Published 12 Oct 2022

တိုရိုတာမော်တော်ကားကုမ္ပဏီက ၁၉လကြာ နှောင့်နှေးခဲ့ပြီးမှ ရန်ကုန်မြို့အနီးက  ယင်းရဲ့ တပ်ဆင်စက်ရုံစတင်လည်ပတ်နေပြီလို့ နီကေးအေးရှားက သတင်းရေးသားပါတယ်။

အဆိုပါစက်ရုံဟာ သီလဝါ အထူးစီးပွားရေးဇုန်မှာတည်ရှိပြီး ယခင်က ၂၀၂၁ ခုနှစ် ဖေဖော်ဝါရီမှာ စတင်လည်ပတ်ရန် သတ်မှတ်ခဲ့တာဖြစ်ပါတယ်။

ဩဂုတ်လကုန်ပိုင်းမှာတော့ တိုယိုတာဟာ အထူးစီးပွားရေးဇုန်အာဏာပိုင်တွေထံ စက်ရုံစတင်လည်ပတ်မယ့် အစီအစဉ်ကိုတင်ပြခဲ့ပါတယ်။ ခိုင်လုံတဲ့ သတင်းအရင်းအမြစ်အရ  ဟိုင်းလပ် ပစ်ကပ်ကားတပ်ဆင်ထုတ်လုပ်တဲ့အဆိုပါ စက်ရုံဟာ  စက်တင်ဘာမှာ ထုတ်လုပ်မှုကို အရေအတွက် အနည်းငယ်နှင့် စတင်ခဲ့တယ်လို့သိရပါတယ်။  လစဉ် ထုတ်လုပ်မှုဟာ ဒါဇင်အနည်းငယ်ပဲရှိပါသေးတယ်။

အင်္ဂါနေ့မှာတော့ မြန်မာနိုင်ငံက တိုရိုတာ အရောင်းလုပ်ငန်းတွေက ဟိုင်းလတ်ပစ်ကပ် အော်ဒါတွေ စတင်လက်ခံနေပြီလို့ ကြေညာခဲ့ပါတယ်။

နီကေးက ဆက်သွယ်မိတဲ့ အရောင်းလုပ်ငန်းတစ်ခုကတော့  ထုတ်လုပ်တဲ့ အရေအတွက်က ကန့်သတ်ထားတဲ့အတွက် ကားဘယ်အချိန်ရမယ်ဆိုတာ အာမမခံနိုင်ဘူးလို့ပြောပါတယ်။

၂၀၁၉ခုနှစ် မေလမှာကြေညာခဲ့တဲ့ မူလအစီအစဉ်အရ တိုယိုတာဟာ အဆိုပါစက်ရုံအတွက် ဒေါ်လာ ၅၂.၆သန်း ရင်းနှီး မတည်ရန်ရှိပြီး တစ်နှစ်ကို ဟိုင်းလပ်ပစ်ကတ်ကား အစီးရေ ၂၅၀၀ထုတ်လုပ်ဖို့ လျာထားခဲ့ပါတယ်။ တိုယိုတာမြန်မာ ကုမ္ပဏီကို တိုယိုတာက ၈၅ ရာခိုင်နှုန်းနှင့် တိုယိုတာ  ဆူရှိုက ၁၅ ရာခိုင်နှုန်းပိုင်ဆိုင်တာဖြစ်ပါတယ်။

Source: Nikkei_Asia

#Toyota_Myanmar

#Thilawa_SEZ

#Hilux_Pickup

Published 11 Oct 2022

ပြင်သစ်ရဲ့ ကြီးမားတဲ့ ရေနံကုမ္ပဏီကြီးဖြစ်တဲ့ တိုတယ်လ်စွမ်းအင်ကုမ္ပဏီရဲ့ အလုပ်သမားတွေ သပိတ်မှောက် ဆန္ဒပြနေကြတဲ့ အတွက် ပြင်သစ်နိုင်ငံတစ်လွှားက ဓာတ်ဆီဆိုင်တွေမှာ ဓာတ်ဆီတွေ လက်ကျန်အတော်နည်းနေတဲ့ ပြဿနာနှင့် ရင်ဆိုင်နေကြရပါတယ်။

အစိုးရက စေ့စပ်ညှိနှိုင်းဖို့ပြောနေတဲ့ကြားထဲက တိုတယ်လ်ရဲ့ အလုပ်သမားတွေ သပိတ်မှောက်ဆန္ဒပြနေကြတာဟာ ရက်သတ္တပတ် (၃)ပတ်ရှိပြီဖြစ်ပါတယ်။

ပြင်သစ်ရဲ့ ဓာတ်ဆီဆိုင်တွေရဲ့ ၃၀ရာခိုင်နှုန်းခန့်ဟာ ဆီတွေအကုန်ပြတ်လပ်နေတာ ဒါမှမဟုတ် လောင်စာဆီ တစ်မျိုးမျိုး ပြတ်လတ်နေတာနှင့်ကြုံနေကြရပါတယ်။ အဲဒါကြောင့် ဆိုင်တွေမှာ ဆီလာထည့်တဲ့ ကားတန်းတွေဟာ အရှည်ကြီးဖြစ်နေပြီး ယာဉ်မောင်းတွေဟာ ကြံရာမရဖြစ်နေကြရပါတယ်။

လစာကိစ္စနှင့်ဆက်စပ်ပြီး ဆန္ဒပြနေကြသူတွေကို အလုပ်ပြန်ဆင်းကြဖို့ လစာကိစ္စဆွေးနွေးမယ်လို့ ကုမ္ပဏီက တနင်္ဂနွေနေ့က သဘောတူခဲ့လို့ ဆန္ဒပြတာတွေရပ်သွားနိုင်တယ်လို့တော့ မျှော်လင့်နေကြပါတယ်။

လောင်စာဆီဈေးနှုန်းတွေနှင့်ငွေကြေးဖောင်းပွမှုတွေမြင့်တက်နေတာကြောင့် ပြင်သစ်အိမ်ထောင်စုတွေ ဝယ်လိုအားတွေဆုတ်ယုတ်နေချိန်မှာ ယခု ဓာတ်ဆီအကျပ်အတည်းထပ်မံပေါ်ပေါက်နေတာဖြစ်ပါတယ်။

Source AFP

#France_Petrol_Crisis

#France_Energy_Crisis

#TotalEnergies_Strikes

Published 10 October 2022

#ချမ်းသာသောအာရှသားများသည်တွေ့နေကျလိုဖြစ်လာနေပြီးတရုတ်နှင့်အိန္ဒိယနိုင်ငံသားတွေအများဆုံးဖြစ်နေ

စက်တင်ဘာလမှာ အိန္ဒိယစီးပွားရေးလုပ်ငန်းရှင် ဂူတမ်အက်ဒါနီဟာ ကမ္ဘာ့အချမ်းသာဆုံး ဘီလျံနာတွေထဲမှာ ဒုတိယ အချမ်းသာဆုံး ပထမဆုံးအာရှသားအဖြစ် ရောက်ရှိလာပြီးနောက် ကမ္ဘာ့အချမ်းသာဆုံးစာရင်းထဲမှာ အာရှသားတွေ ရဲ့ အချိုးအစားဟာ ဖြည်းဖြည်းချင်း နေရာပိုယူလာနေတယ်လို့ နီကေးအေးရှားက သတင်းရေးသားပါတယ်။

ကမ္ဘာ့အချမ်းသာဆုံး ၁၀ ဦးထဲမှာ အများစုက အမေရိကန်တွေဖြစ်နေပေမယ့် အာရှသားတွေဟာ ကမ္ဘာ့ကြွယ်ဝချမ်းသာမှု လှေကားထစ်တွေကို မဆုတ်မနစ် တက်လှမ်းနေလာနေတာကို အရင်းအမြစ်မျိုးစုံကရတဲ့ အချက်အလက်တွေအရ အတည်ပြုပေးနေပါတယ်။

ကမ္ဘာ့ဒုတိယအချမ်းသာဆုံးဖြစ်တဲ့ အိန္ဒိယနိုင်ငံက အက်ဒါနီအုပ်စုရဲ့ ပိုင်ရှင် အက်ဒါနီဟာ Forbes ရဲ့ ယခုစက်တင်ဘာလ ညွှန်းကိန်းမှာ ကမ္ဘာ့အချမ်းသာဆုံး တယ်လ်ဆာရဲ့ စီအီးအို အီလွန်မတ်စ်ရဲ့နောက်မှာ ဒုတိယအချမ်းသာဆုံးအဖြစ် တစ်ခဏ ရောက်ရှိခဲ့ပါတယ်။

Forbes ရဲ့ အချိန်နှင့်တပြေးညီဖော်ပြပေးနေတဲ့  ဘီလျံနာ ၂၄၀၀ ဦးရဲ့ပိုင်ဆိုင်မှုတွေကို  ဒေသအလိုက်ဖော်ပြတဲ့ အခါ မြောက်အမေရိကားဘီလျံနာတွေက အမေရိကန်ဒေါ်လာ ၄.၇ ထရီလီယံ၊ အာရှက ၃,၅ ထရီလီယံနှင့် ဥရောပ က ၂.၄ ထရီလီယံတို့ဖြစ်ကြပါတယ်။

ဘီလျံနာဦးရေနှင့်ပြောရမယ်ဆိုရင်တော့ အာရှမှာ ဘီလျံနာအများဆုံးဖြစ်ပြီး ၉၅၁ ဦးရှိပါတယ်။ မြောက်အမေရိကားက ၇၇၇ ဦးရှိပြီး ဥရောပက ၅၃၆ ဦးပဲရှိကြပါတယ်။

တကယ်လို့ လူဦးရေအချိုးအစားနှင့် ကြည့်မယ်ဆိုရင်တော့ တစ်မျိုးဖြစ်မှာပါ။ ဘာဖြစ်လို့လဲဆိုတော့ ကမ္ဘာ့လူဦးရေရဲ့ ၆၀ ရာခိုင်နှုန်းဟာ အာရှကဖြစ်ပြီး အမေရိကန်ပြည်ထောင်စုဟာ ၄ ရာခိုင်နှုန်းပဲရှိပါတယ်။ ဥရောပက ၁၀ရာခိုင်နှုန်းပဲရှိပါတယ်၊

နိုင်ငံအလိုက်ပြောရမယ်ဆိုရင် အမေရိကန်ပြည်ထောင်စုဘီလျံနာတွေက ၇၁၉ ဦးရှိပါတယ်။ တရုတ်က ၄၄၀ဦးနှင့်ဒုတိယမှာရှိပြီး အိန္ဒိယက ၁၆၁ ဦးရှိပါတယ်။ အဲဒီအထဲမှာ အာဆီယံ၁၀နိုင်ငံမှာ ဘီလျံနာ ၁၁၄ ဦးရှိနေပါတယ်။ ထိုင်ဝမ်က ၄၅ ဦး၊တောင်ကိုရီးယားက ၂၈ ဦးနှင့် ဂျပန်က ၂၇ ဦးစီအသီးသီးရှိကြပါတယ်။

ထွန်းသစ်စစီးပွားရေးနိုင်ငံတွေဟာ ယခုဆိုရင် ဥရောပနှင့် အမေရိကန်တို့ထက် ဘီလျံနာတွေပိုပြီးမွေးထုတ်ပေးနေပါတယ်။ ဘာဖြစ်လို့လဲဆိုတော့ ဆက်သွယ်ရေးနည်းပညာတိုးတက်မှုတွေနှင့် ကမ္ဘာပြုမှုဖြစ်စဉ်ကြီးကြောင့်ဖြစ်ပါတယ်။

အဲဒီအပြင် ထွန်းသစ်စစီးပွာရေးနိုင်ငံတွေက လူချမ်းသာတွေရဲ့ ပိုင်ဆိုင်မှုတိုးပွားနှုန်းက ပိုပြီးမြန်ဆန်နေပါတယ်။ ကမ္ဘာ့အချမ်းသာဆုံး ထိပ်ဆုံး ၁ရာခိုင်နှုန်းထဲမှာ ၂၀၀၀ပြည့်နှစ်နှင့် ၂၀၂၁ အကြား အိန္ဒိယလူချမ်းသာတွေရဲ့ ဓနတိုးပွားနှုန်းက ၁၁ဆ၊ တရုတ်က ၃၄ ဆ အထိရှိနေပါတယ်။ အဲဒီအချိန်မှာ အမေရိကန်က ၃.၆ ဆ၊ ဂျပန်က ၁.၂ ဆပဲ ရှိပါတယ်။

အဲဒါကြောင့် အာရှသားဘီလျံနာတွေဟာ ကမ္ဘာ့အချမ်းသာဆုံး ထိပ်ဆုံးစာရင်းထဲ မကြာမီဝင်တော့မှာလား။

“ အာရှသားတွေ ဓနတိုးပွားမှုကို အဓိကမောင်းနှင်နေတာက အိမ်ခြံမြေဈေးတွေ မြင့်တက်လာတာကြောင့်ဖြစ်တယ်” လို့ ဂျပန်နိုင်ငံ၊ Credit Suisse Wealth Management ရဲ့ ရင်းနှီးမြှပ်နှံမှုအရာရှိချုပ်ဆွိုင်ချီယို မက်ဆူမိုတိုက ပြောပါတယ်။

“ချမ်းသာတဲ့စာရင်းမှာ ထိပ်ပိုင်းရောက်နေသူတွေဟာ အိမ်ခြေံမြေတွေပိုင်ဆိုင်မှုထက် ကမ္ဘာလုံးဆိုင်ရာကုမ္ပဏီတွေမှာ ရှယ်ယာတွေ အများကြီးဝယ်ထားကြသူတွေဖြစ်နေကြတယ်။အဲဒါကြောင့် အမေရိကန်တွေကိုမီဖို့ အာရှသားတွေ အချိန်တော့ပေးရလိမ့်မယ်”လို့ သူကဆက်ပြောပါတယ်။

အခုဆိုနိုင်ငံတွေဟာ ငွေကြေးမူဝါဒတွေကိုတင်းကြပ်နေကြပါတယ်။ စတော့ဈေးတွေကျဆင်းမှုနှင့် ဒေါ်လာတန်ဖိုးတက်မှုတွေရဲ့ ရိုက်ခတ်မှုအချို့ကို အာရှ ဘီလျံနာတွေ အခုရင်ဆိုင်နေကြရပါတယ်။ ခြောက်လအတွင်းမှာ Forbes ရဲ့ ဘီလျံနာစာရင်းမှာ ၂၄၅ ဦးလျော့နည်းသွားခဲ့ရပါတယ်။အဲဒီအထဲမှာ အာရှက ၁၂၆ဦးလျော့သွားပြီး မြောက်အမေရိကားက ၂၇ ဦးပဲလျော့နည်းသွားခဲ့တာဖြစ်ပါတယ်။

မည်သို့ဆိုစေ  ထွန်းသစ်စစီးပွားရေးနိုင်ငံတွေက လူချမ်းသာတွေကို ပြည်တွင်းလိုအပ်ချက်တိုးမြင့်လာနှင့် အခြေခံအဆောက်အဦ ဖွံ့ဖြိုးတိုးတက်မှုတွေက ကျောထောက်နောက်ခံပေးထားကြပါတယ်။ အဲဒါကြောင့် ၂၀၂၆ ခုနှစ်ရောက်ရင် ဘီလျံနာအရေအတွက်ဟာ ၂၀၂၁ ခုနှစ်ထက် တရုတ်နှင့်အိန္ဒိယမှာ နှစ်ဆခန့်တိုးလာနိုင်တယ်လို့ Credit Suis က ခန့်မှန်းထားပါတယ်။

ကမ္ဘာ့အချမ်းသာဆုံးနေရာတွေကို အာရှသားတွေက မနက်ဖန်မှာ ချက်ခြင်းကြီးနေရာယူလာဖို့ မဖြစ်နိုင်သေးပေမယ့်  အာရှလူချမ်းသာဦးရေကတော့ ဆက်လက်မြင့်မားတိုးတက်နေဦးမှာဖြစ်ပါတယ်။

Source: Nikkei Asia

#World’s Richest People

#Asian_Billionaires

#Asian_Rise

Published 9 Oct 2022

ကမ္ဘာလုံးဆိုင်ရာ စီးပွားရေးဟာ ခက်ခဲတဲ့ လမ်းခွဆုံကို ရောက်နေပြီလို့ ကမ္ဘာ့ငွေကြေးရန်ပုံငွေအဖွဲ့ က သတိပေးလိုက်ပါတယ်။ ငွေကြေးဖောင်းပွမှု တစ်ဟုန်ထိုးမြင့်တက်ခြင်း၊အတိုးနှုန်းများတက်နေခြင်းနှင့် ကျယ်ပြန့်လာနေတဲ့ အကြွေးအကျပ်အတည်းတွေအပါအဝင် များလှစွာသော ဆိုးရွားမှုတွေရိုက်ခတ်နေတဲ့အတွက် ကမ္ဘာ့စီးပွားရေး အကျပ်အတည်းတစ်ခုရောက်ရှိနေတယ်လို့ ကမ္ဘာ့ကျန်းမာရေးအဖွဲ့ မန်နေဂျင်းဒါရိုက်တာ ခရစ်စတယ်လီနာ ဂျော့ဂီဗာ က ပြောပါတယ်။ ဒါပေမယ့်  ဒီမုန်တိုင်းကို ခံနိုင်ရည်ရှိစေဖို့ အဖွဲ့အစည်းတွေဟာ ပိုမိုကောင်းမွန်အောင် ပြင်ဆင်ထားနေတယ်လို့လည်း သူမက ပြောပါတယ်။

Source AFP

#IMF

#Global_Economy

#Global_Economy_Crisis

Published 9 October 2022

မြန်မာနိုင်ငံရဲ့ မိုဘိုင်းငွေရေးကြေးရေး ဝန်ဆောင်မှုလုပ်ငန်းတွေကို ထိန်းသိမ်းကိုင်တွယ်ဖို့ရဉ်ရွယ်ပြီး ကြီးကြပ်မှုကော်မတီတစ်ခုကို ဖွဲ့စည်းခဲ့တယ်လို့ မြန်မာနိုင်ငံပြန်တမ်းမှာဖော်ပြထားပါတယ်။ အဲဒီ မိုဘိုင်းငွေရေးကြေးရေး ဝန်ဆောင်မှုလုပ်ငန်းများကြီးကြပ် မှုကော်မတီကို ၂၀၂၂ခုနှစ် ဩဂုတ် ၂၇ ရက်မှာ နစက,က ဖွဲ့စည်းပေးခဲ့တာဖြစ်ပြီး မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌ တစ်ဦးက ကော်မတီရဲ့ ဥက္ကဋ္ဌအဖြစ်ဆောင်ရွက်ပါတယ်။

Published 9 October 2022

တစ်ယောက်နှင့်တစ်ယောက်အမြဲ ယှဉ်ပြီးအပြောခံနေရတဲ့ ဂျပန်နိုင်ငံကအမြွှာညီအစ်မနှစ်ယောက်ဟာ အဲဒါကို  မခံစားနိုင်တော့တဲ့အဆုံး နောက်ဆုံးမှာ နှစ်ယောက်စလုံး မျက်နှာပြင်ခွဲစိတ်ဖို့သဘောတူကြပြီး ခွဲစိတ်မှုခံခဲ့ကြပါတယ်။

အမြွှာညီအစ်မ ချီနှင့် ချီကာယိုရှီကာဝါတို့ဟာ သူတို့လိုချင်တဲ့ မျက်နှာသွင်ပြင်ရရှိအောင် မျက်နှာပြင်ခွဲစိတ်မှုကို ထပ်ကာလုပ်ခဲ့ကြတာတွေကြောင့် သူတို့ရဲ့ မွေးရပ်မြေ ဂျပန်နိုင်ငံမှာ လူသိများကျော်ကြားနေကြပါတယ်။

အသက်နှစ်ဆယ်စွန်းတုန်းက သူတို့ပုံတွေနှင့် ယခုအသက် ၃၄နှစ်အရွယ်ပုံတွေကြည့်လိုက်ရင် သူတို့နှစ်ဦးဟာ လုံးဝမတူတဲ့ အမျိုးသမီးငယ်တွေအဖြစ် အသွင်ပြောင်းလဲသွားကြတာကိုတွေ့နိုင်ပါတယ်။သူတို့ဟာ အင်စတာဂရမ်နှင့် တွစ်တာမှာပုံတွေတင်ဖို့ မိတ်ကပ်တွေနှင့် အလှပြင်ခဲ့ကြပေမယ့် သေသေချာချာကြည့်ရင် သူတို့ရဲ့ မျက်လုံးနှင့် နှာခေါင်း ပုံသဏ္ဍာန်တွေဟာ မူလရုပ်နှင့်လုံးဝမတူကွဲပြားသွားတာသိသာပါတယ်။

ညီအစ်မနှစ်ယောက်ဟာ မျက်နှာပြင်ခွဲစိတ်အလှပြုပြင်ရေးအတွက် တစ်ဦးကို ယန်းသန်း၄၀ (ဒေါ်လာ နှစ်သိန်းခုနှစ်သောင်း ငါးထောင်) အကုန်အကျခံခဲ့ကြတာပါ။ အဲဒီခွဲစိတ်မှုတွေမှာ filler injections ၊မျက်နှာပြင်မတင်တာက အစ နှာခေါင်းပြုပြင်တာ မျက်ရစ်ခွဲစိတ်တာတွေအထိပါဝင်ပါတယ်။

သူတို့နှစ်ဦးဟာ ငယ်စဉ်တုန်းက အမြဲယှဉ်အပြောခံရတာကို သတိရနေကြပါတယ်။ တစ်ယောက်ကို ပိုချစ်စရာ ကောင်းတယ်လို့ အပြောခံရတာမျိုး၊ တစ်ယောက်ကစာပိုတော်တယ်အပြောခံရတာမျိုး၊ တစ်ယောက်က ပိုပြီးစမတ်ဖြစ်တယ်ဆိုတာမျိုး၊ တစ်ယောက်က အားကစားပိုတော်တယ်လိုမျိုး အမြဲအပြောခံခဲ့ကြရတာလို့ သူတို့ကပြောပါတယ်။

အဲသလိုနှိုင်းအပြောခံရတာတွေဟာ သူတို့ရဲ့စိတ်ကျန်းမာရေးအပေါ် မကောင်းတဲ့ဆိုးကျိုးဖြစ်စေပါတယ်။ သူတို့ဟာ သူတို့ရဲ့မျက်နှာတွေကို မှန်မှာကြည့်ပြီး မလှတဲ့အစိတ်အပိုင်းတွေကို ရှာခဲ့ကြပါတယ်တဲ့။ သူတို့ဟာ ခွဲစိတ်လို့ရတဲ့ အရွယ်ရောက်တဲ့အခါ အကြီးမ ချီက အရင်ဆုံးခွဲစိတ်ခံပါတယ်။ ချီရဲ့ ရလာဒ်ကိုကြည့်ပြီး အငယ်မ ချီကာက ဆက်ပြီး ခွဲစိတ်ခံတာဖြစ်ပါတယ်။ နှစ်ယောက်ခွဲစိတ်ခံရတဲ့ အဆင့်တွေမတူကြပေမယ့် နှစ်ယောက်စလုံးက တစ်ယောက်ကို ယန်းသန်း၃၀ဆီမျှခံကြတာပါလို့ပြောပါတယ်။

အစပထမမှာတော့ သူတို့ဟာ နှိုင်းယှဉ်အပြောခံရတာတွေမုန်းလို့ နှစ်ယောက်စလုံးချွတ်စွတ်တူအောင်လုပ်ချင်ကြပါတယ်။ ဒါပေမယ့် အချိန်ကြာလာတာနှင့်အမျှ သူတို့တစ်ယောက်စီမှာမတူတဲ့ အလှကလေးတွေရှိတယ်လို့ သဘောပေါက်သွားကြပါတယ်တဲ့။

သူတို့ဟာ ပထမအကြိမ်မျက်နှာပြင်ခွဲစိတ်ပြုပြင်ပြိးနောက် ဆိုရှယ်မီဒီယာတွေပေါပုံတွဲတင်ပါတယ်။ ကြည့်ရသူတွေက ဝေဖန်ကြတာကိုနားထောင်ပြီး ပြန်ပြင်လိုက် နားထောင်လိုက်ခဏခဏလုပ်ခဲ့ကြပါတယ်။ ဒါပေမယ့် နောက်ဆုံးမှာ လူ့အလို နတ်မလိုက်နိုင်တာလို အားလုံးအကြိုက်တော့မဖြစ်နိုင်ဘူးဆိုတာသိလို့ အဲဒီအလုပ်ကိုရပ်လိုက်တယ်လို့ ပြောပါတယ်။

အခုအသက် ၃၄နှစ်အရွယ်ရောက်ပြီဖြစ်တော့ ချီနှင့်ချီကာတို့က အလှအပစံညွှန်းတွေနှင့် လူကြိုက်ဦးတည်ရာတွေဟာ အမြဲပြောင်းလဲနေလို့ ကိုယ့်ကိုကိုယ်စိတ်ကျေနပ်ဖို့အတွက် အဲဒီအပြောင်းအလဲတွေနောက် အမြဲလိုက်စရာမလိုတော့ဘူးဆိုတာကို သိမြင်သဘောပေါက်လာကြပါတယ်လို့ သတင်းကရေးသားပါတယ်။

Source: aramajapan.com

#Chie_Chika

#Twin_Girls_plastic_surgery

#Japan_Beauty_industry