Published 26 Feb 2023

ကမ္ဘာ့နိုင်ငံများနည်းတူ မြန်မာနိုင်ငံတွင်လည်း ကုန်ဈေးနှုန်းကြီးမြင့်မှုကိုတွေ့ကြုံနေကြရတယ်လို့ နစက ဥက္ကဋ္ဌ၊တပ်မတော်ကာကွယ်ရေးဦးစီးချုပ် ဗိုလ်ချူပ်မှူးကြီးမင်းအောင်လှိုင်ကပြောကြားပါတယ်။

ဖေဖော်ဝါရီ ၂၆ရက်က ရခိုင်ပြည်နယ် စစ်တွေမြို့ကိုရောက်ရှိနေတဲ့ ဗိုလ်ချူပ်မှူးကြီးမင်းအောင်လှိုင်ဟာ အနောက်ပိုင်းတိုင်းစစ်ဌာနချုပ်၊ စစ်တွေတပ်နယ်ရှိ အရာရှိ၊ စစ်သည်၊ မိသားစုများအား နယ်မြေခံတပ်နယ်ခန်းမ၌ သွားရောက်တွေ့ဆုံပြီး  နိုင်ငံရဲ့အခြေအနေကို ပြောကြားရာမှာ ထည့်သွင်းပြောကြားခဲ့တာဖြစ်တယ်လို့ နစကပြန်ကြားရေးရဲ့သတင်းထုတ်ပြန်ချက်အရသိရပါတယ်။

မိမိတို့နိုင်ငံတွင် စိုက်ပျိုးမွေးမြူရေးလုပ်ငန်းများဆောင်ရွက်ရန်အတွက် ရေနှင့်မြေများ၊သဘာဝသယံဇာတများနှင့် လူသားအရင်းအမြစ်များရှိပေမယ့် စဉ်ဆက်မပြတ်ကြိုးစားလိုစိတ်နှင့် အလုပ်လုပ်ကိုင်လိုမှုအားနည်းခြင်းကြောင့်  တိုးတက်မှုများနောက်ကျလျက်ရှိသည်ကို တွေ့ရကြောင်း၊ ထို့ကြောင့် ပြည်တွင်း ကုန်ထုတ်လုပ်မှုလုပ်ငန်းများ တိုးတက်အောင် ဆောင်ရွက်၍ နိုင်ငံစီးပွား ဖွံ့ဖြိုးတိုးတက်အောင်ကြိုးပမ်းဆောင်ရွက်လျက်ရှိတယ်လို့ ဗိုလ်ချူပ်မှူးကြီးက ရှင်းလင်းပြောဆိုခဲ့ပါတယ်။

စစ်သည်များအနေဖြင့်လည်း မိမိတို့၏အတန်းပညာများ မြင့်မားရေးအတွက် တပ်မတော်ပညာရေးကျောင်းများတွင် မှန်မှန်ကန်ကန် တက်ရောက်သင်ကြားသွားရန်လိုကြောင်း၊ တပ်မတော်သားများ၏ တစ်ဦးချင်း စွမ်းရည်တိုးတက်ပြီး စစ်လက်နက်ပစ္စည်းများ၏ စွမ်းအားနှင့် စွမ်းပကားမြင့်မားအောင်  ဆောင်ရွက်နိုင်မည်ဆိုပါက တပ်မတော်အင်အားရှိမည်ဖြစ်ကြောင်း၊တစ်ဦးချင်း စွမ်းရည်များကို အသုံးချ၍ တပ်မတော် တစ်ရပ်လုံးစွမ်းရည် ရှိအောင်ဆောင်ရွက်ရမည် ဖြစ်ကြောင်းလည်း နစက ဥက္ကဋ္ဌက ဆက်လက်ပြောကြားခဲ့ပါတယ်။

ထို့အပြင် ၂၀၂၀ ပြည့်နှစ် ပါတီစုံ ဒီမိုကရေစီ အထွေထွေရွေးကောက်ပွဲတွင် ဖြစ်ပေါ်ခဲ့သည့် မဲမသမာမှုဖြစ်စဉ်များကို သင်ခန်းစာယူပြီးလာမည့်ရွေးကောက်ပွဲတွင် မဲစာရင်းများမှန်ကန်မှုရှိစေရေးအတွက် မြေပြင်စာရင်းကောက်ယူခြင်းလုပ်ငန်းများအပါအဝင် လုပ်ငန်းစဉ်များအတိုင်း စနစ်တကျ စီမံဆောင်ရွက်လျက်ရှိတဲ့ အခြေအနေတွေကိုလည်း ဗိုလ်ချူပ်မှူးကြီးကရှင်းလင်းပြောဆိုခဲ့တယ်လို့ သတင်းထုတ်ပြန်ချက်မှာဖော်ပြထားပါတယ်။

အဆိုပါ တွေ့ဆုံပွဲသို့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌတပ်မတော်ကာကွယ်ရေးဦးစီးချုပ်နှင့်အတူ ဇနီး ဒေါ်ကြူကြူလှ၊ ကာကွယ်ရေးဦးစီးချုပ် (ရေ) ဗိုလ်ချုပ်ကြီး မိုးအောင်နှင့် ဇနီး၊ ကာကွယ်ရေးဦးစီးချုပ် (လေ) ဗိုလ်ချုပ်ကြီးထွန်းအောင်နှင့် ဇနီး၊ ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများနှင့် ဇနီးများ၊ အနောက်ပိုင်းတိုင်းစစ်ဌာနချုပ်တိုင်းမှူး ဗိုလ်ချုပ် ထင်လတ်ဦးနှင့် တာဝန်ရှိသူများ၊ အနောက်ပိုင်းတိုင်းစစ်ဌာနချုပ်၊ စစ်တွေတပ်နယ်မှ အရာရှိ၊ စစ်သည်၊ မိသားစုများ တက်ရောက်ခဲ့ကြပါတယ်။

နစက ဥက္ကဋ္ဌနှင့်အဖွဲ့ဟာ ခရီးစဉ်အတွင်း စစ်တွေမြို့ကျက်သရေဆောင် လောကာနန္ဒာ စေတီတော်မြတ်ကြီးသို့ သွားရောက်ဖူးမြော်ကြည်ညိုခဲ့ကြတယ်လို့ သတင်းထုတ်ပြန်ချက်အရသိရပါတယ်။

YMG/knl

#မြန်မာ

#ဗိုလ်ချူပ်မှူးကြီးမင်းအောင်လှိုင်

#နစကဥက္ကဋ္ဌ

#စစ်တွေခရီးစဉ်

#YangonMediaGroup

#Myanmar_News

Published 26 Feb 2023

လာမည့်ရွေးကောက်ပွဲများတွင် ရွေးကောက်ပွဲမဲလက်မှတ်အသုံးပြုရန်မလိုဘဲ အီလက်ထရွန်းနစ်မဲပေးစက် (EVM: Electronic Voting Machine) ဖြင့်မဲပေးနိုင်တော့မယ်လို့ ပြည်ထောင်စုရွေးကောက်ပွဲကော်မရှင်က ထုတ်ဖော်ပြောဆိုလိုက်ပါတယ်။

ယနေ့ ဖေဖော်ဝါရီ ၂၆ရက်ထုတ် မြန်မာ့အလင်းသတင်းစာပါ  ပြည်ထောင်စုရွေးကောက်ပွဲကော်မရှင်မှ အဆင့်မြင့်တာဝန်ရှိသူတစ်ဦးလို့ ယူဆရတဲ့ ကိုရွှေမိုး(UEC)ဟူသည့် ကလောင်ဝှက်နှင့် ရေးသားတဲ့ ရွေးကောက်ပွဲအတွက် မြန်မာအီလက်ထရွန်းနစ်မဲပေးစက်( MEVM)ခေါင်းစဉ်တပ်ဆောင်းပါးတစ်ပုဒ်မှာ အဆိုပါကိစ္စအတည်ပြုရေးသားထားခြင်းဖြစ်ပါတယ်။

ပြည်ထောင်စုရွေးကောက်ပွဲကော်မရှင်မှ တရားဝင်အတည်ပြုထုတ်ပြန်ထားခြင်းမရှိသေးသော်လည်း အဆိုပါ ဆောင်းပါးအရ လာမည့်ရွေးကောက်ပွဲများတွင် အီလက်ထရွန်းနစ်မဲပေးစနစ်ဖြင့်မဲပေးရန် သေချာသည့် သဘောသက်ဝင်နေပါတယ်။

အာဂျင်တီးနား၊ ဘရာဇီး၊ ပြင်သစ်၊ အမေရိကန် ပြည်ထောင်စု၊ အိန္ဒိယ၊ ဘယ်လ်ဂျီယံ၊ ဗင်နီဇွဲလား ကဲ့သို့သော နိုင်ငံများ အပါအဝင် ကမ္ဘာ့နိုင်ငံပေါင်း ၃၄ နိုင်ငံတို့တွင် မဲပေးစက် (EVMs) များ အပါအဝင် E-voting စနစ်ကို တွင်တွင်ကျယ်ကျယ် အသုံးပြုလျက်ရှိကြပြီး  အဆိုပါ ကမ္ဘာ့နိုင်ငံများတွင် အသုံးပြု လျက်ရှိသော အီလက်ထရွန်နစ် မဲပေးစက်များကိုလေ့လာ၍ မြန်မာ နိုင်ငံရှိ မဲဆန္ဒရှင် ပြည်သူလူထု၏ စာတတ်မြောက်မှုနှုန်း၊ နားလည်နိုင်မှုအခြေအနေတို့နှင့် အကိုက်ညီဆုံး ဖြစ်သော ဒီဇိုင်းကို တီထွင် ထားခြင်းဖြစ်တယ်လို့လည်း ကိုရွှေမိုး(UEC) ကရေးသားပါတယ်။

မဲပေးခြင်းမစတင်မီ၌ ပါတီ/တစ်သီးပုဂ္ဂလ လွှတ်တော်ကိုယ်စား လှယ်လောင်းများ၏ မဲရုံကိုယ်စားလှယ်များအနေဖြင့် စမ်းသပ်မဲပေး၍ စက်ကိုစမ်းသပ်နိုင်ပြီး စက်တွင် သိမ်းဆည်းထားသော ရလဒ်များနှင့် မဲပုံးအတွင်း စမ်းသပ်မဲပေးထားသော မဲစက္ကူဖြတ်ပိုင်းများ ကိုက်ညီမှု ရှိ မရှိလည်း စစ်ဆေးနိုင်မည်ဖြစ်တယ်လို့လည်း အဆိုပါဆောင်းပါးမှာရေးသားထားပါတယ်။

ထိုသို့စမ်းသပ်စစ်ဆေးပြီးမှသာ မဲရုံဖွင့်၍ မဲပေးခြင်းစတင်မည်ဖြစ်မယ်လို့လည်းဆိုပါတယ်။

ထို့ပြင် ဘက်ထရီစနစ် အသုံးပြုထား၍ ပြင်ပလျှပ်စစ်ဓာတ်အား လိုအပ်ခြင်းမရှိသဖြင့် ကျေးရွာများ၌ပါ အသုံးပြုနိုင်မည်ဖြစ်ပါသည်။ မဲရလဒ်များ သိမ်းဆည်း သည့် ထိန်းချုပ်စက်သည် လုံခြုံရေးကြိုးဖြင့် ပိတ်ထားမည့်အပြင် မဲရုံအတွင်းရှိ အများမြင်သာသောနေရာ၌ မဲရုံမှူး/မဲရုံအဖွဲ့ဝင်က ကိုင်တွယ်အသုံးပြုမည် ဖြစ်တယ်လို့လည်း ဖော်ပြထားပါတယ်။

မဲပေးစက်တွင် ရွေးကောက်ပွဲဝင် ပါတီ/တစ်သီးပုဂ္ဂလလွှတ်တော် ကိုယ်စားလှယ်လောင်းအပေါ် မဲဆန္ဒရှင်ပြည်သူတစ်ဦးချင်းစီက ရွေးချယ်မဲပေးလိုက်သည့် အရေအတွက်ကိုသာ မှတ်သားထားမည် ဖြစ်ပြီး မည်သူမည်ဝါက မဲပေးသည်ဆိုသည့်အချက်ကို ထည့်သွင်းထားခြင်းမရှိ၍ မဲဆန္ဒရှင်ပြည်သူတို့၏ လျှို့ဝှက်ဆန္ဒပြုခြင်းကို မည်သို့မျှ ထိခိုက်စေမည် မဟုတ်လို့လည်း ကိုရွှေမိုး(UEC)က ရေးသားပါတယ်။

မြန်မာအီလက်ထရွန်နစ်မဲပေးစက်(MEVM)သည် မြန်မာနိုင်ငံရှိ ပြည်သူလူထု၏ စာတတ်မြောက်မှုနှုန်းများပေါ် မူတည်၍ တီထွင်ထားခြင်း ဖြစ်သည်နှင့်အညီ အသုံးပြုရာတွင် လွယ်ကူရိုးရှင်းသော မဲပေးစက်ဖြစ်တယ်လို့လည်းဆိုပါတယ်။

ပြည်ထောင်စုရွေးကောက်ပွဲကော်မရှင်အနေဖြင့် မဲပေးစက်နှင့်ပတ်သက်၍ အများပြည်သူထံသို့ ပညာပေးရေး ဆောင်ရွက်ရာတွင် မီဒီယာများမှတစ်ဆင့် ဆောင်ရွက်ခြင်းအပြင် မဲပေးစက်အား ပြည်သူများအနေဖြင့် လက်တွေ့စမ်းသပ်အသုံးပြုနိုင်ရေးအတွက်လည်း စီစဉ်ဆောင်ရွက် သွားမယ်လို့လည်း‌ဆောင်းပါးရှင်ကပြောပါတယ်။

အဲဒီအပြင်  မဲပေးစက်အသုံး ပြု၍ မဲပေးနိုင်ရန်အတွက် လိုအပ်သည့် ဥပဒေ၊ နည်းဥပဒေများ ပြင်ဆင်ခြင်းကိုလည်း ဆောင်ရွက်လျက်ရှိပြီး မဲပေးစက်ဖြင့် မဲပေးခြင်း၊ မဲရေတွက်ခြင်း၊ စမ်းသပ်မဲပေးခြင်းများ အစရှိသည့် နည်းလမ်းများကို သက်ဆိုင်ရာလွှတ်တော် ဥပဒေ၊ နည်းဥပဒေများတွင် ထည့်သွင်းပြင်ဆင်သွားမည် ဖြစ်ကာ မဲရုံမှူးလက်စွဲများတွင်လည်း အသေးစိတ် ထည့်သွင်းသွားမယ်လို့လည်း‌ ဆောင်းပါးအရသိရပါတယ်။

ပြည်ထောင်စုရွေးကောက်ပွဲကော်မရှင်ဟာ အဆိုပါမဲပေးစက်အသုံးပြုပုံများနှင့်ပတ်သက်၍ နစက ဥက္ကဋ္ဌဗိုလ်ချူပ်မှူးကြီး မင်းအောင်လှိုင်အား ယခုနှစ် ဖေဖော်ဝါရီ(၉)ရက်နေ့က သွားရောက်ရှင်းလင်းပြသခဲ့ကြတယ်လို့ နစကပြန်ကြားရေးက သတင်းထုတ်ပြန်ထားပါတယ်။

YMG/knl

#မြန်မာအီလက်ထရွန်းမဲပေးစက်

#မြန်မာရွေးကောက်ပွဲ

#မြန်မာနိုင်ငံရေး

#YangonMediaGroup

Published 26 Feb 2023

ဝေဟင်မှဝေဟင်ပစ်ဒုံးကျည်တပ်ဆင်ထာတဲ့ တရုတ် တိုက်လေယာဉ် J-11 ဟာ တောင်တရုတ်ပင်လယ် ပါစယ်ကျွန်းများအနီး ကောင်းကင်ယံမှာ အမေရိကန်ကင်းလှည့်လေယာဉ်တစ်စီးကို ကြားဖြတ်ဟန့်တားခဲ့ရတယ်လို့ စီအင်န်အင်န်က သတင်းထုတ်လွှင့်ခဲ့ပါတယ်။

အမေရိကန်ရေတပ် P-8 Poseidon လေယာဉ်ဟာ တောင်တရုတ်ပင်လယ်ပေါ် အမြင့်ပေး ၂၁.၅၀၀ခန့်မှာ ပျံသန်းနေစဉ် လေယာဉ်အမြီးမှာ ကြယ်နီတပ်ထားပြီး ဒုံးကျည်တွေတပ်ဆင်ထား တဲ့ တရုတ်လေယာဉ်တစ်စီးကို လေယာဉ်မှူးကမြင်ခဲ့တာဖြစ်တယ်လို့ စီအင်န်အင်န်က သတင်းထုတ်ပြန်ပါတယ်။

အဆိုပါတရုတ်ဂျက်လေယာဉ်ဟာ အမေရိကန်လေယာဉ်တောင်ပံနှင့် ပေပေါင်း ရာဂဏန်းမျှသာ ကွာဝေးတဲ့နေရာကနေ ၁၅မိနစ်ခန့် တောက်လျောက်စောင့်ကြပ်ပျံသန်းခဲ့ပြီးမှ ပြန်လှည့်သွားတယ်လို့ဆိုပါတယ်။

တရုတ်ပြည်သူ့လွတ်မြောက်ရေးတပ်မတော်ထံမှ သတင်းစကားတစ်ခုကို အမေရိကန်ကင်းလှည့်လေယာဉ်က ရရှိခဲ့ပါတယ်။ အဲဒီသတိပေးသတင်းအချက်အလက်မှာ အမေရိကန်လေယာဉ်ဟာ တရုတ်လေပိုင်နက်နှင့် ရေမိုင် ၁၂ မိုင်အကွာအထိရောက်နေတယ်။ထပ်ပြီးနီးကပ်မလာဖို့နှင့် နီးကပ်လာရင် ဖြစ်သမျှတာဝန်အားလုံးယူရလိမ့်မယ် လို့ သတိပေးခဲ့တာဖြစ်ပါတယ်။

တောင်တရုတ်ပင်လယ်တစ်ခုလုံးကို တရုတ်ကသူပိုင်တယ်လို့ပြောထးပြီး အခြားနိုင်ငံတွေက အဲဒီမှာ စစ်ရေးလှုပ်ရှားမှုတွေပြုလုပ်တဲ့အခါ ပြင်းထန်စွာကန့်ကွက်လို့ရှိခဲ့ပါတယ်။ အဲဒီရေမျက်နှာပြင်မှာ တစ်နှစ်တစ်နှစ်ကို ကုန်စည်ပေါင်း အမေရိကန် ၅ ထရီလီယံတန်ဖိုးခန့် ပို့ဆောင်ပေးနေတာဖြစ်ပါတယ်။

Source: IndiaToday

#တောင်တရုတ်ပင်လယ်

#အမေရိကန်ကင်းလှည့်လေယာဉ်

#တရုတ်တိုက်လေယာဉ်_J-11

#ကြားဖြတ်ဟန့်တား

#YangonMediaGroup

#WorldNews

Published 24 Feb 2023

Nord Stream ပိုက်လိုင်းကို ဖျက်ဆီးပစ်တဲ့နောက်ကွယ်မှ, အမေရိကန်ပြည်ထောင်စုရှိနေတယ်လို့ အမေရိကန်သတင်းစာဆရာ ဆေမော ဟတ်ချ်က ရေးသားခဲ့တဲ့အတိုင်းဟုတ်တယ်ဆိုရင် ဂျာမန်အစိုးရအနေနှင့် အမေရိကန်နှင့် ဆက်ဆံရေးကို ပြန်လည်သုံးသပ်ရလိမ့်မယ်လို့ ဂျာမန်အရာရှိတစ်ဦးကပြောလိုက်ပါတယ်။

၂၀၂၂ခုနျစ် ဇွန်လက အမေရိကန်နှင့်နော်ဝေးတို့ဟာ ထိပ်တန်းလျှို့ဝှက် စစ်ဆင်ရေးတစ်ခုကိုပူးပေါင်းကြံစည်ခဲ့ကြြပြီးနောက် သုံးလအကြာမှာ အဆိုပါ Nord Stream ပိုက်လိုင်းလေးလိုင်းထဲက သုံးလိုင်းကို အဝေးထိန်းစနစ်နှင့် ဖောက်ခွဲဖျက်ဆီးခဲ့ကြတယ်လို့ ယခုနှစ်ဖေဖော်ဝါရီလဆန်းပိုင်းက ပူလစ်ဇာဆုရ အမေရိကန်သတင်းစာဆရာ ဆေမောဟတ်ချ်က ဖွင့်ချရေးသားခဲ့ပါတယ်။

ပြီးခဲ့တဲ့ စက်တင်ဘာလက Nord Stream ပိုက်လိုင်းဖောက်ခွဲဖျက်ဆီးမှုဟာ အကြမ်းဖက်တိုက်ခိုက်မှုတစ်ခုဖြစ်တယ်လို့ ဂျာမာန်ဖက်ဒရယ်ပါလီမန်ရဲ့ နိုင်ငံခြားရေးရာကော်မတီအဖွဲ့ဝင် ပက်တာဘိုင်စထရွန်က တရုတ်မီဒီယာအုပ်စုကိုပြောခဲ့ပါတယ်၊

“ အစိုးရနှစ်ခုက ဂျာမနီအပေါ် ဒီအကြမ်းဖက်တိုက်ခိုက်မှုလုပ်ခဲ့တယ်ဆိုရင် အမေရိကန်ဟာ ကျွန်တော်တို့ရဲ့  မဟာမိတ်မဟုတ်တော့သလို ကိုယ့်အကျိုးစီးပွားသက်သက်ကြည့်တဲ့ သိပ်တစ်ကိုယ်ကောင်းဆန်သူလည်း ဖြစ်တယ်ဆိုတာကိုပြန်စဉ်းစားသုံးသပ်ရလိမ့်မယ်။ အဲဒါကြောင့် အမေရိကန်ပြည်ထောင်စုနှင့်ပတ်သက်တဲ့ ဂျာမနီရဲ့ နိုင်ငံခြားရေးမူဝါဒကို သိသိသာသာ ပြောင်းလဲရလိမ့်မယ်Ó လို့ သူကပြောပါတယ်။

တစ်နှစ်ကြာ ယူကရိန်းပဋိပက္ခနှင့်ပတ်သက်ပြီးတော့လည်း ကာလရှည်ပဋိပက္ခတစ်ခုကို မီးမွှေးခြင်းဖြင့် အမေရိကန်ဟာ အမြတ်အကြီးအကျယ်ထုတ်နေတယ်လို့လည်း ဘိုင်စထရွန်က စွပ်စွဲလိုက်ပါတယ်။

“ အစကနေ အဆုံးအထိ ကြည့်ရင် အမေရိကန်ဟာ ဒီစစ်ပွဲထဲကို ရုရှားကိုဆွဲသွင်းခဲ့တယ်ဆိုတာ သိပ်ကိုထင်ရှားတယ်။ အထူးသဖြင့် ယခုနေအခါမှာ  အမေရိကန်ဟာ ယူကရိန်းကို စစ်ပွဲဆက်တိုက်ဖို့ မြှောက်ပေးနေတယ်။ အများသိကြရတဲ့ သတင်းအချက်အလက်တွေအရ ပြီးခဲ့တဲ့ နွေဦးတုန်းက အစ္စတန်ဘူမှာ ရုရှားနှင့်ယူကရိန်းကိုယ်စားလှယ်တွေဟာ ငြိမ်းချမ်းရေးသဘောတူညီချက်တွေရဖို့ အတော်ကြီးနီးကပ်ခဲ့ကြတယ်။ ဒါပေမယ့် အဲဒီတုန်းက ဗြိတိန်ဝန်ကြီးချုပ် ဘောရစ်ဂျန်ဆင်နှင့် အမေရိကန်တွေက ကြားဝင်စွက်ဖက်ခဲ့ကြတယ်။ သူတို့ဟာ မီးလောင်ရာလေပင်ဆက်လုပ်နေ ကြပြီးယူကရိန်းကိုလက်နက်တွေဆက်ပေးမယ်လို့ ကတိတွေပေးခဲ့ကြတယ်” လို့လည်း သူကပြောပါတယ်။

အမေရိကန်က  ပထဝီနိုင်ငံရေးဩဇာတွေ တက်လာနေပြီး လက်နက်တွေရောင်းပြီး စွမ်းအင်တွေတင်ပို့နေပေးနေရာကနေ အမြတ်တွေထွက်လာပေမယ့် ရုရှားဆီက စွမ်းအင်ကိုမှီခိုနေရတဲ့ ဂျာမနီအဖို့တော့ အမေရိကန်နှင့်ဆန့်ကျင်ခြားနားစွာ အရှုံးကြီးရှုံးနေတယ် လို့လည်း သူကပြောပါတယ်။

“ စစ်ပွဲကရှည်ကြာတယ်။ ဂျာမနီ အထူးသဖြင့်ဂျာမန်စက်မှုလုပ်ငန်းတွေနှင့် ပြည်သူတွေဟာ ဒီအပေါ်မှာ အဲဒီဒဏ်တွေကို ခံနေကြရတယ်။ ရုရှားအပေါ် ညံ့ဖျင်းတဲ့ နိုင်ငံရေးဆုံးဖြတ်ချက်တွေနှင့် အရေးယူပိတ်ဆို့မှုတွေဟာ စွမ်းအင်ဈေးနှုန်းတွေ မြင့်တက်လာတာပဲ အဖတ်တင်တယ်။ လူတွေက စစ်ပွဲခပ်မြန်မြန်ပြီးဆုံးဖို့ သိပ်ကိုလိုလားနေကြတယ်” လို့ သူကပြောကြားခဲ့ပါတယ်။

Source: CCTV

#NordStreamပိုက်လိုင်း

#ဂျာမနီ

#အမေရိကန်

#ထိပ်တန်းလျှို့ဝှက်စစ်ဆင်ရေး

#WorldNews

#YangonMediaGroup

Published 22 Feb 2023

ရုရှားအနေနှင့် အမေရိကန်ပြည်ထောင်စုနှင့် နောက်ဆုံးလက်ကျန် နျူကလီးယား သဘောတူစာချုပ်မှာ ပါဝင်တော့မှာ မဟုတ်ဘူးလို့  သမ္မတဗလက်ဒီမာ ပူတင်က အင်္ဂါနေ့က ကြေညာခဲ့ပါတယ်။ ရုရှားပါလီမာန်ကို ပြောကြားတဲ့ သူ့ရဲ့ မိန့်ခွန်းမှာ ပူတင်က ရုရှားဟာ အဆိုပါစာချုပ် New Start Treaty ကနေ ထွက်မှာမဟုတ်ပေမယ့် ယာယီအားဖြင့်တော့ ပါဝင်မှုဆိုင်းငံ့မယ်လို့ ပြောခဲ့ပါတယ်။

ရုရှားနှင့် အမေရိကန်တို့ဟာ တစ်နိင်ငံနှင့်တစ်နိုင်ငံ ပြိုင်ဘက်တွေလိုမမြင်ခဲ့ကြတဲ့ ယခုအခြေအနေနှင့် လုံးဝခြားနားတဲ့ အခြေအနေမှာ စာချုပ်ကို သဘောတူခဲ့ကြတာဖြစ်တယ်လို့လည်း ပူတင်ကရှင်းပြခဲ့ပါတယ်။

ဒါပေမယ့် ယခုအခါမှာ  အမေရိကန်ဟာ ရုရှားကို ရာဇသံပေးရုံတင်မကဘဲ နေတိုးကိုယ်တိုင်က  စာချုပ်ရဲ့ အစိတ်အပိုင်းအဖြစ် ပါဝင်ဖို့ လျှောက်ခဲ့တယ်လို့ သူကပြောပါတယ်။

နိုင်ငံတော်ကိုပြောကြားတဲ့ သူ့ရဲ့မိန့်ခွန်းမှာ အမေရိကန်ကသာ နျူကလီးယားစမ်းသပ်မှုလုပ်လာရင် ရုရှားအနေနှင့် နျူကလီးယားစမ်းသပ်မှုတွေပြန်လုပ်ဖို့ အဆင်သင့်ပဲလို့လည်း ပူတင်က သတိပေးပါတယ်။ ဒီလိုသာဆိုရင် စစ်အေးကာလ ကရှိခဲ့တဲ့ နျူကလီးယားစမ်းသပ်မှုတွေကိုပိတ်ပင်ခဲ့တာတွေ အဆုံးသတ်သွားပါလိမ့်မယ်။

New START စာချုပ်ပါလိုက်နာရမယ့်အချက်တွေကို သူဒီလိုဆိုင်းငံ့လိုက်ရတာတွေကို ပူတင်ကရှင်းပြရင်းနှင့် အမေရိကန်နှင့်သူ့မဟာမိတ်‌နေတိုး တို့ဟာ ယူကရိန်းမှာ ရုရှားတို့ရှုံးရမယ်ဆိုတဲ့ ရည်မှန်းချက်ကို ပြောင်ဖွင့်ပြောလာကြ တယ်လို့လည်း စွပ်စွဲလိုက်ပါတယ်။

“ သူတို့ဟာ ကျွန်တော်တို့အပေါ်မှာ မဟာဗျူဟာမြောက် အောင်နိုင်အောင်နှင့် တစ်ပြိုင်တည်းမှာပဲ ကျွန်တော်တို့ရဲ့ နျူကလီးယား အဆောက်အအုံကိုပါ ကြိုးစားလာတယ်” လို့ပူတင်ကပြောပါတယ်။

“ယခုစာချုပ်အရ အမေရိကန်ဟာ ရုရှားရဲ့ နျူကလီးယားအဆောက်အအုံကို စစ်ဆေးမှုတွေပြန်စဖို့ တွန်းအားပေးခဲ့တယ်။ နျူကလီးယားစွမ်းဆောင်နိုင်တဲ့ မဟာဗျူဟာမြောက်ဗုံးကြဲလေယာဉ်တွေအခြေစိုက်တဲ့ ရုရှားလေကြောင်းအခြေစိုက် စခန်းတွေကို ယူကရိန်းက ဒရုန်းတွေနှင့်တိုက်ခတ်နိုင်အောင် နေတိုးမဟာမိတ်တွေကလည်း ကူညီပေးခဲ့ကြတယ်”လို့ ပူတင်က ပြောပါတယ်။

အဲဒီအတွက်သုံးမယ့် ဒရုန်းတွေကို ခေတ်မီကိရိယာတွေတပ်ဆင်ရာမှာ နေတိုးရဲ့ ကျွမ်းကျင်သူတွေ ကူညီပေးခဲ့ကြတယ်  လို့လည်း ပူတင်ကပြောပါတယ်။ “ အခု သူတို့က ကျွန်တော်တို့ရဲ့ ကာကွယ်ရေးအဆောက်အအုံတွေကို စစ်ဆေးချင်ကြတယ်။ ယနေ့ထိပ်တိုက်ရင်ဆိုင်မှုအခြေအနေမျိုးမှာ ဒါကြီးက အတော့်ကို အဓိပ္ပါယ်မရှိတာပဲ” လို့ ပူတင်က ပြောပါတယ်။

Source: india.com

# New_Start_Treaty

#Russia_US

#ရုရှား-အမေရိကန်_နျူကလီးယားစာချုပ်

Published 19 Feb 2023

နိုင်ငံ့ဝန်ထမ်းတွေရဲ့ ပင်စင်ခံစားခွင့်ကို ခေတ်စနစ်နှင့်ကိုက်ညီအောင် ပြန်လည်ပြင်ဆင်ဖို့ စတင်စီစဉ်နေတယ်လို့ သိရပါတယ်။

အဲဒီအတွက် ပင်စင်ဥပဒေသုံးသပ်ပြင်ဆင်ရေးအဖွဲ့တစ်ဖွဲ့ကို နစက စီမံကိန်းနှင့် ဘဏ္ဍာရေးဝန်ကြီးဌာနက  ၂၀၂၃ခုနှစ် ဇန်နဝါရီ (၁၇)ရက်နေ့မှာ ဖွဲ့စည်းပေးခဲ့ပါတယ်။

စီမံ/ဘဏ္ဍာ ပြည်ထောင်စုဝန်ကြီး ဦးဝင်းရှိန် လက်မှတ်ရေးထိုးထုတ်ပြန်တဲ့ အဆိုပါဖွဲ့စည်းတဲ့ အမိန့်မှာ နိုင်ငံ့ဝန်ထမ်းတွေရဲ့ ပင်စင်ခံစားခွင့်နှင့် သက်ဆိုင်တဲ့ တည်ဆဲဥပဒေ၊နည်းဥပဒေတွေကို လက်ရှိအခြေအနေနှင့် ကိုက်ညီစေဖို့ ပြင်ဆင်ပြဋ္ဌာန်းနိုင်ရန် ဖွဲ့စည်းရတာဖြစ်တယ်လို့ ဖော်ပြပါရှိပါတယ်။

ယင်းအဖွဲ့ကို စီမံ/ဘဏ္ဍာ ဒုတိယဝန်ကြီးက ဥက္ကဋ္ဌအဖြစ်ဆောင်ရွက်ပြီး အတွင်းရေးမှူးနှင့် တွဲဖက်အတွင်းရေးမှူးများအဖြစ် ပင်စင်ဦးစီးဌာန ညွှန်ကြားရေးမှူးချုပ်နှင့် ဒုတိယညွှန်ကြားရေးမှူးချုပ်တို့ ပါဝင်ကြပါတယ်။အဖွဲ့ဝင်(၁၁)ဦးထဲမှာ  နစက ဥက္ကဋ္ဌ၏အကြံပေးအဖွဲ့မှ တစ်ဦး၊ နစကရုံးညွှန်ကြားရေးမှူးချုပ်၊ ပြည်ထောင်စုအစိုးရအဖွဲ့ရုံးညွှန်ကြားရေးမှူးချုပ်၊နှင့် အခြား သက်ဆိုင်ရာဝန်ကြီးဌာနတွေက ဆက်စပ်တဲ့ ဌာနတွေရဲ့ညွှန်ကြားရေးမှူးချုပ်ပါဝင်ကြပါတယ်။

ပင်စင်ဥပဒေသုံးသပ်ပြင်ဆင်ရေးအဖွဲ့ကို ဖွဲ့စည်းဆောင်ရွက်ရတာဟာ ခေတ်စနစ်နှင့်လျော်ညီအောင်ဥပဒေကို ပြန်လည်ပြင်ဆင်နိုင်ဖို့အပြင် ပြင်ဆင်ဖြည့်စွက်မယ့် အချက်တွေဟာ နောင်မှာ ပြဋ္ဌာန်းမယ့် ဝန်ထမ်းနောင်ရေးဗဟိုရန်ပုံငွေဥပဒေနှင့်လိုက်လျောညီထွေဖြစ်ဖို့လည်းပါဝင်တယ်လို့သိရပါတယ်။

သုံးသပ်တွေ့ရှိချက်တွေကို နစကရုံးသို့တင်ပြပြီးတဲ့အခါ အတည်ပြုချက်ရရှိပါက ဥပဒေပြဋ္ဌာန်းနိုင်ရေး ဆက်လက်ဆောင်ရွက်သွားဖို့ရှိတယ်လို့လည်း အမိန့်ကြော်ငြာစာထဲမှာ ဖော်ပြပါရှိပါတယ်။

မြန်မာနိုင်ငံတွင် ၂၀၂၂ခုနှစ်မတ်လအထိ တပ်မတော်သား ပင်စင်စားများ အပါအဝင် ပင်စင်စားဦးရေ ၉၉၄၂၁၆ ဦးရှိပြီး ယင်းတို့အတွက် အသုံးစရိတ်မှာ ၂၀၂၀-၂၁ ဘဏ္ဍာရေးနှစ်တွင် နိုင်ငံတော်၏စုစုပေါင်းအသုံးစရိတ်၏ ၃.၆၈ ရာခိုင်နှုန်းရှိခဲ့ကြောင်း ပင်စင်ဦးစီးဌာနက ထုတ်ပြန်တဲ့ သတင်းအချက်အလက်တွေအရသိရှိရပါတယ်။

-ymg/knl

#Myanmar

#Myanmar_Pension_Law