#WorldHealth
Published 05 April 2022
နှာခေါင်းအစက်ချရသည့်ကိုရိုနာဗိုင်းရပ်စ်ကာကွယ်ဆေးကို ရုရှားနိုင်ငံမှာအသိအမှတ်ပြုစာရင်းသွင်းလိုက်ပြီဖြစ်ကြောင်း ကျန်းမာရေးဝန်ကြီးဌာနက သောကြာနေ့မှာထုတ်ပြန်လိုက်ပါတယ်။

ကျန်းမာရေးဝန်ကြီးဌာနရဲ့ ကူးစက်ရောဂါနဲ့အဏုဇီဝဆိုင်ရာ ဂါမယ်လီယာသုတေသနမှထုတ်လုပ်လိုက်တဲ့ Gam-COVID-Vac (Sputnik V) နှာခေါင်းအစက်ချကာကွယ်ဆေးကို ရုရှားကျန်းမာရေးဝန်ကြီးဌာနမှ အသိအမှတ်ပြုလိုက်ပြီဖြစ်ကြောင်း ဖော်ပြခဲ့ပါတယ်။
ဒီကာကွယ်ဆေးမှာ type 16 နဲ့ type 5 adenovirus အမျိုးအစားတွေကိုအခြေခံထားတဲ့ ကာကွယ်ဆေးအစိတ်အပိုင်း ၂ မျိုးပါဝင်ပြီး ဆေးနှစ်ကြိမ်ကို ၃ ပတ်ခြားထိုးနှံရတာဖြစ်ပါတယ်။

ဒီကာကွယ်ဆေးက အသက်ရှူလမ်းကြောင်းအတွင်းမှာ ကိုရိုနာဗိုင်းရပ်စ်ကိုခုခံတဲ့ အဓိကကာကွယ်နိုင်စွမ်းကိုဖန်တီးပေးပါတယ်။
နှာခေါင်းအစက်ချဆေးအသုံးပြုခြင်းဖြင့် သွေးထဲက IgA ပဋိပစ္စည်း၊ အသက်ရှူလမ်းကြောင်းရှိ အချွဲရည်များ၊ ဗိုင်းရပ်စ်ချေဖျက်ပေးတဲ့ သွေးထဲရှိ IgG ပဋိပစ္စည်းတွေများပြားလာစေပြီး ရောဂါခုခံအားကိုမြှင့်တင်ပေးပါတယ်။

SARS-CoV-2 ဗိုင်းရပ်စ်ကူးစက်မှုကိုတုန့်ပြန်တဲ့ ဆဲလ်ခုခံအားစွမ်းအားကိုလည်း မြှင့်တင်ပေးကြောင်း ဖော်ပြထားပါတယ်။
အခုအချိန်မှာ အသက် ၁၈ နှစ်အထက်လူများကို နှာခေါင်းအစက်ချကာကွယ်ဆေးထိုးပေးဖို့ ရည်ရွယ်ထားပါတယ်။

ဒါ့အပြင် နှာခေါင်းအစက်ချကာကွယ်ဆေးကို အားမြှင့်ကာကွယ်ဆေး(booster)အဖြစ်လည်း ထိုးနှံပေးဖို့ရှိနေကြောင်း ရုရှားကျန်းမာရေးဝန်ကြီး'မစ်ခေးလ်မူရက်ရှ်ကို'က အစောပိုင်းကပြောကြားထားပါတယ်။
Source: TASS. 

#WorldNews
Published - 05 April 2022
ကိုရိုနာဗိုင်းရပ်စ်ကာကွယ်ဆေးကို အနည်းဆုံး ၈၇ ကြိမ်ထိုးနှံခဲ့တယ်လို့ယူဆရတဲ့ ဂျာမနီလူမျိုးတစ်ဦးကို အာဏာပိုင်များကစုံစမ်းမေးမြန်းလျက်ရှိကြောင်း Freie Presse သတင်းစာမှာ သောကြာနေ့ကဖော်ပြခဲ့ပါတယ်။

အဆိုပါဖော်ပြချက်အရ အသက် ၆၁ နှစ်အရွယ်အမျိုးသားတစ်ဦးဟာ ဂျာမနီအရှေ့ပိုင်းဒေသများဖြစ်တဲ့ ဆက်ဆိုနီနဲ့ ဆက်ဆိုနီအန်ဟော့တို့ရှိ ကာကွယ်ဆေးထိုးနှံရေးစင်တာအများအပြားကို သွားရောက်ခဲ့တယ်လို့ သိရှိရပါတယ်။

ထိုလူက ကာကွယ်ဆေးစင်တာတွေမှာ တစ်နေ့ကို ၃ ကြိမ်ထိုးနှံခဲ့ပြီး ဆက်ဆိုနီပြည်နယ်တစ်ခုတည်းမှာတင် ကိုဗစ်ကာကွယ်ဆေး ၈၇ ကြိမ်ထိုးနှံခဲ့တယ်လို့ ယူဆရပါတယ်။

ဒရက်စ်ဒန်မြို့ ကာကွယ်ရေးစင်တာတစ်ခုမှဝန်ထမ်းတစ်ဦးက ထိုလူကိုမှတ်မိသွားခဲ့ပြီး စတင်သံသယဝင်ခဲ့တာဖြစ်ကြောင်း ဂျာမနီကြက်ခြေနီအဖွဲ့မှ 'ကိုင်ခရာနစ်ချ်'က သတင်းဌာနကိုပြောကြားခဲ့ပါတယ်။
နောက်တစ်ကြိမ် လိုက်ပ်ဇစ်မြို့ပြင်အိုင်လင်ဘာ့ဂ်ရှိ ကာကွယ်ဆေးစင်တာတစ်ခုကို ဝင်သွားခဲ့ရာမှာတော့ ဝန်ထမ်းကရဲကိုအကြောင်းကြားခဲ့ကာ ဖမ်းဆီးထိန်းသိမ်းလိုက်ရပါတယ်။
ကာကွယ်ဆေးထိုးပြီးကြောင်းထောက်ခံစာတွေကို ရောင်းစားမှုမှာပါဝင်တယ်ဆိုပြီး ထိုလူကို ဂျာမနီကြက်ခြေနီအဖွဲ့က တရားစွဲဆိုလိုက်ပါတယ်။
ဆက်ဆိုနီပြည်နယ်မှာ ရာဇဝတ်စုံစမ်းစစ်ဆေးမှုတွေပြုလုပ်နေပြီး အခြားပြည်နယ်များမှအာဏာပိုင်တွေကလည်း ထိုလူကိုစုံစမ်းစစ်ဆေးလျက်ရှိပါတယ်။
အဆိုပါဂျာမနီလူမျိုးဟာ ကိုရိုနာဗိုင်းရပ်စ်ကာကွယ်ဆေးဘယ်နှကြိမ်ထိုးခဲ့လဲဆိုတာကို အတိအကျမသိရသေးပေမယ့် အနည်းဆုံး ၈၇ ကြိမ်ထက်များမယ်လို့ ခန့်မှန်းရပါတယ်။

သတင်းတင်ပို့ချက်များအရ ထိုလူဟာ ကာကွယ်ဆေးထိုးနှံဖို့ဝင်ရောက်သွားတိုင်း ကာကွယ်ဆေးစာရွက်စာတမ်းအလွတ်ကို ယူဆောင်သွားကြောင်း၊ ကာကွယ်ဆေးထိုးပြီးတဲ့အခါ ကာကွယ်ဆေးအမှတ်စဉ်အကြောင်းအရာများပါဝင်တဲ့နေရာကို ဖျက်ပစ်ပြီး ကာကွယ်ဆေးမထိုးထားတဲ့သူတွေကို ရောင်းချခဲ့ကြောင်း သိရှိရပါတယ်။
ကာကွယ်ဆေးထိုးနှံဖို့စာရင်းသွင်းရာမှာ သူ့ရဲ့ကျန်းမာရေးအာမခံကတ်ကိုမပြသဘဲ နာမည်အစစ်နဲ့မွေးရက်အစစ်အတိုင်း စာရင်းပေးသွင်းခဲ့တာကြောင့် သူ့ရဲ့လုပ်ရပ်တွေ မကြာခင်မှာပဲပေါ်သွားခဲ့တာဖြစ်ပါတယ်။
ဒီဖြစ်ရပ်က ကျန်းမာရေးကဏ္ဍမှာ ဒီဂျစ်တယ်စနစ်အသုံးမပြုတဲ့ ဂျာမနီနိုင်ငံကျန်းမာရေးစောင့်ရှောက်မှုစနစ်ရဲ့လိုအပ်ချက်ကို ပေါ်လွင်စေခဲ့ပါတယ်။

ဂျာမနီနိုင်ငံမှာ ကိုဗစ်ရောဂါကူးစက်မှုများပြားလျက်ရှိပြီး အခြားဥရောပနိုင်ငံတွေနဲ့ယှဉ်ရင် ကာကွယ်ဆေးထိုးနှံမှုနှုန်းနည်းပါးနေပါတယ်။
ထိုးနှံခွင့်ရှိတဲ့လူဦးရေ ၇၅ ရာခိုင်နှုန်းကျော် ကာကွယ်ဆေးအပြည့်ထိုးနှံထားပြီး ၅၈ ရာခိုင်နှုန်းကတော့ အားမြှင့်ကာကွယ်ဆေး(booster)ထိုးနှံပြီးသားဖြစ်ပါတယ်။
ဂျာမနီအရှေ့ပိုင်းပြည်နယ်တွေမှာ ပိုမိုနည်းပါးလျက်ရှိပြီး ဆက်ဆိုနီပြည်နယ်မှာ ၆၄.၅ ရာခိုင်နှုန်းသာ ကာကွယ်ဆေးအပြည့်ထိုးနှံရပါသေးတယ်။
Source: DW.

Published 4 April 2022

ထိုင်းနိုင်ငံတွင် ပထမဆုံးတွေ့ရှိသော အိုမီခရွန် XEကိုဗစ်-၁၉ မျိုးဗီဇကွဲနှင့်ပတ်သက်ပြီး ထိတ်ထိတ်ပျာပျာမဖြစ်ကြဖို့ အစိုးရ ပြည်သူ့ကျန်းမာရေးဝန်ကြီးဌာနက ပြောကြားလိုက်ပါတယ်။ ဒါဟာ အရင်သန္ဓေပြောင်းတွေလိုပဲ ရောဂါသစ်တွေထပ်ဖြစ်လိမ့် မယ်လို့ မယုံကြည်ရဘူးလို့လည်း ပြောပါတယ်။

ရာမသီဘိုဒီဆေးရုံက လူနာတစ်ဦးကို XEကူးစက်ခံထားရတာတွေ့ရှိခဲ့ရတာဖြစ်ပြီး  အဲဒီလူနာဟာ ယခု အပြည့်အဝပြန်လည် ကောင်းမွန်သွားပြီလို့ အဲဒီဆေးရုံရဲ့ Centre for Medical Genomics (CMG) ဌာနမှူးက ပြောပါတယ်။

XEဟာ အိုမီခရွန်ကနေထပ်ခွဲလာတဲ့  BA.1 နှင့်  BA.2  တို့ပေါင်းစပ်မိသွားပြီး ထပ်ပေါ်လာတဲ့ မျိုးခွဲဖြစ်ပါတယ်။ XE ကူးစက်ခံရတဲ့ လူနာတစ်ဦးတွေ့ရတဲ့အကြောင်း CMG က စနေနေ့ သတင်းထုတ်ပြန်ပေးခဲ့တာပါ။

ကမ္ဘာ့ကျန်းမာရေးအဖွဲ့ကလည်း  XEအိုမီခရွန် မျိုးခွဲနှင့်ပတ်သက်ပြီး စနေနေ့က  သတိပေးချက်တစ်ရပ်ထုတ်ပြန်ခဲ့ပါတယ်။ ယင်းဟာ လက်ရှိမှာ ကူးစက်မှုအမြန်ဆုံး မျိုးခွဲဖြစ်နေတယ်လို့ ကမ္ဘာ့ကျန်းမာရေးအဖွဲ့ကပြောပါတယ်။

XE ကို ယူကေမှာ ဇန်နဝါရီ၁၉ရက်က ပထမဆုံးတွေ့ရှိခဲ့ရပြီး ယခုထက်ထိကူးစက်မှု ၆၀၀အောက်ပဲရှိသေးတယ်လို့ ကမ္ဘာ့ကျန်းမာရေးအဖွဲ့က ပြောဆိုထားပါတယ်။

ကူးစက်ခံရပြီ့း တစ်ပတ်လောက်ကြာမှ စစ်ဆေးမယ့် ဗိုင်းရပ်စ်နမူနာက ပုံမှန်အားဖြင့် ရရှိလေ့ရှိတာကြောင့် အဖြေသိရတဲ့အချိန်မှာ လူနာအများစုဟာ နေကောင်းသွားကြပြီဖြစ်တယ်လို့ CMG ဌာနမှူး ဝါဆွန်ချန်တရက်တီတာက ပြောပါတယ်။

XEဟာ လက်ရှိကူးစက်မှုအမြန်ဆုံးဖြစ်တဲ့ B.A2 ထက် ကူးစက်မှုနှုန်း ၁၀ရာခိုင်နှုန်းပိုမြန်တယ်လို့ ကမ္ဘာ့ကျန်းမာရေးအဖွဲ့ကပြောထားပါတယ်။

Source BK Post

#LocalNews
Published - 3 April 2022

ပုဂံ ဒေသသို လာရောက်ကြမည့် ခရီးသွားများ အနေနဲ့ ကိုဗစ်ကာကွယ်ဆေးထိုးပြီးသားလက်မှတ်များကို ယူဆောင်လာရမည်ဖြစ်ပြီး ကာကွယ်ဆေးမထိုးနှံရသေးသည့်ခရီးသွားများကိုလည်း ပုဂံမြို့ အဝင်ရှိ စစ်ဆေးရေးဂိတ်များတွင် ကိုဗစ်ကာကွယ် ဆေးများ ထိုးနှံ ပေး နေတယ်လို့ ပုဂံဒေသရှိ ခရီးသွားလုပ်ငန်းလုပ်ကိုင်သူများထံမှ သိရပါတယ်။

"ပုဂံမြို့အဝင်မှာကာကွယ်ဆေး လက်မှတ်ပါမပါစစ်ပါတယ်။ ပါခဲ့ရင်တောင် ၂ ကြိမ်ထိုးပြီး တတိယအကြိမ်ထိုးဖို့ လိုပြီဆိုရင် ထိုးဖို့ပြောပါတယ်။ တစ်ခါတည်း မြို့အဝင်ကတည်းက တန်းထိုးပေးနေပါတယ်။ မထိုးရသေးတဲ့သူတွေအတွက်လည်း စစ် ဆေးရေးအဖွဲ့ က သူနာပြုဆရာမတွေနဲ့ ကာကွယ်ဆေးကို တစ်ခါထဲထိုးပေး နေပါတယ်။"လို့ ပုဂံ ဒေသခံ တစ်ဦးက ပြောပါတယ်။

လက်ရှိကာလမှာ ပုဂံ ဒေသသို့ ပြည်တွင်း ခရီးသွားဝင်ရောက်မှုတွေ များပြား နေတာဖြစ်ပြီး ခရီးသွားများထံမှာ ကိုဗစ်ကာကွယ် ဆေးလက်မှတ်ပါ၊မပါ ရှောင်တခင်စစ်ဆေးမှု တွေလည်းရှိနေတာဖြစ်တယ်လို့ သိရပါတယ်။

"ကိုဗစ်ကာကွယ် ဆေးထိုးပြီးပြီလား၊ မထိုးရ သေးဘူးလားဆိုတာကို စစ်တာ ပေါ့။ မြို့အဝင်မှာစစ်သလို တစ်ခါတစ်လေလည်း မြို့ထဲမှာစစ်ပါတယ်။ ကာကွယ်မထိုးရသေးရင်လည်း သူတို့ကတစ်ခါထဲထိုးပေးတယ်။ ပုဂံကိုလာမယ့် ခရီးသွားတွေအ နေနဲ့ မှတ်ပုံတင်နဲ့ ကိုဗစ်ကာကွယ် ဆေးထိုးပြီးသားလက်မှတ် တွေကိုယူဆောင်လာဖို့ လိုပါမယ်။"လို့ ၎င်းက ဆက်လက် ပြောပြခဲ့ပါတယ်။

လက်ရှိကာလတွင် ခရီးသွားများအတွက် ပုဂံဒေသရှိ ဘုရား စေတီပုထိုးများကို ပုံမှန်တိုင်းဖွင့်လှစ် ပေးထားပြီး ဘုရားဖူးများတည်းခိုနားနေနိုင်ရန် အတွက် ဟိုတယ်၊
မိုတယ်များကိုလည်း ပုံမှန်အတိုင်းဖွင့်လှစ် ပေးထားတာဖြစ်ပါတယ်။

ဒါ့အပြင် သင်္ကြန်ပိတ်ရက် ကာလများတွင် ပုဂံဒေသသို့ ခရီးသွားဧည့် သည်တွေအဝင် များနိုင်မယ် လို့လည်း ခရီးသွားလုပ်ငန်း လုပ်ကိုင်သူတွေက ခန့်မှန်းထားကြတာပါ။

ကိုဗစ် ၁၉ ရောဂါဖြစ်ပွားမှု တွေ လျော့ကျလာခဲ့တဲ့ ပြီးခဲ့တဲ့ နှစ်လယ်ပိုင်းမှစလို့ ကမ်းခြေ ဒေသနှင့် ပုဂံ ဒေသသို့ ပြည်တွင်းခရီးသွားတွေကို ပြန်လည်ဝင်ရောက်ခွင့် ပြုခဲ့တာလည်း ဖြစ်ပါတယ်။

ymg/kg
#Yangon_Media_Group 

#LocalHealth
Published_ 3 April 2022
တရုတ်နိုင်ငံမှ မြန်မာနိုင်ငံသို့ ကိုဗစ်-၁၉ ကာကွယ်ဆေးထိုးနှံနိုင်ရန် ဆေးထိုးအပ် ၃ သန်းကို ဧပြီ ၂ ရက်နေ့က မူဆယ်မြို၌ လှူဒါန်းခဲ့ကြောင်း သိရပါတယ်။မြန်မာနိုင်ငံဆိုင်ရာတရုတ်သံရုံးမှ မြန်မာနိုင်ငံကျန်းမာရေးဝန်ကြီးဌာနသို့ အရေးပေါ် လှူဒါန်းသော ကိုဗစ်-၁၉ ကာကွယ်ဆေး ဆေးထိုးအပ် ၂ သန်းကို မူဆယ်၌ မြန်မာနိုင်ငံသို့ လွှဲပြောင်းပေးအပ်ခဲ့တယ်လို့ ဖော်ပြထားပါတယ်။ ထို့ပြင် ယူနန်ပြည်နယ်မှ မြန်မာနိုင်ငံသို့ လှူဒါန်းသော ကိုဗစ်-၁၉ ကာကွယ်ဆေး ဆေးထိုးအပ် ၁ သန်းကိုလည်း တပြိုင်တည်း လွှဲပြောင်းပေးအပ်ခဲ့ကြောင်း သိရပါတယ်။

လက်ရှိအချိန်အထိ တရုတ်နိုင်ငံက မြန်မာနိုင်ငံသို့ ထောက်ပံ့သော ကိုဗစ်-၁၉ ကာကွယ်ဆေး Doses စုစုပေါင်း ၄၁ သန်းကျော်ရှိနေပါပြီ။

ကိုဗစ်-၁၉ ကပ်ရောဂါ ဖြစ်ပွားချိန်မှစ၍ တရုတ်နိုင်ငံသည် မြန်မာနိုင်ငံသို့ ကာကွယ်ဆေး၊ အောက်ဆီဂျင်စက်နှင့် နှာခေါင်းစည်း စတဲ့ ကပ်ရောဂါကာကွယ်ရေး ပစ္စည်းများ ဆက်တိုက်လှူဒါန်းပေးခဲ့ပြီး မြန်မာနိုင်ငံ၏ ကပ်ရောဂါတိုက်ဖျက်ရေး လုပ်ငန်းများကို ပံ့ပိုးကူညီခဲ့ပါတယ်။

ယခုအကြိမ် တရုတ်နိုင်ငံမှ မြန်မာနိုင်ငံသို့ အရေးပေါ်လှူဒါန်းသော ကိုဗစ်-၁၉ ကာကွယ်ဆေး ဆေးထိုးအပ် ၃ သန်းသည် မြန်မာနိုင်ငံ၏ ကာကွယ်ဆေး ထိုးနှံမှုလုပ်ငန်း အရှိန်မြှင့်ရန် အားဖြည့်ပေးပြီး မြန်မာပြည်သူများအတွက် ခုခံအား အကာအကွယ်ကို ပိုမိုကောင်းမွန်စွာ တည်ဆောက်နိုင်မှာ ဖြစ်တယ်လို့ ဆိုပါတယ်။

ymg-mnn
#Yangon_Media_Group 

#WorldHealth
Published - 03 April 2022
လက်ရှိကိုဗစ်ရောဂါစစ်ဆေးရာမှာအသုံးပြုနေကြတဲ့ antigen test တွေထက် ပိုမိုထိရောက်စိတ်ချရတဲ့အပြင် ဈေးနှုန်းသက်သာတဲ့ ကိုဗစ်စမ်းသပ်နည်းပစ္စည်းအသစ်ကို တရုတ်သိပ္ပံပညာရှင်များ ထုတ်လုပ်ခဲ့ကြပြီဖြစ်ကြောင်း ဖော်ပြလိုက်ပါတယ်။

အလွန်ကူးစက်မြန်တဲ့အိုမီခရွန်မျိုးဗီဇကွဲ ပျံ့နှံ့နေတဲ့အချိန်မှာ ထိရောက်တဲ့ကိုဗစ်စမ်းသပ်နည်းအစီအစဉ်တွေလည်း ပိုမိုလိုအပ်လာပါတယ်။ အိမ်တွေမှာအသုံးပြုလေ့ရှိတဲ့ antigen test တွေဟာ ရောဂါစစ်ဆေးမှုမှာ ၈၁ ရာခိုင်နှုန်းမှန်ကန်ထိရောက်မှုရှိပါတယ်။

ဒါပေမဲ့ ဒီစစ်ဆေးနည်းတွေဟာ ဗိုင်းရပ်စ်ပမာဏများစွာပါဝင်တဲ့နမူနာကို စစ်ဆေးမိမှသာတွေ့ရှိနိုင်တာဖြစ်ပြီး ရောဂါလက္ခဏာမပေါ်တဲ့ကူးစက်မှုတွေမှာဆိုရင် အဖြေမမှန်ကန်ဘဲရှိနေတတ်ကြောင်း ဆေးသုတေသနဆိုင်ရာဝူဟန်တက္ကသိုလ်မှ'ယင်ဟောင်'က ပြောကြားလိုက်ပါတယ်။

အခု သုတေသီများထုတ်လုပ်လိုက်တဲ့ ကိုဗစ်စစ်ဆေးနည်းအသစ်ကို sPAMC လို့ခေါ်ပြီး စမ်းသပ်မှုအဖြေတိကျမှုနှုန်း ၉၄.၂ ရာခိုင်နှုန်းရှိကြောင်း Nature Biomedical Engineering ဂျာနယ်မှာ ဖော်ပြထားပါတယ်။

သုတေသီများစမ်းသပ်ကြရာမှာ ကိုရိုနာဗိုင်းရပ်စ်ပိုးရှိနေတဲ့လူပေါင်း ၁၀၄ ဦးထဲက ၉၈ ဦးကို အချိန်မိနစ် ၂၀ အတွင်းတိကျစွာတွေ့ရှိခဲ့ပါတယ်။ ဒီစစ်ဆေးနည်းကိုပြုလုပ်ဖို့ ဈေးကြီးပစ္စည်းကိရိယာများမလိုအပ်သလို PCR test ကျွမ်းကျင်သူတွေလည်း မလိုအပ်ပါဘူး။
မြန်ဆန်ထိရောက်တဲ့ စမ်းသပ်နည်းအသစ်က ရောဂါကူးစက်မှုဖြစ်ပွားတဲ့နေရာတွေမှာ ရောဂါထိန်းချုပ်ဖို့ကူညီပေးနိုင်မှာဖြစ်ပါတယ်။

ဒီစစ်ဆေးနည်းကိုလက်တွေ့အသုံးပြုဖို့ ခွင့်ပြုချက်ရယူတဲ့နေရာမှာ အချိန် ၉ လကနေ ၁ နှစ်လောက်ကြာမြင့်နိုင်ကြောင်း 'ယင်ဟောင်'က ခန့်မှန်းထားပါတယ်။

sPAMC ရောဂါစစ်ဆေးနည်းပစ္စည်းရဲ့ကုန်ကျစရိတ်က ဘယ်လောက်လဲဆိုတာကို အတိအကျသတ်မှတ်လို့ မရသေးဘဲ ကုန်ကြမ်းပစ္စည်းရရှိမှုနဲ့ အရည်အသွေးထိန်းချုပ်ရေးတို့ပေါ်မှာမူတည်နေပြီး 'ယင်ဟောင်'ရဲ့ပြောကြားချက်အရ ရထားဘူတာတွေနဲ့ လေဆိပ်တွေမှာအသုံးပြုလို့ရနိုင်မယ်လို့ မျှော်လင့်နိုင်ပါတယ်။
Source: South China Morning Post