Published 15 January 2023

ဂျပန်ဝန်ကြီးချုပ် ဖူမီယိုကီရှီဒါဟာ အမေရိကန်ရဲ့ ရှက်ဖွယ်ကောင်းတဲ့ အသုံးချခံဖြစ်တယ်လို့ ရုရှားသမ္မတဟောင်း ဒီမစ်ထရီမက်ဗီဒက်ဗ်က စွပ်စွဲလိုက်ပြီး သူ့အနေနှင့် သူ့ကိုယ်သူ ရင်ခွဲသတ်သေသင့်တယ်လို့ အကြံပြုလိုက်တဲ့ အကြောင်း နိုင်ငံတကာသတင်းတွေကရေးသားပါတယ်။

ဒါဟာ မက်ဗီဒက်စ်ဆီက တုန်လှုပ်စရာနှင့် ဆွပေးတဲ့ ကြေညာချက်တွေအများကြီးထဲက နောက်ဆုံးထုတ်ပြန်ချက်ဖြစ်ပါတယ်။ သူ့ကို တစ်ခါတုန်းက အနောက်နိုင်ငံပညာတတ်ပြုပြင်ပြောင်းလဲရေးသမားတစ်ဦးလို့ မြင်ခဲ့ကြပေမယ့် ပြီးခဲ့တဲ့နှစ်က ယူကရိန်းကို ရုရှားကျူးကျော်ပြီးကတည်းက သူ့ကိုယ်သူ အဓိကသဘောထားတင်းမာသူအဖြစ် ပြန်လည်တည်ဆောက်ခဲ့ပါတယ်။

ဂျပန်နိုင်ငံမှာ ဝန်ကြီးချုပ်ရုံးဖြစ်ဖြစ်  နိုင်ငံခြားရေးဝန်ကြီးရုံးဖြစ်ဖြစ်  ရုံးချိန်ပြင်ပမှာ ဘယ်သူတစ်ဦးတစ်ယောက်မျှ မှတ်ချက်ကို ချက်ခြင်းပေးလေ့မရှိကြပါဘူး။

မက်ဗီဒက်ဗ်ဟာ သမ္မတပူတင်ရဲ့ အရေးပါတဲ့ မဟာမိတ်တစ်ဦးဖြစ်ပြီး ရုရှားရဲ့ ကာကွယ်ရေးလုပ်ငန်းတွေကို ကြီးကြပ်တဲ့ လုံခြုံရေးကောင်စီမှာ ဒုတိယဥက္ကဋ္ဌအဖြစ် တာဝန်ထမ်းဆောင်နေပါတယ်။

သူက ကီရှီဒါနှင့် အမေရိကန်သမ္မတ ဂျိုးဘိုင်ဒင်တို့ သောကြနေ့ကတွေ့ဆုံကြပြီး ပူးတွဲသတင်းထုတ်ပြန်ချက် ထုတ်ပြန် အပြီးမှာ တုန့်ပြန်လိုက်ခြင်းဖြစ်ပါတယ်။

အဆိုပါကြေညာချက်ထဲမှာ “ ယူကရိန်းမှာ ရုရှားက နျူကလီးယားလက်နက်မည်သည့်လက်နက်မဆို အသုံးပြုခြင်းကို လူသားတွေကို ဆန့်ကျင်တဲ့လုပ်ဆောင်မှုဖြစ်ပြီး မည်သည့်နည်းနှင့်မျှလက်ခံနိုင်စရာမရှိ” လို့ဖော်ပြထားပါတယ်။

ဒီကြေညာချက်ဟာ ရုရှားရန်မူမှာကို အစိုးရိမ်လွန်တဲ့စိတ်ဖောက်ပြန်မှုဖြစ်ပြီး  ဟီရိုရှီးမားနှင့်နာကာစကီတို့ နျူကလီးယား မီးလောင်တိုက်သွင်းခံရတဲ့အပေါ် ရာထောင်များစွာသော ဂျပန်လူမျိုးတို့ရဲ့ အမှတ်ရစရာတွေကို သစ္စာဖောက်တာ ဖြစ်တယ်လို့ မက်ဗီဒက်ဗ်က ပြောပါတယ်။ သူက ဒုတိယကမ္ဘာစစ်အဆုံးသတ်ဖို့ ဂျပန်ကို အတင်းအကျပ်လက်နက်ချစေ ခဲ့ရတဲ့ အမေရိကန်ကြဲချနဲ့ နျူကလီယားဗုံးတွေကို ရည်ညွှန်းပြောဆိုတာဖြစ်ပါတယ်။

အဲဒီဖြစ်ရပ်အတွက် အမေရိကန်ဆီက နောင်တစကားကို တောင်းဆိုရမယ့်အစား ကီရှီဒါဟာ “ အမေရိကန်တွေအတွက် အစေခံတစ်ဦးမျှသာ” ဖြစ်တယ်ဆိုတာကို ပြသခဲ့တယ်လို့ သူကဝေဖန်ပါတယ်။

အဲဒီလို ရှက်စရာကောင်းတဲ့အပြစ် ကို  ကီရှီဒါ ဂျပန်ပြန်ရောက်လို့ ဝန်ကြီးအဖွဲ့အစည်းအဝေးလုပ်တဲ့အခါ ဂျပန်လို ဟာရာကီရီလိုခေါ်တဲ့ ဆက်ပူကူ  seppuku ပုံစံနှင့်ကိုယ့်ရင်ခွဲ ကိုယ့်ကိုကိုယ် သတ်သေသင့်ပြီး ဆေးကြောမှသာ ရလိမ့်မယ်လို့ သူကပြောပါတယ်။

ယူကရိန်းကို ရုရှားကျုုးကျော်ပြီးကတည်းက  အနောက်နိုင်ငံက အကျပ်အတည်းကို စွက်ဖက်ခြယ်လှယ်ရင် အဲဒါဟာ နျူကလီယားစစ်ပွဲကို ဦးတည်သွာနိုင်တယ်လို့  မက်ဗီဒက်ဗ်က မကြာခဏသတိပေးနေတာပါ။နျူကလီးယားစစ်ပွဲတစ်ခု ဟာ ဖြစ်ဖို့အခွင့်အလမ်းများလာနေပေမယ့် ရုရှားဟာ မမိုက်မဲပါဘူး။နျူးကလီးယားလက်နက်ကို ခုခံကာကွယ်ဖို့ အတွက်သာရှုမြင်ထားတယ်လို့ ပူတင်ကပြောခဲ့ပါတယ်။

Source: South China Morning Post

#Medvedev_said_ Japan_PM_should_ritually disembowel himself

#Russia_Japan

#Russia_Ukraine_War

Published 14 January 2023

အမေရိကန်ပြည်ထောင်စုနှင့် ဂျပန်နိုင်ငံတို့ဟာ အာကာသပူးပေါင်းဆောင်ရွက်ရေး သဘောတူညီချက် လက်မှတ်ရေးထိုးခဲ့ကြပါတယ်။  အမေရိကန်ပြည်ထောင်စုကို ဂျပန်ဝန်ကြီးချုပ် ကီရှီဒါ အလည်အပတ်ခရီးစဉ်အတွင်း နှစ်နိုင်ငံ နိုင်ငံခြားရေးဝန်ကြီးတွေက လက်မှတ်ရေးထိုးခဲ့ကြတာဖြစ်ပါတယ်။ အဲဒီလက်မှတ်ရေးထိုးပွဲကို ဝါရှင်တန်ဒီစီက နာဆာ ဌာနချုပ်မှာ ပြုလုပ်ခဲ့တာဖြစ်ပြီး ဂျပန်ဝန်ကြီးချုပ်ဟာ အမေရိကန်အာကာသအေဂျင်စီနာဆာကို သွားရောက် လေ့လာလည်ပတ်ပြီးနောက် လက်မှတ်ရေးထိုးပွဲကို ဆက်လက်ပြုလုပ်ခဲ့တာပါ။

အမေရိကန်နိုင်ငံခြားရေးဝန်ကြီး အန်တိုနီဘလင်ကန်နှင့် ဂျပန်နိုင်ငံခြားရေးဝန်ကြီး ယိုရှီမာဆာ ဟာရာရှီတို့ဟာ ဂျပန်ဝန်ကြီးချုပ်ရှေ့မှောက်မှာ အဆိုပါ အမေရိကန်-ဂျပန်အာကာသပူးပေါင်းဆောင်ရွက်ရေး မူဘောင်သဘောတူညီချက် ကို လက်မှတ်ရေးထိုးခဲ့ကြပါတယ်။

အဲဒီသဘောတူညီချက်ထဲမှာ  ဂျပန်နှင့် အမေရိကန်နှစ်နိုင်ငံအကြား ငြိမ်းချမ်းရေးရည်ရွယ်ချက်နှင့် အာကာသပူးပေါင်း ဆောင်ရွက်ရေးအတွက် အခြေခံမူဘောင်တွေပါဝင်ပါတယ်။ဒီလက်မှတ်ရေးထိုးပြီးနောက် နှစ်နိုင်ငံဟာ သူတို့ပြည်တွင်း ဆက်လက်လုပ်ဆောင်ရမယ့်လုပ်ငန်းစဉ်တွေကို အပြီးသတ်ဆောင်ရွက်ရမှာဖြစ်တယ်လို့ ဂျပန်နိုင်ငံခြားရေးဝန်ကြီးဌာနက သတင်းထုတ်ပြန်ပါတယ်။

ဒီသဘောတူညီချက်ဟာ ဂျပန်နှင့်အမေရိကန်နှစ်နိုင်ငံအကြား  အာကာသပူးပေါင်းဆောင်ရွက်ရေးနှင့် အခြားနယ်ပယ် တွေမှာပူးပေါင်းဆောင်ရွက်ရေးတိုးမြှင့်ဆောင်ရွက်နိုင်မယ်လို့ ယုံကြည်တယ်လို့ ဂျပန်ဝန်ကြီးချုပ်ကီရှီဒါက ပြောပါတယ်။

ဒီမူဘောင်သဘောညီချက်ဟာ ကျွန်တော်တို့ရဲ့ပူးပေါင်းဆောင်ရွက်မှုမှာ အထွတ်အထိပ်အသစ်တစ်ခုကို ရောက်ရှိစေပါလိမ့်မယ်။ အာကသနည်းပညာနှင့်ပို့ဆောင်ရေး၊ လမျက်နှာပြင် စက်ရုပ်မစ်ရှင်တွေနှင့် ရာသီဥတုဆက်စပ် မစ်ရှင်တွေလို နယ်ပယ်တွေနှင့် ဂျပန်အာကာသယာဉ်မှူးတွေကို လကိုစေလွှတ်မယ့် ကျွန်တော်တို့ရဲ့ ဘုံမျှော်မြင်မှုတွေ မှာ မိတ်ဖက်ဖြစ်မှုပိုမိုခိုင်မာလာစေပါလိမ့်မယ်” လို့ အမေရိကန်နိုင်ငံခြားရေးဝန်ကြီးကပြောပါတယ်။

ဂျပန်နိုင်ငံခြားရေးဝန်ကြီးကလည်း ဒီသဘောတူညီချက်ကို အခြေပြုပြီး ဂျပန် အမေရိကန် အာကာသပူးပေါင်းဆောင်ရွက်မှုဟာ ပိုမိုပြီးနက်ရှိုင်းလာပြီး အနာဂတ်မှာ လူသားအားလုံးအတွက် အကျိုးရှိစေမယ်လို့သူရိုးသားစွာယုံကြည်တယ်လို့ ထပ်လောင်းပြောကြားခဲ့ပါတယ်။

Source AFP

Published 13 January 2023

ထိုင်းနိုင်ငံမြောက်ပိုင်းက တောအုပ်တစ်ခုအတွင်း သေနတ်ပစ်ခတ်ရင်း မူးယစ်ဆေးဝါးတရားမဝင်ကုန်ကူးသူတွေလို့ သံသယဖြစ်ဖွယ်ရှိတဲ့ လူ(၅)ဦးကို ထိုင်းစစ်တပ်က သတ်ပစ်လိုက်တယ်လို့ ဇန်နဝါရီ ၁၃ရက်သောကြာနေ့မှာ ထိုင်းအရာရှိတွေက ပြောပါတယ်။  ဒါဟာ (၂)လအတွင်း တတိယအကြိမ်မြောက် ကြောက်ဖက်ဖွယ် တိုက်ခိုက်မှုလည်း ဖြစ်ပါတယ်။

ထိုင်း၊လာအိုနှင့်မြန်မာ သုံးနိုင်ငံနယ်စပ် တရားမဝင်မူးယစ်ဆေးဝါးရောင်းဝယ်ဖောက်ကားတာတွေနှင့်  နာမည်ဆိုးနှင့် ကျော်ကြားတဲ့ ရွှေတြိဂံအနီး ထိုင်းနိုင်ငံနယ်စပ် ချင်းရိုင်မှာ ကြာသပတေးနေ့ မနက်စောစောပိုင်းက အဆိုပါ ဖြစ်ရပ် ဖြစ်ပွားခဲ့တာပါ။

ထိုင်းစစ်တပ် ကင်းလှည့်အဖွဲ့တစ်ဖွဲ့ဟာ ကျောပိုးအိတ်တွေလွယ်ထားတဲ့ သံသယဖြစ်စရာ လူငါးဦးပါးအုပ်စုတစ်စုကို ရှာဖွေဖို့ ကြိုးစားရာမှာ သူတို့က အရှာမခံတဲ့အပြင် အမျိုးအမည်မသိလက်နက်နှင့် စတင်ပစ်ခတ်ခဲ့တာလို့ ထိုင်းစစ်တပ်က ပြောပါတယ်။

“ မူးယစ်ဆေးဝါးတွေဟာ နယ်စပ်မှာ အလွန်ပျံ့နှံ့နေတယ်။ ဒါပေမယ့် တိုင်းမှူးက တရားဥပဒေစိုးမိုးရေးကို အရှိန်မြှင့် ဆောင်ရွက်ကြဖို့ မကြာသေးခင်က အမိန့်ပေးထားပါတယ်” လို့ ဖမောင်းလုပ်ငန်းအဖွဲ့ အရာရှိ ပရမ်ချိုင်း ပရမ်ကာမိုက အေအက်ဖ်ပီကိုပြောပါတယ်။

ပစ်ခတ်မှုဟာ ငါးမိနစ်လောက်ပဲကြာပြီး ထိုင်းစစ်သားတစ်ဦးမျှ ထိခိုက်မှုမရှိခဲ့ဘူးလို့ လုပ်ငန်းအဖွဲ့က သတင်းထုတ်ပြန်ပါတယ်။အဲဒီအုပ်စုထံမှ မီသမ်ဖက်တမင်း ဆေးလုံး ငါးသောင်းနှင့် သေနတ်တလက်သိမ်းဆည်းရမိပါတယ်။

ယခုပစ်ခတ်မှုမတိုင်ခင် ဒီတစ်ပတ်စောစောပိုင်းမှာ မူးယစ်ကုန်ကူးသူ (၆)ဦးနှင့် ဒီဇင်ဘာမှာ (၁၅)ဦးတို့ကိုလည်း အသေပစ်ခတ်ဖမ်းဆီးရမိခဲ့ပါတယ်။

အာရှဒေသမှာ ၂၀၂၁ခုနှစ်အတွင်း  ဆေးပြားပေါင်း တစ်ဘီလျံအထိ စံချိန်တင်ဖမ်းဆီးရမိခဲ့တယ်လို့ ကုလသမဂ္ဂက ပြောထားပါတယ်။

Source: AFP

#Thai_oldiers_kill_drug_traffickers

#Golden_Triangle

#Drug_traffickers_Thailand_Myanmar_Laos

Published 11 January 2023

အသစ်ခန့်အပ်လိုက်တဲ့ တရုတ်နိုင်ငံခြားရေးဝန်ကြီး ချင်ဂန် Qin Gang ဟာ အာဖရိကနှင့်အာရပ်နိုင်ငံအချို့ကို သွားရောက်တဲ့ခရီးစဉ်အတွင်း အီသီယိုပီးယားမဆိုက်ရောက်ခင် ဘင်္ဂလားဒေ့ရှ်နိုင်ငံမှာ ဇန်နဝါရီ ၁၀ရက်က  မကြေညာဘဲ ခရီးတစ်ထောက် ရပ်နားပြီး ဘင်္ဂလားဒေ့ရှ်နိုင်ငံခြားရေးဝန်ကြီး ဒေါက်တာအေကေ အက်ဒူလ်မိုမင်နှင့်တွေ့ဆုံခဲ့တယ်လို့ နိုင်ငံတကာသတင်းတွေက ဖော်ပြပါတယ်။

တရုတ်နှင့် ဘင်္ဂလားဒေ့ရှ်နိုင်ငံခြားရေးဝန်ကြီးနှစ်ဦးတွေ့ဆုံစဉ်မှာ သူတို့ဟာ မြန်မာနိုင်ငံက ဘင်္ဂလီတွေကိစ္စ အပါအဝင် အခြားနှစ်နိုင်ငံဆက်ဆံရေးနှင့် နိုင်ငံတကာရေးရာကိစ္စတွေကိုဆွေးနွေးခဲ့ကြတယ်လို့ သတင်းတွေကဆိုပါတယ်။

ပြဿနာဖြေရှင်းလို့မရသေးရင် ဒါဟာ အစွန်းရောက်ဝါဒတွေကြောင့်ဖြစ်နိုင်တယ်လို့ မိုမင်က တရုတ်နိုင်ငံခြားရေးဝန်ကြီးကိုပြောကြားခဲ့ပါတယ်။

မြနမာနိုင်ငံက ဘင်္ဂလီကိစ္စနှင့်ပတ်သက်ရင်   သူတို့ကို ပြန်ပို့ဖို့ကိစ္စ နှောင့်နှေးနေရတာဟာ  မြန်မာနိုင်ငံမှာပြဿနာအချို့ရှိနေတာကြောင့်လို တရုတ်နိုင်ငံခြားရေးဝန်ကြီးအသစ်ကပြောတယ်လို့ ဘင်္ဂလားဒေ့ရှ်နိုင်ငံခြားရေးဝန်ကြီးက ဒါကာမှာရှိတဲ့ သတင်းထောက်တွေကို ပြောကြားခဲ့ပါတယ်။

“ဒါပေမယ့်.. တရုတ်နိုင်ငံခြားရေးဝန်ကြီးက မျှော်လင့်ယုံကြည်ဆဲဖြစ်တယ်” လို့ ဒေါက်တာ မိုမင်ကပြောတဲ့အကြောင်း ဘင်္ဂလားဒေ့ရှ်မီဒီယာဖြစ်တဲ့ ဒါကာထရိုင်ဗျူးသတင်းစာကရေးသားပါတယ်။

“သူတို့ဟာ နိုင်ငံမဲ့ပြီး အနာဂတ်ဟာ မသေမချာမရေမရာဖြစ်နေကြရတယ်။ အဲဒါတွေကြော့်  အစွန်းရောက်ဝါဒနှင့် အကြမ်းဖက်ဝါဒတွေကို သူတို့ မလွန်ဆန်နိုင်ဖြစ်သွားနိုင်တယ်။ ရလာဒ်အားဖြင့် ငြိမ်းချမ်းရေးဟာ ပျက်စီးသွားလိမ့်မယ်” လို့ သူကပြောတယ်လို့ ဒါကာသတင်းစာကရေးပါတယ်။

ပြဿနာကို အမြန်ုဆုံးပြေလည်သွားဖို့ တရုတ်ဘက်ကနေ အထူးအရေးယူဆောင်ရွက်မှုတွေပြုလုပ်ဖို့ ဘင်္ဂလားဒေ့ရှ်နိုင်ငံခြားရေးဝန်ကြီးက ကြိုးစားနေပါတယ်။

“ အနည်းဆုံးတော့ သူ့အနေနှင့် လုပ်ငန်းစဉ်ကိုစတင်သင့်တယ်” လို့ မိုမင်ကပြောပါတယ်။

Source” Dhaka Tribune

#Myanmar_Bangladesh

#China_Bangladesh

#Myanmar_China

Published 11 Jan 2023

ကမ္ဘောဒီးယားအကြီးတန်းအရာရှိတစ်ဦးဟာ အာဆီယံအတွင်းရေးမှူးချုပ်တာဝန်ကို စတင်ထမ်းဆောင်ပါတယ်။ ကမ္ဘောဒီးယားဝန်ကြီးချုပ်ရုံးဝန်ကြီးဟောင်းတစ်ဦးဖြစ်တဲ့ ကောင်းကင်မ်ဟွန်း Kao Kim Hourn ဟာ အာဆီယံအဖွဲ့ကြီးရဲ့ အတွင်းရေးမှူးချုပ်တာဝန်ကို ဘရူးနိုင်းထံကနေ လွှဲပြောင်းရယူခဲ့တာဖြစ်ပါတယ်။

“ အာဆီယံရဲ့ အရေးကြီးတဲ့သမိုင်းမှာ နောက်စာမျက်နှာဟာ စိန်ခေါ်မှုတွေ၊အခွင့်အလမ်းတွေနှစ်ခုစလုံးပါဝင်တဲ့ အသစ်နှင့်ထွန်းသစ်စ ဦးတည်မှုတွေကနေ ပုံဖော်ပေးပါလိမ့်မယ်” လို့ ကောင်းက ပြောပါတယ်။

အဖွဲ့ဝင်တွေသာညီညွတ်ရင် အာဆီယံဟာ ဘာတစ်ခုကိုမျှ မအောင်မြင်စရာမရှိဘူး လို့လည်း သူကပြောပါတယ်။

အာဆီယံအတွင်းရေးမှူးချုပ်တာဝန်လွှဲပြောင်းပွဲကို တနင်္လာနေ့တုန်းက ယခုနှစ် အာဆီယံအလှည့်ကျဥက္ကဋ္ဌဖြစ်လာတဲ့ အင်ဒိုနီးရှားနိုင်ငံ ဂျာကာတာမှာရှိတဲ့ အာဆီယံ ရုံးချုပ်မှာ ကျင်းပပေးခဲ့တာဖြစ်ပါတယ်။

အတွင်းရေးမှူးချုပ်ဟောင်း လင်မ်ဂျုပ်ဟွိုင်ကလည်း အခမ်းအနားကို အင်ဒိုနီးရှားနိုင်ငံခြားရေးဝန်ကြီး ရက်တနိုမာဆူဒီ နှင့်အတူ တက်ရောက်ခဲ့ပါတယ်။

မြန်မာနိုင်ငံအရေးနှင့်ပတ်သက်ပြီး တင်းမာတဲ့သဘောထားရပ်တည်ဖို့အတွက် အာဆီယံနိုင်ငံတွေအကြား သဘောထား ကွဲပြားမှုတွေရှိခဲ့ပါတယ်။ အင်ဒိုနီးရှားနှင့်မလေးရှားတို့က တင်းမာတဲ့သဘောထားရှိကြပြီး ကမ္ဘောဒီးယားနင့်ထိုင်းတို့က ဖြန်ဖြေစေ့စပ်ပေးလိုတဲ့ သဘောထားရှိနေခဲ့ကြတာဖြစ်ပါတယ်။

Source:NHK

#Kao_Kim_Hourn

#Secretary_General_ASEAN

#ASEAN_Myanmar

Published 8 Jan 2023

ဩစတြေလျနိုင်ငံသား မစ္စတာ ရှောင်တာနယ်လ် Mr. Sean Turnell အပေါ် ပြစ်ဒဏ်လွတ်ငြိမ်းခွင့်ကို ပယ်ဖျက်လိုက်တယ်လို့ နစက အစိုးရက ပြီးခဲ့တဲ့ ၂၀၂၂ခုနှစ် ဒီဇင်ဘာ (၆)ရက်နေ့က အမိန့်ထုတ်ပြန်ကြေညာခဲ့ကြောင်းသိရှိရပါတယ်။

အဆိုပါအမိန့်အမှတ် ၇၉/၂၀၂၂ ထဲမှာ ၂၀၂၂ခုနှစ်နိုဝင်ဘာလမှာ ပြစ်ဒဏ်မှလွတ်ငြိမ်းခွင့်ပြုခဲ့တဲ့ Mr. Sean Turnell ဟာ   ပြစ်ဒဏ်မှ လွတ်ငြိမ်းခွင့်ပြုပြီးနောက် ကျန်ရှိနေသည့် ပြစ်ဒဏ် ကာလမစေ့မီအတွင်း ၎င်း၏လူမှုကွန်ရက်စာမျက်နှာများတွင် လည်းကောင်း၊ သတင်းမီဒီယာများနှင့် ဆက်သွယ်ပြောကြားရာတွင်လည်းကောင်း မြန်မာနိုင်ငံနှင့်ပတ်သက်၍ မဟုတ်မမှန်ရေးသားဖော်ပြခြင်း၊ ပြောဆိုခြင်းများသည် ၎င်းအား ပြစ်ဒဏ်လွတ်ငြိမ်းခွင့်ပေးစဉ်က သတ်မှတ်ထားသည့် စည်းကမ်းချက်များကို ဖောက်ဖျက်ရာရောက်ကြောင်း တွေ့ရှိရတယ်လို့ ဖော်ပြပါရှိပါတယ်။

နစက ဥက္ကဋ္ဌသည် မြန်မာနိုင်ငံ၏ တည်ဆဲဥပဒေများအရ ပြစ်ဒဏ် ကျခံလျက်ရှိသော ဩစတြေးလျနိုင်ငံသား Mr. Sean Turnell အား နှစ်နိုင်ငံဆက်ဆံရေးကို ရှေးရှုသော အားဖြင့်လည်းကောင်း၊ လူသားချင်းစာနာထောက်ထားမှုကို အလေးထားသောအားဖြင့်လည်းကောင်း ၂၀၂၂ ခုနှစ်၊ နိုဝင်ဘာလ ၁၇ ရက်နေ့တွင် နိုင်ငံတော်စီမံအုပ်ချုပ်ရေးကောင်စီ၏ အမိန့်အမှတ် ၇၄/၂၀၂၂ ဖြင့် နောက်တစ်ကြိမ်ပြစ်မှုထပ်မံကျူးလွန်ပါက ၎င်းပြစ်ဒဏ်အပြင် ယခုကျခံရန်ကျန်ရှိသော ပြစ်ဒဏ်များကိုပါ ဆက်လက်ကျခံပါမည် ဟူသော စည်းကမ်းသတ်မှတ်ချက်ဖြင့် ကျခံရန်ကျန်ရှိနေသည့် ပြစ်ဒဏ်များကို လွတ်ငြိမ်းခွင့်ပြုခဲ့တာဖြစ်တယ်လို့လည်း အဆိုပါ အမိန့် ၇၉/၂၀၂၂ က ဆိုပါတယ်။

အဲဒါကြောင့်  ဩစတြေးလျနိုင်ငံသား Mr. Sean Turnell အား နစကရဲ့ အမိန့်အမှတ် ၇၄/၂၀၂၂ ဖြင့် ပြစ်ဒဏ်လွတ်ငြိမ်းခွင့်ပေးခဲ့ခြင်းကို ရာဇဝတ်ကျင့်ထုံးဥပဒေပုဒ်မ ၄၀၁၊ ပုဒ်မခွဲ (၃) အရ ပယ်ဖျက်လိုက်တယ်လို့ အမိန့်ထုတ်ပြန်ထားတာဖြစ်ပါတယ်။

ဒေါ်အောင်ဆန်းစုကြည်ရဲ့ စီးပွားရေးအကြံပေးလုပ်ခဲ့တဲ့ ပါမောက္ခရှောင်တာနယ်ဟာ  နိုင်ငံတော်လျှို့ဝှက်ချက်ဥပဒေနှင့် ပြစ်ဒဏ်စီရင်ခဲ့ပြီးနောက် ပြီးခဲ့တဲ့နှစ်၂၀၂၂ခုနှစ် နိုဝင်ဘာလမှာ အကျဉ်းထောင်ကနေ နစက ဥက္ကဋ္ဌရဲ့ လွတ်ငြိမ်းအမိန့်အရ ထောင်မှလွတ်မြောက်လာသူဖြစ်ပါတယ်။

ymg/knl

#Sean_Turnell

#Myanmar_Politics