#DailyNews
Published_ 14 February 2023

၁။ စားသုံးဆီအစိုးရ ရည်ညွှန်းသတ်မှတ်ဈေး ၄၄၉၀ ကျပ် သတ်မှတ်

၂။ မြူထူထပ်ဆုံးနာရီပိုင်းလောက်သာ သဗ္ဗာန်ဆိပ်များ ပိတ်ထား၊ မြူပါးချိန် GPS ကြည့်ပြီး မောင်းနှင်ပေးနေ

၃။ ကမ္ဘာ့ရွှေဈေး အနည်းငယ်ပြန်ကျနေပြီး ပြည်တွင်းရွှေဈေးအတက်အကျတည်ငြိမ်နေ

၄။ မူးယစ်ဖောက်ကားရေးတွင် သားကောင်ဖြစ်ခဲ့သည့် မက္ကဆီကိုခွေးလေး အိမ်မွေးတိရစ္ဆာန်ပြိုင်ပွဲတွင် ဦးဆောင်‌နေ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published_ 14 February 2023

ဝက်စာဈေးကြီးမြင့်မှုနဲ့ အာဖရိကဝက်အပြင်းဖျားရောဂါတွေကြောင့် ဝက်မွေးမြူမယ့်သူတွေ နည်းပါးလာပြီး ဝက်သားဈေးတွေတက်လာတယ်လို့ ဝက်မွေးမြူရေးလုပ်ငန်းတွေထံမှ သိရပါတယ်၊၊

#Yangon_Media_Group

#Local_News
Published_ 14 February 2023

ကရင်ပြည်နယ်၊ ဘားအံမြို့၊ အမှတ်(၅)ရပ်ကွက်၊ ဥယျာဉ်(၄)လမ်း၊ နေအိမ်ခြံဝန်းအတွင်းရှိ ရေတွင်းထဲသို့ အမျိုးသားတစ်ဦးပြုတ်ကျခဲ့ရာ အသက်ရှင်လျက် ကယ်တင်နိုင်ခဲ့ကြောင်း မြန်မာနိုင်ငံ မီးသတ်တပ်ဖွဲ့က သိရသည်။

ယနေ့ ဖေဖော်ဝါရီလ ၁၄ ရက် မွန်းလွဲ ၁၂ နာရီခွဲခန့်က အခင်းဖြစ်ရာနေရာသို့ ဘားအံခရိုင်၊ မြို့နယ်မီးသတ်စခန်းမှ ရှာဖွေကယ်ဆယ်ရေးယာဉ်(၂)စီး၊ သန္ဓေမီးသတ်တပ်ဖွဲ့ဝင်များဖြင့် ကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ကြခြင်းဖြစ်ကြောင်း သိရသည်။

ရေတွင်းထဲသို့ ပြုတ်ကျနေသူ အမျိုးသားအား အသက်ရှင်လျက် ကယ်ဆယ်နိုင်ခဲ့ပြီးနောက် မာဃလူမှုကူညီရေးအသင်းမှ ယာဉ်ဖြင့် ဘားအံပြည်သူ့ဆေးရုံသို့ ပို့ဆောင်ပေးခဲ့ကြောင်း သိရသည်။

#ymg/mt
#Yangon_Media_Group

#Local_News
Published_ 14 February 2023

ရှမ်းပြည်နယ်၊ ကျောက်မဲခရိုင်၊ သီပေါမြို့မဏိရတနာစံဖိတ်ဘုန်းတော်ကြီးကျောင်း၊ ယာယီကျောင်းဆောင်တွင် ဘုရားမီးပူဇော်ထားရာမှ မီးလောင်ကျွမ်းမှုဖြစ်ခဲ့သောကြောင့် အိပ်ပျော်နေသည့် ကိုရင်တစ်ပါး ပျံလွန်တော်မူသွားကြောင်း သိရသည်။

ဖေဖော်ဝါရီလ ၁၃ ရက် ည ၉ နာရီ ၄၅ မိနစ်ခန့်က အဆိုပါ ကျောင်းဆောင်တွင် အောက်ခံခွက်မပါဘဲ ဘုရားမီးပူဇော်ထားရာမှ မီးလောင်မှု ဖြစ်ပွားခဲ့ခြင်းဖြစ်ကြောင်း မြန်မာနိုင်ငံမီးသပ်တပ်ဖွဲ့က သိရသည်။

"မီးလောင်ရတဲ့အကြောင်းရင်းက အောက်ခံခွက်မပါဘဲ မီးပူဇော်ထားရာကနေ ဘုရားကျောင်းဆောင်ကိုမီးစွဲပြီး အဲဒီကနေတစ်ဆင့် လောင်တာပါ။ ကိုရင်လေးတစ်ပါး ပျံလွန်တော်မူသွားတယ်။ အခြားထိခိုက်တဲ့သူတော့မရှိပါဘူး"ဟု ဒေသခံလူမှုကူညီရေးအသင်း တာဝန်ရှိသူက ပြောသည်။

ပျံလွန်တော်မူသွားသည့် ကိုယ်ရင်လေး၏ ရုပ်အလောင်းကို လူမှုကူညီရေးအသင်းဝင်များက ဆေးရုံသို့ ပို့ဆောင်ပေးခဲ့ကြောင့်လည်း သိရသည်။

#ymg/mt
#Yangon Media Group

#Local_News
Published_ 14 February 2023

ပြန်လည်ပြည့်ဖြိုးမြဲ စွမ်းအင်လျှပ်စစ်ဓာတ်အားထုတ်လုပ်မှုလုပ်ငန်းအပါအဝင် လုပ်ငန်းသစ်ရှစ်ခုကို မြန်မာနိုင်ငံရင်းနှီးမြှုပ်နှံမှု ကော်မရှင် (MIC)က ပြီးခဲ့သည့်လအတွင်း ခွင့်ပြုခဲ့ကြောင်း သိရသည်။

ပြီးခဲ့သည့် ဖေဖော်ဝါရီလ ၁၃ ရက်က နေပြည်တော်၌ပြုလုပ်သည့် ၂၀၂၃ ခုနှစ်၏ ပထမဆုံးအကြိမ်ပြုလုပ်သည့် မြန်မာနိုင်ငံရင်းနှီးမြှုပ်နှံမှုကော်မရှင်အစည်းအဝေးတွင် ဆောင်ရွက်ဆဲရင်းနှီးမြှုပ်နှံမှုလုပ်ငန်းရှစ်ခု၏ မတည် ငွေရင်းတိုးမြှင့်ခြင်းအပါအဝင် လျှပ်စစ်ကဏ္ဍ၊ ပို့ဆောင်ဆက်သွယ်ရေးကဏ္ဍ၊ ရေနံနှင့် သဘာဝဓာတ်ငွေ့ကဏ္ဍ၊ စက်မှုကဏ္ဍ၊ ဟိုတယ်နှင့်ခရီးသွားကဏ္ဍနှင့် ဝန်ဆောင်မှုကဏ္ဍများအထဲမှ ရင်းနှီးမြှုပ်နှံမှု လုပ်ငန်းသစ်ရှစ်ခုကို ခွင့်ပြုပေးခဲ့ခြင်း ဖြစ်သည်။

အဆိုပါ လုပ်ငန်းများ၏ ရင်းနှီးမြှုပ်နှံမှုပမာဏမှာ အမေရိကန်ဒေါ်လာ (၁၄၃ ဒသမ ၆၃၄) သန်းနှင့် ငွေကျပ်(၉၈၀၇၈ ဒသမ ၀၉၄) သန်းဖြစ်ပြီး ပြည်တွင်း အလုပ်အကိုင်အခွင့်အလမ်းပေါင်း (၁၃၇၄)ခု ကို ဖန်တီးပေးနိုင်မည်ဖြစ်ကြောင်းလည်း သိရသည်။

၂၀၂၃ ခုနှစ် ဇန်နဝါရီလကုန်အထိ စာရင်းများအရ မြန်မာနိုင်ငံတွင် ရင်းနှီးမြှုပ်နှံထားသည့် နိုင်ငံ ၊ ဒေသပေါင်း (၅၂) ခု အနက် စင်ကာပူနိုင်ငံ၊ တရုတ်နိုင်ငံနှင့် ထိုင်းနိုင်ငံတို့က ရင်းနှီးမြှုပ်နှံမှုအများဆုံး ပြုလုပ်ကြပြီး စီးပွားရေးကဏ္ဍ (၁၂)ခု အနက် အများဆုံးရင်းနှီးမြှုပ်နှံထားသည့် ကဏ္ဍများမှာ လျှပ်စစ်၊ ရေနံနှင့် သဘာဝဓာတ်ငွေ့၊ စက်မှု ကဏ္ဍတို့ဖြစ်ကြောင်း သိရသည်။

လျှပ်စစ်ကဏ္ဍတွင် စုစုပေါင်းရင်းနှီးမြှုပ်နှံမှု၏ (၂၈ ဒသမ ၃၀) ရာခိုင်နှုန်း ၊ ရေနံနှင့် သဘာဝဓာတ်ငွေ့ကဏ္ဍတွင် စုစုပေါင်းရင်းနှီးမြှုပ်နှံမှု၏ (၂၄ ဒသမ ၆၃) ရာခိုင်နှုန်း၊ စက်မှုကဏ္ဍတွင် စုစုပေါင်းရင်းနှီးမြှုပ်နှံမှု၏ (၁၄ ဒသမ ၃၄) ရာခိုင်နှုန်း ဖြစ်ကြောင်းလည်း MIC ၏ စာရင်းများအရ သိရသည်။

#ymg/mt
#Yangon_Media_Group

#Local_News
Published_ 14 February 2023

ရှမ်းပြည်နယ်၊ မိုင်းခတ်မြို့အနီး အင်အားရစ်တာစကေး (၃.၇) အဆင့်ရှိသည့်မြေငလျင်တစ်ခု လှုပ်ရှားသွားကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၊ မြေငလျင်ဌာနခွဲမှ သိရသည်၊၊

ဖေဖော်ဝါရီလ (၁၄) ရက်မနက်ပိုင်းတွင် ကျိုင်းတုံမြေငလျင်စခန်းမှ အနောက်မြောက်ဘက် (၁၆)မိုင် ခန့်အကွာ၊ မြန်မာနိုင်ငံ ပြည်တွင်း (မိုင်းခတ်မြို့၏ တောင်-အရှေ့‌တောင်ဘက် (၁၆)မိုင်ခန့်အကွာ)၊ မြောက်လတ္တီတွဒ် (၂၁.၅၁) ဒီဂရီ၊ အရှေ့လောင်ဂျီတွဒ် (၉၉.၅၀) ဒီဂရီ၊ အနက် (၁၀)ကီလိုမီတာကို ဗဟိုပြု၍ အင်အားရစ်(ခ်)တာစကေး (၃.၇) အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားသွားခြင်းဖြစ်သည်၊၊

အခုရက်ပိုင်းအတွင်း မြန်မာနိုင်ငံပြည်တွင်းမှာ ငလျင်ငယ်များလှုပ်ခတ်နေပြီး ဖေဖော်ဝါရီ(၁၁)ရက်က နေပြည်တော်အနီးတွင် အင်အားရစ်တာစကေး (၃.၅)အဆင့်ရှိငလျင်ငယ်နှင့် ဖေဖော်ဝါရီ(၁၃)ရက်က ကလေးဝမြို့အနီး အင်အားရစ်တာစကေး(၄.၁) အဆင့်ရှိ ငလျင်ငယ်တစ်ခုလှုပ်ရှားသွားကြောင်းနှင့် မြေငလျင်ငယ်များအပြင် မြေငလျင်ကြီးများတစ်ကျော့ပြန်လှုပ်ခတ်နိုင်သဖြင့် သတိပြုနေထိုင်ကြရန် မိုးလေဝသနှင့်ဇလဗေဒညွှန်ကြားမှုဦးစီးဌာန၊မြေငလျင်ဌာနခွဲမှသတိပေးချက်ထုတ်ပြန်ထားကြောင်းသိရသည်၊၊

ymg/tthl
#Yangon_Media_Group