Published 9 October 2022

တစ်ယောက်နှင့်တစ်ယောက်အမြဲ ယှဉ်ပြီးအပြောခံနေရတဲ့ ဂျပန်နိုင်ငံကအမြွှာညီအစ်မနှစ်ယောက်ဟာ အဲဒါကို  မခံစားနိုင်တော့တဲ့အဆုံး နောက်ဆုံးမှာ နှစ်ယောက်စလုံး မျက်နှာပြင်ခွဲစိတ်ဖို့သဘောတူကြပြီး ခွဲစိတ်မှုခံခဲ့ကြပါတယ်။

အမြွှာညီအစ်မ ချီနှင့် ချီကာယိုရှီကာဝါတို့ဟာ သူတို့လိုချင်တဲ့ မျက်နှာသွင်ပြင်ရရှိအောင် မျက်နှာပြင်ခွဲစိတ်မှုကို ထပ်ကာလုပ်ခဲ့ကြတာတွေကြောင့် သူတို့ရဲ့ မွေးရပ်မြေ ဂျပန်နိုင်ငံမှာ လူသိများကျော်ကြားနေကြပါတယ်။

အသက်နှစ်ဆယ်စွန်းတုန်းက သူတို့ပုံတွေနှင့် ယခုအသက် ၃၄နှစ်အရွယ်ပုံတွေကြည့်လိုက်ရင် သူတို့နှစ်ဦးဟာ လုံးဝမတူတဲ့ အမျိုးသမီးငယ်တွေအဖြစ် အသွင်ပြောင်းလဲသွားကြတာကိုတွေ့နိုင်ပါတယ်။သူတို့ဟာ အင်စတာဂရမ်နှင့် တွစ်တာမှာပုံတွေတင်ဖို့ မိတ်ကပ်တွေနှင့် အလှပြင်ခဲ့ကြပေမယ့် သေသေချာချာကြည့်ရင် သူတို့ရဲ့ မျက်လုံးနှင့် နှာခေါင်း ပုံသဏ္ဍာန်တွေဟာ မူလရုပ်နှင့်လုံးဝမတူကွဲပြားသွားတာသိသာပါတယ်။

ညီအစ်မနှစ်ယောက်ဟာ မျက်နှာပြင်ခွဲစိတ်အလှပြုပြင်ရေးအတွက် တစ်ဦးကို ယန်းသန်း၄၀ (ဒေါ်လာ နှစ်သိန်းခုနှစ်သောင်း ငါးထောင်) အကုန်အကျခံခဲ့ကြတာပါ။ အဲဒီခွဲစိတ်မှုတွေမှာ filler injections ၊မျက်နှာပြင်မတင်တာက အစ နှာခေါင်းပြုပြင်တာ မျက်ရစ်ခွဲစိတ်တာတွေအထိပါဝင်ပါတယ်။

သူတို့နှစ်ဦးဟာ ငယ်စဉ်တုန်းက အမြဲယှဉ်အပြောခံရတာကို သတိရနေကြပါတယ်။ တစ်ယောက်ကို ပိုချစ်စရာ ကောင်းတယ်လို့ အပြောခံရတာမျိုး၊ တစ်ယောက်ကစာပိုတော်တယ်အပြောခံရတာမျိုး၊ တစ်ယောက်က ပိုပြီးစမတ်ဖြစ်တယ်ဆိုတာမျိုး၊ တစ်ယောက်က အားကစားပိုတော်တယ်လိုမျိုး အမြဲအပြောခံခဲ့ကြရတာလို့ သူတို့ကပြောပါတယ်။

အဲသလိုနှိုင်းအပြောခံရတာတွေဟာ သူတို့ရဲ့စိတ်ကျန်းမာရေးအပေါ် မကောင်းတဲ့ဆိုးကျိုးဖြစ်စေပါတယ်။ သူတို့ဟာ သူတို့ရဲ့မျက်နှာတွေကို မှန်မှာကြည့်ပြီး မလှတဲ့အစိတ်အပိုင်းတွေကို ရှာခဲ့ကြပါတယ်တဲ့။ သူတို့ဟာ ခွဲစိတ်လို့ရတဲ့ အရွယ်ရောက်တဲ့အခါ အကြီးမ ချီက အရင်ဆုံးခွဲစိတ်ခံပါတယ်။ ချီရဲ့ ရလာဒ်ကိုကြည့်ပြီး အငယ်မ ချီကာက ဆက်ပြီး ခွဲစိတ်ခံတာဖြစ်ပါတယ်။ နှစ်ယောက်ခွဲစိတ်ခံရတဲ့ အဆင့်တွေမတူကြပေမယ့် နှစ်ယောက်စလုံးက တစ်ယောက်ကို ယန်းသန်း၃၀ဆီမျှခံကြတာပါလို့ပြောပါတယ်။

အစပထမမှာတော့ သူတို့ဟာ နှိုင်းယှဉ်အပြောခံရတာတွေမုန်းလို့ နှစ်ယောက်စလုံးချွတ်စွတ်တူအောင်လုပ်ချင်ကြပါတယ်။ ဒါပေမယ့် အချိန်ကြာလာတာနှင့်အမျှ သူတို့တစ်ယောက်စီမှာမတူတဲ့ အလှကလေးတွေရှိတယ်လို့ သဘောပေါက်သွားကြပါတယ်တဲ့။

သူတို့ဟာ ပထမအကြိမ်မျက်နှာပြင်ခွဲစိတ်ပြုပြင်ပြိးနောက် ဆိုရှယ်မီဒီယာတွေပေါပုံတွဲတင်ပါတယ်။ ကြည့်ရသူတွေက ဝေဖန်ကြတာကိုနားထောင်ပြီး ပြန်ပြင်လိုက် နားထောင်လိုက်ခဏခဏလုပ်ခဲ့ကြပါတယ်။ ဒါပေမယ့် နောက်ဆုံးမှာ လူ့အလို နတ်မလိုက်နိုင်တာလို အားလုံးအကြိုက်တော့မဖြစ်နိုင်ဘူးဆိုတာသိလို့ အဲဒီအလုပ်ကိုရပ်လိုက်တယ်လို့ ပြောပါတယ်။

အခုအသက် ၃၄နှစ်အရွယ်ရောက်ပြီဖြစ်တော့ ချီနှင့်ချီကာတို့က အလှအပစံညွှန်းတွေနှင့် လူကြိုက်ဦးတည်ရာတွေဟာ အမြဲပြောင်းလဲနေလို့ ကိုယ့်ကိုကိုယ်စိတ်ကျေနပ်ဖို့အတွက် အဲဒီအပြောင်းအလဲတွေနောက် အမြဲလိုက်စရာမလိုတော့ဘူးဆိုတာကို သိမြင်သဘောပေါက်လာကြပါတယ်လို့ သတင်းကရေးသားပါတယ်။

Source: aramajapan.com

#Chie_Chika

#Twin_Girls_plastic_surgery

#Japan_Beauty_industry

Published 8 Oct 2022

အိန္ဒိယဗဟိုဘဏ်က အီး-ရူပီးဆိုတဲ့ ဒစ်ဂျစ်တယ်ငွေကြေးကို အသုံးပြုနိုင်ဖို့ ဆောင်ရွက်နေရာ  ကြီးမားတဲ့ ရှေ့ပြေးစီမံကိန်းတွေ လုပ်ဆောင်ခဲ့ပြီးနောက် နောက်ဆုံးဒီဇိုင်းတစ်ခုကို ရရှိတော့မှာဖြစ်ပါတယ်။

အိန္ဒိယ အရန်ငွေကြေးဘဏ်ဟာ  လက်ကားလုပ်ငန်းတွေအတွက် ဘဏ်စာရင်းအခြေပြု ဗဟိုဘဏ် ဒစ်ဂျစ်တယ်ငွေကြေး သို့မဟုတ် CBDC နှင့် လက်လီလုပ်ငန်းတွေအတွက် တိုကင် အခြေပြု ငွေကြေးတစ်ခုကို အကောင်အထည်ဖော်ဖို့ လုပ် ဆောင်နေပါတယ်လို့ သောကြာနေ့က ထုတ်ပြန်တဲ့ စာတမ်းတစ်ခုထဲမှာ ဖော်ပြထားပါတယ်။  ဒစ်ဂျစ်တယ်ငွေကြေးကို  အီး-ရူပီးအဖြစ် လွှဲပြောင်းမှာဖြစ်ပြီး  ငွေကြေးပုံစံအားလုံးအတွက် နောက်ထပ်ရွေးချယ်မှုတစ်ခုဖြစ်လာပါလိမ့်မယ်လို့ လည်းဖော်ပြထားပါတယ်။

ငွေသားကို မှီခိုနေတဲ့ အိန္ဒိယဟာ ငွေကြေး ပေးချေမှုတွေမှာ ပိုပြီး အကျိုးရှိစေအောင် သူတို့ရဲ့ ငွေကြေးတွေကို ဒစ်ဂျစ်တယ်ပုံစံဦးတည်လုပ်ဆောင်နေကြတဲ့ တရုတ်နိုင်ငံအပါအဝင် နိုင်ငံတွေလို ဦးတည်ကြိုးပမ်းလာတာဖြစ်ပါတယ်။ အိန္ဒိယဘဏ္ဍာရေးဝန်ကြီး နီယာမာလာ ဆီသာရာမန်က ဒီနှစ်အတွင်းမှာ အိန္ဒိယအရန်ငွေကြေးဘဏ်ဟာ  ဒစ်ဂျစ်တယ်ငွေကြေးကို စတင်ဆောင်ရွက်တော့မယ်လို့ကြေညာပါတယ်။

“ ဒစ်ဂျစ်တယ်ငွေကြေးအတွက် လက်ရှိမှာ မဟာဗျူဟာအဆင့်အကောင်အထည်ဖော်မှုကို ဦးတည်ဆောင်ရွက်နေပြီး တစ်ဆင့်ပြီးတစ်ဆင့် ရှေ့ပြေးလုပ်ငန်းတွေလုပ်ဆောင်ပြီးနောက်ဆုံးမှာ ဒစ်ဂျစ်တယ်ငွေကြေးအဆင့် စတင်မှာဖြစ်တယ်” လို့ သူမကပြောပါတယ်။

ဒါပေမယ့် လုံးဝဗဟိုချုပ်ကိုင်မှုကင်းတဲ့ ပုံစံကိုတော့ ဗဟိုဘဏ်တွေက စိတ်ပူနေကြဆဲဖြစ်ပါတယ်။ ဘာဖြစ်လို့လဲဆိုတော့ အဲသလိုလုပ်ရင် ရာဇဝတ်လုပ်ငန်းတွေကို ငွေကြေးထောက်ပံ့တာတွေကို နောက်ယောင်ခံလိုက်ဖို့ ခက်ခဲသွားနိုင်တယ်လို့ မြင်ထားကြလို့ဖြစ်တဲ့အကြောင်း SCMP သတင်းစာကရေးသားပါတယ်။

Source SCMP

#Digital_Currency_India

#e-Rupee

#India_ Reserve_Bank

Published 7 Oct 2022

မြန်မာနိုင်ငံရဲ့ ရန်ကုန်၊ပုသိမ်၊စစ်တွေ၊မော်လမြိုင်စတဲ့ ပင်လယ်ဆိပ်ကမ်းတွေကနေ ဆန်ကိုပြည်ပသို့ တင်ပို့ရေး ဆောင်ရွက်ကြဖို့နှင့် အဲသလိုဆောင်ရွက်ခြင်းဖြင့် ဆိပ်ကမ်းလုပ်ငန်းတွေ ဖွံ့ဖြိုးတိုးတက်လာမှာဖြစ်တယ်လို့ ဗိုလ်ချူပ်မှူးကြီး မင်းအောင်လှိုင်က ပြောပါတယ်။

အောက်တိုဘာ(၇)ရက် နေ့က နေပြည်တော်ရှိ နစကဥက္ကဋ္ဌရုံး အစည်းအဝေးခန်းမ၌ ကျင်းပတဲ့ ပြည်ထောင်စုအစိုးရအဖွဲ့ရဲ့ လစဉ်ပုံမှန်အစည်းအဝေးမှာ နစက ဥက္ကဋ္ဌ၊နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားခဲ့တာဖြစ်ပါတယ်။

“ဆန်ဟာမြန်မာနိုင်ငံရဲ့အဓိကထုတ်ကုန်ဖြစ်ပြီး ဆန်ကောင်းစွာ ထုတ်လုပ်နိုင်တဲ့အတွက်Food Security အတွက် နိုင်ငံ၏ဂုဏ်သိက္ခာတစ်ခုပင် ဖြစ်ပါတယ်။ နိုင်ငံတကာသို့ ဆန်များ ပေါများစွာ တင်ပို့နိုင်မည်ဆိုပါက လူအများ၏စားရေး Food Security ကိုတာဝန်ယူ နိုင်သည့် အခန်းကဏ္ဍတွင် ပါဝင်မှာဖြစ်ပါတယ်” လို့လည်း နစကဥက္ကဋ္ဌက ဆက်လက်ပြောကြားခဲ့တယ်လို့ သတင်းထုတ်ပြန်ချက်မှာဖော်ပြထားပါတယ်၊

MSME လုပ်ငန်းများမှ ကုန်ထုတ်လုပ်မှုများဆောင်ရွက်ရာတွင် ပြည်တွင်းနှင့် ဒေသတွင်းမှ ထွက်ရှိသည့် ကုန်ကြမ်းများကို အခြေခံသည့် ကုန်ထုတ်လုပ်မှုများကို ဆောင်ရွက်မည်ဆိုပါက ကုန်ကြမ်းပြတ်လပ်မှု နည်းပါးမည်ဖြစ်ပြီး ဒေသတွင်းမှ ထွက်ရှိသည့် ကုန်ကြမ်းများဖြင့်လည်း ဆောင်ရွက်၍ရကြောင်း၊ ကုန်ထုတ်လုပ်မှု လုပ်ငန်းများအတွက် လိုအပ်သည့် သွင်းအားစုများတွင် ကုန်ကြမ်းသာမက လျှပ်စစ် စွမ်းအင်နှင့် Energy စွမ်းအားများလည်း လိုအပ်ကြောင်းလည်း ယင်းကဆိုသည်။

MSME ဆောင်ရွက်နေသူများခိုင်မာသည့် လုပ်ငန်းများ ရှိချိန်တွင် အစိုးရအနေဖြင့် ရင်းနှီးမြှုပ်နှံငွေများ ထုတ်ချေးပေးသွားမည်ဖြစ်ကြောင်း၊ ချေး ငွေတွင် ဖွံ့ဖြိုးရေးချေးငွေနှင့် စီးပွားရေးချေးငွေဟူ၍ နှစ်မျိုးရှိပြီး သတ်မှတ်ချက် များနှင့်အညီ ဆောင်ရွက်ပေးမည်ဖြစ်ကြောင်း၊ ယခင် နိုင်ငံတော်မှချေးယူခဲ့သည့် ရင်းနှီးမြှုပ်နှံငွေများ ပြန်လည်ပေးဆပ်ရန်အတွက် အချိန် အတိုင်းအတာ တစ်ခုအထိ ဖြေလျှော့ပေးထားသော်လည်း အချိန်တစ်ခုတွင် ပြန်လည် ပေးဆပ်ရမည်ဖြစ်ကြောင်း ၎င်းကပြောကြားခဲ့သည်။

ပြီးခဲ့သည့် ၂၀၂၁ ခုနှစ် ဖေဖော်ဝါရီလ ၁ ရက်နောက်ပိုင်း အကြောင်းအမျိုးမျိုးကြောင့် နိုင်ငံ့စီးပွားတိုးတက်မှုများ တုန့်ဆိုင်းမှု ဖြစ်ပေါ်ခဲ့ကာ  မြန်မာနိုင်ငံ၏စီးပွားရေးဖွံ့ဖြိုးတိုးတက်မှုမှာ အနုတ်လက္ခဏာ ပြနေသည်ဟု ကမ္ဘာ့ဘဏ်၊ အပြည်ပြည်ဆိုင်ရာငွေကြေး ရန်ပုံငွေအဖွဲ့နှင့် အာရှဖွံ့ဖြိုးရေးဘဏ်တို့က ပြောကြားခဲ့ကြကြောင်း၊ နိုင်ငံစီးပွားရေးကျဆင်းသည်ဟု ဆိုသော်လည်း မြန်မာနိုင်ငံအနေဖြင့် စိုက်ပျိုးရေးနှင့်မွေးမြူရေးကို အခြေခံသည့် ကုန်ထုတ်လုပ်မှုများ အမြဲမပြတ်ထုတ်လုပ်၍ ပြည်ပသို့ပို့ကုန်များ တင်ပို့နိုင်ခြင်း ကြောင့် စီးပွားရေးနှင့်ပတ်သက်၍ များစွာထိခိုက်ကျဆင်းသွားခြင်းမရှိခဲ့တာဖြစ်တယ်လို့ ဗိုလ်ချူပ်မှူးကြီးက အစည်းအဝေးမှာ ပြောကြားခဲ့ကြောင်း နစကရဲ့သတင်းထုတ်ပြန်ချက်အရသိရပါတယ်။

ymg/mt

Yangon_Media_Group

Published 6 Oct 2022

စင်္ကာပူအစားအစာ အေဂျင်စီ (SFA) က Mie Sedaap တံဆိပ် အသင့်စားခေါက်ဆွဲနှစ်မျိုးမှာ အက်သလင်းအောက်ဆိုက် ethylene oxide ဆိုတဲ့ ပိုးသတ်ဆေးတစ်မျိုးကို တွေ့ရှိရတဲ့အတွက် အဲဒါတွေကို ပြန်လည်သိမ်းယူရန် အမိန့်ထုတ်ပြန်ခဲ့ပါတယ်။

အက်စ်အက်ဖက်အေက Mie Sedaap ကိုးရီးယားအစပ် အသင့်စားခေါက်ဆွဲပြုတ်နှင့် Mie Sedaap ကိုရီးယားအစပ် ကြက်သား အသင့်စားခေါက်ဆွဲတွေကို ပြန်လည်သိမ်းဆည်းဖို့ ရှန်းရှန်း အစားအစာနှင့် အဖျော်ယမကာ လုပ်ငန်းကို ညွှန်ကြားခဲ့တာပါ။သိမ်းဆည်းမှုတွေလုပ်ဆောင်ဆဲလို့လည်းသိရပါတယ်။

အဲဒီပြန်လည်သိမ်းယူတဲ့ အသင့်ခေါက်ဆွဲတွေကတော့ Mie Sedaap ကိုရီးယား အစပ် အသင့်ခေါက်ဆွဲပြုတ်အထုတ်တွေမှာ သက်တမ်းကုန်ရက် ၂၀၂၃ မေလ ၁၇ ရက်ရှိတဲ့ အထုတ်တွေနှင့် Mie Sedaap ကိုရီးယား အစပ် အသင့်ခေါက်ဆွဲ သက်တမ်းကုန်ရက် ၂၀၂၃ မေ ၂၁ရက်ရှိတဲ့အထုတ်တွေဖြစ်ပါတယ်။

“ အက်သလင်းအောက်ဆိုက် Ethylene oxide ဟာ ပိုးသတ်ဆေးတစ်မျိုုးဖြစ်ပြီး အစားအစာထဲမှာ အသုံးပြုရန် ခွင့်မပြုထားပါဘူး” လို့ အက်စ်အက်ဖ်အေက သတင်းထုတ်ပြန်ပါတယ်။အဲဒီခေါက်ဆွဲထုတ်တွေက အင်ဒိုနီးရှားက တင်သွင်းတာတွေပါ။

“အက်သလင်းအောက်ဆိုက်ကို ဟင်းခတ်အမွှေးအကြိုင်တွေမှာပိုးသတ်ဖို့ခွင့်ပြုထားတာပါ။အဲဒီအတွက်သတ်မှတ်ချက်က ဟင်းခတ်အမွှေးအကြိုင်တစ်ကီလိုဂရမ်မှာ အက်သလင်းအောက်ဆိုက် ၅၀မီလီဂရမ်အထိပဲခွင့်ပြုတာပါ” လို့ အဖွဲ့က ဆက်ပြောပါတယ်။

တင်သွင်းသူတွေနှင့်အင်ဒိုနီးရှားအာဏာပိုင်တွေကို ဒီလိုဖြစ်ရတာနှင့်ပတ်သက်ပြီး စုံစမ်းစစ်ဆေးမှုတွေပြုလုပ်နိုင်ရေး အဖွဲ့က ပူးပေါင်းဆောင်ရွက်နေပါတယ်။

Source: CNA

#Mie_Sedaap_Korean_Spicy_Soup

#Mie_Sedaap_Korean_Spicy_Chicken

#Recall_Indo_made_Instant_noddles

Published 6 Oct 2022

မကြာမီရောက်ရှိတော့မယ့် နွေစပါးရာသီအတွက် ဧက ၈ ဒသမ ၅ သိန်းတွင် အကျိုးတူလယ်ယာစနစ် (Contract Farming) ဆောင်ရွက်ရန်အတွက် နိုင်ငံတော်က တစ်ဧကကိုကျပ် ၂ သိန်းနှုန်းဖြင့် အထူးချေးငွေစီစဉ်ပေးမယ်လို့ သိရပါတယ်။

အဲဒီအတွက် ဆန်စပါးသီးနှံ အတွက် ငွေကျပ် ၁၄၀ ဘီလီယံအထိ ထောက်ပံ့ပေးအပ်သွားရန် စီစဉ်ပေးထားတာဖြစ်တယ်လို့လည်း  သိရပါတယ်။

အဆိုပါ အထူးချေးငွေစီစဉ်ပေးမယ့်အကြောင်း နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်က ယနေ့ အောက်တိုဘာ ၆ ရက်က နေပြည်တော်မှာပြုလုပ်တဲ့ မြန်မာ့ဆန်စပါး ညီလာခံ -၂၀၂၂ (Myanmar Rice Conference – 2022) ဖွင့်ပွဲမှာ ထုတ်ဖော်ပြော  ကြားခဲ့တာဖြစ်ပါတယ်။

မြန်မာနိုင်ငံဆန်စပါးစိုက်ပျိုးထုတ်လုပ်မှုနှင့် စီးပွားလုပ်ငန်းဖွံ့ဖြိုးတိုးတက်ရေးအတွက် အစိုးရနှင့် ပုဂ္ဂလိကကဏ္ဍများမှ  ဆောင်ရွက် ရမယ့် လုပ်ငန်းအစီအစဉ်များကို ဆွေးနွေးဖော်ထုတ်ရန် ရည်ရွယ်၍ “နိုင်ငံ့စီပွားမြှင့်တင်ဖို့၊ ဆန်စပါးဖြင့် ကြိုးပမ်းစို့” ဟူသည့် ခေါင်းစဉ်ဖြင့်  မြန်မာ့ဆန်စပါး ညီလာခံ -၂၀၂၂ကို မြန်မာအပြည်ပြည်ဆိုင်ရာ ကွန်ဗင်းရှင်း (ဗဟိုဌာန-၂)၌ စတင်ကျင်းပနေပါတယ်။

စိုက်ပျိုးထုတ်လုပ်သူ တောင်သူ လယ်သမားများနှင့် ပြည်ပတင်ပို့သူ ကုမ္ပဏီများအကြား အကျိုးတူလယ်ယာ စနစ် (Contract Farming)ဖြင့် တစ်ဧက အထွက်နှုန်းတိုးတက်ပြီး ဝင်ငွေ တိုးတက်ရေးနှင့် ကုန်ထုတ်လုပ်မှုတိုးတက်ရေး၊ ဆန်စပါးအထူးပြုကုမ္ပဏီကြီးများ ထူထောင်ဆောင်ရွက်ကြဖို့ကို ဗိုလ်ချူပ်မှူးကြီးက တိုက်တွန်းသွားပါတယ်။

အရည်အသွေးကောင်းဆန်များကို အရေ အတွက် ပိုမိုထုတ်လုပ်နိုင်ပြီး ပြည်ပဈေးကွက်ကို တိုးတက်တင်ပို့နိုင်‌ရေး၊ ဆန်စပါး ကဏ္ဍတွင် ဒီဂျစ်တယ်နည်းပညာများ ထိရောက်စွာ အသုံးပြုနိုင်ရေးတို့အတွက် ကျယ်ကျယ် ပြန့်ပြန့်ဆွေးနွေးပေးကြ ဖို့ကိုလည်း နစက ဥက္ကဋ္ဌက ဆန်စပါးစိုက်ပျိုးထုတ်လုပ်သူတွေကိုလည်း ဆက်လက် တိုက်တွန်းသွားပါတယ်။

မြန်မာနိုင်ငံသည် ဘင်္ဂလားဒေ့ရှ်နိုင်ငံသို့ တတိယအကြိမ်အဖြစ် ဆန်တန်ချိန် ၂ သိန်း ရောင်းချနိုင်ရန် ဆောင်ရွက်လျက်ရှိပြီး တန်းမြင့်ဆန်တစ်ချို့ကိုလည်း အာဖရိကနိုင်ငံသာမ ကတရုတ်ပြည်သူ့သမ္မတ နိုင်ငံကို ပါတိုးမြှင့်တင်ပို့နိုင်ရန် ဆောင်ရွက်နေတယ်  လို့ သတင်းထုတ်ပြန်ချက်အရသိရှိရပါတယ်။

၂၀၂၂ - ၂၀၂၃ဘဏ္ဍာနှစ် ၆ လတာကာလအတွင်း ဆန်တန်ချိန်  ၅  သိန်း ကျော်နှင့် ဆန်ကွဲတန်ချိန် ၃ ဒသမ ၆ သိန်း၊ စုစုပေါင်းတန်ချိန် ၈ ဒသမ ၆ သိန်းကျော် ကိုနိုင်ငံ ၃၈ နိုင်ငံကိုတင်ပို့နိုင်ခဲ့ပြီး ယခင်နှစ်ကာလတူထက် ဆန် ၊ ဆန်ကွဲ တန်ချိန် ၂ သိန်းကျော် ပိုမိုတင်ပို့ခဲ့ပါတယ်။

ပြည်ပနိုင်ငံအချို့ကို ပေါင်းဆန်တင်ပို့ရာတွင် တစ်တန်လျှင် အမေရိကန် ဒေါ်လာ ၄၆၀ မှ ၅၀၅ အထိ ဈေးရရှိခဲ့ပြီး ဘဏ္ဍာနှစ် ၆ လပတ်အတွင်း ဆန်တင်ပို့မှု တန်ချိန် ၈ ဒသမ ၆ သိန်းအနက်ပေါင်းဆန် ၅ ရာခိုင်နှုန်း၊ ဆန်ကွဲ ၄၂ ရာခိုင်နှုန်း၊ ပုံမှန်ဆန်တင်ပို့မှု ၅၃ ရာခိုင်နှုန်းရှိခဲ့တယ်လို့လည်း သတင်းထုတ်ပြန် ထားပါတယ်။

“နိုင်ငံအတွင်း စားသုံးမှုသည်လက်ရှိ စပါးစိုက်ပျိုးမှုနှင့် ဖူလုံပိုလျှံမှုရှိပါတယ်။ လက်ရှိစပါးစိုက်ပျိုးဧကအတိုင်း သီးထပ် အပြည့် အဝစိုက်ပျိုးနိုင်မည်ဆိုပါက များစွာပိုလျှံပြီး ပြည်ပသို့ပိုမိုတင်ပို့နိုင်မှာဖြစ်ပါတယ်။အဲဒါကြောင့် စပါးစိုက်ဧကတိုးချဲ့ရေးထက် လက်ရှိစပါးစိုက်မြေများတွင် စပါးပြီးစပါး၊ စပါး ပဲ  စပါး၊ စပါး နေကြာ စပါး စသဖြင့် မိမိတို့နှစ်သက်ရာသီးနှံများဖြင့် တွဲဖက်ပြီး သီးထပ်အဖြစ် စိုက်ပျိုးသွားကြရန် တိုက်တွန်းလိုပါတယ်” လို့ ဗိုလ်ချူပ်မှူးကြီးက ထပ်မံပြောကြားခဲ့ပါတယ်။

၂၀၂၀-၂၀၂၁ ခုနှစ်တွင် စုစုပေါင်း စပါးစိုက်ပျိုးဧက ၁၇ သန်းခန့် စိုက်ပျိုးနိုင်ခဲ့ပြီး ၂၀၂၁-၂၀၂၂ ခုနှစ်တွင် မိုးစပါးစိုက်ဧက  ၁၅ သန်းခန့် နှင့် နွေစပါးစိုက်ဧက ၂ ဒသမ ၄ သန်း၊ စုစုပေါင်းစပါးစိုက်ပျိုးဧက ၁၇ ဒသမ ၄ သန်းခန့် စိုက်ပျိုးနိုင်ခဲ့တယ်လို့လည်း သိရှိရပါတယ်။

မြန်မာ့ဆန်စပါးညီလာခံ ၂၀၂၂မှာ သက်ဆိုင်ရာ ပြည်ထောင်စုဝန်ကြီးတွေ၊တိုင်းဒေသကြီးနှင့်ပြည်နယ်တွေက  စီးပွားရေးရာဝန်ကြီး တွေ၊မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်(UMFCCI)၊ မြန်မာနိုင်ငံဆန်စပါးအသင်းချုပ်၊ မြန်မာ နိုင်ငံဆန်စပါးကုန်သည်များအသင်း၊ မြန်မာနိုင်ငံဆန်စပါး စိုက်ပျိုးထုတ်လုပ်သူများအသင်း၊ ပုဂ္ဂလိကဘဏ်များနှင့် မြန်မာနိုင်ငံ  ဆန်စက်လုပ်ငန်းရှင်များအသင်း၊ ပြည်တွင်း/ပြည်ပ စိုက်ပျိုးရေး ကျွမ်းကျင်ပညာရှင်တွေတက်ရောက်ဆွေးနွေးကြတာဖြစ်ပါတယ်။

မြန်မာ့ဆန်စပါးညီလာခံ၂၀၂၂ ခုနှစ်ကို  စီးပွားရေးနှင့် ကူးသန်းရောင်းဝယ်ရေးဝန်ကြီးဌာနနှင့် မြန်မာ နိုင်ငံဆန်စပါး အသင်းချုပ်(MRF)တို့ ပူးပေါင်းကျင်းပနေတာဖြစ်ပြီး အောက်တိုဘာ (၇)ရက်အထိ ဆက်လက်ကျင်းပသွားမယ်လို့ သတင်း ရရှိပါတယ်။

Source MNA

#Myanmar_Agriculture

#Myanmar_Economy

#Myanmar_Rice_Conference

Published 6 Oct 2022

တောင်ကိုရီးယားနိုင်ငံ ဆိပ်ကမ်းမြို့ ဘူဆန်မှာ ဘူဆန်နိုင်ငံတကာ ရုပ်ရှင်ပွဲတော်ကို ဗုဒ္ဓဟူးနေ့က စတင်ဖွင့်လှစ်ခဲ့ပါတယ်။

ဘူဆန်ရုပ်ရှင်ပွဲတော်ဟာ အာရှရဲ့ အကြီးဆုံးရုပ်ရှင်ပွဲတော်ဖြစ်ပြီး  ကိုဗစ်ကပ်ဘေးအလွန် ဒီနှစ်မှာ ပုံစံအပြည့် ပြန်လည်ကျင်းပပေးခြင်းဖြစ်ပါတယ်။

ဖွင့်ပွဲမှာ အီရန်ရဲ့ရုပ်ရှင်ဇာတ်ကာတစ်ကားကို စတင်ပြသဖွင့်လှစ်ပေးခဲ့ပါတယ်။

အဆိုပါဘူဆန်နိုင်ငံတကာရုပ်ရှင်ပွဲတော်ဖွင့်ပွဲသို့ ရုပ်ရှင်သရုပ်ဆောင်တွေ၊ဒါရိုက်တာတွေနှင့် ပရိဿတ်တွေ တက်ရောက်ဆင်နွှဲခဲ့ကြပါတယ်။

တက်ရောက်သူတွေထဲမှာ ဟောင်ကောင်အကျော်ဇေယျ သရုပ်ဆောင် Tony Leung အပါအဝင်  ထိပ်တန်း တောင်ကိုးရီယား ရုပ်ရှင်သရုပ်ဆောင်များနှင့် အာရှကြယ်ပွင့်တွေပါတက်ရောက်ခဲ့ကြပါတယ်။

ဒီပွဲတော်ကို ကော်ဇော်နီအခမ်းအနားဖြင့်ဖွင့်လှစ်ခဲ့ပြီး အောက်တိုဘာ ၁၄ရက်အထိ ကျင်းပမှာဖြစ်ပါတယ်။

Source AFP

#Busan_International_Film_Festival

#South_Korea

#Asia’s_Biggest_Film_Festival