Published 16 April 2024

အစ္စရေးလ်က အီရန်ရဲ့ နျူကလီးယား စက်ရုံတွေကို ပစ်မှတ်ထားလာနိုင်တာနဲ့ ပတ်သက်ပြီး ကုလသမဂ္ဂ နျူကလီးယား စောင့်ကြည့်ရေးအဖွဲ့ အကြီးအကဲက စိုးရိမ်နေကြောင်း တနင်္လာနေ့မှာ ပြောကြားလိုက်ပါတယ်။

နိုင်ငံတကာ နျူကလီးယားစွမ်းအင် အေဂျင်စီ(IAEA)မှ အီရန်စက်ရုံတွေကို ဝင်ရောက်စစ်ဆေးတာတွေကတော့ အင်္ဂါနေ့မှာ ပြန်လည်စတင်မှာ ဖြစ်ပါတယ်။

ဧပြီ ၁ ရက်နေ့ ဆီးရီးယားရှိ အီရန်သံရုံးဝင်းကို အစ္စရေးလ်ကလို့ သံသယဖြစ်နေတဲ့ လေကြောင်းတိုက်ခိုက်မှု ပြုလုပ်ခဲ့တဲ့အပေါ် အီရန်က လက်စားချေတဲ့အနေနဲ့ သီတင်းပတ်အကုန်မှာ ဒုံးကျည်တွေ ဒရုန်းတွေနဲ့ တိုက်ခိုက်ခဲ့ရာ အစ္စရေးလ်က ပြန်လည်တုန့်ပြန်သွားမှာ ဖြစ်တယ်လို့ အစ္စရေးလ်စစ်တပ် အကြီးအကဲက တနင်္လာနေ့မှာ ဆိုပါတယ်။

အစ္စရေးလ်မဟာမိတ်တွေက အရှေ့အလယ်ပိုင်းမှာ တင်းမာမှု မြင့်တက်လာမှာကို စိုးရိမ်နေကာ ဝိုင်းဝန်းတားဆီးနေတဲ့ကြားက အခုလို ပြောကြားလာတာ ဖြစ်ပါတယ်။

အီရန်က လုံခြုံရေးဆိုင်ရာ ချင့်ချိန်စရာတွေ ရှိတယ်ဆိုပြီး နျူကလီးယားစက်ရုံများကို တနင်္ဂနွေနေ့က ပိတ်သိမ်းခဲ့ကြောင်း IAEA ညွှန်ကြားရေးမှူးချုပ် ရာဖေးလ်ဂရော့စီက ဆိုပါတယ်။

တနင်္လာနေ့မှာ ပြန်ဖွင့်ခဲ့ပေမယ့် အခြေအနေတွေ မတည်ငြိမ်သေးသရွေ့ စစ်ဆေးရေးမှူးများကို လွှတ်ဦးမှာမဟုတ်ဘူးလို့ ဆိုပါတယ်။

‘’မနက်ဖြန်တော့ ပြန်လည်စတင်မှာဖြစ်ပြီး ထိုကိစ္စကြောင့် စစ်ဆေးရေးလုပ်ငန်းများကို ထိခိုက်မှာမဟုတ်ပါဘူး’’ လို့ ဂရော့စီက သတင်းထောက်တွေကို နယူးယော့ခ်မှာ ပြောကြားခဲ့ပါတယ်။

IAEA က အီရန်ရဲ့ အဓိကနျူကလီးယား စက်ရုံကြီးများကို ပုံမှန်စစ်ဆေးနေတာ ဖြစ်ပါတယ်။

အီရန်ကတော့ သူတို့ရဲ့ နျူကလီးယားစီမံကိန်းက လုံးဝငြိမ်းချမ်းတည်ငြိမ်တယ်လို့ ဆိုထားပေမယ့် အမေရိကန်က အီရန်ဟာ နျူကလီးယားဗုံးများ ပြုလုပ်ရန်ကြံရွယ်နေတယ်လို့ စွပ်စွဲထားပါတယ်။

Source: NDTV

Published 15 April 2024

လူတစ်ယောက်ရဲ့ လက်ရှိအသက်ထက် ကိုယ်တွင်းဇီဝအသက်က ပိုကြီးလာတဲ့အခါ အရွယ်လွန် မြန်လာပြီး ကင်ဆာအကျိတ်များ ဖြစ်နိုင်ခြေ ပိုများစေပါတယ်။

လတ်တလော ဆယ်စုနှစ်များအတွင်း ကင်ဆာဖြစ်နိုင်ခြေနဲ့ အရွယ်လွန်မြန်လာခြင်းတို့က ငယ်ရွယ် သူတွေမှာ တကယ်ကို ပြဿနာဖြစ်လာကြောင်း စိန့်လူးဝစ္စ ဝါရှင်တန်ဆေးတက္ကသိုလ်မှ ရူရီရှန်က ပြောပြပါတယ်။

အသက် ၅၅ နှစ်အောက်လူတွေမှာ ကင်ဆာတွေ့ခဲ့ရင် ငယ်ငယ်ရွယ်ရွယ်နဲ့ ကင်ဆာဖြစ်တယ်လို့ လေ့လာချက်ထဲမှာ သတ်မှတ်ပါတယ်။

၁၉၆၅ ခုနှစ်နောက်ပိုင်း မွေးဖွားသူတွေဟာ ယင်းတို့ထက် စောမွေးသူများထက် စောစီးစွာအိုမင်းခြင်း ၁၇ ရာခိုင်နှုန်း ပိုများတယ်လို့ သုတေသီများ ကောက်ချက်ချထားပါတယ်။

ထိုလေ့လာချက်တွေကနေ ကိုယ်တွင်းဇီဝအသက် အိုမင်းလာခြင်းကို နှောင့်နှေးစေကာ ကင်ဆာ ကာကွယ်နိုင်ရန် နည်းလမ်းတွေ့လာနိုင်တယ်လို့ မျှော်လင့်ရပါတယ်။

လက်ရှိမျိုးဆက်များအနေဖြင့် ကျန်းမာရေးအကြောင်း ပိုမိုသတိထားနေရန်နဲ့ အရွယ်လွန်မြန်လာခြင်းရဲ့ ဆိုးကျိုးတွေကို သိရှိရန် အရေးကြီးပါတယ်။

ဒါပေမဲ့ ထိုလေ့လာချက်တွေက ဗြိတိန်မှာပဲ စမ်းသပ်ထားတာကြောင့် အခြားနိုင်ငံ၊ လူမျိုးများနဲ့ တိုက်ရိုက်သက်ဆိုင်မနေနိုင်ပါဘူး။

လူတွေရဲ့ ပြက္ခဒိန်သက်တမ်း ကြီးလာတာနဲ့အမျှ ကင်ဆာ၊ ဆီးချို၊ နှလုံးရောဂါ၊ လေဖြတ်ခြင်းတို့ ဖြစ်နိုင်ခြေ များလာပါတယ်။

အဝလွန်နှုန်းကလည်း မြင့်တက်နေပြီး အရွယ်လွန်မြန်လာခြင်းနဲ့ ရောဂါဖြစ်နိုင်ခြေများခြင်းတို့နဲ့ ဆက်စပ်နေကာ ခန္ဓာကိုယ်ထဲမှာ ဇီဝဓာတုမမှန်ခြင်းများ ဖြစ်လာစေပါတယ်။

ဒါကြောင့် ကိုယ်တွင်းဇီဝသက်တမ်း ပိုမိုမြန်ဆန်စွာ အိုမင်းလာတဲ့အခါ အသက်အရွယ်နဲ့ ဆိုင်တဲ့ရောဂါတွေလည်း စောစီးစွာ ဖြစ်နိုင်ပါတယ်။

Source: New York Post

#World_News

ဇမ်ဘီယာနိုင်ငံမှာ တရုတ်မှ ဆောက်လုပ်တဲ့ အစ်ထမ်ပီ ဆိုလာလျှပ်စစ်ဓာတ်အားပေးစက်ရုံကို ကော့ပါးဘဲ့လ်ပြည်နယ် ကီထွေမှာ ဗုဒ္ဓဟူးနေ့က တရားဝင်ဖွင့်လှစ်လိုက်ပြီ ဖြစ်ပြီး တိုင်းပြည်စွမ်းအင်ကဏ္ဍမှာ အရေးပါတဲ့ မှတ်ကျောက်တစ်ခု ဖြစ်လာပါတယ်။

၁၅ ဧပြီ ၂၀၂၄

မန္တလေးတိုင်းဒေသကြီး ပြင်ဦးလွင်မြို့အတွင်းသို့ ဧပြီ ၁၄ရက် ညပိုင်းတွင် အကြမ်းဖက်သမားများက ၁၀၇မမ ရှော့တိုက်ဒုံး ၁၁ လုံးဖြင့် ပစ်ခတ်ခဲ့တဲ့အတွက် သံဃာတော်(၂)ပါးနှင့်ပြည်သူ(၂)ဦးသေဆုံးခဲ့ကာ ပြည်သူ ၁၂ ဦး ထိခိုက်ဒဏ်ရာများရရှိခဲ့ကြောင်း နစကရဲ့သတင်းထုတ်ပြန်ချက်အရသိရပါတယ်။

အကြမ်းဖက်သမားများပစ်ခတ်လိုက်တဲ့ ရှော့တိုက်ဒုံးများသည် ပြည်သူ့ဆေးရုံရှိ အရိုးကုသဆောင်၊ အောင်မြေ  ဇေယျာဘုန်းကြီးကျောင်း၊ Luxury Hotel ၊ ရပ်ကွက်ကြီး (၅)၊ ဗလမင်းထင်ရပ်ကွက်နှင့် စပါယ်ရပ်ကွက်များ အတွင်း သို့ ရှော့တိုက်ဒုံးသီးများ ကျရောက်ပေါက်ကွဲခဲ့တာဖြစ်ပါတယ်။

အဆိုပါတိုက်ခိုက်ခံရမှုကြောင့် အောင်မြေဇေယျာဘုန်းတော်ကြီးကျောင်းတွင် သီတင်းသုံး နေထိုင်သည့် ဘဒ္ဒန္တ  တေဇာနန္ဒနှင့် ဒုလ္လဘရဟန်း ၁ ပါး ၊ စုစုပေါင်း ၂ ပါးပျံလွန်တော်မူပြီး ပြည်သူ ၁ ဦး သေဆုံး၍ ၁ ဦးထိခိုက်ဒဏ်ရာများ ရရှိခဲ့ပါတယ်။ စပါယ်ရပ်ကွက်တွင် နေထိုင်သည့် ပြည်သူ ၁ ဦး သေဆုံးခဲ့ကာ ပြည်သူ့ ဆေးရုံတွင် တက်ရောက်  ဆေးကုသ မှုခံယူနေသော အသက် ၅ နှစ်နှင့် ၉ နှစ်အရွယ် ကလေးငယ်များအပါအဝင် လူနာနှင့် ဆေးရုံဝန်ထမ်း ၁၁ ဦးမှာ အပြင်းအထန် ထိခိုက်ဒဏ်ရာများ ရရှိခဲ့ကြောင်း သတင်းထုတ်ပြန်ချက်မှာဖော်ပြထားပါတယ်။

ထိခိုက်ဒဏ်ရာရရှိသူများကို လိုအပ်တဲ့ဆေးဝါးကုသမှုတွေလုပ်ဆောင်ပေးနေကြောင်းလည်းသိရပါတယ်။

ယခုကဲ့သို့ စစ်ရေးနှင့် မသက်ဆိုင်သော မြို့/ရွာ ရပ်ကွက်များ အတွင်းသို့ ရှော့တိုက်ဒုံးများ ရည်ရွယ်ချက်ရှိရှိဖြင့် ပစ်ခတ်ခြင်းသည် ဂျီနီဗာကွန်ဗန်းရှင်းနှင့် အပြည်ပြည်ဆိုင်ရာ ဥပဒေတို့အရ စစ်ရာဇဝတ်မှု(War Crime)ကို ကျူးလွန်ခြင်းဖြစ်တယ်လို့ နစကရဲ့သတင်းထုတ်ပြန်ချက်မှာဖော်ပြထားပါတယ်။ အဆိုပါအကြမ်းဖက်သမားများ  အား အမြန်ဆုံး ဖော်ထုတ်ဖမ်းဆီးနိုင်ရေး လုံခြုံရေး တပ်ဖွဲ့ဝင်များက လုံခြုံရေးလုပ်ငန်းများ တိုးမြှင့်ဆောင်ရွက် လျက်ရှိကြောင်းနှင့် ပြည်သူများ သက်ဆိုင်ရာသို့ လျှို့ဝှက်သတင်းပေးတိုင်ကြားပြီး ပူးပေါင်းပါဝင်ကြဖို့ နစက,က နှိုးဆော်ထားပါတယ်။

@ymg/knl

Published 15 April 2024

AI နည်းပညာဖြင့် ရင်သားကင်ဆာရှိတဲ့ လူနာတွေမှာ စောစီးစွာ ရောဂါတွေ့ရှိနိုင်ပြီး လာမယ့် ၂ နှစ်အတွင်း ကင်ဆာဖြစ်နိုင်ခြေ ရှိမရှိကို ခန့်မှန်းနိုင်မှာ ဖြစ်ပါတယ်။

ဘေလင်ဆန်ဆေးရုံက iCAD ရဲ့ လူလုပ်အသိဉာဏ် နည်းပညာများကို အသုံးပြုကာ ရင်သားဓာတ်မှန်ပေါင်း ၁ သောင်းခွဲကျော်ကို လေ့လာခဲ့ကြောင်း တနင်္လာနေ့က ကြေညာခဲ့ပါတယ်။

ထိုပညာဖြင့် ယခင်က ရှာမတွေ့ခဲ့တဲ့ အကျိတ်များကို တွေ့ရှိနိုင်ကာ ရောဂါရှာဖွေနိုင်စွမ်းကို သိသိသာသာ မြှင့်တင်ပေးနိုင်မှာဖြစ်ပြီး ရင်သားကင်ဆာကို စောစီးစွာတွေ့ရှိခြင်းဖြင့် အသက်ပေါင်းများစွာကို ကယ်တင်နိုင်မှာ ဖြစ်ပါတယ်။

တစ်ရှူးတွေထဲ ဓာတ်မှန်ရိုက်ကြည့်ပြီး လာမယ့် ၂ နှစ်အတွင်း ကင်ဆာအကျိတ် ဖြစ်နိုင်ခြေကို သုံးသပ်ပေးနိုင်ပါတယ်။

ထိုစနစ်ကို ကလဲလစ်ကျန်းမာရေး ကွန်ရက်ကြီးမှာ အသုံးပြုနေပြီဖြစ်ပြီး အမေရိကန် FDAကလည်း အသိအမှတ် ပြုထားပြီးဖြစ်ပါတယ်။

ထိုအစီအစဥ် စတင်ကတည်းက ဘေလင်ဆန်မှ ဓာတ်မှန်ပေါင်း ၁ သောင်းခွဲကျော်ကို ကူညီပေးထားပါတယ်။

Source: The Jerusalem Post

ကုလသမဂ္ဂ အထွေထွေအတွင်းရေးမှူး အန်တိုနီယိုဂူတာရက်စ်က စစ်ပွဲပဋိပက္ခ ပိုမိုပြင်းထန် လာနိုင်တဲ့အန္တရာယ်နဲ့ ပတ်သက်ပြီး နိုင်ငံတကာ အသိုင်းအဝိုင်းကို ဧပြီ ၁၄ ရက်နေ့က သတိပေးလိုက်ပါတယ်။

ဆီးရီးယားရှိ အီရန်ကောင်စစ်ဝန်ရုံးကို အစ္စရေးလ်တိုက်ခိုက်တဲ့အပေါ် အီရန်က လက်စားချေတဲ့အနေဖြင့် ပြီးခဲ့တဲ့ သီတင်းပတ်အကုန်က အစ္စရေးလ်ကို ဒုံးကျည်များ ဒရုန်းများဖြင့် ပစ်ခတ်ခဲ့တဲ့အကြောင်း ဂူတာရက်စ်က ကုလသမဂ္ဂလုံခြုံရေးကောင်စီ အစည်းအဝေးပွဲမှာ ပြောကြားခဲ့တာ ဖြစ်ပါတယ်။

တစ်ကမ္ဘာလုံးက နောက်ထပ်စစ်ပွဲတွေ ဖြစ်လာမှာကို မခံစားနိုင်တော့ဘဲ အရှေ့အလယ်ပိုင်း ဒေသဟာလည်း စစ်ပွဲကြီးဖြစ်တော့မယ့် အနေအထား ရောက်နေပြီဖြစ်ပြီး အခုက တင်းမာမှုလျှော့ချရမယ့် အချိန်ဖြစ်တယ်လို့ ဆိုလိုက်ပါတယ်။

အီရန်က အစ္စရေးလ်ကို ပစ်ခတ်တာတွေကိုရော အစ္စရေးလ်ဘက်ကလို့ စွပ်စွဲခံထားရတဲ့ အီရန်သံရုံးကို တိုက်ခိုက်မှုကိုရော ဂူတာရက်စ်က ရှုတ်ချလိုက်ပါတယ်။

အရှေ့အလယ်ပိုင်းမှာ စစ်ရေးထိပ်တိုက်ရင်ဆိုင်မှုတွေ ဖြစ်လာနိုင်တဲ့ လုပ်ရပ်မှန်သမျှ မပြုလုပ်ရန် အရေးကြီးကြောင်း ဆိုလိုက်ကာ ဂါဇာမှာ လူသားချင်းစာနာမှု ချက်ချင်းအပစ်အခတ် ရပ်စဲရေးကိုလည်း ထပ်မံတောင်းဆိုလိုက်ပါတယ်။

အကြမ်းဖက်တိုက်ခိုက်မှု ပြုလုပ်ခဲ့တဲ့ အီရန်ကို တတ်နိုင်သမျှ အရေးယူပိတ်ဆို့မှုများ ချမှတ်ပေးဖို့ ကုလသမဂ္ဂဆိုင်ရာ အစ္စရေးလ်သံအမတ် ဂျီလက်အာဒန်က လုံခြုံရေးကောင်စီကို လျှောက်တင်ခဲ့ပါတယ်။

ကုလသမဂ္ဂဆိုင်ရာ အီရန်သံတမန် အေမီယာဆာအိဒ်ကတော့ ယင်းတို့ဟာ ကိုယ်တိုင်ကာကွယ်ပိုင်ခွင့်အတိုင်း ကျင့်သုံးနေတာဖြစ်တယ်လို့ တုန့်ပြန်လိုက်ပါတယ်။

Source: WION

Published 15 April 2024

တရေးတမောမအိပ်ခင်မှာ ကော်ဖီသောက်ခြင်းဖြင့် နိုးလာတဲ့အခါ လန်းဆန်းတက်ကြွစေနိုင်တယ်လို့ ပညာရှင်တစ်ဦးက ဆိုလိုက်ပါတယ်။

ကဖင်းဓာတ်ဟာ ဇီဝကမ္မဖြစ်ပျက်ဖို့ မိနစ် ၃၀ ခန့် ကြာမြင့်တတ်ပြီး နိုးလာတဲ့အခါ နိုးကြားလန်းဆန်းမှုကို နှစ်ဆပေးနိုင်တယ်လို့ အိပ်စက်မှုကျန်းမာရေး ပညာရှင် ဂျိမ်းစ်ဝီလ်ဆန်က ပြောပြသွားပါတယ်။

၂၀၁၀ ခုနှစ်က လေ့လာမှုတစ်ခုမှာလည်း ကော်ဖီသောက်ပြီးပြီးချင်း တရေးအိပ်လိုက်ပါက ဦးနှောက်ကနေ ကဖင်းဓာတ်လက်ခံနိုင်စွမ်းကို မြှင့်တင်ပေးတယ်လို့ တွေ့ရှိဖူးပါတယ်။

ပုံမှန်အားဖြင့်တော့ ကော်ဖီသောက်လိုက်ရင် အိပ်ပျော်ဖို့ခက်ခဲပြီး ကဖင်းဓာတ်ပျက်ပြယ်ဖို့ကလည်း အချိန်ကြာမြင့်တတ်ပါတယ်။

တရေးမအိပ်ခင်လေးမှာတင် ကော်ဖီသောက်ပြီး မိနစ် ၂၀ ခန့်အိပ်လိုက်ခြင်းဟာ အကောင်းဆုံးနည်းလမ်း ဖြစ်တယ်လို့ ကျွမ်းကျင်သူတွေက ဆိုပါတယ်။

မိနစ် ၃၀ ထက်ကျော်အောင် အိပ်ရင်တော့ နိုးလာတဲ့အခါ ငိုက်မျဥ်းနေတတ်ပါတယ်။

ညဘက်နှစ်ခြိုက်စွာ အိပ်ပျော်ဖို့ ဆိုရင်တော့ ညအိပ်ခါနီး အနည်းဆုံး ၆ နာရီအကွာကစပြီး ကော်ဖီမသောက်သင့်ပါဘူး။

တစ်ယောက်နဲ့တစ်ယောက် ဇီဝဖြစ်စဥ်ချင်းမတူတာကြောင့် တရေးမအိပ်ခင် ကော်ဖီသောက်တာက အလုပ်ဖြစ်ချင်မှ ဖြစ်ပါလိမ့်မယ်။

အကြောင်းအမျိုးမျိုးကြောင့် အိပ်ရေးပျက်ထားပါက တရေးအိပ်ခြင်းက အကျိုးရှိစေပါတယ်။

Source: New York Post

၁၄ ဧပြီ ၂၀၂၄

မန္တလေးမြို့တော်ဝန်သင်္ကြန်မဏ္ဏပ်အနီးတွင် ဗုံးဖောက်ခွဲခဲ့သူတွေကို အမြန်ဆုံးဖော်ထုတ်ပြီး ပြင်းထန်စွာအရေး  ယူမယ်လို့ နစကသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောကြားလိုက်ပါတယ်။ မြန်မာ့ ရိုးရာသင်္ကြန်ပွဲတော် အကျနေ့မှာ ဖြစ်ခဲ့တဲ့ အဆိုပါ ဗုံးဖောက်ခွဲမှုအပေါ်ဗိုလ်ချုပ်ဇော်မင်းထွန်းက တုန့်ပြန် သတိပေးလိုက်တာဖြစ်ပါတယ်။ အကြမ်းဖက်မှုတွေကို ယခုထက်ပိုမိုစောင့်ကြည့်ပြီး ပိုမိုနှိမ်နှင်းသွားမယ်လို့ သူက ဆက်လက်ပြောဆိုလိုက်ပြီး ဗုံးပေါက်ကွဲမှုကြောင့် ထိခိုက်ဒဏ်ရာရရှိတဲ့ပြည်သူတွေကိုလည်း အထူးဝမ်းနည်း ကြေကွဲရတယ်လို့ပြောဆိုလိုက်ပါတယ်။

ဗိုလ်ချုပ်ဇော်မင်းထွန်းပြောကြားချက် အပြည့်အစုံကို ဖော်ပြပေးအပ်ပါတယ်။

@ymg/knl

Published_14 April 2024
မန္တလေး ဗုံးပေါက်ကွဲမှု နှစ်ခုဖြစ်စဉ် ၂ ခုတွင် ကလေး(၅)ဦးနှင့်လူကြီး(၇)ဦး ထိခိုက်ဒဏ်ရာရပြီး ၂ ဦးမှာ စိုးရိမ်ရကြောင်း သိရသည်။
ယနေ့ သင်္ကြန်အကျနေ့တွင် မန္တလေးမြို့၊ချမ်းအေးသာစံမြို့နယ်၊မန်းစည်ပင်ရုံးအနီး ၇၁ လမ်းနှင့်၂၇လမ်း ထောင့်၊၇၁လမ်း(၂၇×၂၈)လမ်းကြားတို့တွင် ဗုံးပေါက်ကွဲမှု များ ဖြစ်ပွားခဲ့၍ ကလေး(၅)ဦးနှင့်လူကြီး(၇)ဦး ထိခိုက်ဒဏ်ရာရကြောင်း သိရသည်။
ယနေ့ ဧပြီလ ၁၄ ရက် နံနက် ၁၀ နာရီ ၂၅ မိနစ်ခန့်က ချမ်း အေးသာစံမြို့နယ်၊မန်းစည်ပင်ရုံး အနီး၇၁လမ်း နှင့်၂၇လမ်းထောင့် ရှိ ဆိုင်ကယ်အပ်နှံရာ နေရာတွင် ရပ်နားထားရှိသော (အမျိုးအစား/နံပါတ်) စိစစ်ဆဲ ဆိုင်ကယ်အတွင်းမှ ပေါက် ကွဲမှု ဖြစ် ပွားခဲ့သောကြောင့် အမျိုးသား ၆ ဦးနှင့်အမျိုးသမီး၂ ဦး၊ စုစု ပေါင်း ၈ဦး ထိခိုက်ဒဏ်ရာ အသီးသီးရရှိခဲ့ကြောင်း သိရသည်။
အလူးတူ နံနက် ၁၀နာရီ ခွဲခန့်ကလည်း ၇၁လမ်း(၂၇×၂၈) လမ်းကြားရှိ ဆိုင်ကယ်အပ် နှံရာနေရာတွင် ဆိုင်ကယ်အတွင်းမှ ထပ်မံ၍ ဗုံးပေါက်ကွဲမှု ဖြစ်ပွားခဲ့ခြင်းကြောင့် အနီးရှိ စိစစ်ဆဲ အမျိုးသား ၃ ဦးနှင့်အမျိုးသမီး ၁ ဦး စုစု ပေါင်း ၄ ဦး ထိခိုက်ဒဏ်ရာ ရရှိခဲ့ခြင်း ဖြစ်ပြီး ထိခိုက်ဒဏ်ရာရရှိသူများအနက် အမျိုးသား(၂)ဦး စိုးရိမ်ရကြောင်းလည်း သိရသည်။
ထိခိုက်ဒဏ်ရာရရှိသူများမှာ လည်ပင်း၊ယာပါး၊ နှုတ်ခမ်း ပေါက်ပြဲဒဏ်ရာ၊ ခြေထောက်မိုင်းထိဒဏ်ရာ ၊ လက်ဝဲ နား နှင့် လက် ပေါက်ပြဲဒဏ်ရာ၊လက်ယာဘက်ရင်အုံ ပေါက်ပြဲ ဒဏ်ရာ ၊မျက်နှာ ပေါက်ပြဲဒဏ်ရာ၊ခြေထောက် ပေါက်ပြဲ ဒဏ်ရာ၊ လက်ဝဲ လက်ညှိူး၊ လက်ယာ လက်ဖမိုး ပေါက်ပြဲဒဏ်ရာ၊ လက်ယာယာပါး ပေါက်ပြဲဒဏ်ရာ၊ ခြေထောက်၊ပုခုံး၊လက် စသည်တို့တွင် ထိခိုက်ဒဏ်ရာ အသီးသီး ရရှိခဲ့ကြောင်း သိရသည်။

Yangon_Times /PP

#Developing_Stories

၁၄ ဧပြီ ၂၀၂၄

အီရန်ရဲ့လေကြောင်းတိုက်ခိုက်မှုဟာ ဘာတန်ဖိုးမှထိခိုက်မှုမရှိဘူးလို့ အမေရိကန်သမ္မတ ဘိုင်ဒင်က အစ္စရေးဝန်ကြီးချုပ် နေတန်ယာဟုကို ဖုန်းဆက်သွယ်ပြောဆိုလိုက်ပါတယ်။ အီရန်ကိုတိုက်ခိုက်ဖို့ အမေရိကန်တပ်တွေပါဝင်မှာမဟုတ်ဘူးလို့လည်း ဘိုင်ဒင်က အခိုင်အမာပြောလိုက်ပါတယ်။

တိုက်ခိုက်ခံရမှုတွေအတွင်း အစ္စရေးရဲ့ ကာကွယ်ရေးဟာ အောင်နိုင်ခဲ့တယ်လို့ ဘိုင်ဒင်ကပြောလိုက်ပြီး   ရာပေါင်းများစွာသော ဒုံးကျည်တွေနှင့်ဒရုန်းတွေ အားလုံးနီးပါးကို ဟန့်တားပေးနိုင်တဲ့စွမ်းရည်ဟာ အစ္စရေးစစ်တပ်ရဲ့ သာလွန်ကောင်းမွန်မှုကိုပြသနေတာဖြစ်တယ်လို့လည်း ဘိုင်ဒင်က နေတန်ယာဟုကို ပြောလိုက်တယ်လို့ အမေရိကန်အရာရှိတစ်ဦးက စီအင်န်အင်န်သတင်းဌာနကိုပြောပါတယ်။

အမေရိကန်အနေနှင့် အီရန်အပေါ် စစ်ရေးအရထိုးစစ်ဆင်မှုတွေမှာ ပါဝင်ပတ်သက်မှာမဟုတ်ဘူးလို့လည်း ဘိုင်ဒင်က ရှင်းရှင်းလင်းလင်းပြောခဲ့တယ်လို့ အဆိုပါ အဆင့်မြင့်အရာရှိက စီအင်န်အင်န်ကိုပြောပါတယ်။

အစ္စရေးနယ်စပ်အပြင်ဘက်မှာ ကျည်ဖူးအမြောက်အမြားကို အမေရိကန်စစ်တပ်ရဲ့အကူအညီနှင့် အစ္စရေး  ကာကွယ်ရေးတပ်ဖွဲ့တွေက ပစ်ချ နိုင်ခဲ့တယ်လို့ အစ္စရေးစစ်တပ်ကပြောပါတယ်။

စနေနေ့ည အီရန်ရဲ့တိုက်ခိုက်ခံရမှုအပြီးမှာ နေတာယာဟုနှင့်ဘိုင်ဒင်တို့ ဖုန်းဆက်သွယ်ပြောဆိုခဲ့ကြ တယ်လို့ အစ္စရေးဝန်ကြီးချုပ်ရုံးက အတည်ပြုပါတယ်။

“ကျွန်တော့်ရဲ့ညွှန်ကြားချက်အရ အစ္စရေးရဲ့ကာကွယ်ရေးကို အထောက်အကူပြုဖို့ ပြီးခဲ့တဲ့ ရက်သတ္တပတ် တွေမှာ အမေရိကန်စစ်တပ်ဟာ လေယာဉ်တွေနှင့် တိုက်ချင်းပစ် ဒုံးကျည်ကာကွယ်ရေဖျက်သင်္ဘော တွေကို အစ္စရေးထံ ရွှေ့ပြောင်းပေးခဲ့တယ်” လို့ ဘိုင်ဒင်က နေတာယာဟုနှင့် ဖုန်းဆက်အပြီးသတင်းထုတ် ပြန်ချက်မှာဖော်ပြထားပါတယ်။

“အဲဒီလိုတပ်ဖြန့်ချထားမှုတွေနှင့်ကျွန်တော်တို့စစ်သည်တွေရဲ့ သူမတူအောင်ထူးချွန်တဲ့အရည်အချင်းတွေ ကြောင့် ဝင်ချလာတဲ့ ဒရုန်းတွေနှင့် ဒုံးကျည်အကုန်နီးပါးကို အစ္စရေးကပစ်ချနိုင်အောင် ကျွန်တော်တို့ ကူညီပေးနိုင်ခဲ့ပါတယ်” လို့ ဘိုင်ဒင်ကပြောပါတယ်။

အနည်းငယ်မျှသော ဒုံးကျည်တွေသာ ထိုးဖောက်ဝင်ရောက်နိုင်ခဲ့ပြီး အစ္စရေးရဲ့ စစ်စခန်းတစ်ခုကို ထိမှန် ခဲ့ပါတယ်။ ဒါပေမယ့် ပျက်စီးမှုအနည်းအကျဉ်းပဲရှိပြီး ဘယ်သူမှထိခိုက်မှုမရှိပါဘူးလို့ အစ္စရေးစစ်တပ်က ပြောပါတယ်။

အမေရိကန်ဟာ ဒရုန်းအစင်းရေ ၇၀ကျော်နှင့် တိုက်ချင်းပစ်ဒုံးကျည် အနည်းဆုံးတစ်စင်းကို အမေရိကန် တပ်တွေက ဟန့်တားနိုင်ခဲ့တယ်လို့ အမေရိကန် ဝါရင့်အရာရှိတစ်ဦးက စီအင်န်အင်န်ကိုပြောပါတယ်။

အဆိုပါဒုံးကျည်ကို အရှေ့မြေထဲပင်လယ်မှာရှိနေတဲ့ အမေရိကန်ရဲ့ ဒုံးကျည်ဖျက်သင်္ဘောနှစ်စီးကနေ ပစ်ချခဲ့တာဖြစ်တယ်လို့လည်း သူကပြောပါတယ်။ အမေရိကန်ရဲ့ တိုက်လေယာဉ်တွေကလည်း အစ္စရေးရဲ့  ကာကွယ်ရေးမှာ ဝင်ကူပေးခဲ့တယ်လို့ နောက်အရာရှိတစ်ဦးက ထပ်ပြောပါတယ်။

 အီရန်ရဲ့ တိုက်ခိုက်မှုအပေါ် ပြန်လည်ပြီး သံတမန်ရေးအရ ညီညီညွတ်ညွတ်တုန့်ပြန်နိုင်ဖို့ ဂျီဆဲဗင်း အုပ်စု ခေါင်းဆောင်တွေနှင့် တွေ့မယ်လို့ ဘိုင်ဒင်ကပြောပါတယ်။

Source NY Post

Published 14 April 2024

နေကြတ်ခြင်းဖြစ်စဥ်တွေဟာ မြင်တွေ့ရသမျှထဲမှာ ထူးခြားဆန်းကျယ်ဆုံးသော ဖြစ်ရပ်တွေထဲက တစ်ခုဖြစ်ပြီး အခုဆိုရင် အလိုရှိတဲ့အတိုင်း ဖန်တီးနိုင်တော့မှာ                ဖြစ်ပါတယ်။

ဥရောပမှ သိပ္ပံပညာရှင်များက နေကြတ်ခြင်းအတု ဖန်တီးနိုင်မယ့် နည်းလမ်းတစ်မျိုး တွေ့ရှိထားပြီ ဖြစ်ပါတယ်။

Proba-3 လို့အမည်ပေးထားတဲ့ စီမံကိန်းမှာ အာကာသယာဥ် ၂ ခုကို နေရာချိန်ညှိပြီး နေကြတ်ခြင်းကို လိုချင်တဲ့အတိုင်း ဖန်တီးနိုင်ရန် စီစဥ်နေကြပါတယ်။

ပြီးခဲ့တဲ့ ရက်သတ္တပတ် ဘယ်လ်ဂျီယံမှာ ပြုလုပ်တဲ့ ပွဲတစ်ပွဲမှာ ဥရောပအာကာသအေဂျင်စီ (ESA)က Proba-3 ဂြိုဟ်တုများဖြစ်တဲ့ Coronagraph နဲ့ Occulter တို့ကို ဖော်ထုတ်ပြသခဲ့ပါတယ်။

Occulter က Coronagraph နားတဝိုက် ၁၅၀ မီတာခန့်ကနေ ပျံသန်းစေမှာ ဖြစ်ပါတယ်။

ဂြိုဟ်တုတွေ သတ်မှတ်ထားတဲ့ နေရာအတိအကျကို ရောက်တာနဲ့ Occulter က Coronagraph မျက်နှာပြင်ပေါ် အရိပ်ထိုးစေကာ နေကိုပါအုပ်ပြီး စက်ဝန်းရောင် ထွက်ပေါ်စေမှာ ဖြစ်ပါတယ်။

အနည်းမျှပင် နေရာလွဲချော်တာနဲ့ မအောင်မြင်နိင်တာကြောင့် အလွန်ခက်ခဲတယ်လို့ ESA ညွှန်ကြားရေးမှူး ဒီယက်မာပစ်ဇ်က ပြောပြပါတယ်။

၁၉၇၅ ခုနှစ်တုန်းကလည်း အမေရိကန်နဲ့ ဆိုဗီယက်ပြည်ထောင်စုတို့မှ နက္ခတ္တပညာရှင်များ ပူးပေါင်းကာ နေကြတ်ခြင်းအတု ဖန်တီးရန် အလားတူစမ်းသပ်ခဲ့ဖူးပါတယ်။

ပျံသန်းမှုပုံစံ အမျိုးမျိုးကို ဖော်ပြသွားမှာဖြစ်ပြီး ဂြိုဟ်လည်ပတ်မှုနည်းပညာများနဲ့ စမ်းသပ်သွားမှာဖြစ်ကာ အောင်မြင်သွားပါက အနာဂတ်မစ်ရှင်တွေမှာ အသုံးပြုနိုင်မှာ ဖြစ်တယ်လို့ ပြောကြားသွားပါတယ်။

Source: WION

Published 14 April 2024
အလုပ်စားပွဲမှာ အထိုင်များခြင်းကြောင့် ကျန်းမာရေးပြဿနာ အမျိုးမျိုး ဖြစ်နိုင်တဲ့အပြင် ကျားအင်္ဂါကိုပါ ထိခိုက်စေတယ်လို့ တွေ့ရှိထားပါတယ်။
တောင်မတ်ရန် ပြဿနာရှိခြင်း၊ ထောင်မတ်မှု အားနည်းခြင်း၊ လိင်အထွတ်အထိပ် ရောက်ရှိရန် ခက်ခဲခြင်းတို့အထိ ဖြစ်တတ်ပါတယ်။
ကိုယ်နေဟန်ထား မမှန်ခြင်းရဲ့ ကျန်းမာရေးပြဿနာများအကြောင်း အမျိုးသားကျန်းမာရေး ဆရာဝန် ဒေါက်တာ ဂျက်ဖ်ဖော်စတာက ပြောပြသွားပါတယ်။
ကျောကုန်းခြင်း၊ ဦးခေါင်းစောင်းခြင်းတို့ကလည်း ကိုယ်နေဟန်ထား မမှန်တဲ့ လက္ခဏာတွေ ဖြစ်ပါတယ်။
ကိုယ်နေဟန်ထား မမှန်ခြင်းကြောင့် တင်ပါးရိုးများ တင်းကြပ်အားနည်းလာတတ်ပါတယ်။
ဆီးအိမ်၊ အူတွေကို ထောက်ပံ့ထားတဲ့ ကြွက်သားတွေပါပြီး ကိုယ်နေဟန်ထား မမှန်ပါက အာရုံကြော လုပ်ဆောင်ချက်များကို ထိခိုက်စေပါတယ်။
ကျားအင်္ဂါပါ ထိလာတဲ့အခါ ထောင်မတ်မှု အားနည်းခြင်း၊ ဆန္ဒမပြီးမြောက်ခြင်တို့ပါ ဖြစ်လာနိုင်တယ်လို့ ရှင်းကြပါတယ်။
တင်ပါးရိုးရှိ အင်္ဂါများလည်း ပြဿနာဖြစ်လာကာ ဆီးယိုစိမ့် နာကျင်ခြင်း၊ လိင်တံနဲ့ အနားတဝိုက် တင်းရင်းနာကျင်ခြင်းတို့ ဖြစ်စေနိုင်ပါတယ်။
ကျောရိုးနဲ့ တင်ပါးကြွက်သားတွေကို အနေတော်ထိန်းထားဖို့က အရေးကြီးပြီး လိင်တံသို့ သွေးစီးဆင်းစေမှာ ဖြစ်ပါတယ်။
မတ်တပ်ရပ် အနေအထား မှန်ဖို့ဆိုရင် နံရံကိုကျောပေးရပ်ကာ ဦးခေါင်း၊ ပခုံးရိုး၊ တင်ပါးတို့က နံရံကို ထိထားရမှာ ဖြစ်ပါတယ်။
အလုပ်သဘောအရ ကြာရှည်ထိုင်ရမယ် ဆိုရင်တော့ ကွန်ပျူတာဖန်သားပြင်ကို မျက်လုံးနဲ့ တည့်စေကာ ခြေဖျားတွေက မြေပြင်မှာ ကပ်လျက်ရှိစေပြီး လက်တွေက စားပွဲပေါ်မှာ သက်တောင့်သက်သာ ရှိနေရမှာ ဖြစ်ပါတယ်။
ကိုယ်နေဟန်ထားမှန်ကန်ခြင်းဖြင့် ကျားအင်္ဂါသို့ သွေးစီးဆင်းစေကာ ကောင်းစွာထောင်မတ်နိုင်မှာ ဖြစ်ပါတယ်။
Source: Metro