#World_Health
Published 2 September 2022

ပုံမှန်ကိုယ်လက်လှုပ်ရှားမှုပြုလုပ်ခြင်းက ကျန်းမာရေးအတွက် အကျိုးကျေးဇူးများစွာရရှိစေပြီး ပိုမိုအသက်ရှည်စွာနေထိုင်နိုင်တဲ့ အကျိုးကျေးဇူးလည်း ပါဝင်ပါတယ်။

ဘယ်လိုလေ့ကျင့်ခန်းမျိုး၊ ဘယ်လောက်ကြာကြာ ပြုလုပ်ခြင်းမျိုးက အကောင်းဆုံးဖြစ်စေလဲဆိုတာကို လေ့လာသုံးသပ်နေဆဲဖြစ်ပါတယ်။

ကိုယ်ကာယလှုပ်ရှားမှုပဲဖြစ်ဖြစ် ကြံ့ခိုင်သန်စွမ်းမှုလေ့ကျင့်ခန်းပဲဖြစ်ဖြစ် အသက်ဆုံးပါးနိုင်ချေကို လျော့နည်းစေတယ်လို့ သုတေသီများတွေ့ရှိထားကာ ကိုယ်ကာယလေ့ကျင့်ခန်း တစ်ပတ်ကို ၁ နာရီမှ ၃ နာရီကြားနဲ့ ကြံ့ခိုင်သန်စွမ်းမှုလေ့ကျင့်ခန်း တစ်ပတ်ကို ၁ ကြိမ် ၂ ကြိမ်ပြုလုပ်ခြင်းဖြင့် အသက်အန္တရာယ် ပိုပြီးတော့တောင် နည်းပါးသွားပါသေးကြောင်း British Journal of Sports Medicine ဂျာနယ်မှာ ဖော်ပြထားပါတယ်။

အထိုင်များတဲ့ လူနေမှုပုံစံကနေ လေ့ကျင့်ခန်းပြုလုပ်ခြင်းက ဆေးလိပ်သောက်ရာကနေ ဆေးလိပ်ဖြတ်လိုက်တဲ့သူလိုပါပဲလို့ သိပ္ပံပညာရှင်'ကာဗာကိုးလ်မန်း'က ဖော်ပြခဲ့ပါတယ်။

လေ့ကျင့်ခန်းပြုလုပ်ခြင်းက သက်ရှည်ကျန်းမာဖို့အတွက် အရေးကြီးဆုံးလုပ်ဆောင်ချက်ဖြစ်ကြောင်း ဒီတွေ့ရှိချက်က သက်သေပါပဲ။

သုသေသနအတွက် ၁၉၉၇ ခုနှစ်မှ ၂၀၁၄ ခုနှစ်ကြား အမေရိကန်လူမျိုး ၄ သိန်းကျော်ကို စစ်တမ်းကောက်ယူခဲ့ပါတယ်။

လေ့ကျင့်ခန်းတွေကို ဘယ်လောက်ပြင်းထန်တဲ့အထိ ပြုလုပ်တယ်၊ တစ်ပတ်ကို ဘယ်နှကြိမ်မျှပြုလုပ်လဲဆိုတာတွေကို မေးမြန်းခဲ့ကြပါတယ်။

အခြားအချက်အလက်များနဲ့ နာတာရှည်ရောဂါအခြေအနေများပါ ထည့်တွက်ပြီးနောက် အနည်းငယ်ပြင်းထန်တဲ့ကိုယ်ကာယလေ့ကျင့်ခန်းကို တစ်ပတ်ကို ၁ နာရီမျှပြုလုပ်သူတွေဟာ သေဆုံးနိုင်ချေ ၁၅ ရာခိုင်နှုန်းနည်းပါးပြီး တစ်ပတ်ကို ၃ နာရီပြုလုပ်သူတွေက ၂၇ ရာခိုင်နှုန်း ပိုနည်းပါးခဲ့ပါတယ်။

ကြံ့ခိုင်သန်စွမ်းလေ့ကျင့်ခန်းများကို တစ်ပတ်ကို ၁ ကြိမ် ၂ ကြိမ်ခန့်ပြုလုပ်သူတွေက လုံးဝမလုပ်တဲ့သူတွေထက် သေဆုံးနိုင်ချေ ၄၀ ရာခိုင်နှုန်း ပိုနည်းခဲ့ပါတယ်။

ဒါဟာ ဆေးလိပ်မသောက်သူနဲ့ ဆေးလိပ်သောက်သူတို့ကြား ကွာခြားချက်နဲ့ ဆင်တူနေပါတယ်။

"ကြွက်သားတွေ ကျန်းမာသန်စွမ်းရင် ပိုပြီးတော့ အသက်ရှည်ကျန်းမာစွာ နေရပါလိမ့်မယ်" လို့ ဘေလာဆေးပညာကောလိပ်မှ ဒေါက်တာ'ဘရုစ်မိုစ်လီ'က ဆိုပါတယ်။

နေ့စဉ်လှုပ်ရှားလုပ်ကိုင်မှုတိုင်းအတွက် ကြွက်သားသန်စွမ်းမှုက အရေးပါ လှပါတယ်။

လူတစ်ယောက်က အသက် ၃၀ အရွယ်ခန့်ကစပြီး ကြွက်သားသန်စွမ်းမှုလျော့နည်းလာပေမယ့် ပုံမှန်လေ့ကျင့်ခန်းပြုလုပ်ခြင်းဖြင့် ကာကွယ်နိုင်သေးတာကြောင့် လေ့ကျင့်ခန်းစလုပ်ဖို့ နောက်ကျတယ်ဆိုတာမျိုး မရှိပါဘူး။

ဒါပေမဲ့ ထိခိုက်ဒဏ်ရာမဖြစ်စေရန်အတွက် ပုံမှန်လေးပြုလုပ်သွားဖို့တော့ လိုအပ်ပါတယ်။

"လူတွေကိုမေးကြည့်တဲ့အခါ အသက်ကြီးလာရင် မှီခိုမှု မရှိဘဲနဲ့ ကျန်းမာသန်စွမ်းတဲ့ဘဝကို လိုချင်ကြတာပါပဲ"လို့ ဒေါက်တာ'ကွန်စီလ်ဂျာ'က မှတ်ချက်ပြုခဲ့ပါတယ်။

Source: The Straits Times
#Yangon_Media_Group

#World_Art
Published 1 Sept 2022

အထည်ဒီဇိုင်နာ'ဘရစ်ဂျစ်ဆင်း'က အနီရောင်ပေါ်ပီဘိန်းပန်းဖောင်းကြွပုံပါတဲ့ အဝတ်စကြီးကို ဖြန့်ပြနေခဲ့ပါတယ်။

#Yangon_Media_Group

Published 1 Sept 2022

နက်ဖလစ်မှာ လူကြိုက်များနေတဲ့  အော်တဇင်ဖြစ်နေတဲ့ ရှေ့နေတစ်ဦးအကြောင်း ရိုက်ကူးထားတဲ့ ကေ-ဒရာမာစီးရီးကြောင့် တောင်ကိုးရီးယားမှာ ကိုယ့်ကိုကိုယ်ဆန်းစစ်သုံးသပ်မှုတွေဖြစ်လာနေကြပါတယ်။

ချစ်စဖွယ် အဲဒီ “ မတူထူးခြားတဲ့ရှေ့နေမလေးဝူး”(Extraordinary Attorney Woo)ဆိုတဲ့ ဒရာမားစီးရီးဟာ အာရုံကြော ကွဲလွဲမှုဖြစ်နေတဲ ရှေ့နေတစ်ဦးအကြောင်း ရိုက်ကူးထားပါတယ်။ ဒီစီးရီးဟာ နာမည်ကြီး စကွစ်ဂိမ်း စီးရီးပြီးလျှင် တစ်လအတွင်း လူကြည့်အများဆုံး အင်္ဂလိပ်ဘာသာစကားမဟုတ်တဲ့ စီရီးဖြစ်လာပါတယ်။

ကေပေါ့ အဖွဲ့ BTS တို့ကလည်း အဲဒီစီးရီးရဲ့ ပရိဿတ်တွေဖြစ်နေပြီး ဝူးနှင့် သူမရဲ့ အချစ်ဆုံးသူငယ်ချင်းနှစ်ဦးအကြား တွေဆုံနှုတ်ဆက်တဲ့ပုံစံကို သူတို့အဖွဲ့က ဗွီဒီယိုရိုက်ကူးတင်ဆက်ခဲ့ပြီး ပို့စ်တင်တာကြောင့်  ဆိုရှယ်မီဒီယာတစ်လွှား ကြည့်ရသူတွေ မျက်ရည်စို့ခဲ့ကြပါတယ်။

ဒါပေမယ့် အပိုင်း ၁၆ ပိုင်းပါတဲ့ အဲဒီစီးရီးထဲမှာ ဦးနှောက်စားစရာကောင်းလှတဲ့ ဥပဒေပြသနာတွေအပေါ် သူမအတွက် ထူးခြားကောင်းမွန်တဲ့ အဖြေတွေ ရှာဖို့ ဝိုင်းကူညီပေးနေတဲ့ ရှေ့နေပေါက်စကလေးတစ်ဦး၊ပြီးတော့ မကြာခဏဆိုသလိုပဲ သူမကို လူမှုအသိုင်းအဝန်းမှ ဖယ်ထုတ်ခံရသလိုဖြစ်ခဲ့ရတာတွေကိုလည်း ရိုက်ကူးတင်ဆက်ထားတဲ့အတွက်  အော်တဇင်နှင့် ပတ်သက်ပြီး တောင်ကိုးရီးယားမှာ အရေးကြီးတဲ့ ငြင်းခုံဆွေးနွေးမှုတွေလည်း ဖြစ်လာစေပါတယ်။

စီးရီးထဲမှာ ဝူယောင်ဝူးဟာ အိုင်ကျူ ၁၆၄ အဆင့်အထိရှိတဲ့ ဉာဏ်ရည်မြင့်မားသူကလေးဖြစ်ပါတယ်။ ဒါပေမယ့် တစ်ခါတစ်ခါ အဆက်အစပ်မရှိတဲ့ စကာလုံးတွေ စာကြောင်းတွေကို ထပ်ခါထပ်ခါရွတ်တတ်တဲ့ အက်ကိုလာလီယာလို့ခေါ်တဲ့ အော်တဇင်ရဲ့ လက္ခဏာတွေပြတတ်တာမျိုးတော့ရှိနေပါတယ်။

ဝူးအဖြစ်သရုပ်ဆောင်တဲ့ မင်းသမီး ပတ်အန်ဘင်ဟာ အသက် ၂၉နှစ်ရှိပါပြီ။ ဒီစရိုက်မျိုး သရုပ်ဆောင်တာကို လက်ခံဖို့အတွက် သူမအနေနှင့် အစပထမမှာ အတော်ကလေးချီတုံချတုံဖြစ်ခဲ့တယ်လို့ သူမကပြောပါတယ်။ သူမဟာ ဒီဇတ်လမ်းရဲ့ စွမ်းပကားက  တောင်ကိုးရီးယားနှင့် အခြားနေရာတွေက အော်တဇင်ဖြစ်နေတဲ့သူတွေအပေါ် ရိုက်ခတ်မှုရှိမှာကို တွေးမိလို့ ဖြစ်ပါတယ်။

“ ကျွန်မဟာ သရုပ်ဆောင်တစ်ဦးအနေနှင့် ကျင့်ဝတ်ပိုင်းဆိုင်ရာ တာဝန်ရှိတယ်လို့ ခံစားရပါတယ်” လို့ သူမက‌ အေအက်ဖ်ပီကို ပြောပါတယ်။

“ ဒီဇာတ်ကားက အော်တဇင်ဖြစ်နေတဲ့သူတွေနှင့် သူတို့မိသားစုတွေအပေါ် သေချာပေါက် ရိုက်ခတ်မှုရှိလိမ့်မယ်လို့ ကျွန်မသိခဲ့ တယ်” လို့ သူမကပြောပါတယ်။

“ ဒါ ပထမဆုံးအကြိမ် ကျွန်မဘာလုပ်ရမှန်း မသိဖြစ်ခဲ့ရတာပဲ။ ဇာတ်ညွှန်းကိုဖတ်ကြည့်တဲ့အခါ ကျွန်မဘယ်လိုသရုပ်ဆောင် ဖော်ကျူးရမလဲ ပေါ့” လို့ သူမက ဖြည့်စွက်ပြောကြားပါတယ်။

ဒါပေမယ့် တောင်ကိုးရီးယားမက အော်တဇင်ဖြစ်နေတဲ့သူတွေရဲ့ မိသားစုတွေကတော့ “ဒီဇာတ်လမ်းဟာ တကယ့်ကို  စိတ်ကူးယဉ်ပဲ ပြီးတော့ သူမသရုပ်ဆောင်တာ သဘာဝမကျဘူး” လို့ပြောနေကြပါတယ်။

လမ်းတောင်မလျှောက်နိုင်တဲ့ကလေးငယ်တစ်ဦးက စက်ဘီးစီးပြိုင်ပွဲမှာ ရွှေတံဆိပ်ရ သလိုမျိုးဖြစ်နေတယ်လို့လည်း အော်တဇင်ကလေးငယ်တစ်ဦးရဲ့ မိခင် လီဒွန်ဂျူးက ပြည်တွင်းရုပ်သံတစ်ခုကိုပြောပါတယ်။

ဒရာမာ အမြင့်ဆုံးဖြစ်ဖို့ ဝူးကို စိတ်ကူးယာဉ်ဇာတ်ကောင်အဖြစ် ဖန်တီးခဲ့တယ်ဆိုတာ သိပ်ရှင်းပါတယ်။ ဒါဟာ တောင်ကိုးရီးယားကသူတော်တော်များများ သဘောပေါက်ထားသလိုမဟုတ်တဲ့ အမှန်တရားပဲလို့ စိတ်ပညာရှင် ကင်အီ ဂျွန်းက ပြောပါတယ်။

အော်တဇင်ဖြစ်နေတဲ့သူတွေရဲ့ သုံးပုံတစ်ပုံဟာ သာမာန်ဉာဏ်ရည်ထက်မြင့်မားကြပြီး အော်တဇင်လက္ခဏာတွေ သိသိသာသာ ပြတာလည်းမရှိဘူး၊ သူတို့ အော်တဇင်ဖြစ်လို့ဖြစ်နေမှန်းတောင်မသိကြဘူး လို့လည်း သူမကဖြည့်စွက်ပြောပါတယ်။

Source AFP

#Autism

#Extraordinary_Attorney_Woo

#Netflix_most_popular_K_Drama

#DailyNews
Published _ 1 September 2022

၁။ မတ်ပဲ FAQ တစ်တန် ကျပ် ၁၉ သိန်းကျော်အထိ မြင့်တက်လာ

၂။ စားသောက်ဆိုင်လုပ်ငန်းများတွင် ကျွမ်းကျင်လုပ်သားရှားပါးမှုနှင့် အလုပ်လက်မဲ့ပြဿနာများ ဖြစ်လာနိုင်ဟုဆို

၃။ အာဆီယံနိုင်ငံ ပြည်ဝင်ခွင့်ဗီဇာကင်းလွတ်ခွင့်ပြုခြင်းသည် လာမည့်ခရီးသွားရာသီအတွက် အထောက်အကူပြုဟုဆို

၄။ လွန်ခဲ့သည့်ရာစုနှစ်(၄)ခုမှအဝတ်ဒီဇိုင်းပုံစံအား ပြန်လည်ဖန်တီးလျက်ရှိသည့် ပြင်သစ်အိန္ဒိယလူမျိုးဒီဇိုင်နာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

Published 1 Sept 2022

ထိုင်းနိုင်ငံရဲ့ YouTube ယူကျုနာမည်ကျော် အကမယ် နတ်တီဟာ နိုင်ငံခြားငွေကြေးလဲလှယ်မှု ရိုက်စားလုပ်ပြီး သူ့ရဲ့နောက်လိုက် ပရိဿတ် (ဖော်လိုဝါ)တွေဆီကဒေါ်လာသန်းပေါင်း များစွာလိမ်လည်သွားတဲ့အတွက် ရဲက သူ့ကိုအပူတပြင်းလိုက်လံရှာဖွေနေတယ်လို့ အာဏာပိုင်တွေက ဩဂုတ် ၃၁ရက်က ပြောပါတယ်။

လီယာ Leah နှင့် ဆုချာတာ Suchata ဆိုတဲ့အမည်တွေကိုပါသုံးတဲ့ အသက် ၂၉ နှစ်အရွယ်ရှိ နက်သာမွန် ခွန်ချက်ဟာ ယူကျုမှာ နောက်လိုက်ပရိဿတ် ရှစ်သိန်းခွဲနီးပါးရှိနေပါတယ်။

ရင်းနှီးမြှပ်နှံမှုရဲ့ ၃၅ ရာခိုင်နှုန်းပြန်ရမယ်ဆိုတဲ့ ကတိစကားကြောင့် အဲဒီပရိဿတ်တွေထဲက လူပေါင်း ၆၀၀၀ အထိဟာ သူတို့ရဲ့ ငွေတွေ ဒေါ်လာ ၅၅ သန်းအထိဆုံးရှုုံးခဲ့ကြပါတယ်။

လက်ရှိအထိ အလိမ်ခံရသူတွေအထဲက ၁၀၂ ဦးက ဘတ်ငွေ သန်း၃၀ (အမေရိကန်ဒေါ်လာ ၈၂၅,၀၀၀) အလိမ်ခံရမှုနှင့် အမှုဖွင့်တိုင်တန်းထားတယ်လို့ ထိုင်းနိုင်ငံ ဆိုက်ဘာမှုမခင်းစုံစမ်းစစ်ဆေးရေးဗျူရို ဒုတိယရဲမှူး ဝါတာနာ ကက်တမ်ပိုင် ကပြောပါတယ်။

နတ်တီးဟာ သူချမ်းသာကြွယ်ဝမှုတွေကို ဆိုရှယ်မီဒီယာပလက်ဖောင်းတွေမှ ကြေညာပြီး လူတွေက သူမဟာ ငွေကြေး အရောင်းအဝယ်လုပ်ပြီး ချမ်းသာလာတယ်လို့ ထင်မြင်လာအောင် လူတွေကို လှည့်ဖျားခဲ့တယ်လို့ ရဲတွေက စွပ်စွဲထားပါတယ်။

ဒီလိုရိုက်စားလုပ်တာဟာ ပွန်ဇီအကြံအစည်နှင့်ဆင်တူပေမယ့် ကွာခြားတာက သူမဟာ ပြည်သူ့ဆက်ဆံရေးနှင့် မျက်စေ့မှောက်သွားစေတဲ့ နည်းတွေသုံးခဲ့တာပဲဖြစ်တယ်လို့ ဝါတာနာကပြောပါတယ်။

“ ရှေ့ဆက်ပြီး တိုင်တန်းမယ့်သူတွေ ပိုများလာနိုင်တယ်” လို့လည်းသူကပြောပါတယ်။

သူမကို လိမ်လှည်မှု၊ကွန်ပျူတာရာဇဝတ်မှုနှင့် လှည့်ဖျားပြီးချေးငွေလက်ခံမှုတွေနှင့် တရားစွဲနိုင်ဖို့ ရဲတွေက အထောက်အထားတွေ စုဆောင်းနေပါတယ်။

ခံခဲ့ရသူတွေက ၂၀၂၁ ကတည်းက စတင်တိုင်တန်းခဲ့တာလို့လည်း သူကပြောပါတယ်။

ဩဂုတ်လ စောစောပိုင်းမှာ ဘန်ကောက်တရားရုံးတစ်ခုက သူမကိုဖမ်းဝရမ်းထုတ်ခဲ့ပါတယ်။

သူမဟာ ထိုင်းကနေ မလေးရှားကိုထွက်ပြေးသွားပြီလို့လည်း အချို့သတင်းတွေက ပြောနေပါတယ်၊ ဒါပေမယ့် လူဝင်မှုဆိုင်ရာ အချက်အလက်တွေအရ သူမဟာ ထိုင်းနိုင်ငံထဲမှာပဲ ရှိနေတုန်းဖြစ်တယ်လို့ ဝါတာနာကပြောပါတယ်။

သူမရဲ့ ယူကျနှင့်အင်စတာဂရ် အကောင့်တွေမှာ အကတွေ၊တေးဂီတဗွီဒီယိုတွေနှင့် ပြည့်နေပါတယ်။

မေ ၂၅ ရက်မှာ  အင်စတာဂရမ်ကနေ သူမနောက်ဆုံးတင်ခဲ့တဲ့ပို့စ်မှာတော့ သူမက တောင်းပန်ထားပြီး ပိုက်ဆံတွေပြန်ပေးပါ့မယ်လို့ ကတိပေးထားပါတယ်။

“ လူတော်တော်များများကို ဒုက္ခပေးခဲ့ရပြီး စိတ်ပျက်လက်ပျက်ဖြစ်စေခရတဲ့အတွက် ကျွန်မတောင်းပန်ပါတယ်” လို့ သူမက ရေးခဲ့ပါတယ်။

“ ကျွန်မရဲ့ ရင်ထဲ အသည်းထဲကနေ ဒီဖြစ်ရပ်အတွက် တောင်းပန်ပါတယ်” လို့ သူမကရေးပါတယ်။

Source AFP

#Nutty

#YouTube_Dancer_Nutty

#Nutty_Scam

#World_Climate
Published 1 September 2022

အမေရိကန်အနောက်ပိုင်းမှာ အပူလှိုင်းဖြတ်နေတာကြောင့် ပြည်နယ်သားတွေကို လျှပ်စစ်ဓာတ်အားလျှော့သုံးဖို့ ကယ်လီဖိုးနီးယားအုပ်ချုပ်ရေးမှူးက ဗုဒ္ဓဟူးနေ့မှာ အရေးပေါ်ကြေညာချက် ထုတ်ပြန်လိုက်ပြီး အခြေအနေပိုဆိုးလာပါက ဓာတ်အားပြတ်တောက်မှုများ ရှိလာနိုင်ကြောင်း အရာရှိများက သတိပေးထားပါတယ်။

အုပ်ချုပ်ရေးမှူး'ဂေဗင်နယူဆမ်'ကြေညာပြီးနောက် ကယ်လီဖိုးနီးယားအော်ပရေတာတစ်ခုကနေ ကြာသပတေးနေ့အထိ ဆက်လက်ထိန်းသိမ်းသုံးစွဲဖို့ ညွှန်ကြားထားပါတယ်။

အပူလှိုင်းက ကယ်လီဖိုးနီးယားတောင်ပိုင်းနဲ့ စင်ထရယ်ဗယ်လီအထိ ဆက်လက်ဖြတ်သန်းနေကာ အပူချိန် ၃ ဆလောက်မြင့်တက်နေပါတယ်။

ကယ်လီဖိုးနီးယားမြောက်ပိုင်းအထိ ရောက်ရှိလာနိုင်ကာ နောက်အပတ်အထိ အပူလှိုင်းလွှမ်းခြုံလာနိုင်ပြီး အချို့နေရာတွေမှာ စံချိန်တင်အပူချိန်ရောက်ရှိနိုင်ပါတယ်။

အပူချိန်က ပုံမှန်ထက် ၁၀ ကနေ ၂၀ ဒီဂရီလောက်အထိ မြင့်တက်လာတာကြောင့် လေအေးပေးစက်များ ဖွင့်ထားကြမှာဖြစ်ပြီး လျှပ်စစ်ဓာတ်အားသုံးစွဲမှု အလွန်များလာနိုင်ပါတယ်။

'နယူဆမ်'က ဒီအချိန်မှာ စွမ်းအင်ပိုမိုတိုးမြှင့်ထုတ်လုပ်ရန်နဲ့ လေထုညစ်ညမ်းမှုမူဝါဒများကို ဖြေလျှော့ထားရန် ကြေညာလိုက်ပါတယ်။

"ကျွန်တော်တို့က သဘာဝပတ်ဝန်းကျင်ကို အံတုဖို့ကြိုးစားကြပေမယ့် မယှဉ်နိုင်ခဲ့ပါဘူး၊ တကယ်တမ်းတော့ အပူလွန်ကဲခြင်း၊ မိုးခေါင်ရေရှားခြင်း၊ ရေကြီးခြင်းစတဲ့ ပြဿနာတွေအမြဲကြုံတွေ့နေရပါတယ်" လို့ ပြောကြားခဲ့ပါတယ်။

အစောပိုင်းရက်တုန်းက အရေးပေါ်ကြေညာဖို့ မလိုအပ်သေးပေမယ့် ရုတ်တရက်ကြီး အပူချိန်အလွန်မြင့်တက်လာတာဖြစ်ပါတယ်။

ပစိဖိတ်အနောက်မြောက်မှ ဟိုက်ဒရိုစွမ်းအင်တင်သွင်းမှုနဲ့ အနောက်တောင်ကန္တာရမှ စွမ်းအင်တွေက ရာသီဥတုပူလာတဲ့အချိန်မှာ မလုံလောက်တော့ပါဘူး။

ဓာတ်အားပြတ်တောက်နိုင်ပေမယ့်လည်း လူတွေက သုံးစွဲမှုလျှော့ချရင်တော့ မဖြစ်လာနိုင်ပါဘူးလို့ 'အယ်လီယော့မိန်ဇာ'က ပြောပြပါတယ်။

လွန်ခဲ့တဲ့ ၂ နှစ်က ဓာတ်အားပြတ်တောက်ပြီးနောက်ပိုင်း ဓာတ်အားထောက်ပံ့ရန် စီမံကိန်း ၁၆၀ ကျော်နဲ့ ၄ ထောင်မက်ဂါဝပ်သိုလှောင်ထားပေမယ့် မိုးခေါင်ရေရှားမှုဒဏ်ကြောင့် ပြည်တွင်းဟိုက်ဒရိုစွမ်းအင်ထုတ်လုပ်မှု သိသိသာသာလျော့ကျနေပါတယ်။

ဓာတ်အားလိုအပ်ချက်အတွက် ဒီဇယ်စက်များမောင်းတဲ့အခါ လေထုညစ်ညမ်းနိုင်ပေမယ့် လျှပ်စစ်ဓာတ်အားရရှိဖိုက ပိုပြီးအရေးကြီးကြောင်း စွမ်းအင်အကြံပေးအရာရှိ'ကယ်ရင်ဒူးဂလပ်စ်'က ပြောပြပါတယ်။

အအေးပေးစနစ်အသုံးပြုနေတဲ့စင်တာများ ဖွင့်ခိုင်းထားပြီး ပြည်သူတွေအနေနဲ့ စာကြည့်တိုက်တို့ မီနီမားကတ်တို့လိုနေရာတွေမှာ သက်တောင့်သက်သာဖြစ်အောင်နေထိုင်ရန် အရာရှိများက အကြံပြုထားပါတယ်။

လုပ်အားပေးများက ရေခဲရေဗူးများကို လှည်းနဲ့တင်ပြီး လိုက်ဝေနေတာကို မြင်တွေ့ကြရပါတယ်။

နေရာဒေသများအလိုက် မီးသတ်သမားများကိုလည်း အဆင်သင့်နေရာချထားဖို့ ကယ်လီဖိုးနီးယားတောတောင်နဲ့ မီးဘေးကာကွယ်ရေးဌာနက စီစဉ်နေပါတယ်။

တနင်္လာနေ့က ကယ်လီဖိုးနီးယားမှာ ဓာတ်အားသုံးစွဲမှု ၄၈,၀၀၀ မက်ဂါဝပ်အထိ ရောက်ရှိသွားခဲ့ကာ ယခုနှစ်အတွင်း အများဆုံးဖြစ်သွားခဲ့ပြီး ဗုဒ္ဓဟူးနေ့မှာတော့ ဒီထက်ပိုများသွားခဲ့ပါတယ်။

မိုးလေဝသဌာနများက အပူချိန် ၃ ဆတက်လာနိုင်ကာ ညဘက်တွေမှာ အနည်းငယ်လျော့ကျနိုင်ပြီးတော့ အနောက်နိုင်ငံနေရာအများအပြားမှာ တောမီးလောင်ကျွမ်းမှုဖြစ်လာနိုင်ကြောင်း သတိပေးထားပါတယ်။

"ဒီတစ်ပတ်ကတော့ အမေရိကန်အနောက်ပိုင်းမှာ အပူလှိင်းက စံချိန်တင်ဖြတ်သန်းနေဦးမှာဖြစ်ပါတယ်" လို့ အမျိုးသားမိုးလေဝသဌာနက ကြေညာခဲ့ပါတယ်။

Source: AP News
#Yangon_Media_Group