#WorldHealth
Published 5 June 2022

ဖိုင်ဇာကုမ္ပဏီမှထုတ်လုပ်တဲ့ ပက်ဇ်လိုဗစ်(Paxlovid) ကိုဗစ်ကုသဆေးဟာ အသက် ၆၅ နှစ်နဲ့အထက် ကာကွယ်ဆေးထိုးထားတဲ့သူတွေရော ကာကွယ်ဆေးမထိုးထားတဲ့သူတွေမှာပါ ဆေးရုံတက်ကုသခံယူရမှုနဲ့ အသက်ဆုံးရှုံးမှုတို့ကို လျှော့ချပေးနိုင်ကြောင်း အိုမီခရွန်မျိုးဗီဇကွဲ ကူးစက်မှု မြင့်မားနေတဲ့ကာလအတွင်း ပြုလုပ်ခဲ့တဲ့ အစ္စရေးလ်ရဲ့လေ့လာမှုတစ်ခုမှာဖော်ပြခဲ့ပါတယ်။

ဒါပေမဲ့အဆိုပါဆေးဟာ လူလတ်ပိုင်းတွေမှာတော့ ရောဂါပြင်းထန်စွာဖြစ်ပွားခြင်းမျိုးကို မကာကွယ်နိုင်ဘူးလို့ အစ္စရေးလ်မှကလဲလစ်ကျန်းမာရေးဝန်ဆောင်မှုရဲ့ သုတေသနမှတ်တမ်းမှာ ဖော်ပြထားပါတယ်။

ဖိုင်ဇာရဲ့ပက်ဇ်လိုဗစ်ဆေးကို ရောဂါအန္တရာယ်ဆိုးရွားနိုင်တဲ့လူတွေမှာ ရောဂါပြင်းထန်ခြင်းကိုကာကွယ်နိုင်ဖို့ ကူးစက်ပြီးခါစအချိန်မှာအသုံးပြုရတာဖြစ်ပြီး အမေရိကန်မှာ အသုံးများနေပြီဖြစ်ပါတယ်။

အစိုးရအဖွဲ့က ပက်ဇ်လိုဗစ်ဆေးတွေကိုအသုံးပြုဖို့ တိုက်တွန်းထားပြီး ဆေးတွေဝယ်ယူကာ အခမဲ့ထောက်ပံ့ပေးနေပါတယ်။

ဖိုင်ဇာက ဒယ်လ်တာကူးစက်မှုကာလအတွင်း ရောဂါဆိုးရွားနိုင်ပြီးကာကွယ်ဆေးမထိုးထားတဲ့သူတွေမှာ ပက်ဇ်လိုဗစ်နဲ့စမ်းသပ်မှုပြုလုပ်ခဲ့ရာ ဆေးရုံတက်ကုသခံယူရမှုနဲ့ အသက်သေဆုံးမှုနှုန်းတို့ကို ၉၀ ရာခိုင်နှုန်းလျှော့ချပေးနိုင်ခဲ့ပါတယ်။

ပက်ဇ်လိုဗစ်ဆေးသောက်သုံးပြီး ရောဂါသက်သာလာတဲ့လူနာတွေမှာ ကိုဗစ်လက္ခဏာပြန်ပေါ်တာမျိုးတွေဖြစ်ပေါ်ကြောင်း အကြောင်းကြားမှုများရှိလာတာကြောင့် စိုးရိမ်စရာအနည်းငယ်ဖြစ်လာရပြီး ကာကွယ်ဆေးထိုးထားတဲ့သူတွေမှာ ထိရောက်မှုနည်းပါးနေနိုင်ပါတယ်။

ဇန်နဝါရီ ၉ ရက်မှ မတ်လ ၁၀ ရက်နေ့အတွင်း အစ္စရေးလ်မှာအိုမီခရွန်ကူးစက်ပျံ့ပွားနေချိန်မှာ လူနာ ၁၁၀,၀၀၀ ခန့်ရဲ့အချက်အလက်တွေကို လေ့လာခဲ့ပါတယ်။

ကာကွယ်ဆေးမထိုးထားဘဲ ကိုဗစ်ရောဂါခုခံအားမရရှိသေးတဲ့လူကြီးတွေမှာ ပက်ဇ်လိုဗစ်သောက်သုံးခြင်းဖြင့် ဆေးရုံတက်ကုသခံယူရမှုကို ၈၆ ရာခိုင်နှုန်းလျှော့ချပေးနိုင်ခဲ့ပြီး ရောဂါခုခံအားရှိပြီးသားသူတွေမှာတော့ ၆၀ ရာခိုင်နှုန်းသာကာကွယ်ပေးနိုင်ပါတယ်။

ပက်ဇ်လိုဗစ်နဲ့စမ်းသပ်တဲ့ အသက် ၆၅ နှစ်နဲ့အထက်လူကြီးတွေထဲက ဝ.၆ ရာခိုင်နှုန်းသာ ဆေးရုံတက်ကုသခံယူခဲ့ရပါတယ်။

အသက် ၄၀ နဲ့ ၆၄ နှစ်ကြားလူလတ်ပိုင်းတွေမှာ ရောဂါခုခံအားရှိသည်ဖြစ်စေ/မရှိသည်ဖြစ်စေ ဆေးရုံတက်ကုသခံယူရခြင်းကို သိသိသာသာမလျှော့ချပေးနိုင်ကြောင်း ကလဲလစ်မှသုတေသီ'ရိုနန်အာဘယ်လ်'က ဆိုပါတယ်။

အသက်အန္တရာယ်သေဆုံးမှုကို လျှော့ချရာမှာလည်း အသက် ၆၅ နှစ်နဲ့အထက်လူကြီးတွေမှာ ၈၁ ရာခိုင်နှုန်းအထိ လျှော့ချပေးနိုင်ပြီး လူလတ်ပိုင်းတွေမှာသိသိသာသာ ထိရောက်မှုမရှိလှပါဘူး။

လူနာတွေခံစားရတဲ့ လက္ခဏာများကို တင်ပြမှုအချက်အလက်မရှိခြင်းကနေ ရောဂါကုသမှုကိုထိခိုက်စေနိုင်ပြီး အရင်က ရောဂါခုခံအားရရှိထားတဲ့အတိုင်းအတာကြောင့် သူတိုရဲ့လေ့လာချက်တွေ မမျှမတဖော်ထုတ်မိတာမျိုးလည်းဖြစ်နိုင်တယ်လို့ သုတေသီတို့ကသတိပြုမိထားပါတယ်။

Source: Reuters.
#Yangon_Media_Group

#WorldEntertainment
Published 4 June 2022

ဂန်နမ်စတိုင်လ်သီချင်းဖြင့် ကမ္ဘာကျော်ခဲ့ပြီး ၁၀ နှစ်အကြာမှာ တောင်ကိုရီးယားရက်ပါအဆိုတော် PSY ဟာ သူ့ရဲ့အောင်မြင်မှုဆုလာဒ်ကို ဂုဏ်ယူစွာဖြင့် အပျော်ရွှင်ရဆုံးဘဝကိုခံစားလျက်ရှိပြီး နောက်ထပ်နာမည်ကြီးသီချင်းများ ဖန်တီးဖို့ဖိအားတွေအောက်ကနေ လွတ်မြောက်ခဲ့ပြီလို့ ဖွင့်ဟလာပါတယ်။

#Yangon_Media_Group

Published 4 June 2022

တရုတ်နိုင်ငံအနောက်ပိုင်း ကွေးကျိုး ပြည်နယ် ရုံးကျန်းစီရင်စုက ရထားဘူတာရုံမှာ ကျည်ဆံအမြန်ရထားတစ်စီး လမ်းချော်ရာ ရထားမောင်းသေဆုံးသွားပြီး အခြား(၈)ဦး ဒဏ်ရာရရှိသွားခဲ့ပါတယ်။

စနေနေ့ ဒေသစံတော်ချိန် မနက်၁၀နာရီခွဲမှာ ရထားလမ်းချော်မှုဖြစ်ခဲ့တာဖြစ်တယ်လို့ တရုတ်နိုင်ငံတော်ရထားအုပ်စုကုမ္ပဏီက သတင်းထုတ်ပြန်ပါတယ်။

ပြည်နယ်မြို့တော်ကွေးရန်းကနေထွက်ခွာပြီး  တောင်ပိုင်း ကွမ်ဒေါင်းပြည်နယ် ကွမ်ကျိုးမြို့ကို ဦးတည်မောင်းနှင်နေတဲ့ အဆိုပါ ကျည်ဆံရထား D2809ရဲ့ တွဲနှစ်တွဲဟာ  ရုံးကျန်းဘူတာရုံကို ရောက်ခါနီးမှာ ရွှံစေးတွေနှင့် ကျောက်ခဲတွေထိမှန်ပြီးနောက်  လမ်းချော်ခဲ့ရတာဖြစ်ပါတယ်။

ဒဏ်ရာရသူတွေထဲမှာ ရထားတွဲစောင့်တစ်ဦးနှင့် ခရီးသည်(၇)ဦးတို့ပါဝင်ပြီး သူတို့ကို ဒေသဆေးရုံမှာ ဆေးဝါးကုသမှုပေးနေပါတယ်။ ခရီးသည် ၁၃၆ ဦးကိုတော့ ကယ်ထုတ်လိုက်နိုင်တယ်လို့ ကုမ္ပဏီကပြောပါတယ်။

ပြီးခဲ့တဲ့ရက်တွေက အဲဒီဒေသမှာ မိုးသည်းထန်ခဲ့တာဖြစ်ပါတယ်။ ရထားလမ်းချော်မှုကိစ္စ စတင်စုံစမ်းစစ်ဆေးနေပြီလို့ ကုမ္ပဏီက ပြောပါတယ်။

Source CCTV+

Published 4 June 2022

စာရေးဆရာမ မာဂရက် အက်ဝုဒ်က သူမရဲ့ မကြာခဏအပိတ်ခံရတဲ့ ရှေ့ဖြစ်ဟော "The Handmaid's Tale” ဝတ္ထုစာအုပ်ကို မီးမလောင်စာအုပ်အဖြစ် ထုတ်ဝေခဲ့ပါတယ်။ အဲဒီစာအုပ်ကို နယူးယောက်စီးတီးရဲ့ ဆောက်သဗီး အကျိုးဆောင်လုပ်ငန်းမှာ ခင်းကျင်းပြသထားပါတယ်။ အဲဒီစာအုပ်ကို ဇွန်(၇)ရက်နေ့ကစပြီး ဒေါ်လာ ငါးသောင်းနှင့် တစ်သိန်းအကြား ကြမ်းခင်းဈေးနှင့် လေလံပွဲဖွင့်လှစ် ရောင်းချသွားမှာဖြစ်ပါတယ်။

Source AFP

#Health_Technology
Published 6 June 2022

အသက် ၂၀ အရွယ်အမျိုးသမီးတစ်ဦးမှာ သေးငယ်ပြီးပုံစံမမှန်တဲ့ညာဘက်နားရွက်ပါရှိနေပြီး သူ့ရဲ့ကိုယ်ပိုင်ဆဲလ်များဖြင့် 3D ပရင့်တာဖြင့် နားရွက်အစားထိုးခွဲစိတ်မှု ခံယူခဲ့ကြောင်း အဆိုပါနည်းပညာထုတ်လုပ်သူများက ကြာသပတေးနေ့က ပြောကြားလိုက်ပါတယ်။

ဒီခွဲစိတ်မှုဟာ အဆိုပါဆေးကုသမှုဆိုင်ရာနည်းပညာကို ပထမဆုံးအကြိမ်အောင်မြင်စွာစမ်းသပ်မှုကြီးရဲ့ တစ်စိတ်တစ်ပိုင်းဖြစ်ခဲ့ပြီး တစ်ရှူးခွဲစိတ်ခြင်းနည်းပညာအဆင့်မြင့်မားလာပုံကို ဖော်ပြနေကြောင်း ကျွမ်းကျင်သူများက သုံးသပ်ခဲ့ပါတယ်။

အမျိုးသမီးရဲ့ဘယ်ဘက်နားရွက်ပုံစံအတိအကျအတိုင်း ပရင့်ထုတ်ပြီး နားရွက်အသစ်ပုံစံပြုလုပ်ခဲ့ကြောင်း ကွင်းစ်အခြေစိုက် 3D Bio Therapeutics ဆဲလ်အသစ်ပွားခြင်းဆိုင်ရာဆေးပညာကုမ္ပဏီက ဆိုပါတယ်။

မတ်လကပြုလုပ်ခဲ့တဲ့ နားရွက်ခွဲစိတ်မှုဟာ အရိုးနုတစ်ရှူးတွေထွက်လာမှာဖြစ်ပြီး တကယ့်နားရွက်အတိုင်းခံစားမြင်တွေ့ရမှာဖြစ်ကြောင်း ကုမ္ပဏီကဆိုပါတယ်။

တာဝန်ရှိသူများက စမ်းသပ်မှုအတိုင်းအတာများကို ပြန်လည်သုံးသပ်ပြီး တင်းကြပ်တဲ့စံချိန်စံညွှန်းတွေ သတ်မှတ်သွားမှာဖြစ်ကာ လေ့လာလိုအပြီးမှ ဆေးဘက်ဆိုင်ရာဂျာနယ်မှာ အချက်အလက်တွေ ဖော်ပြသွားမှာဖြစ်ကြောင်း ကုမ္ပဏီဘက်က ပြောကြားခဲ့ပါတယ်။

လူနာ ၁၁ ယောက်မှာ လက်တွေ့စမ်းသပ်မှုများ ပြုလုပ်နေပြီး အစားထိုးခွဲစိတ်မှုက မအောင်မြင်တာမျိုးနဲ့ မမျှော်လင့်နိုင်တဲ့ ကျန်းမာရေးပြဿနာများတွေ့ရနိုင်ပါတယ်။

ဒါပေမဲ့ လူနာရှင်ကိုယ်တိုင်ရဲ့ဆဲလ်တွေကိုပဲ ယူသုံးတာကြောင့် ခန္ဓာကိုယ်ကလက်မခံနိုင်စရာတော့မရှိဘူးလို့ ဆရာဝန်များက ဆိုပါတယ်။

ဒါဟာ ကိုယ်တွင်းအင်္ဂါနဲ့တစ်ရှူးအစားထိုးခွဲစိတ်ခြင်း ၇ နှစ်အတွင်း 3D Bio ရဲ့ အောင်မြင်မှုတွေထဲက တစ်ခုဖြစ်ပါတယ်။

ဇန်နဝါရီလတုန်းက မယ်ရီလန်းမှခွဲစိတ်ဆရာဝန်တွေက နှလုံးရောဂါရှိနေတဲ့ အသက် ၅၇ နှစ်အရွယ် လူတစ်ယောက်ကို မျိုးရိုးဗီဇပြုပြင်ထားတဲ့ ဝက်နှလုံးဖြင့် အစားထိုးခွဲစိတ်ခဲ့ရာ အသက်ရှင် နေထိုင်ချိန်သက်တမ်း ၂ လဆွဲဆန့်ပေးနိုင်ခဲ့ပါတယ်။

အလှူရှင်တွေ လှူဒါန်းတဲ့အင်္ဂါများ အလေအလွင့်မဖြစ်ရဘဲ တာရှည်ခံနိုင်စေရန် သိပ္ပံပညာရှင်များက နည်းပညာများ တီထွင်နေကြပါတယ်။

3D ပုံစံနဲ့ ခြေလက်အစားထိုးခွဲစိတ်မှုများ ပြုလုပ်ဖူးပေမယ့် ပုံစံမမှန်တဲ့နားရွက်ကနေဆဲလ်ယူပြီးခွဲစိတ်တာမျိုးကတော့ ပထမဆုံးအကြိမ်ဖြစ်ပါတယ်။

ကျောရိုးဆစ်ကြားခံပစ္စည်း၊ နှာခေါင်း၊ ဒူးခေါင်းဆုံကြားခံပစ္စည်း၊ ပခုံးဆုံကြား ကြွက်သားအရွတ်တို့လို ခန္ဓာကိုယ်အခြားအစိတ်အပိုင်းတွေမှာလည်း ဒီနည်းပညာကိုအသုံးပြုနိုင်ပြီး အသည်း၊ ကျောက်ကပ်၊ ပန်ကရိယတို့လို ပိုမိုရှုပ်ထွေးခက်ခဲတဲ့ ကိုယ်တွင်းအင်္ဂါတွေမှာပါ အသုံးပြုနိုင်ပါတယ်။

နားရွက်အသစ်အစားထိုးခွဲစိတ်ခဲ့တဲ့လူနာက ပထမဆုံးအောင်မြင်စွာ ခွဲစိတ်ခဲ့သူတွေထဲကတစ်ဦးဖြစ်ပြီး ဒေါက်တာ'ဘွန်နေလာ'က ဦးဆောင်စမ်းသပ်မှု ပြုလုပ်ခဲ့တာဖြစ်ပါတယ်။

လူနာရှင်မိန်းကလေးက အရင်ကသူ့ရဲ့ညာဘက်နားရွက်ကို ဆံပင်ရှည်နဲ့ဖုံးအုပ်ထားရလေ့ရှိပြီး လူတွေသတိမထားမိအောင် နေထိုင်ခဲ့ရပေမယ့် အခုဆိုရင်တော့ ဆံပင်ကိုအနောက်ထိစည်းပြီးနေနိုင်ပြီလို့ ပြောပြသွားပါတယ်။

Source: New York Times
#Yangon_Media_Group

#DailyNews
Published - 4 June 2022

၁။ အဝေးပြေးခရီးသည်တင်ယာဉ်လိုင်းကြီးအချို့ ကိုယ်ပိုင်ဆီဆိုင်ရှိခြင်းကြောင့် အခက်အခဲမရှိသေးဟုဆို

၂။ ရန်ကုန်တိုင်းအပါအဝင် အခြားမြို့နယ် ၁၀ မြို့နယ်က စပါးစိုက်တောင်သူများအတွက် မျိုးစေ့နှင့် ဓာတ်မြေဩဇာများကို သက်သာသောနှုန်းဖြင့် ရောင်းချပေးမည်

၃။ နေ့စဉ်မိုးလေဝသသတင်း။

၄။ ဂန်နမ်စတိုင်လ်သီချင်းထွက်ရှိပြီး(၁၀)နှစ်အကြာ ဘဝမှာကျေနပ်စရာအကောင်းဆုံးအချိန်ကိုပိုင်ဆိုင်နေရပြီဟုဆိုလာသည့် တောင်ကိုရီးယားအဆိုတော် PSY ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group