#LocalNews
Published _13 June 2022

ထေရဝါဒဗုဒ္ဓသာသနာတော် အဓွန့်ရှည်စွာ တည်တံ့ခိုင်မြဲစေခြင်းငှာ သာသနာတော်အကျိုး၊ စေတီတော်အကျိုးတို့ကို ရှေ့ရှု၍ နေ့ထူးနေ့မြတ် အခါတော်နေ့ အခမ်းအနားများကို ၁၂လရာသီပတ်လုံးစဉ်ဆက်မပြတ် ကျင်းပလျက်ရှိပြီး မြတ်ဗုဒ္ဓ၏ အဆုံးအမတော်များမှ မဟာသမယဒေသနာတော်ကို ဟောကြားတော်မူခဲ့သည့် ယနေ့ နယုန်လပြည့်နေ့တွင် ရှေးရှေးက ဗုဒ္ဓဘာသာသူတော်ကောင်းကြီးများ ပြုလုပ်ခဲ့ကြသည့် နည်းထုံးများကို နှလုံးမူပြီး ဗုဒ္ဓဘာသာထုံးတမ်းအစဉ်အလာများအတိုင်း သာသနာတော်နှစ် ၂၅၆၆ခုနှစ်၊ ကောဇာသက္ကရာဇ် ၁၃၈၄ခုနှစ် နယုန်လပြည့်နေ့၊ ခရစ်နှစ် ၂၀၂၂ခုနှစ် ဇွန်လ ၁၃ ရက်၊ တနင်္လာနေ့တွင် ရွှေတိဂုံစေတီတော်ဘဏ္ဍာတော်ထိန်း ဂေါပကအဖွဲ့ကကြီးမှူး၍ နယုန်လပြည့် မဟာသမယနေ့အခမ်းအနားကို ကျင်းပခဲ့သည်။

မြတ်စွာဘုရားရှင်အဖြစ်သို့ ရောက်တော်မူပြီး ငါးဝါမြောက်ဖြစ်သော မဟာသက္ကရာဇ် ၁၀၈ခုနှစ်၊ နယုန်လတွင် ကပိလဝတ်ပြည်နှင့် ကောလိယပြည်မှ တောင်သူလယ်သမားများသည် ရောဟိဏီမြစ်ရေကို ခွဲဝေသုံးစွဲရာ ညီညွတ်မျှတမှုမရှိဘဲ တိုင်းပြည်အချင်းချင်း စစ်ခင်းစစ်ပြိုင်ကြမည့် အခြေအနေကို ရောက်ရှိ လာသောကြောင့် ဗုဒ္ဓမြတ်စွာဘုရားမှ ငြိမ်းချမ်းရေးအခြေခံသော ဗုဒ္ဓဝင်ဖြစ်စဉ်များ ဟောကြားသော နယုန်လပြည့်နေ့ကို မဟာသမယနေ့ဟု သတ်မှတ်ခဲ့ကြောင်းသိရသည်။

ထိုကဲ့သို့သော မဟာသမယနေ့၏ အဓိပါယ် အနှစ်သာရများကို သိရှိမှတ်သား လိုက်နာကျင့်ကြံနိုင်စေရန် ကောင်းမြတ်သော ရည်ရွယ်ချက်ဖြင့် ဗုဒ္ဓဘာသာဝင်တို့၏ မမေ့အပ်သော နေ့ထူးနေ့မြတ်အဖြစ် မဟာသမယနေ့ အခမ်းအနားကြီးကို နံနက် ၅ နာရီတွင် မြတ်စွာဘုရားရှင်အား ရည်မှန်း၍ အရုဏ်ဆွမ်းတော်ကြီး ဆက်ကပ်လှူဒါန်းခြင်းနှင့် နံနက် ၅ နာရီ ၃၀မိနစ်တွင် ရွှေတိဂုံစေတီတော် ဩဝါဒါစရိယဆရာတော်ကြီးများအား အရုဏ် ဆွမ်းတော်ကြီး ဆက်ကပ်လှူဒါန်းခြင်း အပါအဝင် နံနက် ၆ နာရီ ၃၀မိနစ်တွင် ဩဝါဒါစရိယဆရာတော်ကြီးများထံမှ မဟာသမယနေ့ဆိုင်ရာ တရားတော်များနှင့် ရေစက်ချအနုမောဒနာတရားများ နာကြားခြင်း၊ နံနက် ၇ နာရီတွင် ဗုဒ္ဓဝေယျာဝစ္စအသင်းအဖွဲ့များနှင့် ဂေါပကရုံးဝန်ထမ်းများက ရင်ပြင်တော် ရာဟုထောင့် ချမ်းသာကြီးတန်ဆောင်းတွင် စုပေါင်း၍ မဟာသမယတရား ဒေသနာတော်အား ရွတ်ဆိုပူဇော်ခြင်း၊ မေတ္တာပို့ဆုတောင်းခြင်းများ ဆောင်ရွက်ခဲ့ကြသည်။

မေတ္တာပို့ဆုတောင်းပြီးသည်နှင့် ရင်ပြင်တော်ပေါ်ရှိ ခေါင်းလောင်းများကို ၃ကြိမ် ၃ခါ ထိုးကာ ဗုဒ္ဓသာသနံစိရံတိဋ္ဌတုသုံးကြိမ်ရွတ်ဆို ဆုတောင်း၍ အခမ်းအနားကို ရုပ်သိမ်းခဲ့ကြောင်း သိရသည်။

ymg/NN
#Yangon_Media_Group

#LocalNews
Published - 13 June 2022

၂၀၂၂ ခုနှစ်၏ တက္ကသိုလ်ဝင်စာမေးပွဲအောင်စာရင်းကို ဇွန်လ ၁၂ ရက်ထက်နောက်ဆုတ်၍ ဇွန် ၁၇ ရက်တွင်သာ ထုတ်ပြန်ကြေညာမည်ဖြစ်ကြောင်း အခြေခံပညာဦးစီးဌာနမှ သိရသည်။

" ဘာကြောင့်နောက်ဆုတ်လိုက်လဲဆိုတာတော့ မသိရဘူး။ ၁၇ ရက်နေ့ထွက်မယ်လို့ကြားတယ်။ အဲ့ရက်ကတော့ သေချာပါတယ်။ အောင်ချက်ကတော့ မနှစ်ကထက် ဒီနှစ်ပိုများပါတယ်" ဟု အခြေခံပညာဦးစီးဌာနမှ တာဝန်ရှိသူတစ်ဦးကပြောသည်။

တက္ကသိုလ်ဝင်တန်းအောင်စာရင်းများကို အွန်လိုင်းမှတဆင့်ကြည့်လိုသူများအနေဖြင့် မြန်မာနိုင်ငံစာစစ်ဦးစီးဌာန Website တွင်လည်း ဝင်ရောက်ကြည့်ရှုနိုင်ကြောင်း သိရသည်။

၂၀၂၁-၂၀၂၂ ခုနှစ်တက္ကသိုလ်ဝင်စားမေးပွဲတွင် ကျောင်းသား၊ ကျောင်းသူစုစုပေါင်း ၂ သိန်းကျော်ဝင်ရောက်ဖြေဆိုခဲ့ကြောင်း သိရသည်။

ymg/sth
#Yangon_Media_Group

#LocalNews
Published - 13 June 2022

မြန်မာနိုင်ငံမှ ပြည်ပပို့ကုန်များနှင့်ပြည်ပမှ သွင်းကုန်များ မြန်ဆန်ချောမွေ့စွာ ကုန်စည်စီးဆင်းနိုင်ရန် ရန်ကုန်မြို့ မြန်မာ့စက်မှုဆိပ်ကမ်းမှ တစ်လလျှင်ကုန်တင်သင်္ဘော အစင်းရေ ၂၅ စင်းမှ ၃၅ စင်းဖြင့် ဝန်ဆောင်မှုပေးနေကြောင်း Myanmar Industrial Port မှသိရသည်။

ပြည်တွင်းမှ အခြေခံထွက်ကုန်ဖြစ်သော စိုက်ပျိုးရေးနှင့် မွေးမြူရေးထွက်ကုန်များ၊ စက်မှုကုန်ချောပစ္စည်းများနှင့် အခြားထွက်ကုန်များကို ရေကြောင်းဖြင့် ပို့ဆောင်ရာ၌ ဆိပ်ကမ်းအဝင်/ အထွက်တွင် ကုန်စည်မြန်ဆန်စွာ ပို့ဆောင်/တင်သွင်းနိုင်ခြင်းဖြင့် နိုင်ငံအတွက်စီးပွားရေးလည်ပတ်မှု ယန္တရားကို အထောက်အကူပြုလျက်ရှိရာ ရေကြောင်းပို့ဆောင်မှုတွင် အရေးပါသော ရန်ကုန်ဆိပ်ကမ်း၌ ဆိပ်ကမ်းငါးခုနှင့် သီလဝါဆိပ်ကမ်းရှိ ဆိပ်ကမ်းနှစ်ခုတို့တွင်ကုန်သင်္ဘောများဖြင့် ရေကြောင်းကုန်သွယ်လျက်ရှိကြောင်း သိရသည်။

MIP ဆိပ်ကမ်းအနေဖြင့် ပြည်တွင်းကြယ်ငါးပွင့်သင်္ဘောလိုင်း အပါအဝင် နိုင်ငံခြားသင်္ဘောလိုင်းခြောက်လိုင်းကို လက်ခံဆောင်ရွက်လျက် ဝန်ထမ်းတစ်ထောင်ကျော်ဖြင့် ဆိပ်ကမ်းကွန်တိန်နာလုပ်ငန်းများကို ၂၄ နာရီဝန်ဆောင်မှုပေးလျက်ရှိကြောင်း သိရသည်။

MIP မြန်မာ့စက်မှုဆိပ်ကမ်းတွင် Export cargo နှင့် Import cargo နှစ်ပိုင်းဆောင်ရွက်လျက်ရှိရာ Import cargo တွင်မြန်မာ့ဆိပ်ကမ်း အာဏာပိုင်မှ လိုအပ်သော အထောက်အထား စာရွက်စာတမ်းဖြင့် ဝင်ခွင့်ပြု၍ အကောက်ခွန်ဦးစီးဌာနမှ စစ်ဆေးပြီးနောက် ကုန်ပစ္စည်းတင်ပို့မှုကို ဆောင်ရွက်ခြင်းဖြစ်သည်။

Import ကဏ္ဍတွင် ကုန်သင်္ဘောမှချသော ကုန်ပစ္စည်းများကို ယာယီစုပုံထားပြီး Export cargo များ စာရွက်စာတမ်းဖြင့် အခွန်အခပေးဆောင်ပြီးနောက် ထုတ်ယူခွင့်ပြုလျက်ရှိပြီး၊ အဆိုပါ ဆိပ်ကမ်းတွင် ကွန်တိန်နာတစ်လုံး တစ်ရက်လျှင် အမေရိကန်ဒေါ်လာ ၂ ဒေါ်လာမှ ၄ ဒေါ်လာကောက်ခံ၍ ခုနစ်ရက်ထားသိုခွင့်ပြုကာ တစ်နှစ်ကျော် ထားရှိပါက လေလံပစ္စည်းအဖြစ် ဆိပ်ကမ်းအာဏာပိုင်မှ ခွင့်ပြုလျက်ရှိကြောင်း သိရသည်။

ယင်းအပြင် နှစ်ချီထိန်းသိမ်းထားသော ကွန်တိန်နာများလာပါက ပိုကုန်/သွင်းကုန်ပစ္စည်းများ ကုန်စည်စီးဆင်းမှုတွင် ဆိပ်ကမ်းအတွက် ထိခိုက်စေလျက်ရှိကာ နိုင်ငံတကာ ဆိပ်ကမ်းတို့တွင် မြန်ဆန်စွာ ကုန်ပစ္စည်းထုတ်ယူနိုင်ရန် ဆောင်ရွက်ထားရှိမှုဖြင့် ကုန်သေတ္တာစီးဆင်းမှု မြန်ဆန်လျက်ရှိရာ ရန်ကုန်ဆိပ်ကမ်း အတွင်း၌လည်း လေလံကွန်တိန်နာ ပစ္စည်းများ ရှင်းလင်းနိုင်ရန် မြန်မာ့ဆိပ်ကမ်းအာဏာပိုင်နှင့် အကောက်ခွန် ဦးစီးဌာနတိုမှ စီမံဆောင်ရွက်လျက်ရှိကြောင်း သိရသည်။

ရန်ကုန်ဆိပ်ကမ်း၌ ကုန်သေတ္တာတင်ဆိပ်ကမ်းငါးခုတွင် ပြည်ပပို့ကုန်နှင့် ပြည်တွင်းသွင်းကုန်အတွက် ကုန်သေတ္တာ စီးဆင်းမှု မြန်ဆန်ချောမွေ့စေရန် ဆောင်ရွက်လျက်ရှိကြောင်း၊ ၂၀၂၁ ခုနှစ်တွင် ဇန်နဝါရီလမှ ဒီဇင်ဘာလအထိ ပေ ၂၀ နှင့် ပေ ၄၀ ကုန်သေတ္တာ ၂၁၀၀၀၀ ကျော်နှင့် ပေTEU ၂၀ ကုန်သေတ္တာအလုံး ၃၀၇၀၀၀ ကျော်တို့ကို ကိုင်တွယ်လျက် ကုန်တင်သင်္ဘောအစင်း ၂၃၀ ဖြင့် ကုန်တင်/ကုန်ချလုပ်ငန်းများကို ဝန်ဆောင်မှုပေးနိုင်ခဲ့ကြောင်း သိရသည်။

ymg/sth
#Yangon_Media_Group

#LocalNews
Published_13 June 2022

ထိုင်း-မြန်မာနယ်စပ်၊ မဲဆောက်မြို့အထွက် ဟွေ့ယအုစစ်ဆေးရေးဂိတ်တွင် တရားမဝင်မြန်မာများ တင်လာသည့်ယာဉ်တစ်စီးကို ပစ်ခတ်ဖမ်းဆီးရာတွင် လေးဦးထက်မနည်း ဒဏ်ရာရခဲ့ကြောင်း သိရသည်။

ဇွန်လ ၁၀ ရက်၊ ည ၁၀ နာရီခန့်အချိန်က ထိုင်းရဲတပ်ဖွဲ့၏ တားဆီးစစ်ဆေးခြင်းကို မခံဘဲ မောင်းနှင်ထွက်ပြေးသွားခဲ့သောကြောင့် သေနတ်ဖြင့်ပစ်ခတ်ဖမ်းဆီးခဲ့စဉ်ယာဉ်မောင်းဖြစ်သူမှာ ခုန်ချထွက်ပြေးလွတ်မြောက်ခဲ့သော်လည်း ယာဉ်ပေါ်ပါ တရားမဝင်မြန်မာနိုင်ငံသား ၉ ဦးအနက် ၄ ဦးမှာ သေနတ်ထိမှန်ဒဏ်ရာရရှိခဲ့သောကြောင့် ယခုအခါ ဆေးကုသမှုခံယူနေရကာ ကျန် ၅ ဦးမှာ ထိုင်းနိုင်ငံ မဲဆောက်မြို ဖဝေါရဲစခန်း၌ ဖမ်းဆီးထိန်းသိမ်းခံထားရကြောင်းသိရသည်။

လက်ရှိတွင် ယာဉ်နံပါတ်ကို ခြေရာခံ၍ လူမှောင်ခိုပြုလုပ်နေသူများအား ဖမ်းဆီးနိုင်ရေးအတွက် စုံစမ်းစစ်ဆေးမှုများ ပြုလုပ်ခဲ့ရာ ထွက်ပြေးလွတ်မြောက်သွားသော ယာဉ်မောင်းဖြစ်သူအား ဖမ်းဆီးရမိရန် သဲလွန်စပြီ ဖြစ်ကြောင်း ဇွန်လ ၁၂ ရက်တွင် ထိုင်းအာဏာပိုင်များက မီဒီယာများကို ပြောကြားထားကြောင်းလည်း သိရသည်။

ymg/mt
#Yangon_Media_group

Published 13 June 2022

(Updated)

ငြိမ်းချမ်းရေးဆွေးနွေးပွဲသို့ ရောက်လာခြင်းမရှိသေးတဲ့ တိုင်းရင်းသားလက်နက်ကိုင်အဖွဲ့အစည်းတွေကို လာရောက်ဆွေးနွေးလိုတဲ့ ဆန္ဒရှိပါက ယခင်ဖိတ်ခေါ်ကမ်းလှမ်းချက်တွေအတိုင်း ထပ်မံဖိတ်ခေါ်နေတယ်လို့ နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်ကပြောပါတယ်။

 အဲသလိုဖိတ်ခေါ်ရာမှာ NCA  လက်မှတ်ရေးထိုးထားသည့် အဖွဲ့တွေနှင့် ရေးထိုးထားခြင်းမရှိတဲ့ အဖွဲ့တွေ အားလုံးပါဝင်တယ်လို့ ပြောပါတယ်။

 ဇွန်လ၁၃ရက် ယနေ့ မနက်ပိုင်းက နေပြည်တော်ရှိ ဘုရင့်နောင်ရိပ်သာတွင် ရခိုင်လွတ်မြောက်ရေးပါတီ ALP ဒုတိယ ဥက္ကဋ္ဌ ဒေါ်စောမြရာဇာလင်း ဦးဆောင်သည့် ငြိမ်းချမ်းရေးကိုယ်စားလှယ်အဖွဲ့နှင့် ငြိမ်းချမ်းရေးဆွေးနွေးရာမှာ ဗိုလ်ချူပ်မှူးကြီးက အဲသလိုပြောကြားခဲ့တာဖြစ်တယ်လို့ နစကရဲ့ သတင်းထုတ်ပြန်ချက်အရသိရှိရပါတယ်။

ယခုငြိမ်းချမ်းရေး ဆွေးနွေးပွဲတွင် တိုင်းပြည်၏ ပကတိအနေအထား နှင့် ကိုက်ညီပြီး ဖြစ်သင့်ဖြစ်ထိုက်သည်များ၊ တိုင်းရင်းသားလက်နက်ကိုင် အဖွဲ့ အစည်းများ၏ တောင်းဆိုချက်များ၊ အမှန်တကယ် ဖြစ်နိုင်ဖွယ်ရှိသည်များ စသည် တို့ကို အသေးစိတ်အကြေအလည်ဆွေးနွေး အဖြေရှာဆောင်ရွက်သွားမည့် အခြေအနေတွေကိုလည်း သူကရှင်းပြခဲ့တယ်လို့ သတင်းထုတ်ပြန်ပါတယ်။

အဲဒီအပြင်ဒီမိုကရေစီနှင့် ဖက်ဒရယ်ကို အခြေခံသည့် ပြည်ထောင်စုစနစ် တည်ဆောက်ရေးဆိုင်ရာကိစ္စရပ်များ၊ ပါတီစုံဒီမိုကရေစီစနစ်ကို လျှောက်လှမ်းရာတွင် နိုင်ငံရေးအရ သဘောထားကွဲလွဲမှုများရှိမည်ဖြစ်သော်လည်း ငြိမ်းချမ်းသည့် နည်းလမ်း ဖြင့်သာ ဖြေရှင်းဆောင်ရွက်ရန်လိုသည့် အခြေအနေတွေကို ရခိုင်လွတ်မြောက်ရေးပါတီကို နစက ဥက္ကဋ္ဌက ရှင်းပြခဲ့တယ်လို့လည်းသိရပါတယ်။

ရခိုင်ပြည်လွတ်မြောက်ရေးပါတီ ALP ဒုတိယဥက္ကဋ္ဌနှင့်အဖွဲ့ဝင်တွေကလည်း ငြိမ်းချမ်းရေးဆွေးနွေးနိုင်ရန် ဖိတ်ခေါ်ခဲ့သည်ကို ရခိုင် ပြည်လွတ်မြောက်ရေးပါတီ ALP အနေနှင့် ထောက်ခံကြိုဆိုပြီး ရခိုင် ပြည်နယ် တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေး တို့ကို ဆက်လက်ဆောင်ရွက်နိုင်မည့် အခြေအနေတွေ၊ပါတီစုံဒီမိုကရေစီ စနစ်ကျင့်သုံးရေး၊ ဒီမိုကရေစီနှင့် ဖက်ဒရယ်ကို အခြေခံသည့် ပြည်ထောင်စုစနစ် တည်ဆောက်ရေးနှင့် ပတ်သက်၍ သဘောထား တူညီချက်အမြင်များကို ပြန်လည်ဆွေးနွေးခဲ့ပြီး  ဒေသဖွံ့ဖြိုးတိုးတက်ရေးဆိုင်ရာကိစ္စတွေကို တင်ပြခဲ့တယ်လို့လည်း သတင်းမှာဖော်ပြထားပါတယ်။

ယနေ့ငြိမ်းချမ်းရေးတွေ့ဆုံဆွေးနွေးပွဲသို့ နစကဥက္ကဋ္ဌနှင့်အတူ ကောင်စီအဖွဲ့ဝင်များဖြစ်ကြသည့် ဗိုလ်ချုပ်ကြီး မြထွန်းဦး၊ ဒုတိယဗိုလ်ချုပ်ကြီး မိုးမြင့်ထွန်း၊ ဒုတိယဗိုလ်ချုပ်ကြီး ရာပြည့် တို့ တက်ရောက်ကြပြီး ရခိုင်ပြည်လွတ်မြောက်ရေးပါတီ ALP ဒုတိယဥက္ကဋ္ဌနှင့်အတူ ဗဟိုအလုပ်အမှုဆောင်ကော်မတီဝင်များဖြစ်ကြသည့် ခိုင်စိုးမြ နှင့် ခိုင်ပေါ်လင်း တို့ တက်ရောက်ကြတယ်လို့ သိရှိရပါတယ်။

တစ်နိုင်ငံလုံး ထာဝရငြိမ်းချမ်းရေးရရှိရန်နှင့် လက်နက်ကိုင်ပဋိပက္ခချုပ်ငြိမ်းရေးအတွက်ဧပြီ ၂၂ ရက်တွင် ဗိုလ်ချုပ်မှူးကြီး မင်းအောင်လှိုင်က တိုင်းရင်းသားလက်နက်ကိုင်အဖွဲ့အစည်းတွေနှင့် တွေ့ဆုံဆွေးနွေးဖို့ ဖိတ်ခေါ်ခဲ့ပြီးနောက် မေလ(၂၀)ရက်မှစတင်ပြီး တိုင်းရင်းသားလက်နက်ကိုင်အဖွဲ့အစည်းတွေနှင့် တွေ့ဆုံဆွေးနွေးမှုတွေ ဆက်တိုက်ပြုလုပ်ခဲ့တာဖြစ်ပါတယ်။

#DailyNews
Published - 13 June 2022

၁။ ပြည်တွင်းခရီးသွားရပ်နားနေချိန် ပြည်ပခရီးသွားဧည့်သည် ဝင်ရောက်မှုများပြားလာ

၂။ FAO ၏ ပရော်ဂျက်မရလိုက်၍ ဆေးခါးကြီးပင်ကို တစ်ပိုင်တစ်နိုင်သာစိုက်ပျိုးနိုင်တော့မည်ဟုဆို

၃။ နေ့စဉ်မိုးလေဝသသတင်း။

၄။ မက္ကဆီကိုရှိ ကမ္ဘာ့အကြီးမားဆုံးနွားရိုင်းသတ်ကွင်းကြီးမှ ပြိုင်ပွဲများအား ရက်အကန့်အသတ်မရှိဆိုင်းငံ့... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group