#World_Health
Published 09 June 2024

▪️ ဘော့စတွန်မှာ ကျင်းပတဲ့ ၂၀၂၄ ဟော်မုန်းဆိုင်ရာ နှစ်စဥ်ကွန်ဖရင့်မှာ အမျိုးသားဟော်မုန်း တားဆေးဂျယ်လ်အသစ်ရဲ့ ဒုတိယအဆင့် စမ်းသပ်ချက်များကို သုတေသီများက ဇွန် ၂ ရက်နေ့မှာ တင်ပြခဲ့ပါတယ်။

▪️ နက်စ်တိုရုန်းနဲ့ တက်စ်တိုစတီရုန်း ဟော်မုန်း ၂ မျိုးပေါင်းစပ်ထားတဲ့ အမျိုးသားတားဆေးဂျယ်လ်ဟာ အခြားအမျိုးသားတားဆေးတွေထက် သုတ်ပိုးထုတ်လုပ်မှုကို ဖိနှိပ်ထားနိုင်တယ်လို့ စမ်းသပ်မှာ တွေ့ရပါတယ်။

▪️ NIH မှထောက်ပံ့တဲ့ လေ့လာချက်မှာ အသက် ၁၈ နှစ်မှ ၅၀ အတွင်းရှိ အမျိုးသား ၂၂၂ ဦးဖြင့်စမ်းသပ်ကာ တားဆေးဂျယ်လ်ကို လက်ဖက်ရည်ဇွန်း ၁ ဇွန်းခန့်ဖြင့် ပခုံးရိုးကို တစ်နေ့တစ်ကြိမ်လိမ်းခိုင်းပါတယ်။

▪️ အဆိုပါ တားဆေးအသစ်က ထင်ထားတာထက် ပိုပြီးမြန်မြန်အာနိသင်ပြတယ်လို့ NIH တားဆေးထုတ်လုပ်ရေးအဖွဲ့မှ အကြီးတန်းသုတေသီ ဒီယာနာဘလစ်သ်က ပြောပြပါတယ်။

▪️ သုတ်ပိုးထုတ်လုပ်မှုကို တိုင်းတာကြည့်ရာမှာ ၄ ပတ်တာကာလအတွင်း အရေအတွက် နည်းပါးသွားပြီး ကိုယ်ဝန်ရနိုင်ခြေ လျော့နည်းသွားပါတယ်။

▪️ စမ်းသပ်ချက် ဒုတိယပိုင်းကိုတော့ ဆက်လက်ပြုလုပ်နေဆဲ ဖြစ်ပါတယ်။

▪️ ၁၂ ပတ်ဆက်တိုက် နေ့စဥ်ဂျယ်လိမ်းခြင်းဖြင့် ၈၆ ရာခိုင်နှုန်းသော စမ်းသပ်ပါဝင်သူတွေဟာ သုတ်ရည် ၁ မီလီလီတာမှာ သုတ်ပိုး ၁ သန်းအထိသာ ကျန်ရှိတော့ပြီး ဒါဟာ ကိုယ်ဝန်တားဖို့ သင့်လျော်တဲ့ ပမာဏအဖြစ် သုတေသီများ သတ်မှတ်ထားပါတယ်။

▪️ သာမန်ဆိုရင် သုတ်ရည် ၁ မီလီလီတာမှာ သုတ်ပိုးကောင်ရေ ၁၅ သန်းလောက်အထိ ပါဝင်ပါတယ်။

▪️ စမ်းသပ်ချက်အတွင်း ကိုယ်ဝန်တားခြင်း သက်ရောက်မှု ရရှိဖို့အတွက် ပျမ်းမျှအားဖြင့် အချိန် ၈ ပတ်ကြာမြင့်ပါတယ်။

▪️ ထိုးဆေးဖြင့် ကိုယ်ဝန်တားနည်းတွေမှာတော့ သာမန်အားဖြင့် ၉ ပတ်မှ ၁၅ ပတ်လောက်အထိ ကြာမြင့်တတ်ပါတယ်။

▪️ ဂျယ်ရဲ့ဆေးသက်ရောက်မှုက တက်စ်တိုစတီရုန်းကို ပုံမှန်ပမာဏအတိုင်း ဆက်ရှိစေပြီး လိင်ပိုင်းဆိုင်ရာ လုပ်ဆောင်ချက်များ ပုံမှန်အတိုင်း ဆက်ရှိနေမှာ ဖြစ်ပါတယ်။

▪️ ယခင်က ဆယ်စုနှစ်တွေတိုင်အောင် အမျိုးသားတားဆေးများကို အစောပိုင်းစမ်းသပ်ချက်များ ပြုလုပ်ရာမှာ ကျရှုံးမှုများ ရှိခဲ့ကာ အနည်းငယ်လောက်သာ လူသားဖြင့် စမ်းသပ်တဲ့အဆင့်သို့ ရောက်ရှိခဲ့ပါတယ်။

#Source: WION

#World_Health
Published 09 June 2024

▪️ လိင်မှုကိစ္စပြုလုပ်ခြင်းဟာ စိတ်ဖိစီးမှုခံစားနေရတဲ့ မိခင်များအတွက် အထောက်အကူ ဖြစ်စေတယ်လို့ လေ့လာချက်အသစ်တစ်ခုမှာ ဖော်ပြထားပါတယ်။

▪️ အော်တစ်ဇင်လက္ခဏာ ခံစားနေရတဲ့ ကလေးတွေရဲ့ မိခင်တွေမှာဆိုရင် လိင်မှုကိစ္စ ပုံမှန်ပြုလုပ်တဲ့ မိခင်တွေက ပုံမှန်မလုပ်တဲ့ သူတွေထက် ဇီဝဖြစ်ပျက်မှု ဟော်မုန်းများ မြင့်မားတာကို တွေ့ရှိရပါတယ်။

▪️ စိတ်ဖိစီးမှုရေရှည် ခံစားရခြင်းဟာ ခန္ဓာကိုယ်အတွက် ဆိုးကျိုးဖြစ်စေနိုင်ကာ နှလုံးရောဂါ၊ ဆီးချို၊ စိတ်ဓာတ်ကျခြင်း၊ လေဖြတ်ခြင်းနဲ့ အဝလွန်ခြင်း စတဲ့ပြဿနာများ ဖြစ်လာနိုင်ပါတယ်။

▪️ လိင်မှုကိစ္စဆောင်ရွက်ခြင်းက ဖိစီးမှုပြေပျောက်စေနိုင်တဲ့ အစွမ်းသတ္တိရှိသလို အိပ်စက်မှုကိုလည်း အကျိုးရှိစေကြောင်း ဆန်ဖရန်ဆစ္စကို ကယ်လီဖိုးနီးယားတက္ကသိုလ်မှ သုတေသီ ယူဘင်ပါ့ခ်က ပြောပါတယ်။

▪️ အသက် ၂၀ မှ ၅၀ ကြား ကလေးမိခင်တွေကို ၇ ရက်တိုင်အောင် စစ်တမ်းမေးမြန်းကောက်ယူခြင်း၊ ဇီဝဖြစ်ပျက်မှုများ၊ ကျန်းမာရေးအချက်အလက်များ ရယူခြင်းတို့ ပြုလုပ်ခဲ့ပါတယ်။

▪️ ဒီနောက် နေ့စဥ် လိင်မှုကိစ္စပြုလုပ်သလား၊ အိမ်ထောင်ရေး ကျေနပ်မှုရှိသလား၊ ကိုယ်လက်လှုပ်ရှားမှု ဘယ်လောက်ရှိလဲ ဆိုတာတွေကိုလည်း အကဲဖြတ်ခဲ့ပါတယ်။

▪️ ရက်သတ္တပတ်အကြာ ဆန်းစစ်ရာမှာ အနည်းဆုံး လိင်မှုကိစ္စ ၁ ကြိမ်ပြုလုပ်ရင် လှုပ်ရှားမှုရှိတယ်လို့ သတ်မှတ်ကာ အမျိုးသမီး ၁၀၁ ယောက်က ဆက်တိုက် လိင်မှုကိစ္စပြုတာရှိသလို ဆက်တိုက် မပြုလုပ်ကြတာလည်း ရှိပါတယ်။

▪️ အော်တစ်ဇင်လိုမျိုး ရောဂါလက္ခဏာရှိတဲ့ ကလေးမိခင်တွေက ဖိစီးမှုများကြပြီး ကျန်တဲ့မိခင်တွေကတော့ ဖိစီးမှုနည်းတယ်လို့ သတ်မှတ်ပါတယ်။

▪️ ဖိစီးမှုနဲ့ ပတ်သက်ပြီး ဇီဝဖြစ်ပျက်မှုကျန်းမာရေး ဆိုးကျိုးတွေက လိင်မှုကိစ္စ ပြုလုပ်တဲ့မိခင်တွေမှာ သိသိသာသာ လျော့နည်းသွားတာကို တွေ့ရပါတယ်။

▪️ သုတေသီတွေက ယင်းတို့ရဲ့ လေ့လာချက်များဖြင့် လိင်မှုကိစ္စပြုလုပ်ခြင်းရဲ့ ကျန်းမာရေး အကျိုးကျေးဇူးတွေကို ပိုမိုသိရှိလာစေရန် မျှော်လင့်နေပါတယ်။

#Source: New York Post

တရုတ်ပြည်မှချန်ဂယ်-၆အာကာသယာဥ်ဖြင့် လကမ္ဘာပေါ်မှနမူနာအရာဝတ္ထုများကို စုဆောင်းကာအဆင့်(၄)ဆင့်ဖြတ်သန်းပြီး ကမ္ဘာမြေပေါ်သို့ ပြန်လည်သယ်ဆောင်လာမည်

လကမ္ဘာအဝေးဘက်ခြမ်းမှ စုဆောင်းရရှိတဲ့ နမူနာအရာဝတ္ထုများကို ချန်ဂယ်-၆ လကမ္ဘာစူးစမ်းရေးယာဥ်ထဲမှာ အလုံပိတ်သိမ်းဆည်းပြီးနောက် ကမ္ဘာမြေပေါ်သို့ မရောက်ခင် အဆင့် ၄ ဆင့်ဖြတ်သန်းရမယ်လို့ တရုတ်နိုင်ငံ ချန်ဂယ်-၆ မစ်ရှင် ဖန်တီးသူက ဆိုပါတယ်။
#Asia_Space
Published 08 June 2024
#တရုတ်ပြည်မှချန်ဂယ်-၆အာကာသယာဥ် #လကမ္ဘာပေါ်မှနမူနာအရာဝတ္ထုများ
#YMG #Yangon_Times #Yangon_Media_Group

#Daily_News
Published_08 June 2024

၁။ တက္ကသိုလ်ဝင်စာမေးပွဲအောင်စာရင်းများ ဇွန်(၁၁) ရက်နေ့ထွက်မည်၊ အင်တာနက်မရ‌သောဒေသများကို ရေဒီယိုမှအောင်စာရင်းလွှင့်ပေးမည်

၂။ မြန်မာ့ပဲစင်းငုံ CNF‌ ဈေးနှုန်းမြင့်လာခြင်းနှင့်‌ ဈေးကွက်ယှဥ်ပြိုင်ရခြင်းကြောင့် ဈေးနှုန်းကျဆင်းနိုင်

၃။ စိုက်ပျိုးရေးလုပ်သားရှားပါးလာသည့်အတွက် ယခုနှစ်စိုက်ပျိုးရာသီတွင် လုပ်အားခ ယခင်ထက်သုံးဆခန့်တိုးပေးကာခေါ်ယူနေရဟုဆို

၄။ တရုတ်ပြည်မှချန်ဂယ်-၆အာကာသယာဥ်ဖြင့် လကမ္ဘာပေါ်မှနမူနာအရာဝတ္ထုများကို စုဆောင်းကာအဆင့်(၄)ဆင့်ဖြတ်သန်းပြီး ကမ္ဘာမြေပေါ်သို့ ပြန်လည်သယ်ဆောင်လာမည်... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Daily_News #Yangon_Times #Yangon_Media_Group #TV Yangon Times

#World_News
Published 08 June 2024

▪️ နျူကလီးယားစွမ်းအင်သုံး ရုရှားရေငုပ်သင်္ဘောတစ်စင်း လာမယ့်သီတင်းပတ်အတွင်း ဟာဗားနားကို ရောက်ရှိလာမယ်လို့ ကျူးဘားနိုင်ငံ ကွန်မြူနစ်အာဏာပိုင်များက ဇွန်လ ၆ ရက်နေ့မှာ ပြောကြားလိုက်ပါတယ်။

▪️ ရေငုပ်သင်္ဘောဟာ နျူကလီးယားလက်နက်များ တင်ဆောင်လာမှာ မဟုတ်ပေမယ့် နာမည်ကျော် ၁၉၆၂ ကျူးဘားဒုံးကျည်ပြဿနာကို ပြန်လည်အမှတ်ရစေပါတယ်။

▪️ နျူကလီးယား ရေငုပ်သင်္ဘော ကာဇန်၊ အစောင့်သင်္ဘော အက်ဒ်မရယ်ဂေ့ါရှ်ကော့ဗ်၊ ဆီတင်သင်္ဘောတစ်စင်းနဲ့ ကုန်ဆယ်တင်ရေး သင်္ဘောတစ်စင်းတို့ဟာ ဇွန် ၁၂ ရက်နေ့မှ ၁၇ ရက်နေ့အထိ ကျူးဘားမြို့တော်မှာ ဆိုက်ကပ်ထားမှာ ဖြစ်ကြောင်း၊ နျူကလီးယားလက်နက်တွေ မပါဝင်တာကြောင့် အန္တရာယ်ခြိမ်းခြောက်မှု မရှိကြောင်း ကျူးဘားတော်လှန်ရေး တပ်မတော်ဝန်ကြီးဌာနက ကြေညာလိုက်ပါတယ်။

▪️ ဒီလိုမျိုး နေရာချထားခြင်းက အနောက်တိုင်းကို အချက်ပေးသလို ဖြစ်နေပြီး ရုရှားစစ်တပ်က အမေရိကားနဲ့ အတော်လေး နီးစပ်လာမှာဖြစ်ပါတယ်။

▪️ ရုရှားသမ္မတ ဗလာဒီမာပူတင်က မကြာသေးမီက နျူကလီးယား ခြိမ်းခြောက်မှုများ ပြုလုပ်ထားရာ ယူကရိန်းအရေးနဲ့ ပတ်သက်ပြီး ရုရှားနဲ့ အမေရိကန်တို့ တင်းမာမှုမြင့်တက်နေချိန် ဖြစ်ပါတယ်။

▪️ အနောက်တိုင်းကို ပစ်ခတ်ချင်တဲ့ နိုင်ငံတွေအတွက် လက်နက်များ ထောက်ပံ့ပေးနိုင်တယ်လို့ ပူတင်က ပြောထားပါတယ်။

▪️ ၁၉၆၂ ကျူးဘားဒုံးကျည်ပြဿနာ ဆိုတာက အမေရိကန်နဲ့ ယခင်ဆိုဗီယက်ပြည်ထောင်စုတို့ ရင်ဆိုင်ခဲ့ကြတာဖြစ်ပြီး တစ်လနဲ့ ၄ ရက်ကြာမြင့်ခဲ့ကာ နျူကလီးယားစစ်ပွဲ ဖြစ်လုနီးပါးအန္တရာယ် ကျရောက်ခဲ့ပါတယ်။

▪️ အမေရိကန်က တူရကီများ ဒုံးကျည်များနေရာချထားခဲ့ရာ ဆိုဗီယက်ကလည်း ကျူးဘားထံ ဒုံးကျည်များ ပေးပို့ခဲ့ပါတယ်။

▪️ ကျူးဘားကနေသာပစ်ရင် အမေရိကန်အရှေ့ပိုင်း နေရာအများစုကို မိနစ်ပိုင်းအတွင်း ထိမှန်နိုင်ပါတယ်။

▪️ ထိုအချိန် အမေရိကန်သမ္မတ ဂျွန်အက်ဖ်ကနက်ဒီက ဆိုဗီယက်မှ ဒုံးကျည်ပေးပို့မှုများ ကျူးဘားသို့မရောက်နိုင်အောင် ရေကြောင်းပိတ်ဆို့မှု ချမှတ်ဖို့ ဆုံးဖြတ်ခဲ့ပါတယ်။

▪️ ဒီနောက် ဆိုဗီယက်သင်္ဘောများ တဖြည်းဖြည်း ဆုတ်ခွာသွားကာ ကျူးဘားမှ ဒုံးကျည်တွေကို ဆိုဗီယက်သို့ ပြန်လည်သယ်ဆောင်သွားပြီလို့ အကြောင်းကြားခဲ့သလို ကနက်ဒီကလည်း တူရကီမှ ဒုံးကျည်များကို ရုပ်သိမ်းကာ ကျူးဘားကို ဘယ်တော့မှ မကျူးကျော်ဘူးလို့ လျှို့ဝှက်စွာ ကတိပြုခဲ့ရကြောင်း သတင်းထွက်ပေါ်ခဲ့ပါတယ်။

#Source: WION

#World_Health
Published 08 June 2024

▪️ အသက်အရွယ် ကြီးလာတဲ့အခါ အသားအရေဟာလည်း သဘာဝအတိုင်း ရင့်ရော်ယိုယွင်းလာကြပါတယ်။

▪️ ကော်လာဂျင်နဲ့ တင်းရင်းစေတဲ့ အမျှင်များ လျော့နည်းလာခြင်း၊ ဆဲလ်အသစ်ဖြစ်ပေါ်မှု နှေးသွားခြင်း၊ အစိုဓာတ် မထိန်းသိမ်းနိုင်ခြင်းတို့ကြောင့် အရေပြား တွန့်ခေါက်ခြင်း၊ ခြောက်သွေ့ခြင်း၊ အရောင်အသွေးမဲ့ခြင်းတို့ ဖြစ်ပေါ်လာပါတယ်။

▪️ ထိုကဲ့သို့ အသားအရည်ရင့်ရော်ခြင်းကို ပိုပြီးလျင်မြန်စွာ ဖြစ်ပေါ်စေမယ့် အလေ့အထများကို ဖော်ပြလိုက်ပါတယ်။

 
(၁) ဆေးလိပ်သောက်ခြင်းဖြင့် အရေပြားဆီသို့ သွေး၊ အောက်ဆီဂျင်နဲ့ အာဟာရဓာတ်များ ရောက်ရှိမှု နည်းပါးသွားကာ ကော်လာဂျင်များ ပျက်စီးစေပါတယ်။

 
(၂) ခရမ်းလွန်ရောင်ခြည်က ကော်လာဂျင်နဲ့ အီလက်စ်တင်တို့ကို ပျက်စီးစေကာ အရေးကြောင်းများ၊ အစက်အပြောက်များနဲ့ အရေပြားကင်ဆာတို့ ဖြစ်နိုင်ခြေ များစေပါတယ်။

 
(၃) အိပ်ရေးပျက်တဲ့အခါ ကော်တီဆောဟော်မုန်း များပြားလာပြီး ကော်လာဂျင်ကို ပျက်စီးစေကာ အရေပြားဆဲလ်အသစ် ဖြစ်ပေါ်ခြင်းကို နှောင့်နှေးစေပါတယ်။

 
(၄) အချိုဓာတ်များတဲ့ အစားအစာတွေနဲ့ အဆင့်ဆင့်ထုတ်လုပ်ထားတဲ့ စားစရာတွေက ရောင်ရမ်းခြင်းကို ဖြစ်စေပြီး ကော်လာဂျင်နဲ့ အီလက်စ်တင်တို့ကို ပျက်စီးစေပါတယ်။

 
(၅) ရေဓာတ်ခန်းခြောက်ခြင်းက အရေပြားခြောက်သွေ့ခြင်း၊ အရေးကြောင်းပေါ်ခြင်းတို့ ဖြစ်စေတာကြောင့် တစ်နေ့ကို အနည်းဆုံး ရေ ၈ ခွက်ခန့် သောက်သုံးသင့်ပါတယ်။

 
(၆) အယ်လ်ကိုဟော အလွန်အကျွံ သောက်သုံးခြင်းဖြင့် အရေပြားကို ရေဓာတ်ခန်းခြောက်စေပြီး အရေပြားကျန်းမာရေးအတွက် လိုအပ်တဲ့ အာဟာရဓာတ်များနဲ့ ဗိုက်တာမင်များ ချို့တဲ့စေပါတယ်။

 
(၇) ရေရှည်ဖိစီးမှုခံစားရခြင်းဖြင့် ကော်တီဆောဟော်မုန်း မြင့်တက်စေပြီး ကော်လာဂျင်ပျက်စီးစေပြီး အရေပြားကာကွယ်ရေး လုပ်ဆောင်ချက်ကို ယိုယွင်းစေပါတယ်။

 
(၈) လှုပ်ရှားလေ့ကျင့်ခန်း မပြုလုပ်ပါက သွေးလည်ပတ်စီးဆင်းမှု မကောင်းတော့ဘဲ အရေပြားမွဲခြောက်ကာ ကော်လာဂျင်ထုတ်လုပ်မှု အားလျော့စေပါတယ်။

 
(၉) အသားအရေ ထိန်းသိမ်းမှု မှန်ကန်စွာမပြုလုပ်ပါက သဘာဝအဆီဓာတ်များ လျော့ပါးသွားနိုင်တာကြောင့် အလွန်အကျွံ ပွတ်တိုက်လွန်းခြင်းမျိုး မပြုလုပ်သင့်ပါဘူး။

 
(၁၀) ပတ်ဝန်းကျင်လေထု ညစ်ညမ်းမှုကြောင့် အညစ်အကြေးတွေက အရေပြားထဲကို ဖောက်ဝင်ကာ ကော်လာဂျင်နဲ့ အီလက်စ်တင်တို့ကို ပျက်စီးစေပါတယ်။

 
▪️ ထိုအလေ့အထများကို ရှောင်ရှားခြင်းဖြင့် အရေပြားကျန်းမာရေး သိသိသာသာ တိုးတက်စေမှာဖြစ်ပြီး ရင့်ရော်ခြင်းဖြစ်စဥ်ကို နှေးစေမှာဖြစ်ပါတယ်။

#Source: DoctorNDTV