Published 7 June 2022

မြန်မာနိုင်ငံဆိုင်ရာ သီရိလင်္ကာသံအမတ်ကြီး အဖြစ် ခန့်အပ်ရန် သဘောတူပြီးဖြစ်တဲ့ သံအမတ်ကြီး မစ္စတာ ဂျေအမ် ဂျန်နကာ ပရီယန်သာ ဘန်ဒါရာဟာ ယနေ့ ဇွန်လ (၇)ရက်နေ့ မနက်ပိုင်းမှာ နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ထံ ယင်းရဲ့ သံအမတ်ခန့်အပ်လွှာကို ပေးအပ်ခဲ့တယ်လို့ သတင်းထုတ်ပြန်ချက်အရ သိရပါတယ်။

ထေရဝါဒဗုဒ္ဓဘာသာ နှစ်နိုင်ငံဖြစ်တဲ့ မြန်မာနှင့် သီရိလင်္ကာအကြား ကာလရှည်ချစ်ကြည်ရင်းနှီးတဲ့ ဆက်ဆံမှုကို တိုးမြှင့်ဆောင်ရွက်သွားမယ်လို့ သံအမတ်ကြီး ဂျေအမ်ဂျာနာကာပရီယန်သာ က ရန်ကုန်မှာရှိတဲ့ သူ့သံရုံးဝန်ထမ်းတွေကို ပြောကြာခဲ့ကြောင်း သီရိလင်္ကာအစိုးရသတင်းဌာန news.lk ကရေးသားခဲ့ပါတယ်။အဲဒီအပြင် နှစ်နိုင်ငံအကြား စီးပွားရေး၊နိုင်ငံရေးနှင့် ယဉ်ကျေးမှုချိတ်ဆက်မှုကို နှစ်ဘက်အကျိုးစီးပွားအတွက် မြှင့်တင်ဆောင်ရွက်သွားမယ်လို့လည်း သူကပြောပါတယ်။

မစ္စတာ ဂျေ၊ အမ်၊ ဂျန်နကာ ပရီယန်သာ ဘန်ဒါရာ ကို ၁၉၆၈ ခုနှစ်၊ ဖေဖော်ဝါရီလ ၁ ရက်တွင် မွေးဖွားခဲ့ပြီး ကိုလံဘိုတက္ကသိုလ်မှ ဝိဇ္ဇာဘွဲ့ကို ၁၉၉၃ ခုနှစ်တွင်ရရှိခဲ့ပါတယ်။ သူဟာ ၁၉၉၅ ခုနှစ်မှ ၂၀၀၈ ခုနှစ်အထိ အလွတ်တန်းရှေ့နေအဖြစ်လည်းကောင်း၊ တွဲဖက် ခရိုင်တရားသူကြီးအဖြစ်လည်းကောင်း၊ ပိုင်ဆိုင်မှုနှင့် မြေယာ စီမံခန့်ခွဲရေးဆိုင်ရာ အစိုးရရှေ့နေအဖြစ်လည်းကောင်း ရာထူးအဆင့်ဆင့်တွင် တာဝန်ထမ်းဆောင်ခဲ့ပါတယ်။ ၂၀၀၈ ခုနှစ်မှစ၍ သမ္မတဟောင်း မစ္စတာမဟင်ဒါရာဂျာပက်ဆာ၏သာသနာရေးဆိုင်ရာ အကြံပေးပုဂ္ဂိုလ်အဖြစ် လည်းကောင်း၊ ၂၀၀၈ ခုနှစ်မှ ၂၀၀၉ခုနှစ်အထိ အာရပ်စော်ဘွားများ ပြည်ထောင်စုဆိုင်ရာ သီရိလင်္ကာသံအမတ်ကြီး အဖြစ်လည်းကောင်း၊ ၂၀၀၉ ခုနှစ်မှ ၂၀၁၀ ပြည့်နှစ်အထိ ဆာဘရာဂမူဝါ ပြည်နယ်အုပ်ချုပ်ရေးမှူးအဖြစ်လည်းကောင်း၊ ၂၀၁၀ ပြည့်နှစ်မှ ၂၀၁၅ ခုနှစ်အထိ လွှတ်တော်ကိုယ်စားလှယ် (အမျိုးသားစာရင်း)အဖြစ်နှင့် လွှတ်တော်ပြည်သူ့အသနားခံစာတင်သွင်းရေး ကော်မတီ ဥက္ကဋ္ဌအဖြစ် လည်းကောင်း၊ ၂၀၁၅ ခုနှစ်ရွေးကောက်ပွဲအလွန်ကာလ တွင်သမ္မတဟောင်း မစ္စတာမဟင်ဒါရာဂျာပက်ဆာ၏ ညှိနှိုင်းရေးမှူး အဖြစ် လည်းကောင်း၊ ၂၀၁၆ ခုနှစ်မှစ၍ အလွတ်တန်းဥပဒေရေးရာ ဝါရင့်အကြံပေးအဖြစ် လည်းကောင်း၊ ၂၀၁၈ ခုနှစ်၊ နိုဝင်ဘာလမှ ဒီဇင်ဘာလအထိ သမ္မတဟောင်း မစ္စတာမဟင်ဒါရာဂျာပက်ဆာမှ ဘဏ္ဍာရေးဝန်ကြီးအဖြစ်ဆောင်ရွက်စဉ် ၎င်း၏ ကိုယ်ရေးအရာရှိအဖြစ် လည်းကောင်း၊ ၂၀၁၉ ခုနှစ်၊ ဒီဇင်ဘာလမှ ၂၀၂၁ ခုနှစ်၊ ဇူလိုင်လအထိ ဝန်ကြီးချုပ် မစ္စတာ မဟင်ဒါရာဂျာပက်ဆာ၏ လွှတ်တော်ကိစ္စရပ်များဆိုင်ရာ အတွင်းရေးမှူးအဖြစ်လည်းကောင်း အဆင့်ဆင့်တာဝန် ထမ်းဆောင်ခဲ့ပါတယ်။

မြန်မာနိုင်ငံသို့မရောက်ခင် နိုင်ဂျီးရီးယားနိုင်ငံဆိုင်ရာ သီရိလင်္ကာရဲ့ သံအမတ်ကြီး အဖြစ် တာဝန်  ထမ်းဆောင်ခဲ့ကြောင်းသိရပါတယ်။အသက် ၅၄နှစ်အရွယ်ရှိပြီဖြစ်တဲ့သူဟာ အိမ်ထောင်ရှင်တစ်ဦးလည်းဖြစ်ပါတယ်။

#LocalNews
Published_7 June 2022

မကွေးတိုင်းဒေသကြီး၊ ပခုက္ကူမြို့နယ်၊ တန့်ကြည့်တောင်ပေါ်ရှိ တန့်ကြည့်တောင်စေတီသို့ ဘုရားဖူးလာသော မော်တော်ယာဉ်တစ်စီး ယနေ့ ဇွန်လ ၇ ရက်နံနက်ပိုင်းက ပစ်ခတ်ခံရသောကြောင့် အသက် ၈၀ ခန့်အရွယ် အဖိုးအိုတစ်ဦး ဒဏ်ရာပြင်းထန်စွာရရှိသွားကြောင်း ဒေသခံများ ပြောကြားချက်အရ သိရသည်။

"ပုဂံညောင်ဦးကနေ တန့်ကြည့်တောင်ဘက်ကို ဟိုက်ဂျက်ကားနဲ့ ဘုရားဖူးသွားတဲ့အဖွဲ့ပါ၊ ဒေသတွင်းလက်နက်ကိုင်အဖွဲ့က သေနတ်နဲ့ ပစ်ခဲ့လို ကားရှေ့ခန်းမှာလိုက်ပါလာတဲ့ အသက် ၈၀ လောက်အဖိုးကို သေနတ်ကျည်ဆံမှန်ခဲ့ပါတယ်။ အဖိုးမှာ ရင်ဘတ်နဲ့တင်ပါးမှာ သေနတ်ထိတဲ့ဒဏ်ရာရတာ။ ဒဏ်ရာက စိုးရိမ်ရတဲ့အခြေအနေရှိပါတယ်။ အခုတော့ ဆိက္ခဝကျေးရွာက တစ်ဆင့် စက်လှေနဲ့ ညောင်ဦးဆေးရုံကိုတော့ ပို့ပြီးပါပြီ" ဟု အဆိုပါ အခင်းဖြစ်စဉ်ကို ကူညီခဲ့သည့်အဖွဲ့၏ တာဝန်ရှိသူက ပြောသည်။

အဆိုပါ အဖြူရောင် ဟိုက်ဂျက်မော်တော်ယာဉ်သည် ဘုရားဖူးခရီးသည် လူကြီး(၇)ဦး၊ ကလေး (၁)ဦး တင်ဆောင်၍ တန့်ကြည့်တောင်ဘုရားကုန်းပေါ်သို့ မောင်းနှင်ပို့ဆောင်စဉ် လမ်းခရီးတစ်ဝက် အန္တရာယ်ကွေ့ အရောက်တွင် လက်နက်ကိုင်အဖွဲ့တစ်ဖွဲ့မှ ချောင်းမြောင်းပစ်ခတ်ခံခဲ့ရခြင်း ဖြစ်ကြောင်း သိရသည်။

ymg/mt
#Yangon_Media_Group

#LocalNews
Published_7 June 2022

ရခိုင်ပြည်နယ်တွင် မူလတန်းကျောင်းသားများအား ကိုဗစ်ကာကွယ်ဆေး စတင်ထိုးနှံပေးနေပြီ ဖြစ်ကြောင်း ပြည်နယ်ပြည်သူ့ကျန်းမာရေးဦးစီးဌာနက သိရသည်။

ပြီးခဲ့သည့်အပတ်မှစ၍ တရုတ်နိုင်ငံထုတ် Sinopharm အမျိုးအစား ကိုဗစ်ကာကွယ်ဆေးကို စတင်ထိုးနှံခြင်းဖြစ်ပြီး လက်ရှိတွင် အသက် ၅ နှစ်မှ ၁၂ နှစ်အထိ အခြေခံပညာ မူလတန်း ကျောင်းသား၊ ကျောင်းသူဦးရေ ၂၀၅၂၁ ဦးကို ထိုးနှံပြီးစီးသွားပြီဖြစ်ကြောင်းလည်း သိရသည်။

ရခိုင်ပြည်နယ်တွင် ကိုဗစ်ကာကွယ်ဆေးထိုးနှံရမည့် မူလတန်းကျောင်းသူ၊ ကျောင်းသားဦးရေမှာ ၃ သိန်း ၆ သောင်းခန့် ရှိကြောင်း၊ ကျောင်းသားကျောင်းသူအများစုမှာ ကာကွယ်ဆေး ထိုးကြသော်လည်း တချို့မိဘများမှာ ယင်းတို့၏ ကလေးများအား စိတ်ပူသဖြင့် မထိုးသူအချို့ရှိနေကြောင်းလည်း သိရသည်။

တရုတ်ထုတ် Sinopharm ကိုဗစ်ကာကွယ်ဆေးကို အသက် ၅ နှစ်နှင့် အထက်ကလေးများ ထိုးနှံနိုင်ကြောင်း အစားအသောက်နှင့် ဆေးဝါးကွပ်ကဲမှုဌာန (FDA)က ခွင့်ပြုထားပြီး ဖြစ်ကြောင်းလည်း သိရသည်။

ရခိုင်ပြည်နယ်တွင် ပြီးခဲ့သည့် ၂ဝ၂၁ ခုနှစ်၊ အောက်တိုဘာလ ၁၇ ရက်မှစတင်၍ အသက် ၁၂ နှစ်အထက် အလယ်တန်းနှင့် အထက်တန်းအဆင့်ကျောင်းသား၊ ကျောင်းသူများအား တရုတ်နိုင်ငံထုတ် Sinovac အမျိုးအစားကိုဗစ်ကာကွယ်ဆေးများ စတင်ထိုးနှံပေးခဲ့ကြောင်း၊ ယင်းအပြင် စက်မှုဝန်ကြီးဌာနနှင့် တရုတ်ပြည်သူ့သမ္မတနိုင်ငံ Sinopharm China National Biotec Group တို့ပူးပေါင်း၍ မြန်မာနိုင်ငံတွင် ပြီးခဲ့သည့်မတ်လက စတင်ထုတ်လုပ်နိုင်ခဲ့သော Myancopharm ကိုဗစ်ကာကွယ်ဆေးကို အသက် ၁၅ နှစ်မှ အသက် ၁၈ နှစ်အထိ ကျောင်းသား၊ ကျောင်းသူ ၇၀ အထိ ထိုးနှံပြီး ဖြစ်ကြောင်းလည်း သိရသည်။

ymg/mt
Photos - We Love Sittwe
#Yangon_Media_Group

#WorldPolitics
Published 7 June 2022

ယခုအပတ်အတွင်း အမေရိကန်ကလက်ခံကျင်းပမယ့် အမေရိကတိုက်ထိပ်သီးအစည်းအဝေးပွဲမှ ကျူးဘား၊ ဗင်နီဇွဲလားနဲ့ နီကာရာဂွာနိုင်ငံတို့ကို ဖယ်ထုတ်လိုက်ကြောင်း အမေရိကန်အိမ်ဖြူတော်က တနင်္လာနေ့က ကြေညာလိုက်ပါတယ်။

အနောက်ဘက်ခြမ်းက နိုင်ငံအားလုံးကို ဖိတ်ကြားခြင်းမရှိတဲ့အတွက် မက္ကဆီကိုသမ္မတအနေနဲ့ အစည်းအဝေးပွဲ မတက်ရောက်ဖို့ အကြောင်းပြချက်ဖန်လာပါတယ်။

လော့စ်အိန်ဂျလိစ်မှာ ပြုလုပ်မယ့်အစည်းအဝေးပွဲမှာ ဒေသတွင်းပြောင်းရွှေ့နေထိုင်မှုများနဲ့ စီးပွားရေးစိန်ခေါ်မှု အခက်အခဲများဖြေရှင်းရန် အမေရိကန်ကရည်ရွယ်ထားတာဖြစ်ပြီး မက္ကဆီကိုသမ္မတ'အန်ဒရီစ်မန်နျူယယ်လိုပက်ဇ်အိုဘရာဒေါ'နဲ့ အခြားခေါင်းဆောင်များ သပိတ်မှောက်လာကြတာဟာ အစည်းအဝေးပွဲရဲ့အရေးပါမှုကို ထိခိုက်စေနိုင်ပါတယ်။

ရီပတ်ဘလစ်ကန်သမ္မတဟောင်း'ဒေါ်နယ်ထရမ့်'လက်ထက်က ပျက်စီးခဲ့တဲ့လက်တင်အမေရိကဆက်ဆံရေးကို ပြန်လည်ပြုပြင်နိုင်ဖို့ ဒီမိုကရက်တစ်သမ္မတ'ဂျိုးဘိုင်ဒန်'ကမျှော်လင့်ထားပြီး အမေရိကန်ရဲ့ဩဇာလွှမ်းမိုးမှု သက်ရောက်ရေးနဲ့ တရုတ်ကျူးကျော်မှုတို့ကို တန်ပြန်နိုင်ရေး ရည်မှန်း ထားပါတယ်။

ရက်သတ္တပတ်အချို့ကြာမြင့်အောင် ဆုံးဖြတ်ချက်များခက်ခက်ခဲခဲချခဲ့ပြီးနောက် ကျူးဘား၊ ဗင်နီဇွဲလား၊ နီကာရာဂွာတို့ကို ဖယ်ထုတ်ဖို့ဆုံးဖြတ်ချက်ချခဲ့ပြီး ဒါဟာ အဆိုပါနိုင်ငံ ၃ နိုင်ငံရဲ့ ဒီမိုကရေစီမဆန်မှုနဲ့ လူအခွင့်အရေးများအပေါ် စိုးရိမ်မှုများကြောင့်ဖြစ်ကြောင်း အမေရိကန်အကြီးတန်းအရာရှိတစ်ဦးက ဆိုပါတယ်။

အမေရိကန် နိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူ'နက်ဒ်ပရိုက်စ်'က "အမေရိကန်အုပ်ချုပ်ရေးအစိုးရအနေနဲ့ မက္ကဆီကိုရဲ့ သဘောထားရပ်တည်ချက်ကို နားလည်ပေမယ့် အခုအစည်းအဝေးပွဲရဲ့အဓိကအနှစ်သာရတစ်ခုက ဒီမိုကရက်တစ်အုပ်ချုပ်ရေးဖြစ်ပြီး ထိုနိုင်ငံတွေက ဒီမိုကရေစီစံပြနိုင်ငံများမဟုတ်ပါဘူး" လို့ ပြောကြားခဲ့ပါတယ်။

'ဘိုင်ဒန်'နဲ့အစိုးရအဖွဲ့ကို ရီပတ်ဘလစ်ကန်များမှ ဖိအားပေးမှုများရှိနေတဲ့အပြင် လက်တင်အမေရိကရှိ လက်ဝဲဆန့်ကျင်ရေးအဓိက ၃ နိုင်ငံအပေါ် သဘောထားပျော့ပျောင်းစွာ ဆက်ဆံမှုကိုလည်း ဒီမိုကရက်တစ်အချို့က သဘောမတွေ့ကြပါဘူး။

'ထရမ့်'လက်ထက်က ကျူးဘားနဲ့ဗင်နီဇွဲလားတို့အပေါ် ပြင်းထန်တဲ့မူဝါဒတွေချမှတ်ခြင်းကိုထောက်ခံတဲ့ မိုင်ယာမီမှကျူးဘား-အမေရိကန်အသိုင်းအဝိုင်းကြီးဟာ နိုဝင်ဘာလရွေးကောက်ပွဲမှာ ဖလော်ရီဒါကအရေးကြီးတဲ့ မဲပေးအဖွဲ့ဖြစ်လာဖို့ရှိပြီး အခုလက်ရှိဒီမိုကရက်တစ်တွေအုပ်စိုးနေတဲ့ အမေရိကန်လွှတ်တော်စိုးမိုးနိုင်ရေးကို အဆုံးအဖြတ်ပေးသွားမှာဖြစ်ပါတယ်။

မက္ကဆီကိုသမ္မတ'လိုပက်ဇ်အိုဘရာဒေါ'က သူ့အစား နိုင်ငံရေးဝန်ကြီး'မာဆယ်လိုအက်ဘရတ်ဒ်'က အစည်းအဝေးတက်ရောက်မှာဖြစ်ကြောင်း သတင်းထောက်များကိုပြောကြားခဲ့ပါတယ်။

ဒါ့အပြင် နောက်လအတွင်း ဝါရှင်တန်မှာ 'ဘိုင်ဒန်'နဲ့တွေ့ဆုံသွားမယ်လို့ ပြောကြားခဲ့ပြီး အိမ်ဖြူတော်ကလည်း အတည်ပြုခဲ့ပါတယ်။

ဗုဒ္ဓဟူးနေ့မှာကျင်းပမယ့်အစည်းအဝေးပွဲက အမေရိကန်တောင်ပိုင်းနယ်စပ်မှာ ပြောင်းရွှေ့မှုတားဆီးထိန်းချုပ်ရေးကို အဓိကထားဆွေးနွေးသွားဖို့ဖြစ်ပြီး မက္ကဆီကိုသမ္မတမတက်ရောက်ခြင်းက အမေရိကန်အတွက် သံတမန်ရေးရာမှာ အရှက်ရဖွယ်ဖြစ်လာနိုင်ပါတယ်။

ဗင်နီဇွဲလားမှ အများစုပါဝင်တဲ့ ထောင်ဂဏန်းချီရှိတဲ့ ရွှေ့ပြောင်းနေထိုင်သူတွေဟာ တနင်္လာနေ့အစောပိုင်းမှာ မက္ကဆီကိုတောင်ပိုင်းကနေထွက်လာပြီး အမေရိကန်သို့ဦးတည်ရောက်ရှိအောင် သွားကြမှာ ဖြစ်ပါတယ်။

ဒါပေမဲ့ မက္ကဆီကိုသမ္မတအစည်းအဝေးမတက်ရောက်ခြင်းက 'ဘိုင်ဒန်'ရဲ့ဒေသတွင်းပြောင်းရွှေ့မှုအစီအစဉ်ကို အဟန့်အတားဖြစ်စေမှာ မဟုတ်ကြောင်း အကြီးတန်းအရာရှိတစ်ဦးကဆိုပါတယ်။

အရင်ကျင်းပခဲ့တဲ့ ထိပ်သီးအစည်းအဝေးပွဲတွေလိုမျိုး နိုင်ငံ့အစိုးရခေါင်းဆောင်အနည်းဆုံး ၂၃ ဦးတက်ရောက်ဖို့ အိမ်ဖြူတော်က မျှော်မှန်းထားပါတယ်။

အထက်လွှတ်တော်နိုင်ငံခြားဆက်ဆံရေးကော်မတီဥက္ကဌ တာဝန်ယူထားပြီး ဒီမိုကရက်တစ်လည်းဖြစ်တဲ့ အမေရိကန်လွှတ်တော်အမတ်'ရောဘတ်မီနန်ဒက်ဇ်'က မက္ကဆီကိုသမ္မတကို ဝေဖန် လိုက်ကာ အာဏာရှင်တွေနဲ့ရပ်တည်ဖို့ ဆုံးဖြတ်လိုက်တာက အမေရိကန်-မက္ကဆီကိုဆက်ဆံရေးကို ထိခိုက်စေလိမ့်မယ်လို့ ပြောကြားလိုက်ပါတယ်။

Source: Reuters
#Yangon_Media_Group

#LocalNews
Published_7 June 2022

ပဲခူး ကမ္ဘောဇသာဒီရွှေနန်းတော်တွင် အမှတ်တရဓာတ်ပုံရိုက်လိုသူများအတွက် နန်းဝတ်နန်းစားဝတ်စုံများကို သမိုင်းယဉ်ကျေးမှု မလွဲချော်စေရန် သိနားလည်သသည့်ပညာရှင်များ၏ အကူအညီရယူ၍ ဆောင်ရွက်နေကြောင်း သိရသည်။

ကမ္ဘောဇသာဒီရွှေနန်းတော်သည် အောက်မြန်မာပြည်တွင် တစ်ခုတည်းသော မင်းနေပြည်တော်အဖြစ် ထီးနန်းစိုက်ခဲ့ရာနေရာဖြစ်ပြီးယခုအခါ လေ့လာသူများ ပြန်လည်ရှိလာပြီဖြစ်ကြောင်း၊ နန်းတော်ဝင်းအတွင်း လှည့်လည်လေ့လာနိုင်ရန်အတွက် စက်ဘီးနှင့် မြင်းများကိုလည်း ငှားရမ်းစီးနင်းနိုင်ရန် ဆောင်ရွက်ပေးထားကာ အမှတ်တရဓာတ်ပုံရိုက်နိုင်ရန် KanBawZaThadi မြက်ခင်းပြင်ကိုလည်း ပြုလုပ်ပေးထားကြောင်းသိရသည်။

"အမှတ်တရဓာတ်ပုံရိုက်နိုင်ဖို့အတွက် အထိမ်းအမှတ်သင်္ကေတပုံတွေရှိတယ်။ လာရောက်လေ့လာလည်ပတ်ကြသူတွေအနေနဲ့ ရိုးရာဝတ်စုံနဲ့ နန်းတော်အတွင်း ဓာတ်ပုံရိုက်နိုင်ဖို့ ရိုးရာဝတ်စုံတွေ ငှားရမ်းပေးတာ ရှိပါတယ်၊ ဗမာ၊ ရှမ်း၊ မွန် ဝတ်စုံ၊ ထိုင်း၊ တရုတ်ဝတ်စုံတွေထားရှိပေးထားပါတယ်"ဟု အဆိုပါ ရွှေနန်းတော်မှ တာဝန်ရှိသူတစ်ဦးက ပြောသည်။

အဆိုပါ နန်းတော်အတွင်း ဒုတိယမြန်မာနိုင်တော်ကြီးအဖြစ် စုစည်းဆောင်ရွက်နိုင်ခဲ့သည့် ဆင်ဖြူများရှင် ဘုရင့်နောင်မင်းတရားကြီး၏ မြေနန်းပြသာဒ်ဆောင်၊ ဘမရာသနပလ္လင် (စက်တော်ခေါ်ရာအဆောင်)ဆောင်တို့ကို ရှေးဟောင်းသုသေသနဦးစီးဌာနမှ ရှေးမူမပျက် ပုံစံတူပြန်လည်ဆောက်လုပ်ထားပြီး ဘုရင့်နောင်မင်းတရားကြီး၏ မိဖုရားခေါင် ခင်ခင်ကြီးနှင့်ထိုင်းနိုင်ငံမှ ဆက်သခဲ့သည့် မင်းသမီးဆုပန်ကလျာအဆောင်နှင့် မင်္ဂလာကန်တော်တို့လည်း ရှိသောကြောင့် လာရောက်လေ့လာသူများ နေ့စဉ်ရှိနေကြောင်းသိရသည်။

ymg/mt
#Yangon_Media_Group

#LocalNews
Published - 7 June 2022

လိပ်ကျွန်းလူသတ်မှုကြောင့် ထိုင်းနိုင်ငံတွင် ထောင်ဒဏ်တစ်သက်တစ်ကျွန်း ပြစ်ဒဏ်ကျခံနေရသည့် ဝင်းနှင့်ဇော်အတွက် စိတ်ပိုင်းဆိုင်ရာအားပေးမှု လိုအပ်ကြောင်း ထိုင်းနိုင်ငံတောင်ပိုင်းအခြေစိုက်ပညာရေးနှင့် ဖွံ့ဖြိုးတိုးတက်ရေးဖောင်ဒေးရှင်း အမှုဆောင်ဒါရိုက်တာ ဦးထူးချစ်က ပြောသည်။

"လိပ်ကျွန်းလူသတ်မှုနဲ့ သေဒဏ်ကျခံနေရတဲ့ ဝင်းနဲ့ဇော်ဟာ သေဒဏ်ကနေ တစ်သက်တစ်ကျွန်း ပြစ်ဒဏ်ကျခံနေရပါတယ်။ အစိုးရတာဝန်ရှိသူတွေအနေနဲ့ ထောင်ဝင်စာပုံမှန်တွေ့နိုင်အောင် ကြိုးစားသင့်ပါတယ်၊ အရင်အစိုးရတွေတုန်းကလည်း ထောင်ဝင်စာပုံမှန်တွေ့ဖို့ ပျက်ကွက်ခဲ့ပါတယ်။ တစ်ချိန်တည်းမှာပဲ လိပ်ကျွန်းအမှုနဲ့ တစ်သက်တစ်ကျွန်းအပြစ်ဒဏ်ကျနေတဲ့ "ဝင်း"နဲ့ "ဇော်”ကို စိတ်ပိုင်းဆိုင်ရာ အားပေးမှုတွေလည်းပဲ လုပ်ဆောင်သင့်ပါတယ်" ဟု ယင်းကပြောသည်။

"ဝင်း" နှင့် "ဇော်" သည် လွန်ခဲ့သည့် ၂၀၁၅ ခုနှစ်တွင် ထိုင်းနိုင်ငံတောင်ပိုင်းရှိ လိပ်ကျွန်း၌ ဗြိတိန်နိုင်ငံသားနှစ်ဦး သေဆုံးမှုနှင့်ပတ်သက်၍ လူသတ်မှု၊ မုဒိမ်းမှု၊ ပစ္စည်းလုယူမှုအပါအဝင် အမှုပေါင်း ၇ ခုဖြင့် ထိုင်းရဲတပ်ဖွဲ့၏တရားစွဲဆိုခံခဲ့ရကာ သေဒဏ်ချမှတ်ခြင်းခံခဲ့ရပြီးနောက် ၂၀၁၉ ခုနှစ် အောက်တိုဘာလ ၂၄ ရက်က အသနားခံစာတင်ပြမှုကြောင့် ၂၀၂၀ ပြည့်နှစ် ဒီဇင်ဘာလ ၅ ရက်တွင် သေဒဏ်မှ ထောင်ဒဏ်တစ်သက်တစ်ကျွန်းသို့ ပြစ်ဒဏ်လျှော့ပေါ့ပေးခံထားရခြင်း ဖြစ်သည်။

ymg/sth
#Yangon_Media_Group