Published 18 Dec 2022

မြောက်ကိုရီးယားနိုင်ငံဟာ ကိုရီးယားကျွန်းဆွယ်အရှေ့ဖက်ကမ်းခြေ ပင်လယ်ထဲကို ပဲ့ထိန်းဒုံးကျည်နှစ်စင်း ဒီဇင်ဘာ ၁၈ ရက် တနင်္ဂနွေနေ့က ပစ်လွှတ်ခဲ့တယ်လို့ တောင်ကိုးရီးယားနှင့် ဂျပန်တို့ကပြောပါတယ်။

တောင်ကိုးရီးယား ပူးတွဲစစ်ဦးစီးချုပ် (JCS) ကပြောကြားရာမှာ တာလတ်ပစ် ဒုံးကျည်နှစ်စင်းဟာ ၅၀၀ကီလိုမီတာ အမြင့်ကနေ ပျံသန်းသွားတယ်လို့ ဆိုပါတယ်။

ဂျပန်ဒုတိယ ကာကွယ်ရေးဝန်ကြီး တိုရှီယိုအီနိုကလည်း ‘ ဒုံးကျည်တွေဟာ ဂျပန်ရဲ့ အထူးစီးပွားရေးဇုန်အပြင်ဘက်ကျသွားခဲ့ပုံရပြီး ထိခိုက်ဒဏ်ရာရရှိတဲ့သတင်းတွေတက်မလာဘူး” လို့ ပြောပါတယ်။

“ မြောက်ကိုရီးယားရဲ့ ပဲ့ထိန်းဒုံးကျည်တွေဟာ ခပ်မတ်မတ်ပစ်လွှတ်ခဲ့တာဖြစ်ပြီး အရှေ့ပင်လယ်ထဲကျသွားတယ်” လို့ တောင်ကိုးရီးယားနိုင်ငံ (JCS)က သတင်းထုတ်ပြန်ပါတယ်။

“ တောင်ကိုရီးယားနှင့် အမေရိကန်ပြည်ထောင်စုက ထောက်လှမ်းရေးအဖွဲ့တွေဟာ မြောက်ကိုရီးယားရဲ့ လက်ရှိ ဒုံကျည်တွေပစ်လွှတ်နေတာနှင့် ဆက်စပ်ပြီး ဘာကိုဦးတည်နေသလဲဆိုတာကို  ခွဲခြမ်းစိတ်ဖြာသုံးသပ်နေတယ်” လို့ သတင်းထုတ်ပြန်ချက်မှာဖော်ပြထားပါတယ်။

မြောက်ကိုရီးယားဟာ မဟာဗျူဟာအစ်လက်နက်တွေထုတ်လုပ်ဖို့နှင့် နျူကလီးယားနှင့် ဒုံးကျည်အစီအစဉ်တွေ အရှိန်မြှင့်ဖို့ ကြံစည်နေတဲ့အလျောက် မကြာသေးခင်က မြင့်မားကန်အားရှိ solid-fuel အင်ဂျင်ကိုစမ်းသပ်ခဲ့ပါတယ်။ အဲဒီစမ်းသပ်မှုဟာ ပဲ့ထိန်းဒုံးကျည်တွေကို လျင်လျင်မြန်မြန်ရွှေ့ပြောင်းနေရာချပေးနိုင်ဖို့ အထောက်အကူဖြစ်စေပါလိမ့်မယ်။ အဆိုပါအင်ဂျင်စမ်းသပ်ပြီး ရက်အနည်းငယ်အကြာမှာ မြောက်ကိုရီးယားက  ယခုလို ဒုံးကျည်စမ်းသပ်ပစ်လွှတ်မှုတွေ ပြန်လုပ်ဆောင်လာခြင်းဖြစ်ပါတယ်။

အဆိုပါစမ်းသပ်မှုကို မြောက်ကိုရီးယားခေါင်းဆောင်ကင်မ်ဂျုန်အန်ကိုယ်တိုင် ကြာသပတေးနေ့က ဦးစီးခဲ့တာဖြစ်ပြီး ဒုံးပျံအင်ဂျင်တွေနှင့် အကာသပစ်တင်ယာဉ်တွေစမ်းသပ်မှုတွေအပါအဝင် ဒုံးကျည်နည်းပညာတွေ စမ်းသပ်နေတဲ့နေရာဖြစ်တဲ့ ဆိုဟေးဂြိုဟ်တုစခန်းမှာ လုပ်ဆောင်ခဲ့တာပါ။

မြောက်ကိုးရီးယားဟာ  နိုင်ငံတကာကကန့်ကွက်အရေးယူမှုတွေပြုလုပ်နေတဲ့ကြားထဲက ဒီနှစ်ထဲမှာ မကြုံစဖူး ဒုံးကျည်တွေအများအပြားစမ်းသပ်ပစ်လွှတ်ခဲ့ပါတယ်။ အဲဒီအထဲမှာ တိုက်ကြီးအချင်းချင်းပစ်ခတ်နိုင်တဲ့ ပဲ့ထိန်းဒုံကျည်တစ်စင်းလည်းပါဝင်ပါတယ်။ အဲဒီဒုံးကျည်ဟာ အမေရိကန် ပင်မကုန်းမြေကြီးအထိရောက်အောင်ပစ်ခတ်နိုင်ပါတယ်။

ဂျပန်နိုင်ငံကလည်း တရုတ်ကိုတိုက်ခိုက်နိုင်စွမ်းရှိတဲ့ ဒုံးကျည်တွေဝယ်ယူမယ့် အမေရိကန်ဒေါ်လာ ၃၂၀ဘီလျံတန် စစ်ရေးမြှင့်တင်မယ့်အစီအစဉ်ကို သောကြာနေ့ကကြေညာခဲ့ရာမှာ ဒါဟာ ဒုတိယကမ္ဘာစစ်နောက်ပိုင်း အကြီးကျယ်ဆုံးဖြစ်ပါတယ်။

Source:Reuters/CNA

#North_Korea_Launches_two_missiles

#North_Korea_Missile_testings

#Korea_ Peninsula_tension

Published 16 December 2022

ထိုင်းဝန်ကြီးချုပ် ပရာရွတ်ချန်အိုချာဟာ ဇနီးဖြစ်သူ နာရာပွန်ချန်အိုချာနှင့်အတူ ဆေးရုံတက်ကုသခံနေရတဲ့ မင်းသမီး  ဗဂျာကီတီရာဗာ မဟီဒေါ အတွက် ဆေးရုံသို့သွားရောက်ကာ ဆုမေတ္တာပန်းစည်းတွေ ပေးပို့ပြီး ဆုတောင်းစာအုပ်မှာ လည်း ကျန်းမာစေကြောင်း ဆုတောင်းမေတ္တာစာလွှာတွေရေးသားခဲ့ပါတယ်။

ထိုင်းဘုရင့် အကြီးဆုံးသမီးတော် မင်းသမီးဟာ ဗုဒ္ဓဟူးနေ့က နှလုံးရောဂါကြောင့် သတိမေ့သွားခဲ့တဲ့အတွက် ဘန်ကောက်ရှိ ချူလာလောင်ကွန်းဆေးရုံသို့ လေယာဉ်ဖြင့် အရေးပေါ်ပို့ဆောင်ပေးခဲ့ရတာဖြစ်ပါတယ်။

Source AFP

#Princess_Bajrakitiyabha_Mahidol

#Thailand_Princess_hospitalized

#Thailand_PM_Prayut_Chan-O-Cha

Published 15 Dec 2022

တပ်မတော်(လေ)သည် မဟာဗျူဟာမြောက်အလှမ်းမီစစ်ဆင်နိုင်မှုအပြင် ရေငုပ်သင်္ဘော တန်ပြန်စစ်ဆင်နိုင်မှုတွေပါ ဆောင်ရွက်နိုင်မည်ဖြစ်တဲ့အတွက် ဝေဟင်၊မြေပြင်၊ရေပြင်နှင့် ရေအောက် Dimension လေးခုလုံးတွင် စွမ်းအားပြည့် စစ်ဆင်နိုင်တော့မှာဖြစ်တယ်လို့ နစက ဥက္ကဋ္ဌ၊တပ်မတော်ကာကွယ်ရေးဦးစီးချုပ် ဗိုလ်ချူပ်မှူးကြီး မင်းအောင်လှိုင်က ပြောကြားပါတယ်။

ဒီဇင်ဘာ ၁၅ ရက်က မိတ္ထီလာတပ်နယ်ရှိ လေကြောင်းအတတ်သင်လေတပ်စခန်းဌာနချုပ်မှာ ကျင်းပပြုလုပ်တဲ့ တပ်တော်(လေ)ဖွဲ့စည်းတည်ထောင်မှု(၇၅)နှစ်မြောက်၊ စိန်ရတုနှစ်ပတ်လည်နေ့အခမ်းအနားတွင် တပ်မတော် ကာကွယ်ရေးဦးစီးချုပ်က ပြောဆိုခဲ့တာဖြစ်တယ်လို့ နစက, က  သတင်းထုတ်ပြန်ပါတယ်။

ဒီကနေ့အခမ်းအနားမှာ လေယာဉ်နှင့်ရဟတ်ယာဉ်အသစ်တွေရဲ့ တပ်တော်ဝင်အခမ်းအနားကိုပါ ပူးတွဲကျင်းပခဲ့တာ ဖြစ်ပါတယ်။ အခမ်းအနားကို လက်ရှိတာဝန်ထမ်းဆောင်နေတဲ့ တပ်မတော်ထိပ်တန်းအရာရှိကြီးတွေအပြင် အငြိမ်းစားယူသွားခဲ့ကြပြီးဖြစ်သည့် ကာကွယ်ရေးဦးစီးချုပ်(လေ)များနှင့် ကာကွယ်ရေးဦးစီးချုပ်(ရေ)များပါ တက်ရောက်လာကြတာတွေ့ရပါတယ်။

၁၉၄၇ခုနှစ် ဇူလိုင် ၁၃ရက်နေ့တွင် ဗိုလ်ချုပ်အောင်ဆန်းက လေတပ်သည် နိုင်ငံတော်၏ အချုပ်အခြာအာဏာကို ကာကွယ်ရန်အတွက် မရှိမဖြစ်လိုအပ်သည့် တပ်ဖွဲ့တစ်ခုဖြစ်ကြောင်းပြောကြားခဲ့တာကြောင့် အဲဒီပြောကြားချက်ဟာ  လေတပ်ဖွဲ့စည်းရေးအတွက် ခြေလှမ်းတစ်ရပ်ဖြစ်ပေါ်စေခဲ့တယ်လို့ ဗိုလ်ချူပ်မှူးကြီးကပြောပါတယ်။

တပ်မတော်(လေ)သည် မျိုးဆက်သစ်လေသူရဲများဖြင့် စတုတ္ထမျိုးဆက်လွန် ဘက်စုံသုံးတိုက်လေယာဉ်တွေ၊နည်းဗျူဟာမြောက် သယ်ယူပို့ဆောင်ရေးလေယာ်တွေဖြင့် အဆင့်မြင့် တိုက်လေယာဉ်/ရဟတ်ယာဉ်တွေကို မောင်းနှင်ပျံသန်းနိုင်ကြပြီး နည်းပညာသုတေသနပြု စမ်းသပ်ထုတ်လုပ်မှု အပိုင်းတွင်လည်း  MTX-!A လေယာဉ်နှင့်  SR-1 UAVများကို ကိုယ်တိုင်စမ်းသပ်ထုတ်လုပ်နိုင်ခဲ့ပြီလို့လည်း သတင်းထုတ်ပြန်ချက်မှာ ဖော်ပြထားပါတယ်။

အခမ်းအနားအတွင်း လေယာဉ်၊ရဟတ်ယာဉ်များ သရုပ်ပြအုပ်ဖွဲ့ ပျံသန်းအလေးပြုခြင်းနှင့် ကျွမ်းထိုးသရုပ်ပြခြင်းတွေ ပြသခဲ့ကြရာမှာ စတုတ္ထမျိုးဆက်လွန် ဘက်စုံသုံး အကြီးစားတိုက်လေယာဉ်  Su-30 SMEတိုက်လေယာဉ်(၁)စီးက အဆင့်မြင့် လှုပ်ရှားစစ်ကစားမှုတွေကို စွမ်းရည်ပြပျံသန်းခြင်းပြုလုပ်ခဲ့တာကို နိုင်ငံပိုင်ရုပ်သံတွေကနေ ထုတ်လွှင့်ပြသ ခဲ့ပါတယ်။

ဒီကနေ့ တပ်တော်ဝင်တဲ့လေယာဉ်တွေထဲမှာ  Su-30 SMEအပြင်  FTC 2000 G ဘက်စုံသုံး အပေါ့စားတိုက်ခိုက်ရေးလေယာဉ်၊ Ka-28 ရေငုတ်သင်္ဘော တိုက်ဖျက်ရေး ရဟတ်ယာဉ်၊ FT-7ကြားဖြတ်တိုက်လေယာဉ်နှင့်  K-8W  အမောင်းသင် ဂျက်တိုက်လေယာဉ်/အပေါ့စားတိုက်ခိုက်ရေးလေယာဉ်တွေ ပါဝင်တယ်လို့ သတင်းထုတ်ပြန်ချက်မှာ ဖော်ပြထားပါတယ်။

၁၉၄၇ ခုနှစ် ဒီဇင်ဘာ (၁၅)ရက်နေ့တွင် တပ်မတော်(လေ) အက်ဥပဒေကို ပြဋ္ဌာန်းပေးခဲ့တဲ့အတွက် အဆိုပါနေ့ကို တပ်မတော်(လေ) တည်ထောင်ခြင်းနေ့အဖြစ်သတ်မှတ်ခဲ့တာဖြစ်ပါတယ်။

-ymg/knl

#Myanmar_Air_Force

#Myanmar_Defense

#Myanmar_politics

Published - 15 December 2022

၂၀၂၃ ခုနှစ် ဇန်နဝါရီလ ၄ ရက်တွင် ကျရောက်မည့် (၇၅)နှစ်မြောက် စိန်ရတုလွတ်လပ်ရေးနေ့အား ဂုဏ်ပြုကြိုဆိုသည့်အနေဖြင့် ရန်ကုန်မြို့ ပြည်လမ်းမကြီးပေါ်တွင်  နိုင်ငံတော်အလံနှင့် တိုင်းဒေသကြီး၊ပြည်နယ် ကိုယ်စားပြုအလံများကို ပေါင်းယှက်၍ စတင် ချိတ်ဆွဲလွှင့်ထူထားသည်ကို ဒီဇင်ဘာလ ၁၅ ရက် ညနေပိုင်းက မြင်တွေ့ရစဉ်

ymg/mt

Yangon_Media_Group

Published 15 Dec 2022

အာဆီယံဟာ ပေးစာကမ်းစာတွေထက် ဥရောပနှင့်လွတ်လပ်သောကုန်သွယ်မှုတစ်ခုလိုချင်တာသာဖြစ်ပြီး အင်အားကြီးတွေပြိုင်ဆိုင်မှုကြားထဲ အသုံးချခံနယ်ရုပ်တစ်ရုပ် အဖြစ်မခံလိုကြောင်း အာဆီယံခေါင်းဆောင်တွေက ဘရပ်ဆဲလ်မြို့မှာ ဗုဒ္ဓဟူးနေ့ကပြောကြားလိုက်ပါတယ်။

အာဆီယံနှင့် ဥရောပသမဂ္ဂတို့အကြား ပထမဆုံးသော ထိပ်သီးအစည်းအဝေးပြီးဆုံးပြီးနောက် အဖွဲ့ကြီးနှစ်ခုအကြား ကုန်သွယ်ရေးသဘောတူညီချက်ကို ပြန်လည်စတင်ဖို့ မနီးကပ်သေးတဲ့အပေါ် အာဆီယံဟာ မကျေမနပ်မှုနှင့် ကျန်ခဲ့ရတာဖြစ်ပါတယ်။

 မြန်မာနိုင်ငံပါဝင်နေတဲ့ အာဆီယံမှာ ဒီလိုမျိုးသဘောတူညီချက်မျိုးကို ဥရောပသမဂ္ဂ(အီးယူ)အနေနှင့် ဆွေးနွေးဖို့တုန့်ဆိုင်းနေတာဖြစ်တယ်လို့ အေအက်ဖ်ပီကရေးပါတယ်။ အဲဒီအစား အဖွဲ့အချင်းချင်း သဘောတူညီမှုကို အဖွဲ့ဝင်နိုင်ငံတစ်နိုင်ငံချင်းစီနှင့်သာ ဆောင်ရွက်သွားလိုတယ်လို့ အီးယူခေါင်းဆောင်တွေက ပြောပါတယ်။

အီးယူက ယူရို ၁၀ဘီလျံ( အမေရိကန်ဒေါ်လာ ၁၀.၇ဘီလျံ)တန်ဖိုးရှိတဲ့ အခြေခံအဆောက်အအုံအကူအညီနှင့် ချေးငွေတွေကို အာဆီယံနိုင်ငံတွေကို ပေးမယ်လို့ကြေညာခဲ့တာဖြစ်ပါတယ်။ 

“ အာဆီယံဟာ ဥရောပကနေအကူအညီအမြဲတမ်းရရှိနေဖို့ စိတ်မဝင်စားဘူး၊ ကုန်သွယ်ရေးသဘောတူညီချက်ပဲ ပိုသဘောကျတယ်”လို့ အာဆီယံရဲ့ တာဝန်ပြီးဆုံးတော့မယ့် ဥက္ကဋ္ဌ၊ ကမ္ဘောဒီးယားဝန်ကြီးချုပ်ဟွန်ဆန်က  အီးယူကို သတိပေးပြောကြားလိုက်ပါတယ်။

“ အာဆီယံဟာ အီးယူက အကူအညီကို အမြဲတမ်းစောင့်ဆိုင်းနေတာမဟုတ်ဘူး။ ဒါပေမယ့် ကျွန်တော်တို့ဟာ ဒေသနှစ်ခုရဲ့ စီးပွားရေးအစပ်တည့်မှုကို မြင်လိုတယ်” လို့ ဟွန်ဆန်ကပြောလိုက်ပြီး မြန်မာကိစ္စမှာ “ နိုင်ငံရေးဟာ အီးယူနှင့်အာဆီယံရဲ့ တိုးတက်မှုကို အဟန့်အတားမဖြစ်စေသင့်ဘူး” လို့လည်းပြောပါတယ်။

“ ဥရောပနိုင်ငံတွေကပိုတိုးတက်တာ မှန်ပါတယ်။ ဒါပေမယ့် အာဆီယံဟာ  အကူအညီလက်ခံရယူနေတဲ့ နေရာတစ်ခုမျှ မဟုတ်ဘူး။ အာဆီယံနှင့် ဥရောပဟာ ကုန်သွယ်မှုသဘောတူညီချက်တစ်ခုရှိသင့်တယ်” လို့ သူကပြောပါတယ်။

အမေရိကန်-တရုတ်ပြိုင်ဆိုင်မှုမှာ ဒေသကိုမကြာခဏဆိုသလို ဟိုယိမ်းသည်ယိမ်းလို့ ဖော်ပြကြတာရှိတာကို သတိပေး လိုက်ပြီး ပထဝီနိုင်ငံရေး အပြန်အလှန်တိုက်ပွဲမှာ ပိတ်မိနေတာမျိုးကို သဘောမကျဘူးလို့ ဖိလစ်ပိုင်သမ္မတ ဖာဒီနန် မားကို့စ်ဂျုနီယာက ပြောလိုက်ပါတယ်။” ဘယ်အင်အားကြီးနိုင်ငံဟာ ကျွန်တော်တိုနှင့် မဟာမိတ်ဖြစ်တယ်လို့ ရွေးချယ်ရမယ့် စစ်အေးတိုက်ပွဲအခြေအနေတွေပြန်သွားဖို့ ကျွန်တော်တို့ လုံးဝငြင်းဆိုတယ်” လို့လည်း သူက ဆက်လက်ပြောဆိုပါတယ်။

“ အာရှပစိတ်ဖိတ်ဒေသရဲ့ အနာဂတ်ကို အာရှပစိဖိတ်နိုင်ငံတွေကသာ ဆုံးဖြတ်သင့်ပြီး အဲဒီဒေသအပြင်က ဘယ်အင်အားကြိးနိုင်ငံကမှာ မဆုံးဖြတ်သင့်ဘူးဆိုတဲ့ အတွေးအခေါ်ကို  အာဆီယံအဖွဲ့ဝင်တွေဟာ ကတိပြုထားကြတယ်” လို့လည်း ဖိလစ်ပိုင်သမ္မတက ထပ်မံပြောဆိုပါတယ်။

အီးယူက အာဆီယံကို ပထဝီနိုင်ငံရေးကိစ္စတွေထဲ ပါဝင်လာဖို့ ကြိုးပမ်းမှုတွေဟာ လုံးဝဥဿုံ မအောင်မမြင်ဖြစ်ခဲ့ရတာပါ။

ထိုင်ဝမ်နှင့် ရုရှားရဲ့ယူကရိန်းကျူးကျော်မှုခေါင်းစဉ်တွေဟာ နှစ်ဘက်အကြား ပေါင်းကူးလို့ မရနိုင်လို့ အဲဒီကိစ္စတွေဆွေးနွေးတာရပ်ပစ်ခဲ့ကြရပါတယ်။  စေ့စပ်ညှိနှိုင်းသူတွေက ပူးတွဲကြေညာချက်တစ်စောင်အတွက် ရက်သတ္တပတ်ပေါင်းများစွာ ကြိုးစားခဲ့ကြပေမယ့် တကယ်ရလိုက်တာကတော့ စာကြောင်းတွေက စိတ်ပျက်စရာ ကောင်းလှတယ်လို့ အီးယူခေါင်းဆောင်တွေကပြောပါတယ်။

Source: SCMP

#ASEAN_EU_Summit

#Free_Trade_Rather_than_handouts

#EU_ASEAN_Relations

Published 14 Dec 2022

အမေရိကန်စစ်တပ်ဟာ တောင်ကိုးရီးယားမှာ အာကာသတပ်ဖွဲ့တစ်ဖွဲ့ကို  ဗုဒ္ဓဟူးနေ့က တည်ထောင်လိုက်ပါတယ်။ အဲဒီအာကာသတပ်ဖွဲ့ဟာ  မြောက်ကိုးရီးယားမှ ပဲ့ထိန်းဒုံးကျည် ပစ်လွှတ်တာတွေကို ထောက်လှမ်းသိရှိဖို့ ပိုမိုထိရောက်စွာကူညီပေးနိုင်တော့မှာဖြစ်ပါတယ်။

မြောက်ကိုးရီးယားဟာ လေကြောင်းစစ်လက်နက်စမ်းသပ်မှုတွေကို ဒီနှစ်မှာ စံချိန်တင်ပြုလုပ်ခဲ့ကြပါတယ်။ အဲဒီစမ်းသပ် မှုတွေထဲမှာ ပြီးခဲ့တဲ့လကစမ်းသပ်ခဲ့တဲ့ တိုက်ချင်းပစ်ပဲ့ထိန်းဒုံးကျည်အသစ်လွင်ဆုံးတွေလည်းပါဝင်ပါတယ်။

“ အကာသတပ်ဖွဲ့ဟာ ပဲ့ထိန်းဒုံးကျည်ပစ်လွှတ်မှုတွေကို အချိန်နှင့်တပြေးညီနီးပါးမျှ ထောက်လှမ်းသိရှိ သတိပေးနိုင်  ပါလိမ့်မယ်” လို့ အမေရိကန်တပ်-ကိုးရီးယားက သတင်းထုတ်ပြန်ပါတယ်။

ကျွန်တော်တိုနှင့် ၄၈မိုင်လောက်ပဲကွာတဲ့နေရာမှာ လက်ငင်းခြိမ်းခြောက်မှုတစ်ခု တည်ရှိနေတယ်။ အဲဒီခြိမ်းခြောက်မှုကို ကျွန်တော်တို့ဟန့်တားရမယ်၊ကာကွယ်တိုက်ဖျက်ရမယ်။ လိုအပ်လာရင် တိုက်ခိုက်ရလိမ့်မယ်” လို့ အဲဒီအကာသတပ်ဖွဲ့ ကို ဦးဆောင်မယ့် ဒုတိယဗိုလ်မှူးကြီး ဂျိုဆွား မက်ကူလီယွန်းက ပြောပါတယ်။

ဒီတပ်ဖွဲ့သစ်ဟာ အမေရိကန်-ကိုရီးယားမဟာမိတ်ဖြစ်မှုအပေါ် ခိုင်မာတောင့်တင်းတဲ့ကတိကဝတ်ကို တိုးမြှင့်လိုက်ပြီလို့ သူက ဆက်လက်ပြောဆိုပါတယ်။

နျူကလီးယားလက်နက်ပိုင်မြောက်ကိုးရီးယားရဲ့ အန္တရာယ်ကနေ ကာကွယ်ရာမှာကူညီဖို့ တောင်ကိုရီးယားမှာ အမေရိကန် စစ်သား ၂၈၅၀၀ ဦးခန့်ရှိနေကြပါတယ်။ ၁၉၅၀-၅၃ ကိုရီးယားစစ်ပွဲကို စစ်ဆိုင်းသဘာတူညီမှုနှင့် အဆုံးသတ် ခဲ့ပေမယ့် ငြိမ်းချမ်းရေးစာချုပ်မဟုတ်တဲ့အတွက် နှစ်နိုင်ငံဟာ သဘောတရားအရ စစ်ပွဲဆက်ဖြစ်နေတုန်းပဲဖြစ်ပါတယ်။

၂၀၁၈ခုနှစ်မှာ သမ္မတဟောင်းဒေါ်နယ်ထရမ့်က အာကာသတပ်ဖွဲ့စည်းဖို့ အမိန့်ပေးခဲ့ပါတယ်။ ပင်တဂွန်ဟာ အာကာသမှာ ပျော့ကွက်တွေရှိနေတာကို ကိုင်တွယ်ဖြေရှင်းပြီး ဂြိုဟ်ပတ်လမ်းမှာ အမေရိကန်အသေအချာကြီးစိုးအောင်လုပ်ရမယ် လို့ပြောခဲ့ပါတယ်။

တောင်ကိုးရီးယားမှာ ယခုဖွဲ့ပေးလိုက်တဲ့ အာကသာတပ်ဖွဲ့ဟာ အမေရိကန်နိုင်ငံပြင်ပမှာ လုပ်ငန်းလုပ်ဆောင်နေတဲ့ အာကသာတပ်ဖွဲ့တွေထဲက တစ်ခုဖြစ်ပါတယ်။

ပြီးခဲ့တဲ့လကလည်း အမေရိကန်စစ်တပ်ဟာ ဟာဝိုင်ယီမှာ အင်ဒိုပစိတ်ဖိတ်စစ်တိုင်းက အာကာသတပ်တိုက်ပွဲဝင် စစ်ဌာန  ချုပ်တစ်ခုကို စတင်လည်ပတ်ခဲ့ပါတယ်။

တောင်ကိုးရီးယားလေတပ်ဟာ သူ့ရဲ့ကိယ်ပိုင်အာကာသ တပ်ဖွဲ့တစ်ခု ဒီလစောစောပိုင်းက ဖွဲ့စည်းခဲ့ပါတယ်။ အဲဒီတပ်ဖွဲ့က အမေရိကန်စစ်တပ်နှင့် အကာသစစ်ရေးဆိုင်ရာကိစ္စတွေပူးပေါင်းဆောင်ရွက်မှာဖြစ်ပါတယ်။

ကုလလုံခြုံရေးကောင်စီက မြောက်ကိုးရီးယားရဲ့ ပဲ့ထိန်းဒုံကျည်စမ်းသပ်မှုတွေကို  ကြိမ်ဖန်များစွာတားမြစ်ထား ပေမယ့်  ဆိုးလ်နှင့်တိုကျိုမဟာမိတ်တွေကို အကာအကွယ်ပေးနေတဲ့ ဝါရှင်တန်ရဲ့ လှုပ်ရှားမှုတွေကို တုန့်ပြန်ဖို့အတွက် စမ်းသပ်မှုတွေဟာ တရားဝင်တယ်လို့ မြောက်ကိုးရီးယားက ပြန်ချေပခဲ့ပါတယ်။

Source AFP

#US_South_Korea_Military_Alliance

#US_space-force_in_South_Korea

#Korea_Peninisula_tensions