့ဖြိုးတိုးတက်ရေးကို အထောက်အကူပြုနိုင်ရန် ရည်ရွယ်ကျင်းပတာ ဖြစ်တယ်လို့ ပြောပါတယ်။

“Aquarius Day” ဖိုရမ်မှတစ်ဆင့် နှစ်နိုင်ငံနည်းပညာ ပူးပေါင်းဆောင်ရွက်မှုများ မြှင့်တင်ရန်၊ မြန်မာနိုင်ငံ၏ ဒစ်ဂျစ်တယ်အသွင်ကူးပြောင်းရေးနှင့် e-Government စနစ် ဖွံ့ဖြိုးတိုးတက်ရေးအတွက် အထောက်အပံ့ပြုနိုင်ရန် ကြိုးပမ်းကြရမယ်လို့ ဆိုပါတယ်။

ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီး ဒေါက်တာကံဇော်က e-Government စနစ် ဖွံ့ဖြိုးတိုးတက်ရေးအတွက် ပြည်တွင်းနှင့် ဒေသတွင်းပူးပေါင်း ဆောင်ရွက်မှုများ၊ မြန်မာနိုင်ငံ၏နည်းပညာကဏ္ဍတွင် ရင်းနှီးမြှုပ်နှံမှုအခွင့်အလမ်းများ တိုးတက်လာစေရေး ဆောင်ရွက်မှုများ၊ မြန်မာနိုင်ငံဆိုင်ရာ ရုရှားနိုင်ငံ၊ သံအမတ်ကြီး H.E. Mr. Iskander Azizov က နှစ်နိုင်ငံအကြား ချစ်ကြည်ရင်းနှီးမှုနှင့် နည်းပညာ ပူးပေါင်းဆောင်ရွက်မှုများကို အရှိန်မြှင့်တင်ရန်၊ မြန်မာနိုင်ငံ၏ ဒစ်ဂျစ်တယ် အသွင်ကူးပြောင်းရေးနှင့် e-Government စနစ် ဖွံ့ဖြိုးတိုးတက်ရေးကို အထောက်အကူပြု နိုင်ရေးအတွက် Aquarius ကုမ္ပဏီအပါအဝင် ရုရှား IT ကုမ္ပဏီများအနေဖြင့် နည်းပညာ ဖလှယ်မှုများ၊ IT Solution အတွေ့အကြုံများနှင့် ထုတ်ကုန်များအကြောင်းကို ပိုမိုနားလည် စေရန်ရည်ရွယ်ပြီး ယခုဖိုရမ်ကို ကျင်းပခြင်းဖြစ်တယ်လို့ ပြောပါတယ်။

ထို့ပြင် Aquarius နည်းပညာ ကုမ္ပဏီဥက္ကဋ္ဌ Mr. Vladimir Stepanov က လွတ်လပ်၍ ရေရှည်တည်တံ့သော ရုရှား-မြန်မာ နိုင်ငံတကာ နည်းပညာပူးပေါင်း ဆောင်ရွက်မှု အခြေအနေများကိုလည်း ဆွေးနွေးခဲ့ကြောင်း သတင်းရရှိပါတယ်။
ymg_mnn
#Yangon_Media_Group
#Local_News
#Yangon_Times #Yangon_Media_Group #YMG_News

Published 1 December 2023

နေလုံးကြီးဟာ လှုပ်ရှားမှု ရုတ်တရက်မြင့်မားလာပြီး အာကာသထဲကို ပူပြင်းတဲ့ ပလတ်စ်မာအမှုန်အမွှားများ ရောက်ရှိစေတဲ့ နေအစက်အပြောက်များ သိသိသာသာ များပြားလာကာ ကမ္ဘာမြေမှာ ရေဒီယိုလှိုင်းပြတ်တောက်မှု ဖြစ်ပေါ်ပြီး ဘူမိသံလိုက်မုန်တိုင်းများအသွင် ဖြစ်လာနိုင်ဖွယ်ရှိကြောင်း နာဆာ(NASA)ရဲ့ လေ့လာချက်ကို Newsweek က ဖော်ပြထားပါတယ်။

နေမျက်နှာပြင်ပေါ်မှာ အစက်အပြောင်မည်းများ ရှိနေပြီး ယခုရက်ပိုင်းအတွင်း သံလိုက်စက်ကွင်း အလွန်အားကောင်းလာကာ ထိုအစက်အပြောက် အရေအတွက်တွေ ဆယ်ဆခန့် များပြားလာသဖြင့် အပူငွေ့ အများအပြား နေ့စဥ်ထုတ်လွှတ်နေပါတယ်။

နေကနေ ပလတ်စ်မာထုကြီး အရှိန်မြန်မြန်ဖြင့် ထုတ်လွှတ်တဲ့အခါ ကမ္ဘာမြေသံလိုက်လှိုင်းနဲ့ လေထုကို ထိခိုက်နိုင်ဖွယ် ရှိနေပါတယ်။

နေကဖြစ်လာတဲ့ ဆိုလာရောင်ခြည်တွေနဲ့ အပူငွေ့ထုတွေက သံလိုက်လှိုင်းရှုပ်ထွေးခြင်းကြောင့် ဖြစ်လာကြောင်း နော်တင်ဂမ်ထရန့်တက္ကသိုလ် နက္ခတ္တနဲ့ သိပ္ပံဆက်သွယ်ရေး တွဲဖက်ပရော်ဖက်ဆာ ဒန်နီယယ်ဘရောင်းက ပြောပြသွားပါတယ်။

နေအစက်အပြောက်တွေက နိုဝင်ဘာ ၁၈ ရက်နေ့ကစပြီး များပြားလာတာဖြစ်ကြောင်း Spaceweather.com မှာ ဖော်ပြထားပါတယ်။

အပူငွေ့ထုထဲက အမှုန်အမွှားတွေ ကမ္ဘာ့သံလိုက်လှိုင်းနဲ့ လေထုကို ထိခိုက်ပြီး ဆိုလာလေတွေကြောင့် ကမ္ဘာ့အပေါ်ယံလွှာမှာ အော်ရိုရာများ အားကောင်းလာကာ လေထုအနိမ့်ပိုင်းမှာပင် မြင်နိုင်ပါတယ်။

ကမ္ဘာ့သံလိုက်စက်ကွင်းကို နေကလာတဲ့အရာတွေက နှောင့်ယှက်တဲ့အခါ ဘူမိသံလိုက်မုန်တိုင်း ဖြစ်နိုင်တယ်လို့ ဆိုလာရူပဗေဒအဖွဲ့မှ ဟော့မော်ဂန်က ပြောပြခဲ့ပါတယ်။

ဒါ့အပြင် လျှပ်စစ်ဓာတ်အားလိုင်းနဲ့ ရေဒီယိုလှိုင်း ပြတ်တောက်ခြင်းများလည်း ဖြစ်ပေါ်နိုင်ပါတယ်။
Source: WION
#World_Science
#Yangon_Times #Yangon_Media_Group #YMG_News

Published_ 1 December 2023

မြန်မာနိုင်ငံနှင့် နီပေါနိုင်ငံတို့အကြား ခရီးသွားလုပ်ငန်းများ မြှင့်တင်ဆောင်ရွက် နိုင်ရန်အတွက် နှစ်နိုင်ငံအကြား တိုက်ရိုက်လေကြောင်းခရီးစဉ်ပျံသန်းရေးကို နှစ်နိုင်ငံ တာဝန်ရှိသူများ ဆွေးနွေးခဲ့ကြောင်း သိရပါတယ်။

နစကအဖွဲဝင်၊ ဒုတိယဝန်ကြီးချုပ်နှင့် ပိုဆောင်ရေးနှင့် ဆက်သွယ်ရေးဝန်ကြီး ဗိုလ်ချုပ်ကြီးမြထွန်းဦးသည် မြန်မာနိုင်ငံဆိုင်ရာ နီပေါနိုင်ငံသံအမတ်ကြီး H.E. Mr. Harishchandra Ghimire အား နိုဝင်ဘာ (၃၀) ရက်တွင် ပိုဆောင်ရေးနှင့် ဆက်သွယ်ရေးဝန်ကြီးဌာန၌ လက်ခံတွေ့ဆုံစဉ် ဆွေးနွေးခဲ့တာ ဖြစ်ပါတယ်။

တွေ့ဆုံပွဲသို့ ပိုဆောင်ရေးနှင့်ဆက်သွယ်ရေးဝန်ကြီးဌာန ဒုဝန်ကြီး ဦးအောင်ကျော်ထွန်း၊ ဌာနအကြီးအမှူးများနှင့် တာဝန်ရှိသူများ တက်ရောက်ခဲ့ကြောင်း သတင်းရရှိပါတယ်။
ymg_mnn
#Yangon_Media_Group
#Local_News
#Yangon_Times #Yangon_Media_Group #YMG_News

Published 01 December 2023

မြောက်ကိုရီးယားနိုင်ငံက တောင်ကိုရီးယားနဲ့ နယ်စပ်တလျှောက်မှာ ပိုမိုအားကောင်းတဲ့ လက်နက်ကိုင်တပ်များ၊ လက်နက်အသစ်များ နေရာချထားရန် ကတိပြုလိုက်ပြီး ရန်သူတွေဘက်မှ ရန်စလာသမျှကို တုန့်ပြန်သွားရန် စစ်တပ်အသင့်ရှိနေဖို့အတွက် ခေါင်းဆောင်ကင်မ်ဂျုံအန်းက တောင်းဆိုလိုက်ပါတယ်။

တိုင်းပြည်ရဲ့ လေတပ်သားများနေ့ ကြာသပတေးနေ့မှာ ကင်မ်ဂျုံအန်းက လေတပ်ဌာနချုပ်သို့ သွားရောက်ခဲ့ပြီး စစ်တပ်အသင့်ရှိရေးနဲ့ စစ်ပွဲစွမ်းရည်များ တိုးတက်မှုရှိလာရန် ဗျူဟာမြောက် နည်းလမ်းညွှန်များကို ချပြခဲ့ကြောင်း KCNA သတင်းဌာနက ဖော်ပြထားပါတယ်။

ဒီနောက် လေယာဥ်မှူးများ စစ်ရေးပြတဲ့ တိုက်လေယာဥ်စခန်းသို့လည်း သွားရောက်ခဲ့ပါသေးတယ်။

အရေးမသာတဲ့ ဘယ်လိုအခြေအနေမျိုးမှာမဆို လေယာဥ်မှူးများအနေနဲ့ အခက်အခဲမရှိ လေကြောင်းစစ်ဆင်ရေးများ အသင့်လှုပ်ရှားဆောင်ရွက်နိုင်စေရန် ကင်မ်ဂျုံအန်းက အတော်လေးမျှော်မှန်းထားတယ်လို့ KCNA က ဆိုပါတယ်။

အမေရိကန်နဲ့ တောင်ကိုရီးယားတို့ရဲ့ စစ်ရေးလှုပ်ရှားမှုတွေကို စောင့်ကြည့်ရန် ရည်ရွယ်ကာ မြောက်ကိုရီးယားက ယင်းတို့ရဲ့ ပထမဆုံး ကင်းထောက်ဂြိုဟ်တုကို ပြီးခဲ့တဲ့ ရက်သတ္တပတ်က အောင်မြင်စွာ လွှတ်တင်ခဲ့ပါတယ်။

ဒီလွှတ်တင်မှုဟာ ကုလသမဂ္ဂ လုံခြုံရေးကောင်စီရဲ့ ပဋိဉာဥ်စည်းမျဥ်း အများအပြားကို ချိုးဖောက်ရာကျတယ်လို့ အမေရိကန်နဲ့ မဟာမိတ်များက စွပ်စွဲလိုက်ကာ အပြင်းအထန် ရှုတ်ချခဲ့ကြပါတယ်။

မြောက်ကိုရီးယားကတော့ နောက်ထပ်ဂြိုဟ်တုတွေ လွှတ်တင်ဦးမယ်လို့ ဆိုလိုက်ကာ ဒါဟာ ကိုယ်ပိုင်ကာကွယ်ခွင့်အတွက် ကျင့်သုံးတာလို့ သတ်မှတ်ထားပါတယ်။

ဂြိုဟ်တုလွှတ်တင်မှုကို တုန့်ပြန်တဲ့အနေနဲ့ တောင်ကိုရီးယားဘက်က ကိုရီးယားနှစ်နိုင်ငံကြား စစ်ရေးသဘောတူညီချက် တစ်စိတ်တစ်ပိုင်းကို ရပ်ဆိုင်းလိုက်ကာ တင်းကြပ်စွာ စောင့်ကြပ်ထားတဲ့ မြောက်ကိုရီးယားနယ်စပ်တလျှောက် စောင့်ကြည့်ရေးလုပ်ငန်းများ အရှိန်မြှင့်လုပ်ဆောင်ခဲ့ပါတယ်။

ဒါကို မြောက်ကိုရီးယားဘက်ကလည်း နယ်စပ်တဝိုက်မှာ ပိုမိုအားကောင်းတဲ့ တပ်အင်အား၊ လက်နက်အသစ်တွေနဲ့ တုန့်ပြန်နေရာချလိုက်တာ ဖြစ်ပါတယ်။

ကြာသပတေးနေ့မှာ အမေရိကန်က ဂြိုဟ်တုလွှတ်တင်တာနဲ့ ပတ်သက်ပြီး မြောက်ကိုရီးယားအပေါ် ဒဏ်ခတ်ပိတ်ဆို့မှုအသစ်များ ချမှတ်ရန် ပစ်မှတ်ထားကာ ပိတ်ဆို့မှုများ ရှောင်လွှဲနိုင်ရန် အကူအညီပေးနေတယ်လို့ စွပ်စွဲထားတဲ့ ပြည်ပအခြေစိုက်အေးဂျင့်များကို ရွေးချယ်သတ်မှတ်လိုက်ပါတယ်။
Source: Reuters
#World_News
#Yangon_Times #Yangon_Media_Group #YMG_News

Published 1 December 2023

ကလေး ၂ ယောက်အမေဟာ ရေသောက်များလွန်းခြင်းကြောင့် အသက်ဆုံးပါးသွားရပြီး သူ့ရဲ့အမျိုးသားကတော့ ဒီအတွက် ကျန်းမာရေးစောင့်ရှောက်မှုအဖွဲ့တစ်ခုကို အပြစ်တင်နေပါတယ်။

အင်္ဂလန်မှ အသက် ၄၅ နှစ်အရွယ် မစ်ရှဲလ်ဝှိုက်ဟတ်ဟာ စိတ်ဝေဒနာတစ်ခု ခံစားခဲ့ရပြီးနောက် ၂၀၂၁ မေလ ၅ ရက်နေ့မှာ နော်တင်ဂမ်ရှိုင်းယားရှိ မေးလ်ဘရွတ်ခ် စိတ်ကျန်းမာရေးဆေးရုံသို့ ပို့ဆောင်ခဲ့ပါတယ်။

ရေအလွန်အကျူး သောက်ပြီး ကိုမာဝင်သွားတာကို ဆေးဝန်ထမ်းများ နောက်ကျမှ သိခဲ့ပြီးနောက် ၂ ရက်အကြာမှာ သေဆုံးသွားခဲ့ပါတယ်။

အရေးပေါ်ကြပ်မတ်ဆောင်ကို စောစီးစွာ ခေါ်သွားပြီး အားဆေးချိတ်ထားမယ်ဆိုရင် မစ်ရှဲလ်အသက်ကို ကယ်နိုင်လောက်မယ်လို့ အမျိုးသားဖြစ်သူ မိုက်ကယ်ဝှိုက်ဟတ်က ဆိုပါတယ်။

ဝှိုက်ဟတ်မှာ ရေအလွန်အကျူး သောက်တတ်တဲ့ ရောဂါအခြေအနေတစ်ခု ရှိခဲ့ပြီး စိတ်ကျန်းမာရေး ပုံမှန်မဟုတ်သူတွေမှာ တွေ့ရတတ်ကြောင်း BMJ Best Practice ဂျာနယ်မှာ ဖော်ပြခဲ့ပါတယ်။

ဆေးရုံမှ ဆေးဝန်ထမ်းတွေက သူမမှာ ဒီလိုရောဂါရှိတာကို မသိရှိခဲ့ဘဲ အခန်းထဲမှာ သောက်ရေတွေ ရှိနေခဲ့တယ်လို့ မိုက်ကယ်က ဆိုပါတယ်။

သေဆုံးခြင်းအကြောင်းအရင်းကို ရှာဖွေရာမှာ ဝန်ထမ်းတွေက သူမကို ငြိမ်သက်အောင် ဆေးများပေးခဲ့ရာ ကိုမာဝင်သွားတာကို မသိခဲ့ကြဘူးလို့ သိရပါတယ်။

ကင်းစ်မေးလ်ဆေးရုံသို့ ခေါ်ဆောင်ပြီးနောက် ရေသောက်များရာကနေ ဆိုဒီယမ်ပမာဏ နည်းပါးသွားပြီး သေဆုံးခဲ့တာ ဖြစ်ပါတယ်။

ရေသောက်များလွန်းတဲ့အတွက် ဦးနှောက်မှာ ဖောင်းကားလာပြီး အသက်ဆုံးပါးခဲ့ရတာ ဖြစ်ပါတယ်။

အဆိုပါ နော်တင်ဂမ်ဆေးရုံက လွဲမှားချက် ၈ ချက်ကို ဝန်ခံလိုက်ကာ စိတ်ငြိမ်ဆေးပေးတဲ့အချိန် မူဝါဒအတိုင်း မလိုက်နာခြင်းနဲ့ ဝန်ထမ်းတွေဟာ မိုဘိုင်းဖုန်းတွေနဲ့ အာရုံများနေခြင်းတို့ ပါဝင်နေပါတယ်။

ဆေးရုံဖောင်ဒေးရှင်းမှ စီအီးအို အစ်ဖ်တီမာဂျစ်က မိသားစုဝင်တွေကို တောင်းပန်ခဲ့ပါတယ်။

ဝှိုက်ဟတ်လင်မယားဟာ ငယ်စဥ်ကတည်းက ချစ်ကြိုက်ခဲ့ကြတာ ဖြစ်ပါတယ်။

နှစ်ပေါင်း ၃၀ မျှ အတူနေထိုင်ခဲ့ကြပြီး သား ၂ ယောက်မွေးဖွားရာမှာ တစ်ဦးက ဒေါင်းဆင်ဒရုန်းဝေဒနာ ရှိနေကာ မစ်ရှဲလ်က သူ့ကိုအချိန်ပြည့် ဂရုစိုက်ပေးနေခဲ့ပါတယ်။
Source: New York Post
#World_Health
#Yangon_Times # YMG_News #Yangon_Media_Group

Published_30 Nov 2023

မနက်ဖြန် ဒီဇင်ဘာလ ၁ ရက်တွင် တရုတ်-မြန်မာ နှစ်နိုင်ငံတပ်မတော်(ရေ) တို့ ရေကြောင်းလုံခြုံရေး လေ့ကျင့်မှု စတင်မည်ဖြစ်ကြောင်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်‌ဇော်မင်းထွန်းက ပြောသည်။

“မြန်မာနိုင်ငံကို ချစ်ကြည်ရေးအလည်အပတ်ခရီးစဉ်နဲ့ မြန်မာ-တရုတ် ရေကြောင်းလုံခြုံရေး လေ့ကျင့်ခန်း ဆောင်ရွက်ဖို့ ရောက်ရှိနေတဲ့ တရုတ်ပြည်သူ့လွတ်မြောက်ရေးတပ်မတော် တပ်မတော်(ရေ)က အရာရှိ၊ စစ် သည်များအနေနဲ့ ဒီနေ့ မြန်မာနိုင်ငံက စစ်ရေယာဉ်တွေကို အပြန်အလှန် လေ့လာခဲ့ပါတယ်။ မနက်ဖြန် မှာတော့ မြန်မာ-တရုတ် ရေကြောင်းလေ့ကျင့်ရေးလုပ်ငန်း လေ့ကျင့်ခန်း စတင်ဆောင်ရွက်သွားမှာ ဖြစ်ပါတယ်”ဟု ယင်းက နိုဝင်ဘာလ ၃၀ ရက် ညပိုင်းတွင် ပြောသည်။

နိုဝင်ဘာလ ၂၇ ရက်က ရန်ကုန်မြို့၊ သီလဝါ ဆိပ် ကမ်းသို့ မြန်မာ-တရုတ် ရေကြောင်းလုံခြုံရေးဆိုင်ရာ လေ့ ကျင့် ခန်း ဆောင်ရွက်ရန်နှင့် ချစ်ကြည်ရေးခရီးလည်ပတ်ရန်အတွက် တရုတ်ပြည်သူ့လွတ် မြောက်ရေး တပ်မ တော်(ရေ)၊ 44th PLA Navy Escort Task Group(ETG) မှ စစ်ရေယာဉ် ၃ စင်း ရောက်ရှိလာခဲ့ကြခြင်း ဖြစ်သည်။

ယင်းသင်္ဘောများမှာ ဖျက်သင်္ဘော Zi Bo၊ ဖရီဂိတ်စစ်ရေယာဉ် Jing Zhou နှင့် ထောက်ပံ့ရေးစစ်ရေယာဉ် Qian Dao Hu တို့ဖြစ်ပြီး အဆိုပါစစ်ရေယာဉ်များတွင် အဖွဲ့ခေါင်းဆောင်အဖြစ် Senior Captain Sun Bo ဦးစီး၍ အရာရှိ၊စစ်သည်စုစုပေါင်း ၇၀၀ ဦးခန့် လိုက်ပါလာကြကြောင်း သိရသည်။

ယင်းတရုတ်ပြည်သူ့လွတ်မြောက်ရေးတပ်မတော်(ရေ)မှ ချစ်ကြည်ရေးကိုယ်စားလှယ်အဖွဲ့ ကရေတပ်လေ့ ကျင့် ရေး ဌာနချုပ်နှင့် အထင်ကရနေရာများသို့ လေ့လာရေးခရီးသွားရောက်ခြင်း၊သန်လျင်တပ်နယ်ရှိ အခြေခံ ပညာ အ ထက်တန်း ကျောင်း(ဆိပ်ကြီး)တွင် ပညာ သင်ကြားနေသော ကျောင်းသားကျောင်းသူများအား စာရေး ကိရိ ယာ များ လှူဒါန်းခဲ့ကာ ရန်ကုန်မြို့ရှိ အထင်ကရနေရာများသို့ လေ့လာရေးခရီးသွားရောက် လည်ပတ်ခဲ့ကြပြီး ဖြစ်ကြောင်း သိရသည်။

အလားတူ တရုတ်ပြည်သူ့လွတ်မြောက်ရေးတပ်မတော်(ရေ)မှ အရာရှိ၊ စစ်သည်များနှင့် မြန်မာ့တပ်မတော်မှ တပ်မတော်(ရေ)မှ အရာရှိ၊စစ်သည်များနှစ်နိုင်ငံချစ်ကြည်ရေး ဘတ်စကက်ဘော အားကစားပြိုင်ပွဲကို လည်း ပြုလုပ်ခဲ့ကြောင်း သိရသည်။

ယခုအခါ တရုတ်-မြန်မာ နှစ်နိုင်ငံ၏ နယ်စပ်ဒေသများတွင် တည်ငြိမ်ရေး၊ တရားဥပဒေစိုးမိုးရေးနှင့် လုံခြုံ ရေးအတွက်လည်း နှစ်နိုင်ငံအစိုးရနှင့် လုံခြုံရေးတပ်ဖွဲ့ဝင်များအကြား နီးကပ်စွာ ပူးပေါင်း‌ဆောင်ရွက်လျက် ရှိကြောင်းလည်း သိရသည်။
Yangon_Times/PP
#Local_News
#YMG_News #Yangon_Times #Yangon_Media_Group

တရုတ်တောင်ပိုင်း ကွမ်တုံပြည်နယ် ရှန်ကျန်နဲ့ ကျုံရှန်မြို့များကြား ပင်လယ်ဖြတ်သန်းအဝေးပြေး လမ်းမကြီးစီမံကိန်းဟာ ပြီးစီးရန် ပိုမိုနီးစပ်လာပြီ ဖြစ်ပါတယ်။
 ၆.၈ ကီလိုမီတာခန့်ရှိတဲ့ ရေအောက်လိုဏ်ခေါင်းပိုက်ကြီးမှာ အင်္ဂါနေ့က နောက်ဆုံးကွန်ကရစ် လောင်းခဲ့ကာ အပြီးသတ်ရန် နီးစပ်လာပြီလို့ ကွမ်တုံပြည်နယ် ဆက်သွယ်ရေးအဖွဲ့ကုမ္ပဏီမှ ပြောကြားခဲ့ပါတယ်။
#Asia_Development
#Published 30 November 2023
#Yangon_Times #YMG_News #Yangon_Media_Group
‌

၃၀ နိုဝင်ဘာ ၂၀၂၃

မြန်မာ-တရုတ် ရေကြောင်းလုံခြုံရေးလေ့ကျင့်ခန်း စတင်ဆောင်ရွက်မည့်ကိစ္စနှင့်စစ်ရေယာဉ်များအပြန်အလှန်လေ့လာခြင်း

နယ်စပ်ဒေသများတွင် တရားမဝင် ဝင်ရောက်နေထိုင်သည့် နိုင်ငံခြားသားများအား  တရုတ်နိုင်ငံသို့ ထပ်မံပြန်လည် လွှဲပြောင်းပေးခြင်းများ

နယ်စပ်ဒေသတည်ငြိမ်အေးချမ်းရေး၊ တရားဥပဒေစိုးမိုးရေး၊ လုံခြုံရေးတို့အတွက် တရုတ်-မြန်မာနှစ်နိုင်ငံ အစိုးရနှင့် လုံခြုံရေး  တပ်ဖွဲ့ဝင်များအကြား ပူးပေါင်းဆောင်ရွက်နေမှုများ

နိုင်ငံအတွင်းဖြစ်ပေါ်နေသောအခြေအနေများကို ကောလာဟလသတင်း မျိုးစုံထုတ်လွှင့်နေမှုများ

၃၀-၁၁-၂၀၂၃ ရက်နေ့ ရှမ်းပြည်နယ်(အရှေ့မြောက်ဘက်)၊ ကယားပြည်နယ်နှင့် ရခိုင်ပြည်နယ်တို့တွင် ထိတွေ့တိုက်ပွဲ ဖြစ်ပွားမှုများ

နှင့်ပတ်သက်၍ နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ရှင်းလင်းပြောကြားခဲ့ပါတယ်။

အဆိုပါပြောကြားချက် အပြည့်အစုံကို ပြန်လည်ဖော်ပြပေးအပ်ပါတယ်။

-ymg/knl

Published_ 30 November 2023

မြန်မာနိုင်ငံအစိုးရ၏ ပန္နရသမအကြိမ် (၁၅) ကြိမ်မြောက် မဇ္စျိမဒေသ ဗုဒ္ဓဂယာ မဟာကထိန်သင်္ကန်းဆက်ကပ်လှူဒါန်းပွဲကို နိုဝင်ဘာ ၂၆ ရက်တွင် အိန္ဒိယနိုင်ငံ၊ ဘီဟာပြည်နယ်၊ ဂယာမြို့၊ မြန်မာ ဘုန်းတော်ကြီးကျောင်း၌ ကျင်းပပြုလုပ်ခဲ့ကြောင်း သိရပါတယ်။

အဆိုပါအခမ်းအနားသို့ သာသနာရေးနှင့် ယဉ်ကျေးမှုဝန်ကြီးဌာနမှ ဒုတိယ ဝန်ကြီး ဦးအေးထွန်း၊ အိန္ဒိယနိုင်ငံဆိုင်ရာ မြန်မာသံအမတ်ကြီး ဦးမိုးကျော်အောင်နှင့် မြန်မာသံရုံး၊ ကောင်စစ်ဝန်ချုပ်ရုံး၊ မြန်မာစစ်သံရုံး (ကြည်း၊ ရေ၊လေ) တို့မှ ဝန်ထမ်းများ တက်ရောက်ခဲ့ ကြပါတယ်။

အခမ်းအနားတွင် အိန္ဒိယ၌ သီတင်းသုံးကြတဲ့ မြန်မာဘုန်းတော်ကြီးကျောင်းများမှ ကျောင်းထိုင်ဆရာတော်ကြီးများ၊ သံဃာတော်များ၊ ကိုရင်များ၊ သီလရှင်များနှင့် တက္ကသိုလ် အသီးသီးတွင် ပညာသင်ကြားနေသည့် သံဃာတော်များ/သီလရှင်များအား လှူဖွယ်ဝတ္ထုနှင့် မဟာဘုံကထိန်သင်္ကန်းများ ဆက်ကပ်လှူဒါန်းပြီး နေ့ဆွမ်းဆက်ကပ် လှူဒါန်းခဲ့ကြောင်း သိရှိရပါတယ်။
ymg_mnn
#Local_News
#Yangon_Times # YMG_News #Yangon_Media_Group