#LocalNews
Published -23 May 2022

မေလ(၂၂)ရက်က ပုလဲမေတ္တာ (အခမဲ့ဆေးကုခန်းနှင့် ဆေးပေးခန်း) ကို လာရောက်ပြသတဲ့လူနာဟာ မျောက်ကျောက်ရောဂါမဟုတ်ကြောင်း ပုလဲအရန်မီးသတ်တပ်ဖွဲ့က ပြန်လည်ရှင်းလင်းခဲ့ပါတယ်၊၊

အဆိုပါ လူနာရဲ့ပုံကိုယူပြီး မျောက်ကျောက်ရောဂါ မြန်မာမှာဖြစ်နေတယ်ဆိုပြီး အွန်လိုင်းပေါ်မှာ ပြန့်နှံလာတဲ့အတွက် ပြန်လည်ရှင်းလင်းခဲ့တာဖြစ်ပါတယ်၊၊

လာရောက်ပြသတဲ့လူနာဟာ ကားအောက်မှာကားဝင်ပြင်တဲ့အချိန် အခင်းမခင်းပဲ ဝင်ပြင်ချိန် ယားလို့ကုတ်ရာမှ ယားနာတွေ ဖြစ်ပေါ်လာတဲ့အတွက် ဆေးခန်းလာပြတာဖြစ်ပြီး မျောက်ကျောက်ရောဂါ မဟုတ်ဘူးလို့ ပုလဲအရန်မီးသတ်တပ်ဖွဲ့က ပြန်လည်ရှင်းလင်းဖော်ပြခဲ့ပါတယ်၊၊

နိုင်ငံတကာသတင်းတွေအရ ကမ္ဘာတစ်ဝန်း မျောက်ကျောက်ရောဂါကူးစက်ခံရသူ(၉၂)ဦးရှိပြီဖြစ်ပြီး ကူးစက်ခံရသောနိုင်ငံတွေကတော့ ဗြိတိန်၊ ပေါ်တူဂီ၊ စပိန်တို့ပါဝင်ပါတယ်၊၊

မြန်မာနိုင်ငံမှာတော့ မျောက်ကျောက်ရောဂါနဲ့ပတ်သက်လို့ သတိပေးချက်တွေထုတ်ပြန်ထားပြီဖြစ်ပြီး ကူးစက်မှုမရှိသေးတဲ့အတွက် ကူးစက်ခံရသူရှိကြောင်းထုတ်ပြန်ချက်ကို ယနေ့ မေလ(၂၃)ရက်အထိ ကျန်းမာရေးဝန်ကြီးဌာနက တရားဝင်ထုတ်ပြန်ထားမှု မရှိသေးဘူးလို့ သိရပါတယ်၊၊

ymg/tthl
#Yangon_Media_Group

#DailyNews
Published - 23 May 2022

၁။ မိုင်းကိုင်မြို့တွင် ရှမ်းစာပေတိုးတက်ရန်နှင့်ရှမ်းယဥ်ကျေးမှုအမွေအနှစ်များ ရှေးမူမပျက်ထိန်းသိမ်းပေးရန်လိုဟုဆို။

၂။ ကလေးမြို့ပေါ်သို့ ချင်းစစ်ဘေးရှောင်ပြည်သူများထပ်တိုး ရောက်လာရှိလာပြီး စားနပ်ရိက္ခာလိုအပ်မှုရှိနေ။

၃။ နေ့စဉ်မိုးလေဝသသတင်း။

၄။ ကမ္ဘာ့အကြီးဆုံးရေအားလျှပ်စစ်စီမံကိန်း တရုတ်တွင်ဆောက်လုပ် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published_23 May 2022

ရခိုင်ပြည်နယ်တွင်ပြေးဆွဲမည့် RBE ရထားတွဲသစ် ၃ တွဲမှာ မေလ ၂၀ ရက်က စစ်တွေမြို့သို့ရောက်ရှိခဲ့ကာ ယနေ့မေလ ၂၃ ရက်တွင် စတင်ပြေးဆွဲပြီဖြစ်ကြောင်း ရခိုင်ပြည်နယ်အစိုးရအဖွဲ့က သိရသည်။

အဆိုပါ ရထားတွဲများအနက် နှစ်တွဲကို စစ်တွေတက္ကသိုလ်ကျောင်းသား၊ သူများ သွားလာရေး အဆင်ပြေစေရန် ဦးစားပေးပြေးဆွဲခြင်းဖြစ်ပြီး လူတစ်ဦးလျှင် ၁၅၀ ကျပ်ကောက်ခံမည် ဖြစ်ကြောင်း၊ ကျန်တစ်တွဲကို ပြည်သူများအတွက် ပြေးဆွဲမည်ဖြစ်ကြောင်း သိရသည်။

"ဒီနေ့ တနင်္လာနေ့ စပြီးတော့ ပြေးဆွဲပါတယ်။ ကျောင်းဖွင့်ချိန် မီးရထားတွေ တိုးပြေးပေးပါမယ်။ စစ်တွေ (ပြည်တော်သာ) ရေချမ်းပြင် မူလရထားတစ်တွဲအစား နှစ်တွဲချိတ်ဆွဲပေးပါမယ်။ မနက် ၇ နာရီခွဲ စထွက်ပြီး၈ နာရီခွဲမှာရေချမ်းပြင် ကိုရောက်မယ်။ အဲဒီကနေ ၁၀ နာရီမှာ ရေချမ်းပြင်ကထွက်မယ်။ ၁၁နာရီမှာ ပြည်တော်သာကိုရောက်မယ်။ ညနေ ၂နာရီ မှာ ပြည်တော်သာက ထွက်ရင် ရေချမ်းပြင်ကို ၃ နာရီမှာ ရောက်မယ်။ ညနေ ၄ နာရီ မှာ ရေချမ်းပြင်ကထွက်မယ်၊ ညနေ ၅ နာရီမှာ ပြည်တော်သာကိုရောက်မယ်။ စစ်တွေတက္ကသိုလ် နည်းပညာတက္ကသိုလ်တွေကဆိုရင် မနက်၈နာရီခွဲမှာ class တွေစမှာမို့ အဆင်ပြေကြမှာပါ"ဟု ရခိုင်ပြည်နယ် အစိုးရအဖွဲ့ တာဝန်ရှိသူက ပြောသည်။

စစ်တွေမြို့တွင် ကွန်ပျူတာတက္ကသိုလ်၊ စစ်တွေတက္ကသိုလ်နှင့် စစ်တွေနည်းပညာတက္ကသိုလ် ဟူ၍ရှိပြီး စစ်တွေ-ရေချမ်းပြင် ရထားလမ်းပိုင်းတွင် စစ်တွေတက္ကသိုလ်နှင့် စစ်တွေနည်းပညာတက္ကသိုလ်တို့ တည်ရှိကြောင်း သိရသည်။

စစ်တွေ- ရေချမ်းပြင် မီးရထားလမ်းပိုင်းကို ၂၀၂၂ ခုနှစ် မတ်လ (၂၄)ရက်တွင် ပြန်လည်ပြေးဆွဲရန် ဖွင့်လှစ်ပေးခဲ့ပြီး ပြည်တော်သာဘူတာမှ စစ်တွေဘူတာ၊ စစ်တွေတက္ကသိုလ်ဘူတာနှင့် ဒါးပိုင်ဘူတာအထိ (၅၀)ကျပ်၊ ပြည်တော်သာ ဘူတာမှ ဇောပူဂျာဘူတာနှင့် မယ်ဇလီကုန်းဘူတာအထိ (၁၀၀)ကျပ်နှင့် ပြည်တော်သာဘူတာမှ ရေချမ်းပြင်ဘူတာအထိ (၁၅၀)ကျပ် သတ်မှတ်ထားကြောင်း သိရသည်။

ymg/mt
#Yangon_Media_Group

#LocalNews
Published -23 May 2022

မျောက်ကျောက်ရောဂါနဲ့ပတ်သက်လို့ ကမ္ဘာ့ကျန်းမာရေးအဖွဲ့ရဲ့သတိပေးချက်အတိုင်းမြန်မာ နိုင်ငံရဲ့ကျန်းမာရေးဝန်ကြီးဌာန၊ ပြည်သူ့ကျန်းမာရေးဦးစီးဌာနက သတိပေးချက်ထုတ်ပြန်လိုက်ပါတယ်၊၊

သတိပေးချက်မှာ မျောက်ကျောက်ရောဂါဖြစ်ပွားစေတဲ့ မျောက်ကျောက်ဗိုင်းရပ်စ်အကြောင်း၊စတင်ဖြစ်ပွားတဲ့ဒေသ၊ ကူးစက်တတ်ပုံ၊ ရောဂါလက္ခဏာတွေ၊ ကာကွယ်ဆေးစတဲ့ အကြောင်း အရာတွေကို အောက်ပါအတိုင်းဖော်ပြထားပါတယ်၊၊

အဓိကအချက်များ
• မျောက်ကျောက်ရောဂါဆိုတာ မျောက်ကျောက်ဗိုင်းရပ်စ်ကြောင့် ဖြစ်ပေါ်လာတာပါ။

• အာဖရိကအလယ်ပိုင်းနှင့် အနောက်ပိုင်းရှိ အပူပိုင်းမိုးသစ်တောများမှာ အစပထမတွေ့ရှိခဲ့တဲ့ ရောဂါတစ်မျိုးဖြစ်ပါတယ်။

• မျောက်ကျောက်ရောဂါဟာဖျားခြင်း၊ အနီစက်များထွက်ခြင်းနှင့် ပြန်ရည်အိတ်များ(lymph nodes) များရောင်ရမ်းခြင်း စသည်တို့တွေ့ရှိရပြီး နောက်ဆက်တွဲပြဿနာများ ဖြစ်လာနိုင်ပါတယ်။

• မျောက်ကျောက်ရောဂါလက္ခဏာများဟာ (၂) ပတ်မှ (၄) ပတ်အထိ ကြာမြင့်နိုင်သည့် ရောဂါတစ်မျိုးဖြစ်ပါတယ်။ သေဆုံးနှုန်းဟာ (၃) ရာခိုင်နှုန်းမှ (၆) ရာခိုင်နှုန်းအထိ ဖြစ်ပါတယ်။

• ဗိုင်းရပ်စ်ကူးစက်ခံထားရသည့် တိရစ္ဆာန်/ ကူးစက်ခံထားရသူနှင့် ထိတွေ့ခြင်း၊ ဗိုင်းရပ်စ်ရှိနေသော အရာဝတ္ထုပစ္စည်းများကို ထိတွေ့ကိုင်တွယ်မိခြင်း တိုမှတစ်ဆင့် လူကိုကူးစက်နိုင်ပါတယ်။

• မျောက်ကျောက်ရောဂါဟာ ရောဂါပိုးရှိသူ၏ အနာပြည်၊ အရည်ကြည်များမှတစ်ဆင့် သို့မဟုတ် ရောဂါပိုးရှိသူအသုံးပြုထားသည့် အိပ်ရာခင်းကဲ့သို ပစ္စည်းများမှတစ်ဆင့် ကူးစက်နိုင်ပါတယ်။

• (၁၉၈၀) ခန့်က ကမ္ဘာတစ်ဝန်းမှာ လုံးဝအမြစ်ပြတ် ရှင်းလင်းသွားပြီဖြစ်သည့် orthopox virus နှင့် ဆက်စပ်နေသည့် ရောဂါတစ်မျိုး ဖြစ်ပါတယ်။

• ထိုရောဂါကို အမြစ်ဖျက်ချေမှုန်းရာတွင် အသုံးပြုထားသည့် ကာကွယ်ဆေးများဟာ မျောက်ကျောက်ရောဂါကို ကာကွယ်နိုင်ပါတယ်။ မျောက်ကျောက်ရောဂါအတွက် ကာကွယ်ဆေးအသစ်များလည်း လုပ်ဆောင်နေကြပါတယ်။

• မျောက်ကျောက်ရောဂါကုသမှုများလည်း တရားဝင်ခွင့်ပြုချက် ရရှိပြီးသား ဖြစ်ပါတယ်။

မျောက်ကျောက်ရောဂါပေါ်ပေါက်ခြင်း/ဖြစ်ပွားခြင်း

မျောက်ကျောက်ရောဂါဟာ (၁၉၇၀) ခန့်က ကွန်ဂိုနိုင်ငံမှာ အသက် (၉) နှစ်အရွယ်ကလေးငယ်လေးမှာ စတင်တွေ့ရှိခဲ့တာ ဖြစ်ပါတယ်။ ထိုအချိန်ကတည်းက ကျေးလက်ဒေသများ၊ ကွန်ဂိုမိုးသစ်တောဒေသများနှင့် အာဖရိကအနောက်နှင့်အလယ်ပိုင်းဒေသများမှာ တဖြည်းဖြည်း တွေ့ရှိလာတာ ဖြစ်ပါတယ်။

(၂၀၁၇) ခုနှစ်မှာ နိုင်ဂျီးရီးယားမှာ ကူးစက်မှုသံသယရှိသူ (၅၀၀) ကျော်နှင့် ကူးစက်ခံရသူ (၂၀၀) ကျော် ရှိခဲ့ပါတယ်။ ယနေ့အချိန်အထိ သေဆုံးနှုန်း (၃) ရာခိုင်နှုန်း ရှိပါတယ်။

မျောက်ကျောက်ရောဂါဟာ (၂၀၁၈) ခုနှစ်မှာ နိုင်ဂျီးရီးယားခရီးသွားများမှ အစ္စရေးကို ကူးစက်ခဲ့ပြီး၊ အင်္ဂလန်နိုင်ငံမှာလည်း ကူးစက်မှုများ ကြုံတွေ့ခဲ့ရပါတယ်။ (၂၀၁၉) ဒီဇင်ဘာ၊ (၂၀၂၁) မေနှင့် (၂၀၂၂) မေလတို့တွင် အင်္ဂလန်မှာ ကူးစက်မှုများ ဆက်လက်ဖြစ်ပွားခဲ့ပြီး (၂၀၁၉) ခုနှစ် မေလတွင် စင်္ကာပူနိုင်ငံမှာပါ ကူးစက်မှုများ တွေ့လာရပါတယ်။ (၂၀၂၁) ဇူလိုင်နှင့် နိုဝင်ဘာလတွင် အမေရိကတွင် ကူးစက်မှုများ ဖြစ်ပွားခဲ့ပါတယ်။ (၂၀၂၂) မေလမှာတော့ မျောက်ကျောက်ရောဂါကို အခြားနိုင်ငံအများအပြားမှာပါ တွေ့ရှိလာရပါတယ်။ လက်ရှိမှာတော့ ရောဂါပိုးအရင်းအမြစ်နှင့် ကူးစက်မှုပုံစံများကို နားလည်နိုင်ဖို့ လုပ်ဆောင်နေကြပါတယ်။

ရောဂါကူးစက်ပြန့်ပွားခြင်း
ရောဂါပိုးရှိသည့် တိရိစ္ဆာန်များမှတစ်ဆင့် ကူးစက်နိုင်ပါတယ်။ အာဖရိကမှာတော့ ရှဉ့်၊ ကြွက်၊ မျောက်နှင့် အခြားသော တိရိစ္ဆာန်များမှာ မျောက်ကျောက်ရောဂါကို တွေ့ရှိရပါတယ်။ ကြွက်တွေဟာ ရောဂါပိုးသယ်ဆောင်သူဖြစ်နိုင်ချေ အများဆုံးဖြစ်သော်လည်း အတည်မပြုရသေးပါဘူး။

မကျက်တကျက် ချက်ပြုတ်ထားသည့် အသားနှင့် အခြားသော ပိုးရှိသည့်
တိရိစ္ဆာန်များမှ ထုတ်လုပ်ထားသည့် ထုတ်ကုန်များကို စားသုံးသုံးစွဲမိခြင်းမှလည်း ကူးစက်နိုင်ပါတယ်။ ရောဂါပိုးရှိသူနှင့် အနီးကပ်ထိတွေ့ခြင်းက ကူးစက်မှုများနိုင်သော်လည်း လိင်မှတဆင့် ကူးစက်မှု ရှိမရှိကိုတော့ မသိရသေးပါဘူး။

ymg/tthl
#Yangon_Media_Group

#LocalNews
Published_23 May 2022

သမ္မတရုံး ညွှန်ကြားရေးမှူးချုပ် (ငြိမ်း) ဦးဇော်ဌေး နေပြည်တော်၌ ယနေ့ မေလ ၂၃ ရက် နံနက်က ကွယ်လွန်သွားကြောင်း သိရသည်။

ဇော်ဌေးသည် စစ်တက္ကသိုလ် အပတ်စဉ် (၃၇)မှဖြစ်ကာ ဗိုလ်မှူးအဆင့်ရှိတပ်မတော်သားတစ်ဦးလည်းဖြစ်ပြီး မှူးဇော်ဟူသောအမည်ဖြင့် လူမှုကွန်ရက်အသုံးပြုသောကြောင့် မှူးဇော်ဟု လူသိများသည်။

"သူက ဆေးလိပ်သောက်တယ်။ အခု နှလုံးရောဂါကြောင့်လို့ သိရပါတယ်"ဟု နေပြည်တော်ရှိ သတင်းရင်းမြစ်တစ်ဦးက ပြောသည်။

၂၀၀၇ ခုနှစ်တွင် တပ်မတော်မှ အငြိမ်းစားယူခဲ့ပြီးနောက် USDP အသင်းဝင် ဖြစ်လာခဲ့ကာ ၂၀၁၁ ခုနှစ် အစိုးရအကူးအပြောင်းတွင် ပေါ်ပေါက်လာခဲ့သော နိုင်ငံတော်သမ္မတရုံးတွင် ညွှန်ကြားရေးမှူး ဖြစ်လာခဲ့ပြီး ပြောရေးဆိုခွင့်ရှိသူ ဖြစ်လာခဲ့သည်။

၂၀၁၁ ခုနှစ်မှ ၂၀၁၆ ခုနှစ်အတွင်း သမ္မတဦးသိန်းစိန်၏ လက်အောက်တွင် တာဝန်ထမ်းဆောင်စဉ်က မှူးဇော် ဟူသော အမည်ဖြင့် လူမှုကွန်ယက်ဖေ့ဘွတ်ခ်တွင် ဆောင်းပါးများ ရေးသားခဲ့ပြီး ၎င်းကို မှူးဇော်ဟု လူသိများကြသည်။

၂၀၁၆ ခုနှစ် အစိုးရအသစ်တက်လာချိန်တွင် ဦးဇော်ဌေးသည် ဒုတိယညွှန်ကြားရေးမှူးချုပ်ဖြစ်လာခဲ့ပြီး အသစ်ဖွဲ့စည်းလိုက်သော နိုင်ငံတော်အတိုင်ပင်ခံရုံးဝန်ကြီးဌာနရှိ ပြည်ထောင်စုငြိမ်းချမ်းရေးဖော်ဆောင်ရေးဦးစီးဌာန ညွှန်ကြားရေးမှူးချုပ် အဖြစ်လည်းကောင်း၊ နောက်ပိုင်းတွင် သမ္မတရုံး၌ ညွှန်ကြားရေးမှူးချုပ်အဖြစ်လည်းကောင်း ဖြစ်လာကာ အစိုးရအဖွဲ့၏ ပြောခွင့်ရှိသူအဖြစ် နိုင်ငံတော်သမ္မတအိမ်တော်သတင်းစာရှင်းလင်းပွဲများကို ဦးဆောင်ကျင်းပခဲ့ရသူဖြစ်သည်။

ymg/mt
#Yangon_Media_Group

#LocalNews
Published_23 May 2022

ရေကြီးနေသောသောင်းရင်းမြစ်ကိုဖြတ်၍ ထိုင်းနိုင်ငံသို့ခိုးဝင်လာကြသော အထောက်အထားမဲ့ မြန်မာနိုင်ငံသားများအား မေလ ၂၁ ရက်တွင် ထိုင်းအာဏာပိုင်များက ဖမ်းဆီးလိုက်ကြောင်း သိရသည်။

ဖမ်းဆီးမိသော မြန်မာနိုင်ငံသားများမှာ အမျိုးသား ၁၅ ဦး၊ အမျိုးသမီး၂ ဦးဖြစ်ပြီး ထိုင်းနိုင်ငံ မဲ့လမတ်မြို့နယ်အတွင်း ဖမ်းဆီးခဲ့ခြင်း ဖြစ်ကြောင်း သိရသည်။

အဆိုပါ ဖမ်းဆီးခံရသူများမှာ ကရင်ပြည်နယ် ဘားအံမြို့တွင်နေထိုင်သူများဖြစ်ပြီး ထိုင်းနိုင်ငံသို့ ပိုပေးသည့်ပွဲစားကို ဘတ်ငွေ ၂၅၀၀၀ မှ ၂၇၀၀၀ အထိ‌ ပေးဆောင်ခဲ့ရကြောင်း၊ ယင်းတို့အနေဖြင့် ထိုင်းနိုင်ငံဥပဒေအရ အရေးယူဆောက်ရွက်သွားမည်ဖြစ်ကြောင်း သိရသည်။

ymg/mt
#Yangong_Media_Group