#WorldHealth
Published 20 July 2022

၁၉၆၀ ပြည့်နှစ်ဝန်းကျင်တွေတုန်းက ဆီလီကွန်ဖြင့် ရင်သားအစားထိုးခွဲစိတ်မှုများကို အလှအပအရေးရာအတွက်ရည်ရွယ်ပြီး ဆေးဘက်ဆိုင်ရာအသိုင်းအဝိုင်းက ခွင့်ပြုခဲ့တာဟာ သမိုင်းတွင်လောက်တဲ့ မှားယွင်းမှုကြီးဖြစ်ကြောင်း အေရီယယ်တက္ကသိုလ်၊ ရှီဘာဆေးဘက်ဆိုင်ရာစင်တာ၊ တဲလ်အေဗစ်ဆက္ကလာဆေးတက္ကသိုလ်နဲ့ ရုရှားဖက်ဒရေးရှင်းကျန်းမာရေးဝန်ကြီးဌာနတို့မှ သုတေသီများက အသိပေးလိုက်ပါတယ်။

ဆေးဘက်ဆိုင်ရာအသိုင်းအဝိုင်းက ဆီလီကွန်ဟာ လူ့ခန္ဓာကိုယ်နဲ့ ကိုယ်ခံအားစနစ်တို့ကို ဘေးအန္တရာယ်မဖြစ်စေနိုင်ဘူးလို့ မှားယွင်းစွာယူဆခဲ့ကြကြောင်း ကိုယ်ခံအားစနစ်ပညာရှင် ပရော်ဖက်ဆာ'ယာဟူဒါရှောင်ဖဲလ်'နဲ့ မော်လီကျူးဇီဝပညာရှင် ဒေါက်တာ'ဂျီလက်ဟယ်လ်ပါ့တ်'တိုက IMAJ အစ္စရေးလ်ဆေးဘက်ဆိုင်ရာဂျာနယ်မှာ ဖော်ပြခဲ့ကြပါတယ်။

ကမ္ဘာပေါ်မှာ နှစ်ပေါင်းအတော်များများကြာတဲ့အထိ ဆီလီကွန်အစားထိုးခြင်းရဲ့ လူ့ကျန်းမာရေးအပေါ် ဆိုးကျိုးသက်ရောက်မှုတွေအကြောင်း တင်ပြထားတာတွေရှိသလို ထိုကဲ့သိုအစားထိုးခွဲစိတ်ခြင်းရဲ့ ဘေးကင်းစိတ်ချရမှုနဲ့ပတ်သက်ပြီး အငြင်းပွားနေကြဆဲဖြစ်ပါတယ်။

ဆီလီကွန်ရင်သားရောဂါ(SBI)ခံစားနေရတဲ့အမျိုးသမီးတွေကို မေးမြန်းကြည့်ရာမှာ အလွန်အမင်းနွမ်းနယ်ခြင်း၊ စိတ်ဓာတ်ကျခြင်း၊ ခန္ဓာကိုယ်အနှံ့နာကျင်ကိုက်ခဲခြင်း၊ ရင်တုန်ခြင်း၊ မေ့လျော့ခြင်း၊ မျက်လုံး ပါးစပ်တို့ခြောက်သွေ့ခြင်း၊ သွေးကင်ဆာခံစားရခြင်းများ ဖြစ်တတ်ကြောင်းသိရှိရပါတယ်။

စိတ်ကျရောဂါပျောက်ဆေးများ၊ စိတ္တဇရောဂါပျောက်ဆေးများသုံးစွဲတဲ့ အမျိုးသမီးအချို့ဆိုရင် ဝေဒနာမသက်သာတဲ့အပြင် ပိုဆိုးလာကြပါတယ်။

ဆီလီကွန်အစားထိုးခွဲစိတ်ခြင်းအစား အသုံးပြုနိုင်မယ့်အခြားနည်းလမ်းများရှာဖွေဖို့၊ SBI ခံစားနေရတဲ့အမျိုးသမီးများနဲ့ ခုခံအားပုံမှန်မဟုတ်တဲ့ အခြေအနေခံစားနေရတဲ့ လူနာတွေမှာကုသနိုင်ဖို့ ဆရာဝန်တွေ သိပ္ပံပညာရှင်တွေ အတူတကွပူးပေါင်းဆောင်ရွက်သင့်ကြောင်း ဖော်ပြထားပါတယ်။

ဆီလီကွန်က သဘာဝပစ္စည်းမဟုတ်ဘဲ ကြာရှည်စွာထိတွေ့နေပါက ခန္ဓာကိုယ်ခုခံအားစနစ်နဲ့ဆိုင်တဲ့ရောဂါများဖြစ်လာနိုင်ပြီး ကိုယ်ခံအားစနစ်က ခန္ဓာကိုယ်ထဲရှိတစ်ရှူးတွေနဲ့ အင်္ဂါများကို မှားယွင်းပြီး တိုက်ခိုက်တတ်ကြပါတယ်။

ကုမ္ပဏီတွေက ဆီလီကွန်အစားထိုးပစ္စည်းတွေကို ရောင်းချနေကြပေမယ့် FDA က လိုအပ်တဲ့ အချက်အလက်တွေကိုတော့ မတင်ပြခဲ့ကြပါဘူး။

နယ်သာလန်မှတင်ပြထားတဲ့ အစီရင်ခံစာတစ်ခုမှာ ဆီလီကွန်အစားထိုးခွဲစိတ်ထားတဲ့ အမျိုးသမီးတစ်ဦးဟာ ဆီလီကွန်ကိုပြုလုပ်တဲ့ ပိုလီမာအမှုန်တွေက သိုင်းရွိက်၊ အူလမ်းကြောင်း၊ ကျောရိုးမတို့ကိုရောက်ရှိသွားပြီး ရင်သားကင်ဆာနဲ့သေဆုံးသွားခဲ့ကြောင်း ဖော်ပြထားပါတယ်။

၂၀၁၈ ခုနှစ်က ဖော်ပြထားတဲ့အစ္စရေးလ်လေ့လာချက်တစ်ခုမှာ SBI ဝေဒနာခံစားနေရသူအမျိုးသမီး ၂ သောင်းခန့်ကို လေ့လာရာမှာ မျက်လုံးနှင့်ပါးစပ်များခြောက်သွေ့ခြင်း၊ ခန္ဓာကိုယ်အင်္ဂါများမှာ အနီစက်များပေါ်ခြင်း၊ အဆစ်အမြစ်ရောင်ခြင်းနဲ့ ကြွက်သားများနာကျင်ကိုက်ခဲခြင်းတို့ဖြစ်ပေါ်ကြောင်း သိရှိရပါတယ်။

ကျန်းမာရေးစောင့်ရှောက်ရေးဝန်ထမ်းများ၊ မိသားစုဆရာဝန်များ၊ ပလတ်စတစ်ဆာဂျရီခွဲစိတ်ဆရာဝန်များ၊ အရိုးအဆစ်ဆရာဝန်များအနေနဲ့ ဆီလီကွန်ရင်သားအစားထိုးခြင်းနဲ့ ရောဂါလက္ခဏာပေါ်ပေါက်ခြင်းများကို အမြဲသတိထားစောင့်ကြည့်ဖို့ သုတေသီများကတိုက်တွန်းလိုက်ပါတယ်။

ဒီအတွက်အစားထိုးနိုင်မယ့်အခြားနည်းလမ်းကတော့ လူနာရှင်ကိုယ်တိုင်ရဲ့ ခန္ဓာကိုယ်ကအဆီကိုယူပြီး ရင်သားမှာအစားထိုးခြင်းဖြစ်ကာ ဒီနည်းလမ်းက ခုခံအားစနစ်ကိုလည်း မှားယွင်းလှုံ့ဆော်ပေးမှာမဟုတ်ပါဘူး။

Source: The Jerusalem Post
#Yangon_Media_Group

#World_Industry
Published 19 July 2022

ကပ်ရောဂါဘေး၊ ယူကရိန်း-ရုရှားစစ်ဘေးတို့အပြင် နေထိုင်မှုစရိတ်မြင့်မားလာခြင်းကြောင့် အီကွေဒေါနိုင်ငံမှာ ဆန္ဒပြလာကြတာ ၂ ပတ်ကျော်ကြာလာခဲ့ပြီး နိုင်ငံရဲ့ပန်းစိုက်ပျိုးထုတ်လုပ်ရေးလုပ်ငန်းအနေနဲ့ နောက်ထပ်အခက်အခဲတစ်ခုကို ကျော်လွှားရဦးမှာဖြစ်ပါတယ်။

#Yangon_Media_Group

#WorldEconomy
Published 19 July 2022

ရုရှားနှင့်တရုတ် မဟာမိတ်နှစ်နိုင်ငံဟာ စီးပွားရေးနှင့်စွမ်းအင် ဆက်ဆံဆောင်ရွက်မှု နက်ရှိုင်းလာတဲ့အလျောက် လာမယ့် (၂)နှစ်အတွင်း အဲဒီနှစ်နိုင်ငံအကြား ဓာတ်ငွေ့ပိုက်လိုင်းတည်ဆောက်တော့မယ်လို့ ဖိုင်နင်ရှယ်တိုင်းမ် သတင်းစာက တနင်္လာနေ့က ရေးသားလိုက်ပါတယ်။

ရုရှားက ယူကရိန်းကို ကျူးကျော်မှုကြောင့် ဆာဘီးယား-၂ ပိုင်လိုင်း အစီအစဉ်အချို့ အကန့်အသတ်ဖြစ်လာနေတဲ့ကြားထဲက အဲဒီပိုက်လိုင်းတည်ဆောက်ရေးလုပ်ငန်းကို ၂၀၂၄မှာ စတင်လိမ့်မယ်လို့ မွန်ဂိုလီးယား ဝန်ကြီးချုပ် Oyun-Erdene Luvsannamsrai က ဖိုင်နင်ရှယ်တိုင်းမ်ကို ပြောပါတယ်။

အဲဒီပိုက်လိုင်းဟာ အရှည် ၂၆၀၀ ကီလိုမီတာရှိပြီး ၂၀၃၀ အရောက်မှာ လုပ်ငန်းတွေစတင်လည်ပတ်နိုင်လိမ့်မယ်လို့ ခန့်မှန်းထားကြပါတယ်။ မွန်ဂိုလီးယားဟာ အဲဒီပိုက်လိုင်းကြောင့် ဖြတ်သန်းခနှင့်အခွန်တွေကို ရရှိမှာဖြစ်လို့ ကိုရိုနာဗိုင်းရပ်စ်ကြောင့် အထိနာနေတဲ့ စီးပွားရေးကို ပြန်လည်ကူညီနိုင်မှာဖြစ်ပါတယ်။

ရုရှားကနေ တရုတ်ကို ဓာတ်ငွေ့တင်ပို့တာ ၂၀၁၉ ကစပြီး မြင့်တက်လာနေပါတယ်။ ဒါပေမယ့် ဥရောပက သူ့အပေါ် ဓာတ်ငွေ့ မှီခိုနေရတာကနေ ခွာဖို့လုပ်ဆောင်နေတဲ့အတွက် မော်စကိုအတွက် ရေနံတင်ပို့မှုမြှင့်တင်ဖို့က အရေးကြီးနေတာဖြစ်ပါတယ်။

အစောပိုင်းကတော့ ဆာဘီယားပိုက်လိုင်းဟာ ဥရောပကို ဓာတ်ငွေ့ပိုဖို့အတွက် အခရာဖြစ်ခဲ့ပေမယ့် အခု အဲဒီဆာဘီးယားနယ် ပယ်ကနေ တရုတ်ကို ဓာတ်ငွေ့ ပြန်ပြောင်းသွယ်ပို့မှာဖြစ်ပါတယ်။

ဥရောပသမဂ္ဂက အဇာဘိုင်ဂျန်ကနေ ဓာတ်ငွေ့ တင်သွင်းမှုကို ၂၀၂၇နှစ်အရောက်မှာ အနည်းဆုံး ၂၀ဘီလျံကုဗမီတာအထိ နှစ်ဆတိုးဖို့ စာချုပ်အသစ်ချုပ်ဆိုခဲ့ပြီးနောက် ယခုသတင်းထွက်ပေါ်လာတာပါ။

#Source_Insider
#Russia_China_Gas_Pipeleines
#Russia_China_energy_Ties
#Geo_Economy.
#Yangon_Media_Group

#DailyNews
Published - 19 July 2022

၁။ တရုတ်-မြန်မာနယ်စပ်ဂိတ်ပိတ်မည်ဆိုသည့်သတင်း အမှားသာဖြစ်ဟုဆို

၂။ တရားမဝင်မြန်မာနိုင်ငံသားများ ထိုင်းနိုင်ငံအတွင်း ဖမ်းဆီးခံရမှု ဆက်တိုက်ဖြစ်နေ

၃။ နေ့စဉ်မိုးလေဝသသတင်း။

၄။ နိုင်ငံ့ဝင်ငွေ၏ စတုတ္ထအများဆုံးရှာပေးနေသည့် အီကွေဒေါပန်းစိုက်ပျိုးထုတ်လုပ်ရေးလုပ်ငန်းအခက်ကြုံနေရ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Business
Published 19 July 2022

ရုရှားဓာတ်ငွေ့ကုမ္ပဏီကြီး Gazprom က ပုံမှန်မဟုတ်တဲ့အခြေအနေများကြောင့် ဓာတ်ငွေ့ထောက်ပံ့ပေးပို့မှုကို အာမမခံနိုင်ကြောင်း ဥရောပမှ ဓာတ်ငွေ့ဝယ်ယူသူများကို အသိပေးလိုက်တယ်လို့ ရိုက်တာသတင်းဌာနက ဖော်ပြလိုက်ပါတယ်။

ဒါဟာ ရုရှားတို့ ယူကရိန်းကိုကျူးကျော်တာကြောင့် အနောက်နိုင်ငံများက ဒဏ်ခတ်ပိတ်ဆို့တာကို ရုရှားတို့ကစီးပွားရေးအရ တုန့်ပြန်လာတာဖြစ်နိုင်ကြောင်း ယူဆရပါတယ်။

ဇွန်လ ၁၄ ရက်နေ့မှစတင်၍ သာမန်မဟုတ်တဲ့အခြေအနေတွင် ဓာတ်ငွေ့ထောက်ပံ့မှုမရရှိခြင်းအတွက် တာဝန်မယူနိုင်ကြောင်းစာချုပ်ပါအချက်အလက်ကို ပြန်လည်အသက်သွင်းကြေညာလိုက်တယ်လို့ ဇူလိုင် ၁၄ ရက်နေ့ရက်စွဲဖြင့် ရုရှားဓာတ်ငွေ့ကုမ္ပဏီကြီး Gazprom က စာတစ်စောင်ထုတ်ပြန်လိုက်ပါတယ်။

ဂျာမနီနဲ့ဥရောပကို ရုရှားဓာတ်ငွေ့များ အဓိကပေးပို့ဖြတ်သန်းရာ နော့ဒ်စထရင်းမ်(၁)ဓာတ်ငွေ့ပိုက်လိုင်းကို ၁၀ ရက်တာပြုပြင်ထိန်းသိမ်းမှုပြုလုပ်မှာဖြစ်ပြီးကြာသပတေးနေ့မှာ ထိန်းသိမ်းခြင်းလုပ်ငန်းစဉ်ပြီးဆုံးမှာဖြစ်ပါတယ်။

ထိုစာစောင်ရဲ့ဖော်ပြချက်အရ ထိန်းသိမ်းပြုပြင်မှုပြီးဆုံးသွားရင်တောင် ရုရှားက ဓာတ်ငွေ့ပြန်လည်မပေးပို့မှာကို ဥရောပကစိုးရိမ်နေပါတယ်။

ယူကရိန်းကိုကျူးကျော်တာကြောင့် ရုရှားအပေါ်ဒဏ်ခတ်ပိတ်ဆို့မှုများပြုလုပ်ခဲ့ရာ ရုရှားက လက်တုံ့ပြန်လာမှာကို စိုးရိမ်နေကြပြီး လောင်စာစွမ်းအင်ပြတ်လတ်လာပါက တိုင်းပြည်ဆုတ်ယုတ်မှုများ ဖြစ်လာနိုင်ချေရှိနေပါတယ်။

စီးပွားရေးလုပ်ငန်းစာချုပ်တွေမှာ ထည့်သွင်းသတ်မှတ်လေ့ရှိတဲ့ အချက်အလက်တစ်ခုက သာမန်မဟုတ်တဲ့အခြေအနေတွေမှာ တာဝန်ယူမှုကင်းလွတ်ခွင့်ရှိနေတဲ့ အချက်ဖြစ်ပါတယ်။

ထိုအချက်အလက်အရ Gazprom က ဓာတ်ငွေ့ပေးပို့ခြင်းကို ရပ်ဆိုင်းမှာမျိုးမဟုတ်ဘဲ အကြောင်းတစ်ခုခုကြောင့် စာချုပ်ပါအချက်အလက်များအတိုင်း မဖြည့်ဆည်းနိုင်ပါက တာဝန်မယူနိုင်ဘူးလို့ ဆိုလိုတာဖြစ်ပါတယ်။

ပြီးခဲ့တဲ့လများအတွင်း ရုရှားဓာတ်ငွေ့အဓိကပေးပို့ရာ ယူကရိန်း၊ ဘီလာရုစ်တိုအပါအဝင်လမ်းကြောင်းများကို ဓာတ်ငွေ့ထောက်ပံ့မှုများ လျှော့ချလာပါတယ်။

စာစောင်ထုတ်ပြန်ချက်အရ ပြုပြင်ထိန်းသိမ်းခြင်းပြုလုပ်ပြီးရင်တောင် နော့ဒ်စထရင်းမ်(၁)ပိုက်လိုင်းကနေ ဓာတ်ငွေ့ပေးပို့ချင်မှ ပေးပို့တော့မယ်ဆိုတဲ့သဘောဖြစ်နေကြောင်း ABN အမ်ရိုမှ အကြီးတန်းစွမ်းအင်စီးပွားရေးပညာရှင်'ဟန်းစ်ဗန်ကလိဖ်'က ပြောကြားခဲ့ပါတယ်။

ထိုအချက်အလက်ထုတ်ပြန်ဖို့ ဘယ်လိုအခြေအနေမျိုးဖန်တီးနေပါစေ၊ နည်းပညာပိုင်းအရပဲဖြစ်ဖြစ် နိုင်ငံရေးအရပဲဖြစ်ဖြစ် ရုရှားနဲ့ ဥရောပ၊ ဂျာမနီတိုကြား တင်းမာမှုဆက်လက်မြင့်တက်လာဖို့ပဲရှိပါတယ်လို့ ဆိုပါတယ်။

ရုရှားဓာတ်ငွေ့ အများဆုံးတင်သွင်းနေတဲ့ Uniper ဂျာမနီကုမ္ပဏီကလည်း ထုတ်ပြန်စာကိုလက်ခံရရှိခဲ့ပြီး ဒါဟာတရားမမျှတဘူးလို တရားဝင်ကြေညာလိုက်ပါတယ်။

ဒါ့အပြင် နောက်ထပ်ကုမ္ပဏီကြီးတစ်ခုဖြစ်တဲ့ RWE ကလည်း ထိုထုတ်ပြန်စာစောင်ကိုရရှိခဲ့ပြီး အတိအကျထုတ်ပြန်ကြေညာတာမျိုး မပြုလုပ်နိုင်တာကိုနားလည်ပေးကြပါလို့ မေတ္တာရပ်ခံခဲ့ပါတယ်။

Source: Reuters
#Yangon_Media_Group

#WorldHealth
Published 19 July 2022

ကိုဗစ်နောက်ဆက်တွဲလက္ခဏာခံစားရသူတွေကို လေဖိအားမြင့်ပတ်ဝန်းကျင်မှာ သန့်စင်တဲ့အောက်ဆီဂျင်ရှူခိုင်းခြင်းဖြင့် အခြေအနေတိုးတက်လာနိုင်ဖွယ်ရှိကြောင်း အစ္စရေးလ်လေ့လာချက်တစ်ခုမှာ ဖော်ပြခဲ့ပါတယ်။

သုတေသီတွေက အနည်းဆုံး ၃ လတိုင်အောင် ကိုဗစ်နောက်ဆက်တွဲဝေဒနာခံစားနေရသူ ၇၃ ဦးကို လေဖိအားမြင့်နေရာမှာ အောက်ဆီဂျင်ပေးခြင်း (HBOT) ကုသနည်းဖြင့် စမ်းသပ်ခဲ့ကြပါတယ်။

ထိုလူနာတွေကို ပုံမှန်ထက်အောက်ဆီဂျင်ပိုရစေရန် ပုံမှန်လေဖိအားထက် ၂ ဆ ၃ ဆပိုများတဲ့ အခန်းထဲမှာ အောက်ဆီဂျင်ရှူသွင်းခြင်းမျိုးကို အကြိမ် ၄၀ ခန့်ပြုလုပ်ခိုင်းခဲ့ပါတယ်။

နောက်ဆုံးကုသမှု အကြိမ်ပြီးဆုံးနောက်ခဏအကြာမှာပဲ HBOT ကုသနည်းခံယူတဲ့ လူတွေဟာ ကုသမှုမခံယူတဲ့လူတွေထက် ဝေဒနာလက္ခဏာခံစားရမှုအပိုင်းတွေမှာ သိသိသာသာတိုးတက်လာကြောင်း အင်္ဂါနေ့က Scientific Reports မှာ ဖော်ပြထားပါတယ်။

လက္ခဏာခံစားရမှုသက်သာလာခြင်းက ဦးနှောက်တည်ဆောက်ပုံနဲ့လုပ်ဆောင်ပုံရဲ့ သံလိုက်ပဲ့တင်ရိုက်ခတ်မှုအထောက်အထားတွေနဲ့ ဆက်စပ်နေပြီး ဦးနှောက်သို့ အောက်ဆီဂျင်ပါဝင်မှုများတဲ့ သွေးတွေကို ပိုဆောင်ပေးကြောင်း ဖော်ပြထားပါတယ်။

HBOT နည်းလမ်းက ဒဏ်ရာကောင်းစွာ မသက်သာတဲ့အနေအထားမှာ အသုံးပြုလေ့ရှိပြီး ဦးနှောက်ထိခိုက်ဒဏ်ရာအတွက် ကုသနည်းအဖြစ်လည်း မကြာသေးမီကမှ စမ်းသပ်ခဲ့ပေမယ့် ကိုဗစ်နောက်ဆက်တွဲဝေဒနာအတွက်ကတော့ ပထမဆုံးစမ်းသပ်မှုဖြစ်ပါတယ်။ တွေ့ရှိမှုများကို အတည်ပြုနိုင်ဖို့နဲ့ အသုံးပြုနိုင်မယ့်လူနာအမျိုးအစားတွေကို သိရှိဖို့ နောက်ထပ်လေ့လာမှုများ ပြုလုပ်ရန်လိုအပ်ကြောင်း သုတေသီတွေပြောကြားခဲ့ပါတယ်။

Source: Reuters
#Yangon_Media_Group