#Daily_News
Published_ 12 May 2023

၁။ အိန္ဒိယအစိုးရက လွတ်လပ်စွာ ပဲတင်သွင်းခွင့်ကာလတိုးမြှင့်သတ်မှတ်

၂။ ရခိုင်ကို ဆိုက်ကလုန်းမုန်တိုင်းဝင်ရောက်နိုင်ပေမည့် မြောက်ဦးအမွေအနှစ် ထိခိုက်နိုင်ခြေနည်းနိုင်ဟုဆို

၃။ ကမ္ဘာ့ရွှေဈေး ၂၀၂၅ ပေါက်ဈေးရှိနေပြီး ဈေးဆက်လက်မြင့်တက်နေ ရန်ကုန်ရွှေအသင်း ၂၃သိန်း၆သောင်းကျော်ရည်ညွှန်းသတ်မှတ်

၄။ နော်ဝေးဆဗယ်ဘာ့ကျွန်းများတွင် ရေခဲများမြန်ဆန်စွာအရည်ပျော်ခြင်းပြဿနာနှင့် ကြုံတွေ့နေရ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group #Daily_News #YMG

#Local_News
Published_ 12 May 2023

မော်ဒယ်နိမ့် YBS ဘတ်စ်ကားဟောင်းတွေအစား လျှပ်စစ်ဘတ်စ်ကား (EV Bus)တွေ အစားထိုးပြေးဆွဲနိုင်အောင်ဆောင်ရွက်သွားဖို့ရှိတယ်လို့ YRTC မှ သိရပါတယ်၊

#Local_News #မော်ဒယ်နိမ့် YBS ဘတ်စ်ကား #လျှပ်စစ်ဘတ်စ်ကားများအစားထိုးပြေးဆွဲ
#YMG #Yangon_Media_Group

Published 12 May 2023

ရခိုင်ပြည်နယ် တောင်ကုတ်မြို့နယ်မှာ မိုခါဆိုင်ကလုန်းမုန်တိုင်းအန္တရာယ်ကျရောက်နိုင်တဲ့ ပင်လယ်ကမ်းခြေကျေးရွာများမှ ပြည်သူတွေ မုန်တိုင်းဘေးလွတ်ရာနေရာတွေဖြစ်တဲ့ ယာယီခိုလှုံရာစခန်းများသို့ ရွှေ့ပြောင်းခိုလှုံရန် ရောက်ရှိလာကြတယ်လို့ ဒေသခံ ပြန်/ဆက်ရဲ့ သတင်းထုတ်ပြန်ချက်အရသိရပါတယ်။

အဲဒီကျေးရွာတွေကတော့ ပန်းတင်ကျွန်း ၊ ဖောင်းခါး ၊ ခေါင်းလောင်းတူ၊ ကုလားရောင်၊ ဂျီပြင်၊ ညောင်ပင်ဆိပ်၊ နတ်ကန်နှင့် ပြင်ကြီးကျေးရွာတွေဖြစ်ကြပြီး ယာယီခိုလှုံရေးစခန်းတွေဖြစ်တဲ့ တောင်ကုတ်မြို့ပေါ်ရှိ အထက(၄)ဂူတာကျောင်း၊ သိမ်တောင်ဘုရားကြီးကျောင်းတိုက်၊ အာလိန်ငါးဆင့် ကျောင်းတိုက်နှင့် ဝိသုတာရာမကျောင်းတိုက်များတွင် သက်ဆိုင်ရာသဘာဝဘေးအန္တရာယ်ဆိုင်ရာ ဒေသ အာဏာပိုင်တွေနှင့်အဖွဲ့အစည်းတွေက စီစဉ်နေရာချထားပေးတယ်လို့ သတင်းမှာဖော်ပြထားပါတယ်။

အချို့ကျေးရွတွေကတော့ ကျေးရွာတွေမှာရှိတဲ့ Cyclone Shelter များ၊ စာသင်ကျောင်းများနှင့် ဘုန်းတော်ကြီးကျောင်းများတွင် ယာယီခိုလှုံလျက်ရှိကြောင်းလည်းသိရှိရပါတယ်။

တောင်ကုတ်မြို့နယ်တွင် မိုခါဆိုင်ကလုန်းမုန်တိုင်းအတွက် အသိပညာပေးနှိုးဆော်ခြင်း ၊ ယာယီခိုလှုံမည့် စခန်းများသတ်မှတ်ထားခြင်း ၊ Command Post အဖွဲ့ ဖွဲ့စည်းထားရှိခြင်း၊ စားနပ်ရိက္ခာ၊ ရေနှင့်ဆေးဝါးများ စုဆောင်းထားရှိခြင်း၊ အရေးပေါ် ဆေးကုသရေး နေရာများ သတ်မှတ်ထားရှိခြင်းများဖြင့် ကြိုတင်ပြင်ဆင်ထားရှိတယ်လို့ သတင်းမှာဖော်ပြထားပါတယ်။

Photo-IPRD
-ymg/knl
#Mocha_Cyclone
#မိုခါဆိုင်ကလုန်း_ရခိုင်ပြည်နယ်_မြန်မာ

#Local_News
Published_ 12 May 2023

မုန်တိုင်းမဖြတ်ကျော်ခင်အချိန်တွင် ရခိုင်ပြည်နယ်နေပြည်သူများဖုန်း၊ ဓာတ်မီး၊ ဘက်ထရီ၊ မီးသီးစသည်များ အားသွင်းထားကြပါရန် ရခိုင်ပြည်နယ်ရှိ EPC မှ နှိုးဆော်ထုတ်ပြန်လိုက်ကြောင်း သိရသည်၊၊

ထုတ်ပြန်ချက်တွင် "မုန်တိုင်းဖြတ်ကျော်မည်ဟု ခန့်မှန်းထားသည့်မြို့များကို ကြိုတင်ပြင်ဆင်မှုများဆောင်ရွက်နိုင်ရန် တက်နိုင်သလောက် ဓာတ်အားမပြတ်ရေး ကြိုးစားဆောင်ရွက်ပေးထားကြောင်း၊ ဖုန်း၊ ဓာတ်မီး၊ ဘက်ထရီ၊ မီးသီး....စသည်များ အားသွင်းထားကြပါရန် ပထမအကြိမ် နှိုးဆော်ကြောင်း ဖော်ပြထားသည်၊၊

သဘာဝဘေးကြုံရချိန်တွင် ဆေးရုံစသည့် အရေးကြီးနေရာများတွင်လျှပ်စစ်ဓာတ်အားပြတ်တောက်မှု မရှိအောင် လျှပ်စစ်စွမ်းအားဝန်ကြီးဌာနမှ မီးစက်များဖြင့်စီစဉ်ဆောင်ရွက်ထားမည်ဖြစ်သည်ဟု ထုတ်ပြန်ထားသည်၊၊

မေလ(၁၄) ရက်တွင် အားအလွန်ကောင်းသည့် ဆိုက်ကလုန်းမုန်တိုင်းသည် ရခိုင်ပြည်နယ်၊ကျောက်ဖြူမြို့နှင့် စစ်တွေမြို့အနီးမှဖြတ်ကျော်ဝင်ရောက်ရန်ရှိသောကြောင့် ကြိုတင်ပြင်ဆင်မှုဆောင်ရွက်ထားရန် လိုအပ်ကြောင်းသိရသည်၊၊

#ymg/tthl #Local_News #ဖုန်း၊ ဓာတ်မီး၊ ဘက်ထရီ၊ မီးသီး #EPC မှ နှိုးဆော်
#YMG #Yangon_Media_Group

#Local_News
Published_ 12 May 2023

သဘာဝဘေးကြုံနိုင်သည့် ရခိုင်ပြည်နယ်သို့ ရွေ့လျားရေသန့်စင်စက်၊ ဆေးဝါးနှင့်ရေသန့်ဆေးပြားများ၊ မိုးကာတဲများ၊ တာပေါ်လင်စများနှင့်လိုအပ်သောပစ္စည်းများ ပို့ဆောင်ထားမည်ဖြစ်ကြောင်း လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနမှသိရသည်၊၊

ယင်းကဲ့သို့ ပို့ဆောင်ထားခြင်းကို သဘာဝဘေး အန္တရာယ်ဆိုင်ရာ စီမံခန့်ခွဲမှုဗဟိုဌာန (Disaster Management Centre-DMC) လုပ်ငန်းဆောင် ရွက်မှု ရှင်းလင်းတင်ပြခြင်း အစည်းအဝေးတွင်လုပ်ငန်းကော်မတီများမှ တာဝန်ရှိသူများ၏ ထည့်သွင်းဆွေးနွေးချက်အရသိရခြင်းဖြစ်သည်၊၊

လုပ်ငန်းကော်မတီများမှ တာဝန်ရှိသူများက ဆိုင်ကလုန်းမုန်တိုင်း မိုခါ (MOCHA)၏ လက်ရှိအခြေအနေ၊ မုန်တိုင်းဦးတည်ရာလမ်းကြောင်း၊ မုန်တိုင်းပြင်းအားနှင့် မုန်တိုင်းဖြတ်သန်းဝင်ရောက်မည့် အခြေအနေ၊ ရခိုင်ပြည်နယ်နှင့် ချင်းပြည်နယ်တို့ရှိ မုန်တိုင်းဖြတ်သန်း ဝင်ရောက်နိုင်သည့် မြို့နယ်များတွင် လုံခြုံရေးပိုင်းဆိုင်ရာ အသင့်ပြင်ဆင်ထားရှိမှု၊ အရေးပေါ် ဆက်သွယ်ရေးအတွက် ပြင်ဆင်ထားရှိမှု၊ အရေးပေါ်ရှာဖွေကယ်ဆယ်ရေးအတွက် လူအင်အား၊ ယာဉ်အင်အား၊ စက်ပစ္စည်း ကိရိယာအင်အားများ စုဖွဲ့ထားရှိမှု၊ Cyclone Shelter နှင့် ဘေးလွတ် ရာနေရာများသို့ ပြောင်းရွှေ့ပြီးစီးမှုနှင့် ဆက်လက်ပြောင်းရွှေ့ရန် စီစဉ်ထားရှိမှု၊ ဆက်သွယ်မှု ကောင်းမွန်စေရေး ဆက်သွယ်ရေးစက်နှင့် Satellite Phone များ တပ်ဆင်ထားရှိမှု၊ နိုင်ငံတကာနှင့် ဆက်သွယ်ဆောင်ရွက်ထားရှိမှု၊ ရခိုင်ပြည်နယ်သို့ ရွေ့လျားရေသန့်စင်စက်ပေးပို့ပြီးစီးမှု၊ အရေးပေါ် ကျန်းမာရေးစောင့်ရှောက်မှုအဖွဲ့များ စေလွှတ်ပြီးစီးမှုနှင့် ဆက်လက်စေလွှတ်ရန် စီစဉ်ထားရှိမှု၊ လူနာတင်ယာဉ်နှင့် ဆေးရုံများ အသင့်ပြင်ဆင်ထားရှိမှု၊ ဆေးဝါးများနှင့် ရေသန့်ဆေးပြားများ ပို့ဆောင်ထားရှိမှု၊ ဘေလီတံတားနှင့် လူအင်အားစုဖွဲ့ထားရှိမှု၊ ကယ်ဆယ်ရေးပစ္စည်းများ၊ မိုးကာတဲများ၊ တာပေါ်လင်စများ အသင့်ပြင်ဆင်ထားရှိမှု စသည်ဖြင့် အရေးပေါ်တုံ့ပြန်ရေးလုပ်ငန်းများအတွက် ဆောင်ရွက်ထားရှိမှုများကို အစည်းအဝေး၌ ဆွေးနွေးတင်ပြခဲ့ကြသည်၊၊

ဆွေးနွေးပွဲတွင် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနမှပြည်ထောင် စုဝန်ကြီးကလည်း အရေးပေါ်တုံ့ပြန်ရေး ကြိုတင်ပြင်ဆင်ထားရှိမှု၊ အရန်ဆန်တန်ချိန် (၁)သောင်း ဝယ်ယူဖြန့်ခွဲမည့် အခြေအနေနှင့်DMC အဖွဲ့ဝင် ကာကွယ်ရေးဦးစီးချုပ်ရုံး(ရေ) ကိုယ်စားလှယ်က မုန်တိုင်းဒီရေ မြင့်တက်လာပါက ဖြစ်ပေါ်လာနိုင်မည့် အခြေအနေများကို ရှင်းလင်းတင်ပြကြောင်း သိရသည်၊၊

#ymg/tthl #Local_News #သဘာဝဘေးကြုံနိုင် #ရွေ့လျားရေသန့်စင်စက်၊ ဆေးဝါးနှင့်ရေသန့်ဆေးပြားများပို့ဆောင် #YMG #Yangon_Media_Group

#Local_News
Published_ 12 May 2023

လေကြောင်းလိုင်းမရှိ၍ ငပလီမှ ပြန်မရဖြစ်နေသော ဧည့်သည်များအား မုန်တိုင်းပြီးချိန်အထိ ဆက်လက်နားခိုနိုင်ရန်လုပ်ဆောင်ပေးထားကြောင်း ရခိုင်ပြည်နယ် ဟိုတယ်နှင့် ခရီးသွားလာရေး ညွှန်ကြားမှု ဦးစီးဌာနမှ ညွှန်ကြားရေးမှူး ဦးတင်ထွဋ်အောင် ကပြောသည်။

“လေကြောင်းလိုင်းတွေ ပိတ်ထားတယ်ဆိုတော့ ပြန်မယ့် ခရီးသွားတွေ မပြန်နိုင်သူတွေလည်း ရှိတယ်။ ကျန်ရှိတဲ့ သူတွေကို ဟိုတယ်တွေက ထိန်းသိမ်းစောင့်ရှောက်ထားဖို့ မှာကြားထားတယ်။ မေလ ၉ ရက်ကစပြီး မုန်တိုင်းငြိမ်သက်ချိန်အထိ မုန်တိုင်းကာလအဖြစ် သတ်မှတ်ထားတာကြောင့် ပင်လယ်ကမ်းခြေ ခရီးသွားတွေ ခရီးသွားလာမှု တွေကို ရပ်နားထားဖို့ တိုက်တွန်းထားတာရှိတယ်။ ဌာနအနေနဲ့ ပျက်စီးဆုံးရှုံးမှုနည်းနိုင်သမျှနည်းအောင် ကြိုတင်ပြင်ဆင်ထားဖို့ ဝန်ထမ်းတွေကို လမ်းညွှန်ထားပါတယ်။ အထူးသဖြင့် ပင်လယ်ကမ်းခြေ ဟိုတယ်နှင့် တည်းခိုခန်းတွေကို မုန်တိုင်းအန္တရာယ်နဲ့ ပတ်သက်ပြီး ကြိုတင်အသိပေးထားပါတယ်” ဟု ယင်းက မီဒီယာများအား ပြောသည်။

ယနေ့ မေလ ၁၂ ရက် နံနက် ၉ နာရီခွဲ အချိန် တိုင်းထွာချက်အရ ဘင်္ဂလား ပင်လယ်အော်အရှေ့တောင်ပိုင်းနှင့် ယင်းနှင့်ဆက်စပ်လျက်ရှိသော ဘင်္ဂလား ပင်လယ်အော်အလယ်ပိုင်းတွင် ဖြစ်ပေါ်နေသော အားကောင်းသောဆိုင်ကလုန်း မုန်တိုင်း(Severe Cyclonic Storm) “မိုခါ(MOCHA)”သည် မြောက်ယွန်းယွန်းသို့ ရွေ့လျားခဲ့ပြီး၊ ပိုမိုအားကောင်းလာကာ အားအလွန်ကောင်းသောဆိုင် ကလုန်းမုန်တိုင်း(Very Severe Cyclonic Storm) “မိုခါ(MOCHA)”အဖြစ်သို့ ရောက်ရှိခဲ့ပါသည်။ အဆိုပါ အားအလွန်ကောင်းသောဆိုင်ကလုန်းမုန်တိုင်း (Very Severe Cyclonic Storm) “မိုခါ (MOCHA)”သည် မြန်မာနိုင်ငံ၊ ကိုကိုးကျွန်းမြို့(Coco Island)၏ အနောက်-အနောက်တောင်ဘက် ရေမိုင် (၃၁၀)မိုင်ခန့်၊ ဟိုင်းကြီးကျွန်းမြို့(Hainggyigyun)၏ အနောက်တောင်ဘက် ရေမိုင်(၄၀၀)မိုင်ခန့်၊ စစ်တွေမြို့(Sittwe)၏ တောင်-အနောက်တောင်ဘက် ရေမိုင်(၄၉၅)မိုင်ခန့်၊ အိန္ဒိယနိုင်ငံ၊ ပို့ပလဲယား(Port Blair)၏ အနောက်-အနောက်မြောက်ဘက် ရေမိုင်(၂၉၀)မိုင်ခန့်နှင့် ဘင်္ဂလားဒေ့ရှ်နိုင်ငံ၊ ကော့ဘဇား မြို့(Cox’s Bazar)၏ တောင်-အနောက်တောင်ဘက် ရေမိုင်(၅၃၀)မိုင်ခန့် အကွာ ပင်လယ်ပြင်ကို ဗဟိုပြုနေကြောင်း မိုးလေဝသနှင့် ဇလဗေဒညွှန်ကြားမှု ဦးစီးဌာနက ထုတ်ပြန်ထားသည်။

ယင်းအားအလွန်ကောင်းသောဆိုင်ကလုန်းမုန်တိုင်း(Very Severe Cyclonic Storm) “မိုခါ(MOCHA)”၏ လက်ရှိအခြေအနေမှာ ဘင်္ဂလားဒေ့ရှ်-မြန်မာကမ်းရိုးတန်း သို့ ဦးတည်ရွေ့လျားနိုင်သည့် အခြေအနေရှိပါသဖြင့် လိမ္မော်ရောင်အဆင့်ဟု သတ်မှတ်ကြောင်း၊“မိုခါ(MOCHA)”သည် မေလ ၁၄ ရက်တွင်ဘင်္ဂလားဒေ့ရှ်နိုင်ငံ၊ ကော့ဘဇားမြို့(Cox’s Bazar)နှင့် မြန်မာနိုင်ငံ၊ ကျောက်ဖြူမြို့(Kyaukpyu)တို့ကြား စစ်တွေမြို့(Sittwe)အနီးမှ ဖြတ် ကျော်ဝင်ရောက်နိုင်သည်ဟု ခန့်မှန်းရကြောင်း သိရသည်။

#ymg/pl #Local_News #လေကြောင်းလိုင်းမရှိ #မုန်တိုင်းပြီးချိန်အထိနားခိုနိုင်ရန်လုပ်ဆောင်
#YMG #Yangon_Media_Group