#Local_News
Published_ 20 January 2023

ရန်ကုန်တိုင်းဒေသကြီး ဒဂုံမြို့သစ်တောင်ပိုင်းမြို့နယ် အောင်မြင့်မိုရ်အိမ်ရာနှင့် သန်လျှင်မြို့နယ် သီလဝါအိမ်ရာစီမံကိန်းတို့မှ တန်ဖိုးနည်း ၊ တန်ဖိုးသင့်တိုက်ခန်း၂၀၄ ခန်းကို ရောင်းချတော့မည်ဖြစ်ကြောင်း မြို့ပြနှင့် အိမ်ရာဖွံ့ဖြိုးရေးဦးစီးဌာနမှ သိရသည်။

အောင်မြင့်မိုရ်အိမ်ရာတွင် ရောင်းချမည့်တိုက်ခန်းများမှာ ၄ခန်းတွဲ ၃ထပ်တိုက်ဖြစ်ပြီး တစ်ခန်းလျှင် ဈေးနှုန်းအနိမ့်ဆုံး ၂၉၆သိန်းမှ ဈေးအမြင့်ဆုံး ၅၅၆သိန်းအထိရှိကာ ၆ ခန်းတွဲ ၄ ထပ်တိုက်ဈေးနှုန်းမှာ အနိမ့်ဆုံး ၁၁၁သိန်းမှ ၁၉၁ သိန်းအထိ ရှိကြောင်း သိရသည်။

ထို့အတူ သီလဝါ အိမ်ရာစီမံကိန်းရှိ ၆ခန်းတွဲ ၅ထပ်တိုက်ရှိအခန်းများရောင်းချပေးသွားမှာဖြစ်ပြီး မြေညီထပ် ၁၃၃သိန်း၊ ပထမထပ် သိန်း၁၂ဝ၊ ဒုတိယထပ် ၁၁၅ သိန်း၊ တတိယထပ် ၁၀၉သိန်းနှင့် စတုတ္ထထပ် ၁၀၄ သိန်း တို့ဖြစ်ကြောင်း သိရသည်။

အဆိုပါ တိုက်ခန်း အခန်းပေါင်း ၂၀၄ခန်း ကို CHID ဘဏ်တွင် အိမ်ရာစုဆောင်းငွေ ကျပ်သိန်း ၃၀နှင့် အထက်ရှိသူများအား စုဆောင်းထားရှိသူများ၏ တန်းစီဇယားအမှတ်စဉ်အတိုင်း ရောင်းချပေးမည် ဖြစ်ကြောင်းမြို့ပြနှင့် အိမ်ရာဖွံ့ဖြိုးရေးဦးစီးဌာနမှ သိရသည်။

#ymg/mt
#Yangon_Media_Group

#Local_News
Published_20 January 2023

မြန်မာနိုင်ငံကုမ္ပဏီများဥပဒေ ပုဒ်မ ၄၆၂ ပုဒ်မခွဲ(က) ပုဒ်မခွဲငယ်(၂) အရ အပ်နှင်းထားသည့် အခွင့်အာဏာများကို ကျင့်သုံး၍ ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာနအနေဖြင့် အမည်ခံဒါရိုက်တာများနှင့် အမည်ခံအစုရှယ်ယာရှင်များကို ခွင့်ပြုမည်မဟုတ်ကြောင်း ထုတ်ပြန်လိုက်သည်။

ပြည်ထောင်စုသမ္မတမြန်မာနိုင်ငံတော်အစိုးရ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန ညွှန်ကြားချက်အမှတ် (၇ /၂၀၂၃) ဖြင့် ဇန်နဝါရီလ ၁၇ ရက်တွင် ထုတ်ပြန်လိုက်ခြင်းလည်း ဖြစ်သည်။

မြန်မာနိုင်ငံ ကုမ္ပဏီများဥပဒေ အခန်း (၁၈) တွင် ဒါရိုက်တာများ၏ ရရန်ပိုင်ခွင့်နှင့် တာဝန်ရှိမှုများနှင့်စပ်လျဉ်း၍ ဒါရိုက်တာရာထူး ခန့်အပ်ထားခြင်းမရှိစေကာမူ ကုမ္ပဏီကိစ္စများကို ညွှန်ကြားသူ၊ ထိန်းချုပ်သူများကိုလည်း ဒါရိုက်တာအဖြစ် သတ်မှတ်ကြောင်း ပြဋ္ဌာန်းထားပြီး ဖြစ်သည့်အပြင် ဥပဒေနှင့်အညီ အလှည့်ကျဒါရိုက်တာခန့်အပ်ရန်ကိုလည်း ခွင့်ပြုထားပြီး ဖြစ်သည့်အတွက် ဥပဒေနှင့်မညီညွတ်သော အမည်ခံဒါရိုက်တာများ ခန့်အပ်ခြင်းကို လုံးဝ ခွင့်ပြု မည်မဟုတ်ကြောင်း ထုတ်ပြန်ချက်တွင် ဖော်ပြထားသည်။

ကုမ္ပဏီတွင် ပါဝင်သူတစ်ဦးဦးက ပိုင်ဆိုင်ထားသော အစုရှယ်ယာများအတွက် မှတ်ပုံတင်အရာရှိထံ တင်ပြမှတ်ပုံတင်ရန်အတွက်လည်းကောင်း၊ ကုမ္ပဏီတွင် ထိန်းသိမ်းထား သော ကုမ္ပဏီတွင်ပါဝင်သူများ၏ မှတ်ပုံတင်စာရင်းတွင် မှတ်ပုံတင်စာရင်းရေးသွင်းရန်အတွက် လည်းကောင်း မြန်မာနိုင်ငံကုမ္ပဏီများဥပဒေတွင် ပြဋ္ဌာန်းထားပြီး ဖြစ်ကြောင်။ယခုအခါ အချို့သောနိုင်ငံများတွင် အမည်ခံအစုရှယ်ယာရှင်များဖြင့် မှတ်ပုံတင်စာရင်း ရေးသွင်းခြင်းကို ခွင့်ပြုထားပြီး အကျိုးခံစားခွင့်ရှိသူပိုင်ရှင်ကို သီးခြားဖော်ပြရသော စနစ်မျိုး ကျင့်သုံးဆောင်ရွက်လျက်ရှိသော်လည်း မြန်မာနိုင်ငံအနေဖြင့် ထိုသို့သော အမည်ခံအစုရှယ်ယာရှင်များအမည်ဖြင့် မှတ်ပုံတင် စာရင်းရေးသွင်းခြင်းကို ခွင့်မပြုကြောင်းနှင့် မှတ်ပုံတင်အရာရှိထံ တင်ပြထားသော၊ ကုမ္ပဏီ တွင်ထိန်းသိမ်းထားသော ကုမ္ပဏီတွင်ပါဝင်သူများ၏ မှတ်ပုံတင်စာရင်းတွင် မှတ်ပုံတင်စာရင်း ရေးသွင်းထားသော လူပုဂ္ဂိုလ်၊ဥပဒေဆိုင်ရာပုဂ္ဂိုလ်ကိုသာလျှင် အမှန်တကယ် အကျိုးခံစားခွင့် ရှိသူ ပိုင်ရှင်အဖြစ် သတ်မှတ်မည်ဖြစ်ကြောင်း ဖော်ပြထားသည်။

#ymg/mt
#Yangon_Media_Group

#Local_News
Published_ 20 January 2023

ရခိုင်ပြည်နယ်၊ သံတွဲမြို့အနီးတွင် ဇန်နဝါရီလ ၁၉ ရက်က နယ်မြေခံပင်မရေငုပ်နှင့် ဆယ်ယူရေးတပ်တို့ လေ့ကျင့်ရေးလုပ်ငန်းများ ပြုလုပ်ခဲ့ကြရာတွင် ရေတပ်အထူးစစ်ဆင်ရေးတပ်ဖွဲ့ဝင် ၈ ဦးမှ ရန်သူ့ရေယာဉ်ကို တိတ်တဆိတ်ဝင်ရောက်ဖောက်ခွဲ၍ ပြန်လည်ထွက်ခွာခြင်း (Cast & Recovery) လေ့ကျင့်ခန်းသရုပ်ပြခဲ့ကြကြောင်း နစက သတင်းထုတ်ပြန်ရေးအဖွဲ့က သိရသည်။

အဆိုပါ သရုပ်ပြသရာတွင် တပ်မတော်(ရေ)မှ ရေတပ်အထူးစစ်ဆင်ရေးတပ်ဖွဲ့ဝင် နည်းပြ ၈ ဦး၏ လေ့ကျင့်ရေးစင်မြင့် (Training Tower)၌ Climbing Wall၊ Fast Rope နှင့် Rappelling Rope ဖြင့် ဆင်းသက်ခြင်း၊ အခက်အခဲအတားအဆီး ယုံကြည်မှုကွင်း ဖြတ်ကျော်ခြင်းတို့ကို သရုပ်ပြသလေ့ကျင့်ခြင်း၊ ရေအောက်အနှောင့်အယှက်လေ့ကျင့်ခန်း လေ့ကျင့်နေမှု၊ နှစ်ယောက်တွဲလေဝေရှူခြင်း လေ့ကျင့်နေမှု၊ Closed Circuit အသုံးပြု၍ Underwater Compass ဖြင့် ရေအောက်ကူးခတ်ခြင်း လေ့ကျင့်နေမှုတို့ကို ကြည့်ရှုစစ်ဆေးပြီး 10 Men Hyperbaric Medical Treatment Chamber နှင့် Diving Tower တို့အား လှည့်လည်ကြည့်ရှုကြပြီး တပ်မတော်(ရေ)မှ တပ်ဖွဲ့ဝင်များ၏ Escape Training သရုပ်ပြသလေ့ကျင့်ခဲ့ကြကြောင်းသိရသည်။

ယင်း နယ်မြေခံရေတပ်ပင်မရေငုပ်နှင့် ဆယ်ယူရေးတပ်၏ လေ့ကျင့်ရေးဆောင်ရွက်နေမှုများကို နစက ဥက္ကဌ နှင့် အဖွဲ့ဝင်များကသွားရောက်ကြည့်ရှုခဲ့ကြကာ ရေတပ်ပင်မရေငုပ်နှင့် ဆယ်ယူရေးတပ်ရှိ Training Pool အတွင်းသို့ ရောက်ရှိကြပြီး တပ်မတော်(ရေ)မှ တပ်ဖွဲ့ဝင်များ၏ ၁၀ မီတာ Tower Jump လေ့ကျင့်မှု၊ ၅ မီတာ အမြင့်မှ ခုန်ချ၍ ၅၀ မီတာ ခြေတုပ်၊ လက်တုပ် ကူးခတ် လေ့ကျင့်နေမှု၊ ၅၀ မီတာ အလွတ်ရေအောက်မှ ကူးခတ်လေ့ကျင့်နေမှု၊ လေဘူး၊ ဖြုတ်၊ တပ်ခြင်းလေ့ကျင့်နေမှုတို့ကို ကြည့်ရှုစစ်ဆေးကာ တပ်မတော်(ရေ)၏ လေ့ကျင့်ရေး၊ ဆယ်ယူရေးနှင့် လုံခြုံရေး တာဝန်များ၊ ရေပြင်သက်စောင့်လုပ်ငန်းတာဝန်များ၊ မိုင်း ရှင်းလင်းရေးနှင့် ရေပြင်ကယ်ဆယ်ရေး လုပ်ငန်းများတွင် အသုံးပြုလျက်ရှိသည့် အသုံးအဆောင်ပစ္စည်းများနှင့် လက်နက်များကို ကြည့်ရှု၍ လေ့ကျင့်ရေးလုပ်ငန်းများနှင့် တာဝန်ထမ်းဆောင်ရွက်ခဲ့မှုမှတ်တမ်းဓာတ်ပုံများကို ကြည့်ရှုခဲ့ကြကြောင်းလည်း သိရသည်။

#ymg/mt
#Yangon_Media_Group

#Local_News
Published_ 20 January 2023

တရုတ်နိုင်ငံမှ ကိုဗစ်ကာကွယ်ဆေးအကြိမ်ရေ(၃) သန်းကို မြန်မာနိုင်ငံအတွက်ထပ်မံပံ့ပိုး ပို့ဆောင်ပေးလိုက်ကြောင်း မြန်မာနိုင်ငံဆိုင်ရာတရုတ်သံရုံးမှ သိရသည်၊၊

တရုတ်နိုင်ငံအစိုးရမှ မြန်မာနိုင်ငံသို့ ပံ့ပိုးကူညီသည့် ကိုဗစ်-၁၉ ရောဂါကာကွယ်ဆေးများ လွှဲပြောင်းပေးအပ်ခြင်းအခမ်းအနားကို ဇန်နဝါရီလ ၁၉ ရက်နေ့တွင် ရန်ကုန်အပြည်ပြည်ဆိုင်ရာလေဆိပ်၌ကျင်းပခဲ့သည်၊၊

အခမ်းအနားတွင် ​ပြည်ထောင်စုဝန်ကြီး ဒေါက်တာသက်ခိုင်ဝင်းက ကိုဗစ်-၁၉ ရောဂါ ဖြစ်ပွားလာကတည်းက တရုတ်နိုင်ငံသည် မြန်မာနိုင်ငံသို့ ကာကွယ်ဆေး အကြိမ်ရေ ၆၁ သန်းခန့် ပံ့ပိုးပေးခဲ့ကြောင်း၊ ယခုအကြိမ် ပံ့ပိုးပေးသော ကာကွယ်ဆေး ၃ သန်းကို ကျောင်းနေအရွယ်ကလေးငယ်များနှင့် နာတာရှည်ရောဂါခံစားနေရသော သက်ကြီးရွယ်အိုများအတွက် ထပ်ဆောင်းကာကွယ်ဆေး (booster) အဖြစ် ထိုးနှံပေးမည်ဖြစ်ကြောင်း ထည့်သွင်းပြောကြားခဲ့သည်၊၊

​လွှဲပြောင်းပေးအပ်ခြင်း အခမ်းအနား၌ သံအမတ်ကြီး Mr. Chen Hai က တရုတ်နိုင်ငံဘက်မှ ကိုဗစ်-၁၉ ရောဂါကာကွယ်ဆေးများ ထပ်မံပံ့ပိုးပေးရန် မြန်မာနိုင်ငံဘက်က တောင်းဆိုလာသည့်အတွက် တရုတ်ဘက်မှ လှူဒါန်းပေးရန် ချက်ချင်းတုံ့ပြန်ခဲ့ပြီး လေကြောင်းခရီးစဉ်အကျပ်အတည်းကို ကျော်လွှားကာ ကာကွယ်ဆေးများကို အမြန်ဆုံးပို့ဆောင်ပေးခဲ့ကြောင်း၊ ထို့ပြင် ကိုဗစ်-၁၉ ရောဂါ ဒယ်လ်တာမျိုးကွဲ ကူးစက်ပြန့်ပွားချိန်တွင်လည်း တရုတ်နိုင်ငံက မြန်မာနိုင်ငံအတွက် အောက်ဆီဂျင်အရည်စသည့် အရေးပါသော ကပ်ရောဂါကာကွယ်ကုသရေးပစ္စည်းများ ပို့ဆောင်နိုင်ရန် အထူးလမ်းကြောင်းများ ဖွင့်လှစ်ပေးခဲ့ပြီး မြန်မာနိုင်ငံသို့ အောက်ဆီဂျင်စက် စသည့်ပစ္စည်းများ အရေးပေါ် ပံ့ပိုးပေးခဲ့ကြောင်းပြောကြားခဲ့သည်၊၊

အခမ်းအနားတွင် သံအမတ်ကြီး Mr. Chen Hai နှင့် ပြည်ထောင်စုဝန်ကြီး ဒေါက်တာသက်ခိုင်ဝင်းသည် ကာကွယ်ဆေးအကူအညီပေးရေးစီမံကိန်းဆိုင်ရာ လွှဲပြောင်းပေးအပ်ခြင်းလက်မှတ်အား လက်မှတ်ရေးထိုး၍ အပြန်အလှန်လဲလှယ်ခဲ့ကြကြောင်းသိရသည်၊၊

​#ymg/tthl
#Yangon_Media_Group

#Local_News
Published_ 20 January 2023

ကျပ်သိန်း ၅၀၀၀ ကျော် တန်ဖိုးရှိ ထိန်းချုပ်ဓာတုပစ္စည်း များနှင့် အခြားဓာတုပစ္စည်းများကို ရန်ကုန်တိုင်းဒေသကြီးမှ ရှမ်းပြည်နယ်(တောင်ပိုင်း)သို့ သယ်ယူစဉ် ဖမ်းဆီးမိခဲ့ကြောင်း နစက သတင်းထုတ်ပြန်ရေးက ထုတ်ပြန်လိုက်သည်။

ဇန်နဝါရီလ ၁၄ ရက်နံနက် ၇ နာရီခွဲအချိန်က ရှမ်းပြည်နယ်(တောင်ပိုင်း)၊ တောင်ကြီးမြို့နယ်၊ တောင်ကြီး-လွိုင်လင်သွားကားလမ်း၊ (၄)မိုင်ပူးပေါင်းစစ်ဆေးရေးဂိတ်တွင် တောင်ကြီးမှ လွိုင်လင်ဘက်သို့ ဇော်ဌေးအောင် မောင်းနှင်ပြီး အာကာလိုက်ပါလာသည့် ၂၂ ဘီး တွဲယာဉ်ကို ရှာဖွေရာယာဉ်ပေါ်တွင် အချိုရည်ကတ်များဖြင့် ဖုံးအုပ်၍ တရားမဝင် သယ်ဆောင်လာသော သံပီပါ(၈၀)လုံးဖြင့် ထည့်လျက်ဓာတုပစ္စည်း Sulfurous Dichloride ၁၂ တန် သိမ်းဆည်းရမိခဲ့ပြီးနောက် ကွင်းဆက်အရ ထပ်မံ ဖမ်းမိခဲ့ခြင်းဖြစ်ကြောင်း သိရသည်။

ဇန်နဝါရီလ ၁၅ ရက်တွင် တောင်ကြီးဘက်မှ လွိုင်လင်ဘက်သို့ မျိုးအောင် မောင်းနှင်ပြီး ပြည့်ဖြိုးအောင် လိုက်ပါလာသော ၂၂ ဘီးတွဲယာဉ်နှင့် ရှေ့နောက်လိုက်ပါလာသည့် စည်သူအောင် မောင်းနှင်ပြီး တင်အောင်ဝင်း လိုက်ပါလာသည့် ၂၂ ဘီးတွဲယာဉ်တို့ ၂ စီးပေါ်တွင် အုတ်နီခဲများဖြင့် ဖုံးအုပ်၍ တရားမဝင်သယ်ဆောင်လာသော ပလတ်စတစ်ပီပါ(၁၁၉)လုံးဖြင့်ထည့်လျက် ဓာတုပစ္စည်း Benzyl Cyanide ၁၇ ဒသမ ၈၅ တန်နှင့် Caustic Soda ၆ ဒသမ ၇၅ တန်တို့ကို ထပ်မံသိမ်းဆည်း ရမိခဲ့ကြောင်းလည်း သိရသည်။

ယင်းနောက် တာဝန်ခံသယ်ဆောင်သူ ဇော်လင်းစိုး အား တောင်ကြီး-ဟိုပုံးသွားကားလမ်းဟိုပုံးမြို့အဝင်တွင် PAJERO မော်တော်ယာဉ် ၁ စီးနှင့်လည်းကောင်း ပူးပေါင်းပါဝင်ဆောင်ရွက်သူ မြတ်သူအား အောင်ပန်းမြို့ မိုးကောင်းရပ်ကွက်တွင်လည်းကောင်း၊ လွိုင်လင်မြို့ နယ်၊ လွိုင်လင်ယ တောင်ကြီးသွားကားလမ်း၊ ဟိုတင့်ကျေးရွာအနီးတွင် လွိုင်လင်ဘက်မှ တောင်ကြီးဘက်သို့ မျိုးကျော်(ခ)အားမီ မောင်းနှင်ပြီး ရွှေမင်းဦး(ခ)ကောင်းထက် လိုက်ပါလာသည့် FUSO ၁၂ ဘီး မော်တော်ယာဉ်ကို ရှာဖွေရာ ယာဉ်ပေါ်ပါ တရားမဝင်သယ်ဆောင်လာသော ဓာတုပစ္စည်း SODIUM HYDROHIDE, ANHYDROUS(NaOH) ၁၄ ဒသမ ၉၅ တန် ထပ်မံသိမ်းဆည်းရမိခဲ့ကြောင်း သိရသည်။

ဇန်နဝါရီလ ၁၆ ရက်ကလည်း သာစည်မြို့နယ် ကျွဲတပ်ဆုံကျေးရွာရှိ စစ်ဆေးရေးစခန်းအနီးတွင် သာစည်ဘက်မှ တောင်ကြီး မြို့ ဘက်သို့ ချစ်တိုင်းအောင်မောင်းနှင်ပြီး ကျော်ဇင်ခက် လိုက်ပါလာသည့် NISSAN ၁၂ ဘီး မော်တော်ယာဉ်ပေါ်တွင် သံပီပါ(၅၀)လုံးဖြင့်ထည့်လျက် တရားမဝင်သယ်ဆောင်လာသည့် ထိန်းချုပ် ဓာတုပစ္စည်း Toluene ၃ တန် Methylamine ၄ ဒသမ ၅ တန်တို့ကို သိမ်းဆည်းရမိခဲ့ကြောင်း၊အင်းစိန်မြို့နယ်ရွှေပြည်သာ၊ စက်မှုဇုန်(၃)မင်းကြီးမဟာမင်းခေါင် လမ်းရှိ ဂိုဒေါင်ကို ဝင်ရောက်ရှာဖွေရာ စိုင်းခေးလှိုင်အားတွေ့ရှိပြီး ဂိုဒေါင်အတွင်း တရားမဝင် သိုလှောင်ထားရှိသည့် သံပီပါ(၃၀)လုံးဖြင့်ထည့်လျက် ထိန်းချုပ်ဓာတုပစ္စည်း Toluene ၄ ဒသမ ၅ တန် ထပ်မံဖမ်းဆီးရမိခဲ့သဖြင့် ဒေသကာလတန်ဖိုးငွေကျပ်သိန်း ၅,၀၀၀ ကျော်တန်ဖိုးရှိ စုစုပေါင်း ထိန်းချုပ်ဓာတုပစ္စည်းနှင့် အခြားဓာတုပစ္စည်းများ ၆၃ ဒသမ ၅၅ တန် သိမ်းဆည်းရမိခဲ့ကြောင်း လည်း သိရသည်။

#ymg/mt
#Yangon_Media_Group

Published 19 Jan 2023

မြန်မာနိုင်ငံက အိမ်ရှင်အဖြစ် လက်ခံကျင်းပပြုလုပ်တဲ့  မြန်မာ-ထိုင်း တပ်မတော်နှစ်ရပ်အကြား အဆင့်မြင့်အရာရှိကြီးများအစည်းအဝေး 8th High Level Committee Meeting သို့ တက်ရောက်ရန် ရောက်ရှိနေတဲ့  ထိုင်းဘုရင့်တပ်မတော်ကာကွယ်ရေးဦးစီးချုပ် General Chalermphon Srisawasdi နှင့် ဇနီး ဦးဆောင်သည့် ကိုယ်စားလှယ်အဖွဲ့ကို နစက ဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချူပ်မှူးကြီး မင်းအောင်လှိုင်နှင့်ဇနီး ဒေါ်ကြူကြူလှတို့က ဇန်နဝါရီ ၁၉ရက်  ယနေ့ညပိုင်းတွင် ရခိုင်ပြည်နယ်၊ သံတွဲမြို့၊ Jasmine ဟိုတယ်၌ ညစာစားပွဲဖြင့် ကြိုဆို ဧည့်ခံခဲ့တယ်လို့ နစက ပြန်ကြားရေး က သတင်းထုတ်ပြန်ပါတယ်။

အဲဒီ ညစာစားပွဲအခမ်းအနားသို့ နစက ဥက္ကဋ္ဌ တပ်မတော်ကာကွယ်ရေးဦးစီးချုပ်နှင့်ဇနီး၊ ထိုင်းဘုရင့်တပ်မတော်ကာကွယ်ရေးဦးစီး ချုပ်နှင့် ဇနီး တို့နှင့်အတူ ညှိနှိုင်းကွပ်ကဲရေးမှူး(ကြည်း၊ ရေ၊ လေ) ဗိုလ်ချုပ်ကြီး မောင်မောင်အေး နှင့် ဇနီး၊ ကာကွယ်ရေးဦးစီးချုပ်(ရေ) ဗိုလ်ချုပ်ကြီး မိုးအောင်နှင့် ဇနီး၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး ထွန်းအောင်နှင့် ဇနီး၊ ကာကွယ်ရေးဦးစီးချုပ်ရုံး မှ တပ်မတော်အရာရှိကြီးများနှင့် ဇနီးများ၊ ထိုင်းဘုရင့်တပ်မတော်မှ အရာရှိကြီးများနှင့် ဇနီးများ၊ နှစ်နိုင်ငံ စစ်သံမှူးများ နှင့် ဇနီးများ၊ တာဝန်ရှိသူများ တက်ရောက်ကြတယ်လို့သိရှိရပါတယ်။

ညစာစားပွဲတက်ရောက်လာတဲ့ ထိုင်းဘုရင့်တပ်မတော် ကာကွယ်ရေးဦီးစီးချုပ်နှင့်ဇနီးတို့ကို ဗိုလ်ချူပ်မှူးကြီးမင်းအောင်လှိုင်နှင့်ဇနီးတို့က ရင်းနှီးနွေးထွေးစွာ ကြိုဆိုနှုတ်ဆက်ခဲ့ကြပါတယ်။ အဲဒီနောက် နှုတ်ခွန်းဆက်စကားများ အပြန်အလှန်ပြောကြားကြပြီး တက် ရောက်လာကြသူများနှင့်အတူ ညစာကို အတူတကွ သုံးဆောင်ခဲ့ကြပါတယ်။

ထိုင်းဘုရင့်တပ်မတော်ကာကွယ်ရေး ဦးစီးချုပ် ဦးဆောင်တဲ့ ထိုင်းဘုရင့်တပ်မတော် အဆင့်မြင့် ကိုယ်စားလှယ်အဖွဲ့ဟာ  ယနေ့နံနက်ပိုင်းတွင် ထိုင်းဘုရင့်တပ်မတော် အထူး လေယာဉ် ဖြင့် ရခိုင်ပြည်နယ်၊ သံတွဲလေဆိပ်သို့ ရောက်ရှိခဲ့ကြတာဖြစ်ပါတယ်။

ထိုင်းဘုရင့်တပ်မတော်ကာကွယ်ရေးဦးစီးချုပ် ဦးဆောင်တဲ့  အဆင့်မြင့် ကိုယ်စား လှယ်အဖွဲ့သည် မြန်မာနိုင်ငံသို့ ရောက်ရှိနေစဉ်အတွင်း 8th High Level Committee Meeting သို့ တက်ရောက်ခြင်း၊ တပ်မတော်နှစ်ရပ်အကြား ချစ်ကြည်ရင်းနှီးမှုနှင့် ပူးပေါင်း ဆောင်ရွက်မှုများ ပိုမိုတိုးမြှင့်နိုင်ရေးအတွက် ဆွေးနွေးဆောင်ရွက်ခြင်း၊ တန်ခိုးကြီးဘုရား များအား ဖူးမြော်ခြင်းနှင့် အထင်ကရနေရာများသို့ သွားရောက်လေ့လာခြင်းများကို ဆောင်ရွက်သွားမှာဖြစ်တယ်လို့ သတင်းထုတ်ပြန်ချက်မှာဖော်ပြထားပါတယ်။

-ymg/knl

#Myanmar_Thailand_Military_Co-operation