#DailyNews
Published - 23 May 2022

၁။ မိုင်းကိုင်မြို့တွင် ရှမ်းစာပေတိုးတက်ရန်နှင့်ရှမ်းယဥ်ကျေးမှုအမွေအနှစ်များ ရှေးမူမပျက်ထိန်းသိမ်းပေးရန်လိုဟုဆို။

၂။ ကလေးမြို့ပေါ်သို့ ချင်းစစ်ဘေးရှောင်ပြည်သူများထပ်တိုး ရောက်လာရှိလာပြီး စားနပ်ရိက္ခာလိုအပ်မှုရှိနေ။

၃။ နေ့စဉ်မိုးလေဝသသတင်း။

၄။ ကမ္ဘာ့အကြီးဆုံးရေအားလျှပ်စစ်စီမံကိန်း တရုတ်တွင်ဆောက်လုပ် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#WorldNews
Published 23 May 2022

အာဟာရနို့မှုန့်တွေ တင်ဆောင်လာတဲ့ စစ်လေယာဉ်တစ်စင်းဟာ အမေရိကန်နိုင်ငံ အင်ဒီယာနာပိုလစ်သို့ တနင်္ဂနွေနေ့မှာ ဆိုက်ရောက်လာခဲ့ရာ ကလေးငယ်များအတွက် နို့ဗူးသန်းတစ်ဝက်ကျော်တိုက်ကျွေးနိုင်မှာ ဖြစ်ပါတယ်။

ဒါဟာ ဥရောပက‌ ပထမအသုတ်ပို့ဆောင်လိုက်တာဖြစ်ပြီး ကလေးတွေကိုတိုက်ကျွေးဖို့ အာဟာရနို့မှုန့်မလုံမလောက်ဖြစ်နေတဲ့ အမေရိကန်မှ ကလေးမိဘများအတွက် ရည်ရွယ်ပို့ဆောင်လိုက်တာဖြစ်ပါတယ်။

ပို့ဆောင်မယ့်ကုန်တင်လေယာဉ်တွေ မရှိတာကြောင့် သမ္မတ’ဂျိုးဘိုင်ဒန်’က ‘Operation Fly Formula’ခရီးစဉ်ကို လေတပ်လေယာဉ်များဖြင့် ပို့ဆောင်ဖို့ ခွင့်ပြုခဲ့တာဖြစ်ပါတယ်။

ယခုတင်ဆောင်လာတဲ့ အာဟာရနို့မှုန့်တွေက တန်ချိန် ၇၈,၀၀၀ ပေါင်ရှိကြောင်း အိမ်ဖြူတော်စာနယ်ဇင်းတာဝန်ခံ’ကာရင်ဂျွန်ပီယာရဲ’က သတင်းထောက်များကို ပြောပြခဲ့ပါတယ်။

ပထမအသုတ်ပို့ဆောင်မှုကို ခရီးဦးကြို‌ဆိုဖို့ စိုက်ပျိုးရေးဝန်ကြီး’တွမ်ဗီလ်ဆက်’က အင်ဒီယာနာပိုလစ်ကို ရောက်ရှိနေခဲ့ပါတယ်။

အခုလို အာဟာရနို့မှုန့်များ ရောက်ရှိလာတာက ဒီပြဿနာကိုဖြေရှင်းဖို့ကြိုးပမ်းနေတဲ့ အစိုးရအတွက် အနည်းငယ်ဖြေသာစရာ ဖြစ်ခဲ့ပါတယ်။

တနင်္ဂနွေနေ့ကရောက်ရှိခဲ့တာတွေက အမေရိကန်ရဲ့အာဟာရနို့မှုန့်လိုအပ်ချက်ကို ၁၅ ရာခိုင်နှုန်းဖြည့်ဆည်းပေးနိုင်မှာ ဖြစ်ပါတယ်။

အာဟာရမှုန့်ထုတ်လုပ်မှုကို တစ်ဦးတည်းကပဲ ခြယ်လှယ်နေတာမျိုးမဖြစ်အောင် ထုတ်လုပ်တဲ့ကုမ္ပဏီအများအပြားရှိဖို့ လိုအပ်နေပါတယ်။

အခုဆိုရင် Abbott Nutrition နဲ့ Mead-Johnson ကုမ္ပဏီတို့က အာဟာရမှုန့်များလက်ခံထုတ်လုပ်နိုင်ပြီဖြစ်ပါတယ်။

မီချီဂန်မှာရှိတဲ့ နိုင်ငံအတွင်း အာဟာရမှုန့်ထုတ်လုပ်ရေး အကြီးဆုံးကုမ္ပဏီဟာ ဘေးကင်းစိတ်ချရခြင်းဆိုင်ရာ ပြဿနာများကြောင့် ဖေဖော်ဝါရီလမှာ ပိတ်သိမ်းခဲ့ရကာ အမေရိကန်မှာ ဓာတ်မတည့်တာမျိုး ဖြစ်နိုင်ချေနည်းတဲ့ အာဟာရနို့မှုန့်တွေရှားပါးပြတ်လတ်ခြင်းပြဿနာကို အစိုးရကဖြေရှင်းဖို့ ကြိုးစားနေရပါတယ်။

ဂျာမနီနိုင်ငံ ရမ်စတိုင်းလေဆိပ်ကနေ Nestle Health Science မှ အာဟာရမှုန့်အိတ်ပေါင်း ၁၃၂ အိတ်ရောက်ရှိထားပြီး Gerber Good Start Extensive မှ အိတ်ပေါင်း ၁၁၄ အိတ်ဟာ လာမယ့်ရက်အတွင်း ထပ်မံရောက်ရှိလာမှာဖြစ်ကြောင်း အိမ်ဖြူတော်က အသိပေးလိုက်ပါတယ်။

နွားနို့ပရိုတိန်းနဲ့ ဓာတ်မတည့်တဲ့ကလေးများအတွက် ရည်ရွယ်တဲ့ အာဟာရမှုန့်နိုဗူး ၁.၅ သန်းဟာလည်း ယခုအပတ်အတွင်း ရောက်ရှိလာမှာဖြစ်ပါတယ်။

အခုရောက်ရှိတဲ့ အာဟာရမှုန့်တွေကို အင်ဒီယာနာပိုလစ်ရှိ Nestle ဖြန့်ချိရေးစင်တာကနေ ဖြန့်ဖြူးမှာဖြစ်ပြီး စံညွှန်းအရည်အသွေး စစ်ဆေးသွားမှာဖြစ်ပါတယ်။

အမေရိကန်မှ တာဝန်ရှိသူများနဲ့ Abbott Nutrient တိုက မီချီဂန်ရှိစက်ရုံကို နောက်အပတ်မှာပြန်လည်ဖွင့်လှစ်နိုင်ဖို့ မျှော်မှန်းထားပေမယ့် တင်ပို့ဖို့အဆင်သင့်ဖြစ်ဖို့က ၂ လလောက်ကြာနေနိုင်ပါတယ်။

အာဟာရမှုန့်ပြတ်လတ်နေတဲ့ အချိန်ဖြစ်တာကြောင့် အစားအစာနဲ့ဆေးဝါးကွပ်ကဲရေးက စံချိန်စံညွှန်းသတ်မှတ်ချက်တွေကို လျှော့ချတိုင်းတာသွားမှာဖြစ်ပါတယ်။

Source: AP News
#Yangon_Media_Group

#WorldHealth
Published 23 May 2022

မီးဖိုချောင်ထဲက အသုံးအများဆုံးဟင်းချက်ပစ္စည်းတွေထဲမှာ ဆီလည်းပါဝင်ပါတယ်။

သင့်လျော်တဲ့ဟင်းချက်ဆီကို ရွေးချယ်အသုံးပြုခြင်းက အရသာထူးကဲကောင်းမွန်စေသလို ကျန်းမာရေးအတွက်လည်း အဟာရဓာတ်အမျိုးမျိုးရရှိစေပါတယ်။

စားစရာပြုလုပ်ရာမှာ ဆီအသုံးများတဲ့ အိန္ဒိယနိုင်ငံကအိမ်တွေမှာ ဆီတွေအလဟဿမဖြစ်အောင် သုံးပြီးသားဆီတွေကို ပြန်လည်သုံးစွဲလေ့ရှိကြပါတယ်။

ဒီလိုပြန်လည်သုံးစွဲခြင်းက အဆိပ်အတောက်ဖြစ်စေပြီး ကျန်းမာရေးပြဿနာများဖြစ်ပေါ်လာနိုင်ပါတယ်။

ဒါဆိုရင် အသုံးပြုပြီးသားဆီတွေကို ပြန်လည်သုံးစွဲခြင်းကြောင့် ကျန်းမာရေးကို ဘယ်လိုမျိုးထိခိုက်စေနိုင်သလဲ?

(၁) ခန္ဓာကိုယ်ကိုအဆိပ်အတောက်ဖြစ်စေပြီး နှလုံးနှင့်မှတ်ဉာဏ်ပိုင်းချို့ယွင်းမှု ဖြစ်ပေါ်နိုင်ခြင်း
- အသုံးပြုပြီးသားဆီကို ထပ်မံအပူပေးမယ်ဆိုရင် Aldehydes နဲ့ HNE တို့လို အဆိပ်အတောက်ဓာတုပစ္စည်းများ ပိုမိုများပြားစွာဖြစ်ပေါ်လာပါတယ်။

- Aldehydes ကြောင့် နှလုံးပုံမှန်အလုပ်မလုပ်ခြင်း၊ မှတ်ဉာဏ်ချို့ယွင်းခြင်း၊ အယ်လ်ဇိုင်းမားရောဂါနဲ့ ပါကင်ဆန်ရောဂါတို့ဖြစ်ပေါ်နိုင်ပြီး HNE ကတော့ ခန္ဓာကိုယ်အတွက် အဆိပ်ဖြစ်စေကာ DNA, RNA နဲ့ ပရိုတိန်းလုပ်ဆောင်ချက်တွေကို ထိခိုက်စေပါတယ်။

(၂) မကောင်းတဲ့ကိုလက်စ်ထရောလ်များပြားလာခြင်း
- အမည်းရောင်ပါတဲ့ အသုံးပြုပြီးသားဆီတွေကို ထပ်မံအပူပေးလိုက်ပါက အဆီဓာတ်တွေများစွာထွက်လာပြီး ကျန်းမာရေးထိခိုက်စေပါတယ်။

- မကောင်းတဲ့ ကိုလက်စ်ထရောလ်(LDL)ပမာဏ ခန္ဓာကိုယ်ထဲများလာတဲ့အခါ လေဖြတ်ခြင်း၊ အဝလွန်ခြင်း၊ အစာမကြေခြင်းနဲ့ နှလုံးရောဂါတို ဖြစ်ပွားလာနိုင်ပါတယ်။

(၃) အက်ဆစ်ဓာတ်များလာကာ အချဉ်ပေါက်ခြင်း
- အသုံးပြုပြီးသား ဆီတွေက ရေငွေ့၊ လေ၊ အလင်းရောင်နဲ့ထိတွေ့တဲ့အခါ အချဉ်ထပြီးဆီချေးစော်နံတာမျိုး ဖြစ်တတ်ပါတယ်။

- ဆီတွေကိုအပူပေးလိုက်တိုင်းမှာ အမှုန်လေးတွေက ပြောင်းလဲသွားပြီး ဆီရဲ့အနံ့နဲ့ အရသာကို ဆိုးရွားစွာ ပြောင်းလဲစေပါတယ်။

- ဒီလိုဆီတွေပါဝင်တဲ့ အစားအစာစားမယ်ဆိုရင် အက်ဆစ်ဓာတ်များလာပြီး အစာအိမ်ထိခိုက်ကာ လည်ချောင်းပြဿနာများ ဖြစ်ပေါ်တတ်ပါတယ်။

(၄) ရောင်ရမ်းခြင်းနဲ့ ကင်ဆာဖြစ်နိုင်ချေများပြား
- သုံးပြီးသားဆီ ပြန်လည်သုံးစွဲခြင်းက PAH နဲ့ Aldehydes ပစ္စည်းများဖြစ်ပေါ်လာပြီး ခန္ဓာကိုယ်ထဲ ရောင်ရမ်းခြင်းနဲ့ ကင်ဆာရောဂါဖြစ်ပေါ်လာနိုင်ပါတယ်။

- အဆိုပါ အခြေအနေကို လစ်လျူရှုထားပါက ကိုယ်ခံအားကျဆင်းလာပြီး ရောဂါဘယများဝင်ရောက်လာနိုင်ပါတယ်။

Source: Pinkvilla.
#Yangon_Media_Group

#WorldHealth
Published 23 May 2022

ညဘက်မှာ ခွေးလေးတွေ ကြောင်လေးတွေနဲ့ အတူအိပ်စက်ခြင်းဖြင့် နှစ်ခြိုက်စွာအိပ်ပျော်နိုင်ကြောင်း စစ်တမ်းလေ့လာရရှိထားပါတယ်။

ဗြိတိန်စစ်တမ်းကောက်ယူရေး OnePoll က အမေရိကန်အိမ်မွေးတိရစ္ဆာန်ပိုင်ရှင်အယောက် ၂ ထောင်ကို စစ်တမ်းကောက်ယူခဲ့ပါတယ်။

၁၀ ယောက်မှာ ၇ ယောက်က သူတို့အချစ်ဆုံးတိရိစ္ဆာန်နဲ့အတူ အိပ်စက်ခြင်းက ပိုမိုကောင်းမွန်စွာအိပ်ပျော်စေကြောင်း တွေ့ရှိရပါတယ်။

ထိုထဲကလူတဝက်လောက်က သူတို့ရဲ့အိမ်မွေးလေးတွေ အနားမှာရှိရုံနဲ့တင် စိတ်ဖိစီးမှုလျော့ကျစေတယ်လို့ သိရှိရပါတယ်။

အရင်ကလေ့လာမှုတွေမှာလည်း အိမ်မွေးတွေနဲ့အိပ်စက်ခြင်းက လူသားတွေအတွက် ပိုမိုလုံခြုံစိတ်ချရစေပြီး စိတ်အခြေအနေတိုးတက်စေတယ်လို့ ဖော်ပြထားပါတယ်။

လူသားတွေဟာ ညစဉ်အိပ်ချိန် ၇ နာရီမှ ၉ နာရီကြားရှိသင့်တယ်လို့ ဆရာဝန်များအကြံပြုထားပေမယ့် ၃ ပုံ ၁ ပုံလောက်က လုံလောက်စွာမအိပ်စက်ရပါဘူး။

ဒါကြောင့်နှလုံးရောဂါ၊ အဝလွန်ခြင်း၊ စိတ်ဓာတ်ကျခြင်းတိုလို နာတာရှည်ရောဂါများဖြစ်ပေါ်လာကြကြောင်း CDC က ဖော်ပြထားပါတယ်။

အချို့ကလည်း ညဘက်မှာ အိမ်မွေးတိရိစ္ဆာန်တွေအနားမှာရှိခြင်းက စိတ်ငြိမ်သက်စေတယ်လို့ ဆိုပါတယ်။

လက်တွဲဖော်ရှိတဲ့လူတွေထဲက ၅၈ ရာခိုင်နှုန်းက ညဘက်မှာလက်တွဲဖော်နဲ့အတူရှိဖို့ထက် အိမ်မွေးတိရိစ္ဆာန်နဲ့သာရှိဖို့ ပိုပြီးလိုလားပါတယ်။

အချို့အိမ်မွေးတိရိစ္ဆာန်ပိုင်ရှင်တွေကတော့ သူတို့နဲ့အတူအိပ်ရလို့ အနှောင့်အယှက်ဖြစ်ရကြောင်း ဖြေကြားလာပါတယ်။

၂၀၁၈ ခုနှစ်က အမျိုးသမီး ၉၀၀ ကို လေ့လာရာမှာ အိမ်မွေး‌လေးတွေနဲ့အိပ်ခြင်းက အိပ်ရာထဲမှာ ပိုမိုလုံခြုံစိတ်ချရတယ်လို့ ဖြေကြားခဲ့ကြပါတယ်။

ခွေးတွေက အိပ်စက်ရာမှာအနှောင့်အယှက်ပိုနည်းပြီး ပိုမိုလုံခြုံစိတ်ချရနိုင်ပေမယ့် ကြောင်တွေကတော့ အိပ်စက်ရာမှာ အနှောင့်အယှက်ဖြစ်စေတယ်လို့ ပြောသူတွေရှိပါတယ်။

Sealy မွေ့ရာထုတ်လုပ်ကုန်မှ ကြော်ငြာဌာနဥက္ကဌ’ဘရန့်ဖစ္စတာ’က ဒီစစ်တမ်းများအရ အိမ်မွေးတွေနဲ့အိပ်စက်ခြင်းက လူသားတွေအတွက် အကျိုးပြုတာရှိသလို အနှောင့်အယှက်ဖြစ်စေတာမျိုးလည်းရှိကြောင်း သုံးသပ်သွားပါတယ်။

Source: Dailymail.
#Yangon_Media_Group

Published 22 May 2022

ပုံမှန်မဟုတ်တဲ့ အပူနှင့်စိုထိုင်းမှုအခြေအနေတွေမှာ ဘရွတ်ကလင်း တာဝက်မာရသွန်ပြေးပွဲကို မေလ၂၁ ရက် စနေနေ့က ကျင်းပရာ အပြေးသမားတစ်ဦးသေဆုံးပြီး အခြား၁၅ ဦးမှာ ဆေးရုံတင်လိုက်ရတယ်လို့ မြို့အရာရှိတွေကပြောပါတယ်။ ဆေးရုံတင်လိုက်ရတဲ့ ၁၅ ဦးထဲမှာ လေးဦးရဲ့ဒဏ်ရာတွေဟာစိုးရိမ်ရပြီး (၈)ဦးက အသက်အန္တရာယ်မရှိဘဲ ကျန်လေးဦးကတော့ အနည်းအကျဉ်းဒဏ်ရာရတာဖြစ်တယ်လို့ နယူးယောက်စီးတီးမီးသတ်ဌာနပြောရေးဆိုခွင့်ရသူက Insider ကို သတင်းထုတ်ပြန် ဖြေကြားပါတယ်။

သေဆုံးသွားတဲ့အပြေးသမားဟာ အသက်၃၀အရွယ်ရှိပြီး ပန်းဝင်ပြီးနောက်လဲကျသွားတာဖြစ်တယ်လို့ နယူးယောက်တိုင်းမ် ကရေးသားပါတယ်။

အခုလိုသေဆုံးဒဏ်ရာရမှုတွေဟာ အပူချိန်နှင့်စိုထိုင်းဆတွေနှင့် တိုက်ရိုက်ပတ်သက်သလားဆိုတာကိုတော့ ရှင်းရှင်းလင်း လင်းမသိရသေးပါဘူး။ နယူးယောက်စီးတီးနေရာတစ်ဝိုက်မှာ အရာရှိတွေက အပူသတိပေးချက်ထုတ်ပြန်တဲ့တစ်ရက်တည်းမှာ မာရသွန်ပြေးပွဲ ကျင်းပခဲ့တာဖြစ်ပါတယ်။လေထုအရည်အသွေးသတိပေးချက်ပါအဲဒီတုန်းက ထုတ်ပြန်ခဲ့တာပါ။

မနက်၇နာရီမှ စတင်ခဲ့တဲ့ပြေးပွဲအချိန်အတွင်း အပူချိန်ဟာ ၆၀နှင့်၇၀ ဖာရင်ဟိုက်ကြားရှိခဲ့ပြီး နောက်ပိုင်းမှာ ၉၀ဒီဂရီဖာရင်ဟိုက်ကျော်ရှိခဲ့ပါတယ်။အဲဒီစနေနေ့ဟာ နယူးယောက်စီးတီးမှာ တစ်နှစ်လုံးအပူဆုံးဖြစ်ပြီး မေလမှာ အပူချိန် သတိပေးချက်ထုတ်ပြန်ရတာကလည်း ၁၆နှစ်အတွင်းပထမဆုံးအကြိမ်ဖြစ်ပါတယ်။

၁၃.၁မိုင်ပြေးရတဲ့ ခရီးဝက်မာရသွန်ကိုဘရွတ်ကလင်းပြတိုက်က တာထွက်ပြီး ပရောစပက်ပန်းခြံကိုဖြတ်သန်းပြီးနောက် ကိုနေကျွန်းမှာ ပန်းဝင်တာဖြစ်ပါတယ်။သေဆုံးသွားသူဟာ ပန်းဝင်အပြီးလဲကျသွားလို့ ဆေးရုံကိုအပို့ ဆေးရုံအရောက်မှာ သေဆုံးခဲ့ရတာပါ။

Source Insider

Published 22 May 2022

မြောက်ကိုးရီးယားလုပ်တာမှန်သမျှအတွက် ကျွန်တော်တို့ပြင်ဆင်ထားပြီးပါပြီ၊သူတို့ဘာပဲလုပ်လုပ် ကျွန်တော်တို့ ဘယ်လိုတုန့်ပြန်ရမယ်ဆိုတာစဉ်းစားထားပြီးပြီမို့ စိတ်မပူဘူး လို့ အမေရိကန်သမ္မတ ဂျိုးဘိုင်ဒင်ကပြောပါတယ်။  တောင်ကိုးရီးယားကို သူရောက်ရှိနေစဉ်အတွင်း ဟွန်ဒေးရင်းနှီးမြှပ်နှံမှုနှင့်ပတ်သက်လို့ မှတ်ချက်စကားပြောကြားရာမှာ သူက ထည့်သွင်းပြောဆိုခဲ့တာဖြစ်ပါတယ်။

Source AFP