Published 18 Nov 2022

ကမ္ဘောဒီးယားနိုင်ငံခြားရေးနှင့် နိုင်ငံတကာပူးပေါင်းဆောင်ရွက်ရေးဝန်ကြီး ပရက်ဆော့ခွန်ဟာ အာဆီယံဥက္ကဋ္ဌရဲ့ အထူးသံတမန်အဖြစ် သူဟာ မြန်မာနိုင်ငံကို လာမယ့် အပတ်တွေထဲ တတိယအကြိမ်လာရောက်ဖို့ရှိတယ်လို့ ပြောဆိုလိုက်ပါတယ်။

ဒီလိုသွားရောက်ခြင်းဟာ မြန်မာနိုင်ငံကို ပုံမှန်အနေအထားနှင့် ဒီမိုကရေစီလမ်းကြောင်းပေါ် ပြန်လည်ရောက်ရှိရေး အတွက် နောက်ထပ်ကြိုးပမ်းအားထုတ်မှုဖြစ်တယ်လို့လည်းဆိုပါတယ်။

ယနေ့ နိုဝင်ဘာ (၁၈)ရက်မှာ ထုတ်ပြန်တဲ့ ကြေညာချက်အရ မြန်မာနစကရဲ့ အကျဉ်းသားတွေလွှတ်လိုက်တဲ့အပေါ် ကြိုဆိုတယ်လို့ ဆော့ခွန်ကပြောကြောင်းသိရပါတယ်။ အကျဉ်းသား ခြောက်ထောင်ကျော်ကို မြန်မာနိုင်ငံက လွှတ်ပေးလိုက်တာဟာ  အာဆီယံရဲ့ ဘုံသဘောတူညီချက်(၅)ချက်နှင့်အညီ လက်ရှိအကျပ်အတည်းတွက် ငြိမ်းချမ်းတဲ့ ဖြေရှင်းမှုတစ်ခု ရှာဖွေဖို့ အခွင့်အလမ်းတွေ လမ်းပွင့်သွားတဲ့ ကောင်းမွန်တဲ့စိတ်ထားတစ်ခုဖြစ်တယ်လို့ သူက ပြောကြောင်း သတင်းထုတ်ပြန်ချက်မှာ ဖော်ပြထားပါတယ်။

“ ယခု အကျဉ်းသား အမြောက်အမြားလွှတ်ပေးခြင်းဟာ မြန်မာနိုင်ငံမှ သက်ဆိုင်တဲ့အဖွဲ့အစည်းတွေအကြား ဆွေးနွေးမှု လုပ်ငန်းစဉ်တစ်ခုစတင်ဖို့အတွက် ထောက်ကူပေးမယ့် ဝန်းကျင်တစ်ခုကိုဖန်တီးဖို့ လမ်းကြောင်းမှန်ပေါ်က အရေးကြီးတဲ့ ပြမူမှုတစ်ခုလို့ အထူးသံတမန်က မှတ်ယူပါတယ်”

“ဒါဟာ လက်ရှိအကျပ်အတည်းအတွက် ငြိမ်းချမ်းတဲ့ ဖြေရှင်းမှုတစ်ခုဆက်လက်ဆောင်ရွက်ရာမှာ အရေးကြီးတဲ့ ပြူမူမှုတစ်ခုနှင့် ၂၀၂၁ခုနှစ် ဧပြီ ၂၄ ရက်နေ့မှာ အာဆီယံခေါင်းဆောင်တွေအစည်းအဝေးမှာ ရရှိခဲ့တဲ့ ဘုံသဘောတူညီချက်(၅)ချက်ရဲ့ အနှစ်သာရနှင့်ကိုက်ညီတဲ့ ကောင်းမွန်တဲ့တိုးတက်မှုတစ်ခုဖြစ်တယ်” လို့ ထုတ်ပြန်ချက်က ဆိုပါတယ်။

သတင်းထုတ်ပြန်ချက်ထဲမှာ သတိထားမိစရာ လူပုဂ္ဂိုလ်အချို့လွတ်မြောက်လာတာကို အမည်နှင့်တကွဖော်ပြထားပါတယ်။ အဲဒီအထဲမှာ ယခင် နိုင်ငံတော်အတိုင်ပင်ခံရုံးဝန်ကြီး ဦးကျော်တင့်ဆွေ၊ တနင်္သာရီတိုင်းဒေသကြီး ဝန်ကြီးချုပ် ဒေါ်လဲ့လဲ့မော်၊ ရှစ်လေးလုံး ဒီမိုကရေစီလှုပ်ရှားတက်ကြွသူ ကိုမြအေးတို့အမည်တွေပါဝင်ပါတယ်။

လွှတ်ပေးတဲ့အထဲမှာ အမျိုးသားဒီမိုကရေစီအဖွဲ့ချုပ် ဗဟိုအလုပ်အမှုဆောင်နှင့် ပြောရေးဆိုခွင့်ရသူ ဦးမျိုးညွန့်၊ အလုပ်အမှုဆောင် ဦးသိန်းဦး၊ NLD ဥပဒေအကြံပေး ဦးကျော်ဟိုး၊ ပါမောက္ခ ဦးမောင်သာချို၊ ရွှေညဝါဆရာတော်၊ ဗြိတိန်သံအမတ်ကြီးဟောင်း ဗစ်ကီဘိုမန်းနှင့် သူ့ခင်ပွန်း၊ ဒေါ်အောင်ဆန်းစုကြည်ရဲ့ စီးပွားရေးအကြံပေးပါမောက္ခ ရှောင်တာနယ်၊ ဂျပန်သတင်းထောက်နှင့် ရုပ်ရှင်ထုတ်လုပ်သူ တိုရူကူဘိုတာ၊နှင့် အမေရိကန်နိုင်ငံသား ဦးကျော်ဋ္ဌေးဦး တို့ပါဝင်ကြပါတယ်။

“ အကြမ်းဖက်မှုတွေရပ်တန့်ဖို့၊ လူသားချင်းစာနာထောက်ထားမှု အကူအညီများပေးရေးနှင့် အားလုံးပါဝင်သည့် ငြိမ်းချမ်းရေးဆွေးနွေးပွဲတစ်ခုအတွက် ယုံကြည်မှုတည်ဆောက်ရေးဆိုသည့် ဘုံသဘောတူညီချက်(၅)ချက်၏ ဦးစားပေးလုပ်ငန်း(၃)ခုရရှိနိုင်စေရေးအတွက် ပိုပြီးတိုးတက်ဖြစ်ထွန်းမှုများရှိလာမည်ဟုယုံကြည်ပါသည်” လို့လည်း ဆော့ခွန်ကပြောပါတယ်။

Source: Phnom Penh Post

#ASEAN_Special_Envoy

#Prak_Sokhonn

#Myanmar_ASEAN

Published 18 Nov 2022

☑️ အမေရိကန်တစ်နိုင်ငံလုံးကို ရောက်ရှိတိုက်ခိုက်နိုင်တဲ့ တိုက်အချင်းချင်းပစ် ပဲ့ထိန်းဒုံးကျည်တစ်စင်းကို မြောက်ကိုရီးယားက သောကြာနေ့မှာ စမ်းသပ်ခဲ့ပြီး အဲဒီဒုံးကျည်ဟာ ဂျပန်ရေပိုင်နက်အနီးဆင်းသက်ခဲ့

☑️ အမေရိကန်ပြည်ထောင်စုက အဲဒီစမ်းသပ်မှုကို မြန်မြန်ဆန်ဆန်ပဲ ပြစ်တင်ရှုတ်ချခဲ့ပြီး သူ့ပိုင်နက်နှင့် သူ့ရဲ့ မဟာမိတ် တောင်ကိုးရီးယားနှင့်ဂျပန်တို့ရဲ့ပိုက်နက်တွေရဲ့ လုံခြုံရေး အာမခံချက်ရှိဖို့ လိုအပ်တဲ့ တုန့်ပြန်အရေးယူမှာတွေအားလုံး ဆောင်ရွက်သွားမယ်လို့ ပြော

☑️ အမေရိကန်ဒုသမ္မတ ကမ်မလာ ဟာရစ်ဟာ အဲဒီမဟာမိတ်နှစ်နိုင်ငံ၊ဩစတြေလျ၊ကနေဒါနှင့် နယူးဇီလန်က ခေါင်းဆောင်တွေနှင့်အတူ ဘန်ကောက်မှာ ဒေသဆိုင်ရာဖိုရမ်တစ်ခုတက်နေပြီး ယခုကိစ္စကို ထိုခေါင်းဆောင်များနှင့် ဆွေးနွေးမည်ဟုပြော

☑️“ တရားဥပဒေမဲပြီး မတည်မငြိမ်ဖြစ်စေတဲ့ ဒီလိုအလုပ်တွေ နောက်ထပ်မလုပ်ဘဲ ရပ်တန်ဖို့ ကျွန်မတို့ မြောက်ကိုးရီးယားကို တောင်းဆိုပါတယ်။ အမေရိကန်ပြည်ထောင်စုကိုယ်စားပြောရရင် ကျွန်မတို့ရဲ့ အင်ဒိုပစိဖိတ် မဟာမိတ်တွေနှင့် ကျွန်မတို့ ဆက်ဆံရေးခိုင်မာတောင့်တင်းဖို့ ထပ်မံကတိပေးတယ်” လို့ သူမကပြော

☑️ ဒီကနေ့ မနက် ၁၀နာရီ ၁၅မိနစ်ခန့်မှာ ဒီဒုံးကျည်ကို တောင်ကိုးရီးယားရဲ့ မြို့တော်ဒေသအနီးမှာ ထောက်လှမ်း သိရှိခဲ့တယ်လို့ တောင်ကိုးရီးယား Joint Chiefs of Staff ကပြော

☑️ မြောက်ကိုးရီးယားဟာ နျူကလီးယားလက်နက်တွေ ခေတ်မီတိုးတက်ရေးနှင့် အနာဂတ်သံတမန်ရေးရာမှာ အကြီးအကျယ်လိုက်လျောမှုတွေရရှိဖို့ရည်ရွယ်ပြီး လက်နက်စမ်းသပ်မှုတွေ ဆက်တိုက်လုပ်နေတာဖြစ်

☑️ ဒီဒုံးကျည်ဟာ အမြင့်ဆုံး ၆၂၀မိုင်ကနေပြီး ခရီး ကီလိုမီတာ ၆၀၀၀မှ ၆၁၀၀ အကြား ပျံသန်းခဲ့တာဖြစ်တယ်လို့ တောင်ကိုးရီးယားနှင့် ဂျပန် တို့က ခန့်မှန်းခဲ့

☑️ ဒုံးကျည်ထိပ်ဖူးရဲ့ အလေးချိန်ပေါ်မူတည်ပြီး ဒုံးကျည်ဟာ မိုင်ပေါင်း ၉၃၂၀ မိုင်အကွာအထိပစ်နိုင်စွမ်းရှိလို့ ဒါဟာ အမေရိကန်ကုန်းမြေတစ်ခုလုံးကို ခြုံငုံရောက်ရှိနိုင်တာဖြစ်တယ် လို့ ဂျပန်ကာကွယ်ရေးဝန်ကြီး ယာဆူကာဇူ ဟာမာဒါကပြောကြား

Source AP

#North_Korea_Missile_test

#intercontinental_ballistic _missile_test

#North_Korea_US

Published 17 Nov 2022

ပြစ်ဒဏ်မှလွတ်ငြိမ်းချမ်းသာခွင့်ပေးခဲ့တဲ့ ဗြိတိန်သံအမတ်ဟောင်းဗစ်ကီဘိုမန်း၊ဩစတြေလျစီးပွားရေးပညာရှင် ရှောင်တာနယ်၊ဂျပန်နိုင်ငံသားတိုရူကူဘိုတာနှင့် အမေရိကန်နိုင်ငံသား ဦးကျော်ဋ္ဌေးဦးအပါအဝင် အင်းစိန်အကျဉ်းထောင်မှ လွတ်မြောက်လာသူ ၉၈၅ ဦးကို  အဆိုပါအကျဉ်းထောင်တွင် သက်ဆိုင်ရာ  တာဝန်ရှိသူတွေက တွေ့ဆုံစကားပြောကြားခဲ့ကြတယ်လို့ နစကရဲ့သတင်းထုတ်ပြန်ချက်အရသိရပါတယ်။

အဲဒီအပြင် နိုင်ငံခြားသား(၄)ဦးရဲ့ သက်ဆိုင်ရာ နိုင်ငံတွေရဲ့ သံရုံးတွေက တာဝန်ရှိသူတွေကလည်း လာရောက်ခဲ့ပြီး လိုအပ်တာတွေ ဆောင်ရွက်ပေးခဲ့ကြတယ်လို့သိရှိရပါတယ်။

Source: MRTV Video Footages

#Myanmar_Amnesty

Published 17 Nov 2022

ဗြိတိန်သံအမတ်ဟောင်း ဗစ်ကီဘိုမန်းဂျပန်သတင်းထောက် တိုရူကူဘိုတာနှင့် အမေရိကန်နိုင်ငံသား မြန်မာလူမျိုး ကိုကျော်ဋ္ဌေးဦးတို့ဟာ မြန်မာနိုင်ငံမှာ အကျဉ်းချခံနေရတာကနေ လွတ်မြောက်ပြီး ပြည်နှင်ဒဏ်ပေးလိုက်တဲ့အတွက် ဘန်ကောက်လေဆိပ်ကို နိုဝင်ဘာ ၁၇ ရက်ညက ရောက်ရှိလာခဲ့ကြပါတယ်။ လေဆိပ်မှာ သူတို့ကို သက်ဆိုင်ရာ သံတမန်တွေနှင့် အဖွဲ့အစည်းတွေက လာရောက်ကြိုဆိုခဲ့ကြတာတွေ့ရပါတယ်။

Source AFP

ရုပ်သံကြည့်ရန်...https://fb.watch/gS2zLA_6Mi/

#Vicky_Bowman

#Toru_Kubota

#Kyaw_Htay_Oo

Published 17 Nov 2022

စီးပွားရေးပညာရှင် ရှောင်တာနယ်ကို လွှတ်ပေးတဲ့သတင်းတွေအတွက် ကြိုဆိုကြောင်း ဩစတြေလျ နိုင်ငံခြားရေးဝန်ကြီး ပင်နီဝေါင်းက ပြောကြားလိုက်ပါတယ်။ ဒါပေမယ့် နောက်ထပ်မှတ်ချက်တစ်စုံတစ်ရာကိုတော့ ပေးခြင်းမရှိပါဘူး။

“ ပါမောက္ခ ရှောင်တာနယ်လ်နှင့်ပတ်သက်တဲ့ သတင်းတွေကို ကျွန်မတို့ကြိုဆိုပါတယ်” လို့ ဝေါင်းက တွစ်တာမှာ ရေးခဲ့ပါတယ်။

“ ပါမောက္ခ တာနယ်လ်ဟာ ကျွန်မတို့ရဲ့ ပထမဦးစားပေးဖြစ်တယ်။ ဒီအနေအထားမှာ ကျွန်မတို့ နောက်ထပ်မှတ်ချက်ပေးမှာမဟုတ်ဘူး” လို့ သူမကပြောပါတယ်။

ရှောင်တာနယ်လ်နှင့်အတူ လွတ်မြောက်လာတဲ့ ဂျပန်ရုပ်ရှင်ဖန်တီးသူ ကူဘိုတာဟာ ယနေ့ နိုဝင်ဘာ ၁၇ ရက်ကြာသပတေးနေ့ည လေယာဉ်နှင့် မြန်မာနိုင်ငံကထွက်ခွာမှာဖြစ်တယ်လို့ ဂျပန်အစိုးရထိပ်တန်းပြောရေးဆိုခွင့်ရှိသူ ဟီရိုကာဇူမက်ဆူနိုကပြောတဲ့အကြောင်းအေပီကရေးပါတယ်။  သူဟာကျန်းမာရေးကောင်းမွန်နေတယ်လို့ ယုံကြည်ရတယ်လို့လည်း အဆိုပါပြောရေးဆိုခွင့်ရသူကဆက်ပြောပါတယ်။

Source:Reuters/AP

#Penny_Wong

#Sean_Turnell

#Myanmar_amnesty

#World_Military
Published 17 November 2022

ပိုလန်စိုက်ပျိုးရေးလုပ်ငန်းနေရာကို ကျရောက်ခဲ့ပြီး လူ ၂ ဦးသေဆုံးစေခဲ့တဲ့ ဒုံးကျည်ဟာ မရည်ရွယ်ဘဲ ကျရောက်ခဲ့ဟန်ရှိပြီး အိမ်နီးချင်းယူကရိန်းရဲ့ လေကြောင်းရန်ကာကွယ်ရေးမှ ပစ်လွှတ်ခဲ့ခြင်းဖြစ်နိုင်ကြောင်း နေတိုးအဖွဲ့ဝင်နိုင်ငံပိုလန်နဲ့ စစ်ဘက်မဟာမိတ်အကြီးအကဲတို့က ဗုဒ္ဓဟူးနေ့မှာပြောကြားလိုက်ပါတယ်။

ထိုအချိန်တွေမှာ ရုရှားကလည်း ယူကရိန်းရဲ့ ဓာတ်အားပေးစက်ရုံတွေကို ဗုံးကျဲတိုက်ခိုက်နေခဲ့တာဖြစ်ပါတယ်။

"ယူကရိန်းကာကွယ်ရေးတပ်က ဒုံးကျည်တွေကို နေရာအနှံ့ပစ်လွှတ်နေတာကြောင့် ဒုံးကျည်တစ်စင်းက ကံဆိုးစွာနဲ့ပဲ ပိုလန်နယ်မြေကို ကျရောက်ခဲ့တာဖြစ်နိုင်ပါတယ်၊ ဒါဟာ ပိုလန်ကို ရည်ရွယ်ချက်ရှိရှိတိုက်ခိုက်တာ လုံးဝမဟုတ်ပါဘူး" လို့ ပိုလန်သမ္မတ'အန်ဒရဇက်ဒူဒါ'က ပြောကြားလိုက်ပါတယ်။

နေတိုးအထွေထွေအတွင်းရေးမှူးချုပ် 'ယန်းစ်စတိုလ်တန်ဘာ့ဂ်'က ပိုလန်ရဲ့ ပဏာမတွေ့ရှိချက်များကို ဘရူဆဲလ်မြို့ နိုင်ငံ ၃၀ စစ်ဘက်မဟာမိတ်အစည်းအဝေးမှာ တင်ပြသွားပါတယ်။

ယူကရိန်းသမ္မတ'ဗိုလိုဒီမီယာဇယ်လန်စကီ'ကတော့ ငြင်းဆိုလိုက်ကာ နောက်ထပ်စုံစမ်းမှုများပြုလုပ်ရန် တောင်းဆိုလိုက်ပါတယ်။

ရုရှားသာ နေတိုးအဖွဲ့ဝင်ပိုလန်နိုင်ငံကို ပစ်မှတ်ထားတိုက်ခိုက်ပါက နေတိုးတပ်ဖွဲ့ကြီးကပါ စစ်ပွဲပဋိပက္ခထဲ ပါလာနိုင်ပါတယ်။

"ဒါဟာ ယူကရိန်းရဲ့အမှားမဟုတ်ပါဘူး၊ နောက်ဆုံးမှာတော့ ရုရှားကသာ ဒီအတွက်တာဝန်ရှိပါတယ်" လို့ 'စတိုလ်တန်ဘာ့ဂ်'က ပြောကြားခဲ့ပါတယ်။
ယူကရိန်းထိပ်သီးတပ်မှူးများထံမှ အစီရင်ခံစာများအရ ဒါဟာ ယူကရိန်းဒုံးကျည်မဖြစ်နိုင်ဘူးဆိုတာ ယုံမှားစရာမရှိကြောင်း၊ ယူကရိန်းအရာရှိများလည်း ဒုံးကျည်ကျရောက်ရာနေရာကို သွားပြီးစစ်ဆေးခွင့်ရသင့်ကြောင်း 'ဇယ်လန်စကီ'က သတင်းထောက်တွေကို ပြောကြားလိုက်ပါတယ်။

"ပွင့်ပွင့်လင်းလင်းပြောရရင် ယူကရိန်းလေကြောင်းကာကွယ်ရေးကြောင့် လူသေဆုံးခဲ့တယ်ဆိုရင် ကျွန်တော်တို့တောင်းပန်စကားပြောကြားသွားမှာပါ၊ အရင်ဆုံးတော့ စုံစမ်းစစ်ဆေးမှုပြုလုပ်ပြီး အဲဒီမှာရှိနေတဲ့ အချက်အလက်တွေကို ကြည့်ရှုချင်ပါသေးတယ်" လို့ ဆိုပါတယ်။

ပိုလန်နဲ့ နေတိုးတို့မှ အကဲဖြတ်သုံးသပ်ချက်မထွက်ခင် အမေရိကန်သမ္မတ'ဘိုင်ဒင်'ကပြောကြားခဲ့ရာမှာ "ရုရှားက ဒုံးကျည်ပစ်ခတ်လိုက်တာ မဖြစ်နိုင်ပါဘူး၊ ဒါပေမဲ့ ဘာလိုဖြစ်တာလဲဆိုတာကို တိတိကျကျသိရအောင် ဆောင်ရွက်သွားမှာပါ" လို့ ဆိုပါတယ်။

ရုရှားကာကွယ်ရေးဝန်ကြီးဌာနမှ ပြောရေးဆိုခွင့်ရှိသူတစ်ဦးက ရုရှားပစ်တဲ့ဒုံးကျည်တွေဟာ ယူကရိန်း-ပိုလန်နယ်စပ်နဲ့ ၃၅ ကီလိုမီတာအကွာအဝေးအတွင်း ရောက်ရှိခဲ့ခြင်းလုံးဝမရှိကြောင်း ဆိုလိုက်ကာ ပိုလန်နဲ့ အခြားနိုင်ငံများမှ ကနဦးတုန့်ပြန်စွပ်စွဲချက်တွေကို ရှုတ်ချလိုက်ပါတယ်။

"တကယ့်လက်တွေ့အထောက်အထားတွေကို အခြေမခံဘဲ ရုရှားမုန်းတီးရေးစိတ်တစ်ခုတည်းနဲ့ စွပ်စွဲနေတာကို မြင်တွေ့ခဲ့ရတယ်" လို့ ရုရှားစစ်ရုံးချုပ်ခရမ်လင်မှ 'ဒီမစ်ထရီပက်စ်ကော့ဗ်'က ပြောကြားခဲ့ပါတယ်။

ကျရောက်ခဲ့တဲ့ဒုံးကျည်ဟာ ဆိုဗီယက်ခေတ်က ရုရှားနိုင်ငံလုပ် S-300 ဒုံးကျည်ဖြစ်ပါတယ်။
ဆိုဗီယက်ပြည်ထောင်စုနိုင်ငံဟောင်းဖြစ်ခဲ့တဲ့ ယူကရိန်းဟာ ရုရှားနိုင်ငံလုပ်လက်နက်များ ရရှိထားသလို ကျူးကျော်ရုရှားတပ်တွေကို ပြန်လည်တိုက်ခိုက်စဉ်ကလည်း ရုရှားလက်နက်အများအပြားရရှိထားတယ်လို့ ပိုလန်သမ္မတကဆိုပါတယ်။

Source: AP News
#Yangon_Media_Group