#World_News
Published 25 October 2023

ဟားမတ်စ်စစ်သွေးကြွတွေက အရပ်သားတွေကို လူသားဒိုင်းအဖြစ် အသုံးချနေတဲ့ ဂါဇာမြို့မှ လူနေထူထပ်တဲ့ ဒေသတွေကို အစ္စရေးလ်တပ်များ ဝင်ရောက်တိုက်ခိုက်ရန် အလားအလာ ရှိနေပြီး ဒါဟာ ယခင်က ဆီးရီးယားနဲ့ အီရတ်တို့မှာ အမေရိကန်ဦးဆောင်တဲ့ ပူးပေါင်းတပ်ဖွဲ့တွေက အစ္စလာမ်အကြမ်းဖက်အဖွဲ့နဲ့ အသေအကြေ တိုက်ခိုက်ခဲ့ကြတာကို ပြန်လည်အမှတ်ရစေပါတယ်။

မိုဆူလ်နဲ့ ရက်ကာတို့မှာ သေနတ်ပစ်ခတ်တာတွေ လေကြောင်းတိုက်ခိုက်မှုတွေကြောင့် အရပ်သားထောင်နဲ့ချီ သေဆုံးခဲ့တာကို အစ္စရေးလ်အနေနဲ့ သင်ခန်းစာယူရမယ်လို့ အမေရိကန်ကာကွယ်ရေးဝန်ကြီး လွိုက်အော်စတင်နဲ့ စစ်ခေါင်းဆောင်များက သတိပေးလိုက်ပါတယ်။

အစ္စရေးလ်တို့နဲ့ ပြောဆိုရာမှာ အရပ်သားထိခိုက်မှု အနည်းဆုံးဖြစ်ဖို့၊ ဘေးကင်းရေး အတိုင်းအတာများ သေချာဆောင်ရွက်ဖို့ အရေးကြီးကြောင်း အလေးပေးပြောပြခဲ့တယ်လို့ ပင်တဂွန်မှ ပြောရေးဆိုခွင့်ရှိသူ ဗိုလ်မှူးချုပ် ပတ်ရိုင်ဒါက အင်္ဂါနေ့မှာ မိန့်ကြားလိုက်ပါတယ်။

၂၀၁၆ အောက်တိုဘာမှ အစ္စလာမ်အကြမ်းဖက်အဖွဲ့ ကျဆုံးရာ ၂၀၁၇ ဇူလိုင်လအထိ မိုဆူလ်ကို အစ္စလာမ်သူပုန်များထံမှ လွတ်မြောက်အောင် ဝိုင်းရံတိုက်ခိုက်ခဲ့ရာမှာ အနည်းဆုံး လူ ၁ သောင်းသေဆုံးကာ အရပ်သား ၃,၂၀၀ ခန့်ပါဝင်ခဲ့တယ်လို့ AP သတင်းဌာန စုံစမ်းရေးမှ သိရှိရပါတယ်။

စစ်သွေးကြွများက ထွက်ပြေးရန်ကြိုးပမ်းစဉ်မှာ အရပ်သားဓားစာခံတွေကို ဖမ်းဆီး သတ်ဖြတ်သွားခဲ့ပြီး လူသားဒိုင်းအဖြစ် အသုံးချသွားပါတယ်။

အရပ်သားတွေကို အဝေးသို့ ထွက်ပြေးဖို့ သတိပေးထားစဉ် စစ်ဘက်ဆိုင်ရာ လုပ်ဆောင်ချက်များ ရပ်ဆိုင်းထားဖို့နဲ့ လူသားချင်းစာနာမှုစင်္ကြံများ ချမှတ်ဆောင်ရွက်သွားဖို့ အရေးပါကြောင်းကို ပူးတွဲစစ်ဦးစီးချုပ်ဥက္ကဌ၊ အမေရိကန် ဗဟိုစစ်ကွပ်ကဲရေးအကြီးအကဲ၊ အကြီးတန်း ကွန်မန်ဒါများက သိရှိထားကြကာ အရပ်သားကာကွယ်ရေး၊ စစ်သွေးကြွများမှ ပြုလုပ်ထားနိုင်တဲ့ ထောင်ချောက်များအကြောင်း အကြံပြုကြကာ ကျောင်းတွေ၊ ဗလီတွေ၊ နေအိမ်တွေမှာ ပုန်းခိုနေတဲ့ စစ်သွေးကြွတွေကို နှိမ်နင်းရမှာဖြစ်တယ်လို့ ဆိုပါတယ်။

အစ္စလာမ်အကြမ်းဖက်အဖွဲ့ကို တိုက်ခိုက်ခဲ့တဲ့ အထူးတပ်ဖွဲ့မှာ ပါဝင်ခဲ့တဲ့ မရင်းတပ် ဒုတိယဗိုလ်ချုပ်ကြီး ဂျိမ်းစ်ဂလင်း အပါအဝင် စစ်ဘက်ဆိုင်ရာ အကြံပေးအဖွဲ့ကို အစ္စရေးလ်သို့ စေလွှတ်လိုက်ပါတယ်။

လူနေအရပ်တွေမှာ တိုက်ခိုက်တာနဲ့  ပတ်သက်လာရင် အဆိုပါအရာရှိတွေက အတွေ့အကြုံရှိထားပြီး အစ္စရေးလ်ကာကွယ်ရေးတပ်တွေနဲ့ ဆွေးနွေးသွားကြမှာ ဖြစ်ပါတယ်။

တဲလ်အေဗစ်မှာ အစ္စရေးလ်ခေါင်းဆောင်များနဲ့ လွိုက်အော်စတင် တွေ့ဆုံရာမှာ အစ္စလာမ်အကြမ်းဖက်တွေကို နှိမ်နင်းခဲ့စဉ် အမေရိကန် ဗဟိုစစ်ကွပ်ကဲရေးကို ဦးဆောင်ခဲ့တဲ့ အတွေ့အကြုံတွေကို ပြန်လည်မျှဝေခဲ့ကာ တစ်ကမ္ဘာလုံးက စောင့်ကြည့်နေတယ်ဆိုတဲ့ အချက်ကိုလည်း သိရှိထားဖို့ ပြောကြားသွားပါတယ်။

ဂါဇာသို့ ဝင်ရောက်တိုက်ခိုက်တဲ့အခါ အရပ်သားတွေရဲ့ ဘေးကင်းမှုကိုလည်း ထည့်သွင်းစဉ်းစားရမယ်လို့ သတိပေးလိုက်ပါတယ်။

အရပ်သားများ ထိခိုက်သေဆုံးမှု မဖြစ်အောင် အစီအစဉ်တွေ၊ လေ့ကျင့်မှုတွေ၊ ပစ်မှတ်တွေ၊ လက်နက်အသုံးပြုခြင်းတွေကို ထိန်းညှိသွားဖို့ကို အလေးထားရမှာဖြစ်ပါတယ်။

ဒီစစ်ဆင်ရေးကို ဘယ်လိုပုံဖော်သွားမလဲဆိုတာ တကယ်အရေးပါကြောင်း၊ ဟားမတ်စ်တွေရဲ့ လက်ထဲမှာရှိနေတဲ့ အပြစ်မဲ့ ပါလက်စ်တိုင်းပြည်သူတွေရဲ့ အရေးကို စဉ်းစားပြီး အကျိုးရှိမယ့်လုပ်ရပ် လုပ်နိုင်ဖို့လိုအပ်ကြောင်း အငြိမ်းစားစစ်တပ်ဗိုလ်ချုပ်ကြီး ဂျိုဆပ်ဗိုတယ်က ပြောပြခဲ့ပါတယ်။

ဒါ့အပြင် ယခုစစ်သွေးကြွတွေဟာ အီရန်ကထောက်ပံ့ထားတဲ့ လက်နက်တွေနဲ့ ပိုမိုအဆင့်မြင့်နေပြီး ဂါဇာမြေအောက်က လှိုဏ်ခေါင်းတွေက ဆီးရီးယားတုန်းက လှိုဏ်ခေါင်းတွေထက် ပိုမိုရှည်လျားဖြစ်ထွန်းနေတယ်လို့ ဆိုပါတယ်။

ယခင်က ရင်ဆိုင်ခဲ့တဲ့ ISIS တွေထက် ယခုဟားမတ်စ်စစ်သွေးကြွေတွေက နောက်တစ်ဆင့်မြင့်လာတဲ့ လူရမ်းကားတွေဖြစ်နေတယ်လို့ ခံစားရကြောင်း အော်စတင်က ဆိုပါတယ်။

#World_News #အမေရိကန် #အီရတ် #ဆီးရီးယား #Source: AP News

#World_Health
Published 25 October 2023

ထိုင်ခြင်း၊ မတ်တပ်ရပ်ခြင်းနဲ့ အခြားလှုပ်ရှားမှုများ ပြုလုပ်စဥ် ကျောရိုး၊ အဆစ်အမြစ်၊ ကြွက်သား စတဲ့ အစိတ်အပိုင်းများ နေရာတကျ ရှိတာနဲ့ပတ်သက်ပြီး ကိုယ်နေဟန်ထားလို့ ခေါ်ကြပါတယ်။

ခန္ဓာကိုယ် ကိုယ်နေဟန်ထား မှန်ကန်အောင် နေခြင်းဖြင့် ကြွက်သား၊ အရိုး၊ အရွတ်တွေအပေါ် ဖိအားသက်ရောက်မှု လျော့နည်းစေကာ ထိခိုက်ဒဏ်ရာရခြင်းမှ ကာကွယ်ပေးပါတယ်။

ကိုယ်နေဟန်ထား မှန်ကန်စွာနေထိုင်ခြင်းဖြင့် ရရှိလာတဲ့ ကျန်းမာရေး အကျိုးကျေးဇူးတွေကတော့..

 
(၁) ကျောရိုးမကြီး နေရာတကျရှိစေကာ ခါးကိုင်းခြင်း ခါးစောင်းခြင်းတို့ ဖြစ်နိုင်ချေ လျော့နည်းစေပါတယ်။

(၂) အဆုတ်ကို အပြည့်အဝ ချဲ့စေနိုင်တာကြောင့် အောက်ဆီဂျင်ပြည့်ဝစေပြီး အသက်ရှူခြင်းကို အထောက်အကူ ဖြစ်စေပါတယ်။

(၃) ကျောရိုးမရဲ့ သဘာဝပုံစံကို ထောက်ပံ့ပေးကာ ကျောနဲ့ လည်ပင်းကြွက်သားများအပေါ် ဖိအားလျော့ပါးစေပါတယ်။

(၄) သွေးလည်ပတ်မှုကို ကောင်းမွန်စေပြီး အောက်ဆီဂျင် ကောင်းစွာရရှိစေတာကြောင့် စွမ်းအင်ကိုမြှင့်တင်ပေးပါတယ်။

(၅) အစာခြေခြင်းကို အထောက်အကူ ဖြစ်စေပြီး အက်ဆစ်လျှံတက်ခြင်း ဝမ်းပိတ်ခြင်းတို့ကို ကာကွယ်ပေးပါတယ်။

(၆) ခံစားချက်နဲ့ စိတ်အခြေအနေကို ကောင်းမွန်စေကာ နွမ်းနယ်ခြင်း၊ ဖိစီးခြင်း၊ စိတ်ဓာတ်ကျခြင်းတို့ကို သက်သာစေပါတယ်။

(၇) ဦးနှောက်သို့ သွေးလည်ပတ်မှု ကောင်းစေတာကြောင့် ဦးနှောက်လုပ်ဆောင်ချက်ကို မြှင့်တင်ပေးကာ အာရုံစူးစိုက်မှု ကောင်းစေပါတယ်။

(၈) ကြွက်သားများ ထိခိုက်ခြင်းမှ ကာကွယ်ပေးပြီး ကြွက်သားခွန်အားနဲ့ ကျုံ့နိုင်ဆန့်နိုင်စွမ်းကို ကာကွယ်ပေးပါတယ်။

(၉) ခန္ဓာကိုယ်အနှံ့ သွေးစီးဆင်းမှုကို ကောင်းမွန်စေကာ အာဟာရဓာတ်များ ပေးပို့ခြင်း အညစ်အကြေး ဖယ်ရှားခြင်းတို့ ပြုလုပ်ပေးပြီး နှလုံးသွေးကြော ကျန်းမာရေးကို ကောင်းမွန်စေပါတယ်။

(၁၀) ကြွက်သားအရိုးငြမ်း ပြဿနာများ ဖြစ်ပေါ်မလာအောင် ကာကွယ်ပေးပါတယ်။

 
ကိုယ်နေဟန်ထား မှန်ကန်အောင် နေထိုင်နိုင်မယ့် နည်းလမ်းများကတော့..

(၁) ပခုံးကိုမတ်အောင်ထားပြီး စိတ်လျော့ထားပါ။ မျက်နှာကို ရှေ့သို့မူကာ ကျောရိုးနဲ့ တည့်အောင်ထားပါ။

(၂) ကျောကိုမတ်အောင်ထိုင်ပါ။ ကျောရိုးကို ထောက်ပံ့နိုင်အောင် ခုံနဲ့ထိုင်ပါ။ ခြေဖဝါးကို အောက်ခြေနဲ့ ကပ်နေအောင်ထားပါ။

(၃) ရှေ့သို့ စောင်းနေခြင်း၊ ခွေနေခြင်းမျိုး မဖြစ်စေဘဲ အစိတ်အပိုင်းအားလုံး မျှနေအောင်ထားပါ။

(၄) အချိန်ကြာမြင့်စွာ ထိုင်နေခြင်း၊ ရပ်နေခြင်း မပြုပါနှင့်။ အနားယူပြီး အကြောလျှော့ခြင်းမျိုး ပြုလုပ်ပါ။

(၅) လက်ကိုင်ဖုန်း၊ ကွန်ပျူတာတို့ကို ငုံ့မကြည့်ဘဲနဲ့ မျက်လုံးနဲ့ တစ်တန်းတည်းဖြစ်အောင်ထားပါ။

#World_Health #ကိုယ်နေဟန်ထား #ကျန်းမာရေးအကျိုးကျေးဇူးများ #Source: DoctorNDTV

#World_Health
Published 25 October 2023

သွေးလွန်တုပ်ကွေးရောဂါကို တိုက်ဖျက်ဖို့ ကြိုးပမ်းရာမှာ Johnson & Johnson က အောင်မြင်မှုတစ်ခု ရလာပြီလို့ ဆိုရမှာဖြစ်ပြီး ယင်းတို့စမ်းသပ်ထုတ်လုပ်နေတဲ့ ဆေးဟာ လူသားစမ်းသပ်မှုလေးတစ်ခုမှာ စိတ်ချရတဲ့ရလဒ် ထွက်ပေါ်လာခဲ့ပါတယ်။

ထိုဆေးဟာ သွေးလွန်တုပ်ကွေး ဗိုင်းရပ်စ်ကို ရှင်းလင်းနိုင်တဲ့ ပထမဆုံးဆေးဖြစ်လာပြီး လူနာအများအပြားမှာ ဗိုင်းရပ်စ်ပုံစံတစ်မျိုးကို ကာကွယ်ပေးနိုင်ခဲ့ပါတယ်။

သွေးလွန်တုပ်ကွေးရောဂါဟာ လက္ခဏာမပြတတ်ပေမယ့် အဆစ်အမြစ်နာခြင်း၊ ကြွက်တက်ခြင်းတို့ ဖြစ်နိုင်ကာ နှစ်စဥ်လူပေါင်း သန်းနဲ့ချီပြီး ဖြစ်ပွားတတ်ပါတယ်။

လက်ရှိမှာ ကုသနည်းလမ်း တိတိကျကျ မရှိသေးတာကြောင့် ယခုဆေးဝါးက အဓိကခြေလှမ်းကြီးတစ်ရပ် ဖြစ်လာနိုင်ပါတယ်။

စမ်းသပ်ခံသူ ၁၀ ဦးဖြင့် ပြုလုပ်ရာမှာ သွေးလွန်တုပ်ကွေး ဗိုင်းရပ်စ်တစ်မျိုး မထည့်သွင်းခင် အဆိုပါဆေးကို ၅ ရက်တိုင်အောင် ဆေးပမာဏများများ သုံးစွဲစေခဲ့ပြီး ဒီနောက် ၂၁ ရက်ဆက်တိုက် သောက်သုံးစေခဲ့ပါတယ်။

ထိုအခါမှာ လူနာ ၆ ဦးဟာ ရောဂါပိုးထိပြီးနောက် သွေးလွန်တုပ်ကွေး လက္ခဏာမတွေ့ရသလို ၈၅ ရက်ကြာတဲ့အထိ စောင့်ကြည့်ရာမှာ ကိုယ်ခံအားတုန့်ပြန်တာမျိုး မတွေ့ခဲ့ရပါဘူး။

ထိုဆေးဟာ ဗိုင်းရပ်စ်မှပရိုတိန်း ၂ မျိုးကိုပိတ်ပင်လိုက်ကာ ဗိုင်းရပ်စ်မပွားအောင် ထိန်းချုပ်လိုက်ပါတယ်။

ဒုတိယအဆင့် စမ်းသပ်ချက်အနေဖြင့် ရောဂါဖြစ်ပွားလေ့ရှိတဲ့ နေရာတွေမှ တုပ်ကွေးဗိုင်းရပ်စ် ၄ မျိုးကို ကာကွယ်နိုင်ရန် ရည်မှန်းထားပြီး နောက်တစ်ဆင့်ကတော့ ရောဂါကုသရေး ဖြစ်ပါတယ်။

အဓိကစိန်ခေါ်မှုကတော့ ရောဂါအဖြစ်အများဆုံးဖြစ်တဲ့ ဝင်ငွေနိမ့်ပါးတဲ့ နိုင်ငံတွေနဲ့ အလယ်အလတ်နိုင်ငံတွေမှာ ဆေးရရှိဖို့ပဲ ဖြစ်ပါတယ်။

Johnson & Johnson ရဲ့ Janssen ဌာနခွဲမှ မာနစ်ဗန်လော့ခ်က ဒီအခက်အခဲကို သိရှိထားပြီးဖြစ်ပြီး ဒီအတွက် လုပ်ဆောင်နေကြောင်း ပြောပြသွားပါတယ်။

#World_Health #သွေးလွန်တုပ်ကွေးရောဂါ #ပထမဆုံးဆေးတောင့် #ပထမအဆင့်စမ်းသပ်အောင်မြင် #Source: India Today

တရုတ်အနောက်မြောက်ဘက် ရှန်ရှီပြည်နယ် ရှီအန်မြို့မှာ ပေါက်ကွဲမှုဒဏ်အမျိုးမျိုးကို ခံနိုင်ရည်ရှိအောင် ဖန်တီးထားတဲ့ ပန်ဂူနံပါတ် ၁ စက်ရုပ်အသစ်ကို ဗုဒ္ဓဟူးနေ့မှာ ထုတ်ဖော်ပြသ လိုက်ပါတယ်။

#Asia_Technology
Published_ 24 October 2023
#ပန်ဂူနံပါတ်(၁)စက်ရုပ် #တရုတ်ထုတ်ဖော်ပြသ

#Daily_News
Published_ 24 October 2023

၁။ ဆင်ကြီးမိုမို အသက်(၇၀)ပြည့်မွေးနေ့ ရန်ကုန်တိရစ္ဆာန်ဥယျာဉ်၌ (၃)ရက်တိုင်တိုင် ကျင်းပမည်

၂။ သီတင်းကျွတ်ကာလ နီးလာပေမယ့် ရန်ကုန်သစ်သီးဈေးကွက် အရောင်းဝယ်အေးနေသေး

၃။ ကားဝယ်ရောင်းများလက်ထဲ‌မော်ဒယ်မြင့်ကားများ ဆက်လက်ပိတ်မိနေပြီး မော်ဒယ်နိမ့်ကားများအနည်းငယ်အဝယ်လိုက်၍ ဈေးနှုန်းများတက်ရိပ်ပြလာ

၄။ ပေါက်ကွဲမှုများကို ခံနိုင်ရည်ရှိသည့် ပန်ဂူနံပါတ်(၁)စက်ရုပ်အား တရုတ်ထုတ်ဖော်ပြသ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG

#World_News
Published 24 October 2023
အစ္စရေးလ်တို့က ပါလက်စ်တိုင်း စစ်သွေးကြွ ဟားမတ်စ်တို့ကို အညှာအတာမရှိ တိုက်ခိုက်ပြီး ချေမှုန်းပစ်ရန် ပြင်ဆင်နေကြောင်း ပြောကြားလိုက်ကာ အမေရိကန်သမ္မတဟောင်း ဘာရက်အိုဘားမားကတော့ လူ့အသက်တွေကို ပဓာနမထားဘဲ အစ္စရေးလ်ဘက်မှ စစ်ရေးဗျူဟာများ ဆောင်ရွက်နေမယ်ဆိုရင် နောက်ဆုံးမှာ မျှော်မှန်းထားတာနဲ့ ဆန့်ကျင်ဘက်ဖြစ်နေလိမ့်မယ်လို့ သတိပေးလိုက်ပါတယ်။

အောက်တိုဘာ ၇ ရက်နေ့ အစ္စရေးလ်တောင်ပိုင်းကို ဟားမတ်စ်တို့ ဝင်ရောက်တိုက်ခိုက်ပြီး နောက်ပိုင်း အစ္စရေးလ်ဘက်က လေကြောင်းကနေ တုန့်ပြန်တိုက်ခိုက်လာတာ ၂ ပတ်ကြာမြင့်လာပြီဖြစ်ရာ ဂါဇာမှာ သေဆုံးသူဦးရေ ၅,၀၀၀ ရှိလာပြီဖြစ်တယ်လို့ ဂါဇာကျန်းမာရေးဝန်ကြီးဌာနက ဆိုပါတယ်။

တနင်္လာနေ့မှာ အစ္စရေးလ်တို့က ဂါဇာရှိပစ်မှတ်ပေါင်း ရာဂဏန်းခန့်ကို လေကြောင်းမှ တိုက်ခိုက်ခဲ့ပြီး စစ်သားများကတော့ ဝိုင်းရံထားတဲ့ ပါလက်စ်တိုင်းကမ်းမြောင်ကို ဝင်ရောက်စီးနင်းကာ ဟားမတ်စ်စစ်သွေးကြွများကို တိုက်ခိုက်ခဲ့ပါတယ်။

ဟားမတ်စ်တို့က ဖမ်းဆီးသွားတဲ့ ဓားစာခံ ၂၀၀ ကျော်ထဲမှ အစ္စရေးလ်အမျိုးသမီး ၂ ဦးကို တနင်္လာနေ့က လွှတ်ပေးခဲ့ပြီး ဒါဟာ လွှတ်ပေးခဲ့တဲ့ ဓားစာခံတွေထဲမှာ တတိယမြောက်နဲ့ စတုတ္ထမြောက် ဖြစ်လာပါတယ်။

အစ္စရေးလ်ဟာ လူဦးရေသိပ်သည်းတဲ့ ဂါဇာကမ်းမြောင်ကို တိုက်ခိုက်ဖို့ နှောင့်နှေးနေမှာ မဟုတ်ဘဲ မြေပြင်တိုက်ခိုက်မှုကြီး ပြုလုပ်ရန် သေချာပြင်ဆင်ထားတယ်လို့လည်း သဘောမြင်တွေ့နေရပါတယ်။

အစ္စရေးလ်အနေနဲ့ ကိုယ့်တိုင်းပြည်ကို ကာကွယ်ခွင့်ရှိတယ်လို့ အများမြင်ကွင်းမှာ အမေရိကန်က ပြောကြားထားပေမယ့် အိမ်ဖြူတော်၊ ပင်တဂွန်၊ နိုင်ငံခြားရေးဝန်ကြီးဌာနတို့ကတော့ အစ္စရေးလ်တို့နဲ့ သီးသန့်ပြောဆိုရာမှာ သတိပေးပြောကြားခဲ့တယ်လို့ နီးစပ်တဲ့ သတင်းရင်းမြစ် ၂ ခုက ဆိုပါတယ်။

အမေရိကန်ရဲ့ အဓိကဦးစားပေးက ဖမ်းဆီးခံထားရတဲ့ ဓားစာခံတွေ ပြန်လွှတ်ပေးဖို့ ညှိနှိုင်းမှုများ ပြုလုပ်ရန်အတွက် အချိန်ရချင်နေတာ ဖြစ်ပါတယ်။

အစ္စရေးလ်အနေနဲ့ ဟားမတ်စ်တို့ကို လက်တုန့်ပြန်ရာမှာ အရပ်သား အများအပြား ထိခိုက်ပြီး ပါလက်စ်တိုင်းတွေနဲ့ အစဥ်အဆက် သွေးကွဲစေမယ့် လုပ်ရပ်မျိုး မပြုလုပ်စေဖို့ အမေရိကန်သမ္မတဟောင်း အိုဘားမားက သတိပေးလိုက်ပါတယ်။

‘’ဂါဇာကိုတိုက်ခိုက်ရာမှာ အခုတောင် ပါလက်စ်တိုင်း ထောင်နဲ့ချီ သေဆုံးထားပြီး ကလေးအများအပြားလည်း ပါဝင်နေပါတယ်။ လူပေါင်းသန်းချီပြီး အိုးအိမ်စွန့်ခွာ ထွက်ပြေးနေရပါတယ်’’ လို့ ဆိုရှယ်မီဒီယာတစ်ခုမှာ ကြေညာထားပါတယ်။

ထိုဒေသကို စားနပ်ရိက္ခာ၊ ရေ၊ လျှပ်စစ်မီး ဖြတ်တောက်ထားဖို့ အစ္စရေးလ်အစိုးရ ဆုံးဖြတ်ထားတာဟာ စစ်ဘေးဒုက္ခသည် အကြပ်အတည်း ပိုမိုဆိုးရွားစေရုံမက မျိုးရိုးအစဥ်အဆက် ပါလက်စ်တိုင်းတို့ရဲ့ သဘောထားရပ်တည်ချက် တင်းမာလာနိုင်ကြောင်း၊ အစ္စရေးလ်အပေါ် တစ်ကမ္ဘာလုံးရဲ့ ထောက်ခံမှု ယိုယွင်းလာနိုင်ကြောင်း၊ အစ္စရေးလ်ရန်သူတွေရဲ့ ကစားကွက်ထဲသို့ ရောက်ရှိသွားနိုင်ကြောင်း၊ နှစ်ရှည်လများ ဒေသတွင်း တည်ငြိမ်အေးချမ်းရေး ကြိုးပမ်းမှုများ ပျက်ပြားခြင်းတို့ ပေါ်ပေါက်လာနိုင်ကြောင်း ထုတ်ပြန်ကြေညာခဲ့ကာ ဟားမတ်စ်တို့ ကျူးကျော်တိုက်ခိုက်မှုကို ရှုတ်ချကြောင်း၊ အစ္စရေးလ်တို့ ကိုယ်ပိုင်ခုခံပိုင်ခွင့်ကိုလည်း ထောက်ခံကြောင်း ဆိုလိုက်ပါတယ်။

ပြီးခဲ့တဲ့ ၂၄ နာရီအတွင်း ဂါဇာရှိ ပစ်မှတ်ပေါင်း ၃၂၀ ကျော်ကို တိုက်ခိုက်ခဲ့ရာ ဟားမတ်စ်တိုက်ခိုက်ရေးသမားများ ခိုလှုံတဲ့လှိုဏ်ခေါင်း၊ ကင်းစောင့်စခန်းဒါဇင်ခန့်၊ တင့်ကားဖျက်ဒုံးကျည်နေရာတွေကို ထိမှန်ခဲ့တယ်လို့ အစ္စရေးလ်စစ်တပ်က ပြောကြားလိုက်ပါတယ်။

#World_News #ဟားမတ်စ် #အမေရိကန်နှင့်အိုဘားမား #အစ္စရေးလ်အားသတိပေး #Source: Reuters