#Local_News
Published 05 December 2023

မန္တလေးတိုင်းဒသကြီး အမရပူရမြို့နယ်၌စိတ်ကျန်းမာရေးဝေဒနာခံစားနေရသည့် အသက် ၂၀ အရွယ်အမျိုးသမီးငယ်တစ်ဦး ရေတွင်းထဲခုန်ချသေဆုံးမှု ယနေ့မနက်၌ဖြစ်ပွားခဲကြောင်း မြန်မာနိုင်ငံလူမှုကယ်ဆယ်ရေးအဖွဲ့(မန္တလေးတိုင်းရုံး)မှ သိရသည်။

ဖြစ်စဉ်မှာ ယနေ့(ဒီဇင်ဘာ ၅ ရက်)နံနက် ၄ နာရီ ၃၀ မိနစ်ခန့်က မန္တလေးတိုင်းဒေသကြီး၊ အမရပူရမြို့နယ်၊ မှန်တန်းရပ်ကွက်၊ ဝါးတန်းမြောက်ရပ်(ဒေသအခေါ်)တွင် နေထိုင်သည့် စိတ်ကျန်းမာရေးဝေဒနာခံစားနေရသော အသက် ၂၀ အရွယ်အမျိုးသမီးငယ်တစ်ဦးသည် လမ်းလျှောက်ထွက်ရင်း ရပ်ကွက်အတွင်းရှိ ရေတွင်းထဲခုန်ချသွားခဲ့ကြောင်း သိရသည်။

'ကျွန်တော်တို့ဆီကို ရပ်ကွက်နေပြည်သူတစ်ဦးက ဖုန်းဆက်အကြောင်းကြား အကူအညီတောင်းခံလာတာပါ၊ ဒါ‌ ကြောင့်ရှာဖွေကယ်ဆယ်ရေးအဖွဲ့ဝင်တွေ သွားရောက်ကူညီပေးခဲ့ပါတယ်၊ ဆယ်တင်ပေးခဲ့ချိန် မှာတော့ အသက်မရှိတော့ပါဘူး၊'ဟုမြန်မာနိုင်ငံလူမှုကယ်ဆယ်ရေးအဖွဲ့(မန္တလေးတိုင်းရုံး)မှ တာဝန်ရှိသူတစ်ဦးက ပြောသည်။

အဆိုပါ ရုပ်အလောင်းအား မေတ္တာမြင့်မိုရ်အသင်း လူနာတင်ယာဉ်ဖြင့် မန္တလေးအထွေထွေရောဂါကုဆေးရုံကြီးရှိ ရင်ခွဲရုံသို့ ပို့ဆောင်ပေးခဲ့ကြောင်းသိရသည်။

#Local_News #စိတ်ဝေဒနာရှင် #ရေတွင်းထဲခုန်ချသေဆုံးမှုဖြစ် #YMG/NN #Yangon_Times

#Local_News
Published 05 December 2023

ရှမ်းပြည်နယ်(အရှေ့ပိုင်း) ကျိုင်းတုံမြို့နယ်၊ လွိုင်မွေဒေသတွင်သုံးကြိမ်မြောက် ချယ်ရီပန်းပွဲတော် ကျင်းပမည် ဖြစ်ကြောင်း ရှမ်းပြည်နယ်ဟိုတယ်နှင့်ခရီးသွားညွှန်ကြားမှု ဦးစီးဌာနထံမှ သိရသည်။

အဆိုပါ ချယ်ရီပန်းပွဲတော်ကို ၂၀၂၂ ခုနှစ်တွင် စတင်ကျင်းပလာခဲ့ရာ ယခုအကြိမ်မှာ ၃ ကြိမ်မြောက်ဖြစ်ပြီး လာမည့် ၂၀၂၄ ခုနှစ် ဇန်နဝါရီလဆန်းပိုင်းတွင် ငါးရက်ကြာကျင်းပမည်ဖြစ်ကြောင်း သိရသည်။

'ချယ်ရီပန်းပွင့်ချိန် စုံတဲ့အနေအထားပေါ်မူတည်ပြီးပွဲတော်ကျင်းပမှာပါ။ လတ်တလောတော့ပန်းစုံတာက ဇန်နဝါရီလဆန်းဆိုတော့ အဲ့ဒီအချိန် ပဲလုပ်မယ်လျာထားပါတယ်' ရှမ်းပြည်နယ်ဟိုတယ်နှင့်ခရီးသွားညွှန်ကြားမှု ဦးစီးဌာနထံမှတာဝန်ရှိသူတစ်ဦး ကပြောသည်။

အဆိုပါဒေသတွင် ချယ်ရီပန်းပွင့်သည့်ကာလများ၌ ပန်းများနှင့်အတူဓာတ်ပုံလာရောက်ရိုက်ခြင်းများရှိသည့် အပြင် အချို့သူများမှာမူ ပန်းခိုင်များအားခူးယူ ခြင်းများရှိခဲ့သည့်အတွက် အသိပညာပေးခြင်းများပြုလုပ်ရန်ရည်ရွယ်၍ပန်းပွဲတော် ပြုလုပ်ရခြင်းဖြစ်ကြောင်း၊ လတ်တလောတွင် ချယ်ရီပင်များကိုပြုပြင် ထိန်းသိမ်းစိုက်ပျိုးခြင်းများကို ဆောင်ရွက်ပေးနေကြောင်း၊ ယင်းပွဲတော်တွင် ရှမ်း၊ အခါ၊ လားဟူ၊ အပါအဝင် အခြားသော တိုင်းရင်းသား ရိုးရာယဉ်ကျေးမှု အကများကိုပါ တင်ဆက်ဖျော်ဖြေသွားမည့်အပြင် အမှတ်တရရိုးရာ ပစ္စည်းအရောင်းဆိုင်များ၊ ဒေသထွက်ဝိုင်များ၊ အစားအစာများ ရောင်းချခြင်း၊ ဒေသထွက်ကုန်ပစ္စည်းများကိုပါ ရောင်းချသည့်ဆိုင်ခန်းများလည်း ပါဝင်မည်ဖြစ်ကြောင်း သိရသည်။

#Local_News #လွိုင်မွေဒေသ #ချယ်ရီပန်းပွဲတော်ကျင်းပ #YMG/ NN #Yangon_Times

ပြည်ပအလုပ်အကိုင်အကျိုးဆောင်လိုင်စင်ရ အေဂျင်စီတွေအနေနဲ့ တောင်ကိုရီယားနိုင်ငံကို ရာသီချိန်လုပ်သားစေလွှတ်လိုပါက အလုပ်သမား၀န်ကြီးဌာနကို လာရောက်လျှောက်ထားနိုင်တယ်လို့ အလုပ်သမား ၀န်ကြီးဌာနထံက သိရပါတယ်။
#Local_News
Published 05 December 2023
#တောင်ကိုရီးယား #ရာသီချိန်လုပ်သားစေလွှတ်
#YMG/LW #Yangon_Times

#Local_News
Published 05 December 2023

ကမ္ဘာ့ဘောလုံးအဖွဲ့ချုပ် (ဖီဖာ)နှင့် မြန်မာနိုင်ငံ ဘောလုံးအဖွဲ့ချုပ်တို့ ပူးပေါင်းစီစဉ်သည့် FIFA-MFF U17 League 2023 ပြိုင်ပွဲကိုယခုလအတွင်း ကျင်းပသွားမည်ဖြစ်ရာအသင်း(၁၀)သင်းဖြင့် ကျင်းပရန်လျာထားကြောင်း မြန်မာနိုင်ငံ ဘောလုံး အဖွဲ့ချုပ်မှသိရသည်။

လူငယ်မျိုးဆက်သစ် ကစားသမားများထွက်‌ပေါ်လာရေးနှင့်မြန်မာ့လက်ရွေးစင် လူငယ်အသင်းများအား ထောက်ပံ့မှု ဖြစ်စေရန် ရည်ရွယ်၍ယခုလ ၂၀၂၃ ဒီဇင်ဘာလ နောက်ဆုံးအပတ်အတွင်း ရန်ကုန်မြို့၌ ကျင်းပပြုလုပ်ရန် စီစဉ်ထားကြောင်း သိရသည်။

အဆိုပါ ယူ ၁၇ လိဂ်ပြိုင်ပွဲအား အသင်း(၁၀)သင်းဖြင့် ကျင်းပရန်လျာထားပြီး ပြိုင်ပွဲဝင် ကစားသမားများအား ၂၀၀၇ ခုနှစ် ဇန်နဝါရီ ၁ ရက်မှ၂၀၀၉ ခုနှစ် ဒီဇင်ဘာ ၃၁ ရက်အတွင်း ဖွားမြင်သူများကိုသာ ပါဝင်ခွင့်ပြုမည်ဖြစ်ကြောင်း၊အသင်းတစ်သင်းတွင် အုပ်ချုပ်မှု အဖွဲ့ဝင်အနည်းဆုံး(၆)ဦး မှ အများဆုံး (၁၅)ဦး၊ ကစားသမား အနည်းဆုံး (၂၃)ဦးမှ အများဆုံး (၃၀)ဦး မှတ်ပုံတင်ခွင့်ပြုမည်ဖြစ်ပြီး ပထမ အကျော့၊ ဒုတိယ အကျော့ ပွဲစဉ်များအား ပြိုင်ပွဲကျင်းပရေး စည်းမျဉ်းစည်းကမ်းများအတိုင်း ယှဉ်ပြိုင်ရမည် ဖြစ်ကြောင်း သိရသည်။

FIFA-MFF U17 League 2023 ပြိုင်ပွဲသို့ ဝင်ရောက်ယှဉ်ပြိုင်လိုသော အသင်းများ အနေဖြင့် မြန်မာနိုင်ငံ ဘောလုံး အဖွဲ့ချုပ်သို့ လာ‌ရောက်ဆက်သွယ်နိုင်ပြီး This email address is being protected from spambots. You need JavaScript enabled to view it. နှင့် ဖုန်းနံပါတ် 09769900600 သို့ဆက်သွယ်၍ စုံစမ်းမေးမြန်းနိုင်ကြောင်း သိရသည်။

FIFA နှင့် MFF တို့ပူးပေါင်း၍ မြန်မာ ယူ၁၅ လိဂ်ကိုလည်း ယခုနှစ် ဇွန်လ ၂၄ ရက်မှစ၍ တိုင်းဒေသကြီးနှင့် ပြည်နယ်အသီးသီးမှ မန္တလေးမြို့(အထက်မြန်မာပြည်ဇုန်)နှင့် ရန်ကုန်မြို့ (အောက်မြန်မာပြည်ဇုန်)တို့တွင် ကျင်းပခဲ့ကာ ပြိုင်ပွဲဝင် အသင်းပေါင်း ၂၁ သင်းပါဝင်ယှဉ်ပြိုင်ခဲ့ကြပြီး အောင်မြင်မှုရရှိခဲ့ကြောင်း သိရသည်။

#Local_News #FIFA #MFF #မြန်မာယူ၁၇လိဂ်ပြိုင်ပွဲ #YMG/ NN #Yangon_Times

#Local_News
Published 5 December 2023

နေပြည်တော် လယ်ဝေးမြို့နယ် ပတ္တာကျေးရွာရှိ ရေသန့်စက်ရုံတစ်ရုံ မီးလောင်မှုဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့ထုတ်ပြန်ချက်အရ သိရသည်။

ဒီဇင်ဘာ ၅ရက် နံနက် ၁၀နာရီ အချိန်ခန့်က မီးလောင်ကျွမ်းသဖြင့် မြို့နယ်မီးသတ်တပ်ဖွဲ့မှ သွားရောက်level-1အဆင့်ဖြင့် မီးငြှိမ်းသတ်ရာ လောင်ကျွမ်းမှု များသဖြင့် ၁၀နာရီ ၂၅ မိနစ် တွင် Level 2 အဆင့် မီးသတ်ရေယာဉ် အုပ်စုထွက်ခွာ ငြှိမ်းသတ်ခဲ့ရာ ၁၀နာရီ ၅၀ မိနစ်တွင် မီးထိန်းနိုင်ခဲ့ပြီး ၁၁နာရီ တွင် မီးငြှိမ်းသတ်နိုင်ခဲ့ကြောင်း သိရသည်။

အဆိုပါ မီးလောင်မှုကြောင့် ထိခိုက်ဒဏ်ရာရရှိသူရှိကာ မီးလောင်သည့်အကြောင်းရာနှင့် ဆုံးရှုံးမှုတန်ဖိုးတို့ကို သက်ဆိုင်ရာမှ စစ်ဆေးလျက်ရှိကြောင်း သိရသည်။

#Local_News #နေပြည်တော် #ရေသန့်စက်ရုံမီးလောင်မှုဖြစ် #YMG/LW #Yangon_Times

"လာမယ့်တပို့တွဲ၊ တပေါင်းနဲ့တန်ခူးလတွေမှာ ပြည်တွင်းမှာ ရိုးရာပွဲတော်တွေ၊ အလှူမင်္ဂလာပွဲတွေရှိဦးမှာဖြစ်တဲ့အတွက် အိုးစည်ဒိုးပတ်တွေ အော်ဒါပြန်ရလာမှာဖြစ်တယ်"ဒို့ဗမာ အိုးစည်ဒိုးပတ် လုပ်ငန်းမှတာဝန်ရှိသူတစ်ဦး
#Local_News
Published 05 December 2023
#အိုးစည်ဒိုးပတ် #အလှူမင်္ဂလာပွဲ
#tthl #Yangon _Times

#Local_News
Published 05 December 2023

ဆေးဝါးမှတ်ပုံတင်သက်တမ်းတိုးခြင်းနှင့် နှစ်စဉ်‌ကြေးပေးသွင်းခြင်းကို ဇန်နဝါရီ ၁ ရက်မှစပြီး အီလက်ထရွန်နစ်စနစ်ဖြင့်ဆောင်ရွက်နိုင်ပြီဖြစ်ကြောင်း အစားအသောက်နှင့် ဆေးဝါးကွပ်ကဲရေး ဦးစီးဌာန(FDA)မှ သိရသည်။

သက်တမ်းတိုးလျှောက်ထားခြင်းအတွက် သတ်မှတ်အထောက်အထားများ အပြည့်အစုံတင်ပြရမည်ဖြစ်ပြီး ကနဦးအ‌ထောက်အထားစစ်ဆေးခကျပ် ၃၀၀၀၀ ကို Digital Payment ဖြင့် သွင်းရမည်ဖြစ်သည်။

ဆေးဝါးမှတ်ပုံတင်ကြေးကို ကျပ် ၅ သိန်းသတ်မှတ်ထားပြီး ငါးနှစ်တစ်ကြိမ်သက်တမ်းတိုးရမည်ဖြစ်ပြီးဆေးဝါးတစ်မျိုးအတွက် နှစ်စဉ်ကြေးAnnual Feeအနေဖြင့် ကျပ်၃သိန်းသွင်းရမည်ဟု ဖော်ပြထားသည်။

 သက်တမ်းတိုးလျှောက်ထားခြင်းကို ဆေးဝါးမှတ်ပုံတင်သက်တမ်းမကုန်ဆုံးမီ ရက်ပေါင်း (၁၈၀)ကြိုတင်ပြီး လျှောက်ထားရမှာဖြစ်ပြီးသတ်မှတ်ကာလအတွင်း ဆောင်ရွက်ခြင်းမရှိပါက သက်တမ်းကုန်ဆုံးရက် ကစပြီး တစ်လကိုဒဏ်ငွေကျပ်ငါးသောင်းပေးဆောင်ရမှာဖြစ်သည်ဟု ဆိုသည်။

ဆေးဝါးမှတ်ပုံတင် နှစ်စဉ်ကြေးကို ဒစ်ဂျစ်တယ်စနစ်ဖြင့်သာ ပေးသွင်းရမည်ဖြစ်ပြီး နှစ်စဉ်ကြေးပေးသွင်းရန် (၂) နှစ်ဆက်တိုက် ပျက်ကွက်ပါက ဆေးဝါးမှတ်ပုံတင်သက်တမ်းတိုးခြင်းကို ဆက် လက်ဆောင်ရွက်ခွင့်ပြုမည်မဟုတ်ကြောင်း အစားအသောက်နှင့် ဆေးဝါးကွပ်ကဲရေး ဦးစီးဌာန(FDA)မှ သိရသည်။

#Local_News #ဆေးဝါးမှတ်ပုံတင်သက်တမ်းတိုးခြင်း #သက်တမ်းမကုန်မီရက်(၁၈၀)ကြိုလျှောက် #tthl #Yangon _Times

#Local_News
Published 5 December 2023

ရန်ကုန်တိုင်းဒေသကြီး လှည်းကူးမြို့နယ် စခန်းကြီးကျေးရွာအနီး လှည်းကူး-ဖောင်ကြီး လမ်းတွင် ဒီဇင်ဘာ ၅ရက် နံနက် ၈နာရီခန့်က ယာဉ်သုံးစီးဆင့်တိုက်မှု ဖြစ်ပွားခဲ့ကြောင်း လှည်းကူးမြို့နယ် မီးသတ်တပ်ဖွဲ့ထံမှ သိရသည်။

အဆိုပါ ယာဉ်တိုက်မှုကြောင့် ယာဉ်ပေါ်တွင် လူတစ်ဦးညှပ်နေကြောင်း သတင်းရရှိသဖြင့် လှည်းကူးမြို့နယ် မီးသတ်စခန်းမှ တာဝန်ရှိသူများက သွားရောက်ကယ်ဆယ်ထုတ်ယူပေးတာကြောင့် ၈နာရီ၈မိခန့်တွင် ကယ်ထုတ်နိုင်ခဲ့ကြောင်း သိရသည်။

ယာဉ်တိုက်မှုဖြစ်စဉ်တွင် ထိခိုက်ဒဏ်ရာရရှိသူများလည်းရှိပြီး ယင်းထိခိုက်ဒဏ်ရာရသူများကို လှည်းကူးမြို့နယ် ကြက်ခြေနီအသင်းနှင့်လူမှုကူညီရေးအသင်းများက ရှေးဦးသူနာပြုစုခြင်းတို့ ပြုလုပ်ပေးကာ ဆေးရုံကို ပို့ဆောင်ပေးခဲ့ကြောင်း သိရသည်။

#Local_News #ယာဉ်သုံးစီးဆင့်တိုက်မှုဖြစ် #YMG/LW #Yangon_Times

#World_News
Published 05 December 2023

အင်ဒိုနီးရှားနိုင်ငံ အနောက်ဆူမာတြာရှိ မရာပီမီးတောင် ပေါက်ကွဲခဲ့သဖြင့် တနင်္လာနေ့က တောင်တက်သမား ၁၁ ဦး သေဆုံးလျက် တွေ့ရှိခဲ့ကာ ၁၂ ဦး ပျောက်ဆုံးနေကြောင်း ကယ်ဆယ်ရေးအရာရှိတစ်ဦးက ပြောပြခဲ့ပါတယ်။

လုံခြုံရေးစိုးရိမ်ရမှုများကြောင့် ကယ်ဆယ်ရေးလုပ်ငန်းများ ခေတ္တရပ်ဆိုင်းခဲ့ရကာ ပြန်လည်ဆောင်ရွက်နေပြီ ဖြစ်ပါတယ်။

တနင်္ဂနွေနေ့ မီးတောင်ပေါက်ကွဲချိန်မှာ ထိုအနီးနားတဝိုက်မှာရှိတဲ့ လူ ၇၅ ဦးထဲက အသက်ရှင်ကျန်ရစ်သူ ၃ ဦးနဲ့ အလောင်း ၁၁ လောင်းကို တနင်္လာနေ့မှာ တွေ့ရှိခဲ့ပြီး ထိုလူအားလုံးဟာ တောင်တက်သမားတွေချည်း ဖြစ်ကြောင်း ရှာဖွေရေးနဲ့ ကယ်ဆယ်ရေးအဖွဲ့မှ ပြောရေးဆိုခွင့်ရှိသူ ဂျိုဒီဟာယာဝမ်က ပြောပြသွားပါတယ်။

ညနေမတိုင်မီအထိ ပျောက်ဆုံးနေသူ ၁၂ ဦးကို ဆက်လက်ရှာဖွေနေပြီး ကယ်ဆယ်ရေးလုပ်ငန်းများကို ဘယ်အချိန်မှ ရပ်တန့်မလဲဆိုတာ မဆုံးဖြတ်ရသေးကြောင်း ပြောကြားခဲ့ကာ အသက်ရှင်ကျန်ရစ်သူ ၃ ဦးနဲ့ အလောင်းတွေကို ဆက်လက်ကယ်ထုတ်သွားမှာ ဖြစ်တယ်လို့ ဆိုပါတယ်။

တနင်္လာနေ့အစောပိုင်းက တောင်တက်သမား ၄၉ ဦးကို ဆယ်ထုတ်နိုင်ခဲ့ပြီး အပူလောင်ဒဏ်ရာများကို ကုသပေးခဲ့ပါတယ်။

မီးတောင်မှ အလောင်းတစ်လောင်းကို ဆယ်ထုတ်ဖို့ ၄ နာရီမှ ၆ နာရီလောက်အထိ အချိန်ယူရကာ အလွန်ခက်ခဲနေပါတယ်။

၂,၈၉၁ မီတာမြင့်တဲ့ မီးတောင်ကနေ တနင်္ဂနွေနေ့က ပြာမှုန့်တွေကို ကောင်းကင်ထက်သို့ ၃ ကီလိုမီတာလောက်အထိ မှုတ်ထုတ်နေခဲ့ပါတယ်။

မရာပီမီးတောင်ဟာ ဆူမာတြာကျွန်းမှာ အလှုပ်ရှားဆုံး မီးတောင်တွေထဲက တစ်ခုဖြစ်ပြီး ၁၉၇၉ ခုနှစ် ဧပြီလမှာ အကြီးမားဆုံး ပေါက်ကွဲမှုကြီးဖြစ်ခဲ့ပြီး လူ ၆၀ သေဆုံးခဲ့ပါတယ်။

ယခုနှစ် ဇန်နဝါရီနဲ့ ဖေဖော်ဝါရီမှာလည်း ပေါက်ကွဲခဲ့ကာ ၁ ကီလိုမီတာ အမြင့်လောက်အထိ ပြာမှုန်များ မှုတ်ထုတ်ခဲ့ပါတယ်။

အာဏာပိုင်များက ဒုတိယအဆင့် သတိပေးချက် ထုတ်ပြန်ခဲ့ကာ မီးတောင်ထိပ်ဝ ၃ ကီလိုမီတာအတွင်း မသွားကြဖို့ တားမြစ်ထားပါတယ်။

ဗီဒီယိုပြသချက်တွေထဲမှာ မီးတောင်ပြာမှုန်ထုထည်ကြီးက ကောင်းကင်အနှံ့ ပျံ့နှံ့သွားခဲ့ပြီး လမ်းတွေကားတွေဟာ ပြာမှုန်ဖုံးလွှမ်းသွားခဲ့ပါတယ်။

တနင်္လာနေ့နံနက်ပိုင်းမှာ အသေးစားပေါက်ကွဲမှု ဖြစ်ခဲ့ပြီး ရှာဖွေရေးများကို နာရီအနည်းငယ်ကြာ ရပ်ဆိုင်းခဲ့ရပါတယ်။

ထိုပေါက်ကွဲမှုကတော့ ပြာမှုန်များ ကောင်းကင်သို့ ၈၀၀ မီတာခန့်အထိ မှုတ်ထုတ်ခဲ့ပါတယ်။

အင်ဒိုနီးရှားနိုင်ငံဟာ ပစိဖိတ်ရဲ့ မီးကွင်းနေရာကြီးမှာ တည်ရှိနေပြီး လှုပ်ရှားမီးတောင် ၁၂၇ ခုရှိနေပါတယ်။

#World_News #အင်ဒိုနီးရှားမှမရာပီမီးတောင်ပေါက်ကွဲ #(၁၁)ဦးသေဆုံး #(၁၂)ဦးပျောက်ဆုံး #Source: Reuters

#Local_News
Published_ 5 December 2023

လူသားချင်းစာနာထောက်ထားမှုအကူအညီများ ပေးအပ်ရေးနှင့် လူသားချင်း စာနာထောက်ထားမှုဆိုင်ရာ နိုင်ငံတကာဥပဒေများ လိုက်နာရေးနှင့်ပတ်သက်၍ ဝန်ကြီး ဦးကိုကိုလှိုင်နှင့် အပြည်ပြည်ဆိုင်ရာ ကြက်ခြေနီကော်မတီ၏ မြန်မာနိုင်ငံဆိုင်ရာဌာနေကိုယ်စားလှယ် Ms. Elena Ajmone Sessera တို့ ဆွေးနွေးခဲ့ကြောင်း သိရပါတယ်။

ပြည်ထောင်စုအစိုးရအဖွဲ့ရုံးဝန်ကြီးဌာန(၂)ဝန်ကြီး ဦးကိုကိုလှိုင်သည် အပြည်ပြည်ဆိုင်ရာ ကြက်ခြေနီကော်မတီ (International Com-mittee of the Red Cross-ICRC)၏ မြန်မာနိုင်ငံဆိုင်ရာ ဌာနေကိုယ်စားလှယ်ဖြစ်သူ Ms. Elena Ajmone Sessera ဦးဆောင်တဲ့ ကိုယ်စားလှယ်အဖွဲ့ကို ဒီဇင်ဘာ ၄ ရက်က နေပြည်တော်၌ လက်ခံတွေ့ဆုံစဉ် ဆွေးနွေးခဲ့တာ ဖြစ်ပါတယ်။

လက်နက်ကိုင်ပဋိပက္ခတွေကြောင့် ထိခိုက်ခံစားရသူတွေ အပါအဝင် ထောင်ပေါင်းများစွာသော မသန်စွမ်းသူတွေနဲ့အတူလုပ်ငန်းတွေဆောင်ရွက်နေတာ နှစ်ပေါင်း ၃၀ ကျော်တိုင်ခဲ့ပြီဖြစ်တယ်လို့ ICRC က ဆိုပါတယ်။

လက်ရှိမှာ မြန်မာနိုင်ငံတစ်ဝန်း ကချင်၊ ကရင်၊ ရခိုင်၊ ရှမ်းနဲ့ ရန်ကုန်တို့မှာရှိတဲ့ ကိုယ်ကာယပြန်လည်သန်စွမ်းရေးဌာန ၅ ခုကို ပံ့ပိုးကူညီနေပြီး အမျိုးမျိုးသော ကိုယ်ကာယပြန်လည်သန်စွမ်းရေး ဝန်ဆောင်မှုတွေကို ပံ့ပိုးပေးတဲ့အပြင်၊ ဒီဌာနတွေက ကိုယ်အင်္ဂါမသန်စွမ်းသူတွေ လူ့အသိုင်းအဝိုင်းအတွင်း ပြန်လည်ပါဝင်စေနိုင်ဖို့ ပြန်လည်သန်စွမ်းရေးဆိုင်ရာ အားကစားတွေကအစ အသေးစားစီးပွားရေးလုပ်ငန်းတွေ အစပြုနိုင်ဖို့ အသက်မွေးဝမ်းကျောင်းသင်တန်းတွေပံ့ပိုးပေးတာအပါအဝင် အမျိုးမျိုးသော လုပ်ငန်းတွေအားဖြင့် အားပေးမြှင့်တင်လျက်ရှိတယ်လို့ ICRC မြန်မာ က သတင်းထုတ်ပြန် ထားပါတယ်။

#Local_News #လူသားချင်းစာနာထောက်ထားမှု #နိုင်ငံတကာဥပဒေ #ymg_mnn #Yangon_Media_Group

 Published 05 December 2023

ကိုယ့်ကိုယ်ကို အထင်ကြီးပြီး စိတ်ကြီးဝင်နေတဲ့သူတွေဟာ လက်ကိုင်ဖုန်းတွေကို ပိုမိုစွဲလမ်းရူးသွပ်နိုင်ဖွယ် ရှိတယ်လို့ ရိုမေးနီးယား သုတေသီများက လေ့လာတွေ့ရှိခဲ့ပါတယ်။

လက်ကိုင်ဖုန်းစွဲလမ်းသူတွေဟာ ဖုန်းနဲ့အဆက်အသွယ် ပြတ်သွားမှာကို စိုးရိမ်နေကြတယ်လို့ ဖော်ပြခဲ့ပါတယ်။

သုတေသီများက အသက် ၁၈ နှစ်မှ ၄၅ နှစ်ကြား လူပေါင်း ၅၅၉ ဦးကို အွန်လိုင်းစစ်တမ်း ကောက်ယူကာ စိတ်ကြီးဝင်ခြင်း၊ စိတ်ဖိစီးခြင်း၊ ဆိုရှယ်မီဒီယာ စွဲလမ်းခြင်းလက္ခဏာများကို စမ်းသပ်တဲ့ မေးခွန်းများ ပါဝင်ခဲ့ပါတယ်။

မိမိကိုယ်ကို အထင်ကြီးတဲ့ စရိုက်လက္ခဏာတွေမှာ အမှတ်များများရတဲ့ လူတွေဟာ မိုဘိုင်းဖုန်း မကိုင်ရဘဲ မနေနိုင်တဲ့လက္ခဏာ သိသိသာသာ မြင့်မားနေတာကို တွေ့ရှိခဲ့ပါတယ်။

ထိုသူတွေဟာ အခြားသူတွေဆီက အသိအမှတ်ပြု လေးစားခြင်းကို အလိုရှိနေပြီး ဆိုရှယ်မီဒီယာတွေကနေ လိုက်ခ်တွေ ကွန်မန့်တွေ အလွယ်တကူရရှိတာကို ခံယူချင်နေကြတယ်လို့လည်း တွေ့ရှိခဲ့ကြပါတယ်။

ဒီလိုလူမျိုးဟာ အခြားသူများထံမှ အသိအမှတ်ပြုခြင်း လေးစားခြင်းတို့ကို အလွန်လိုချင်ပြီး လူတွေရဲ့ အာရုံစိုက်မှုကို ခံယူချင်ကြကြောင်း၊ ယင်းတို့ကို အထက်တန်းစားသဖွယ် ဆက်ဆံခံရဖို့ မျှော်လင့်နေကြကြောင်း ဖော်ပြထားပါတယ်။

ထိုလေ့လာချက်ထဲမှာ ဖုန်းမကိုင်ရမနေနိုင်ဖြစ်ခြင်း၊ စိတ်ကြီးဝင်ခြင်း၊ စိတ်ဖိစီးခြင်း၊ ဆိုရှယ်မီဒီယာစွဲလမ်းခြင်းတို့ဟာ လူတစ်ယောက်ရဲ့ စရိုက်ပြုမူပုံအပေါ် ဘယ်လိုလွှမ်းမိုးနေလဲဆိုတာကို Psychology ဂျာနယ်မှာ ရှင်းလင်းထားပါတယ်။

အထောက်အထားများအရ ဆိုရှယ်မီဒီယာ စွဲလမ်းခြင်းနဲ့ ဖုန်းမကိုင်ရမနေနိုင်ဖြစ်ခြင်းတို့ဟာ စိတ်ကြီးဝင်ခြင်းနဲ့ ဖိစီးမှုတို့ကြား ပတ်သက်မှုကို အားပေးနေပါတယ်။

ဒါတွေကို တိုက်ဖျက်ဖို့အတွက် နည်းလမ်းတွေရှိနေပါတယ်။

ဆိုရှယ်မီဒီယာ မဖြစ်မနေ သုံးစွဲဖို့လိုတယ်ဆိုတာမျိုးကို ဖယ်ရှားပြီး ဆိုရှယ်မီဒီယာအက်ပ် တစ်ခုခုကနေ ထွက်လိုက်တဲ့အခါ ဝင်လိုက်တဲ့အခါ ဖြစ်လာတဲ့ စိတ်ခံစားချက်မျိုးကို စဥ်းစားသုံးသပ်သင့်သလို လူအများအပြားက သူတို့ရဲ့ဘဝအမှန်ကို အွန်လိုင်းမှာ မဖော်ပြတာကြောင့် တက်လာသမျှ အကြောင်းအရာတိုင်းကို အမှန်မယူတာမျိုး ပြုလုပ်သင့်ပါတယ်။
Source: New York Post.
#World_Health
#YMG_News #Yangon_Times #Yangon_Media_Group