#LocalNews
Published_24 May 2022

ရခိုင်ပြည်နယ်၊ စစ်တွေမြို့နယ်၊ ကန်ပြင်ကျေးရွာတွင် နေထိုင်သော အသက် ၂၁ နှစ် နှင့် ၁၈ နှစ်အရွယ်ရှိ ဇနီးမောင်နှံနှစ်ဦး တစ်ပြိုင်နက်တည်းကြိုးဆွဲချသေဆုံးမှု ဖြစ်ပွားခဲ့ကြောင်း သိရသည်။

"ဒီနေ့မေလ ၂၄ ရက် မနက်ကမှ သိရတာ၊ ကောင်လေးက ထွန်းအေးကျော်၊ ကောင်မလေးက အသက် (၁၈)နှစ်ပဲ ရှိသေးတယ်။ မယုယုလှိုင်တဲ့။ ဘာကြောင့် သေရတယ်ဆိုတာတော့ မသိဘူး"ဟု ဒေသခံတစ်ဦးကပြောသည်။

အဆိုပါ ဇနီးမောင်နှံမှာ မကြာသေးခင်ကမှ ထိုင်းနိုင်ငံတွင်အိမ်ထောင်ကျ၍ ပြန်လာခဲ့ကာ မောင်ထွန်းအေးကျော်၏နေအိမ်တွင် နေထိုင်ကြခြင်းဖြစ်ကြောင်း၊ ယင်းတို့နှစ်ဦးရုပ်အလောင်းကို စစ်တွေဆေးရုံကြီး၏ ရင်ခွဲရုံတွင်ရင်ခွဲစစ်ဆေး၍ စစ်တွေမြို့သုဿန်တွင် ညနေ ၅ နာရီ အချိန် မီးသင်္ဂြိုလ်ခဲ့ကြောင်း သိရသည်။

ymg/mt
#Yangon_Media_Group

#LocalNews
Published -24 May 2022

ရွှေတိဂုံစေတီတော်၊ တန်ဆောင်းတွေမှာရှိတဲ့ ပျက်စီးနေတဲ့ မြန်မာမှုပန်းပုရုပ်ကြွတွေကို အစား ထိုးလဲလှယ် သွားဖို့ရှိတယ်လို့ ရွှေတိဂုံစေတီတော်ဘဏ္ဍတော်ထိန်းဂေါပကအဖွဲ့ဝင် ဦးဘိုးသင်းကပြောပါတယ်၊၊

#Yangon_Media_Group

#LocalNews
Published - 24 May 2022

တရုတ်နိုင်ငံ၊ ချုံချင့်မြို့ကနေ ကွန်တိန်နာ အလုံးပေါင်း (၆၀)သယ်ဆောင်လာသည့် ရထားတွဲသည် ဇွန်လအတွင်း မန္တလေးမြို့သို့ရောက်ရှိလာမှာ ဖြစ်တယ်လို့ မြန်မာနိုင်ငံဆိုင်ရာ တရုတ်သံရုံးက ဒီကနေ့မှာ သတင်းထုတ်ပြန်လိုက်ပါတယ်။

အဆိုပါ ရထားတွဲသည် တရုတ်-မြန်မာလမ်းကြောင်းသစ် (ချုံချင့်-လင်ချန်း-မြန်မာ) နိုင်ငံတကာရထားလမ်းကနေ ခုတ်မောင်းမည်ဖြစ်ပြီး မေလ ၂၃ ရက်နေ့တွင် ချုံချင့်မြို့ ကော်ယွမ်ဆိပ်ကမ်း ယွီကြွေဘူတာမှ စတင်ထွက်ခွာလာခဲ့ တာဖြစ်ပါတယ်။

ရထားတွဲ၌ စံချိန်မီကွန်တိန်နာပေါင်း အလုံး (၆၀) သယ်ဆောင်လာပြီး စက်ပစ္စည်းများ၊ အီလက်ထရောနစ်အပိုပစ္စည်းများ၊ ကားနှင့်ဆိုင်ကယ်အပိုပစ္စည်းများ စသည်တို့ ပါဝင်တယ်လို့ ဆိုပါတယ်။

ရထားတွဲသည် ယူနန်ပြည်နယ် လင်ချန်းနယ်စပ်ဂိတ်မှတစ်ဆင့်ပြည်ထွက်၍ ကားလမ်းနှင့်ရထားလမ်း ပူးပေါင်းပို့ဆောင်သည့်ပုံစံဖြင့် (၁၅)ရက်အကြာတွင် မြန်မာနိုင်ငံ မန္တလေးမြို့သို့ရောက်ရှိမည်ဖြစ်ပြီး ဒါဟာ တရုတ်-မြန်မာလမ်းကြောင်းသစ် (ချုံချင့်-လင်ချန်း-မြန်မာ)စတင် လည်ပတ်ခြင်းကို ကိုယ်စားပြုနေတယ်လို့ တရုတ်သံရုံးက ဆိုပါတယ်။

ခရီးစဥ်ခန့်မှန်းတွက်ချက်မှုအရ ချုံချင့်နှင့်မြန်မာနိုင်ငံအကြား ကုန်စည်ပို့ဆောင်မှု ကြာချိန်သည် သမားရိုးကျနည်းလမ်းထက် ရက် ၂၀ လျော့နည်းသွားမည်ဖြစ်ပြီး ကုန်စည်စီးဆင်းမှုအရင်းအနှီး ၂၀ ရာခိုင်နှုန်းလျှော့ချနိုင်မှာဖြစ်တယ်လို့ တရုတ်သံရုံး၏ ဒီကနေ့ထုတ်ပြန်ချက်မှာ ဖော်ပြထားပါတယ်။

ဓါတ်ပုံ - မြန်မာနိုင်ငံဆိုင်ရာ တရုတ်သံရုံး

ymg/kg
#Yangon_Media_Group

#LocalNews
Published_24 May 2022

ရန်ကုန်မှာ လက်ရှိကျန်နေသေးတဲ့ လက်ဝှေ့ကလပ်တွေ ပျောက်မသွားဖို့ ထိန်းသိမ်းနေရတယ်လို့ နဂါးမာန် မြန်မာ့ရိုးရာလက်ဝှေ့အသင်း နည်းပြချုပ်ကိုကျော်စိုးက ပြောပါတယ်။

#Yangon_Media_Group

#LocalNews
Published - 24 May 2022

ကုန်းလမ်း-ရေကြောင်းလမ်းကြောင်းသစ်ကနေ တရုတ်-လာအိုမီးရထားသည် တရုတ်နိုင်ငံ ချုံချင့်မြို့ မှ လာအိုနိုင်ငံ ဗီယင်ကျန်းမြို့သို့ စတင်ထွက်ခွာသွားခဲ့ပြီဖြစ်တယ်လို့ သိရပါတယ်။

မေလ ၂၁ ရက်နေ့တွင် တရုတ်နိုင်ငံ၏ ပထမဆုံး “မီးရထားဖြင့် ပြည်ဝင်ပြည်ထွက် မြန်ဆန်စွာ ဂိတ်ဖြတ်သန်းခြင်း” ပုံစံကို အသုံးပြု၍ ပြည်ထွက်လာသော ကုန်းလမ်း-ရေကြောင်းလမ်းကြောင်းသစ် တရုတ်-လာအိုမီးရထားသည် တရုတ်နိုင်ငံ ချုံချင့်မြို့မှ အဆင်ပြေချောမွေ့ စွာ စတင်ထွက်ခွာလာခဲ့ပြီး (၄)ရက်အကြာတွင် လာအိုနိုင်ငံ ဗီယင်ကျန်းမြို့သို့ ရောက်ရှိမှာဖြစ်တယ်လို့ သိရပါတယ်။

“railway express” ပုံစံကို အကောင်အထည်ဖော်ဆောင်ပြီးနောက် ရထားသည် စတင်ထွက်ခွာသည့်နေရာမှ အကောက်ခွန်ဌာနသို့ လျှောက်ထားမှုများ ဆောင်ရွက်နိုင်ပြီး အကောက်ခွန်ကြေညာခြင်း၊ စစ်ဆေးခြင်း၊ သယ်ယူပို့ဆောင်မှုအသေးစိတ်အခြေအနေ စာရွက်စာတမ်းများ ပေါင်းစပ်ခြင်း၊ သွားခွင့်ပြုခြင်း စသည့်လုပ်ထုံးလုပ်နည်းများအား တစ်နေရာတည်းတွင် ပြီးမြောက်စေရန် ဆောင်ရွက်နိုင်ကာ ပြည်ထွက်သည့်ဂိတ်ပေါက်တွင် ဂိတ်ဖြတ်သန်းမှုဆိုင်ရာ လုပ်ထုံးလုပ်နည်းများ ထပ်မံပြုလုပ်ရန် မလိုအပ်တော့ဘဲ တိုက်ရိုက်ဖြတ်သန်းသွားလာနိုင်မှာဖြစ်သည့်အတွက် ဂိတ်ဖြတ်သန်းသည့်အချိန် (၂၄) နာရီကို သက်သာစေမှာဖြစ်တယ်လို့ ဆိုပါတယ်။

ဒါ့အပြင် စုစုပေါင်း သွားလာချိန်ကို ၁ ရက်မှ ၂ ရက်အထိ တိုတောင်းစေပြီး ကွန်တိန်နာတစ်လုံးလျှင် ယွမ် ၂၀၀ ကျော် သက်သာစေမှာဖြစ်တယ်လို့ သိရပါတယ်။

ချုံချင့်အကောက်ခွန်ဌာန၏ စာရင်းဇယားများအရ ယခုနှစ် ဇန်နဝါရီလမှ ဧပြီလအထိ ကုန်းလမ်း-ရေကြောင်းလမ်းကြောင်းသစ် တရုတ်-လာအိုမီးရထားသည် စုစုပေါင်း (၅၄)ကြိမ် ခုတ်မောင်းပြေးဆွဲခဲ့ပြီး ပုံမှန်ကုန်သေတ္တာ (၁၄၂၂)ခုကို ပို့ဆောင်ခဲ့ရာ ကုန်ပစ္စည်းတန်ဖိုးမှာ ယွမ်သန်း( ၂၅၀)ကျော်ရှိကြောင်း သိရပါတယ်။

အဆိုပါ ကုန်းလမ်း-ရေကြောင်းလမ်းကြောင်းသစ် ကွန်ရက်ကနေ ကုန်ပစ္စည်းများကို လာအို၊ ထိုင်း၊ မလေးရှား၊ မြန်မာ စသည့် အင်ဒိုချိုင်းနားကျွန်းဆွယ်နိုင်ငံများသို့ သယ်ယူပို့ဆောင်ပေးပြီး ယူရေးရှား အလယ်ပိုင်းအထိ ဆက်လက်ဖြန့်ကျက်လျက်ရှိတယ်လို့ မြန်မာနိုင်ငံဆိုင်ရာ တရုတ်သံရုံးက ဒီကနေ့မှာ သတင်းထုတ်ပြန်ခဲ့ပါတယ်။

ဓါတ်ပုံ - မြန်မာနိုင်ငံဆိုင်ရာ တရုတ်သံရုံး

ymg/kg
#Yangon_Media_Group

#Local_News
Published_ 24 May 2022

ထိုင်းနိုင်ငံသို MOU စနစ်ဖြင့် မြန်မာအလုပ်သမားများ စေလွှတ်ရေးလုပ်ငန်းစဉ်အရ ဒီကနေ့နံနက်ပိုင်းက ကော့သောင်းနယ်စပ်ဂိတ်မှတဆင့် မြန်မာအလုပ်သမား ၃၀ ဦးဟာ အလုပ်လုပ်ကိုင်ရန် ပထမအသုတ်အဖြစ်ထွက်ခွာသွားကြောင်း ပြန်ကြားရေးက သတင်းထုတ်ပြန်ထားပါတယ်။

အဆိုပါ မြန်မာအလုပ်သမား အမျိုးသား ၂၀ ဦး၊ အမျိုးသမီး ၁၀ ဦးအား ပြည်ပ အလုပ်အကိုင် အကျိုးဆောင် (ထိုင်း) လိုင်စင်ရအေဂျင်စီတစ်ခုဖြစ်တဲ့ Pwint Phoo Aung Co,Ltd မှ ထိုင်းနိုင်ငံရှိ G and A Thaifruits Co,Ltd သို့ (၂)နှစ်စာချုပ်ဖြင့် အလုပ်လုပ်ကိုင်နိုင်ရန် တာဝန်ယူဆောင်ရွက်ပေးခြင်းဖြစ်ပါတယ်။

အဆိုပါအလုပ်သမားများမှာ ယမန်နေ့မွန်းလွဲပိုင်းက ရန်ကုန်မြို့မှ ကော့သောင်းမြို့သို့ လေကြောင်းခရီးစဉ်ဖြင့် သွားရောက်ခဲ့ခြင်းဖြစ်ပြီး ဒီကနေ့နံနက်ပိုင်းတွင် ကော့သောင်း အပြည်ပြည်ဆိုင်ရာ နယ်ပ်ဂိတ်မှတဆင့် ရေလမ်းခရီးဖြင့် ပို့ဆောင်ပေးခဲ့တာဖြစ်ပါတယ်။

ထိုင်းသို့သွားရောက်မည့် အလုပ်သမားများအား ကော့သောင်းခရိုင် အလုပ်သမားညွှန်ကြားမှုဦးစီးဌာန၊ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန ကော့သောင်း ခရိုင်ရုံးနှင့် တာဝန်ရှိသူများက လိုအပ်တဲ့စစ်ဆေးမှုများ ဆောင်ရွက်ခဲ့ကြပါတယ်။

ယခုရက်ပိုင်းအတွင်း MOU စနစ်ဖြင့် ထိုင်းနိုင်ငံတွင် သွားရောက်အလုပ်လုပ်ကိုင်ရန် သက်ဆိုင်ရာ ပြည်ပအလုပ်အကိုင်အကျိုးဆောင်(ထိုင်း) လိုင်စင်ရအေဂျင်စီ အသီးသီး၏ အစီအစဉ်ဖြင့် မြန်မာအလုပ်သမားများ ထိုင်းနိုင်ငံသို့ ထပ်မံထွက်ခွာရန်ရှိကြောင်း သတင်းရရှိပါတယ်။

ymg-mnn
#Yangon_Media_Group