#Local_News
Published_ 15 June 2022

ငြိမ်းချမ်းရေး ဆွေးနွေးပွဲသို့ ရောက်ရှိလာခြင်းမရှိသေးသည့် NCA လက်မှတ်ရေးထိုးပြီး တိုင်းရင်းသားလက်နက်ကိုင်အဖွဲ့များ၊ ရေးထိုးရခြင်းမရှိသေးသည့် တိုင်းရင်းသား လက်နက်ကိုင်အဖွဲ့များအနေဖြင့် ငြိမ်းချမ်းရေးဆွေးနွေးမှုများ ပြုလုပ်နိုင်ရန် နစကမှ ဇွန် ၃၀ ရက်အထိ ရက်ထပ်တိုးကာ ထပ်မံဖိတ်ခေါ်ထားပါတယ်။

တက်ရောက်ဆွေးနွေးမယ့် တိုင်းရင်းသားလက်နက်ကိုင်အဖွဲ့ အသီးသီးမှ ဥက္ကဋ္ဌ သို့မဟုတ် ကိုယ်စားအဆုံးအဖြတ်ပေးနိုင်မည့် ခေါင်းဆောင်နှင့် အဖွဲ့ဝင် ၂ ဦး၏ အမည်စာရင်းကို ၂၀၂၂ ခုနှစ်၊ ဇွန် ၃၀ ရက် နောက်ဆုံးထား၍ ပြန်ကြားပေးစေလိုကြောင်း ဖော်ပြထားပါတယ်။

ထို့ပြင် ပြည်ထောင်စုစိတ်ဓာတ်ကိုအခြေခံပြီး ငြိမ်းချမ်းသည့် ပြည်ထောင်စု နိုင်ငံတော်ကြီးကို တည်ဆောက်နိုင်ရန်အတွက် ပြည်ထောင်စုသားအားလုံး၏ အကျိုးကို ရှေးရှု၍ ပူးပေါင်းဆောင်ရွက်ပေးကြဖို့ နစက က တိုက်တွန်းနှိုးဆော်ထားတာပါ။

နစကဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ကလည်း ဧပြီ ၂၂ ရက်တွင် ငြိမ်းချမ်းရေးမိန့်ခွန်းတစ်ရပ်ပြောကြား၍ တိုင်းရင်းသား လက်နက်ကိုင်အဖွဲ့ ဥက္ကဋ္ဌခေါင်းဆောင်ဦးစီးအဖွဲ့ဝင် ၂ ဦးဖြင့် ငြိမ်းချမ်းရေးအတွက် ရိုးသားပွင့်လင်းစွာဆွေးနွေးနိုင်ရေး ဖိတ်ခေါ်ကမ်းလှမ်းခဲ့ပါတယ်။

အဆိုပါ ငြိမ်းချမ်းရေးဖိတ်ခေါ်ကမ်းလှမ်းမှုအရ NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့ ၇ ဖွဲ့နှင့် လက်မှတ်ရေးထိုးရခြင်းမရှိသေးသည့် တိုင်းရင်းသားလက်နက်ကိုင်အဖွဲ့ ၃ ဖွဲ့တို့က ပြည်ထောင်စုအကျိုး၊ ဒေသအကျိုးကို ဆောင်ရွက်လိုသည့် စိတ်ဆန္ဒများဖြင့် လာရောက်ဆွေးနွေးမည်ဖြစ်ကြောင်း အကြောင်းပြန်ခဲ့ကြပါတယ်။

ငြိမ်းချမ်းရေးလာရောက်ဆွေးနွေးမည့် အဖွဲ့ ၁၀ ဖွဲ့အနက် အဖွဲ့ ၆ ဖွဲ့မှ ငြိမ်းချမ်းရေးကိုယ်စားလှယ်များသည် နစကဥက္ကဋ္ဌ တပ်မတော်ကာကွယ်ရေးဦးစီးချုပ်နှင့် ကိုယ်တိုင်ကိုယ်ကျတွေ့ဆုံ၍ ငြိမ်းချမ်းရေးဆိုင်ရာကိစ္စရပ်များ၊ ပြည်သူလူထုဆန္ဒနှင့် ကိုက်ညီသည့် ပါတီစုံဒီမိုကရေစီစနစ် ကျင့်သုံးဆောင်ရွက်ရေးဆိုင်ရာကိစ္စရပ်များ၊ ဒီမိုကရေစီနှင့်ဖက်ဒရယ်စနစ်တို့ကို အခြေခံသည့် ပြည်ထောင်စုတည်ဆောက်ရေးဆိုင်ရာ ကိစ္စရပ်များ၊ ဒေသခံများ၏ လူမှုစီးပွားဘဝမြှင့်တင်ရေးနှင့် ဒေသတစ်ခုချင်းမှအစပြု၍ တိုင်းရင်းသားပြည်သူလူထုတစ်ရပ်လုံး စုပေါင်းနေထိုင်လျက်ရှိသည့် အမိပြည်ထောင်စု နိုင်ငံတော်ကြီး ဖွံ့ဖြိုးတိုးတက်ရေးဆိုင်ရာ ကိစ္စရပ်များကို ရိုးသားပွင့်လင်းစွာ အမြင်ချင်း ဖလှယ်ဆွေးနွေးနိုင်ခဲ့ပြီး ငြိမ်းချမ်းရေးအတွက် အပြုသဘောဆောင်သည့်၊ ကောင်းမွန်သည့် တွေ့ဆုံဆွေးနွေးမှုရလာဒ်များကို ဖော်ဆောင်နိုင်ခဲ့တယ်လို့ ဆိုပါတယ်။

ငြိမ်းချမ်းရေးဆွေးနွေးပွဲများတွင် တိုင်းပြည်၏ ပကတိအနေအထားနှင့် ကိုက်ညီပြီး ဖြစ်သင့်ဖြစ်ထိုက်သည်များ၊ တိုင်းရင်းသားလက်နက်ကိုင် အဖွဲ့အစည်းများ၏ တောင်းဆိုချက်များ၊ အမှန်တကယ် ဖြစ်နိုင်ဖွယ်ရှိသည်များ စသည်တို့ကို အသေးစိတ် အကြေအလည် ဆွေးနွေးအဖြေရှာဆောင်ရွက်သွားမှာဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

ymg-mnn
#Yangon_Media_Group

Published 14 June 2022

မြန်မာနိုင်ငံသည် စိုက်ပျိုးရေး အခြေခံသည့် နိုင်ငံဖြစ်သော်လည်း စိုက်ပျိုးရေးတက္ကသိုလ်တစ်ခုသာရှိတဲ့အတွက် စိုက်ပျိုးရေး ပညာရှင်များစွာ မွေးထုတ်ဖို့လိုအပ်နေသေးတယ်လို့ နစက ဥက္ကဋ္ဌက ပြောတယ်လို့ နစကရဲ့သတင်းထုတ်ပြန်ချက် အရသိရပါတယ်။

ယနေ့ ဇွန်လ(၁၄)ရက်က နေပြည်တော်ရှိ စိုက်ပျိုးရေးသုတေသနဦးစီးဌာနမှာ စိုက်ပျိုးရေး မွေးမြူရေးနှင့် ဆည်မြောင်းဝန်ကြီးဌာနက တာဝန်ရှိသူတွေနှင့် စိုက်ပျိုးရေးကဏ္ဍတိုးတက်ရေးဆွေးနွေးရာမှာ ဗိုလ်ချူပ်မှူးကြီး မင်းအောင်လှိုင်က ယခုလိုပြောကြားခဲ့တာဖြစ်ပါတယ်။

အဲဒီအတွက် စိုက်ပျိုးရေးနှင့်မွေးမြူရေးပညာရှင်တွေမွေးထုတ်ပေးနိုင်ဖို့  စိုက်ပျိုးရေးနှင့်မွေးမြူရေးသိပ္ပံကျောင်းတွေနှင့် ကောလိပ်နှင့်တက္ကသိုလ်တွေ တိုးချဲ့ဖွင့်လှစ်နိုင်ဖို့ စီစဉ်ဆောင်ရွက်နေတာဖြစ်ပြီး အိမ်နီးချင်းနိုင်ငံတွေမှာ စိုက်ပျိုးရေးနှင့်မွေးမြူရေး တက္ကသိုလ်နှင့်ကောလိပ်တွေဟာ မြန်မာနိုင်ငံထက်များနေတယ်လို့လည်း သူက နှိုင်းယှဉ်ပြောသွား ပါတယ်။

ခရိုင်တွေတိုးချဲ့ဖွဲ့စည်းလိုက်တဲ့အတွက် ခရိုင်အလိုက် နည်းပညာဆိုင်ရာ သင်တန်းကျောင်းများ ထပ်မံတိုးချဲ့ဖွင့်လှစ်နိုင်ရေး ဆောင်ရွက်သွားမယ်။ထူးချွန်သူတွေဟာ အဆင့်မြင့်ပညာတွေ ဆက်လက်သင်ယူနိုင်မယ်လို့လည်း ဗိုလ်ချူပ်မှူးကြီးကပြော ပါတယ်။

သုတေသနလုပ်ငန်းသည် နိုင်ငံအတွက် အရေးကြီးသည့် လုပ်ငန်းစဉ် ဖြစ်ပြီး စိုက်ပျိုးရေးသုတေသနလုပ်ငန်းဟာ နိုင်ငံအတွက်  အဓိကလိုအပ်ချက်အဖြစ်ပြနေတယ်လို့လည်း သူကထောက်ပြသွားပါတယ်။

စိုက်ပျိုးရေးသုတေသနဌာနဟာ ၁၉၅၄ခုနှစ်ကတည်းက ရန်ကုန်မြို့ ကြို့ကုန်းတွင် လယ်ယာစိုက်ပျိုးခြင်း သုတေသနဗိမာန် အမည်ဖြင့်စတင်တည်ထောင်ခဲ့တာဖြစ်ပြီး လက်ရှိတွင် အပင်မျိုးစုံ မျိုးဗီဇ စုစုပေါင်း ၁၂၈၃၈ မျိုးကို ထိန်းသိမ်းထားရှိပြီး ယနေ့အထိ သီးနှံဗီဇအရင်းအမြစ် စုစုပေါင်း ၂၄၇၇၇ ကို ပြည်တွင်း ပြည်ပအဖွဲ့အစည်းတွေထံ ဖြန့်ဝေပေးနိုင်ခဲ့တယ်လို့ သိရပါတယ်။

#LocalNews
Published _ 14 June 2022

၂၀၂၁-၂၀၂၂ ပညာသင်နှစ်အတွက် တက္ကသိုလ်ဝင်စာမေးပွဲ အောင်စာရင်းတွေ ထုတ်ပြန်မယ့်ရက်ကို အတိအကျ မသိရှိရသေးဘူးလို့ အခြေခံပညာဦးစီးဌာနက သိရပါတယ်။

#Yangon_Media_Group

Published 14 June 2022

လျှပ်စစ်ဓာတ်အားခတွေ ဇူလိုင်(၁)ရက်ကစပြီး တိုးမြှင့်ကောက်ခံတော့မယ်လို့ လူမှုကွန်ယက်ပေါ်မှာ ဖော်ပြနေတာတွေဟာ ယခင် ၂၀၁၉ခုနှစ်က သတင်းကိုပြန်လည်ကူးယူဖော်ပြနေခြင်းသာဖြစ်ပြီး ဓာတ်အားခနှုန်းတွေ ပြောင်းလဲမှာ မဟုတ်ဘူးလို့ ရန်ကုန်လျှပ်စစ်ဓာတ်အားပေးရေးကော်ပိုရေးရှင်းက ယင်းရဲ တရားဝင် ဖေ့စ်ဘုတ်ခ်စာမျက်နှာကနေ ပြန်လည်ရှင်းလင်း ထားပါတယ်။

ရှင်းလင်းချက်အပြည့်အစုံကို ပြန်လည်ကူးယူဖော်ပြပေးပါတယ်။

ဓာတ်အားသုံးစွဲသူများသို့ အသိပေးပန်ကြားချက်

၁။ လျှပ်စစ်စွမ်းအားဝန်ကြီးဌာနမှ ၂၀၁၉ခုနှစ် ဇူလိုင် ၁ ရက်နေ့ ယခင် (၃) နှစ် ကတည်းကမှစ၍ ဓာတ်အားခ နှုန်းထားများကို ပြင်ဆင်သတ်မှတ်ခဲ့ပြီး ယနေ့အချိန်ထိ အဆိုပါနှုန်းထားများအတိုင်း ကောက်ခံလျက်ရှိပါကြောင်းနှင့် လူမှုကွန်ယက်တွင် ဖြန့်ဝေနေသည့် ဓာတ်အားခနှုန်းထား တိုးမြှင့်မည့် သတင်းမှာ ယခင် ၂၀၁၉ ခုနှစ်က သတင်းအား ပြန်လည်ကူးယူဖော်ပြထားခြင်းဖြစ်ပါကြောင်း ရှင်းလင်းအသိပေးအပ် ပါသည်။

၂။ ယခုကောက်ခံလျက်ရှိသည့် ဓာတ်အားခနှုန်းထားများမှာ အောက်ပါအတိုင်း ဖြစ်ပြီး နှုန်းထားပြောင်းလဲမှုမရှိပါကြောင်း အသိပေးကြေညာအပ်ပါသည်။

#LocalNews
Published - 14 June 2022

International school တွေနဲ့ ပုဂ္ဂလိကကိုယ်ပိုင်ကျောင်းတွေမှာ ဆရာ၊ ဆရာမလိုအပ်ချက်တွေရှိနေတယ်လို့ မြန်မာနိုင်ငံကိုယ်ပိုင်ကျောင်းများအသင်းဥက္ကဌ ဦးနေအုပ်က ပြောပါတယ်၊၊

#Yangon_Media_Group

#LocalNews
Published - 14 June 2022

မိုးရာသီကာလ မိုးသည်းထန်ခြင်း၊ ရေကြီးခြင်းများကြောင့် ငါးပုစွန်မွေးမြူရေးကန်များ ရေနစ်မြုပ်ဆုံးရှုံးမှုမရှိရအောင် မွေးမြူရေးကန်ပေါင်များ မြှင့်တင်ခြင်းအပါအဝင် ကြိုတင်ဆောင်ရွက်သင့်သောအချက်များကို ဆောင်ရွက်ထားရန် ငါးလုပ်ငန်းဦးစီးဌာနက သတိပေးချက်ထုတ်ပြန်လိုက်သည်၊၊

ငါးပုစွန်လုပ်ငန်းများဆုံးရှုံးမှု မဖြစ်ရအောင်ကြိုတင်ဆောင်ရွက်သင့်သည်များကို ဆောင်ရွက်ထားကြရမည်ဖြစ်ပြီး အကယ်၍ ငါးပုစွန်မွေးမြူရေးကန်များ ရေကြီးနစ်မြုပ်မှုများကြုံတွေ့ရပါက နီးစပ်ရာ ငါးလုပ်ငန်းဦးစီးဌာနကို ဆက်သွယ်အကူအညီတောင်းခံနိုင်ကြောင်းသိရသည်၊၊

ငါးပုစွန်မွေးမြူရေးကန်များ မဆုံးရှုံးအောင် ကန်ပေါင်များ ခိုင်ခံ့အောင်ဆောင်ရွက်ခြင်း၊ ငါးများမလွတ်အောင်ဇာပြာပိုက်ဖြင့် ကာရံထားခြင်း၊ ငါးကန်များကို ရေတိုက်စားမှုမရှိအောင် ကာရံထားခြင်း၊ လိုအပ်ပါက ငါးများရွေ့ပြောင်းနိုင်အောင် ငါးဖမ်းပိုက်၊ စက်လှေနှင့် စက်ပစ္စည်းများကြိုတင်ပြင်ဆင်ထားခြင်းများ ဆောင်ရွက်ထားကြရမည်ဖြစ်သည်၊၊

ငါးစာနှင့်လုပ်ငန်းသုံးပစ္စည်းများကို ရေလွတ်သောနေရာကို ကြိုတင်ရွေ့ပြောင်းထားခြင်း၊မွေးမြူရေးကန် ရေထွက်ရေလျှံပေါက်များ အစဥ်ဂရုစိုက်စစ်ဆေးရန်၊ မိုးဇလသတင်းများသတိထားနားထောင်ပြီး ငါးမွေးသူအချင်းချင်း သတင်းဖလှယ်ခြင်းများ ဆောင်ရွက်ကြရမည်ဖြစ်ကြောင်းထုတ်ပြန်ချက်တွင် ပါရှိသည်၊၊

ymg/tthl
#Yangon_Media_Group