၂၇ အောက်တိုဘာ ၂၀၂၃

ယနေ့မနက်ပိုင်းတွင် ဖြစ်ပွားနေသော ချင်းရွှေဟော်နှင့်အနီးတစ်ဝိုက် တိုက်ပွဲများကိစ္စနှင့်ပတ်သက်၍ နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းကို YMG. ကဆက်သွယ်မေးမြန်းခဲ့မှုအပေါ် ပြန်လည် ဖြေကြားချက် အပြည့်အစုံ။

#Local_News
Published-27 October 2023

မြန်မာ့ထောပတ်သီးနှံ တိုးမြှင့်ထုတ်လုပ်ရေး၊ တန်ဖိုးမြင့်ထုတ်ကုန်များအဖြစ် ထုတ်လုပ်ပြီး ပြည်ပသို့တင်ပိုနိုင်ရေးနှင့် ဈေးကွက်ကျယ်ပြန့်စွာ ရရှိရေးတို့အတွက် ယမန်နေ့ကဆွေးနွေးမှုများပြုလုပ်ခဲ့ကြောင်းသိရသည်။

ထောပတ်သီးနှံ စိုက်ပျိုးထုတ်လုပ်မှုတိုးတက်လာစေရန်၊ ထောပတ်သီးနှံမှ ပြည်ပပို့ကုန်ဝင်ငွေတိုးမြှင့် ရရှိစေရန်နှင့် ထောပတ်သီးနှံ၏ တန်ဖိုးကွင်းဆက်တစ်လျှောက် အားသာချက်၊ အားနည်းချက်၊ အခွင့်အလမ်းနှင့် စိန်ခေါ်မှုများကို ဆွေးနွေးဖော်ထုတ်ရန် အတွက် “ထောပတ်သီးနှံစိုက်ပျိုးထုတ်လုပ်မှု၊ ပြည်ပတင်ပို့မှုနှင့်စိန်ခေါ်မှုများ” အလုပ်ရုံဆွေးနွေးပွဲကို အောက်တိုဘာ (၂၆)ရက် နေ့က နေပြည်တော်၌ ကျင်းပခဲ့သည်။

ဆွေးနွေးပွဲတွင် ပြည်ထောင်စုဝန်ကြီးဦးမင်းနောင်က မြန်မာ့ရေမြေရာသီဥတုတွင် အောင်မြင်စွာ စိုက်ပျိုးဖြစ်ထွန်းနိုင်သည့် ထောပတ်သီးနှံစိုက်ပျိုးထုတ်လုပ်မှုကို နိုင်ငံတော်အစိုးရက အားပေးမြှင့်တင်လျက်ရှိပြီး အရည်အသွေးကောင်းသော မြန်မာ့ထောပတ်သီးနှံ တိုးမြှင့်ထုတ်လုပ်ရေး၊ တန်ဖိုးမြင့် ထုတ်ကုန်များအဖြစ် ထုတ်လုပ်ပြီး ပြည်ပသို့တင်ပိုနိုင်ရေးနှင့် ဈေးကွက်ကျယ်ပြန့်စွာ ရရှိရေးတို့အတွက် အလေးထားဆောင်ရွက်ကြောင်း ပြောကြားသည်။

ထောပတ်သီးနှံကို ကမ္ဘာ့ကုန်သွယ်မှုအနေဖြင့် ၂၀၂၁ ခုနှစ်တွင် အမေရိကန်ဒေါ်လာ ၈ ဘီလီယံခန့်ရှိပြီး မြန်မာနိုင်ငံအနေဖြင့် ၂၀၂၁ ခုနှစ်တွင် တန်ချိန်နှစ်ထောင့်လေးရာခန့်၊ ၂၀၂၂ ခုနှစ်တွင် တန်ချိန် ခုနစ်ရာကျော်ခန့်ကို ထိုင်း၊ ကမ္ဘောဒီးယား၊ ဟောင်ကောင်၊ တရုတ်၊ မလေးရှား၊ ဗြိတိန်နိုင်ငံများသို့ တင်ပို့ရောင်းချခဲ့သည်ကို တွေ့ရှိပြီး တင်ပိုသည့် ပမာဏ ၃ ဆကျော် လျော့ကျသွားခြင်းကို သေချာစွာဆန်းစစ်လေ့လာရန် လိုအပ်သည်ဟု ပြောကြားခဲ့ပါသည်။

နှစ်စဉ် ကမ္ဘာ့ထောပတ်သီး ဈေးကွက်ဝယ်လိုအား မြင့်တက်လာလျက်ရှိရာ မြန်မာနိုင်ငံ၏ ရေ၊ မြေ၊ ရာသီဥတုနှင့်ကိုက်ညီသော မျိုးသစ်များတင်သွင်းခြင်း၊ ဒေသကိုက်ညီမှု သုတေသနများဆောင်ရွက်ခြင်း၊ ခေတ်မီစိုက်ပျိုးနည်းပညာများ ကျင့်သုံးခြင်း၊ GAP နှင့် အော်ဂဲနစ်လက်မှတ်များရယူခြင်း၊ တန်ဖိုးမြင့် ထောပတ်သီးထုတ်ကုန်များ ထုတ်လုပ်ခြင်းတို့ကို အကောင်အထည်ဖော်ဆောင်ရွက်ရန် လိုအပ်ပါသည်။

အလားတူထောပတ်သီးအနှစ်၊ ထောပတ်သီး အဆီ၊ အလှကုန်နှင့်ဆေးဝါးများ ထုတ်လုပ်ရန်ကုန်ကြမ်း စသည်ဖြင့် ဈေးကွက်တောင်းဆိုမှုအရ ဆန်းသစ်တီထွင်သောနည်းလမ်းများဖြင့် တန်ဖိုးမြင့် ကုန်ပစ္စည်းအမျိုးမျိုးထုတ်လုပ်ပြီး အကျိုးစီးပွားပိုမိုဖြစ်ထွန်းစေရေး ကြိုးပမ်းသွားမည်ဟု ပြောကြားသည်။

ထောပတ်သီးနှံကို လွန်ခဲ့သည့် ၇၅ နှစ်ခန့်က စတင်၍ မြန်မာနိုင်ငံ၌ စိုက်ပျိုးခဲ့ရာ ရှမ်းပြည်နယ်၊ ချင်းပြည်နယ်၊ စစ်ကိုင်းတိုင်းဒေသကြီးနှင့် မန္တလေးတိုင်းဒေသကြီး ပြင်ဦးလွင်ဒေသတစ်ဝိုက်တွင် အဓိကစိုက်ပျိုးကြသည်။

#Local_News #ထောပတ်သီး #တန်ဖိုးမြင့်ကုန်ပစ္စည်းအမျိုးမျိုး #Yangon_Times/PP

#World_News
Published 27 October 2023

ဂါဇာကမ်းမြောင်ရှိ ပါလက်စ်တိုင်း ဟားမတ်စ်စစ်သွေးကြွတွေကို အစ္စရေးလ်တို့ လက်တုန့်ပြန်ခြင်း အဆုံးမသတ်နိုင်ပါက အမေရိကန်လည်း ဒီပြဿနာမီးကနေ ကင်းလွတ်မှာ မဟုတ်ကြောင်း အီရန်နိုင်ငံခြားရေးဝန်ကြီး ဟိုစိန်အမိုင်ရက်ဒိုလာဟီယန်က ကုလသမဂ္ဂမှာ ကြာသပတေးနေ့က ပြောကြားသွားပါတယ်။

‘’ပါလက်စ်တိုင်းမှာ လူမျိုးသုဥ်း သတ်ဖြတ်မှုတွေကို ချုပ်ကိုင်နေတဲ့ အမေရိကန်တွေကို ပွင့်ပွင့်လင်းလင်း ပြောချင်တာက ထိုဒေသတွင်း စစ်ပွဲဂယက် ပျံ့ပွားလာမှာကို ကျုပ်တို့မလိုလားပါဘူး။ ဂါဇာမှာ သတ်ဖြတ်မှုတွေ ဆက်ပြီးဖြစ်နေမယ်ဆိုရင် သူတို့လည်း ဒီပြဿနာမီးကနေ ကင်းလွတ်မှာ မဟုတ်ပါဘူး’’ လို့ အရှေ့အလယ်ပိုင်းရှိ ၁၉၃ နိုင်ငံပါဝင်တဲ့ အထွေထွေညီလာခံ အစည်းအဝေးမှာ ပြောကြားခဲ့ပါတယ်။

ဂါဇာကို အုပ်စိုးနေတဲ့ ဟားမတ်စ်တို့ဟာ အောက်တိုဘာ ၇ ရက်နေ့က အစ္စရေးလ်ကို ကျူးကျော်ပြီး လူပေါင်း ၁,၄၀၀ ခန့် သတ်ဖြတ်ခဲ့ကာ ဓားစာခံရာဂဏန်းခန့်ကို ဖမ်းဆီးခေါ်ဆောင်သွားတဲ့အတွက် အစ္စရေးလ်က ဟားမတ်စ်တို့ကို အမြစ်ပြတ်ချေမှုန်းရန် ကြွေးကြော်ထားပါတယ်။

အစ္စရေးလ်က ဂါဇာကို လေကြောင်း တိုက်ခိုက်မှုများ ပြုလုပ်နေသလို မြို့ကိုဝိုင်းရံထားပြီး မြေပြင်ကျူးကျော်မှု ပြုလုပ်ရန် ပြင်ဆင်နေပါတယ်။

ထိုအတောအတွင်း လူပေါင်း ၇ ထောင်ကျော် သေဆုံးခဲ့တယ်လို့ ပါလက်စ်တိုင်း အာဏာပိုင်များက ဆိုပါတယ်။

ဟားမတ်စ်တို့က အရပ်သားဓားစာခံတွေကို လွှတ်ပေးဖို့ အသင့်ဖြစ်နေပြီလို့ အီရန်ကို ပြောဆိုခဲ့ပြီး အစ္စရေးလ်အကျဥ်းထောင်တွေမှာ ရှိတဲ့ ပါလက်စ်တိုင်း ၆ ထောင်ခန့်ကိုလည်း လွှတ်ပေးရေးအတွက် ကမ္ဘာကြီးအနေနဲ့ တွန်းအားပေးသင့်ကြောင်း အမိုင်ရက်ဒိုလာဟီယန်က ပြောကြားသွားပါတယ်။

အီရန်နိုင်ငံအနေနဲ့ အလွန်အရေးကြီးတဲ့ လူသားချင်းစာနာထောက်ထားမှု ကြိုးပမ်းမှုမှာ ပါဝင်ရန် ကာတာ၊ တူရကီတို့နဲ့အတူ အသင့်ရှိနေကြောင်း၊ ပါလက်စ်တိုင်း ၆ ထောင်ကို လွှတ်ပေးရေးက ဆောင်ရွက်ရန် လိုအပ်တဲ့ နောက်အချက်တစ်ခုဖြစ်ပြီး နိုင်ငံတကာ အသိုင်းအဝိုင်းအနေနဲ့ တာဝန်ရှိကြောင်း ပြောဆိုသွားပါတယ်။

#World_News #စစ်ပွဲဆက်လက်ဖြစ်ပွား #အီရန်ကသတိပေး #Source: Reuters

#Local_News
Published_ 27 October 2023

ကချင်ပြည်နယ်၊တနိုင်းမြို့အနီးတွင် အောက်တိုဘာလ(၂၇)ရက်မနက်ပိုင်း၌အင်အားရစ်တာစကေး(၄.၂)အဆင့်ရှိ ငလျင်လှုပ်ခတ်သွားကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရ သိရသည်။

ထုတ်ပြန်ချက်တွင် ၂၀၂၃ ခုနှစ်၊ အောက်တိုဘာလ (၂၇) ရက်နေ့၊ မြန်မာစံတော်ချိန် (၀၀) နာရီ၊ (၅၉) မိနစ်၊ (၀၆) စက္ကန့်အချိန်တွင် မြစ်ကြီးနားမြေငလျင်စခန်းမှ အနောက်မြောက်ဘက် (၅၈) မိုင်ခန့်ကွာဝေးသော မြန်မာနိုင်ငံပြည်တွင်း (တနိုင်းမြို့၏ အရှေ့-အရှေ့တောင်ဘက် (၂၉) မိုင်ခန့်အကွာ)၊ မြောက်လတ္တီတွဒ် (၂၆.၃၂) ဒီဂရီ၊ အရှေ့လောင်ဂျီတွဒ် (၉၇.၁၃) ဒီဂရီ၊ အနက် (၁၀) ကီလိုမီတာကို ဗဟိုပြု၍ အင်အား ရစ်(ခ်)တာစကေး (၄.၂) အဆင့်ရှိ အင်အားအနည်းငယ်ရှိသော မြေငလျင်တစ်ခုလှုပ်ရှားသွားကြောင်း ဖော်ပြပါရှိသည်။

မြန်မာနိုင်ငံသည်၂၀၂၃ ခုနှစ်အတွင်း ဒေသအနှံ မြေငလျင်ငယ်များ ဆက်တိုက်လှုပ်ခတ်ခဲ့သလို မြေငလျင်ကြီး အချို့လည်းရန်ကုန်တိုင်း၊ မန္တလေးတိုင်း၊ စစ်ကိုင်းတိုင်းစသည့်ဒေသအချို့တွင် လှုပ်ခတ်ခြင်းများရှိခဲ့ကြောင်းနှင့် စစ်ကိုင်းပြတ်ရွေ့ကြောပေါ်ရှိ ဒေသများအနေဖြင့် တစ်ကျော့ပြန် မြေငလျင်ကြီးများကို သတိပြုကြရန် မိုးလေဝသနှင့် ဇလဗေဒညွှန်ကြားမှုဦးစီးဌာန(မြေငလျင်ဌာနခွဲ)မှ သတိပေးထားကြောင်း သိရသည်။

#Local_News #ကချင်ပြည်နယ် #တနိုင်းမြို့ #ငလျင်လှုပ် #tthl #Yangon_Times

#World_Health
Published 27 October 2023

ဖျားနာနေမကောင်း ဖြစ်နေတဲ့အချိန်မှာ ကော်ဖီကို အနံ့အရသာမခံနိုင်ပေမယ့် ကဖင်းဓာတ်က လူကိုနိုးကြားနေစေမှာ ဖြစ်ပါတယ်။

ဒါကြောင့် ထိုအချိန်မှာ ကော်ဖီကို သင့်တင့်ရုံသောက်သုံးတာက အဆင်ပြေတယ်လို့ စတိုနီဘရွတ်ခ်ကလေးဆေးရုံမှ ဒေါက်တာ ရှရွန်နာ့ခ်မန်းက ပြောပြသွားပါတယ်။

နေ့စဥ်ကော်ဖီသောက်နေကျလူဟာ မသောက်မိတဲ့အခါမှာသာ ပိုမိုဆိုးရွားနိုင်ပြီး ကဖင်းဓာတ်မရတဲ့ အခြေအနေကို ခံစားရနိုင်တာ ဖြစ်ပါတယ်။

ကော်ဖီသောက်ပြီးတော့ နေမကောင်းဖြစ်နေရာကနေ သက်သာလာစေမှာတော့ မဟုတ်ပါဘူး။

ကော်ဖီမှာ ပိုလီဖီနောလ်လို ဓာတ်တိုးဆန့်ကျင်ပစ္စည်း ပါဝင်ပေမယ့် ရောဂါကိုတော့ မကုသနိုင်ပါဘူး။

ခဏတာ နေမကောင်းဖြစ်တာမျိုးမှာ ကော်ဖီသောက်ခြင်းကြောင့် စိတ်ပိုင်းဆိုင်ရာ အကျိုးကျေးဇူးကလွဲရင် ဘာမှမရှိပါဘူးလို့ မမ်မိုရီယဲလ်ဟာမန်းဆေးရုံမှ ဒေါက်တာ လင်ဒါယန်ဆေးက ပြောပြခဲ့ပါတယ်။

တစ်ခါတလေ အစာအိမ်မှာ ကော်ဖီက ဒုက္ခပေးတတ်တဲ့ အခြေအနေမှာတော့ ခဏတာ မသောက်ဘဲနေသင့်ပါတယ်။

ဖျားနာပြီး ရေဓာတ်ခန်းခြောက်နေတဲ့အချိန်မှာ ချွဲသလိပ်တွေကို မျိုချမိပြီး အစာအိမ်ထဲ ရောက်သွားတာကြောင့် ကော်ဖီပါသောက်မယ်ဆိုရင် မူးဝေအော့အန်တတ်ပါတယ်။

ကော်ဖီကလည်း ရေဓာတ်ခန်းခြောက်စေတာကြောင့် ရေများများသောက်ပြီး ရေဓာတ်ကို ထိန်းသိမ်းနေထိုင်သင့်ပါတယ်။

ချွဲပျော်စေရန်အတွက် ရေနွေးဖြင့် ရေချိုးနိုင်သလို အိပ်ရေးဝဖို့လည်း လိုအပ်ပါတယ်။

ဖျားနာတဲ့အခါ အကောင်းဆုံးကတော့ ရက်အနည်းငယ် အနားယူသင့်တာပါပဲ။

#World_Health #ကော်ဖီ #ကဖင်းဓာတ် #Source: New York Post

#Local_News
Published -27 October 2023

မွန်ပြည်နယ်၊ မော်လမြိုင်မြို့၊ ပန်းဘဲတန်းရပ်ကွက်၊ အမှတ်(၉)ကျောင်းလမ်းရှိ အမှတ်(၉)အခြေခံ အထက်တန်း ကျောင်း မီးလောင်မှုဖြစ်စဉ်မှ သံသယရှိသူ အမျိုးသမီးတစ်ဦးအား ဖမ်းမိထားကြောင်း နစက သတင်းထုတ်ပြန် ရေး အဖွဲ့က ထုတ်ပြန်လိုက်သည်။

အောက်တိုဘာလ ၂၅ ရက်၊ နံနက် ၃ နာရီ မိနစ် ၄၀ တွင် မီးလောင်မှုဖြစ်ပွားခဲ့ခြင်းဖြစ်ပြီး မီးလောင်မှုကြောင့် အလျား ၉၅ ပေ၊ အနံ ၃၀ ပေရှိ သွပ်မိုး၊ အုတ်ခံ၊ ပျဉ်ထောင် ၂ ထပ်ကျောင်းဆောင် အဆောက်အဦ ၁ လုံးနှင့် အလျား ၄၀ ပေ၊ အနံ ၃၀ ပေရှိ RC J ထပ် သင်ထောက်ကူအဆောက်အဦ ၁ လုံးတို့ မီးလောင်ပျက်စီးခဲ့ပြီး ဆုံးရှုံးမှု တန်ဖိုးငွေကျပ် ကိုးဆယ့်သုံးသိန်းခုနှစ်သောင်းငါးထောင်ကျပ်ခန့် ဖြစ်ကြောင်း သိရသည်။

အဆိုပါ ဖြစ်စဉ်နှင့်ပတ်သက်၍ သံသယဖြစ်ဖွယ် အမျိုးသမီးတစ်ဦးအား စစ်ဆေးလျက်ရှိကြောင်း၊ မီးလောင်မှုကြောင့် ပျက်စီးသွားသော အဆောက်အဦများကို ပြန်လည်ပြုပြင်တည်ဆောက်သွားမည်ဖြစ်ကြောင်း သိရသည်။

ယင်းအပြင် ကျောင်းသူ၊ ကျောင်းသားများအား ကျောင်းပြန်လည်ဖွင့်ချိန်တွင် နှစ်သုတ်တက် စနစ်ဖြင့် အရှိန်မပျက်ပညာသင်ကြားနိုင်ရေး စီစဉ်ထားကြောင်း သိရသည်။

#Local_News #မော်လမြိုင်မြို့ #အမျိုးသမီးတစ်ဦးအားဖမ်းမိ #Yangon_Times/PP

#World_Health
Published 27 October 2023

သုတေသီအဖွဲ့တစ်ဖွဲ့ ဆန်းသစ်တီထွင်လိုက်တဲ့ အနာကျက်ဂျယ်လ်တစ်မျိုးဟာ သံလိုက်အစွမ်းသတ္တိရှိပြီး ဆီးချိုရောဂါဒဏ်ရာများ သက်သာနိုင်စွမ်းကို မြှင့်တင်ပေးနိုင်ကာ အနာပြန်ဖြစ်ခြင်း လျော့ကျနိုင်သလို နောက်ဆုံး ခြေထောက်ဖြတ်ပစ်ရတဲ့ အခြေအနေမျိုးဖြစ်နိုင်ချေ နည်းသွားနိုင်ပါတယ်။

ထိုတီထွင်မှုကို စင်္ကာပူအမျိုးသားတက္ကသိုလ် NUSမှ အဖွဲ့က အောင်မြင်စွာ ထုတ်လုပ်နိုင်ခဲ့တာ ဖြစ်ပါတယ်။

အရေပြားကုသပေးတဲ့ ဆဲလ်တွေနဲ့ သံလိုက်အမှုန်များပါဝင်တဲ့ ဟိုက်ဒရိုဂျယ်လ်များကို ရောစပ်ကာ ပတ်တီးပါဝင်တဲ့ ပစ္စည်းကို ထုတ်လုပ်ခဲ့ကြတာ ဖြစ်ပါတယ်။

ကြိုးမဲ့သံလိုက်ပစ္စည်းတစ်ခုကို ပြင်ပမှာထားပြီး အရေပြားဆဲလ်များကို လှုံ့ဆော်ခြင်းဖြင့် ဒဏ်ရာပြန်လည်သက်သာနိုင်စွမ်းကို မြန်ဆန်စေမှာ ဖြစ်ပါတယ်။

သံလိုက်လှုံ့ဆော်မှုက တစ်နာရီ နှစ်နာရီခန့် ကြာမြင့်လေ့ရှိပါတယ်။

ဓာတ်ခွဲခန်းစမ်းသပ်ချက်များအရ ထိုပစ္စည်းဟာ ဆီးချိုဒဏ်ရာတွေကုသရာမှာ သမားရိုးကျ လက်ရှိနည်းလမ်းများထက် ၃ ဆ ပိုမိုမြန်ဆန်ကြောင်း တွေ့ရှိခဲ့ပါတယ်။

ဒဏ်ရာတဝိုက်ကနေရာမှာ ဂလူးကို့စ်ပမာဏ ထိန်းချုပ်ပေးခြင်း၊ ဒဏ်ရာအနီးနားမှ အလုပ်မလုပ်တဲ့ ဆဲလ်တွေကို လှုံ့ဆော်ခြင်း၊ ထိခိုက်ထားတဲ့ သွေးကြောများကို ကုသပေးခြင်း၊ ပျက်စီးသွားတဲ့ သွေးကြောကွန်ရက်ကို ပြန်လည်ပြုပြင်ခြင်းတို့ကို တပြိုင်နက် လုပ်ဆောင်ပေးနိုင်ပါတယ်။

ကမ္ဘာပေါ်မှာ လက်ရှိ ဆီးချိုရောဂါခံစားနေရသူ သန်း ၅၀၀ ကျော်ရှိမယ်လို့ ယူဆရကာ ဒီထက်ပိုပြီး များလာနိုင်ခြေရှိပါတယ်။

ဆီးချိုအနာတွေဖြစ်တဲ့ ခြေထောက်အနာတွေဟာ ကမ္ဘာ့ကျန်းမာရေးမှာ ပြဿနာတစ်ရပ် ဖြစ်နေပါတယ်။

ဆီးချိုခြေထောက်နာ ဖြစ်ပွားသူပေါင်း နှစ်စဥ် ၉ သန်းမှ ၂၆ သန်းကြားရှိနိုင်ပြီး ဆီးချိုဝေဒနာရှင်တွေထဲက ၁၅ မှ ၂၅ ရာခိုင်နှုန်းလောက်ဟာ သူတို့ရဲ့ဘဝမှာ ဆီးချိုခြေထောက်ဒဏ်ရာ တစ်ကြိမ်တစ်ခါတော့ ခံစားရဖူးပါတယ်။

သုတေသီအဖွဲ့ထဲကတစ်ဦးက ယင်းတို့ဟာ အဓိကအချက်ကို ရှာဖွေပြီး စက်ပစ္စည်းဖြင့် ညင်သာစွာ လှုံ့ဆော်ဖို့ ကြိုးစားခဲ့တာဖြစ်ကြောင်း၊ ဒဏ်ရာသက်သာစေရန် ငြိမ်နေတဲ့ အရေပြားဆဲလ်တွေကို လှုံ့ဆော်ပေးတာဖြစ်ကြောင်း ရှင်းပြသွားပါတယ်။

ပြင်ပစက်မှ ထုတ်လွှတ်လိုက်တဲ့ သံလိုက်စက်ကွင်းနဲ့ ပေါင်းစည်းလိုက်တဲ့အခါ ဂျယ်လ်က အရေပြားဆဲလ်တွေ နိုးထလှုပ်ရှားလာအောင် လှုံ့ဆော်ပေးသွားတာ ဖြစ်ပါတယ်။

#World_Health #သံလိုက်ဂျယ်လ် #သိပ္ပံပညာရှင်အဖွဲ့တီထွင် #Source: India Today

၂၇ အောက်တိုဘာ ၂၀၂၃

တရုတ်ဝန်ကြီးချုပ်ဟောင်း လီကာချန်း Li Keqiang သည် သောကြာနေ့က နှလုံးဖောက်ပြီး ကွယ်လွန်သွားပါတယ်။ သူဟာ ကွယ်လွန်ချိန်မှာ အသက် ၆၈နှစ်ရှိပြီဖြစ်ပါတယ်။ ဝန်ကြီးချုပ်ဟောင်းလီကာချန်းဟာ ဆယ်စုနှစ်တစ်စုအထိ ဝန်ကြီးချုပ်  လုပ်ခဲ့ရာ မှ အနားယူပြီး ၁၀လခန့်အကြာမှာ နှလုံးရောဂါကြောင့်သေဆုံးခဲ့ရတာလို့ ရိုက်တာကသတင်းဖော်ပြပါတယ်။

တစ်ကြိမ်တစ်ခါက တရုတ်ကွန်မြူနစ်ပါတီ ထိပ်တန်းခေါင်းဆောင်မှုမှာ အပြိုင်ဖြစ်ခဲ့တယ်လို့ မြင်ခဲ့ကြတဲ့ လီဟာ ပြီးခဲ့တဲ့နှစ်များအတွင်း သမ္မတရှီကျင့် ဖျင်နှင့် ဘေးချင်းကပ်အတူရှိခဲ့သူတစ်ဦးဖြစ်ပါတယ်။

ပီကင်းတက္ကသိုလ်မှ စီးပွားရေးဘွဲ့ရ လီကာချန်းကို လစ်ဘရယ်ဈေးကွက်စီးပွားရေးကို ထောက်ခံသူတစ်ဦးအဖြစ်မြင်ခဲ့ရပေမယ့် ရှီနှစ်သက်တဲ့ နိုင်ငံတော်ကထိန်းချုပ်တဲ့စနစ်ကို ညွတ်တိမ်းခဲ့ရသူဖြစ်တယ်လို့လည်း သတင်းကရေးသားပါတယ်။

“ ရှန်ဟိုင်းတွင် ယခုရက်များအတွင် အနားယူနေသည့် ရဲဘော်ကြီးလီကာရှန်းသည် အောက်တိုဘာ ၂၆ ရက်တွင် ရုတ်တရက် နှလုံးဖောက်လာခဲ့ပါတယ်။ သူ့ကိုအစွမ်းကုန်ကြိုးစားကုသသော်လည်း နောက်ဆုံးတွင် အောက်တိုဘာ ၂၇ ရက် ညသန်းခေါင်ယံ၌ ရှန်ဟိုင်းတွင်ကွယ်လွန်ခဲ့ပါတယ်” လို့ နိုင်ငံပိုင်ရုပ်သံ CCTV က သတင်းထုတ်ပြန်သွားပါတယ်။

မတ်လတွင် ရာထူးမှမဆင်းမီအထိ လီသည် တရုတ်နိုင်ငံဝန်ကြီးချုပ်နှင့် ဝန်ကြီးအဖွဲ့အကြီးအကဲအဖြစ် ရှီ၏ လက်အောက်တွင် ဆယ်စုနှစ်တစ်စု တာဝန်ထမ်းဆောင်ခဲ့သူဖြစ်ပါတယ်။

 “ ယန်စီမြစ်နှင့် မြစ်ဝါမြစ်တို့သည် ဘယ်တော့မှနောက်ပြန်စီးဆင်းမည်မဟုတ်” လို့ သူ့ကို လူအများရှေ့နောက်ဆုံးတွေ့ရတဲ့ မတ်လ သတင်းစာရှင်းလင်းပွဲမှာ သူကပြောခဲ့ပါတယ်။

သူ့ကို တရုတ်နိုင်ငံရဲ့  အရှေ့ပိုင်း အန်ဟွေးပြည်နယ်တွင် မွေးဖွားခဲ့ပါတယ်။ သူ့ဖခင်ဟာ အစိုးရအရာရှိတစ်ဦးဖြစ်ပြီး လီဟာ ယဉ်ကျေးမှုတော်လှန်ရေးအတွင်း လယ်ကွင်းတွေထဲ အလုပ်ကြမ်းလုပ်ဖို့ စေလွှတ်ခံခဲ့ရသူဖြစ်ပါတယ်။

Source Reuters

၂၆ အောက်တိုဘာ ၂၀၂၃

ယနေ့ကာလအထိ အမေရိကန်နိုင်ငံအနေဖြင့် မြန်မာနိုင်ငံအားရန်သူသဖွယ်သဘောထားခြင်းမှာ ကြီးမားသောနောက်ခံ အကြောင်း ရှိတယ်လို့  ဗိုလ်ချုပ်မှူးကြီးမင်းအောင်လှိုင်ကပြောကြားတယ်လို့ နစကရဲ့သတင်းထုတ်ပြန်ချက်မှာ   ဖော်ပြထားပါ  တယ်။

အောက်တိုဘာ ၂၆ ရက်ယနေ့နံနက်က နေပြည်တော် နစက ဥက္ကဋ္ဌရုံးတွင် ကျင်းပတဲ့ နိုင်ငံတော်စီမံအုပ်ချုပ်ရေး   ကောင်စီအစည်းအဝေး(၅/၂၀၂၃) ၌ နစက ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် အမှာစကား   ပြောကြားရာမှာထည့်သွင်းပြောကြားခဲ့တာဖြစ်ပါတယ်။

အရှေ့တောင်အာရှဒေသတွင် အမေရိကန်ဦးဆောင်သော SEATO အဖွဲ့ကို ၁၉၅၄ ခုနှစ်တွင်ဖွဲ့စည်းခဲ့ပြီး အဓိကရည်ရွယ်ချက်မှာ အရှေ့တောင် အာရှဒေသအတွင်း ကွန်မြူနစ်စနစ်မပြန့်ပွားရေးပင်ဖြစ်ကြောင်းနှင့် ၁၉၇၇ ခုနှစ်၊ ဇွန်လ မှ ၎င်းအဖွဲ့ကိုဖျက်သိမ်းခဲ့ကြောင်းဗိုလ်ချုပ်မှူးကြီးကပြောပါတယ်။ ၁၉၄၇ ခုနှစ် ဖွဲ့စည်းအုပ်ချုပ်ပုံဥပဒေပါ ပြည်နယ် များခွဲထွက်ခွင့်၊ ၎င်းအပေါ်မူတည်၍ ၁၉၆၁ -၁၉၆၂ ခုနှစ် တွင် ဖြစ်လာသည့် ပြည်နယ် များ၏ တောင်းဆိုမှုများကို SEATO ဖြစ်စဉ်နှင့် ဆက်စပ်ကြည့်ပါက မြန်မာ့နိုင်ငံရေး၏ ရှုပ်ထွေးမှုကို သဘောပေါက်နိုင်မည်ဖြစ်တယ်လို့ ဗိုလ်ချုပ်မှူးကြီးက ထောက်ပြပြောဆိုတဲ့အကြောင်း သတင်းထုတ်ပြန်ထားပါတယ်။

အမေရိကန်ဟာ မြန်မာနိုင်ငံအရေးနှင့်ပတ်သက်၍ ၎င်းတို့ဖြစ်စေချင်သည့်အတိုင်း မဖြစ်သည့်အခါ ယင်းကဲ့သို့မဖြစ်အောင်   ကာကွယ်နိုင်သည့် အင်အားစုများကို ရန်ပြုခြင်းမှာ မြင်သာသည့် အကြောင်းအရာပင်ဖြစ်တယ်လို့လည်း ဗိုလ်ချုပ်မှူးကြီးက သုံးသပ်ပြောဆိုပါတယ်။

မြန်မာနိုင်ငံအရေးနှင့် ပတ်သက်၍ ဝင်ရောက်စွက်ဖက်မှုများကို အမေရိကန်ဦးဆောင်သည့် အနောက်အုပ်စုမှ စဉ်ဆက်မပြတ်ပြုလုပ်ခဲ့မှုများ ရှိကြောင်း၊ မြန်မာနှင့်အမေရိကန်သည် ရန်ဘက်နိုင်ငံများ မဟုတ်ကြောင်း၊ စစ်ဖြစ်ပွားဖူးခြင်းလည်း မရှိကြောင်း၊ ယုတ်ဆွအဆုံး အရှေ့တောင် အာရှတွင် အမေရိကန်ကျူးကျော်မှုကြောင့် ဖြစ်ပွားခဲ့သော ဗီယက်နမ်စစ်ပွဲ၌ပင် မြန်မာ တို့ပါဝင်ပတ်သက်မှုမရှိခဲ့ကြောင်းလည်း ဗိုလ်ချုပ်မှူးကြီးက အတိတ်သမိုင်းကို ပြန်ပြောင်းပြောဆို ပါတယ်။

ယခုလက်ရှိအခြေအနေတွင်လည်း အမေရိကန်ဦးဆောင်သော အုပ်စု၏ ရည်မှန်းချက် မှာ မြန်မာနိုင်ငံ၏ အိမ်နီးချင်း နိုင်ငံဖြစ်သော တရုတ်နိုင်ငံကို ထိန်းချုပ်နိုင်ရေး  (China Containment Policy) ပင်ဖြစ်လို့ မြန်မာနိုင်ငံ၌ ၎င်းတို့လိုလားသော အစိုးရ/အုပ်စု အာဏာရရှိရေးကို တစ်စိုက်မတ်မတ်ဆောင်ရွက်ခြင်းဖြစ်ပြီးမရရှိခဲ့ပါက မြန်မာနိုင်ငံ၌ ကဏ္ဍပေါင်းစုံ မငြိမ် မသက်ဖြစ်အောင် ဆောင်ရွက်နေတာဖြစ်တယ်လို့ ဗိုလ်ချုပ်မှူးကြီးက ဝေဖန်ပြောဆိုပါတယ်။

ယင်းအပြင် အမေရိကန်နိုင်ငံကိုယ်တိုင်က အကြမ်းဖက်အဖွဲ့များကို ခေါင်းစဉ်အမျိုးမျိုး အကြောင်းအမျိုးမျိုးဖြင့် ကူညီနေကြောင်း၊ အိန္ဒိယ၊ ထိုင်း၊ စင်ကာပူ၊ မလေးရှား၊ အင်ဒိုနီးရှား စသောနိုင်ငံများသည် သမိုင်းအစဉ်အလာအရ ရင်းနှီးသောမိတ်ဆွေ နိုင်ငံများဖြစ်ကြောင်း၊ သို့သော် အမေရိကန်၏ဩဇာလွှမ်းမိုးမှုကိုမလွန်ဆန်နိုင်သော နိုင်ငံများက မိမိတို့နိုင်ငံအပေါ် ကုန်သွယ်မှု၊ ဘဏ္ဍာရေး၊ နိုင်ငံခြားရေး ပိတ်ဆို့မှုများ ပြုလုပ် ခဲ့ကြတယ်လို့လည်း ဗိုလ်ချုပ်မှူးကြီးက ဆက်လက်ပြောဆိုတာကို သတင်းထုတ်ပြန်ချက်မှာဖော်ပြထားပါတယ်။

နစကအနေနှင့် အရေးပေါ်ကာလဆိုင်ရာပြဋ္ဌာန်းချက်များနှင့်အညီ ဆောင်ရွက်ပြီးစီးပါက လွတ်လပ်ပြီး တရားမျှတသော ပါတီစုံဒီမိုကရေစီအထွေထွေ ရွေးကောက်ပွဲကျင်းပ၍ ထွက်ပေါ်လာ သည့်အစိုးရအား နိုင်ငံတော်တာဝန်လွှဲအပ်နိုင်ရေး ဆက်လက်ဆောင်ရွက်သွားမည် ဖြစ်ကြောင်း ထည့်သွင်းထားပြီး ပါတီစုံဒီမိုကရေစီစနစ်အတွက် တိုင်းသိပြည်သိ အာမခံ ထားတယ်လို့လည်း ဗိုလ်ချုပ်မှူးကြီးက ထပ်လောင်းပြောဆိုပါတယ်။

နိုင်ငံတကာအနေဖြင့် မြန်မာနိုင်ငံ၏အခြေအနေကို ယခုထက်ပိုမို ကောင်းမွန်စေ လိုလျှင်ပိုမိုပူးပေါင်းဆောင်ရွက်  သင့်ပြီးအကြမ်းဖက်အဖွဲ့အစည်းများကို တိုက် ရိုက်(သို့မဟုတ်)သွယ်ဝိုက်အားပေးနေခြင်းသည် ပြည်သူတို့၏ဆန္ဒဖြစ်သော ပါတီစုံ ဒီမိုကရေစီစနစ် ခိုင်မာရေးနှင့် နိုင်ငံဖွံ့ဖြိုးတိုးတက်ရေးလုပ်ငန်းများ အကောင်အထည် ဖော်ရာတွင် နှောင့်နှေးသွားနိုင်တယ်လို့ ဗိုလ်ချုပ်မှူးကြီးက ပြောကြားခဲ့ပါတယ်။

အစည်းအဝေးတွင် ကောင်စီဝင်များက တိုင်ဒေသကြီးနှင့် ပြည်နယ်အလိုက် နယ်မြေ ဖွံ့ဖြိုးတိုးတက်ရေးကိစ္စရပ်များ ကွင်းဆင်းဆောင်ရွက်ခဲ့မှုနှင့် ဆက်လက်ဆောင်ရွက် သွားမည့် အခြေအနေများကို ရှင်းလင်းတင်ပြခဲ့ကြပြီး

ကောင်စီတွဲဖက်အတွင်းရေးမှူး က ၂၀၂၃ ခုနှစ် အောက်တိုဘာလ တွင်း နိုင်ငံတော်၏ တည်ငြိမ်အေးချမ်းရေးနှင့် တရားဥပဒေစိုးမိုးရေးကိစ္စရပ်များကို ရှင်းလင်းတင်ပြခဲ့တယ်လို့ သတင်းထုတ်ပြန်ချက်မှာဖော်ပြထားပါတယ်။

#ymg/knl

ကမ္ဘာတဝှမ်းမှ အရည်အသွေးမြင့် ထုတ်ကုန်ပစ္စည်းများ တင်သွင်းခြင်းကို ထောက်ပံ့ပြီး နိုင်ငံအတွင်း အဆင့်မြင့်နည်းပညာများ၊ လူသုံးကုန်ပစ္စည်းများ၊ ဝန်ဆောင်မှုများ ပိုမိုမြင့်မားလာစေရန် အတိုင်းအတာ လုပ်ဆောင်ချက်များ ချမှတ်သွားမှာဖြစ်ကြောင်း ကုန်သွယ်ရေး လက်ထောက်ဝန်ကြီး ရှန်ချူပင်က တနင်္လာနေ့မှာ ပြောကြားလိုက်ပါတယ်။

#Asia_Business
Published_ 26 October 2023
#လူသုံးကုန်ပစ္စည်း #တရုတ်ကတိုးမြှင့်တင်သွင်း

#Daily_News
Published_ 26 October 2023

၁။ မကွေးမှနှုတ်ခမ်းကွဲ၊ အာခေါင်ကွဲကလေးငယ်(၁၀၀)ကျော် ကိုရီးယား-မြန်မာဆရာဝန်များနှင့် အခမဲ့ခွဲစိတ်ကုသခွင့်ရ

၂။ နယ်စပ်ဂိတ်များ ပြန်ဖွင့်လာတာကြောင့် မူဆယ်မြို့နယ်အတွင်း လူကုန်ကူးမှုအသိပညာပေးလုပ်ငန်းတွေ ထိရောက်စွာလုပ်ဆောင်ပေးနေ

၃။ ပုသိမ်ထီးကုန်ကြမ်းဈေးမြင့်တက်ပြီး ကုန်ချောဈေးပုံမှန်အတိုင်းရှိသောကြောင့် တစ်နိုင်တစ်ပိုင်လုပ်ငန်းများတွက်ခြေကိုက်မှုနည်းပါးနေ

၄။ နိုင်ငံခြားမှ အဆင့်မြင့်နည်းပညာများ၊ လူသုံးကုန်ပစ္စည်းများ တရုတ်ကတိုးမြှင့်တင်သွင်းသွားမည်ဟုဆို... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG

#Local_News
Published 26 October 2023

ထိုင်းနိုင်ငံအတွင်း ရောက်ရှိနေသည့် မြန်မာအလုပ်သမားများ၏ အသက်၁၈နှစ်အောက် သားသမီးများကို မိဘများ အား သတ်မှတ်ထားသည့် ကာလအတိုင်းနေထိုင်ခွင့်ပြုပြီး အသက် ၁၈နှစ် ပြည့်ပြီးသည့် သားသမီးများကိုလဲ အလုပ်လုပ်ကိုင်လိုပါက လုပ်ကိုင်ခွင့်တင်ပြလျှောက်ထားနိုင်ကြောင်း ထိုင်းအစိုးရအဖွဲ့၏ အစည်းဝေးဆုံးဖြတ်ချက်အရ သိရသည်။

ထိုင်းအစိုးရမှ မြန်မာအပါအဝင် နိုင်ငံခြားသားလုပ်သားများကို နေထိုင်ခွင့်အလုပ်လုပ်ကိုင်ခွင့်သက်တမ်းတိုးမြင့်ပေးခြင်းနှင့် ပတ်သက်ပြီး ထိုင်းအစိုးရအဖွဲ့၏ အစည်းဝေးဆုံးဖြတ်ချက်ကို ထိုင်းနိုင်ငံရှိ မြန်မာနိုင်ငံဆိုင်ရာ အလုပ်သမား သံရုံးက အောက်တိုဘာ ၂၅ ရက်က ထုတ်ပြန်ပေးခဲ့သည်။

အဆိုပါ ထုတ်ပြန်ချက်တွင် ထိုင်းနိုင်ငံရောက် မြန်မာရွှေ့ပြောင်းလုပ်သားများအား ၂၀၂ ၃ ခုနှစ် အောက်တိုဘာ (၁) ရက်မှ ၂၀၂၅ ခုနှစ် ဖေဖော်ဝါရီ (၁၃)ရက်အထိ ယာယီနေထိုင် အလုပ်လုပ်ကိုင်ခွင့်ပြုပေးထားပြီး ဖြစ်တာကြောင့်အလုပ်ရှင်များအနေဖြင့် ၂၀၂၃ ခုနှစ် ဇန်နဝါရီ (၁၈) ရက်မှ ၂၀၂၄ ခုနှစ် ဇန်နဝါရီ (၁၅) ရက်အတွင်း အလုပ်လုပ်ကိုင်ခွင့်ရရန် အမည်စာရင်း တင်ပြလျှောက်ထားရမည်ဖြစ်ကြောင်း သိရသည်။

ထို့ကြောင့် ယခုအချက်အလက်များနှင့် လုပ်ဆောင်ရမည့်ကိစ္စရပ်များကို ထိုင်းနိုင်ငံတွင် အလုပ်လုပ်ကိုင်နေသော မြန်မာအလုပ်သမားများ အနေဖြင့် သက်ဆိုင်ရာ အလုပ်ရှင်၊ စက်ရုံအလုပ်ရုံမှ တာဝန်ရှိသူများကို ထပ်ဆင့်ပြောကြား ဖို့ကိုလည်း ထိုင်းနိုင်ငံရှိ မြန်မာအလုပ်သမားသံရုံးမှ တိုက်တွန်းထားသည်။

#Local_News #ထိုင်းရောက်မြန်မာအလုပ်သမားများ #YMG/LW #Yangon_Times