#Local_News
Published_ 19 May 2023

ဆိုင်ကလုန်းမုန်တိုင်း မိုခါ သဘာဝဘေးအန္တရာယ်သင့်ခဲ့သည့် ဒေသများရှိ ပြည်​ပြည်သူများအတွက် ဂျပန်နိုင်ငံရောက် မြန်မာနိုင်ငံသားများနှင့် စေတနာရှင်များက စုပေါင်းလှူဒါန်းငွေ ယန်း ၂၁၃၈၅၀၀(ယန်း ၂သန်း ၁သိန်း ၃သောင်း ၈ထောင့်ငါးရာ)ကို နိုင်ငံခြားရေးဝန်ကြီးဌာနမှတစ်ဆင့်ပေးပို့လှူဒါန်းသွားမည်ဖြစ်ကြောင်း တိုကျိုမြို့ မြန်မာသံရုံးက သိရသည်။

အလွန့်အလွန်အားကောင်းသော ဆိုင်ကလုန်းမုန်တိုင်း မိုခါ (Mocha) သည် မြန်မာနိုင်ငံ အတွင်းသို့ ရခိုင်ပြည်နယ်၊ စစ်တွေမြို့အနီးမှ ဖြတ်ကျော်ဝင်ရောက်ခဲ့သဖြင့် ထိခိုက်ပျက်စီး ဆုံးရှုံးမှုများ ဖြစ်ပေါ်ခဲ့ကာ ရခိုင်ပြည်နယ်အတွင်းရှိ မြို့နယ် ၁၇ မြို့နယ်၊ ချင်းပြည်နယ်အတွင်းရှိ မြို့နယ် ၄ မြို့နယ်ကို သဘာဝဘေးအန္တရာယ် ကျရောက်သော ဒေသများအဖြစ် သတ်မှတ် ကြေညာထားသည်။

အဆိုပါသဘာဝဘေးအန္တရာယ်သင့်ခဲ့ရသည့် ဒေသများရှိ ပြည်သူများအတွက် ကူညီ ကယ်ဆယ်ရေးနှင့် ပြန်လည်ထူထောင်ရေးလုပ်ငန်းများ ဆောင်ရွက်နိုင်ရန်အတွက် မြန်မာသံရုံး၊ တိုကျိုမြို့ရှိ သံအမတ်ကြီးနှင့် သံရုံးဝန်ထမ်းများ၊ နာဂိုယာမြို့နှင့် ကိုဘေးမြို့များရှိ မြန်မာ ဂုဏ်ထူးဆောင်ကောင်စစ်ဝန်များ၊ ဂျပန်စီးပွားရေးကုမ္ပဏီများ၊ ဂျပန်နိုင်ငံရောက် မြန်မာ နိုင်ငံသား စေတနာရှင်များ၊ ဂျပန်နိုင်ငံသားစေတနာရှင်များ၊ ဂျပန်နိုင်ငံရှိတက္ကသိုလ်အသီးသီး တွင် ပညာသင်ကြားနေကြသော အစိုးရပညာတော်သင်များမှ စုပေါင်းလှူဒါန်းငွေ ယန်း ၂,၁၃၈,၅၀၀ (ယန်း နှစ်သန်းတစ်သိန်း သုံးသောင်းရှစ်ထောင့်ငါးရာ) အား အမျိုးသားသဘာဝ ဘေးအန္တရာယ်ဆိုင်ရာ စီမံခန့်ခွဲမှုကော်မတီသို့ နိုင်ငံခြားရေးဝန်ကြီးဌာနမှတစ်ဆင့် ပေးပို့ လှူဒါန်းသွားမည် ဖြစ်ကြောင်း သံရုံးထုတ်ပြန်ချက်တွင်ပါရှိသည်။
 
ယင်းအ​ပြင်စေတနာရှင်များ၏ ထပ်မံထည့်ဝင်လှူဒါန်းငွေများ ရရှိလာပါကလည်း ဆက်လက်ပေးပို့ လှူဒါန်းသွားမည် ဖြစ်ကြောင်းလည်း ပါရှိသည်။
#ymg/pl
#Yangon-Media-Group

#Local_News
Published_ 19 May 2023

ရခိုင်ပြည်နယ်ရှိ မိုခါမုန်တိုင်းဒဏ်သင့်ဒေသများရှိ ပြည်သူများ အဆင်ပြေစေရန်ရည်ရွယ်ပြီး ကမ္ဘောဇဘဏ်မှ မေ ၁၇ ရက် မှ ဇွန် ၃၀ ရက်အတွင်း ငွေလွှဲခဝန်ဆောင်မှု အခမဲ့အစီအစဉ် ရယူနိုင်ကြောင်း ထုတ်ပြန်ကြေညာထားပါသည်။

Customer များအနေဖြင့် မေ ၁၇ ရက်မှ ဇွန် ၃၀ ရက်အတွင်း ရခိုင်ပြည်နယ်ရှိ ကမ္ဘောဇဘဏ်ခွဲများတွင် ဖွင့်လှစ်ထားသည့် ဘဏ်စာရင်းတစ်ခုသို့/မှဖြစ်စေ၊ ဘဏ်စာရင်းဖွင့်လှစ်ထားသော အခြား ဘဏ်ခွဲထံသို့ဖြစ်စေ/ မှဖြစ်စေ Cash Deposit - ငွေသွင်းခြင်း၊ Cash Withdrawal - ငွေထုတ်ခြင်း၊ Inhouse Cheque Deposit (Debit Account  အနေဖြင့်ဖြစ်စေ၊ Credit Account အနေဖြင့်ဖြစ်စေ ချက်လက် မှတ်ဖြင့် ငွေသွင်း/ငွေထုတ်ခြင်း)၊ Account to Account Transfer (Debit Account အနေဖြင့်ဖြစ်စေ၊ Credit Account အနေဖြင့်ဖြစ်စေ account အချင်းချင်းငွေလွှဲခြင်း)စသည့် transaction များကို ပြုလုပ်သည့်အခါ ဝန်ဆောင်ခ ကင်းလွတ်ခွင့်ရရှိမည် ဖြစ်ကြောင်း သိရသည်။

ယင်းအပြင် ဆိုင်ကလုန်းမုန်တိုင်းမိုခါကြောင့် မုန်တိုင်းဒဏ်ခံစားခဲ့ရသော ပြည်သူများအတွက် စုပေါင်းပါဝင်ကူညီနိုင်ရန် KBZPay Marketနှင့်မြန်မာနိုင်ငံ ကြ က်ခြေနီအသင်း (MRCS)တို့ပူးပေါင်း၍အရေးပေါ်လိုအပ်မည့်အစားအ သောက်၊ ဆေးဝါးနှင့်အသုံးအဆောင် ပစ္စည်းများကို KBZ Marketနှင့် KBZ Payကနေ အလှူခံအစီအစဥ်များပြုလုပ်ထားပြီး အလှူ ပစ္စည်းများနှင့်ဆေးဝါးများကို လိုအပ်သည့်နေရာများသိူ့အရောက်ပို့ဆောင်သွားမည်ဖြစ်ကြောင်းလည်း အသိပေးထားသည်။

#ymg/pl
#YMG #Yangon_Media_Group

#Local_News
Published_19 May2023

မကွေးမြို့၊ ကွန်ပျူတာ တက္ကသိုလ််အရှေ့ဘက်အနီးတွင် အမျိုးသား၁ဦး ကားကြိတ်ခံရကြောင်းယူဆရသူတစ်ဦး ဝမ်းဗိုက်အတွင်းမှ အူများထွက်ကာ သေဆုံးနေကြောင်း ရောင်စုံ မေတ္တာလူမှုကူညီရေးအသင်းကသိရသည်။

မေလ၁၉ရက် နံနက် ၄နာရီ ၄၉မိနစ်က မကွေးမြို့၊ တောင်တွင်းလမ်း ၊ ကွန်ပျူတာ တက္ကသိုလ််အရှေ့ဘက်နားတွင် အမျိုးသားတစ်ဦး ဗိုက်က အူတွေထွက်ပြီးသေဆုံးနေကြောင်းဖုန်းဆက်အကြောင်းကြားလာခဲ့ကြောင်း သိရသည်။

"ရောက်သွားတော့ လူက အူတွေထွက်ပြီးသေနေပြီ။ ကားကြိတ်ခံရတယ်လို့ ယူဆရတယ်"ဟု ယင်းအသင်းကသိရသည်။

ယင်းသေဆုံးသူ အမျိုးသားတစ်ဦးအား လိုအပ်သောဆေးစစ်ချက် များရယူနိုင်ရန်မကွေးတိုင်းပြည်သူ့ဆေးရုံကြီးရင်ခွဲရုံသို့ကူညီပို့ဆောင်ပေးခဲ့ကြောင်းသိရသည်။

သေဆုံးသူအားသိရှိပါက ဆက်သွယ်ပေးကြရန်လည်း မြန်မာနိုင်ငံလူမှုကယ်ဆယ်ရေးအဖွဲ့ရောင်စုံ မေတ္တာ လူမှုကူညီရေးအသင်းက အသိပေးထားသည်။

#ymg/pl
#YMG #Yangon_Media_Group

#Local_News
Published_ 19 May 2023

၂၀၂၃-၂၀၂၄ ဘဏ္ဍာရေးနှစ်တွင် ပညာရေးဝန်ကြီးဌာန အပါအဝင် ပညာရေးနှင့်ဆက်စပ်နေသည့် ဝန်ကြီးဌာနများအတွက် ပညာရေးအသုံးစရိတ် စုစု ပေါင်း ၃၁၄၆ ဒသမ ၁၄၉ ဘီလီယံကို ခွင့်ပြုထားကြောင်း မေလ ၁၈ ရက် က နေပြည်တော်ရှိ မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန-၂ ၌ ကျင်းပခဲ့သော မြန်မာနိုင်ငံလုံးဆိုင်ရာပညာရေးညီလာခံ(၂၀၂၃) ဖွင့်ပွဲအခမ်းအနားအတွင်း နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် က ပြောကြားခဲ့သည်။

အဆိုပါခွင့်ပြုပေးထားသည့် ပညာရေးအသုံးစရိတ်သည် ပြည်ထောင်စုအသုံးစရိတ်၏ ၉ ဒသမ ၄၈ ရာခိုင်နှုန်းနှင့် ဂျီဒီပီ၏ ၂ ဒသမ ၁၈ ရာခိုင်နှုန်းရှိကြောင်း၊ နစက တာဝန်ယူခဲ့သည့် ၂ နှစ်တာကာ လအတွင်း ၂၀၂၁ ခုနှစ်၊ အောက်တိုဘာလကစတင်ပြီး သင်ကြားရေးဆရာ ဆရာမများအား ပညာအရည်အချင်းအလိုက် ချီးမြှင့်ငွေများပေးအပ်ခဲ့ရာတွင် ပါရဂူဘွဲ့အတွက် သုံး သောင်းကျပ်နှုန်း၊ မဟာဘွဲ့အတွက် နှစ်သောင်းငါးထောင်ကျပ်နှုန်းဖြင့် ဘွဲ့လွန် ဒီပလိုမာအတွက် တစ်သောင်းကျပ်နှုန်းဖြင့် လစဉ်ချီးမြှင့်ပေးအပ်လျက်ရှိကြောင်းလည်း ၎င်းကပြောသည်။

၂၀၂၂ ခုနှစ်၊ ဧပြီလ ၁ ရက်က စတင်၍ အုပ်ချုပ်မှုစရိတ်အဖြစ် တက္ကသိုလ် ပါမောက္ခချုပ်၊ ပညာရေးဒီဂရီကောလိပ်ကျောင်းအုပ်ကြီးများနှင့် မူလတန်း၊ အလယ် တန်း၊ အထက်တန်းကျောင်းအုပ်ကြီးများအား ကနဦးလစာ၏ ၁၀ ရာခိုင်နှုန်းကို လစဉ်ထပ်ဆောင်း ချီးမြှင့်ပေးအပ်လျက် ရှိကြောင်း၊ ၂၀၂၁ ခုနှစ်၊ အောက်တိုဘာလမှ စတင်ပြီး တိုင်းရင်းသား နေ့စားလပေး သင်ကြားရေးအထောက်အကူပြု ဆရာ (Teaching Assistant) များအား မူလက တစ်လလျှင် ကိုးသောင်းခြောက်ထောင်ကျပ်မှ တစ်သိန်း သုံးသောင်းကျပ်ကိုလည်းကောင်း၊ တိုင်းရင်းသားဘာသာစကားသင် ဆရာ (Language Teacher)များအား ပုတ်ပြတ်တစ်လလျှင် သုံးသောင်းကျပ်နှုန်းမှ ခြောက် သောင်းကျပ်ကိုလည်းကောင်း တိုးမြှင့်ပြီးလစဉ်ချီးမြှင့်ပေးအပ်လျက်ရှိကြောင်းလည်း ယင်းကဆိုသည်။

၂၀၂၂ ခုနှစ်၊ ဩဂုတ်လကစတင်၍ အိမ်ငှားစရိတ်အဖြစ် လူပျို၊ အပျိုများအတွက် မူရင်းလစာ၏ ၄ ရာခိုင်နှုန်းနှင့် အိမ်ထောင်သည်များအတွက် မူရင်းလစာ၏ ၈ ရာခိုင် နှုန်း၊၂၀၂၂ - ၂၀၂၃ ဘဏ္ဍာရေးနှစ်မှစတင်ပြီး ဝတ်စုံစရိတ်အဖြစ် ဘဏ္ဍာရေးနှစ်တစ်နှစ်အတွက် တစ်ဦးလျှင်သုံးသောင်းကျပ် ထောက်ပံ့ လျက်ရှိကြောင်းလည်း သိရသည်။

ထို့ပြင် ထိရောက်သည့် သင်ကြားသင်ယူမှုမြှင့်တင်နိုင်ဖို့အတွက် ဆရာကျောင်း သားအချိုးမျှတရန်လိုအပ်သည်နှင့်အညီ ပညာရေးဝန်ကြီးဌာနတွင် ဆရာဆရာမ အသစ်များကိုခန့်ထားပေးခဲ့ရာ မူလတန်းပြ၊ အလယ်တန်းပြ၊ အထက်တန်းပြ ဆရာ ဆရာမပေါင်း ၁၃၉၀၃ ဦး၊ တက္ကသိုလ်နည်းပြ၊ သရုပ်ပြ ၅၈၉၉ ဦးနှင့် ပညာရေးဒီဂရီ ကောလိပ် နည်းပြ၊ သရုပ်ပြ ၃၃၃ ဦး၊၊ အခြားဝန်ကြီးဌာန များက ကျောင်းအသီးသီးတွင်လည်း ဆရာ၊ ဆရာမ ၇၅၃၇ ဦး ခန့်အပ်ခဲ့ကြောင်း၊ယခင်က ပညာရေးတက္ကသိုလ် နှစ်ခုမှာသာဖွင့်လှစ်ခဲ့သည့် ဘီအီးဒီ (စာပေးစာယူ) ဘွဲ့သင်တန်းကို ပညာရေးဒီဂရီကောလိပ် ၂၅ ကျောင်းတွင် တစ်နှစ်လျှင် နှစ်သုတ်နှုန်း ဖြင့် တိုးချဲ့ဖွင့်လှစ်ပေးလျက်ရှိကြောင်းလည်း နစက ဥက္ကဌက ပြောသည်။

အရည်အသွေးရှိသည့် ပညာရေးကို သင်ကြားနိုင်ခွင့်ရရှိရန်နှင့် သင်ကြား သင်ယူမှုဝန်းကျင်ကောင်းများ ဖန်တီးပေးနိုင်ရန်အတွက် အခြေခံပညာကဏ္ဍတွင် စာသင်ဆောင်အသစ် ၅၈၃၅ ဆောင်၊ စာကြည့်တိုက် ၁၂၅ ဆောင်၊ အဆင့်မြင့် ပညာကဏ္ဍ တက္ကသိုလ်များမှာ စာသင်ဆောင်အသစ် ၂၁ ဆောင်၊ ကျောင်းသား၊ ကျောင်းသူ အိပ်ဆောင် ၂၂ ဆောင်၊ ဆရာ ဆရာမအဆောင် ၃ ဆောင်၊ ဘွဲ့နှင်းသဘင်ခန်းမ ၃ ခု၊ သုတေသနစင်တာ ၅ ခု၊ စာကြည့်တိုက် ၃ ခု၊ အားကစားရုံ ၁ ရုံနဲ့ ပညာရေးဒီဂရီကောလိပ်များမှာ စာသင်ဆောင်အသစ် ၂၃ ဆောင်၊ ကျောင်းသား၊ ကျောင်းသူ အိပ်ဆောင် ၄၀ ၊ ဝန်ထမ်းအိမ်ရာ ၂၇ ခု၊ စာကြည့်တိုက် ၁ ခု၊ အားကစားရုံ ၂ ရုံတို့ဆောက်လုပ်ပေးခဲ့သည့်အပြင် တက္ကသိုလ်၊ ဒီဂရီကောလိပ်နှင့် ကျောင်းတိုင်းတွင် သင်ထောက်ကူ ပစ္စည်း၊ စက်ပစ္စည်း၊ ပရိဘောဂ၊ ဓာတ်ခွဲခန်းသုံးပစ္စည်း၊ ရည်ညွှန်း စာအုပ်များကို ဖြည့်ဆည်းပေးခဲ့ပါကြောင်း၊ အခြားဝန်ကြီးဌာနများမှ ကျောင်းအသီးသီး တွင် အဆောက်အဦ ၁၄၈ လုံးဆောက်လုပ်ပေးနိုင်ခဲ့ကြောင်းလည်း ပညာရေးဝန်ကြီးဌာန စာရင်းများအရ သိရသည်။

ယခုကျင်းပသည့် မြန်မာနိုင်ငံလုံးဆိုင်ရာ ပညာရေး ညီလာခံ(၂၀၂၃) တွင် ဝန်ကြီးဌာနပေါင်းစုံမှ ပညာရှင်များက အနာဂတ်မြန်မာ့ပညာရေး ပိုမိုကောင်းမွန် စေရေးအတွက် ရှုထောင့်စုံမှရင်းနှီးပွင့်လင်းစွာ သုံးသပ်ဆွေးနွေးကြရန်လည်း နစက ဥက္ကဌက အဆိုပါ အခမ်းအနားတွင် ပြောကြားခဲ့ကြောင်း သိရသည်။
ymg/pl
#Local_News #၂၀၂၃-၂၀၂၄ ဘဏ္ဍာရေးနှစ် #ပညာရေးအသုံးစရိတ် #နစကဥက္ကဌ
#YMG #Yangon_Media_Group

#Local_News
Published_ 19 May 2023

လာမည့် ဇွန်လ ၁ ရက်တွင် တက္ကသိုလ်များနှင့် အခြေခံပညာကျောင်းများ ပြန်လည် ဖွင့်လှစ်တော့မည်ဖြစ်သဖြင့် မုန်တိုင်းကြောင့် ထိခိုက်ပျက်စီးခဲ့သည့် စာသင်ကျောင်းများအနက် အထက်တန်းကျောင်းများကို ဦးစားပေးအဖြစ် အမြန်ဆုံးပြုပြင်ဆောင်ရွက်ပေးရန် နိုင်ငံတော် စီမံအုပ်ချုပ်ရေးကောင်စီ ဒုတိယ ဥက္ကဋ္ဌ ဒုတိယဝန်ကြီးချုပ် ဒုတိယဗိုလ်ချုပ်မှူးကြီး စိုးဝင်းက ပြောသည်။

မေလ ၁၈ ရက်က ပြုလုပ်ခဲ့သော ရခိုင်ပြည်နယ်အတွင်း ဆိုင်ကလုန်းမုန်တိုင်း(မိုခါ)ကျရောက်မှုကြောင့် ပျက်စီးဆုံးရှုံးမှုများအပေါ် ကူညီကယ်ဆယ်ရေးနှင့်ပြန်လည်ထူထောင် ရေးဆိုင်ရာ အစည်းအဝေးတွင် ယင်းက အထက်ပါအတိုင်း ပြောကြားခြင်း ဖြစ်သည်။

မေလ ၁၄ ရက်က တိုက်ခတ်ခဲ့သော မိုခါမုန်တိုင်းကြောင့် တိုင်းဒေသကြီးနှင့် ပြည်နယ်များတွင် မေလ ၁၈ ရက် မွန်းလွဲပိုင်းထိရရှိသော စာရင်းများအရ စာသင်ကျောင်း ၁၃၉၇ ကျောင်း ပျက်စီးခဲ့ရကြောင်း သိရသည်။

ယင်းမှာ နေပြည်တော်ကောင်စီနယ်မြေအတွင်း စာသင် ကျောင်း ၃ ကျောင်း၊ ချင်းပြည်နယ်အတွင်း စာသင် ကျောင်း ၁ ကျောင်း၊ မွန်ပြည်နယ် အတွင်း စာသင်ကျောင်း ၁ ကျောင်း၊ရခိုင်ပြည်နယ်အတွင်း စာသင်ကျောင်း ၁၃၅၂ လုံး၊ရန်ကုန်တိုင်းဒေသကြီးအတွင်း စာသင်ကျောင်း ၇ ကျောင်း၊ ရှမ်းပြည်နယ်အတွင်း စာသင်ကျောင်း ၁ ကျောင်း၊ ဧရာဝတီတိုင်းဒေသကြီးအတွင်း စာသင်ကျောင်း ၃၂ ကျောင်း တို့ ဖြစ်ကြောင်း သိရသည်။

ဆိုင်ကလုန်းမုန်တိုင်းတိုက်ခတ်မှုကြောင့် ပျက်စီးဆုံးရှုံးမှု ဖြစ်ပေါ်ခဲ့ သည့် နေရာများ၌ တိုင်းဒေသကြီးနှင့် ပြည်နယ်များအလိုက် အသင့်ပြင်ဆင် စုဖွဲ့ ထားရှိသည့် ကူညီကယ်ဆယ်ရေးအဖွဲ့များက ပရဟိတလူမှုကူညီရေးအသင်းအဖွဲ့ များနှင့်အတူ ကူညီကယ်ဆယ်ရေးလုပ်ငန်းများနှင့် ပြန်လည်ထူထောင်ရေးလုပ်ငန်း များအား ဆောင်ရွက်ပေးလျက်ရှိကြောင်းလည်း သိရသည်။
ymg/pl
#Local_News #မုန်တိုင်း #စာသင်ကျောင်းများ #အထက်တန်းကျောင်းများ #အမြန်ဆုံးပြုပြင်ရန်လုပ်ဆောင်
#YMG #Yangon_Media_Group

#Local_News
Published_ 19 May 2023

ယနေ့ နံနက်ပိုင်း မြောက်ဥက္ကလာပက မီးလောင်မှု Level 2 အဆင့်မီး ငြိမ်းသတ်ခဲ့ရတယ်လို့ မီးသတ်တပ်ဖွဲ့ကသိရသည်။

ယနေ့ မေလ ၁၉ ရက်နေ့ နံနက် ၉ နာရီကျော်အချိန်ခန့်က ရန်ကုန်တိုင်း၊ မြောက်ဥက္ကလာပမြို့နယ်၊ (င)ရပ်ကွက်၊ စက်မှုဇုန်ရတနာလမ်းတွင် မီးလောင်မှုဖြစ်ပွါးခဲ့ခြင်းဖြစ်သည်။

အဆိုပါမီးလောင်မှုကို Level 2 ယာဉ်အုပ်စုများ ထွက်ခွာငြှိမ်းသတ်မှုကြောင့် နံနက် ၉ နာရီ ၄၄ မိနစ်မှာ မီးငြိမ်းသွားတယ်လို့ သိရပါသည်။

လက်ရှိမှာတော့ မီးလောင်တဲ့အကြောင်းအရင်းနဲ့ ပျက်စီးဆုံးရှုံးမှုကိုတော့ မသိရသေးပါဘူးလို့မီးသတ်တပ်ဖွဲ့မှသိရသည်။
ymg/ppk
#Local_News #မြောက်ဥက္ကလာပကမီးလောင်မှု #Level2အဆင့်မီးငြိမ်းသတ်ခဲ့
#YMG #Yangon_Media_Group