#LocalNews
Published - 10 June 2022

ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး (UNHCR)သည် ပြီးခဲ့သည့် ဧပြီလအစောပိုင်းတွင် ကယားပြည်နယ်သို အရေးပေါ်ကယ်ဆယ်ရေးပစ္စည်းများကို ပထမဦးဆုံး ကူညီထောက်ပံ့မှုပေးအပ်ရောက်ရှိခဲ့သော နိုင်ငံတကာအဖွဲ့အစည်းတစ်ဖွဲ့ဖြစ်ပြီး ယနေ့(ဇွန်၁၀ရက်)အထိ ကယားပြည်နယ်ရှိ လူဦးရေ စုစုပေါင်း ၅၄, ၂၀၀ ဦးကိုအရေးပေါ်ကယ်ဆယ်ရေးပစ္စည်းများပေးအပ်ခဲ့ကြောင်း UNHCR က ထုတ်ပြန်ခဲ့သည်၊၊

မေလ နှင့် ဇွန်လအစောပိုင်းတွင်ဆောင်ရွက်ခဲ့သည့် အဓိကအရေးပေါ် ကယ်ဆယ်ရေးပစ္စည်းများကူညီထောက်ပံ့မှုများမှတဆင့် ခန့်မှန်းခြေအားဖြင့် လွိုင်ကော်နှင့် ဒီမောဆိုမြို့နယ်များအတွင်း နေထိုင်သူပေါင်း ၂၅,၂၀၀ ဦး အကျိုးခံစားခွင့်ရရှိခဲ့ကြသည်ဟု ဆိုသည်၊၊

UNHCR အနေဖြင့်စောင်များ၊ ဆိုလာမီးအိမ်များ၊ ခြင်ထောင်များ၊ ရေပုံးများ၊ တစ်ကိုယ်ရေကျန်းမာရေးသုံး ပစ္စည်းများ၊ တာပေါ်လင်စများ၊ ဖျာများ စသည်တို့ကို ကူညီမှုလိုအပ်နေသော အမျိုးသမီးများ၊ အမျိုးသားများနှင့် ၎င်းတို့၏ မိသားစုများထံ ဖြန့်ဝေပေးခဲ့ပါသည်။

UNHCR ၏ ကူညီထောက်ပံ့မှု အစီအစဉ်များကို ဆက်လက်တိုးမြှင့်ဆောင်ရွက်လျက်ရှိပြီး မြန်မာနိုင်ငံတစ်ဝှမ်းတွင် အထူးသဖြင့် ကျေးလက်ဒေသနှင့် ဝေးလံခက်ခဲသောဒေသများရှိ အကူအညီလိုအပ်နေသော လူမှုအသိုက်အဝန်းများထံ အရေးပေါ်ကယ်ဆယ်ရေး လူသားချင်း စာနာမှုဆိုင်ရာ အကူအညီများပေးအပ်နိုင်ရန် ဖြစ်နိုင်ခြေရှိသည့်နည်းလမ်းများကို လေ့လာဆောင်ရွက်သွားမည်ဖြစ်ကြောင်း သိရသည်၊၊

ymg/tthl
#Yangon_Media_Group

#LocalNews
Published - 10 June 2022

မြန်မာအမျိုးသားလေကြောင်းသည် ရန်ကုန်- ဘန်ကောက်- ရန်ကုန်ခရီးစဉ်များကို နေ့စဉ်ပျံသန်းပြေးဆွဲလျက် ရှိရာ ဇွန် ၁၅ ရက်မှစတင်၍ တနင်္လာနှင့် ဗုဒ္ဓဟူးနေ့တို့တွင် ခရီးစဉ်နှစ်ကြိမ်နှုန်းဖြင့် တိုးချဲ့ပျံသန်းသွားမည်ဖြစ်ကြောင်း အဆိုပါ လေကြောင်းမှ သိရသည်။

ရန်ကုန်- ဘန်ကောက်- ရန်ကုန် ခရီးစဉ်ကို ရန်ကုန်မြို့မှ နံနက် ၆ နာရီ ၁၅ မိနစ်တွင် ထွက်ခွာပြီး ဘန်ကောက်သို့ နံနက် ၈ နာရီခွဲတွင် ဆိုက်ရောက်ကာ ဘန်ကောက်မှ ရန်ကုန်သို့ နံနက် ၉ နာရီခွဲ ပြန်လည်ထွက်ခွာပြီး နံနက် ၁၀ နာရီ ၂၅ မိနစ်တွင် ရန်ကုန်သို့ရောက်ရှိမည်ဖြစ်ကြောင်း သိရသည်။

မြန်မာအမျိုးသားလေကြောင်းအနေဖြင့် ကွာလာလမ်ပူ၊ ကိုရီးယား အင်ချွန်းခရီးစဉ်ကို တစ်ပတ် နှစ်ကြိမ် တိုးချဲ့ပျံသန်းသွားရန်ရှိပြီး ဗုဒ္ဓဂယာခရီးစဥ်ကိုလည်း ပျံသန်းပြေးဆွဲရန် စီမံဆောင်ရွက်လျက်ရှိကာ တရုတ်နိုင်ငံ ယူနန်ပြည်နယ် ကူမင်းမြို့ကိုလည်း ပျံသန်းသွားမည်ဖြစ်ကြောင်း သိရသည်။

ပြည်တွင်း၌ ကိုဗစ်-၁၉ ရောဂါထိန်းချုပ်နိုင်ပြီး လေကြောင်းလိုင်းများ ပြန်လည်ဖွင့်လှစ် ပြေးဆွဲလာသောကြောင့် မြန်မာအမျိုးသားလေကြောင်းအနေဖြင့် အခြားခရီးစဉ်များကိုလည်း ယင်းကဲ့သို တိုးချဲ့ပျံသန်းသွားမည်ဖြစ်ကြောင်း ယင်းထုတ်ပြန်ချက်တွင်ဖော်ပြထားသည်။

ymg/NN
#Yangon_Media_Group

#DailyNews
Published - 10 June 2022

၁။ သင်ရိုးညွှန်းတမ်းဖတ်စာများကို မျက်မမြင်စာဖြင့် ဖတ်နိုင်အောင်ဆောင်ရွက်နေ

၂။ နေပြည်တော် အိမ်ခြံမြေဈေးကွက် အရောင်းအေးနေ

၃။ နေ့စဉ်မိုးလေဝသသတင်း။

၄။ ပါကစ္စတန်နှင့်အိန္ဒိယ ပန်းရောင်အချိုရည်ကြောင့် ပြည်သူတွေပေါင်းစပ် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published - 10 June 2022

ကမ္ဘာ့ဘဏ်၏ စီးပွားရေးတိုးတက်မှုဆိုင်ရာ ခန့်မှန်းတွက်ချက်မှုများအတွင်း မြန်မာနိုင်ငံကို ထည့်သွင်းထားခြင်းမရှိဘဲ ချန်လှပ်ထားသည်ကို ကမ္ဘာ့စီးပွားရေးအလားအလာ (ဇွန် ၂၀၂၂) အစီရင်ခံစာတွင် ဖော်ပြထားချက်အရ သိရသည်။

အဆိုပါ အစီရင်ခံစာတွင် မြန်မာနိုင်ငံအတွင်း ဖြစ်ပေါ်နေသည့်မသေချာ၊ မရေရာမှုတွေ မြင့်မား နေခြင်းကြောင့် ၂၀၂၁ အလွန် မြန်မာ့စီးပွားရေး တိုးတက်မှုခန့်မှန်းချက်မှ ဖယ်ထုတ်ခဲ့ခြင်းဖြစ်ကြောင်း ထောက်ပြပြောဆိုထားသည်။

ယင်းအပြင် နောက်ဆုံးခန့်မှန်းချက်ဖြစ်သည့် ၂၀၂၁ ခုနှစ်အတွင်း မြန်မာ့စီးပွားရေးကျဆင်းမှုနှုန်း အနုတ် ၁၈ ရာခိုင်နှုန်းရှိမည်ဟု တွက်ချက်ပြီးနောက် ၂၀၂၂ ခုနှစ်မှစတင်ပြီး ကမ္ဘာ့ဘဏ်မှ မြန်မာ့စီးပွားရေးကို ခန့်မှန်းထားခြင်း မရှိတော့ကြောင်း သိရသည်။

မြန်မာနိုင်ငံမှအပ ကျန်အာဆီယံဒေသတွင်း အဖွဲ့ဝင်နိုင်ငံအားလုံး စီးပွားရေးတိုးတက်မှုရှိနိုင်ကြောင်း အစီရင်ခံစာတွင် ဖော်ပြခဲ့ပြီး အရှေ့အာရှနှင့်ပစိဖိတ်ဒေသ (EAP) နိုင်ငံအတွင်း စီးပွားရေးအလားအလာခန့်မှန်းချက်မှ ဖယ်ထုတ်ခြင်းခံရသည့် တစ်ခုတည်းသော နိုင်ငံဖြစ်ကြောင်း သိရသည်။

မြန်မာနိုင်ငံနှင့် နယ်နမိတ်ချင်း ထိစပ်နေသည့် ထိုင်းနိုင်ငံသည် ယခုနှစ်အတွင်း စီးပွားရေးတိုးတက်မှုနှုန်း ၂ ဒသမ ၉ ရာခိုင်နှုန်းရှိနေပြီး လာအို ၃ ဒသမ ၈ ရာခိုင်နှုန်း၊ ကမ္ဘောဒီးယား ၄ ဒသမ ၅ ရာခိုင်နှုန်းနှင့် အရှေ့တီမော ၂ ဒသမ ၄ ရာခိုင်နှုန်း တိုးတက်မှုရှိမည်ဟု ကမ္ဘာ့ဘဏ်မှ ခန့်မှန်းထားသည်။

ymg/sth
#Yangon_Media_Group

#LocalNews
Published - 10 June 2022

ပြည်ပရောက်မြန်မာလုပ်သားများအနေဖြင့် NUG မှထုတ်ပေးမည့် OERC ကတ်အားလျှောက်ထားခြင်း၊ လက်ဝယ်ကိုင်ဆောင်ခြင်းတွေ့ရှိပါက နိုင်ငံသားအဖြစ်မှရပ်စဲ၍ ပြည်ဝင်ခွင့် ပိတ်ပင်သွားမည်ဖြစ်ကြောင်း နစက၏ အလုပ်သမားဝန်ကြီးဌာနမှ ထုတ်ပြန်ထားသည်။

ပြည်ပတွင် အလုပ်လုပ်ကိုင်ခွင့်အတွက် အသိအမှတ်ပြုသက်သေခံကတ်အဖြစ် ထုတ်ပေးထားသည့် OWIC အစား ပြည်ပအလုပ်အကိုင်ဆိုင်ရာ စစ်တမ်းကောက်ယူခြင်းနှင့် ပြည်ပအလုပ် အကိုင်အသိအမှတ်ပြုကတ် (OERC)ကို NUG ဘက်မှ ထုတ်ပေးသွားမည်ဖြစ်ကြောင်း ပြီးခဲ့သည့် မေလ ၂၇ ရက်တွင် အသိပေးထုတ်ပြန်ထားသည်။

ယင်းကြောင့် ပြည်ပနိုင်ငံများတွင် ရောက်ရှိနေထိုင်သူ မြန်မာနိုင်ငံသားများအနေဖြင့် အဆိုပါ OERC ကတ်အား လျှောက်ထားခြင်း၊ လက်ဝယ်ကိုင်ဆောင်ထားခြင်း စိစစ်တွေ့ရှိပါက Black List စာရင်းရေးသွင်း၍ နိုင်ငံကူးလက်မှတ်ပယ်ဖျက်ခြင်း၊ နိုင်ငံသားအဖြစ်မှ ရပ်စဲခြင်းခံရ၍ ပြည်ဝင်ခွင့်ပိတ်ပင်သွားမည်ဖြစ်ကာ အကြမ်းဖက်မှုတိုက်ဖျက်ရေးဥပဒေ၊ တည်ဆဲဥပဒေများအရ အရေးယူခံရမည်ဖြစ်ကြောင်း နစက၏ အလုပ်သမားဝန်ကြီးဌာနက ဇွန်လ ၉ ရက်တွင် အသိပေးထုတ်ပြန်ထားသည်။

မြန်မာနိုင်ငံမှ ပြည်ပနိုင်ငံများသို့ သွားရောက်အလုပ်လုပ်ကိုင်မည့်သူများအနေဖြင့် မြန်မာနိုင်ငံရှိ အလုပ်သမားဝန်ကြီးဌာနမှ ထုတ်ပေးထားသော OWIC ပါရှိမှသာလျှင် အပြည်ပြည်ဆိုင်ရာလေဆိပ်များ၊ နယ်စပ်ဂိတ်များမှ တစ်ဆင့် ပြည်ပနိုင်ငံများသို့ သွားရောက်နိုင်မည်ဖြစ်ပြီး OWIC သက်တမ်း (၅) နှစ်အတွင်း ခွင့်ဖြင့်ပြန်လာ၍ ပြန်လည်ထွက်ခွာမည်ဆိုပါက အဆိုပါ OWIC ကို ဆက်လက်ကိုင်ဆောင်၍ ပြည်ဝင်/ပြည်ထွက်များ အသုံးပြုနိုင်ကြောင်း သိရသည်။

ymg/sth
#Yangon_Media_Group

#LocalNews
Published - 10 June 2022

နယ်ကနေ ရန်ကုန်ကလေးဆေးရုံကြီးကို လာရောက်ကုသနေရသည့် ကလေးလူနာများအတွက် အလှူရှင်များ လိုအပ်လျက်ရှိကြောင်း သိရသည်၊၊

ဆေးရုံကြီးက လိုအပ်သည့်ဆေးနှင့်နေ့လည်စာ အခမဲ့ပေးသော်လည်း မျက်စိကင်ဆာဖြစ်နေသည့် ကလေးလူနာအတွက် ခွဲစိတ်ကုသရမယ့်စရိတ်၊ သွားလာစရိတ်၊ စားစရိတ်တွေလိုအပ်နေသည်ဟု ဆိုပါသည်၊၊

"နယ်ကနေဆေးရုံလာတက်တဲ့ ကလေးလူနာတွေအတွက်ကတော့ အလှူရှင်တွေလိုပါတယ်၊၊ ကလေးလူနာဖြစ်လို့ မသွားနိုင်မလာနိုင်တော့ တက်စီနဲ့ပဲနေ့စဥ်ဆေးရုံကို အသွားအပြန်ပြရတော့ တက်စီခတွေ ကုန်ကျပါတယ်၊၊ တစ်ရက်ကိုတက်စီခ ၅၀၀၀/ ၁၀၀၀၀ ကုန်ကျပါတယ်၊၊ စားစရိတ်က ဆေးရုံကနေ့ခင်းပိုင်း အခမဲ့ကျွေးတယ်၊၊ ညနေကျတော့ဝယ်စားရတယ်၊၊ အခုမျက်စိကင်ဆာက မျက်စိခွဲထုတ်ရမှာဆိုတော့ ခွဲစိတ်စရိတ်သုံးသိန်းလောက်တော့ ကုန်ဖို့ရှိပါတယ်၊၊မျက်စိခွဲထုတ်လိုက်ရင်တော့ အသက်အန္တရာယ်မရှိတော့ဘူးလို့ ပြောပါတယ်၊၊ ဖုန်း 09441460973 ကို ဆက်သွယ်လှူဒါန်းနိုင်ပါတယ်"လို့ မျက်စိကင်ဆာဖြစ်ပွားနေတဲ့ ကလေးငယ် ကောင်းခန့်ပိုင်ရဲ့မိခင်က YMG ကို ပြောပါတယ်၊၊

ကလေးလူနာတွေအတွက် ဝေဠုကျော်ဖောင်ဒေးရှင်း ကလည်းတတ်နိုင်သလောက်လှူဒါန်းနေပြီးနေ့စဥ် အကူအညီတောင်းခံထားသည့် ကလေးလူနာများရှိကြောင်း ဝေဠုကျော်ဖောင်ဒေးရှင်းက တာဝန်ရှိသူတစ်ဦးက ပြောပါသည်၊၊

လှူဒါန်းလိုသူများ ဝေဠုကျော်ဖောင်ဒေးရှင်းက တစ်ဆင့်လှူဒါန်းနိုင်သလို ကိုယ်တိုင်ကိုယ်ကျလည်း သွားရောက်လှူဒါန်းနိုင်ကြောင်းသိရသည်၊၊

ymg/tthl
#Yangon_Media_Group