#Local_News
Published 16 June 2026

■ တရုတ်နိုင်ငံသို့ နိုင်ငံတော်အဆင့် ချစ်ကြည်ရေးခရီးစဥ်ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင် နှင့် တရုတ်နိုင်ငံဝန်ကြီးချုပ်လီချန်တို့ ယနေ့ မွန်းလွဲပိုင်းအချိန်တွင်တွေ့ဆုံ ဆွေးနွေးခဲ့ကြောင်း သိရသည်။

■ နိုင်ငံတော်သမ္မတဦးမင်းအောင်လှိုင်အနေဖြင့် ယနေ့ နံနက် မှ မွန်းလွဲပိုင်းထိ
တရုတ်သမ္မတ ရှီကျင့်ဖျင်နှင့် တွေ့ဆုံဆွေးနွေးခြင်း၊ MOU ၁၈ ခုရေးထိုးခြင်းနှင့် တီယန်အန်မင်ရင်ပြင်တွင် လွမ်းသူပန်းခွေချ ဂုဏ်ပြုခြင်း။

■ တရုတ်ပြည်လုံးဆိုင်ရာ ပြည်သူ့ကွန်ဂရက် (NPC) အမြဲတမ်းကော်မတီဥက္ကဋ္ဌ ကျောက်လဲ့ကျိနှင့်ပါ တွေ့ဆုံဆွေးနွေးခြင်းတို့ကိုပြုလုပ်ခဲ့ပြီးဖြစ်ကြောင်းသိရသည်။

Yangon_Times/PP

#Local_News
Published_16 June 2026

နိုင်ငံတော်သမ္မတ ဦးမင်းအောင်လှိုင် နှင့် တရုတ်သမ္မတ ရှီကျင့်ဖျင်တို့ တွေ့ဆုံဆွေးနွေး မှုကို ယနေ့ နံနက်က တရုတ်နိုင်ငံ မြို့တော်ပေကျင်းရှိ The Great Hall ခန်းမတွင် ပြုလုပ်ခဲ့ကြောင်း သိရသည်။

The Great Hall ခန်းမသို့ ယနေ့ နံနက် ၁၀ နာရီခွဲအချိန်က ရောက်ရှိလာသည့် သမ္မတ ဦးမင်းအောင်လှိုင်အား ဂုဏ်ပြုတပ်ဖွဲ့က အမြှောက် ၂၁ ချက် ပစ်ဖောက်၍ ဂုဏ်ပြုကြိုဆိုခဲ့ခြင်း ဖြစ်သည်။

ထိုသို့ ကြိုဆိုပြီးနောက် တရုတ်သမ္မတရှီကျင့်ဖျင်က နိုင်ငံတော်သမ္မတ ဦးမင်းအောင်လှိုင်အား ကြိုဆိုနှုတ်ဆက်ခဲ့ပြီး ဂုဏ်ပြုတပ်ဖွဲ့၏ အလေးပြုမှု ခံယူပြီးနောက် နှစ်နိုင်ငံသမ္မတများ တွေ့ဆုံဆွေးနွေးခဲ့ကြောင်း သိရသည်။

ဆွေးနွေးမှုများကို YMG က ထပ်မံဖော်ပြမည် ဖြစ်ပါသည်။

Yangon_Times/PP

#Local_News
Published 16 June 2026

■ တရုတ်နိုင်ငံသို့ရောက်ရှိနေသော နိုင်ငံတော်သမ္မတ ဦးမင်းအောင်လှိုင်က တရုတ်နိုင်ငံ၊ တီယန်အန်မင်ရင်ပြင် (Tiananmen Square) ရှိ သူရဲကောင်းဗိမာန်တွင် ယနေ့
မွန်းလွဲ ၂ နာရီ ၄၅ မိနစ်ခန့် အချိန်လွမ်းသူပန်းခွေချ၍ ဂုဏ်ပြုခဲ့ကြောင်း သိရသည်။

■ ရင်ပြင်သို့ရောက်ရှိလာသည့် နိုင်ငံတော်သမ္မတအား ဂုဏ်ပြုတပ်ဖွဲ့ဖြင့် ကြိုဆိုပြီးနောက် နှစ်နိုင်ငံ နိုင်ငံတော်သီချင်းများ ဖွင့်လှစ်ဂုဏ်ပြုခဲ့ကြကြောင်း။နိုင်ငံတော်သမ္မတက ကျဆုံးလေပြီးသော တရုတ်ပြည်သူ့ သူရဲကောင်းများအား လွမ်းသူပန်းခွေချ ဂုဏ်ပြုပေးခဲ့ကြောင်း သိရသည်။

■ တီယန်အန်မင်ရင်ပြင်ဆိုသည်မှာ တရုတ်နိုင်ငံသို့ လာရောက်လည်ပတ်သည့် နိုင်ငံခြားသမ္မတများနှင့် နိုင်ငံ့ခေါင်းဆောင်များ လာရောက်ပန်းခွေချကာ ဂုဏ်ပြုရသည့်နေရာလည်းဖြစ်ကြောင်း သိရသည်။

#YMG/PP #Yangon_Times

#Local_News
Published 16 June 2026

■ တရုတ်နိုင်ငံသို့ နိုင်ငံတော်အဆင့်ချစ်ကြည်ရေးခရီးစဉ် ရောက်ရှိနေသော နိုင်ငံတော်သမ္မတ ဦးမင်းအောင်လှိုင်သည် ယနေ့ ဇွန် လ၁၆ ရက် နေ့လယ်ပိုင်းတွင် တရုတ်အမျိုးသားပြည်သူ့ကွန်ဂရက် (National People's Congress - NPC) ဥက္ကဋ္ဌ မစ္စတာ ကျောက်လဲ့ကျိ (Zhao Leji) အား လက်ခံတွေ့ဆုံကာ နှစ်နိုင်ငံအကျိုးစီးပွားနှင့် ပူးပေါင်းဆောင်ရွက်ရေးဆိုင်ရာ ကိစ္စရပ်များကို ဆွေးနွေးခဲ့ကြ‌ကြောင်းသိရသည်။

■ တွေ့ဆုံဆွေးနွေးပွဲတွင် မြန်မာ-တရုတ် နှစ်နိုင်ငံအကြား ရှိရင်းစွဲ ပေါက်ဖော်ချစ်ကြည်ရေးနှင့် မဟာဗျူဟာမြောက် ပူးပေါင်းဆောင်ရွက်မှုများ ပိုမိုခိုင်မာစေရေး၊ စီးပွားရေးနှင့် ကုန်သွယ်ရေးဆိုင်ရာ ဆက်ဆံရေးများ တိုးမြှင့်ဆောင်ရွက်ရေး၊ ဒေသတွင်း တည်ငြိမ်ရေးနှင့် ဖွံ့ဖြိုးတိုးတက်ရေးဆိုင်ရာ ကိစ္စရပ်များကို အမြင်ချင်းဖလှယ်ဆွေးနွေးခဲ့ကြကြောင်း သိရသည်။

■ တရုတ်အမျိုးသားပြည်သူ့ကွန်ဂရက်သည် တရုတ်နိုင်ငံ၏ အမြင့်ဆုံးနိုင်ငံတော်အာဏာပိုင် ဥပဒေပြုအဖွဲ့အစည်းဖြစ်ပြီး နိုင်ငံတော်၏ အရေးကြီးသော ဥပဒေများ၊ မူဝါဒများနှင့် အမျိုးသားအဆင့် ဆုံးဖြတ်ချက်များကို အတည်ပြုချမှတ်ပေးသည့် အဖွဲ့အစည်းတစ်ရပ်ဖြစ်သည်။

#YMG/PP #Yangon_Times

#Local_News
Published 16 June 2026

■ မြန်မာ – တရုတ်နှစ်နိုင်ငံအကြား ကမ္ဘာလုံးဆိုင်ရာ လုံခြုံရေးအစီအမံ ပူးတွဲမြှင့်တင်ရေး၊ အောင်ဆန်းအား ကစား ကွင်း ပြန်လည်တည်ဆောက်ရေးအကူအညီပေးမှု အပါအဝင် နားလည်မှုစာချွန်လွှာ ၁၈ ခု ကို ယနေ့ လက်မှတ်ရေးထိုးခဲ့ကြောင်း သိရသည်။

■ ယင်းကို တရုတ်နိုင်ငံ မြို့တော်ပေကျင်းရှိ The Great Hall ခန်းမအတွင်း ပြည်ထောင်စုသမ္မတ မြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင်နှင့် တရုတ်ပြည်သူ့သမ္မတနိုင်ငံ သမ္မတ မစ္စတာရှီကျင့်ဖျင်တို့၏ ရှေ့မှောက်၌ နှစ်နိုင်ငံမှ သက်ဆိုင်ရာကဏ္ဍအလိုက် တာဝန်ရှိသူများက လက်မှတ်ရေးထိုး လဲလှယ်ခဲ့ကြခြင်း ဖြစ်ကြောင်း သိရသည်။

■ အဆိုပါ စာချွန်လွှာများတွင် ပြည်ထောင်စုသမ္မတမြန်မာနိုင်ငံတော်နှင့် တရုတ်ပြည်သူ့သမ္မတနိုင်ငံ တို့အကြား ကမ္ဘာလုံးဆိုင်ရာ လုံခြုံရေးအစီအမံ(Global Security Initiative-GSI) ပူးတွဲမြှင့်တင်ရေး ပူးပေါင်းဆောင်ရွက်မှုဆိုင်ရာ နားလည်မှု စာချွန်လွှာ၊ မြန်မာ-တရုတ် နှစ်နိုင်ငံအစိုးရများအကြား ကမ္ဘာလုံးဆိုင်ရာယဉ်ကျေးမှုအစီအမံ (Global Civilization Initiative-GCI) ပူးတွဲမြှင့်တင်ရေး ပူးပေါင်းဆောင်ရွက်မှုဆိုင်ရာ နားလည်မှု စာချွန်လွှာ၊ ကမ္ဘာလုံးဆိုင်ရာဖွံ့ဖြိုးတိုးတက်မှု ဦးဆောင်ဦးရွက်ပြုမှု (Global Development Initiative-GDI) အကောင်အထည်ဖော်ဆောင်ရွက်ရေး နားလည်မှုစာချွန်လွှာ၊ လူ့စွမ်းအားအရင်းအမြစ်ဖွံ့ဖြိုးတိုးတက်မှု ပူးပေါင်းဆောင်ရွက်မှုအစီအစဉ်(၂၀၂၆) အတွက် ပူးတွဲအကောင်အထည်ဖော်ရေးဆိုင်ရာ နားလည်မှုစာချွန်လွှာများ ပါဝင်ကြောင်း သိရသည်။

■ အလားတူ အောင်ဆန်းအားကစားကွင်းသစ် ပြန်လည်တည်ဆောက်ခြင်းစီမံကိန်းဆောင်ရွက်ရန်အတွက် အကူအညီပေး ရေးဆိုင်ရာစာလွှာ၊ မြန်မာနိုင်ငံမှ တရုတ်နိုင်ငံသို့ တရုတ်တိုင်းရင်းသား ဆေးဖက်ဝင်အပင်များ တင်ပို့ခြင်းဆိုင်ရာ အပင်ကျန်းမာရေးလိုအပ်ချက် သဘောတူစာချုပ်၊ မြန်မာနိုင်ငံမှ တရုတ်နိုင်ငံသို့ လတ်ဆတ်သော ငှက်ပျောသီးများ တင်ပို့ခြင်းဆိုင်ရာ အပင်ကျန်းမာရေးလိုအပ်ချက် သဘောတူစာချုပ်၊ မြန်မာနိုင်ငံမှ တရုတ်နိုင်ငံသို့ စားသုံးရန် ရေထွက်တိရစ္ဆာန်များ တင်ပို့ခြင်းဆိုင်ရာ ကန့်သတ်စစ်ဆေးရေးနှင့် သန့်ရှင်းရေးလိုအပ်ချက်ဆိုင်ရာ သဘောတူစာချုပ်၊ မဟာမဲခေါင်ဒေသခွဲ နယ်စပ်ဖြတ်ကျော်သယ်ယူပို့ဆောင်ရေး လွယ်ကူချောမွေ့စေရေး အကောင်အထည်ဖော်ရေးဆိုင်ရာ နားလည်မှု စာချွန်လွှာ၊ ကျန်းမာရေးကဏ္ဍပူးပေါင်းဆောင်ရွက်ရေးဆိုင်ရာ နားလည်မှု စာချွန်လွှာများလည်းပါဝင်ကြောင်း သိရသည်။

■ ယင်းနောက် တရုတ်-မြန်မာ သိပ္ပံနှင့် နည်းပညာ ပြည်သူချင်းဖလှယ်ရေးအစီအစဉ်ဆိုင်ရာ နားလည်မှုစာချွန်လွှာ၊ ကမ္ဘာ့တောင်ဘက်ခြမ်း မီဒီယာနှင့် တတ်သိပညာရှင်ဖိုရမ် ယန္တရား နားလည်မှု စာချွန်လွှာ၊ ရုပ်သံထုတ်လွှင့်ခြင်း၊ ရုပ်မြင်သံကြားနှင့် အွန်လိုင်းအသံ/ရုပ် ဝန်ဆောင်မှုများ နယ်ပယ်များတွင် ပူးပေါင်းဆောင်ရွက်မှုများမြှင့်တင်ရန် နားလည်မှု စာချွန်လွှာ၊ ဉာဏပစ္စည်းမူပိုင်ခွင့်ကဏ္ဍ ပူးပေါင်းဆောင်ရွက်ရေးဆိုင်ရာ နားလည်မှု စာချွန်လွှာ၊ ယှဉ်ပြိုင်မှုကဏ္ဍ ပူးပေါင်းဆောင်ရွက်ရေးဆိုင်ရာ နားလည်မှု စာချွန်လွှာ၊ လွတ်လပ်သော ကုန်သွယ်မှုနှင့် နိုင်ငံစုံပူးပေါင်းဆောင်ရွက်မှုကို အထောက်အကူပြုခြင်းဆိုင်ရာ နားလည်မှုစာချွန်လွှာ၊ မြေငလျင်ဘေးအရေးပေါ်လူသားချင်းစာနာထောက်ထားမှု နည်းပညာအကူအညီ လွှဲပြောင်းပေးအပ်ခြင်းနှင့် လက်ခံရေးဆိုင်ရာ စာချွန်လွှာ၊ မီဒီယာကဏ္ဍဖွံ့ဖြိုးတိုးတက်မှု၊ နည်းပညာနှင့် အသိပညာဖလှယ်ခြင်းဆိုင်ရာ ပူးပေါင်းဆောင်ရွက်မှု နားလည်မှုစာချွန်လွှာတို့လည်း ပါဝင်ကြောင်း သိရသည်။

■ တရုတ်သမ္မတ ရှီကျင့်ဖျင်၏ ဖိတ်ကြားချက်အရ တရုတ်နိုင်ငံသို့ နိုင်ငံတော်အဆင့်ချစ်ကြည်ရေးခရီးစဉ်ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်အား ဇွန် ၁၆ ရက်(ယနေ့) ဒေသစံတော်ချိန် နံနက် ၁၀ နာရီခန့်တွင် ပေကျင်းမြို့ရှိ The Great Hall ခန်းမ၌ ဂုဏ်ပြုတပ်ဖွဲဖြင့် ကြိုဆိုခဲ့ကာ အထူးဂုဏ်ပြုနေ့လယ်စာဖြင့် တည်ခင်းဧည့်ခံခဲ့ကြောင်းလည်း သိရသည်။

#YMG/PP #Yangon_Times

#Local_News
Published 16 June 2026

■ သီတဂူကမ္ဘာ့ဗုဒ္ဓ တက္ကသိုလ် (ရန်ကုန်)၏ ၂၀၂၆-၂၀၂၇ ပညာသင်နှစ် ကျောင်းသားသစ်ကြိုဆိုပွဲနှင့်အောင်လက်မှတ်ဆက်ကပ်ပွဲ ကို ဇွန်လ ၁၅ရက်နေ့က ရန်ကုန်မြို့၊ ဒဂုံမြို့သစ်မြောက်ပိုငိးမြို့နယ်ရှိ သီတဂူကမ္ဘာ့ဗုဒ္ဓ တက္ကသိုလ် (ရန်ကုန်)၌ ကျင်းပခဲ့ရာ သီတဂူအဓိပတိ ဆရာတော်ကြီး ကြွရောက်ချီးမြှင့်ခဲ့ကြောင်းသိရသည်။

■ ကျေးဇူးတော်ရှင် သီတဂူကမ္ဘာ့ဗုဒ္ဓ တက္ကသိုလ်များ၏ အဓိပတိ ၊အဘိဓဇမဟာရဌဂုရု၊အဘိဓဇအဂ္ဂမဟာသဒ္ဓမ္မဇောတိက ၊သောဠသမရွှေကျင်သာသနာပိုင်၊သီတဂူအဓိပတိဆရာတော်ကြီးအမှူးပြုသော ပါ‌မောက္ခကထိက သင်ကြားစီမံဆရာတော်များနှင့်တကွ
ကျောင်းသား၊ကျောင်းသူများ၊ဧည့်ပရိတ်သတ်အားလုံးတို့က နမောတသမဟာပဏာမ သုံးကြိမ်ရွတ်ဆိုဘုရားရှစ်ခိုး၍ အခမ်းအနားကိုဖွင့်လှစ်ခဲ့ကြကြောင်းသိရသည်။

■ ထို့နောက် ရတနာမြတ်သုံးပါးအမှူးထား၍ ကျေးဇူးတော်ရှင် သီတဂူကမ္ဘာ့ဗုဒ္ဓ တက္ကသိုလ်များ၏ သီတဂူအဓိပတိဆရာတော်ကြီးအားပါ‌မောက္ခကထိက သင်ကြားစီမံဆရာတော် များနှင့်တကွ တပည့်ဒါယိကာ ၊ဒါယိကာမများက ဩကာသကန်တော့ချိုးဖြင့် ညီညာဖျဖျရှိခိုးကန်တော့၍ အဓိပတိဆရာတော်ကြီးထံမှ ငါးပါးသီလခံယူဆောက်တည်ကြသည်။

■ သီတဂူကမ္ဘာ့ဗုဒ္ဓ တက္ကသိုလ် (ရန်ကုန်)၏သင်ကြားစီမံအဖွဲ့ဥက္ကဌ ပညာရေးမှုးဆရာတော် ဒေါက်တာအရှင်ပညောဘာသ -က သီတဂူကမ္ဘာ့ဗုဒ္ဓ တက္ကသိုလ် (ရန်ကုန်)၏ ၂၀၂၆-၂၀၂၇ ပညာသင်နှစ် ပညာရေးဆိုင်ရာ နှင့်ကျောင်းသားစာရင်း အကျဉ်းချုပ်တို့ကို ရှင်းလင်းတင်ပြလျှောက်ထားခဲ့ပြီး ပညာသင်ယူနေကြသော ကျောင်းသားများလိုက်နာ သိရှိရန်စည်းမျဉ်းစည်းကမ်းများကိုသီတဂူကမ္ဘာ့ဗုဒ္ဓ တက္ကသိုလ် (ရန်ကုန်)၏သင်ကြားစီမံအဖွဲ့ဒုတိယ ဥက္ကဌ၊အုပ်ချုပ်ရေးမှုး ဆရာတော်ပါမောက္ခ ဒေါက်တာအရှင်ကောဝိဒ သိရီ-ကဖတ်ကြားလျှောက်ထားခဲ့သည်။

■ ထို့နောက်၂၀၂၅-၂၀၂၆ပညာသင်နှစ်တွင် Buddha-dhamma Diploma အောင်မြင်ခဲ့ကြသည့် ရဟန်းတော်များ ၊သီလရှင်ဆရာလေးများနှင့် လူပုဂ္ဂိုလ်များဆိုင်ရာဗုဒ္ဓဓမ္မပါဒကဒီပလိုမာနှင့်အဆင့်မြင့်ဗုဒ္ဓဒီပလိုမာ အောင်မြင်ခဲ့ကြသည့် သင်တန်းသူ၊သင်တန်းသားများအား သီတဂူအဓိပတိဆရာတော်ကြီးမှ အောင်လက်မှတ်များချီးမြှင့်ပေးခဲ့ပြီး အလှူရှင်များ ကသီတဂူအဓိပတိဆရာတော်ကြီးအားလှူဖွယ်ပစ္စည်းများဆက်ကပ်လှူဒါန်းခဲ့ကာ ဆရာတော်ကြီးမှ ကျပ်ငွေသိန်း၁၂၀တန်ဖိုးရှိ မိတ္တူကူးစက်အလှုရှင် ဦးဉာဏ်ဝင်း+ဒေါ်မြမြ၊သမီးမငယ်အား ဂုဏ်ပြုလွှာ
ပေးအပ်ချီးမြှင့်ခဲ့ကြောင်းသိရသည်။

■ ၎င်းနောက် သီတဂူကမ္ဘာ့ဗုဒ္ဓ တက္ကသိုလ်များ၏ အဓိပတိ ၊အဘိဓဇမဟာရဌဂုရု၊အဘိဓဇအဂ္ဂမဟာသဒ္ဓမ္မ ဇောတိကဓဇ ၊သောဠသမရွှေကျင်သာသနာပိုင်၊သီတဂူအဓိပတိဆရာတော်ကြီးထံမှ ဩဝါဒကထာနာကြားပြီး လှုဒါန်းမှုအစုစုတို့ကို ရေစက်သွန်းချအမျှပေးဝေခဲ့ကာ သီတဂူကမ္ဘာ့ဗုဒ္ဓ တက္ကသိုလ် (ရန်ကုန်)၏၂၀၂၆-၂၀၂၇ ပညာသင်နှစ် ကျောင်းသားသစ်ကြိုဆိုပွဲနှင့်အောင်လက်မှတ်ဆက်ကပ်ပွဲအောင်မြင်စွာပြီးဆုံးခဲ့ပြီး သီတဂူအဓိဌာန် ညီညာစွာရွတ်ဆိုလျှက်အခမ်းအနားအောင်မြင်စွာပြီးမြောက်ခဲ့ပြီး အလှူရှင်များမှ စာရေးကိရိယာများနှင့်လှူဖွယ်ပစ္စည်းများ ဆက်ကပ်လှူဒါန်းခဲ့ကြကြောင်းသိရသည်။

■ အဆိုပါ အခမ်းအနားတွင်သီတဂူကမ္ဘာ့ဗုဒ္ဓတက္ကသိုလ်၊ ရန်ကုန်၏
Diploma in Buddha Dhamma Course (2024- 2026 Academic Year)
Diploma in Buddha's Teaching Course (2024-2026 Academic Year)
Advanced Study of Buddha Dhamma Course (2025-2026 Academic Year) ကို အောင်မြင်ပြီး ကျောင်းသား/သူတို့အား အောင်လက်မှတ် ဆက်ကပ်/ ချီးမြှင့်ခြင်း ဖြစ် ကြောင်း သိရသည်။

#YMG/NN #Yangon_Times

#Local_News
Published 16 June 2026

■ မန္တလေးတိုင်းဒေသကြီးအတွင်းရှိ လိုင်စင်ရစက်သုံးဆီအရောင်းဆိုင်များအား စဉ်ဆက်မပြတ် ကြီးကြပ်စစ်ဆေးလျက်ရှိကြောင်း သိရသည်။

■ ရေနံထွက်ပစ္စည်းကြီးကြပ်စစ်ဆေးရေးဦးစီးဌာန၊ မန္တလေးတိုင်းဒေသကြီး ကြီးကြပ်စစ်ဆေးရေးအရာရှိရုံးသည် လျှပ်စစ်နှင့်စွမ်းအင်ဝန်ကြီးဌာန၏ လမ်းညွှန်ချက်နှင့်အညီ မန္တလေးတိုင်းဒေသကြီး ရေနံနှင့်ရေနံထွက်ပစ္စည်းဆိုင်ရာလုပ်ငန်းများ ထိန်းသိမ်းကြီးကြပ်ရေးဆပ်ကော်မတီ၏ ကြီးကြပ်မှုဖြင့် ဝင်ရောက်စစ်ဆေးခြင်းဖြစ်သည်။
 
■ ထိုသို့ စစ်ဆေးရာတွင် စက်သုံးဆီအရောင်းဆိုင်များမှ ဖြန့်ဖြူးရောင်းချနေသော စက်သုံးဆီများ၏ အရည်အသွေးပြည့်မီမှန်ကန်မှုရှိ၊ မရှိ၊ အခြင်အတွယ်ပြည့်မီမှန်ကန်မှုရှိ၊ မရှိနှင့် သတ်မှတ်ရည်ညွှန်းဈေးနှုန်းအတိုင်း ရောင်းချမှုရှိ၊ မရှိတို့အား ဌာနပိုင် Mobile Fuel Lab ယာဉ်ဖြင့် လစဉ် ရှောင်တခင်စစ်ဆေးဆောင်ရွက်လျက်ရှိရာ ၂၀၂၆ ခုနှစ် ဇွန် ၁၅ ရက်တွင် မန္တလေးမြို့ပေါ်ရှိ စက်သုံးဆီအရောင်းဆိုင်လေးဆိုင်ကို ရှောင်တခင်ဝင်ရောက်စစ်ဆေး ဆောင်ရွက်ခဲ့ကြောင်း သိရသည်။
 
■ စက်သုံးဆီအရောင်းဆိုင်များအနေဖြင့် အရည်အသွေးပြည့်မီမှု မရှိခြင်း၊ အခြင်အတွယ်ပြည့်မီမှုမရှိခြင်း၊ သတ်မှတ်ရည်ညွှန်းဈေးနှုန်းအတိုင်း ရောင်းချမှုမရှိခြင်းများကို စစ်ဆေးတွေ့ရှိရပါကရေနံနှင့် ရေနံထွက်ပစ္စည်းဆိုင်ရာဥပဒေနှင့်အညီ အရေးယူဆောင်ရွက်လျက်ရှိကြောင်း သိရသည်။

#YMG/NN #Yangon_Times
 

#World_Health
Published 15 June 2026

■ နှစ်ခြိုက်စွာ အိပ်စက်ခြင်းနဲ့ ပတ်သက်လာရင် အိပ်ချိန်ပုံမှန်ရှိခြင်း၊ နံနက်ခင်း နေရောင်ထိတွေ့ခြင်းတို့က အဓိကကျတယ်လို့ ကျွမ်းကျင်သူ ဆိုထားပါတယ်။

■ ဆိုရှယ်မီဒီယာတွေမှာလည်း အကောင်းဆုံး အနားယူအိပ်စက်မှု ရရှိစေဖို့ ဖြတ်လမ်းနည်းတွေ ဖော်ပြနေကြပါတယ်။

■ ■ (၁) ပါးစပ်ကိုတိပ်ဖြင့်ပိတ်ထားခြင်း
ဒီနည်းလမ်းက နှာခေါင်းကနေ အသက်ရှူခြင်းကို ကောင်းမွန်စေပြီး ဟောက်ခြင်းကို လျှော့ချပေးကာ အိပ်စက်မှုမြှင့်တင်ပေးနိုင်တယ်လို့ ယူဆရပါတယ်။
ဒါပေမဲ့ အိပ်နေစဉ် အသက်ကြပ်တတ်တဲ့ သူတွေအတွက်တော့ သတိထားစရာ ဖြစ်ပါတယ်။

■ ■ (၂) ညမအိပ်ခင် အဆီအစိမ့်စားခြင်း
ညအိပ်ရာမဝင်ခင်မှာ အဆီများတာတွေ စားခြင်းဖြင့် သွေးတွင်းသကြားဓာတ် တည်ငြိမ်စေပြီး ဗိုက်ပြည့်ဝနေစေမယ်လို့ ဆိုနေကြပါတယ်။

■ ■ (၃) သဘာဝမယ်လတိုနင်
ညနေခင်းသောက်တဲ့ မော့တေးမှာ မယ်လတိုနင် သဘာဝအတိုင်းပေးနိုင်တဲ့ ချယ်ရီဖျော်ရည်နဲ့ ကြွက်သားပြေလျော့စေတဲ့ မဂ္ဂနီစီယံတို့ ရောနှောပါဝင်ပြီး ဆိုဒါထည့်သောက်ရပါတယ်။

■ ■ (၄) ကော်ဖီ
နှိုးစက်မြည်ပြီးလို့ မိနစ် ၂၀-၃၀ လောက် ဆက်မအိပ်ခင်မှာ ကော်ဖီသောက်ရတဲ့ နည်းလမ်းဖြစ်ပါတယ်။
ကဖင်းဓာတ်က စတင်အကျိုးပြုဖို့ ၁၅-၃၀ မိနစ်ခန့် ကြာမြင့်တာကြောင့် အိပ်ရာထတဲ့အချိန်မှာ လန်းဆန်းနေစေမှာ ဖြစ်ပါတယ်။

Source: New York Post

#World_Health
Published 15 June 2026

■ အသုံးများတဲ့ တာရှည်ခံဆိုးဆေးများပါတဲ့ စားစရာတွေ စားသုံးခြင်းဖြင့် သွေးပေါင်ချိန်တိုးခြင်းနဲ့ နှလုံးသွေးကြောရောဂါတို့ ဖြစ်နိုင်ခြေများစေနိုင်ဖွယ်ရှိကြောင်း European Heart Journal မှာ ဖော်ပြထားပါတယ်။

■ တာရှည်ခံဆေးတွေကို စက်ရုံထုတ်စားစရာပေါင်းများစွာမှာ အသုံးပြုနေပြီး ဒါတွေက နှလုံးသွေးကြောကျန်းမာရေးကို အန္တရာယ်ဖြစ်စေနိုင်ပါတယ်။

■ လေ့လာချက်ကြီးပြုလုပ်ရာမှာ ပြင်သစ်မှ လူပေါင်း ၁၁၂,၃၉၅ ဦး ပါဝင်ပြီး ၃ ရက်ကျော်ကာလအတွင်း စားသမျှသောက်သမျှကို ပြောပြခိုင်းပါတယ်။

■ တာရှည်ခံဆေးများအပြင် စားစရာတွေရဲ့ ပါဝင်ပစ္စည်းတွေကိုလည်း ဆန်းစစ်ခဲ့ကြကာ သွေးတိုးခြင်း၊ နှလုံးသွေးကြောရောဂါဖြစ်ခြင်း စတာတွေကို စောင့်ကြည့်ခဲ့ပါတယ်။

■ ၉၉.၅ ရာခိုင်နှုန်းသော ပါဝင်စမ်းသပ်သူတွေဟာ ပထမ ၂ နှစ်အတွင်း တာရှည်ခံဆေး အနည်းဆုံးတစ်မျိုး စားသုံးမိခဲ့ပါတယ်။

■ ဓာတ်တိုးဆန့်ကျင်မဟုတ်တဲ့ တာရှည်ခံဆေး အများဆုံးစားသူတွေဟာ သွေးတိုးနိုင်ခြေ ၂၉ ရာခိုင်နှုန်းပိုများခဲ့ပြီး ဓာတ်တိုးဆန့်ကျင် တာရှည်ခံဆေး အများဆုံးစားသုံးသူတွေကတော့ သွေးတိုးနိုင်ခြေ ၂၂ ရာခိုင်နှုန်း ပိုများတာတွေ့ရပါတယ်။

■ ပိုတက်ဆီယံဆော်ဘိတ်၊ ဆိုဒီယံနိုက်ထရိုက်၊ အက်စ်ကောဗစ်အက်ဆစ် အပါအဝင် အချို့သောတာရှည်ခံဆိုးဆေးတွေဟာ အဆိုပါ ကျန်းမာရေးအန္တရာယ်တွေနဲ့ ဆက်စပ်နေပါတယ်။

■ သုတေသီတွေကတော့ တာရှည်ခံဆေးတွေကို ပြန်လည်ကွပ်ကဲသုံးသပ်ရန် တောင်းဆိုထားပြီး အဆင့်ဆင့်ထုတ်လုပ်စားစရာတွေကို အနည်းဆုံးစားသုံးဖို့ အကြံပြုထားပါတယ်။

Source: Medical Xpress

ပြည်တွင်းပဲမျိုးစုံဈေးကွက်မှာ မြေပဲဆံဈေးနှုန်းများတက်လာတယ်လို့ ကုန်စည်ဒိုင်များထံမှ သိရပါတယ်။

#Local_News
Published 14 June 2026
#ပဲမျိုးစုံ #မြေပဲဆံ
#YMG/SW #Yangon_Times

#World_Health
Published 14 June 2026

■ တောင်ကယ်ရိုလိုင်းနား ဆေးတက္ကသိုလ် လေ့လာချက်တစ်ခုမှာ ငါးကြီးဆီက ကောင်းကျိုးထက် ဆိုးကျိုးပိုဖြစ်စေနိုင်တယ်လို့ တွေ့ရှိခဲ့ပါတယ်။

■ ငါးကြီးဆီက ဦးနှောက်အသိဉာဏ်လုပ်ဆောင်ချက် တိုးတက်စေနိုင်တယ်လို့ သိထားပေမယ့် ဒီလေ့လာချက်မှာတော့ ဦးခေါင်းဒဏ်ရာ အကြိမ်ကြိမ်ရသူတွေအတွက် ငါးကြီးဆီက မကောင်းနိုင်ပါဘူး။

■ ငါးကြီးဆီထဲက အဓိကအိုမီဂါ-၃ ဖက်တီးအက်ဆစ်ဖြစ်တဲ့ EPA က ဦးနှောက်ရဲ့ ဒဏ်ရာသက်သာနိုင်စွမ်းကို နှောင့်ယှက်နိုင်ဖွယ် ရှိပါတယ်။

■ ဒီအတွက် အဓိကအချက် ၂ ချက်က လုံလောက်စွာအိပ်စက်ဖို့နဲ့ ရေဓာတ်ဖြည့်ပေးဖို့ ဖြစ်ပါတယ်။

■ ခဏခဏ ဦးခေါင်းဒဏ်ရာ မရသူတွေကတော့ ငါးကြီးဆီ သောက်သုံးတာ မဆိုးဘူးလို့ ပြောနိုင်ပါတယ်။

■ တကယ်တမ်းတော့ အာဟာရနဲ့ ပတ်သက်လာရင် အစားအစာကို အရင်ဦးစားပေး စားသင့်ပြီး နောက်လိုအပ်မှသာ ဖြည့်စွက်ဆေးကို စဉ်းစားသင့်ပါတယ်။

■ ဒါမှလည်း အကျိုးမရှိတဲ့ ဖြည့်စွက်ဆေးအတွက် ငွေကြေးအလေအလွင့် မဖြစ်မှာပါ။

■ မိမိရဲ့လက်ရှိ အလေ့အကျင့်တွေကို နားလည်သဘောပေါက်သင့်ပြီး အစားအစာတွေ ချင့်ချိန်စားသုံးပေးပြီး အိုမီဂါ-၃ ပမာဏကို အကောင်းဆုံးအနေအထား ရရှိစေမှာဖြစ်ပါတယ်။

Source: WKBN

#World_Health
Published 14 June 2026

■ သွေးထဲမှာ အမိုင်နိုအက်ဆစ်တစ်မျိုးဖြစ်တဲ့ တိုင်ရိုဆင်းပမာဏ မြင့်မားခြင်းက အမျိုးသားတွေ အသက်တိုခြင်းနဲ့ ဆက်စပ်နိုင်ဖွယ်ရှိတယ်လို့ လေ့လာမှုကြီးတစ်ရပ်မှာ အကြံပြုထားပါတယ်။

■ ဟောင်ကောင်တက္ကသိုလ်နဲ့ ဂျော်ဂျီယာတက္ကသိုလ်တို့မှ သုတေသီတွေက လူပေါင်း ၂၇၀,၀၀၀ ကျော်ထံမှ ကျန်းမာရေးနဲ့ မျိုးဗီဇအချက်အလက်တွေကို ဆန်းစစ်ခဲ့ကြရာ တိုင်ရိုဆင်းပမာဏ မြင့်မားတဲ့ အမျိုးသားတွေဟာ ပျမ်းမျှအားဖြင့် အသက် ၁ နှစ်နီးပါး လျော့နည်းနေထိုင်ရတယ်လို့ ယူဆရပါတယ်။

■ ပရိုတိန်းကြွယ်ဝတဲ့ အစားအစာတွေနဲ့ ဖြည့်စွက်ဆေးတွေမှာ တွေ့ရတဲ့ တိုင်ရိုဆင်းဟာ ဦးနှောက်ဓာတုပစ္စည်းတွေ ထုတ်လုပ်တဲ့နေရာမှာ ပတ်သက်နေပြီး အသက်ကြီးလာတဲ့အခါ ရေရှည်သက်ရောက်မှု ရှိလာနိုင်ပါတယ်။

■ တိရိစ္ဆာန်တွေနဲ့ လေ့လာမှုတွေမှာတော့ တိုင်ရိုဆင်းလိုမျိုး အမိုင်နိုအက်ဆစ်တွေ လျှော့ချစားသုံးခြင်းဖြင့် အသက်ရှည်စေနိုင်မယ်လို့ ထင်ရပါတယ်။

■ သုတေသီတွေက တိုင်ရိုဆင်းဟာ အမျိုးသားတွေမှာ နေထိုင်သက်တမ်း တိုတောင်းခြင်းနဲ့ ဆက်စပ်နေတာကို ဆက်တိုက်တွေ့ရှိလာပါတယ်။

■ အမျိုးသားတွေဟာ သဘာဝအားဖြင့် အမျိုးသမီးတွေထက် တိုင်ရိုဆင်းပမာဏ ပိုများတာကြောင့် ပျမ်းမျှနေထိုင်သက်တမ်း ကွာဟတာ ဖြစ်နိုင်ပါတယ်။

■ တိုင်ရိုဆင်းမြင့်မားခြင်းက အင်ဆူလင်ယဉ်ပါးခြင်း၊ ဖိစီးမှု-တုံ့ပြန်မှုလမ်းကြောင်း လှုံ့ဆော်ခြင်း၊ လိင်ဟော်မုန်းများနဲ့ ဆက်ဆံခြင်းစတဲ့ ဖြစ်စဉ်များအပေါ် သက်ရောက်နိုင်ပါတယ်။

■ ဒီလေ့လာချက်က တိုင်ရိုဆင်းဖြည့်စွက်ဆေးတွေကို တိုက်ရိုက်စမ်းသပ်တာမဟုတ်ဘဲ တိုင်ရိုဆင်းပမာဏ ထိန်းချုပ်နိုင်ဖို့ စားသောက်နေထိုင်မှုပုံစံတွေ ဘယ်လိုလုပ်ရမလဲဆိုတာကို နောက်ထပ်သုတေသန ပြုလုပ်သင့်ကြောင်း ညွှန်ပြနေပါတယ်။

Source: SciTechDaily