#World_Military
Published 8 July 2023

နိုင်ငံအများအပြားမှ တားမြစ်ထားတဲ့ အပြွတ်ဗုံးများကို နယ်မြေကျူးကျော်နေတဲ့ ရုရှားတပ်ဖွဲ့များအား တန်ပြန်တိုက်ခိုက်မယ့် ယူကရိန်းတို့အတွက် အမေရိကန်က ထောက်ပံ့သွားမှာဖြစ်ကြောင်း ဇူလိုင် ၇ ရက်နေ့က ကြေညာလိုက်ပါတယ်။

နေတိုး(NATO)အဖွဲ့အစည်းထဲသို့ ယူကရိန်းဝင်ရောက်ရေး ပိုမိုနီးစပ်စေရန် ဘယ်လိုပြုလုပ်မလဲဆိုတဲ့အကြောင်းကို လာမယ့်ရက်သတ္တပတ်အတွင်း ထိပ်သီးအစည်းအဝေးမှာ တိုင်ပင်သွားမယ်လို့ နေတိုးခေါင်းဆောင်က ပြောကြားလိုက်ပါတယ်။

အမေရိကန်မှ အဆိုပါဗုံးထောက်ပံ့မယ့် အစီအစဉ်ကို လူ့အခွင့်အရေးလှုပ်ရှားမှု အဖွဲ့များနဲ့ ကုလသမဂ္ဂအထွေထွေအတွင်းရေးမှူးတို့က မေးခွန်းထုတ်နေကြပါတယ်။

ယခုထောက်ပံ့ကူညီမှုက ဒေါ်လာသန်း ၈၀၀ တန်ကြေးရှိကာ ၂၀၂၂ ဖေဖော်ဝါရီလက ရုရှားတို့ ယူကရိန်းကို ကျူးကျော်စဉ်ကစပြီး အမေရိကန်မှ စစ်ဘက်ဆိုင်ရာ ထောက်ပံ့ကူညီမှုတွေက စုစုပေါင်းဒေါ်လာ ၄၀ ဘီလီယံကျော်လာပြီ ဖြစ်ပါတယ်။

ယူကရိန်းတန်ပြန်ထိုးစစ်အတွက် သင့်လျော်မယ့်အချိန်အတွင်း အဆိုပါဗုံးများကို ပို့ဆောင်သွားမယ်လို့ ပင်တဂွန်အရာရှိတစ်ဦးက သတင်းထောက်များကို ပြောကြားလိုက်ပါတယ်။

အပြွတ်ဗုံးတွေကို နိုင်ငံပေါင်း ၁၀၀ ကျော်မှ တားမြစ်ထားပြီး အဆိုပါဗုံးကနေ ဗုံးအသေးအမွှားများစွာ ထွက်လာကာ နေရာကျယ်ကျယ်တစ်ခုအတွင်း ဘယ်သူမှမခွဲခြားဘဲ သေစေနိုင်တဲ့အပြင် မပေါက်ကွဲတဲ့ဗုံးတွေကလည်း စစ်ပွဲပြီးသည့်တိုင်အောင် ဆယ်စုနှစ်တွေကြာတဲ့အထိ အန္တရာယ်ရှိနေဆဲ ဖြစ်ပါတယ်။

ယူကရိန်းဘက်က ဒီဗုံးကို အရပ်သားတွေ ထိခိုက်မှုအနည်းဆုံးဖြစ်အောင် အလွန်ဂရုစိုက် အသုံးပြုသွားမယ်လို့ စာရေးသားအာမခံထားကြောင်း အိမ်ဖြူတော်အမျိုးသားလုံခြုံရေးအကြံပေး 'ဂျိတ်ခ်ဆာလီဗန်'က ပြောကြားခဲ့ပါတယ်။

အမေရိကန်သမ္မတ'ဂျိုးဘိုင်ဒင်'က ဒီဗုံးတွေပို့ဆောင်ရန် ခက်ခက်ခဲခဲ ဆုံးဖြတ်ခဲ့ရပေမယ့် ယူကရိန်းတို့ လိုအပ်နေတဲ့အရာဖြစ်ကြောင်း ဖော်ပြခဲ့ပါတယ်။

ဖက်ဒရေးရှင်းကောင်စီ နိုင်ငံတကာကော်မတီအကြီးအကဲ 'ဂရီဂိုရီကရာဆင်'က အမေရိကန်နဲ့ နေတိုးခေါင်းဆောင်တို့ရဲ့ ဆုံးဖြတ်ချက်များကို အလွန်စိုးရိမ်မိကြောင်း RIA သတင်းဌာနက တင်ပြခဲ့ပါတယ်။

ဇွန်လအစောပိုင်း တန်ပြန်ထိုးစစ်စတင်ပြီးနောက်ပိုင်း ယူကရိန်းတောင်ပိုင်းရှိ ရွာအချို့ကို ပြန်လည်သိမ်းပိုက်နိုင်ခဲ့ပေမယ့် လက်နက်အင်အားနဲ့ လေကြောင်းကာကွယ်မှု နည်းပါးနေတယ်လို့ ယူကရိန်းက ပြောထားပါတယ်။

ဇူလိုင် ၁၁ ရက်နေ့နဲ့ ၁၂ ရက်နေ့ထိပ်သီးအစည်းအဝေးမတိုင်ခင် ယူကရိန်းသမ္မတ'ဇယ်လန်စကီ'က နေတိုးအဖွဲ့ဝင်ဖြစ်မြောက်ရေးအတွက် ဘူလ်ဂေးရီးယားမှာ ထောက်ခံမှုရရှိအောင် ပြောကြားခဲ့ပြီးနောက် ချက်ပြည်သူ့သမ္မတနိုင်ငံ၊ ဆလိုဗေးကီးယား၊ တူရကီတို့ကိုလည်း သွားရောက်လည်ပတ်ခဲ့ပါတယ်။

ရုရှားနဲ့စစ်ဖြစ်နေစဉ် ယူကရိန်းအနေနဲ့ နေတိုးထံဝင်ရောက်ဖို့ရာ မဖြစ်နိုင်ဘူးဆိုတာကို ဇယ်လန်စကီက သဘောပေါက်ထားပါတယ်။

Source: CNA #World_Military #ယူကရိန်းအတွက်အပြွတ်ဗုံးများ
#Yangon_Times

#World_Health
Published 9 July 2023

သင့်ရဲ့တစ်နေ့တာ စွမ်းအင်ပမာဏကို သက်ရောက်စေမယ့် အကြောင်းအရာများစွာ ရှိပါတယ်။

အိပ်ရေးပျက်ခြင်းဖြင့် မနက်ခင်းမှာ မူးဝေခြင်းဖြစ်စေနိုင်သလို အစားအသောက်၊ စိတ်ဖိစီးမှုအလွန်မြင့်မားခြင်းဖြင့်လည်း တစ်နေ့တာအတွင်း စွမ်းအင်ကျဆင်းစေပါတယ်။

ပူအိုက်တဲ့ကာလမှာဆိုရင် သတ္တုဓာတ်ပမာဏ မညီမျှခြင်းကို ဖြစ်စေနိုင်သလို ရေဓာတ်ခန်းခြောက်ခြင်း ဖြစ်ပေါ်စေနိုင်ပါတယ်။

ပင်ပန်းနွမ်းနယ်ခြင်း ခံစားရတာဟာ ခန္ဓာကိုယ်ထဲမှာ အချို့သော အာဟာရဓာတ်များ၊ သတ္တုဓာတ်များ ချို့တဲ့တာကြောင့် ဖြစ်ပါတယ်။

ကိုယ်လက်လှုပ်ရှားလေ့ကျင့်ခြင်း မလုပ်တာကလည်း ဒီလိုအချိန်တွေမှာ အားအင်ကျဆင်းစေနိုင်ပါတယ်။

တစ်နေ့တာအားအင်ပမာဏ ထိန်းညှိရာမှာ အသုံးဝင်စေတဲ့ အစားအစာများကို အာဟာရပညာရှင်'လော့ဗ်နိဘာထရာ'က အင်စတာဂရမ်မှာ ဖော်ပြထားပါတယ်။

(၁) ငှက်ပျောသီး

ဗိုက်တာမင်-ဘီ၆ ကြွယ်ဝစွာပါဝင်ကာ ကာဗိုဟိုက်ဒရိတ်တွေကို ချေဖျက်ပြီး စွမ်းအင်ထုတ်လုပ်ပေးပါတယ်။

(၂) ကွင်အာစေ့

အမျှင်ဓာတ်များပါဝင်ပြီး ခန္ဓာကိုယ်စွမ်းအင်ကို အချိန်ကြာရှည်စွာ ထိန်းသိမ်းပေးပါတယ်။

(၃) ဒိန်ချဉ်

ဒိန်ချဉ်က အစာချေခြင်း၊ အာဟာရစုပ်ယူခြင်းအပါအဝင် လုပ်ဆောင်ချက်အမျိုးမျိုးအတွက် အရေးပါတဲ့ အူလမ်းကြောင်းကျန်းမာရေးကို ကောင်းမွန်စေပါတယ်။

(၄) ချီယာစေ့

ကာဗိုဟိုက်ဒရိတ်ပါဝင်မှု၊ ကျန်းမာရေးနဲ့ ညီညွတ်တဲ့အဆီနဲ့ အမျှင်ဓာတ်များ ပါဝင်တာကြောင့် စွမ်းအင်ကြာရှည်စွာ ထိန်းသိမ်းပေးပါတယ်။

(၅) အုတ်ဂျုံ

သူတို့မှာ အမျှင်ဓာတ်ပါဝင်မှု မြင့်မားပြီး အစာချေခြင်းကို နှေးစေကာ စွမ်းအင်ကုန်ဆုံးခြင်းကို ကာကွယ်ပေးပါတယ်။

Source: India Today #World_Health #ပြန်လည်ဖြည့်တင်းပေးနိုင်မည့်အစားအစာများ
#Yangon_Time

#World_Health
Published 8 July 2023

အပြာကားနဲ့ ရုပ်ပုံစာပေတွေဟာ ဆယ်စုနှစ်တွေတိုင်အောင် တည်ရှိနေခဲ့ပေမယ့် အင်တာနက် တိုးတက်လာတာနဲ့အမျှ ထိုအနုပညာကို ကြည့်ရှုသူ ပိုပြီးများပြားလာပါတယ်။

နာမည်ကြီးအပြာဝက်ဘ်ဆိုက် PornHub ဆိုရင် တစ်နှစ်ကို ဝင်ရောက်ကြည့်ရှုသူ ၃၈ ဘီလီယံရှိပြီး တစ်လကို ၃.၂ ဘီလီယံရှိပါတယ်။

XVideos ဝက်ဘ်ဆိုက်ဆိုရင် တစ်လကို ၃.၃ ဘီလီယံကြည့်ရှုနှုန်း ရှိပါတယ်။

ကမ္ဘာပေါ်မှာ လူဦးရေ ၈ ဘီလီယံသာရှိတာကြောင့် ပျမ်းမျှအားဖြင့် လူတစ်ယောက်ဟာ တစ်နှစ်အတွင်း ထိုဝက်ဘ်ဆိုက်တွေထဲကို ၅ ကြိမ်ခန့် ဝင်ရောက်ကြည့်ရှုတယ်လို့ ခန့်မှန်းရပါတယ်။

အပြာကားများ ကြည့်ရှုခြင်းမှ တစ်ပတ်လောက် ရှောင်ကြဉ်ခြင်း ဒါမှမဟုတ် ရှောင်ရန်ကြိုးပမ်းပြီးနောက် နောက်ဆက်တွဲဆိုးကျိုးများ ခံစားရခြင်းရှိမရှိကို လတ်တလော လေ့လာခဲ့ကြပါတယ်။

အပြာကားကြည့်ရှုများတဲ့ ပြဿနာများ၊ စွဲလမ်းတဲ့လက္ခဏာများအကြောင်း တင်ပြကြပြီးနောက်မှာ အခုလို လေ့လာကြတာဖြစ်ပါတယ်။

ဒီလိုတွေတင်ပြကြပေမယ့် အပြာကြားပုံမှန်ကြည့်ရှုသူတွေဟာ စွဲလမ်းလာတယ်ဆိုတာကို သုတေသီတွေက လက်မခံသေးဘဲ ရှိနေဆဲဖြစ်ပြီး စွဲလမ်းခြင်းဆိုင်ရာ ရောဂါလက္ခဏာများ ဖော်ထုတ်ပြသနေပါတယ်။

အရက်၊ ဆေးဝါးစွဲလမ်းသူတွေ ဖြတ်တောက်တဲ့အခါ ခံစားရတဲ့လက္ခဏာတွေလိုမျိုး အပြာကားဖြတ်တဲ့လူတွေမှာလည်း ဖြစ်ပေါ်နိုင်သလားဆိုတာကို သုတေသီတွေက လေ့လာဖို့ ကြိုးစားခဲ့ကြပါတယ်။

စမ်းသပ်ခံမယ့်သူတွေကို အဖွဲ့ ၂ ဖွဲ့ခွဲကာ တစ်ဖွဲ့ကတော့ ပုံမှန်အတိုင်းဆက်လက်ကြည့်ခဲ့ကြပြီး နောက်တစ်ဖွဲ့ကတော့ တစ်ပတ်ကြာအောင် အပြာကားမကြည့်ဘဲ နေခိုင်းခဲ့ပါတယ်။

စမ်းသပ်ကာလအတွင်း အပြာကားတစ်ပတ်မကြည့်သူတွေထဲက ၅၄.၆၅ ရာခိုင်နှုန်းက အပြာကားလုံးဝမကြည့်ခဲ့ကြကာ ၄၅.၃၅ ရာခိုင်နှုန်းကတော့ အနည်းဆုံးတစ်ခါ ကြည့်ခဲ့ပါတယ်။

စမ်းသပ်ခံသူများကိုယ်တိုင် အစီရင်ခံထားတဲ့ အချက်အလက်များကို ယခင်လေ့လာမှုများကနေ ကြည့်ရှုခဲ့ကြပါတယ်။

ထိုလေ့လာမှုကတော့ စမ်းသပ်ခံသူများကြား စွဲလမ်းခြင်းလက္ခဏာ ကွဲပြားမှုမရှိကြောင်း တွေ့ခဲ့ပါတယ်။

ဆက်လက်လေ့လာမှုပြုလုပ်တဲ့အခါမှာ အပြာကားဖြတ်တဲ့လက္ခဏာတွေ လျော့သာလျော့ကျသွားပါတယ်။

ထပ်ခါထပ်ခါစမ်းသပ်လေ ဆိုးကျိုးလက္ခဏာတွေ ပိုပိုနည်းလာလေ ဖြစ်ပါတယ်။

#World_Health #အပြာကားကြည့်ခြင်းကိုတစ်ပတ်ခန့်ရှောင်ရှား
Source: The Jerusalem Post

မက္ကဆီကိုတောင်ပိုင်းမြို့လေးတစ်မြို့မှာ ဒေသခံတွေထံ ကံကောင်းမှုများ ရောက်ရှိလာရန်အတွက် မြို့တော်ဝန်က မိကျောင်းမတစ်ကောင်နဲ့ လက်ထပ်တဲ့ ရိုးရာဓလေ့ပွဲကို ကျင်းပခဲ့ပါတယ်။

#World_Tradition
Published 7 July 2023
#မြို့တော်ဝန်နှင့်တွားသွားသတ္တဝါတစ်ကောင်ထိမ်းမြားလက်ထပ်
#Yangon_Times

#Daily_News
Published_ 7 July 2023

၁။ ကလေးငယ်များဖျားလျှင် ရာသီတုပ်ကွေးထင်ပြီး မပေါ့ဆသင့် သွေးလွန်တုပ်ကွေးဖြစ်နိုင်ဟုဆို

၂။ သင်္ကြန်ပွဲတော်ကို ကမ္ဘာ့အမွေအနှစ်စာရင်းတင်သွင်းနိုင်ရေးအတွက် ယူနက်စကိုသို့အဆိုပြုလွှာပေးပို့ထားပြီဖြစ်ဟုဆို

၃။ MFF Carabao Futsal Amateur Cup 2022 ဘောလုံးပြိုင်ပွဲ Black Cross FC က City Dagon FC (၈-၆) ဂိုးဖြင့် အနိုင်ရ

၄။ မက္ကဆီကိုမြို့လေးမှမြို့တော်ဝန်နှင့် တွားသွားသတ္တဝါတစ်ကောင် ထိမ်းမြားလက်ထပ် .... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Time #Daily_News #YMG

#World_Politics
Published 7 July 2023

ထိုင်းနိုင်ငံမှ Move Forward Party (MFP)ပါတီခေါင်းဆောင် 'ပီတာလင်မ်ဂျရိုအင်ရတ်'ကို အထက်လွှတ်တော်အမတ်အများအပြားက ဝန်ကြီးချုပ်သစ်နေရာအတွက် ထောက်ခံမဲပေးတော့မှာ မဟုတ်ဘဲ နောက်ပြန်ဆုတ်နေကြပြီ ဖြစ်ပါတယ်။

MFP ပါတီရဲ့ နိုင်ငံရေးမူဝါဒများ၊ အထူးသဖြင့် ဘုရင်မင်းမြတ်အား စော်ကားမှုဥပဒေ ပြောင်းလဲရေးနဲ့ နိုင်ငံခြားရေးမူဝါဒ ပြောင်းလဲရေးတို့အပေါ် စိုးရိမ်နေကြတာ ဖြစ်ပါတယ်။

ပီတာကို မဲပေးမယ်လို့ ကတိပြုထားကြပေမယ့် ရာဇဝတ်မှုကျင့်ထုံး ဥပဒေပုဒ်မ ၁၁၂ ဖြစ်တဲ့ ဘုရင်မင်းမြတ်အား စောက်ကားခြင်းဥပဒေအပေါ် ပြောင်းလဲတာနဲ့ ပတ်သက်တဲ့ ပါတီရပ်တည်ချက်ကြောင့် စိတ်ပြောင်းသွားပုံ ပေါ်ပါတယ်။

ဒီဥပဒေပုဒ်မ ၁၁၂ ကို ပြောင်းလဲဖို့ကြိုးစားတာဟာ တိုင်းပြည်အတွက် အန္တရာယ်ဖြစ်စေနိုင်တာက အဓိကအကြောင်းအရင်း တစ်ရပ်ဖြစ်နေပါတယ်လို့ အထက်လွှတ်တော်အမတ် 'ပရာပန်ကွန်မီ'က ပြောကြားလိုက်ပါတယ်။

"ထိုင်းနိုင်ငံက နိုင်ငံတိုင်းနဲ့ ရင်းနှီးကျွမ်းဝင်နေတာပါ။ မစ္စတာပီတာသာ အာဏာရသွားရင် အင်အားကြီးနိုင်ငံဘက်ကို ယိမ်းယိုင်လာတဲ့ နိုင်ငံခြားရေးမူဝါဒပြောင်းလဲမှု ဖြစ်လာနိုင်တယ်" လို့ ဆိုပါတယ်။

ပီတာဟာ iTV Plc မှာ အရင်က ရှယ်ယာပါခဲ့တာကြောင့် ဝန်ကြီးချုပ်ရွေးကောက်ခံခွင့်ရှိမှုအပေါ် မေးခွန်းထုတ်နေခဲ့ကြပါတယ်။

ဒါ့အပြင် MFP ပါတီဟာ ဖွဲ့စည်းပုံအခြေခံဥပဒေပါ ဘုရင်စနစ်ကို ဖြုတ်ချရန် ကြိုးပမ်းနေတယ်လို့လည်း စွပ်စွဲခံထားရပါတယ်။

ပုဒ်မ ၁၁၂ အပေါ် MFP မူဝါဒထားရှိခြင်းက ဖွဲ့စည်းပုံအခြေခံဥပဒေပုဒ်မ ၄၉ ကို ချိုးဖောက်ရာကျတယ်လို့ အစိုးရရှေ့နေချုပ်ရုံးမှ ရှေ့နေ'ထရာယုဆူဝမ်ကက်ဆွန်'က အခိုင်အမာဆိုလိုက်ပါတယ်။

ဇူလိုင် ၁၃ ရက်နေ့မှာ ကျင်းပရန်စီစဉ်ထားတဲ့ ပူးတွဲပါလီမန်လွှတ်တော်မှာ မစ္စတာပီတာအတွက် မဲပေးမှာလားဆိုတာကို အထက်လွှတ်တော် ၂၄ ဦးကို မေးမြန်းခဲ့ကြပါတယ်။

ထိုထဲမှာ သူ့ကိုမဲပေးမယ်လို့ အရင်ကကတိပြုခဲ့သူ ၁၄ ဦးပါဝင်နေပါတယ်။

ဆုံးဖြတ်ချက်မချခင်မှာ MFP ရဲ့မူဝါဒတွေက တိုင်းပြည်အတွက် အကောင်းဆုံးဖြစ်စေမှာလား ဆိုတာကို သုံးသပ်ကြည့်ချင်ကြောင်း အထက်လွှတ်တော်အမတ် 'ဝီရာဆက်ဖူထရာကူ'က ပြောပြသွားပါတယ်။

နောက်ထပ် လွှတ်တော်အမတ်တစ်ဦးကလည်း အရင်က ပီတာကို မဲပေးဖို့ဆုံးဖြတ်ခဲ့ပေမယ့် ပုဒ်မ ၁၁၂ ကိစ္စကြောင့် စိတ်ပြောင်းလဲသွားရတယ်လို့ ဝန်ခံလိုက်ပါတယ်။

နောက်ထပ်တစ်ဦးပြောပြရာမှာ မစ္စတာပီတာအနေနဲ့ ပုဒ်မ ၁၁၂ ကို မပြောင်းလဲဘူးလို့ ကြေညာမှသာ ဝန်ကြီးချုပ်ဖြစ်လာနိုင်ပါတယ်လို့ ဆိုပါတယ်။

#World_Politics #ပီတာလင်မ်ဂျရိုအင်ရတ်အားဝန်ကြီးချုပ်အသစ်
#Source: Bangkok Post #Yangon_Times