#World_Health
Published 21 September 2022

ဗိုက်တာမင်-ဒီ၃ နဲ့ အိုမီဂါ၃ဖက်တီးအက်ဆစ်ဆေးတွေကို ပုံမှန်မှီဝဲခြင်းက သက်ကြီးရွယ်အိုတွေမှာ ရောင်ရမ်းခြင်းတွေကို လျှော့ချပေးနိုင်မှာမဟုတ်ဘူးလို့ လေ့လာတွေ့ရှိထားပါတယ်။

ဘရစ်ဂန်နဲ့ အမျိုးသမီးဆေးရုံမှ သိပ္ပံပညာရှင်များက ၅ နှစ်တိုင်လေ့လာခဲ့ပြီးနောက် အသက် ၅၀ အထက်လူကြီးတွေအနေနဲ့ မလိုလားအပ်တဲ့အားဆေးတွေ မမှီဝဲဖို့ တိုက်တွန်းလိုက်ကာ အဲဒီအစား လေ့ကျင့်ခန်းနဲ့ အစားအသောက်ကိုသာ ဂရုစိုက်ဖို့ ဒေါက်တာ'အရီလာအော်ကာဘီ'က အကြံပြုလိုက်ပါတယ်။

ဖြည့်စွက်အားဆေးတွေက ရောင်ရမ်းခြင်း၊ အသက်အရွယ်ကြောင့် ကြွက်သားဆုံးရှုံးလာခြင်း၊ အားနည်းချည့်နဲ့ခြင်းတို့ကို လျှော့ချပေးနိုင်တယ်လို့ ဆေးထုတ်လုပ်သူများက ပြောနေကြပေမယ့် သိပ္ပံနည်းကျလေ့လာမှုမှာတော့ ကောင်းကျိုးအနည်းငယ်သာရှိတယ်လို့ တွေ့ရှိခဲ့ပါတယ်။

သုတေသနမှာပါဝင်တဲ့ ဒေါက်တာ'ယိုအန်မန်ဆန်'က ဖြည့်စွက်အားဆေးတွေဟာ ငယ်ရွယ်နုပျိုစေတဲ့ မှော်ဆေးလုံးလိုမျိုး မဟုတ်ပါဘူးလို့ ပြောပြခဲ့ပါတယ်။

အားဆေးတွေက နှလုံးရောဂါနဲ့ ကင်ဆာတို့မှာ အသုံးဝင်နိုင်လားဆိုတာကို သိပ္ပံပညာရှင်များလေ့လာရန်အတွက် အသက် ၅၀ အထက် အဝလွန်တယ်လို့ သတ်မှတ်လို့ရတဲ့ လူကြီးအယောက်ပေါင်း ၂၅,၀၀၀ ကို ခေါ်ယူခဲ့ပါတယ်။

စမ်းသပ်ခံမယ့်လူတွေကို အဖွဲ့ ၄ ဖွဲ့ခွဲကာ တစ်ဖွဲ့ကို ဗိုက်တာမင်-ဒီ၃ နဲ့ အိုမီဂါ ၃ ဖက်တီးအက်ဆစ် ၂ မျိုးစလုံး၊ တစ်ဖွဲကို ဗိုက်တာမင်-ဒီ၃ တစ်မျိုးတည်း၊ တစ်ဖွဲ့ကို အိုမီဂါ ၃ ဖက်တီးအက်ဆစ်တစ်မျိုးတည်း အသီးသီးပေးကာ တစ်ဖွဲ့ကိုတော့ ဘာမှမတိုက်ခဲ့ပါဘူး။

FDA က ချမှတ်ထားတဲ့ သတ်မှတ်ဆေးပမာဏအထက် ကျော်လွန်ကာ သုံးစွဲစေခဲ့တာ ဖြစ်ပါတယ်။

အားနည်းခြင်းအခြေအနေကို တိုင်းတာရန်အတွက် သူတို့ရဲ့ လှုပ်ရှားမှု၊ စိတ်အခြေအနေ၊ အခြားရောဂါအခံများအကြောင်း မေးမြန်းခဲ့ပါတယ်။

နောက်ထပ် ၆ လအကြာမှာ စစ်တမ်းထပ်မံကောက်ယူခဲ့ပြီး နောက်ထပ် ၄ နှစ်အထိ တစ်နှစ်တစ်ကြိမ်မေးမြန်းခဲ့ပါတယ်။

အဲဒီအထဲက ၁၂.၇ ရာခိုင်နှုန်းသောလူတွေဟာ အားနည်းခြင်းလက္ခဏာ တွေ့ရှိခဲ့ပါတယ်။

နောက်ထပ် ၅ နှစ်အကြာမှာ နောက်ထပ် ၁၁.၃ ရာခိုင်နှုန်းက အားနည်းခြင်းဖြစ်ပေါ်လာပါတယ်။

အားဆေးသောက်သုံးတဲ့သူတွေနဲ့ မသောက်တဲ့သူတွေကြား သိသိသာသာကွာခြားချက် မရှိခဲ့ပါဘူး။

ဒါပေမဲ့ ပုံမှန်လေ့ကျင့်ခန်းပြုလုပ်ခြင်းနဲ့ အစားအသောက်ထိန်းချုပ်နေထိုင်ခြင်းဖြင့် အားနည်းခြင်းကို ကာကွယ်နိုင်စွမ်းရှိနေပြီး သက်ကြီးရွယ်အိုတွေကို ဒီလိုနေထိုင်ဖို့ အကြံပေးသင့်ပါတယ်။

အားနည်းခြင်းဟာ ရောင်ရမ်းခြင်းနဲ့ အဟာရချို့တဲ့ခြင်းကြောင့်လို့ ထင်နေကြပြီး ဖြည့်စွက်စာတွေနဲ့ ကာကွယ်နိုင်မယ်လို့ ယုံကြည်နေကြပါတယ်။

ကျန်းမာရေးတကယ်ဆိုးရွားတဲ့ လူတွေမှာတော့ အားဆေးတွေက ကောင်းကျိုးရှိနေနိုင်သေးတယ်လို့ ဖြေရှင်းခဲ့ကြပါတယ်။

လုပ်ငန်းဈေးကွက်ထဲမှာ အိုမီဂါ ၃ ဖက်တီးအက်ဆစ်ရဲ့ တန်ကြေးက ဒေါ်လာ ၀.၆၂ ဘီလီယံရှိပြီး ဗိုက်တာမင်-ဒီ၃ ကတော့ ဒေါ်လာ ၀.၄၃ ဘီလီယံရှိပါတယ်။

Source: Daily Mail
#Yangon_Media_Group

#World_Environment
Published 20 September 2022

စွန့်ပစ်ပစ္စည်း ပြန်လည်အသုံးချခြင်းအစီအစဉ် ရှားပါးတဲ့ဗင်နီဇွဲလားနိုင်ငံမှာ ပလတ်စတစ်ဗူးခွံတွေမှ အဖုံးများဖြင့် စီခြယ်ရေးဆွဲထားတဲ့ နံရံပန်းချီကားကြီးဟာ ၂၇၀ မီတာရှည်လျားပါတယ်။

#Yangon_Media_Group

Published 20 Sept 2022

ထရပ်ဘီလူးကြီးတစ်စီးက ကားလေးတွေအပေါ် တက်နင်းကြိတ်ချေပြနေတဲ့မြင်ကွင်းကို ဒက်ထရွိုက် ကားပြပွဲမှာ ပရိဿတ်တွေက အကြိုက်တွေ့နေကြပါတယ်။ Bigfoot 20 လို့အမည်ပေးထားတဲ့ အဲဒီထရပ်ဘီလူးကြီးဟာ ကမ္ဘာ့ ပထမဆုံး လျှပ်စစ်နှင့်မောင်းနှင်တဲ့ ဧရာမ ထရပ်ကားဖြစ်ပါတယ်။  အဲဒီကားဘီလူးကြီးဟာ အလေးချိန်ပေါင်တစ်သောင်းတစ်ထောင် ရှိပြီး ယခုနှစ်မှာ ထုတ်လုပ်မှု ၁၀နှစ်ပြည့်ပြီဖြစ်ပါတယ်။ အဲဒီအပြင် ဘက်ထရီအားသုံး လျှပ်စစ်မော်တာနှင့်မောင်းနှင်တဲ့ တစ်ခုတည်းသော ထရပ်ဘီလူးကြီးပါ။

Source AFP

#Electric_monster_truck

#Bigfoot_20

#Detroit_Auto_Show

#DailyNews
Published _ 20 September 2022

၁။ ရွှေလီမြို့ကို Lockdown ချထားသော်လည်း တရုတ်-မြန်မာ ကုန်သွယ်ရေးလမ်းကြောင်းအပေါ် ထိခိုက်မှုမရှိဟုဆို

၂။ ဆန်လက်လီ၊ လက်ကား ဈေးကွက်တွင် ရွှေဘိုပေါ်ဆန်းတစ်အိတ်ကို ကျပ် ၁၀၀၀၀၀ ဖြင့် ရောင်းချလျက်ရှိနေ

၃။ သုဝဏ္ဏဘူမိ ဂဝံယဉ်ကျေးမှုသုတေသနပြတိုက် မကြာမီဖွင့်လှစ်မည်

၄။ ပင်လယ်ရေညစ်ညမ်းမှုလျှော့ချနိုင်ရန် ဗင်နီဇွဲလားတွင် ပလတ်စတစ်ဗူးအဖုံးများဖြင့် နံရံပန်းချီဖန်တီး ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Health
Published 20 September 2022

အီး-စီးကရက် ပုံမှန်သောက်သုံးသူတွေဟာ အဆုတ်ထဲသို့သွားတဲ့ အသက်ရှူလမ်းကြောင်းတွေမှာ ပိတ်ဆို့လာတတ်ကြပြီး ရင်ကြပ်ကဲ့သို့ ရောဂါလက္ခဏာများ ခံစားရနိုင်ကြောင်း လေ့လာတွေ့ရှိထားပါတယ်။

ဆယ်ကျော်သက်တွေနဲ့ သက်လတ်ပိုင်းလူတွေကြား စီးကရက်အတုစက်တွေ ထင်ရှားကျော်ကြားလာကာ ရေရှည်သောက်သုံးသူတွေအနေနဲ့ အဆုတ်မှာပြင်းထန်စွာ ထိခိုက်စေနိုင်တယ်လို့ ဟားဗတ်ဒ်တက္ကသိုလ်မှ သုတေသီများ တွေ့ရှိခဲ့ကြပါတယ်။

အမေရိကန်လူမျိုး ၁၀ ရာခိုင်နှုန်းနီးပါးနဲ့ အထက်တန်းကျောင်းသား ၄ ယောက်မှာ ၁ ယောက်နှုန်းက စီးကရက်အတု ပုံမှန်အသုံးပြုသူတွေဖြစ်ပါတယ်။

အစိုးရအဖွဲ့ကလည်း ဒီစက်တွေကို ပစ်မှတ်ထားနေပြီး လာမယ့်ဆယ်စုနှစ်များအတွင်း အဆုတ်နဲ့ပတ်သက်တဲ့ရောဂါများ အဖြစ်များလာမှာကို စိုးရိမ်နေကြပါတယ်။

ယခုတွေ့ရှိချက်တွေက အဆန်းတကြယ်မဟုတ်ပေမယ့် စီးကရက်အတုဟာ အဆုတ်ကို ပြင်းပြင်းထန်ထန်ထိခိုက်စေပြီး လူအများထင်ထားတာထက် ပိုပြီးအန္တရာယ်များကြောင်း မယ်ရီလန်း ဂျွန်ဟော့ပ်ကင်းစ်တက္ကသိုလ်မှ ဒေါက်တာ'ပါနာဂျစ်ဂါလီယာဆာတိုစ်'က ပြောပြသွားပါတယ်။

စူးစမ်းလေ့လာချက်တွေအရ စီးကရက်အတုကြာရှည်သောက်သုံးရင် နာတာရှည်ရောဂါတွေ ဖြစ်လာနိုင်တယ်လို့ တွေ့ရှိထားကြောင်း ဒေါက်တာ'ဒေးဗစ်ခရစ္စရှန်နီ'က ဆိုပါတယ်။

လေ့လာမှုအတွက် စီးကရက်အတုသုံးစွဲနေသူ ၄ ဦးကို လေ့လာခဲ့ရာ သုံးစွဲနေတာ ၃ နှစ်ကနေ ၈ နှစ်အတွင်းရှိနေပြီး ၄ ယောက်စလုံးမှာ နာတာရှည်အဆုတ်ရောဂါ တစ်မျိုးမျိုးရှိနေပါတယ်။

လူနာအားလုံး အဆုတ်ထိခိုက်မှုဖြစ်နေပြီး အသက်ရှူလမ်းကြောင်း ပိတ်ဆို့နေကြပါတယ်။

ဒီလိုပိတ်ဆို့တဲ့အခါ အသက်ရှူထုတ်ရခက်ခဲလာကာ ချောင်းဆိုးဝေဒနာဖြစ်လာနိုင်ပါတယ်။

တစ်ခုရှိတာက ထိခိုက်မှုက ပြန်မကောင်းနိုင်တာတော့ မဟုတ်ပါဘူး။
စီးကရက်အတုသောက်ခြင်းကို တစ်နှစ်ကနေ သုံးနှစ်လောက်နားလိုက်ရင် အချို့ထိခိုက်မှုတွေက အလိုအလျောက်သက်သာတတ်ပါတယ်။

စိတ်ပူစရာရှိတာကတော့ ငယ်ရွယ်သူတွေသောက်သုံးတဲ့အခါ အရွယ်မရောက်ခင်မှာပဲ အဆုတ်ကိုပြင်းပြင်းထန်ထန် ထိခိုက်စေနိုင်တာပဲ ဖြစ်ပါတယ်။

အဆုတ်တွေက အသက် ၃၅ နှစ်လောက်အထိ ဖွံ့ဖြိုးနေတာကြောင့် စောစောစီးစီး အဆုတ်ထိခိုက်မယ်ဆိုရင် နာတာရှည်လူနာတွေ ဖြစ်သွားနိုင်ပါတယ်။

အမေရိကန်ရှိ ဆယ်ကျော်သက်တွေကြား စီးကရက်အတုသုံးစွဲမှု လတ်တလောနှစ်များအတွင်း မြင့်တက်လာပြီး ငယ်ရွယ်သူ ၂ သန်းခန့်လောက် သုံးစွဲနေကြပါတယ်။

စီးကရက်အစစ်တွေလို ကင်ဆာမဖြစ်နိုင်ပေမယ့် စီးကရက်အတုရဲ့အန္တရာယ်တွေကိုလည်း မသိကြပါဘူး။

သုံးစွဲမှုလျှော့ချနိုင်ရန်အတွက် FDA က အသီးအနံ့ပါဝင်တဲ့ စီးကရက်အတုများကို တားမြစ်လိုက်ကာ အရောင်းဆိုင်များမှ ယာယီရုတ်သိမ်းထားပါတယ်။

Source: Daily Mail
#Yangon_Media_Group

#World_Military
Published 20 September 2022

ထိုင်ဝမ်ကျွန်းကို တရုတ်က ရေတပ်ဖြင့်လုံးဝပိတ်ဆို့ထားနိုင်လောက်တယ်လို့ အမေရိကန်ရေတပ်(၇)မှ ဒုဗိုလ်ချုပ်ကြီး'ကားလ်သောမတ်စ်'က The Wall Street ဂျာနယ်နဲ့ အင်တာဗျူးမှာ ပြောကြားခဲ့ကြောင်း တနင်္လာနေ့က ဖော်ပြခဲ့ပါတယ်။

"တရုတ်မှာ အင်အားများပြားလှတဲ့ ရေတပ်ကြီးရှိနေပြီးတော့ ထိုင်ဝမ်နားမှာ သင်္ဘောတွေနေရာချပြီး အနိုင်ကျင့်ချင်တယ်ဆိုရင် ကျင့်လို့ရလောက်တဲ့ အနေအထားပါ"လို့ ပြောကြားသွားပါတယ်။

တရုတ်ရေတပ်ဟာ အင်အားကြီးမားပြီး ခေတ်မီစွာတည်ဆောက်ထားသလို ပေကျင်းကနေလွှတ်နေတဲ့ စစ်သင်္ဘောတွေ ပိုပိုများလာကြောင်း၊ တရုတ်က ထိုင်ဝမ်ကို တကယ်ကျူးကျော်ဖို့ လုပ်နေတာလားဆိုတာ သေချာမသိနိုင်ကြောင်း 'သောမတ်စ်'က ရှင်းပြခဲ့ပါတယ်။

တရုတ်က ထိုင်ဝမ်ကို တရုတ်ပိုင်နယ်မြေအဖြစ် မှတ်ယူထားကာ အင်အားပြည့်ကျူးကျော်လာမှာလား ဒါမှမဟုတ် ရေတပ်နဲ့ပိတ်ဆို့ထားမှာလား စောင့်ကြည့်သွားရမှာပါ။

"သိပ်ပြီး မထိခိုက်စေချင်ဘူးဆိုရင် သူတို့ရေတပ်နဲ့ ပိတ်ဆို့တာလောက်ပဲ လုပ်မယ်ဆိုတာ ရှင်းပါတယ်၊ ဒီလိုဆိုရင်တော့ နိုင်ငံတကာကလည်း ပါဝင်လာနိုင်ပြီး ဘယ်လိုဖြေရှင်းရမလဲဆိုတာ အတူတကွဆောင်ရွက်နိုင်မှာပါ" လို့ ရှင်းပြသွားပါတယ်။

ထိုင်ဝမ်အနောက်တောင်ဘက်သို့သွားရာ အသွားအလာများတဲ့ တောင်တရုတ်ပင်လယ်မှာလည်း တရုတ်က စစ်တပ်အင်အားဖြည့်တင်းထားပါတယ်။

အဆိုပါရေလမ်းကြောင်းတလျှောက်မှာရှိတဲ့ ကျွန်းတွေကို စစ်အုပ်ချုပ်ရေးအောက် သိမ်းသွင်းထားပြီလို့လည်း ထောက်ပြလိုက်ပါတယ်။

"သူတို့ဆီမှာ ကတုတ်ကျင်းတွေရှိတယ်၊ လောင်စာဆီအလုံအလောက်ရှိတယ်၊ တပ်တွေအတွက် နေစရာတွေရှိတယ်၊ ဒုံးကျည်တွေ၊ ရေဒါစနစ်တွေ၊ အာရုံခံစနစ်တွေ ရှိပါတယ်" အမေရိကန်- တရုတ်ဆက်ဆံရေးအကြား ထိုင်ဝမ်ကပြဿနာတစ်ရပ်ဖြစ်နေတာဟာ ဆယ်စုနှစ်တွေ ကြာနေပါပြီ။

ဩဂုတ်လအတွင်း အမေရိကန်အောက်လွှတ်တော်ဥက္ကဌ'နန်စီပယ်လိုစီ' ထိုင်ဝမ်ကို သွားရောက်ခဲ့ပြီးနောက် တရုတ်ဘက်က တင်းမာမှုတွေပိုပြီးမြင့်တက်ခဲ့ပါတယ်။

တရုတ်က အကြိမ်ကြိမ်သတိပေးထားတဲ့ကြားက 'ပယ်လိုစီ'ဟာ လျစ်လျူရှုခဲ့တာဖြစ်ပြီး ၂၅ နှစ်ကာလအတွင်း အမေရိကန်ဘက်မှ ရာထူးဩဇာအမြင့်ဆုံးပုဂ္ဂိုလ်တစ်ယောက်က ထိုင်ဝမ်ကျွန်းကို ပထမဆုံးလာရောက်ခဲ့တာဖြစ်ပါတယ်။

တရုတ်အမျိုးသားရေးဝါဒီများက ပြည်တွင်းစစ်အတွင်း ကွန်မြူနစ်တွေကိုရှုံးနိမ့်ခဲ့ပြီးနောက် ပြည်မကြီးကနေ ထွက်ခွာလာကာ ၁၉၄၉ ခုနှစ်ကတည်းက ထိုင်ဝမ်ကျွန်းမှာ ကိုယ်ပိုင်အုပ်ချုပ်လာခဲ့ပါတယ်။

အမေရိကန်တိုက ထိုင်ဝမ်နဲ့ပတ်သက်ပြီး တရုတ်ရဲ့ အချုပ်အခြာအာဏာနဲ့ တရုတ်တစ်သွေးတစ်သံတည်းမူဝါဒကို တရားဝင်အသိအမှတ်ပြုထားသလို ထိုင်ဝမ်နဲ့လည်း နီးစပ်တဲ့ဆက်ဆံရေးကို ထိန်းသိမ်းလာခဲ့ပါတယ်။

တရုတ်ကတော့ ပြန်လည်ပေါင်းစည်းရေးအတွက် အကြိမ်ကြိမ်အသိပေးထားခဲ့ပြီး လိုအပ်လာရင် အင်အားသုံးမယ့် အခြေအနေရှိနေပါတယ်။

#Source: RT
#Yangon_Media_Group