#Local_News
Published_3 July 2024

▪️ ရှမ်းပြည်နယ်(မြောက်ပိုင်း)၊ လားရှိုးမြို့အတွင်း ရှော့တိုက်ဒုံးများပစ်ခတ်ခံရ၍ အသက်(၁၂)နှစ်နှင့် (၁၄)နှစ် အရွယ် ကလေး ၃ ဦး အပါအဝင် ဒေသခံ ၆ ဦး သေဆုံးခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

▪️ ယနေ့ ဇူလိုင်လ နံနက် ၆ နာရီ ၄၅ မိနစ်ခန့်က လားရှိုးမြို့အတွင်းသို့ အကြမ်းဖက်သောင်းကျန်းသူများက မြို့၏အရှေ့မြောက်ဘက် မီတာ ၄၀၀၀ ခန့် အကွာမှ ရှော့တိုက်ဒုံးများဖြင့် အကြောင်းမဲ့ပစ်ခတ်တိုက်ခိုက်ခဲ့ရာ လားရှိုးမြို့၊ ရပ်ကွက် (၁)၊ နယ်မြေ(၃)၊ သာယာလမ်းပေါ်ရှိ လူနေအိမ်ပေါ်သို့ ကျရောက်ပေါက် ကွဲခဲ့ကြောင်း သိရသည်။

▪️ ယင်းကြောင့် ကချင်တိုင်းရင်းသားမိသားစုဖြစ်သော ဒေါ်မာဂျီ ၄၉ နှစ် ၊ ဆိုင်းခွန် ၃၅ နှစ် ၊ မေရီ ၃၃ နှစ် ၊ ဇဇောင်း ၁၂ နှစ် ၊ ဒွဲအောင် ၁၄ နှစ် ၊ ဇေညွယ် ၁၂ နှစ် တို့ နေရာတွင်ပင် သေဆုံးခဲ့ကြရခြင်းဖြစ်ကြောင်း သိရသည်။

▪️ အဆိုပါ သေဆုံးသူများကို လုံခြုံရေးတပ်ဖွဲ့ဝင်များနှင့် ပရဟိတအသင်းအဖွဲ့များက လားရှိုးမြို့ပြည်သူ့ဆေး ရုံသို့ ပို့ဆောင်ခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။

#YMG #Yangon_Times #Yangon_Media_Group

#Local_News
Published 3 July 2024

▪️ ကချင်ပြည်နယ်၊ ရွှေကူမြို့၊ မြေနိမ့်ပိုင်းရပ်ကွက်များသို့ ဧရာ၀တီမြစ်ရေဝင်ရောက်၍ ကူညီကယ်ဆယ်ပေးနေကြောင်း မြန်မာနိုင်ငံမီးသတ်တပ်ဖွဲ့မှ သိရသည်။

▪️ ဇူလိုင်၃ ရက်နေ့၊ မနက် ၈ နာရီအချိန်ခန့်က ကချင်ပြည်နယ်၊ ရွှေကူမြို့၊ မြေနိမ့်ပိုင်းရပ်ကွက်များရှိ နေအိမ်များအတွင်း ဧရာ၀တီမြစ်ရေဝင်ရောက်မှုကြောင့် ရွှေကူမြို့နယ်မီးသတ်စခန်းမှ မီးသတ်ယာဉ်(၁)စီး၊ ရှာဖွေကယ်ဆယ်ရေးလှေ(၃)စီး၊ သန္ဓေမီးသတ်တပ်ဖွဲ့ဝင်များနှင့် သက်ဆိုင်ရာအဖွဲ့အစည်းများ ပူးပေါင်း၍ ကူညီရွှေ့ပြောင်းပေးခြင်းလုပ်ငန်းများ ဆောင်ရွက်ခဲ့ကြောင်း သိရသည်။

#YMG/NN #Yangon_Times

#Local_News
Published 3 June 2024

▪️ ဇူလိုင်လအတွက် သင့်တင့်မျှတသည့် ဆန်ဈေးများ သတ်မှတ်‌ပေးထားပြီးပြန်လည်ရောင်းချသူများအနေဖြင့်  ယင်း သတ်မှတ်ဈေးထက် ၈ ရာခိုင်နှုန်းထက်ပိုပြီး ရောင်းချခွင့်မပြုကြောင်း မြန်မာနိုင်ငံဆန်စပါးအသင်းချုပ်(MSF)မှသိရသည်။

▪️ ထိုသို့သတ်မှတ်ရာတွင် ပြည်ပပို့ဆန်ကြမ်းများဖြစ်သည့်  ၅မှတ်နှင့် ၁၀မှတ်ရှိသည့် ဆန်တစ်အိတ်လျှင်ကျပ် ၇သောင်းခွဲမှ ရှစ်သောင်းရှစ်ထောင်ကျပ်၊ ၁၅မှတ်ဆန်တစ်အိတ်လျှင် ကျပ် ၇သောင်းနှစ်‌ထောင်မှ  ရှစ်သောင်းလေးထောင်ကျပ်၊၂၅မှတ် ဆန်တစ်အိတ်လျှင် ကျပ်၇သောင်းခုနှစ်‌ထောင်မှ  ရှစ်သောင်းကျပ်စသည်ဖြင့် အသီးသီးသတ်မှတ်ထား ကြောင်းသိရသည်။

▪️ ပြည်ပတင်ပို့သည့် အပြင်ပြည်တွင်းစားသုံးသည့်  ဆန်များဖြစ်သည့်  ဧရာမင်း၊ ရက်၉၀၊ မဂျမ်းတောအပါအဝင်   ၅ မှတ်နှင့်၁၀မှတ် ဆန်တစ်အိတ်လျှင်ကျပ်ရှစ်သောင်းခွဲမှ တစ်သိန်းသုံးသောင်းကျပ်၊ ဧရာဝတီပေါ်ဆန်းအုပ်စုဆန်တစ်အိတ်လျှင်ကျပ်ကိုးသောင်းခွဲမှ တစ်သိန်းသုံးသောင်းကျပ်အထိနှင့် ရွှေဘိုပေါ်ဆန်းတစ်အိတ်လျှင်  ကျပ် ၁၃၅,၀၀၀မှ ၁၄၅,၀၀၀ကျပ် အထိဈေးနှုန်းအသီးသီးသတ်မှတ်ထားကြောင်း သိရသည်။

▪️ ဈေးရောင်းစင်တာ များတွင်  ရောင်းချရမည်ါ  သင့်တင့်မျှတသည့်  ဈေးနှုန်းများမှာ  ရွှေဘိုပေါ်ဆန်း1kg တစ်အိတ်လျှင် ကျပ် ၃၅၀၀ မှ  ၃၈၀၀ကျပ်၊ ဧရာဝတီပေါ်ဆန်း 1kg တစ်အိတ်လျှင်  ကျပ် ၃၀၀၀ မှ  ၃၃၀၀ကျပ်၊ ရက်၉၀ /အထူးဧည့်မထ 1kg တစ်အိတ်လျှင်  ကျပ် ၂၂၀၀ မှ  ၂၅၀၀ကျပ်အထိဈေးနှုန်းသတ်မှတ်ထား ကြောင်းသိရသည်။

▪️ 2 kg , 5kg , 10kg , 12kg စသည့် အရွယ်အစားများဖြင့် ထုတ်ပိုးရောင်းချရာတွင်လည်း  အခြေခံသတ်မှတ်ပေးထားသည့်  1kgဈေးနုန်းကိုသာအခြေခံတွက်ချက်ရမည်ဖြစ်ကြောင်း သိရသည်။

▪️ MSFက ဇူလိုင်လအတွက် သင့်တင့်မျှတသည့် ဈေးနှုန်းများဖြင့် သတ်မှတ်ပေးထားသည့် ဆန်များကိုဈေးကွက်အတွင်းရောင်းချသည့် အခါမှာ သတ်မှတ်ထားသည့် သင့်တင့်မျှတသည့်ဈေးနှုန်းအပေါ် ၈ရာခိုင်နှုန်းထက်ပို၍ ရောင်းချခွင့်မပြုကြောင်း သိရသည်။

▪️ အဆိုပါ သင့်တင့်မျှတသည့် ဈေးကွက်ဈေးနှုန်းတွက်ချက်ခြင်းသည် စိုက်ပျိုးသူများ၊ တောင်သူများ၊ ဆန်စက်လုပ်ငန်းများ၊သိုလှောင်ဖြန့်ဖြူးရောင်းချသူများနှင့်  စားသုံးသူပြည်သူများအတွက် သင့်တင့်မျှတသည့် ဈေးနှုန်းများဖြစ်စေရန်တွက်ချက်ထားခြင်းဖြစ်ပြီး ယခင်နှစ်ဈေးနှုန်းများ၊နိုင်ငံတကာဈေးနှုန်းများ၊ပြည်ပဈေးကွက်ရှိအခြားကုန်ဈေးနှုန်းများ နှင့် ချင့်ချိန်ပြီးတွက်ချက်ထားကြောင်း သိရသည်။

▪️ Super Market များ၊mini Market များရှိ Consumer Packaging နှင့် Modern Trade ရောင်းချမှုများ အတွက် သီးခြားထုတ်ပြန်ထားသည့် ရည်ညွှန်းဈေးများ ကိုသာအသုံးပြုရမည်ဖြစ်ကြောင်း သိရသည်။

▪️ ဝယ်ယူရန်အခက်အခဲရှိပါက MSFသို ဆက်သွယ်ညှိနှိင်းဝယ်ယူနိုင် ကြောင်းသိရသည်။ သင်တင့်မျှတသည့် ဈေးနှုန်းဖြင့် မရောင်းချပါကစားသုံးသူရေးရာဦးစီးဌာနနှင့် MSFသို့ အသိပေးတိုင်ကြားနိုင်‌ကြောင်း သိရသည်။

#YMG/NN #Yangon_Times

#Local_News
Published 03 July 2024

▪️ ဗန်းမော်မြို့နှင့်ရွှေကူမြို့တို့တွင် မြစ်ရေကြီးနေ၍ နေအိမ်များအတွင်းသို့ ရေဝင်ရောက်မှုဖြစ်ပွားနေသဖြင့်ကူညီရွှေ့ပြောင်းပေးနေရကြောင်း မြန်မာနိုင်ငံမီးသတ်တပ်ဖွဲ့မှ သိရသည်။

▪️ ဇူလိုင်လ ၃ရက်နေ့၊ ၀၆ ၀၀ အချိန်ခန့်၊ ကချင်ပြည်နယ်၊ ဗန်းမော်မြို့၊ မြေနိမ့်ပိုင်းရပ်ကွက်များရှိ နေအိမ်များအတွင်း ဧရာဝတီမြစ်ရေဝင်ရောက်မှုကြောင့် ဗန်းမော်ခရိုင်မီးသတ်စခန်းမှ ရှာဖွေကယ်ဆယ်ရေးယာဉ်(၁)စီး၊ မီးသတ်စက်ယာဉ်(၁)စီး၊ ရှာဖွေကယ်ဆယ်ရေးလှေ(၈)စီး၊ သန္ဓေမီးသတ်တပ်ဖွဲ့ဝင်များနှင့် သက်ဆိုင်ရာအဖွဲ့အစည်းများပူးပေါင်း၍ ကူညီရွှေ့ပြောင်းပေးခြင်းလုပ်ငန်းများနှင့် သတိပေးဆော်ဩခြင်းလုပ်ငန်းများ ဆောင်ရွက်လျက်ရှိသည်ဟုဆိုသည်။

▪️ ဇူလိုင်လ၂ ရက်နေ့၊ ၀၉ ၀၀ အချိန်ခန့်၊ ကချင်ပြည်နယ်၊ ဗန်းမော်ခရိုင်၊ ရွှေကူမြို့၊ အမှတ်(၄)ရပ်ကွက် (ဘောဂဗလရပ်)အတွင်း ဧရာဝတီမြစ်ရေမြင့်တက်ဝင်ရောက်လာ၍ နေအိမ်များအတွင်းသို့ ရေဝင်ရောက်မှုဖြစ်ပွားကြောင်း သတင်းရရှိသဖြင့် ရွှေကူမြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်များနှင့် သက်ဆိုင်ရာအဖွဲ့အစည်းများပူးပေါင်း၍ ရေဘေးလွတ်ရာ သူဌေးတောရဘုန်းတော်ကြီးကျောင်းသို့ ကူညီရွှေ့ပြောင်းပေးခဲ့ကြောင်း  မြန်မာ နိုင်ငံမီးသတ်တပ်ဖွဲ့မှ သိရသည်။

#tthl #Yangon_Times

#World_News
Published 03 July 2024

▪️ အမေရိကန်သမ္မတ ဂျိုးဘိုင်ဒင်က ပြီးခဲ့တဲ့ ကြာသပတေးနေ့ သမ္မတလောင်း စကားရည်လုပွဲမှာ အကောင်းဆုံး မယှဉ်ပြိုင်နိုင်ခဲ့တာကို အင်္ဂါနေ့မှာ ဝန်ခံလိုက်ပြီး ဇွန်လအစောပိုင်းတွေတုန်းက နိုင်ငံခြားခရီးစဉ် ၂ ခုသွားပြီးနောက် ခရီးပန်းနေခဲ့တာကို အပြစ်တင်လိုက်ပါတယ်။

▪️ အဆိုပါ စကားရည်လုပွဲမှာ တုန်တုန်လှုပ်လှုပ်ဖြင့် ပြောဆိုမိခဲ့ရာမှာ ၂၀၂၄ ရွေးကောက်ပွဲ ထပ်မံယှဉ်ပြိုင်ဖို့နဲ့ ပတ်သက်ပြီး လူအများက မေးခွန်းထုတ်လာကြသလို အောက်လွှတ်တော် ဒီမိုကရက်တစ်အမတ်တစ်ဦးဆိုရင် ဘိုင်ဒင်ကို သမ္မတရွေးကောက်ပွဲမှ နုတ်ထွက်ဖို့အထိ လူသိရှင်ကြား တောင်းဆိုခဲ့ပါတယ်။

▪️ ဘိုင်ဒင်က သမ္မတဟောင်း ဒေါ်နယ်ထရမ့်နဲ့ စကားရည်လုပြိုင်ရာမှာ အဆင်မပြေခဲ့ဘူးလို့ ဗာဂျီးနီးယား မက်လင်းမှာပြုလုပ်တဲ့ စည်းရုံးရေးပွဲတစ်ခုမှာ ဝန်ခံပြောကြားလိုက်တာ ဖြစ်ပါတယ်။

▪️ "အဲဒီညက အကောင်းဆုံး မပြောနိုင်ခဲ့ပါဘူး။ ဒါကလည်း သိကြတဲ့အတိုင်းပါပဲ။ ကျုပ်က စကားပြောမကြွယ်ဘူးလေ။ စကားရည်လုပွဲ မတိုင်ခင် ကမ္ဘာပတ်ပြီး ခရီးသွားခဲ့သေးတယ်" လို့ ရန်ပုံငွေပွဲမှာ ပြောကြားသွားပါတယ်။

▪️ ဝန်ထမ်းတွေပြောတာကို နားမထောင်ဘဲ ပြန်လာရာကနေ စင်ပေါ်မှာ အိပ်ငိုက်လုနီးနီး ဖြစ်ခဲ့ကြောင်း၊ ဆင်ခြေပေးတာ မဟုတ်ပေမယ့် ရှင်းပြတာဖြစ်ကြောင်း ဆိုပါတယ်။

▪️ ဘိုင်ဒင်ဟာ ပြီးခဲ့တဲ့လက အချိန် ၂ ပတ်ခြားပြီး ပြင်သစ်နဲ့ အီတလီတို့ထံ ခရီးသွားရောက်ခဲ့ကာ အီတလီ ဘာရီမြို့မှာ ကျင်းပတဲ့ ဂျီ-၇ ထိပ်သီးအစည်းအဝေးကနေ ညတွင်းချင်းလေယာဉ်စီးပြီး ဝါရှင်တန်သို့ ပြန်မရောက်ခင် လော့စ်အိန်ဂျလိစ်မှာ သမ္မတဟောင်း ဘာရက်အိုဘားမားနဲ့အတူ ရန်ပုံငွေပွဲတစ်ခုသို့ တက်ရောက်ခဲ့ပါတယ်။

▪️ စကားရည်လုပွဲမှာ ဘိုင်ဒင်ကောင်းစွာ မစွမ်းဆောင်နိုင်ခဲ့တာကို အိမ်ဖြူတော်အရာရှိများက အအေးမိနေလို့ဆိုပြီး အကြောင်းပြကြပါတယ်။

▪️ စကားရည်လုပွဲပြီးနောက် ရိုက်တာမှ စစ်တမ်းကောက်ယူချက်တစ်ခုအရ ဒီမိုကရက်တစ် ၃ ဦးလျှင် တစ်ဦးနှုန်းက ဘိုင်ဒင်ဟာ ရွေးကောက်ပွဲထပ်မံ မယှဉ်ပြိုင်သင့်တော့ဘူးလို့ ထင်မြင်နေကြပေမယ့် ထရမ့်နဲ့ယှဉ်ပြိုင်ဖို့ရာ ဘိုင်ဒင်ထက်သာတဲ့ အခြားအထင်ကရ ဒီမိုကရက်တစ် ကိုယ်စားလှယ်လောင်းလည်း မရှိပါဘူး။

▪️ နှစ်ရက်တာ စစ်တမ်းကောက်ယူချက်အရ ထရမ့်နဲ့ဘိုင်ဒင်တို့ဟာ မဲပေးသူ ၄၀ ရာခိုင်နှုန်းရဲ့ ထောက်ခံမှုကို ရရှိထားကာ စကားရည်လုပွဲပြီးနောက်မှာလည်း ဘိုင်ဒင်အနေနဲ့ သိသိသာသာ ဆုံးရှုံးတာမျိုး မရှိဘူးလို့ ယူဆရပါတယ်။

#Source: Reuters

#World_Health
Published 03 July 2024
▪️ အပင်အခြေပြု အစားအစာတွေက ကျန်းမာရေးနဲ့ ညီညွတ်တယ်လို့ ယူဆထားကြပေမယ့် ထိုအစားအစာတွေကို အဆင့်ဆင့်ထုတ်လုပ်ထုပ်ပိုးထားတဲ့ ပေါင်မုန့်ထုပ်တွေ၊  ကွတ်ကီးတွေ၊ အာလူးကြော်ထုပ်တွေ၊ အချို့သောအချိုရည်တွေကတော့ ကျန်းမာရေးကို ထိခိုက်နိုင်ပါတယ်။

▪️ အစားအစာ အမျိုးမျိုးပါဝင်ပြီး အသားကြီးတွေ အဆင့်ဆင့်ထုပ်ပိုးစာတွေ အနည်းငယ်သာပါတဲ့ မက်ဒီတာရေနီးယန်း စားသောက်ပုံစံကတော့ ကျန်းမာရေးပညာရှင်တွေကလည်း ထောက်ခံထားပြီး ကျင့်ကြံစားသုံးသူတွေ တဖြည်းဖြည်း များလာပါတယ်။

▪️ နိုင်ငံတကာ သုတေသီအဖွဲ့တစ်ခုက အပင်အခြေပြု အဆင့်ဆင့်ထုပ်ပိုးထားတဲ့ အစားအစာတွေရဲ့ ကျန်းမာရေးထိခိုက်စေပုံကို လေ့လာခဲ့ရာ ယူကေဘိုင်အိုဘဏ် လေ့လာချက်မှ အသက် ၄၀-၆၉ နှစ်ကြားရှိတဲ့ လူပေါင်း ၁၁၈၃၉၇ ဦးရဲ့ အချက်အလက်တွေကို ၉ နှစ်ကြာအောင် စောင့်ကြည့်လေ့လာခဲ့ပါတယ်။

▪️ သူတို့ရဲ့ စားသောက်ပုံစံများအပြင် ဆေးရုံတက်ကုသမှုတွေ၊ အသက်ဆုံးပါးမှုတွေကိုပါ ထည့်သွင်းလေ့လာခဲ့ပါတယ်။
အစားအစာတွေကို အပင်အခြေပြု အစားအစာနဲ့ အသားအခြေပြု အစားအစာဆိုပြီး အဖွဲ့ခွဲလိုက်ကာ ထိုတစ်ဖွဲ့ချင်းစီကိုမှ အဆင့်ဆင့်ထုပ်ပိုးထားတဲ့ အဖွဲ့နဲ့ အဆင့်ဆင့် မပြုလုပ်ထားတဲ့အဖွဲ့ဆိုပြီး ထပ်မံခွဲခြားလိုက်ပါတယ်။

▪️ အပင်အခြေပြု အဆင့်ဆင့်ထုပ်ပိုးထားတဲ့ စားစရာတွေက နှလုံးသွေးကြောရောဂါ ဖြစ်နိုင်ခြေ ၅ ရာခိုင်နှုန်းနဲ့ အရွယ်မတိုင်ခင် သေဆုံးခြင်း ၁၂ ရာခိုင်နှုန်း ပိုများတာနဲ့ ဆက်စပ်နေကြောင်း ဖော်ပြခဲ့ပါတယ်။

▪️ ဒါပေမဲ့ အပင်အခြေပြု သာမန်အစားအစာတွေကတော့ နှလုံးသွေးကြောရောဂါနဲ့ အသက်အန္တရာယ်ပိုင်းမှာ ဆက်စပ်မှု အထောက်အထားတော့ မတွေ့ခဲ့ကြပါဘူး။

▪️ ဒါကြောင့် အပင်အခြေပြု သဘာဝအစားအစာတွေက အန္တရာယ်မဖြစ်စေဘဲ အဆင့်ဆင့်ထုတ်လုပ်ထားတဲ့ အစားအစာအားလုံးကတော့ နှလုံးသွေးကြောရောဂါ ဖြစ်နိုင်ခြေမြင့်မားတယ်လို့ ကောက်နုတ်ခဲ့ကြပါတယ်။

▪️ လေ့လာချက်ထဲက အပင်အခြေပြု အစားအစာတွေထဲမှာ ပေါင်မုန့်ထုပ်တွေ၊ အချိုရည်တွေ၊ မုန့်တွေ ပါဝင်ပါတယ်။
WHO အချက်အလက်များအရ နှလုံးသွေးကြောရောဂါကြောင့် နှစ်စဉ်ကမ္ဘာတဝှမ်းမှာ ၁၈ သန်းနီးပါး သေဆုံးနေပါတယ်။

#Source: The Star

#Local_News
Published 03 July 2024

▪️ နိုင်ငံအတွင်းအစားအသောက်များ ဘေးကင်း‌အောင် နယ်စပ်မှတရားမဝင်အစားအသောက်တင်သွင်းမှု ထိန်းချုပ်ရန်နှင့် တက္ကသိုလ်ကန်တင်းများ၊ ကားရပ်နားစခန်း‌များမှ စားသောက်ဆိုင်များဘေး အန္တရာယ်ကင်းရေးအပါအဝင်ကဏ္ဍ(၆)ရပ် အသေးစိတ်ဆွေးနွေးခဲ့‌ကြောင်း သိရသည်။

▪️ အမျိုးသားအဆင့် အစားအသောက်ဘေးအန္တရာယ် ကင်းရှင်းရေးမူဝါဒပါ အခန်းကဏ္ဍနှင့် တာဝန်ဝတ္တရားများ ချမှတ်ဆောင်ရွက်နိုင်ရေး အလုပ်ရုံဆွေးနွေးပွဲ၌ကျန်းမာရေးဝန်ကြီးဌာန၊ ပြည်ထောင်စုဝန်ကြီး ပါမောက္ခဒေါက်တာသက်ခိုင်ဝင်းမှ ဆွေးနွေးပြောကြားခဲ့ခြင်းဖြစ်သည်။

▪️ ယခုအစည်းအဝေးတွင် (၁)နယ်စပ်မှ တရားမဝင် အစားအသောက်တင်သွင်းမှုထိန်းချုပ်ခြင်း လုပ်ငန်းစဉ်များ၊ 

(၂)တက္ကသိုလ်စားသောက်ဆိုင်များနှင့် Catering Service လုပ်ငန်းစဉ် များ၊  

(၃)အဝေးပြေးလမ်းမတစ်လျှောက်နှင့် ကားရပ်နားစခန်းများရှိ စားသောက်ဆိုင်များ၊ 

(၄)ဟိုတယ်၊ မိုတယ်များရှိ စားသောက်ဆိုင်များ၏ အစားအသောက် ဘေးအန္တရာယ်ကင်းရှင်းရေးလုပ်ငန်းစဉ်များ၊ 

(၅)ဈေးကွက်အတွင်း ရောင်းချလျက်ရှိသည့် တောရိုင်းတိရိစ္ဆာန်များ၊ အင်းဆက်များ၊ ပိုးကောင်များ၏ အစားအသောက်ဘေးအန္တရာယ် ကင်းရှင်းရေးလုပ်ငန်းစဉ်များ၊ 

(၆)အစားအသောက်စံချိန်စံညွှန်းများ ရေးဆွဲထုတ်ပြန်ခြင်း လုပ်ငန်းစဉ်များအစရှိသည့် ကဏ္ဍ (၆)ခု ကို အသေးစိတ်ညှိနှိုင်းဆွေးနွေးသွားမည်ဖြစ်သည်ဟုဆိုသည်။

▪️ သို့မှသာ ဘေးအန္တရာယ်ကင်းရှင်းသော အစားအသောက်များကို ပြည်သူများ စားသုံးနိုင်မှာဖြစ်သည့်အတွက် အစားအသောက် ကွင်းဆက်တစ်လျှောက် တာဝန်ယူဆောင်ရွက်နေကြသည့် ဌာနဆိုင်ရာများအနေဖြင့် မိမိတို့သက်ဆိုင်ရာကဏ္ဍအလိုက် ဝိုင်းဝန်းဆောင်ရွက်ကြရမည်ဖြစ်ကြောင်း၊ 

▪️ အများပြည်သူနေ့စဉ် စားသုံးနေသည့် အစားအသောက်ဘေးအန္တရာယ်ကင်းရှင်းရေးအတွက်လုပ်ငန်းများ အကောင်အထည်ဖော်ဆောင်ရွက်ရာတွင် တစ်ဦးတစ်ယောက်၊ ဌာန၊ အဖွဲ့အစည်းတစ်ခုတည်းအနေဖြင့် ဆောင်ရွက်၍ မရသည့်အတွက် အစားအသောက် စတင်ထုတ်လုပ်ရာမှ စားသုံးသည်အထိ အစားအသောက်ကွင်းဆက်တစ်လျှောက်လုံးနှင့် သက်ဆိုင်သည့် ဌာနအားလုံးသာမက အစားအသောက် ထုတ်လုပ်သူများ၊ သိုလှောင်သူများ၊  ဖြန့်ဖြူးရောင်းချသူများ၊ စားသုံးသူများ၊ နည်းပညာ ဆိုင်ရာပညာရှင်များ၊ အသင်းအဖွဲ့များအားလုံးက မိမိတို့သက်ဆိုင်ရာ ကဏ္ဍအလိုက် ဟန်ချက်ညီညီ ပူးပေါင်း ပါဝင်ဆောင်ရွက်ခြင်းဖြင့် အမျိုးသားအဆင့် အစားအသောက်ဘေးအန္တရာယ်ကင်းရှင်းရေး မူဝါဒပါ တာဝန် အခန်းကဏ္ဍနှင့် ဝတ္တရားများကို တိတိကျကျ အကောင်အထည်ဖော် ဆောင်ရွက်လာနိုင်မည်ဖြစ်သည့် အတွက် ဝိုင်းဝန်း ဆွေးနွေးအကြံပြုကြစေလိုကြောင်း ပြောကြားသည်။

▪️ လက်ရှိတွင် အစားအသောက်နှင့် ဆေးဝါးကွပ်ကဲရေးဦးစီးဌာန အနေဖြင့် ဓာတ်ခွဲစစ်ဆေးမှုဆိုင်ရာကိစ္စရပ်များကို ပိုမိုအလေးထားဆောင်ရွက်လျက်ရှိကြောင်း၊ မကြာမီက ဖွင့်လှစ်ခဲ့သည့် Myanmar National Center for Disease Control and Medical Training Center တွင်လည်း ကူးစက်ရောဂါများသာမက အစားအသောက်ဓာတ်ခွဲစစ်ဆေးမှုများကို ယခင်ထက်ပိုမို လုပ်ဆောင်သွားနိုင်တော့မည်ဖြစ်ကြောင်း၊

▪️ ထို့ပြင် နိုင်ငံတော်၏ အနာဂတ်ဖြစ်သည့် ကလေးသူငယ်များ အနေဖြင့် ဘေးအန္တရာယ်ကင်းရှင်းသော၊ သန့်ရှင်းသော၊ အာဟာရပြည့်ဝသော အစားအသောက်များကို ရရှိစားသုံးစေနိုင်ရေးအတွက် ကျန်းမာရေးဝန်ကြီးဌာန၊ ကျောင်းကျန်းမာရေးဌာနခွဲနှင့် ပညာရေးဝန်ကြီး ဌာနတို့ ပူးပေါင်းကာ School Meal Program ကို အကောင်အထည်ဖော် ဆောင်ရွက်လျက်ရှိကြောင်း လည်းထည့်သွင်းပြောကြားခဲ့သည်။

#tthl #Yangon_Times

#World_Technology
Published 03 July 2024

▪️ တော်ဝင်မဲလ်ဘုန်း နည်းပညာတက္ကသိုလ်(RMIT)မှ သုတေသီများက ရွှံ့စေးကို စွန့်ပစ်ဖန်များ၊ မီးသွေးမှုန်များဖြင့် ရောစပ်ပြီး စွမ်းအင်ချွေတာ အုတ်ခဲများကို ဖန်တီးလိုက်ပါတယ်။

▪️ ဒီအုတ်တွေဟာ စွမ်းအင်အလွန်ကုန်ကျတဲ့ ရွှံ့တူးလုပ်ငန်းများဖြင့် သမားရိုးကျ အုတ်ထုတ်လုပ်ရေးရဲ့ ဆိုးကျိုးတွေကို လျှော့ချနိုင်မှာဖြစ်ပါတယ်။

▪️ သမားရိုးကျ အုတ်ထုတ်လုပ်ရေးဟာ ကာဗွန်ဒိုင်အောက်ဆိုဒ် အများအပြား ထုတ်လုပ်ပြီး လေထုညစ်ညမ်းစေပါတယ်။

▪️ စွမ်းအင်ချွေတာ အုတ်တွေကတော့ RCF စွန့်ပစ်ပစ္စည်းတွေကိုသာ မှီခိုထုတ်လုပ်ရပါတယ်။

▪️ ပြန်လည်အသုံးချခြင်း လုပ်ငန်းစဉ်မှ ဖန်အစအန ၉၂ ရာခိုင်နှုန်းကို ကြွေပစ္စည်းများ၊ ပလတ်စတစ်၊ စက္ကူ၊ ပြာမှုန်များဖြင့် ထုတ်လုပ်ထားပါတယ်။

▪️ ကမ္ဘာ့စွန့်ပစ်ပစ္စည်း ပြဿနာကိုလည်း လျော့ပါးစေနိုင်ပြီး မြေကြီးဖို့လာတဲ့ ဝန်ထုပ်ကိုလည်း လျှော့ချနိုင်မှာ ဖြစ်တယ်လို့ သုတေသီများ ဖော်ပြထားပါတယ်။

▪️ အဆိုပါ စွမ်းအင်ချွေတာ အုတ်တွေဟာ အပူကို ကြာရှည်ထိန်းထားနိုင်ပြီး ပျံ့နှံ့လွယ်ပါတယ်။

▪️ ဒါကြောင့် အပူချိန်နည်းနည်းဖြင့် ထုတ်လုပ်နိုင်ပြီး သာမန်အုတ်ထုတ်လုပ်ခြင်းထက် စွမ်းအင် ၂၀ ရာခိုင်နှုန်း သက်သာစေမှာ ဖြစ်ပါတယ်။

▪️ မီတာခ ဒေါ်လာထောင်ပေါင်းများစွာ သက်သာစေပြီး မီးဖိုတွေကနေ ကာဗွန်ဒိုင်အောက်ဆိုဒ် ထုတ်လွှတ်မှုလည်း လျော့နည်းသွားမှာ ဖြစ်ပါတယ်။

▪️ အုတ်ထုတ်လုပ်သူတွေသာ မဟုတ်ဘဲ အုတ်တွေက အပူထိန်းသိမ်းခြင်းနဲ့ စုပ်ယူခြင်းမှာ ထိရောက်တာကြောင့် နွေရာသီမှာ အေးမြစေပြီး ဆောင်းရာသီမှာ နွေးထွေးစေမှာ ဖြစ်ပါတယ်။

▪️ စမ်းသပ်ချက်များအရ စွမ်းအင်ချွေတာ အုတ်တွေအသုံးပြုတဲ့ တစ်ထပ်အိမ်တွေဟာ သာမန်အုတ်အသုံးပြုတဲ့ အိမ်တွေထက် မီတာခ ၅ ရာခိုင်နှုန်း ပိုမိုသက်သာမှာ ဖြစ်ပါတယ်။

▪️ RCF စွန့်ပစ်ပစ္စည်းသုံးပြီး ၉၅၀ ဒီဂရီဆဲလ်စီးယပ်စ်မှာ ထုတ်လုပ်ထားတဲ့ အုတ်တွေက မျှော်မှန်းထားတာထက် စံချိန်စံညွှန်းသာလွန်ခဲ့ပြီး ဆောက်လုပ်ရေးမှာ ခိုင်ခံ့မှုရှိတာကို တွေ့ခဲ့ရပါတယ်။

▪️ RMIT သုတေသီများက စွမ်းအင်ချွေတာအုတ် ထုတ်လုပ်ပုံရရှိဖို့ အချိန် ၄ နှစ် ကြာခဲ့ပါတယ်။

▪️ အခုအချိန်မှာ ထိုအုတ်တွေကို အသုံးပြုနိုင်ပြီဖြစ်ပေမယ့် ဓာတ်ခွဲခန်းမှာသာ အကန့်အသတ်ဖြင့် ထုတ်လုပ်နိုင်သေးပြီး အများအပြား ထုတ်လုပ်ဖို့ကတော့ စဉ်းစားရဦးမှာဖြစ်ပါတယ်။

#Source: ARS TECHNICA

အစ္စရေးလ်-လက်ဘနွန်နယ်စပ်ကြားတင်းမာမှုမြင့်တက်ခဲ့သော်ငြား ဟက်ဇ်ဘိုလာအဖွဲ့စစ်ရေးလှုပ်ရှားမှုလျော့ပါးလာ

ပြီးခဲ့တဲ့ အောက်တိုဘာလ ဂါဇာစစ်ပွဲစတင်ကတည်းက အစ္စရေးလ်နဲ့ လက်ဘနွန်စစ်သွေးကြွ ဟက်ဇ်ဘိုလာအဖွဲတို နယ်စပ်ကနေ ပစ်ခတ်နေကြရာ တင်းမာမှုမြင့်တက်နေပြီး လူထောင်သောင်းများစွာ ထွက်ပြေးတိမ်းရှောင်နေရကာ စစ်ပွဲကြီးဖြစ်လာမှာကို စိုးရိမ်နေရပါတယ်။
#World_News
Published 02 July 2024
#အစ္စရေးလ်-လက်ဘနွန် #စစ်ရေးလှုပ်ရှားမှုလျော့ပါးလာ
#YMG #Yangon_Times #Yangon_Media_Group

#Daily_News
Published 02 July 2024

၁။ မြစ်ကြီးနား၊ ဝိုင်းမော်၊ ဗန်းမော်ရှိကချင်ဒေသခံ‌ ထောင်ချီရေဘေးသင့်နေ၊ ဖုန်းလိုင်းများပြတ်နေ၍ အကူအညီတောင်းခံရန်အခက်တွေ့နေ

၂။ ရန်ကုန်မှတရုတ်နိုင်ငံ နန်နင်းမြို့သို့ တိုက်ရိုက်ခရီးသွားနိုင်သလို ကုန်ပစ္စည်းများလည်းတိုက်ရိုက်ပို့ဆောင်နိုင်

၃။ မတ်ပဲဈေးအမြင့်တန်း၌ အတက်အကျဖြစ်နေ

၄။ အစ္စရေးလ်-လက်ဘနွန်နယ်စပ်ကြားတင်းမာမှု မြင့်တက်ခဲ့သော်ငြား ဟက်ဇ်ဘိုလာအဖွဲ့စစ်ရေးလှုပ်ရှားမှုလျော့ပါးလာ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

ဧရာဝတီမြစ်ရေဟာ မြစ်အလယ်ပိုင်း ဒေသတွေဖြစ်တဲ့ဗန်းမော်၊ ကသာ၊ သပိတ်ကျင်း၊ ရွှေကူ၊ မန္တလေး၊ စစ်ကိုင်း၊ညောင်ဦးတို့မှာ မြစ်ရေတွေကြီးနိုင်သလို ဟုမ္မလင်း၊ မော်လိုက်၊ ဖောင်းပြင်တို့မှာကြီးနိုင်တယ်လို့ သိရပါတယ်။
#Local_News
Published 02 July 2024
#မြစ်အလယ်ပိုင်းဒေသ(၁၀)ခု #မြစ်ရေကြီးနိုင်
#tthl #Yangon_Times

ကချင်ပြည်နယ်၊ မြစ်ကြီးနားမြို့က ဧရာဝတီမြစ်ရေဟာ ဒီကနေ့ ဇူလိုင် ၂ ရက် မနက်အစောပိုင်းကစလို့ တဖြည်းဖြည်းကျဆင်းနေပြီး သက်ဆိုင်ရာကလည်း ရေဘေးရှောင်စခန်း ၃၀ဖွင့်လှစ်ပြီး ကူညီကယ်ဆယ်ပေးနေတယ်လို့ ပြည်နယ်အစိုးရအဖွဲ့နဲ့ မိုးလေဝသနှင့်ဇလဗေဒညွှန်ကြားမှုးဦးစီးဌာနက သိရပါတယ်။
#Local_News
Published 02 July 2024
#ရေဘေးရှောင်စခန်း၃၀ဖွင့်လှစ် #ဧရာဝတီမြစ်ရေပြန်ကျလာ
#tthl #Yangon_Times