#Local_News
Published-1 Setember 2022

ယနေ့(စက်တင်ဘာလ ၁ ရက်) စက်သုံးဆီဈေးနှုန်းမှာ ဓာတ်ဆီတစ်လီတာ ကျပ် ၂၃၀ နှင့် ဒီဇယ်မျိုးစုံတစ်လီတာ ၁၀၅ ကျပ်အထိ ဈေးနှုန်းကျဆင်းလာကြောင်း စက်သုံးဆီအရောင်းဆိုင်များ၏ ဈေးနှုန်းများအရ သိရသည်။

သြဂုတ် ၃၁ ရက်နေ့စက်သုံးဆီဈေးနှုန်းမှာ 92 တစ်လီတာကို ၂၅၇၀ ကျပ်၊ ၉၅ တစ်လီတာကို ၂၆၇၀ ကျပ်၊ ၉၇ တစ်လီတာကို ၃၂၄၅ ကျပ် ၊ ဒီဇယ်နှင့်ပရီမီယံဒီဇယ်တစ်လီတာကို ၃၃၃၀ ကျပ်ရှိခဲ့ရာမှ ယနေ့တွင် 92 တစ်လီတာကို၂၃၇၅ ကျပ်၊ ၉၅ တစ်လီတာ ၂၄၄၀ ကျပ်၊ ၉၇ တစ်လီတာဈေး ၃၁၄၀ ကျပ်၊ ၊ ဒီဇယ်နှင့် ပရီမီယံဒီဇယ်တစ်လီတာ ၃၂၂၅ ကျပ်အထိကျဆင်းခဲ့ကြောင်း သိရသည်။

ရန်ကုန်မြို့နှင့် မန္တလေးမြို့တို့တွင် ရည်ညွှန်းလက်ကားဈေးနှုန်းများနှင့် နေပြည်တော်၊ တိုင်းဒေသကြီးနှင့် ပြည်နယ်များတွင် ရည်ညွှန်းလက်လီဈေးနှုန်းများဖြင့်လည်း ရောင်းချပေးနေကြောင်း စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်မှုကော်မတီမှ သိရသည်။

ယင်းအပြင် စက်သုံးဆီဈေးနှုန်းကြီးမြင့်လာခြင်းကြောင့် ကုန်ဈေးနှုန်းမြင့်တက်လာမှုကို သက်သာစေရန် ဗဟိုဘဏ်က ဈေးကွက်ထဲ ကန်ဒေါ်လာ သန်း၂၀၀ ထောက်ပံ့သွားမည်ဖြစ်ကြောင်း သြဂုတ်လ ၃၁ ရက်ရက်စွဲဖြင့် ထုတ်ပြန်ကြေညာထားသည်။

#Ymg/STH
#Yangon_Media_Group

#Local_News
Published _ 1 September 2022

တောင်ကိုရီးယားနိုင်ငံတွင် အလုပ်လုပ်မည့် မြန်မာလုပ်သား ၁၃၅ ဦး ယနေ့ စက်တင်ဘာလ ၁ ရက်က ရောက်ရှိလာကြောင်း ဆိုးလ်မြို့ရှိ မြန်မာသံရုံးမှ သတင်းထုတ်ပြန်ထားသည်။

ကုန်ထုတ်လုပ်သားအဖြစ် အသစ်ဝင်ရောက် လုပ်ကိုင်မည့် လုပ်သားသစ် ၄၃ ဦးနှင့် Re-entry လုပ်သား ၉၂ ဦးဟာ အင်ချွန်းအပြည်ပြည်ဆိုင်ရာ လေဆိပ်သို့ ရောက်ရှိလာကြောင်း ထုတ်ပြန်ချက်၌ ဖော်ပြထားသည်။

ရောက်ရှိလာသည့် မြန်မာလုပ်သားများကို အလုပ်သမားသံအရာရှိမှ ကြိုဆိုပြီး အလုပ်သမားများသိရှိလိုက် နာသင့်သည့် အချက်များကို မှာကြားခဲ့ပြီး လိုအပ်တာများ ကူညီပံ့ပိုးပေးခဲ့ကြောင်း သိရသည်။

တောင်ကိုရီးယားအစိုးရမှ မြန်မာလုပ်သားတွေကို တရားဝင်ပြန်လက်ခံနေပြီးဩ ဂုတ်လအတွင်းမှာ မြန်မာလုပ်သား ၁,၂၉၃ ဦးကို တရားဝင်ဝင်ခွင့်ပြုခဲ့သည်။

#ymg/NN
#Yangon_Media_Group

#Local_News
Published_1 Sept 2022

ကချင်ပြည်နယ်ရှိ ကန်ပိုက်တီနယ်စပ်ဂိတ်နှင့် လွယ်ဂျယ်နယ်စပ်ဂိတ်များမှတစ်သျှူးငှက်ပျောနှင့် အခြားသီးနှံများတင်ပို့မှု စတော့မည်ဟု ပြည်နယ်ဝန်ကြီးချုပ် ဦးခက်ထိန်နန်က သြဂုတ်လ ၃၁ ရက်တွင် ပြောသည်။

ကန်ပိုက်တီနယ်စပ်ဂိတ်နှင့် လွယ်ဂျယ်နယ်စပ်ဂိတ်များမှတစ်ဆင့် မြန်မာ-တရုတ် ကုန်စည်စီးဆင်းရာတွင် သီးနှံတင်မော်တော်ယာဉ်များကို စနစ်တကျ စိစစ်ဆောင်ရွက်နိုင်ရေးအတွက် ပြည်နယ်မြန်မာ-တရုတ် ကုန်စည်ပြန်လည်စီးဆင်းနိုင်ရေး လုပ်ငန်းကော်မတီ အဖွဲဝင်များ၏ လုပ်ငန်းညှိနှိုင်း အစည်းအဝေးအတွင်း ယင်းက အထက်ပါအတိုင်း ပြောကြားခြင်း ဖြစ်သည်။

ယင်းသို့စတင်ရာတွင် ကုန်စည်တင်ပို့မည့် ယာဉ်များကို စနစ်တကျစိစစ်ဆောင်ရွက်သွားရေး၊ ဒေသခံလုပ်ငန်းရှင်များ နစ်နာမှုမရှိစေရေး၊ ကိုဗစ်-၁၉ ကာကွယ် ထိန်းချုပ်ရေး စည်းကမ်းများနှင့်အညီ စည်းကမ်းတကျ လိုက်နာဆောင်ရွက်ရေး၊ ကြိုတင်ပြင်ဆင် ညှိနှိုင်းဆောင်ရွက်ရမည့်ကိစ္စရပ်များအပေါ် ဝိုင်းဝန်းဖြေရှင်း ဆောင်ရွက်ကြရေး၊ နိုင်ငံတော်အခွန်ငွေ အပြည့်အဝရရှိရေးတိုအတွက် အားလုံးက ဝိုင်းဝန်းကြိုးပမ်း ဆောင်ရွက်ရန် တိုက်တွန်းခဲ့ကြောင်းလည်း သိရသည်။

အဆိုပါ အစည်းအဝေးအတွင်း မြစ်ကြီးနားပြည်သူ့ဆေးရုံ၌ လက်နက်ငယ်ဖြင့် ပစ်ခတ်ခံရမှုကြောင့် လက်မောင်းသေနတ်မှန် ဒဏ်ရာဖြင့် ဆေးဝါးကုသမှုခံယူနေသော ပြည်နယ်ရသုံးမှန်းခြေငွေစာရင်းဦးစီးဌာနမှ ယာဉ်မောင်းဝန်ထမ်းအား ပြည်နယ်အစိုးရအဖွဲ့၏ ထောက်ပံ့ငွေကျပ် ငါးသိန်း၊ ပြည်နယ်ဝန်ကြီးများက တစ်ဦးလျှင် တစ်သိန်းနှုန်းဖြင့် စုစုပေါင်း ငွေကျပ် ရှစ်သိန်းနှင့် ခတ်ချိုကျေးရွာမှ မိုင်းထိဒဏ်ရာရရှိသော အမျိုးသမီးအား ပြည်နယ်ဝန်ကြီးများက စုစုပေါင်း ထောက်ပံ့ငွေကျပ် လေးသိန်းကို ထောက်ပံ့ပေးအပ်ခဲ့ကြောင်းလည်း သိရသည်။

#ymg/mt
#Yangon_Media_Group

#Local_News
Published_31 August 2022

ကိုရီးယား-မြန်မာ စီးပွားရေးပူးပေါင်းမှု စက်မှုဇုန် (KMIC) စီမံကိန်းကို အပိုင်း နှစ်ပိုင်းဖြင့် ဆောင်ရွက်မည်ဖြစ်ရာ အခြေခံအဆောက်အအုံ တည်ဆောက်ခြင်းလုပ်ငန်းများကို ၂၀၂၃ ခုနှစ်အတွင်းအပြီးသတ်နိုင်ရန် လျာထားကြောင်း သိရသည်။

အဆိုပါ စီမံကိန်းကို တောင်ကိုရီးယားအစိုးရပိုင် Land and Housing Corporation (LH) နှင့် ဆောက်လုပ်ရေးဝန်ကြီးဌာန (MOC) တို ပူးပေါင်းဆောင်ရွက်နေခြင်းဖြစ်ပြီး ရင်းနှီးမြှုပ်နှံမှု ပမာဏ အမေရိကန်ဒေါ်လာ သန်း ၁၁၀ ရှိကြောင်းလည်း သိရသည်။

KMIC စီမံကိန်းတည်နေရာမှာ ရန်ကုန်တိုင်းဒေသကြီး လှည်းကူးမြို့နယ်၊ ညောင်နှစ်ပင်စခန်းရှိ မြေ ၅၅၆ ဧကပေါ်တွင် ဖော်ဆောင်နေခြင်းဖြစ်ပြီး လွန်ခဲ့သည့်၂၀၁၉ စက်တင်ဘာလအတွင်းက မြန်မာနိုင်ငံကို လာရောက်ခဲ့သည့် ကိုရီးယားသမ္မတ မွန်ဂျေအင်၏ ခရီးစဉ်အတွင်း သဘောတူညီခဲ့ခြင်းလည်း ဖြစ်ကာ ၂၀၂ဝပြည့်နှစ် ဒီဇင်ဘာလ ၂၄ ရက်က ပန္နက်တင်အခမ်းအနား ပြုလုပ်ခဲ့ခြင်း ဖြစ်သည်။

စီမံကိန်း ပထမပိုင်း မြေ ၃၁၅ ဧကပေါ်တွင် အထည်ချုပ်လုပ်ငန်း၊ အစားအသောက်ထုတ်လုပ်သောလုပ်ငန်း၊ ကုန်စည်သိုလှောင် သယ်ယူပို့ဆောင်ရေး လုပ်ငန်းများနှင့် Logistic Facilities များ ပါဝင်မည်ဖြစ်ကြောင်းနှင့် ဒုတိယပိုင်းအတွက် ကျန်မြေဧရိယာပေါ်မှာ ဖွံ့ဖြိုးတိုးတက်မှုအပေါ် အခြေခံကာ အကောင်အထည်ဖော် မည် ဖြစ်ကြောင်း ၊ ကိုယ်ပိုင်ဓာတ်အားခွဲရုံ၊ ရေသန့်စင်ခြင်းနှင့်ရေဆိုးစက်ရုံ၊ ရန်ကုန်-မန္တလေးအဝေးပြေးလမ်းမကြီးနှင့် တိုက်ရိုက်ချိတ်ဆက်ထားသော အထူး ၄ လမ်းသွား ဆက်သွယ်ရေးလမ်းတစ်ခု ပါဝင်မည် ဖြစ်ကြောင်းလည်း KMIC က ထုတ်ပြန်ထားခဲ့သည်။

စီမံကိန်းအတွင်း ဆေးခန်း၊ စာကြည့်တိုက်၊ စတိုးဆိုင်၊ စီးပွားရေးစင်တာ၊ စားသောက်ဆိုင်၊ ဈေးဆိုင်များ ၊ ဘဏ်များ ပါဝင်မည် ဖြစ်ပြီး နိုင်ငံတကာကုမ္ပဏီ ၁၃၅ ခုထိ လာရောက် ရင်းနှီးမြှုပ်နှံကြမည် ဖြစ်သောကြောင့် အလုပ်အကိုင် အခွင့်အလမ်း တစ်သိန်းကျော် ဖန်တီးပေးနိုင်မည်ဖြစ်ကြောင်း အဆိုပါ ထုတ်ပြန်ချက်တွင် ဖော်ပြခဲ့ဖူးသည်။

#ymg/mt
#Yangon_Media_Group

#Local_News
Published_31 August 2022

ရခိုင်ပြည်နယ်မှာရှိတဲ့ စိုက်ပျိုးမွေးမြူရေးလုပ်ငန်းတွေကို ကျပ် ၁၀ ဘီလီယံ ထုတ်ချေးဖို့ ရခိုင်ပြည်နယ် အစိုးရအဖွဲ့က စီစဉ်နေပါတယ်။

#Yangon_Media_Group

Published_ 31 Aug 2022
မြန်မာအလုပ်သမားခေါ်ယူမည့် Quota ဦးရေ တိုးမြှင့်သတ်မှတ်ပေးရန် ကိုရီးယား သမ္မတနိုင်ငံဆိုင်ရာ မြန်မာသံအမတ်ကြီး ဦးသန့်စင်က ကိုရီးယားနိုင်ငံ၊ Gyeongnam ပြည်နယ်၊ Changwon မြို့၌ ဩဂုတ် ၂၉ ရက်မှ ၃၀ ရက်နေ့အထိ ကျင်းပပြုလုပ်ခဲ့တဲ့ “2022 EPS Conference” မှာ ပြောကြားခဲ့ပါတယ်။
သံအမတ်ကြီးသည် ကိုရီးယားနိုင်ငံသို့ Employment Permit System – EPS စနစ် ဖြင့် တရားဝင်အလုပ်သမား စေလွှတ်လျက်ရှိသည့် အခြား (၁၅) နိုင်ငံမှ သံအမတ်ကြီး များ၊ သံရုံးအကြီးအကဲများနှင့် အတူ တက်ရောက်ခဲ့တာ ဖြစ်ပါတယ်။
အဆိုပါဆွေးနွေးပွဲတွင် အိမ်ရှင်ကိုရီးယားနိုင်ငံ၊ အလုပ်အကိုင်နှင့် အလုပ်သမား ရေးရာဝန်ကြီးဌာနအောက်ရှိ HRD-Korea ၏ ဥက္ကဋ္ဌ Mr. Soobong Uh က မိန့်ခွန်း ပြောကြားခဲ့ပြီး ကိုရီးယားနိုင်ငံအနေဖြင့် EPS စနစ်ဖြင့် နိုင်ငံပေါင်း ၁၆ နိုင်ငံမှ တရားဝင် အလုပ်သမားများအားခေါ်ယူ၍ အလုပ်အကိုင်များ တိုးမြှင့်ဖန်တီးပေးနေမှု၊ အလုပ်သမား များ လုပ်ငန်းခွင်အန္တရာယ် ကာကွယ်ရေးကဏ္ဍတွင် အလုပ်ရှင်၊ အလုပ် သမားများအား အသိပညာပေးမှု တိုးမြှင့်ဆောင်ရွက်နေမှု၊ ကျွမ်းကျင်အလုပ်သမားများ ပိုမိုလိုအပ်နေမှု တို့ကို ဆွေးနွေးပြောကြားခဲ့တယ်လို့ ဆိုပါတယ်။
EPS စနစ်ဖြင့် ကိုရီးယားနိုင်ငံသို့ တရားဝင်မြန်မာ အလုပ်သမားများကို ၂၀၁၁ ခုနှစ်က စတင်စေလွှတ်လျက်ရှိရာ ယနေ့အထိ (၄၄၄၇၂) ဦး စေလွှတ်ပြီးပါတယ်။၊ ကိုဗစ်-၁၉ ကာလအတွင်း ကိုရီးယားနိုင်ငံဘက်မှ မြန်မာအလုပ်သမားများ၏ တန်းစီဇယား သက်တမ်းကို (၁) နှစ် တိုးပေးခဲ့ခြင်းနှင့် Certificate for Confirmation of Visa Issuance (CCVI) သက်တမ်းကို ၃ လ မှ ၆ လ သို့လည်းကောင်း၊ ၆ လမှ ၁ နှစ်အထိ လည်းကောင်း တိုးမြှင့်ပေးခဲ့ကြောင်း သိရပါတယ်။
အဆိုပါအစည်းအဝေးတွင် HRD-Korea ဥက္ကဋ္ဌ၊ Korea Occupational Safety and Health Agency ဥက္ကဋ္ဌ နှင့် နိုင်ငံပေါင်း ၁၆ နိုင်ငံမှ သံရုံးအကြီးအကဲတို့က E-9 အလုပ် သမားများ လုပ်ငန်းခွင် အန္တရာယ်တားဆီးကာကွယ်ရေးအတွက် စိတ်အားထက်သန်မှုကို ဖော်ပြသည့် စာချွန်လွှာ Letter of Intent for the Prevention of Industrial Accidents for Foreign Workers (E-9) အား လက်မှတ်ရေးထိုး၍ လဲလှယ်နိုင်ခဲ့ကြကြောင်း သတင်းရရှိပါတယ်။
ygm_mnn
#Yangon_Media_Group