#Health_Matters
Published - 18 Feb 2023

- ကြက်ငှက်တုပ်ကွေးဗိုင်းရပ်စ်တွေက သန္ဓေပြောင်းလာနေပြီလို့ သတင်းအချို့မှာဖတ်ရပါတယ်။ အဲဒါဟုတ်ပါသလား??

#Yangon_Media_Group

#Local_News
Published-18 February 2023

ကျန်းမာရေးဝန်ကြီးဌာန ၊ အစားအသောက်နှင့်ဆေး ဝါးကွပ်ကဲရေးဦးစီးဌာန(FDA)မှ စားသုံးရန်မသင့်သည့် အစားအသောက် ၃၇ မျိုးကို ဖေဖော်ဝါရီလ ၁၈ ရက်တွင် အသိပေးထုတ်ပြန်လိုက်သည်။

ယင်းအစားအသောက်များမှာ ရွှေအုပ်မက်မန်းယို၊ ကောင်းဟိန်းဇီးယို၊ ဘုရင်မ မက်မန်းသီး(အနီ) ရုပ်ပုံပါ မန်ကျည်းဖလိတ်ပြား၊ 123 တံဆိပ်သရက်ယို၊ Hong Yuan တံဆိပ်ဇီးသီးယို၊ MK တံဆိပ်မက်၊မန်းသီး(အနီ)၊ ASA(Kisses You)တံဆိပ် Heart Jelly ၊ LANTERN တံဆိပ်(ပုလင်း)Bubble Gum ၊ Fruity တံဆိပ်(ပလတ်စတစ်ခွက်)အချိုရည် တို့ဖြစ်ကြောင်း အသိပေးစာတွင် ဖော်ပြထားသည်။

ထို့အပြင် မမော် တံဆိပ်ဇယန်းလက်ဖက်အစို၊ ABC(rainbow) တံဆိပ်(ပလတ်စတစ်ပုလင်း)စတော်ဘယ်ရီအရသာအချိုရည်၊ ခြင်္သေ့မင်း တံဆိပ်ငရုတ်ဆီ၊ Lucky Tiger တံဆိပ်ငရုတ်ဆီ၊ Sun Light တံဆိပ်(ပလတ်စတစ်ပုလင်း)ကိုလာအရသာအချိုရည်၊ ဇယန်းရွှေတောင် တံဆိပ်ပဲကြီးလှော် Thailand စာသားပါ(ပလတ်စတစ်ပုလင်း)ယိုးဒယားငါးပိရည်၊ Thailand စာသားပါ (ပလတ်စတစ်အိတ်)ကြက်ကြောလုံး၊ TP Food တံဆိပ်ကြက်ကြောလုံး၊ City Food Squid တံဆိပ် ရေဘဝဲချောင်း၊ Thailand စာသားပါ(ပလတ်စတစ်အိတ်)ပုဇွန်လုံး၊ Shenglong တံဆိပ်ပုဇွန်လုံး၊တရုတ်စာသားပါ(ပလတ်စတစ်အိတ်)ပုဇွန်လုံးနှင့် Thailandစာသားပါ(ပလတ်စတစ်အိတ်) စသည့် အစားအသောက်များလည်း ပါဝင်သည်။

အဆိုပါ အစားအသောက် များကို တာရှည်စားသောက်မိပါက အစာအိမ်၊ အသည်း၊ ကျောက်ကပ်ပျက်စီးနိုင်ခြင်းနှင့်ကင်ဆာရောဂါဖြစ်ပွားစေနိုင်ကြောင်းလည်း အသိပေးထားသည်။

အစားအသောက်ထုတ်လုပ်၊ဖြန့်ဖြူး၊ ရောင်းချသူများအနေဖြင့်လည်း အစားအသောက်တွင် သုံးစွဲရန်ခွင့်မပြုသော ဆိုးဆေးများ၊ခွင့်မပြုတာရှည်ခံ ဓာတုပစ္စည်းများကို လုံးဝအသုံးမပြုရန်၊ ခွင့်ပြုအစားအသောက်ထပ်ဖြည့်ဓာတုပစ္စည်းများကို သတ်မှတ်ပမာဏအတွင်းသာ အသုံးပြုရန်တို့ကို လိုက်နာခြင်းမရှိပါက အမျိုးသားအစားအသောက်ဥပဒေပုဒ်မ ၂၈(က)အရ အရေးယူခံရမည်ဟု အသိပေးထားသည်။

#ymg/mt
#Yangon _Media _Group

#Local_News
Published-18 February 2023

နိုင်ငံကျော်အဆိုတော် မီမီဝင်းဖေ၏ မွေးနေ့အထိမ်းအမှတ်အလှူအဖြစ် ဆေးဝါးကုသမှုခံ ယူနေသူလူနာများနှင့် ရန်ကုန်တိုင်းဒေသကြီး၊ ဒဂုံဆိပ်ကမ်းမြို့နယ်ရှိ ကျူးကျော်မိသားစုဝင်များအတွက် ခြုံ စောင်အထည်(၂၆၀) ကို လှူဒါန်းပေးခဲ့ကြောင်း ၎င်း၏လူမှုကွန်ယက်စာ မျက်နှာက သိရသည်။

ယင်းကို ဖေဖော်ဝါရီလ ၁၆ရက်က အဆိုတော်မီမီဝင်းဖေ ကိုယ်စားTeam –KG အနေဖြင့် သွားရောက်လှူဒါန်းပေးခဲ့ကြောင်းလည်း သိရသည်။

“နာမကျန်းဖြစ်သူများလည်း အမြန်ဆုံးသက်သာကျန်းမာကြပါ စေ” “နွေးထွေးလုံခြုံကြပါစေ”ဟုလည်း အဆိုတော်မီမီဝင်းဖေက ၎င်း၏လူမှုကွန်ယက်စာမျက်နှာမှတစ်ဆင့် ဆု တောင်းပေးထားသည်။

ယင်းအပြင်Team –KG Ambulance Operations များတွင် စက်သုံးဆီဖြည့်တင်းရန်နှင့် လိုအပ်သည့်နေရာများတွင်အသုံးပြုနိုင်ရန် ငွေကျပ် ၃သိန်းလှူဒါန်းပေးခဲ့ကြောင်းလည်း သိရသည်။

#ymg/mt
#Yangon Media Group

#Local_News
Published_ 18 February 2023

ရုရှားအစိုးရနှင့် ပိုမိုနီးကပ်စွာလက်တွဲလုပ်ဆောင်သွားမည်ဟုနိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ကတိကဝတ်ပြုလိုက်သည်။

ဖေဖော်ဝါရီလ ၁၈ ရက်တွင် ကျရောက်သည့် ပြည်ထောင်စုသမ္မတမြန်မာနိုင်ငံတော်နှင့် ရုရှားဖက်ဒရေးရှင်းနိုင်ငံတို့အကြား နှစ်နိုင်ငံသံတမန်ဆက်ဆံရေး (၇၅)နှစ်မြောက် စိန်ရတုအထိမ်းအမှတ်အဖြစ် ရုရှားဖက်ဒရေးရှင်းနိုင်ငံ၊ သမ္မတ မစ္စတာဗလာဒီမာပူတင် ထံ ပေးပို့သည့်သဝဏ်လွှာတွင် ယင်းကအထက်ပါအတိုင်း ကတိကဝတ်ပြုလိုက်ခြင်းလည်း ဖြစ်သည်။

ယင်းသဝဏ်လွှာတွင်၂၀၂၃ ခုနှစ်သည် နှစ်နိုင်ငံဆက်ဆံရေးသမိုင်းမှတ်တိုင်တစ်ရပ်ကို အမှတ်ရဖော်ကျူးရန် အခါသမယတစ်ခုအဖြစ်သာမက နှစ်နိုင်ငံဆက်ဆံရေးနှင့် နှစ်ဖက်အကျိုးဖြစ်ထွန်းစေမည့် ပူးပေါင်းဆောင်ရွက်မှုများကို ပြန်လည်သုံးသပ်၍ အားသစ်လောင်းနိုင်မည့် အချိန်အခါတစ်ခုလည်း ဖြစ်ကြောင်း၊ ယခုတစ်နှစ်ပတ်လုံး နှစ်နိုင်ငံတွင် ကျင်းပရန်လျာထားသည့် အထိမ်းအမှတ်အခမ်းအနားများနှင့် လှုပ်ရှားမှုများက နိုင်ငံဆက်ဆံရေးကို ပိုမိုခိုင်မာစေရန် လမ်းခင်းပေးမည်ဖြစ်၍နှစ်နိုင်ငံဆက်ဆံရေး ပိုမိုခိုင်မာစေရန်နှင့် အာရှပစိဖိတ်ဒေသနှင့် ယင်းဒေသအပြင်ဘက် တည်ငြိမ်သာယာဝပြောရေးအတွက် အထောက်အကူဖြစ်စေမည့် ဘုံအကျိုးစီးပွားဖြစ်ထွန်းစေသည့် ကဏ္ဍစုံတွင် ပူးပေါင်းဆောင်ရွက်မှုချဲ့ထွင်သွား‌ရေးအတွက် ရုရှားဖက်ဒရေးရှင်းနိုင်ငံအစိုးရနှင့် ပိုမိုနီးကပ်စွာလက်တွဲလုပ်ဆောင်သွားမည့် ကတိကဝတ်ကိုလည်း ထပ်လောင်းအတည်ပြုခြင်းဖြစ်ကြောင်း ထည့်သွင်းရေးသားထားသည်။

ပြီးခဲ့သည့် ၂၀၂၂ ခုနှစ်၊ စက်တင်ဘာလအတွင်းက ရုရှားနိုင်ငံသို့သွားရောက်ခဲ့သည့် ခရီးစဉ်အတွင်း နှစ်နိုင်ငံဆက်ဆံရေးနှင့် ကဏ္ဍစုံပူးပေါင်းဆောင်ရွက်မှုကို နှစ်နိုင်ငံပြည်သူများ၏ ဘုံအကျိုးစီးပွားအတွက် ပိုမိုမြှင့်တင်သွားရန် သဘောတူခဲ့ကြပြီး များမကြာမီကာလအတွင်း စိန့်ပီတာစဘတ်မြို့နှင့် နိုဗိုစီဗစ်မြို့၌ မြန်မာကောင်စစ်ဝန်ချုပ်ရုံးများ ဖွင့်လှစ်ခြင်းဖြင့် နှစ်နိုင်ငံအကြား ချစ်ကြည်ရင်းနှီးမှုနှင့်ကုန်သွယ်ရေး၊ ရင်းနှီးမြှုပ်နှံမှု၊ ခရီးသွားလုပ်ငန်းနှင့်ယဉ်ကျေးမှုကဏ္ဍ ပူးပေါင်းဆောင်ရွက်မှုများကို ပိုမိုမြင့်မားသည့် အဆင့်တစ်ခုသို့ မြှင့်တင်ဆောင်ရွက်နိုင်မည်ဟု အခိုင်အမာယုံကြည်ကြောင်းလည်း သဝဏ်လွှာတွင် ဖော်ပြထားသည်။

ယင်းအပြင် ရုရှားဖက်ဒရေးရှင်းနိုင်ငံ၊ သမ္မတ မစ္စတာဗလာဒီမာပူတင်ထံ ၏ နစက ဥက္ကဌထံ ပေးပို့သည့် သဝဏ်လွှာတွင် ရုရှား-မြန်မာ ဆက်ဆံရေးသည် အမြင့်သို့တက်လှမ်းလျက်ရှိနေပြီး နိုင်ငံရေးအရ ထိတွေ့ဆက်ဆံမှုများနှင့် ကုန်သွယ်ရေး၊ စီးပွားရေး၊ တပ်မတော်ပိုင်း၊ နည်းပညာ၊ လူသားချင်းစာနာထောက်ထားမှုနှင့်အခြားနယ်ပယ်များတွင် အပြန်အလှန်အကျိုးဖြစ်ထွန်းစေသည့် ပူးပေါင်းဆောင်ရွက်မှုများတွင် သိသာထင်ရှားစွာ တိုးတက်အောင်မြင်အောင် ဆောင်ရွက်နိုင်ခဲ့ကြောင်း ပါဝင်သည်။

စစ်မှန်သော သာတူညီမျှမှုနှင့် အပြည်ပြည်ဆိုင်ရာဥပဒေများကို အခြေခံသည့် တရားမျှတသော ဗဟုဝင်ရိုးကမ္ဘာ့အခင်းအကျင်းတစ်ရပ် တည်ဆောက်ရေးအတွက် ရုရှားနိုင်ငံနှင့် မြန်မာနိုင်ငံတို့သည် အတူတကွရပ်တည်လျက်ရှိကြောင်းနှင့်ပူးပေါင်းအားထုတ်မှုများဖြင့် နယ်ပယ်စုံတွင် အပြုသဘောဆောင်သော နှစ်နိုင်ငံထိတွေ့ဆက်ဆံမှုများကို ဆက်လက်တည်ဆောက်နိုင်မည်ဟုလည်းကောင်း၊ နှစ်နိုင်ငံပြည်သူများ၏ အကျိုးစီးပွားကိုဖော်ဆောင်နိုင်ပြီး အာရှ-ပစိဖိတ်ဒေသလုံခြုံရေးနှင့် တည်ငြိမ်ရေးတို့အတွက် အထောက်အကူဖြစ်စေမည်ဟုလည်းကောင်း ယုံကြည်ကြောင်းလည်း သမ္မတ မစ္စတာဗလာဒီမာပူတင်ထံမှ ပေးပို့သည့် သဝဏ်လွှာတွင် ရေးသားထားသည်။

#ymg/mt
#Yangon_Media_Group

#Local_News
Published_ 18 February 2023

ကိုဗစ်ကြောင့် ယာယီပိတ်ထားခဲ့ရသည့် ယူနန်ပြည်နယ်၊ ရွှေလီမြို့၊ကျယ်ဂေါင်နန်းတော်ဂိတ် မူလတန်းကျောင်းကို ဖေဖော်ဝါရီလ (၁၅)ရက်က ပြန်ဖွင့်လိုက်ပြီဖြစ်ကြောင်း မြန်မာနိုင်ငံဆိုင်ရာ တရုတ်သံရုံးမှ သိရသည်၊၊

အဆိုပါကျောင်းတွင် တရုတ်နိုင်ငံနှင့် မြန်မာနိုင်ငံမှ ကျောင်းသားကျောင်းသူ (၃၄၅)ဦး ကျောင်းပြန်တက်နေသည်ဟုဆိုသည်၊၊

၂၀၂၁ ခုနှစ်တွင် ကပ်ရောဂါကြောင့် ကျယ်ဂေါင်နန်းတော်ဂိတ် မူလတန်းကျောင်းမှ ကျောင်းသားကျောင်းသူ ၁၀၀၀ ကျော်ကို ကျယ်ဂေါင်မှ ရွှေလီမြို့တွင်းရှိ မူလတန်းကျောင်းသို့ ပြောင်းရွှေ့၍ ခေတ္တပညာသင်ခဲ့ရခြင်းဖြစ်သည်၊၊

ဖေဖော်ဝါရီလ ၁၅ ရက်တွင် အဆိုပါကျောင်းသည် ၂၀၂၃ ခုနှစ် နွေဦးရာသီ ကျောင်းပြန်ဖွင့်ခဲ့ပြီး တရုတ်နိုင်ငံနှင့် မြန်မာနိုင်ငံမှ ကျောင်းသားကျောင်းသူ ၃၄၅ ဦး အဆင်ပြေချောမွေ့စွာ ကျောင်းပြန်တက်ကြကာ အချို့သော ကျောင်းသားကျောင်းသူများသည် ကျောင်းပြောင်းခြင်းဆိုင်ရာ လုပ်ငန်းစဉ်များ ဆောင်ရွက်ကြသည်ဟုဖော်ပြထားသည်၊၊

တရုတ်-မြန်မာချစ်ကြည်ရေးအဖြစ် တရုတ်-မြန်မာနယ်စပ်တွင် တည်ရှိသော ယူနန်ပြည်နယ် တယ်ဟုန်ပြည်နယ်ခွဲ ရွှေလီမြို့ ကျယ်ဂေါင်နန်းတော်ဂိတ် မူလတန်းကျောင်းတွင် တရုတ်နိုင်ငံနှင့် မြန်မာနိုင်ငံမှ ကျောင်းသားကျောင်းသူများကို တပြိုင်နက်တည်း ပညာသင်ကြားပေးလျက်ရှိကြောင်းသိရသည်၊၊

#ymg/tthl
#Yangon_Media_Group

#Local_News
Published_ 18 February 2023

ရှမ်းပြည်နယ်(အရှေ့ပိုင်း)၊ တာချီလိတ်မြို့၊ ပါဆတ်ရပ်ကွက်၊ လွန်းကျိုင်းရပ်ရှိ အမှတ်(၃/၁၂၂) နှင့် (၃/၁၂၃)နေအိမ် ၂ လုံးကို သတင်းအရရှာဖွေရာ နေအိမ်ခြံဝင်းအတွင်း စိုင်းရွက်အား ဒေသကာလတန်ဖိုး ငွေကျပ် ၁၅ ဒသမ ၉၂ ဘီလီယံကျော်တန်ဖိုးရှိ အိုက်စ်(မက်သ်အဖက်တမင်း) ၅၈၀ ကီလို၊ စိတ်ကြွရူးသွပ်ဆေးပြား ၂၇ ဒသမ ၄ သန်း၊ ထိန်းချုပ်ဓာတုပစ္စည်း ကဖင်း ၄ တန်နှင့် ဆက်စပ်ပစ္စည်းများကို မော်တော်ယာဉ် ၄ စီးနှင့်အတူ သိမ်းဆည်းရမိခဲ့ကြောင်း မြန်မာနိုင်ငံ မူးယစ်ဗဟိုက ထုတ်ပြန်ထားသည်။

ပြီးခဲ့သည့် ဖေဖော်ဝါရီလ ၁၃ ရက် ညနေ ၄ နာရီအချိန်တွင် မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့က အထက်ပါအတိုင်း ဖမ်းမိခဲ့ခြင်းဖြစ်ကြောင်း သိရသည်။

ယခုအခါ ၎င်းအားဥပဒေအရ အရေးယူထားရှိပြီး မူးယစ်ဆေးဝါးထုတ်လုပ်သယ်ဆောင် ရောင်းဝယ်သူများပိုင်ဆိုင်သည့် ငွေကြေးအကျိုးအမြတ်များနှင့် ပိုင်ဆိုင်မှုများကို ပြည်သူ့ဘဏ္ဍာအဖြစ် သိမ်းဆည်းနိုင်ရေးနှင့် ကွင်းဆက်ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိကြောင်းမြန်မာနိုင်ငံ မူးယစ်ဗဟို၏ ထုတ်ပြန်ချက်တွင် ဖော်ပြထားသည်။

#ymg/mt
#Yangon_Media_Group