#Local_News
Published - 20 July 2022

ဂျပန်နိုင်ငံမှာ အလုပ်လုပ်ကိုင်ဖို့ရောက်နေတဲ့ မြန်မာလူငယ်တွေ အနေနဲ့ ဂျပန်နိုင်ငံမှာပဲ ဂျပန်ဘာသာ စကားဆက်သင်ပြီး ဂျပန်တက္ကသိုလ်တွေမှာ တက်ရောက်ပညာသင်ယူနိုင်တဲ့အထိ ကြိုးစားစေချင်တယ်လို့ ဂျပန်ဘာသာသင်တန်းကျောင်း တည်ထောင်တဲ့ ဒေါက်တာမင်းညိုကပြောပါတယ်၊၊

#Yangon_Media_Group

#Local_News
Published_20 July 2022

ဒေါ်လာဈေးတက်နေတာကြောင့် ပြည်ပပို့ကုန်တွေ ရပ်ထားရတဲ့ ကိစ္စနဲ့ ပတ်သက်လို့ ပြောင်းလုပ်ငန်းရှင်တွေက သက်ဆိုင်ရာဌာနတွေကို စာတင်မယ်လို့ သိရပါတယ်။

#Yangon_Media_Group

#Local_News
Published _ 20 July 2022

ပြည်တွင်းစက်သုံးဆီဈေးနှုန်းများဟာ ဇူလိုင်လအတွင်း အတက်အကျမြန်ဆန်စွာဖြစ်ပေါ်ခဲ့ပြီး ၉၂ တစ်လီတာကို ကျပ် ၁၇၀၀ အထိ ကျဆင်းသွားခဲ့ကာ အကျဈေးဟာ ရက်ပိုင်းသာကြာခဲ့ပြီး ယနေ့ ဇူလိုင်လ ၂၀ ရက်မှာ တစ်လီတာကို ၁၈၀၀ ကျပ် ပြန်တက်နေကြောင်း စက်သုံးဆီကြီးကြပ်ရေးကော်မတီမှ ထုတ်ပြန်သည့် ရည်ညွှန်းဈေးနှုန်းများအရ သိရသည်။

စက်သုံးကြီးကြပ်ရေးကော်မတီက ထုတ်ပြန်သည့် ရည်ညွှန်းဈေးနှုန်းများအရ ဇူလိုင်လ ၁၆ရက်မှာ ၉၂ တစ်လီတာကို ကျပ် ၁၇၀၀ အထိ ကျဆင်းခဲ့ပြီး ဧပြီလနောက်ပိုင်းထုတ်ပြန်ခဲ့သည့် စက်သုံးဆီအနိမ့်ဆုံး ဈေးနှုန်းတစ်ခုဖြစ်ခဲ့ကြောင်း သိရသည်။

စက်သုံးဆီဈေးဟာ ရက်ပိုင်းပဲကျဆင်းခဲ့ပြီး ယနေ့ ၄ ရက်မြောက်နေ့တွင် ၉၂ တစ်လီတာကို ၁၈၀၀ကျပ်၊ ၉၅တစ်လီတာကို ၁၈၆၅ ကျပ်ဖြစ်ပေါ်ခဲ့၍ လေးရက်အတွင်း ၁၀၀ကျပ် ပြန်တက်လာပြီး ဒီဇယ်ဈေးအနေဖြင့် ကျပ် ၂၁၀၀ကနေ ၂၂၀၀ကျပ် ဝန်းကျင်ဈေးနှုန်းမှာဘဲ တည်ငြိမ်နေခြင်းဖြစ်သည်။

စက်သုံးဆီကြီးကြပ်ရေး ကော်မတီရဲ့ထုတ်ပြန်ချက်အရ ဇူလိုင်လအတွင်း စက်သုံးဆီဈေးနှုန်းဟာ အတက်အကျ မြန်နေခဲ့ပြီး ဇူလိုင်လ ၇ရကမှစတင်၍ ကျပ်၂၀၀၀ အောက် ကျဆင်းခဲ့ကာ ဇူလိုင်လ ၁၅ရက်မှာ ကျပ် ၁၈၀၀ အောက်၊ ၁၆ရက်မှာ ကျပ် ၁၇၀၀ အောက်မှာ ရှိနေခဲ့ကာ ယနေ့ ဇူလိုင်လ ၂၀ရက်၌ တစ်လီတာကို ၁၈၀၀ပြန်ရောက်ရှိနေပြီး တက်မည့်အရိပ်ယောင်မြင်နေရကြောင်း သိရသည်။

ymg/NN
#Yangon_Media_Group

#Local_News
Published - 20 July 2022

နိုင်ငံစီးပွားရေးအတွက် အရေးပါသော ဘဏ်လုပ်ငန်းတည်ငြိမ်ဖွံ့ဖြိုးရေးအတွက် ဘဏ္ဍာရေးမူဝါဒနှင့် ငွေကြေးမူဝါဒများကို ဖော်ဆောင်နေကြောင်း ဗဟိုဘဏ်ဥက္ကဋ္ဌ ဦးသန်းညိန်းက ပြောသည်။

ဗဟိုဘဏ်ဥက္ကဋ္ဌဦးသန်းညိန်းက ဗွီဒီယိုကွန်ဖရန့်စနစ်ဖြင့် ကျင်းပသော မြန်မာနိုင်ငံဘဏ်များအသင်း အဖွဲ့ဝင်များနှင့် တွေ့ဆုံပွဲတွင် အထက်ပါကဲ့သို ထည့်သွင်းပြောဆိုခဲ့ခြင်း ဖြစ်သည်။

ဘဏ်များအားလုံး ဝိုင်းဝန်းပူးပေါင်းဆောင်ရွက်ပေးခြင်းကြောင့် ပြည်သူများအကြား ဘဏ်အသုံးပြုမှုပိုမိုများ ပြားလာပြီး ဘဏ်လုပ်ငန်းစနစ်အပေါ် ယုံကြည်မှုတိုးလာရန် တည်ဆောက်နိုင်ခဲ့ကြောင်း ဗဟိုဘဏ်ဥက္ကဋ္ဌက ပြောကြားခဲ့သည်။

ဗဟိုဘဏ်အနေဖြင့် ဘဏ်များအခက်အခဲကြုံတွေ့ရစဉ်အချိန်တွင် လိုက်နာရမည့် သတ်မှတ်အချိုးများကို ဖြေလျှော့ပေးခဲ့ခြင်း၊ ဘဏ်တစ်ဘဏ်ချင်းအလိုက် လိုအပ်ချက်အပေါ်မူတည်ကာ ပံ့ပိုးပေးခဲ့ကြောင်းလည်း ထည့်သွင်းပြောကြားခဲ့သည်။

ယင်းအပြင် ဗဟိုဘဏ်ဒုဥက္ကဋ္ဌဦးဝင်းသော်က ဘဏ်များအတွက် လိုအပ်သည့် ငွေသားလွယ်ကူမှု ပံ့ပိုးပေးခြင်းများကို စဉ်ဆက်မပြတ်ဆောင်ရွက်နေပြီး နိုင်ငံခြားသုံးငွေဆိုင်ရာသတ်မှတ်ချက်များ၊ ဆောင်ရွက်ရမည့် နည်းလမ်းများကိုလည်း ဆက်လက်လိုက်နာဆောင်ရွက်သွားရန် အသိပေးပြောဆိုခဲ့ကြောင်း သိရသည်။

ymg/sth
#Yangon_Media_Group

Published 20 July 2022

မြန်မာနိုင်ငံမှာ တယ်လီဖုန်းဆက်သွယ်ရေး အော်ပရေတာတစ်ခုဖြစ်တဲ့ အော်ရီဒူးဟာ ယင်းရဲ့ မြန်မာလုပ်ငန်းကို ရောင်းချပြီး မြန်မာနိုင်ငံမှ ထွက်ခွာဖို့ ပြင်ဆင်နေတယ်လို့ အဲဒီကိစ္စနှင့်နီးစပ်တဲ့ ပုဂ္ဂိုလ်နှစ်ဦးကို ကိုးကားပြီး ရိုက်တာက သတင်းရေးသား လိုက်ပါတယ်။

ဒိုဟာ အခြေစိုက် အော်ရီဒူးဟာ မြန်မာနိုင်ငံ စာတိုက်နှင့် ဆက်သွယ်ရေးဌာန PTD (ဆယ်သွယ်ရေးညွှန်ကြားမှုဦးစီးဌာန) ကို သူ့လုပ်ငန်းရောင်းချဖို့ရည်ရွယ်ထားတဲ့ အကြောင်း အကြောင်းကြားခဲ့တယ်လို့သိရပါတယ်။ အော်ရီဒူးဟာ မြန်မာနိုင်ငံမှာ တတိယမြောက်အင်အားအကြီးဆုံး အော်ပရေတာဖြစ်ပြီး ၂၀၂၀မှာ သုံးစွဲသူပေါင်း ၁၅သန်းရှိနေတယ်လို့ ရိုက်တာသတင်းမှာဖော်ပြထားပါတယ်။

ဝယ်ယူဖို့အလားအလာရှိနေတဲ့ အဓိက ကုမွဏီသုံးခုကတော့ မြန်မာနိုင်ငံရဲ့ကုမ္ပဏီနှစ်ခုဖြစ်တဲ့ Young Investment Group နှင့် စကိုင်းနက်တို့ဖြစ်ကြပြီး နောက်တစ်ခုကတော့ စင်္ကာပူအခြေစိုက် ကွန်ယက်အခြခံအဆောက်အအုံအော်ပရတော ကမ်ပါနာအုပ်စု Campana Group တို့ဖြစ်ကြတယ်လို့ သတင်းအရသိရှိရပါတယ်။

အဲဒီအထဲမှာ Young Investment Group ဟာ လက်ရှိ မြန်မာနိုင်ငံရဲ့ ရုပ်မြင်သံကြားလိုင်း Y TV ကိုရင်းနှီးမြှပ်နှံသူဖြစ်ပြီး စကိုင်းနက်ကတော့ ရွှေသံလွင်အုပ်စုက ပိုင်ဆိုင်တာဖြစ်ပါတယ်။

ဒါပေမယ့် အဲဒီအုပ်စု(၃)စုနှင့်‌ ဆွေးနွေးတာတွေ မပြီးပြတ်သေးဘူးလို့လည်း သတင်းအရင်းအမြစ်တွေက ပြောပါတယ်။

ရိုက်တာက အီးမေးလ်နှင့်ဆက်သွယ်မေးမြန်းတာကို အော်ရီဒူးက ချက်ခြင်းပြန်မတုန့်ပြန်သေးပါဘူး။

အဲဒီအပြင်  ဆက်သွယ်ရေးညွှန်ကြားမှုဦးစီးဌာန၊ တဲ့ Young Investment Group နှင့် စကိုင်းနက်တို့ကို ဆက်သွယ်မေးမြန်းသော်လည်း တုန့်ပြန်ခြင်းမရှိကြောင်းနှင့် ကမ်ပါနာအုပ်စုထံမှလည်း မှတ်ချက်ချက်ခြင်းမရသေးဘူးလို့လည်း ရိုက်တာကရေးသားပါတယ်။

#Source_Reuters

#Ooredoo_Myanmar_Exit

#Myanmar_telecommunication

#Myanmar_Ooredoo_sells_business

#DailyNews
Published - 20 July 2022

၁။ မြန်မာလူငယ်များ ဂျပန်တွင်အလုပ်လုပ်ရင်း တက္ကသိုလ်ပညာဆက်သင်ရန် လိုအပ်နေဟုဆို

၂။ ဒေါ်လာဈေးတက်နေ၍ မူဆယ်နယ်စပ်ကုန်သွယ်ရေးလုပ်ငန်း ရပ်ဆိုင်းလုဖြစ်နေ

၃။ နေ့စဉ်မိုးလေဝသသတင်း။

၄။ ကမ္ဘာလှည့်တွေကို ဆွဲဆောင်ထားဆဲဖြစ်တဲ့ နှစ်(၂)ထောင် သက်တမ်းရှိ တရုတ်ရှေးဟောင်းရွှံ့စေးရုပ်ထု တပ်မတော်ကြီး... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published - 20 July 2022

ရန်ကုန်မှာအသက်ရှူမွန်းကြပ်လူနာများ များပြားလာပြီး နေ့စဉ်ဆေးရုံကို ပို့ဆောင်ပေးနေရတယ်လို့ ရှင်သန်ရေးကူညီမှုအသင်းချုပ်ဥက္ကဌဦးထွန်းထွန်းဦးက YMG ကို ပြောပါတယ်၊၊

ရှင်သန်ရေး ကူညီမှုအသင်းချုပ်အနေနဲ့တစ်ရက်ကို အသက်ရှူ မွန်းကြပ်လူနာ(၂)ဦးခန့်နေ့စဉ်ဆေးရုံကို ပို့ဆောင်ပေးရတယ်လို့ ဆိုပါတယ်၊၊

"လောလောဆယ်မှာ ကျွန်တော်တိုအသင်းအနေနဲ့ အသက်ရှူမွန်းကြပ်လူနာတွေကို ပို့ဆောင်ပေးရတာ များနေပါတယ်၊၊ သက်ကြီးရွယ်အိုတွေက ပိုများတယ်၊၊ ဆေးရုံရောက်လို့ အောက်ဆီဂျင်တိုင်းလိုက်ရင် ၇၅/၈၀ပေါ့ အောက်ဆီဂျင်ကျနေတယ်၊၊ ကလေးမွေးပြီးကာစလေးတွေမှာ အောက်ဆီဂျင်ကျနေတာတွေ့နေရတယ်၊၊ ရန်ကုန်မှာကျွန်တော်တို့အသင်းအနေနဲ့ အသက်ရှူမွန်းကြပ်လူနာခန့်မှန်းခြေတစ်ရက်ကို နှစ်ယောက်လောက် ပို့ဆောင်ပေးနေရပါတယ်"လို့ ရှင်သန်ရေးကူညီမှု အသင်းချုပ်ဥက္ကဌဦးထွန်းထွန်းဦးက YMG ကို ပြောပါတယ်၊၊

အသက်ရှူမွန်းကြပ်လူနာတွေထဲမှာ ကလေးရော လူကြီးပါပါဝင်ပြီး ဆေးရုံရောက်လို စစ်ဆေးတဲ့အခါအောက်ဆီဂျင်ကျနေတာတွေရှိသလို ကိုဗစ်ပိုးတွေ့လူနာတွေလည်းရှိနေတယ်လို့ ဆိုပါတယ်၊၊

ရန်ကုန်တွင် ကိုဗစ်ဖြစ်ပွားမှုတွေရှိနေသေးတဲ့အတွက် ရန်ကုန်နေ ပြည်သူတွေ အထူးသတိပြုကာကွယ်ကြဖို့ လိုတယ်လို့ ဦးထွန်းထွန်းဦးရဲ့ပြောပြချက်အရ သိရပါတယ်၊၊

ymg/tthl
#Yangon_Media_Group

#World_Politics
Published 20 July 2022

ရုရှားသမ္မတ'ဗလာဒီမီယာပူတင်'နဲ့ အီရန်ထိပ်သီးခေါင်းဆောင်'အာယာတိုလာအာလီခါမီနိုင်'တို့ဟာ အင်္ဂါနေ့က အီရန်နိုင်ငံမှာ တွေ့ဆုံခဲ့ပါတယ်။

ဒါ့အပြင် 'ပူတင်'ဟာ ယူကရိန်းကို ကျူးကျော်ပြီးနောက်ပိုင်း ပထမဆုံးလူချင်းတွေ့ဆုံဆွေးနွေးပွဲပြုလုပ်ခဲ့ပြီး တူရကီမှ နေတိုး(NATO) ခေါင်းဆောင်တစ်ဦးဖြစ်တဲ့'တာယစ်ပ်အာဒိုဂန်'နဲ့လည်း မြို့တော်တာဟာရန်မှာ တွေ့ဆုံခဲ့ကာ ဆီးရီးယားမြောက်ပိုင်းပဋိပက္ခအကြောင်းနဲ့ ယူကရိန်း ပင်လယ်နက်မှ ဆန်စပါးပြန်လည်တင်ပို့နိုင်ရေး အကြောင်းတို့ကို ဆွေးနွေးခဲ့ကြပါတယ်။

ရုရှားခေါင်းဆောင်'ပူတင်'ဟာ ဖေဖော်ဝါရီ ၂၄ ရက်နေ့ ယူကရိန်းကိုကျူးကျော်ပြီးနောက်ပိုင်း ဆိုဗီယက်ပြည်ထောင်စုနိုင်ငံဟောင်းပြင်ပကို ပထမဆုံးအကြိမ် လူကိုယ်တိုင်ထွက်လာတာ ဖြစ်ပါတယ်။

ပြီးခဲ့တဲ့ ရက်ပိုင်းက အမေရိကန်သမ္မတ'ဂျိုးဘိုင်ဒန်'က အစ္စရေးလ်နဲ့ ဆော်ဒီအာရေဗျတို့ထံ လာရောက်လည်ပတ်ခဲ့ပြီး ရက်ပိုင်းအကြာမှာပဲ 'ပူတင်'ကလည်း အခုလိုအီရန်မှာ လာရောက်တွေ့ဆုံတာဖြစ်ပါတယ်။
ဒါဟာ ရုရှားက အနောက်နိုင်ငံတွေရဲ့ဒဏ်ခတ်ပိတ်ဆို့တွေကို ရင်ဆိုင်နိုင်ဖို့ အီရန်၊ တရုတ်၊ အိန္ဒိယတို့နဲ့ ဆက်ဆံရေး ပိုမိုနီးစပ်အောင်စီစဉ်လာတာဖြစ်ကြောင်း အမေရိကန်ကို အသိပေးလိုက်တဲ့ သဘောဖြစ်ပါတယ်။

အီရန်နဲ့ရုရှားတို့ကြား ရေရှည်ပူးပေါင်းလက်တွဲသွားဖို့ 'ခါမီနိုင်'ကတောင်းဆိုလိုက်ပြီး 'ပူတင်'က နှစ်နိုင်ငံအနေနဲ့ အနောက်နိုင်ငံရဲ့အကြံအစည်ကို အမြဲသတိထားစောင့်ကြည့်နေဖို့ လိုအပ်တယ်လို့ ပြောကြားခဲ့ကြောင်း အီရန်နိုင်ငံပိုင်တီဗီက ဖော်ပြခဲ့ပါတယ်။

ရုရှားက အမေရိကန်ရဲ့လွှမ်းမိုးမှုမသက်ရောက်အောင် အစဉ်တစိုက်ကြိုးပမ်းနေကြောင်း၊ နိုင်ငံတွေအနေနဲ့ ကုန်သွယ်ရောင်းဝယ်တဲ့အခါ ကိုယ့်နိုင်ငံပိုင်ငွေကြေးများဖြင့်သာ အသုံးပြုဖို့ စတင်ကြိုးပမ်းသင့်ကြောင်း 'ပူတင်'က အခိုင်အမာပြောကြားခဲ့တယ်လို့ ဆိုပါတယ်။

"တစ်ကမ္ဘာလုံးဆိုင်ရာကုန်သွယ်ရေးတွေမှာ အမေရိကန်ဒေါ်လာကို တဖြည်းဖြည်းချင်းသုံးစွဲမှု လျှော့ချသွားသင့်ပါတယ်" လို့ 'ခါမီနိုင်'ကဆွေးနွေးပွဲမှာ ပြောကြားခဲ့ပါတယ်။

စစ်ပွဲကြောင့် သာမန်ပြည်သူများဒုက္ခခံစားနေရသော်လည်း ရုရှားဘက်ကလည်း ယူကရိန်းနဲ့ ပတ်သက်ပြီး တခြားရွေးချယ်စရာမရှိကြောင်း ထောက်ခံပြောဆို လိုက်ပါတယ်။

ရုရှားက စမတိုက်ဘူးဆိုရင် အနောက်နိုင်ငံက စစ်ပွဲဖြစ်လာအောင် စလာမှာပါလို့ ဆိုခဲ့ပါတယ်။

အီရန်သို့ 'ပူတင်'သွားရောက်တဲ့ခရီးဟာ ယူကရိန်းကိုကျူးကျော်တဲ့ရုရှားတို့ ဘယ်လောက်အထိ အပယ်ခံနေရလဲဆိုတာကို မြင်သာနေရတယ်လို အမေရိကန်ကတုံပြန်လိုက်ပါတယ်။

အီရန်အတွက်ကလည်း အနောက်နိုင်ငံရဲ့ စီးပွားရေး ဒဏ်ခတ်ပိတ်ဆို့မှုတွေ အထိနာနေရပြီး နျူကလီးယားစီမံကိန်းနဲ့အခြားကိစ္စတွေကြောင့် အမေရိကန်နဲ့ ထိပ်တိုက်တွေ့ဆုံနေရတဲ့အချိန်မှာ 'ပူတင်'ရဲ့ခရီးစဉ်က အချိန်ကိုက်ဖြစ်လာခဲ့ပါတယ်။

ကျူးကျော်မှုနောက်ပိုင်း ရေနံဈေးမြင့်တက်လာတဲ့အချိန်မှာ အီရန်က ရုရှားရဲ့အကူအညီနဲ့ အမေရိကန်တို့ထံမှ လိုက်လျောမှုများ တောင်းဆိုသွားရန် ဖိအားပေးနိုင်ဖို့ မျှော်လင့်ထားပုံရပါတယ်။

တရုတ်တို့ထံ ရေနံတင်ပို့ရောင်းချမှုကနေ အီရန်ကအဓိက ဝင်ငွေရရှိနေခဲ့ရာ ရုရှား-ယူကရိန်းစစ်ပွဲနောက်ပိုင်း တရုတ်တို့က ရုရှားထံမှ ရေနံများကို အချောင်ဈေးနဲ့ ဝယ်ယူလာတာကြောင့် အီရန်တိုရဲ့ရေနံရောင်းချရမှုလျော့နည်းလာခဲ့ပြီး အာရှပင်လယ်ဒေသမှ ရေနံတင် သင်္ဘောတွေမှာ အီရန်ရေနံစည်ပိုင်းပေါင်း သန်း ၄၀ နီးပါးကျန်ရှိနေပြီး ဝယ်မယ့်သူကို ရှာဖွေနေရပါတယ်။

'ပူတင်'မရောက်လာခင်မှာပဲ အီရန်နိုင်ငံပိုင်ကုမ္ပဏီ NIOC နဲ့ ရုရှားဓာတ်ငွေ့ကုမ္ပဏီကြီး Gazprom တိုဟာ ဒေါ်လာ ၄၀ ဘီလီယံတန် သဘောတူညီချက်ကို လက်မှတ်ရေးထိုးခဲ့ကြပါတယ်။

Source: Reuters
#Yangon_Media_Group

#Local_News
Published - 20 July 2022

ပြည်ပနိုင်ငံတွေများသို့ တရားဝင်သွားရောက်အလုပ်လုပ်လိုသူတွေအနေဖြင့် ပြည်တွင်း၌ ဖွင့်ထားသည့် ရွှေ့ပြောင်းလုပ်သားများ ထောက်ပံ့ကူညီရေးဗဟို ဌာန(MRC)များတွင် နည်းလမ်းနှင့် အကြံဉာဏ်များ အခမဲ့ ရယူနိုင်ကြောင်း အလုပ်သမားသံအရာရှိရုံးမှ ထုတ်ပြန်ထားသည်။

မြန်မာနိုင်ငံရှိ မြို့ကြီး ၂၁ မြို့တွင် ဖွင့်ထားသည့် ရွှေ့ပြောင်းလုပ်သားများ ထောက်ပံ့ကူညီရေးဗဟိုဌာနများရှိ အကြံဉာဏ်တောင်းခံနိုင်ကြောင်း အဆိုပါဌာနများက အသိပေးထားခြင်းဖြစ်သည်။

ပြည်ပရှိ အလုပ်လုပ်ရန် ပြင်ဆင်ခြင်းနှင့်ပတ်သက်ပြီး နည်းလမ်းများတောင်းခံနိုင်သလို ပြည်ပအလုပ်အကိုင်အတွက် ပြင်ဆင်နေရင်း ကြုံရသည့်အခက်အခဲများနှင့် ပတ်သက်ပြီးလည်း အကြံဉာဏ်တောင်းယူလိုရကြောင်း ဖော်ပြထားသည်။

ယင်းအပြင် ပြည်ပတွင် အလုပ်လုပ်နေချိန်အတွင်း ခေါင်းပုံဖြတ်အနိုင်ကျင့်ခံရခြင်းများရှိပါက ဆက်သွယ်တိုင်ကြားနိုင်သလို ပြည်ပကနေ မြန်မာနိုင်ငံ ပြန်ရောက်လာချိန်အလုပ်အကိုင် ရှာဖွေလိုရင်လည်း ဆက်သွယ်နိုင်ကြောင်း အသိပေးချက်တွင် ဖော်ပြထားသည်။

လက်ရှိတွင် မြဝတီ၊ ဘားအံ၊ မော်လမြိုင်၊ ရန်ကုန်၊ ပုသိမ်၊ စစ်တွေ၊ မကွေး၊ ဟားခါး၊ မြစ်ကြီးနား၊ တာချီလိတ်၊ မြိတ်၊ အောင်လံ၊ ထားဝယ်၊ ကျိုင်းတုံ၊ တောင်ကြီး၊ လွိုင်ကော်၊ ကျောက်ဆည်၊ မန္တလေး၊ မိတ္ထီလာ၊ မြင်းခြံ၊ ဟင်္သာတ စသည့်မြို့များတွင် ဖွင့်လှစ်ထားပြီး ကော့သောင်းနှင့် မိုးညှင်းတွင်လည်း MRC များ ထပ်မံဖွင့်လှစ်ဖို့ရှိကြောင်း သိရသည်။

ymg/sth
#Yangon_Media_Group

#Local_News
Published - 20 July 2022

ပဲမျိုးစုံ၊ ပြောင်း၊ နှမ်းအမျိုးမျိုးနဲ့ မြေပဲဆန် ပြည်ပတင်ပို့မှုများ အတွက် ပို့ကုန်ရငွေ မတင်ပြနိုင်ခြင်းကြောင့် မြဝတီနယ်စပ်ကုန်သွယ်ရေးစခန်းရှိ ပဲကုန်သည်အချို့ ရပ်နားထားရကြောင်း မြဝတီကုန်သည်တစ်ဦးဖြစ်သူ မဇင်မီက ပြောသည်။

"လောလောဆယ်တော့ ရပ်ထားတာ တစ်ပါတ်ရှိပြီ။ ပဲ၊ ပြောင်း၊ နှမ်းတင်ပို့မှုတွေအတွက် Export credit မရှိရင် တင်ပို့လိုမရဘူးဆိုတော့ အမတို့ကလဲ မပြနိုင်တဲ့အတွက် မပိုရဘူး။ တခြားကုန်ပစ္စည်းတွေကတော့ရမှာပေါ့။ ပဲ၊ ပြောင်း၊ နှမ်းအတွက်ကျတော့ Export credit ပြမှ Export ထွက်ခွင့်ပြုမယ်ဆိုတော့မပြနိုင်တဲ့အတွက် မထွက်ရဘူး"ဟု ယင်းက ပြောသည်။

ယင်းအပြင် ပို့ကုန်ရငွေ မတင်ပြဘဲ တိမ်းရှောင်မှုများရှိနေသည့်အတွက် ပြန်လည်စီစစ်ရန် ထောက်ခံချက်လုပ်များလုပ်ခိုင်းထားကြောင်း မြန်မာ နိုင်ငံပဲမျိုးစုံ၊ ပြောင်းနှင့် နှမ်းကုန်သည်များအသင်းမှ သိရသည်။

ပြည်ပတင်ပို့မှု ထောက်ခံချက်ဟာ ပင်လယ်ရေကြောင်းကနေ တင်ပို့တဲ့ သူတွေအတွက်ဖြစ်ပြီး နယ်စပ်က ပို့မယ့်သူများကို အရင်အတိုင်းပို့လို့ရတယ်လို့ မြန်မာနိုင်ငံပဲမျိုးစုံ၊ ပြောင်းနဲ့ နှမ်းကုန်သည်များ အသင်းရဲ့ ဥက္ကဌ ဦးထွန်းလွင်က YMG ကို ပြောပါတယ်။

စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနအနေဖြင့် ပြည်ပနိုင်ငံတွေဆီ နယ်စပ်၊ ပင်လယ် ရေကြောင်းလမ်းတို့ကနေ ပဲမျိုးစုံ၊ပြောင်းနှင့် ဆီထွက်သီးနှံများ တင်ပို့ရာ ယခုလ ၁ ရက်နေ့မှစပြီး အမေရိကန်ဒေါ်လာငွေကြေးဖြင့်သာ ပို့ကုန်လိုင်စင်များကို ခွင့်ပြုချက် ထုတ်ပေးနေခြင်းဖြစ်ကြောင်း သိရသည်။

ယင်းအပြင် ပို့ကုန်တန်ဖိုးကို ကြိုတင်ငွေလွှဲစနစ် (TT)စနစ် ဖြင့်သာ စိစစ်ပြီး ငွေလွှဲ ကြိုတင်ရရှိပြီးမှ လိုင်စင်ခွင့်ပြုထုတ်ပေးရန် ကုန်သွယ်ရေးဦးစီးဌာနမှ ညွှန်ကြားထားကြောင်း သိရသည်။

ymg/sth
#Yangon_Media_Group

#World_Crime
Published 20 July 2022

ပြီးခဲ့တဲ့သီတင်းပတ်က အိန္ဒိယမှာ သောင်းကျန်းနေတဲ့မျောက်တစ်အုပ်က လူသားမိဘတွေထံမှ လေးလသားအရွယ်ကလေးကိုလုယူပြီး ခေါင်မိုးပေါ်ကပစ်ချလိုက်တာကြောင့် ကလေးသေဆုံးသွားခဲ့ပါတယ်။

အိန္ဒိယမြောက်ပိုင်းအုတာပရာဒက်ရှ်ပြည်နယ် ဒွန်ကာကျေးရွာမှာ အဆိုပါအဖြစ်အပျက်ဖြစ်ပွားခဲ့တာဖြစ်ပါတယ်။

'နီယာဒက်ရှ်အူပါဒီယေ'က သူ့ဇနီး၊ သားယောကျ်ားကလေးနဲ့အတူ သုံးထပ်အိမ်ဝရန်တာမှာ မတ်တပ်ရပ်နေစဉ် အခုလိုဖြစ်ပွားခဲ့တာပါ။

သားအမိ ၃ ယောက် ဝရန်တာမှာအပန်းဖြေနေစဉ် မျောက်တစ်အုပ်က ခေါင်မိုးကနေရောက်လာပြီး သူတို့ကိုဝိုင်းထားခဲ့ပါတယ်။

မျောက်တွေကိုမောင်းထုတ်ဖို့ ကြိုးပမ်းပြီးနောက် လှေကားထစ်ကနေထွက်ပြေးဖို့လုပ်ရာမှာ ကလေးကိုပိုက်ထားတဲ့'နီယာဒက်ရှ်'က ကလေးကိုလွတ်ကျခဲ့ပါတယ်။

မိဘတွေက ကလေးကိုပြန်ယူဖို့ကြိုးစားစဉ်မှာပဲ မျောက်တစ်ကောင်က ကလေးကိုကောက်ယူပြီး ခေါင်မိုးပေါ်ကနေ ပစ်ချလိုက်ပါတယ်။

မိဘတွေကစိုးရိမ်တကြီးနဲ့ အိမ်အထဲလှေကားကနေပြေးဆင်းကာ ကလေးဆီအပြေးအလွှားသွားခဲ့ပေမယ့် ကလေးက ထိုနေရာမှာပင် သေဆုံးသွားခဲ့ပါတယ်။

ဒီအဖြစ်အပျက်နဲ့ပတ်သက်ပြီး ရှာဟီရဲစခန်းမှ အာဏာပိုင်များနဲ့အတူ စုံစမ်းစစ်ဆေးနေကြောင်း၊ ကလေးသေဆုံးမှုမှာ မျောက်တွေပါဝင်ပတ်သက်နေတာနဲ့ပတ်သက်ပြီး စုံစမ်းဖို့အဖွဲ့စေလွှတ်ထားကြောင်း ဘာရဲလီမြို့ဦးစီးချုပ်'လာလစ်ဗာမာ'က PTI သတင်းဌာနကိုပြောကြားခဲ့ပါတယ်။

အုတာပရာဒက်ရှ်ဟာ မျောက်အများအပြားနေထိုင်ရာနေရာဖြစ်ပြီး မြို့တွေလမ်းတွေမှာ လှည့်လည်သွားလာနေကြပါတယ်။

အစပိုင်းမှာတော့ ဒေသခံလူတွေနဲ့ သင့်တင့်အောင်နေထိုင်ကြပေမယ့် လူသားတွေ အထူးသဖြင့်ကလေးတွေကို မျောက်တွေကတိုက်ခိုက်လာတဲ့အကြောင်း အနည်းငယ်ကြားသိရပါတယ်။

ဖေဖော်ဝါရီလတုန်းကလည်း ဘစ်ချ်ပူရီရွာမှာ မျောက်တစ်အုပ်က အသက် ၅ နှစ်အရွယ်မိန်းကလေးတစ်ယောက်ကို သတ်ပစ်လိုက်ကြပါတယ်။

ထိုကလေးက သူ့သူငယ်ချင်းတွေနဲ့အတူ နာကာတီယာမြစ်နံဘေးမှာဆော့ကစားနေစဉ် မျောက်တွေက သူ့ကိုခုန်အုပ်ပြီး တစ်ကိုယ်လုံးကိုကိုက်ပစ်ခဲ့ကြပါတယ်။

ကလေးအဖေက သတင်းစာကိုပြောပြရာမှာ မျောက်တွေက အတော်ကိုရန်လိုနေပြီး သမီးကိုနေရာအနှံ့ကိုက်ပစ်ကြောင်း၊ သူရောက်သွားတော့ သမီးက အော်ငိုပြီးအကူအညီတောင်းနေကြောင်း၊ ဒေသန္တရကျန်းမာရေးဌာနသို့ အမြန်သွားရောက်ခဲ့ပေမယ့် သွေးထွက်လွန်ကာသေဆုံးသွားခဲ့ကြောင်း ပြောပြခဲ့ပါတယ်။

မျောက်တွေက ကားတွေကိုခိုးယူထွက်ပြေးပြီး ယာဉ်တိုက်မှုလည်း ဖြစ်ပွားခဲ့ဖူးပါတယ်။ ၂၀၁၅ ခုနှစ်က ဘတ်စ်ကားယာဉ်မောင်းအိပ်ပျော်နေစဉ် မျောက်တစ်ကောင်က ကားအင်ဂျင်ကိုနှိုးလိုက်နိုင်ပြီး အခြားယာဉ်များကို အကြိမ်ကြိမ်ဝင်တိုက်ခဲ့ပါတယ်။

ယာဉ်မောင်းက ပြီးတော့မှနိုးလာပေမယ့် အခြားဘတ်စ်ကား ၂ စီးကိုဝင်တိုက်ခဲ့ပြီးပြီဖြစ်ကြောင်း ခရီးသည်ပို့ဆောင်ရေးမန်နေဂျာက Times of India ကို ပြောပြခဲ့ပါတယ်။

လွန်ခဲ့တဲ့ ၃ နှစ်က စည်ပင်သာယာအာဏာပိုင်များနဲ့ပူးပေါင်းပြီး မျောက်တွေကိုမောင်းထုတ်လိုက်ကြပေမယ့် ပြန်ရောက်လာခဲ့ကြတာဖြစ်ပါတယ်။

Source: DailyMail
#Yangon_Media_Group

#Local_News
Published _ 20 July 2022

မြန်မာ-တရုတ် နှစ်နိုင်ငံ ခရီးသွားလာရေးမြှင့်တင်ရန် မြန်မာ့ယဉ်ကျေးမှုနှင့် ထွက်ကုန်ပြပွဲကို ပေကျင်းမြို့၌ ယမန်နေ့က ကျင်းပပြုလုပ်ခဲ့ကြောင်း သိရသည်။

တရုတ်နိုင်ငံ ပေကျင်းမြို့ မြန်မာသံရုံးအနေဖြင့် မြန်မာနှင့် တရုတ်နိုင်ငံတို့အကြားတွင် ပြည်သူများအကြား ချစ်ကြည်ရင်းနှီးမှု ပိုမိုမြှင့်တင်ရန်၊ မြန်မာနိုင်ငံ၏ ယဉ်ကျေးမှုကို တရုတ်ပြည်သူများ နားလည်နိုင်စေရန်နှင့် ခရီးသွားလာရေးကဏ္ဍအား မြှင့်တင်ရန် မြန်မာ့ထွက်ကုန်များကို တရုတ်နိုင်ငံ ဈေးကွက်တွင် ပိုမိုတိုးချဲ့ထိုးဖောက်နိုင်စေရန် ရည်ရွယ်ပြီး မြန်မာ့ယဉ်ကျေးမှုနှင့် ထွက်ကုန်ပြပွဲ အခမ်းအနား (Myanmar Culture and Product Shows)ကို ပေကျင်းမြို့တွင် ဇူလိုင်လ ၁၈ ရက်က ကျင်းပခဲ့သည်။

ယင်းပြပွဲတွင် မြန်မာ့ယဉ်ကျေးမှုနှင့် မြန်မာ့ထွက်ကုန်များဖြစ်ကြသည့် ကျောက်စိမ်း၊ ရွှေပုလဲ၊ ကော်ဖီ၊ မြန်မာ့လက်ဖက်ရည်၊ မြန်မာ့အဖျော်ယာမကာ၊ မြန်မာ့စိုက်ပျိုးရေးထွက်ကုန်များ၊ မြန်မာ့ယဉ်ကျေးမှုအနုပညာလက်ရာမျိုးစုံဖြစ်သည့် ယွန်းထည်များ၊ ရေထွက်ကုန်များအား ခင်းကျင်းပြသခဲ့ကြောင်း သိရသည်။

အခမ်းအနားကို တရုတ်နိုင်ငံခြားရေးဝန်ကြီးဌာန၊ သံတမန်အသိုင်းအဝိုင်း၊ မြန်မာနိုင်ငံနှင့်ကုန်သွယ်စီးပွားရေးလုပ်ကိုင်ရန် စိတ်ပါဝင်စားသည့် တရုတ်နိုင်ငံမှ စီးပွားရေးလုပ်ငန်းရှင်းများလည်း တက်ရောက်ခဲ့ကြသည်။

ymg/NN
#Yangon_Media_Group