#World_News
Published 08 September 2026

■ မြောက်ကိုရီးယားနဲ့ ရုရှားတို့ဟာ ပထမဆုံး ကုန်းလမ်းတံတားကို တနင်္လာနေ့က ဖွင့်လှစ်ခဲ့ပြီး တူမန်မြစ်ကို ဖြတ်သန်းတည်ဆောက်ထားကာ နှစ်ဖက်စလုံးက မဟာဗျူဟာမြောက် မိတ်ဖက်ဆက်ဆံရေးအတွက် အရေးပါတဲ့ မှတ်ကျောက်တစ်ခုအဖြစ် ဖော်ပြထားပါတယ်။

■ ဖွင့်ပွဲအခမ်းအနားမှာ ရုရှားဝန်ကြီးချုပ် မီခေးလ်မီရှုစတင်နဲ့ မြောက်ကိုရီးယားဝန်ကြီးချုပ် ပက်ထယ်ဆောင်တို့ ဗီဒီယိုစနစ်ဖြင့် ဖွင့်လှစ်ခဲ့ပါတယ်။

■ ၁ ကီလိုမီတာခန့် ရှည်လျားပြီး လမ်း ၂ လိုင်းပါတဲ့ တံတားဟာ ရုရှားအဝေးရှေ့ဖျားဒေသရှိ ခါဆန်မြို့နဲ့ မြောက်ကိုရီးယားရှိ ရာဆွန်မြို့တို့ကို တိုက်ရိုက်ဆက်သွယ်ပေးထားပါတယ်။

■ နယ်စပ်ဖြတ်ကျော်လမ်းကြောင်းဟာ တစ်နေ့ကို ယာဉ်စီးရေ ၃၀၀ နဲ့ ခရီးသွား ၂ ကျော်ကို လက်ခံသွားလာနိုင်ရန် တည်ဆောက်ထားတာ ဖြစ်ပါတယ်။

■ တည်ဆောက်ရေးလုပ်ငန်းများကို ၂၀၂၄ ခုနှစ်မှာ ဗလာဒီမာပူတင်နဲ့ ကင်ဂျုံးအန်တို့ လက်မှတ်ရေးထိုးခဲ့တဲ့ နှစ်နိုင်ငံသဘောတူညီချက်အရ ၂၀၂၅ ဧပြီလမှာ စတင်ခဲ့ပါတယ်။

■ အဆိုပါ တံတားကို ၁၉၄၆ ခုနှစ်က ကင်အီဆန်ကို ဗုံးပေါက်ကွဲမှုကနေ ကယ်တင်ခဲ့တယ်လို့ အသိအမှတ်ပြုခံရတဲ့ ဆိုဗီယက်အရာရှိ ယာကော့ဗ်နိုဗီချန်းကို အစွဲပြုကာ အမည်ပေးထားတာ ဖြစ်ပါတယ်။

■ နယ်စပ်ဖြတ်ကျော် ကုန်သွယ်ရေး၊ သယ်ယူပို့ဆောင်ရေးနဲ့ ခရီးသွားလုပ်ငန်းများကို မြှင့်တင်ရန်အတွက် အဓိကအထောက်အကူပြုမယ့် အခြေခံအဆောက်အအုံအဖြစ် နှစ်နိုင်ငံစလုံး ရှုမြင်ကြပါတယ်။

■ အနောက်နိုင်ငံများနဲ့ ဒေသတွင်း လေ့လာသူများကတော့ အဆိုပါ လမ်းကြောင်းသစ်ဟာ ယူကရိန်းစစ်ပွဲကြား နက်ရှိုင်းလာတဲ့ မဟာဗျူဟာနဲ့ စစ်ရေးပူးပေါင်းဆောင်ရွက်မှုကို ခိုင်မာစေကြောင်း ထောက်ပြကြပါတယ်။

Source: Reuters

#World_Science
Published 08 September 2026

■ သိပ္ပံပညာရှင်တွေဟာ ဉာဏ်ရည်တုစနစ်(AI)ကို အသုံးပြုပြီး ကမ္ဘာပေါ်မှာ မရှိသေးတဲ့ ဗိုင်းရပ်စ်တွေကို ပထမဆုံးအနေဖြင့် ပြုလုပ်ခဲ့ကြပါတယ်။

■ ရည်ရွယ်ချက်က ဆေးပညာပိုင်း ဖန်တီးအောင်မြင်မှုရဖို့ မျှော်လင့်ကြတာဖြစ်ပေမယ့် ဘေးအန္တရာယ်ရှိ ရောဂါပိုးတွေ ဖြစ်လာမှာကိုလည်း စိုးရိမ်စရာ ဖြစ်နေပါတယ်။

■ AI မှ ဖန်တီးလိုက်တဲ့ ဗိုင်းရပ်စ်တွေဟာ ဘက်တီးရီးယားများကိုသာ သီးသန့်ပစ်မှတ်ထားကူးစက်တဲ့ Bacteriopages များဖြစ်ပြီး လူနဲ့တိရိစ္ဆာန်ဆဲလ်များကို ကူးစက်ခြင်းမရှိပါဘူး။

■ သုတေသီတွေက အပင်၊ လူ၊ တိရိစ္ဆာန်များကို ကူးစက်နိုင်တဲ့ ဗိုင်းရပ်စ်များရဲ့ မျိုးရိုးဗီဇဆိုင်ရာ သင်္ကေတများကို လေ့ကျင့်ရေးအချက်အလက်များမှ ဖယ်ထုတ်ခဲ့ကြပါတယ်။

■ AI ဖြင့် ဒီဇိုင်းထုတ်ထားတဲ့ မျိုးရိုးဗီဇရာပေါင်းများစွာအနက် ဓာတ်ခွဲခန်းထဲမှာ ထုတ်လုပ်လိုက်တဲ့အခါ Bacteriophages ၁၆ မျိုး အောင်မြင်စွာ သက်ဝင်လှုပ်ရှားလာခဲ့ပါတယ်။

■ အသစ်ဖန်တီးလိုက်တဲ့ ဉာဏ်ရည်တုပိုးများကို ပေါင်းစပ်အသုံးပြုလိုက်တဲ့အခါ ပဋိဇီဝဆေးယဉ်ပါးတဲ့ E.coli ဘက်တီးရီးယားပိုးမွှားများကို ထိရောက်စွာ သုတ်သင်နိုင်ခဲ့ပါတယ်။

■ ဒီနည်းပညာဟာ Phage ကုသနည်းကို ပြောင်းလဲပေးနိုင်ပြီး ဇီဝနည်းပညာ ကိရိယာများကို တိုးချဲ့ပေးကာ ဆေးယဉ်ပါး စူပါဘက်တီးရီးယားများကို အနိုင်ယူနိုင်လိမ့်မယ်လို့ သုတေသီများ မျှော်လင့်ထားကြပါတယ်။

■ အင်တာနက်အသုံးပြုသူတွေနဲ့ ဝေဖန်ရေးများကတော့ ဓာတ်ခွဲခန်းမှ ယိုစိမ့်မှုများ၊ ဇီဝလက်နက်အဖြစ် အသုံးပြုခြင်း၊ ကပ်ဘေးသင့်ရောဂါ ကူးစက်ပြန့်ပွားမှုများ ဖြစ်လာမှာကို စိုးရိမ်ပူပန်ကြောင်း အွန်လိုင်းမှာ ဖော်ပြခဲ့ကြပါတယ်။

Source: WION

#World_Health
Published 08 September 2026

■ လူငယ်တွေမှာ ဆံပင်စောစီးစွာ ဖြူခြင်းဟာ မျိုးရိုးဗီဇ၊ အာဟာရ မပြည့်ဝခြင်းနဲ့ သိုင်းရွိုက်ပြဿနာစတဲ့ အချက်တွေကြောင့် ဖြစ်ပွားရခြင်း ဖြစ်ပါတယ်။

■ ခန္ဓာကိုယ် အသက်အရွယ် ရလာတာနဲ့အမျှ melanocytes ဆဲလ်များ ဆုံးရှုံးပြီး မယ်လနင်ရောင်ခြယ်ထုတ်လုပ်မှု လျော့နည်းသွားတာကြောင့် ဆံပင်ဖြူလာရတာ ဖြစ်ပါတယ်။

■ အသက်အရွယ်ရလို့ သဘာဝအတိုင်း ဆံပင်ဖြူတာကိုတော့ မူလအနက်ရောင်ပြောင်းအောင် ပြန်လုပ်လို့ မရပါဘူး။

■ အသက်အရွယ်ကြောင့် မဟုတ်ဘဲ ကုသပျောက်ကင်းနိုင်တဲ့ အကြောင်းအရင်းတွေကြောင့် ဆံပင်ဖြူမှသာ ပြန်လည်မည်းနက်လာဖို့ ဖြစ်နိုင်ခြေ ရှိပါတယ်။

■ ဗိုက်တာမင်-ဘီ၁၂၊ သံဓာတ်၊ ဖောလစ်အက်ဆစ်၊ ဗိုက်တာမင်-ဒီနဲ့ ကြေးနီဓာတ်ချို့တဲ့မှုတွေကို ဖြည့်စွက်ပြုပြင်ခြင်းဖြင့် ဆံပင်ရောင်ခြယ်ဓာတ် ပြန်လည်ရရှိစေဖို့ ကူညီပေးနိုင်ပါတယ်။

■ သိုင်းရွိုက်ဝေဒနာများ ဒါမှမဟုတ် စိတ်ဖိစီးမှုလိုမျိုး နောက်ခံကျန်းမာရေးပြဿနာများကို ကုသထိန်းချုပ်ခြင်းကလည်း ဆံပင်ပုံမှန်ပြန်မည်းလာစေနိုင်ပါတယ်။

■ ဆီးဖြူသီး ဒါမှမဟုတ် ပျဉ်းတော်သိမ်ရွက်တို့လို သဘာဝကုထုံးတွေက ဆံကေသာထိန်းသိမ်းမှုကို အထောက်အကူပြုပေမယ့် ဆံပင်ဖြူတာကို ပြန်မည်းမလာစေနိုင်ပါဘူး။

■ အရေပြားဆရာဝန်နဲ့ တိုင်ပင်ဆွေးနွေးပါက ကုသလို့ရနိုင်တဲ့ ဆံပင်ဖြူခြင်းနဲ့ အသက်အရွယ်ကြောင့် အမြဲတမ်းဆံပင်ဖြူခြင်းတို့ကို ခွဲခြားသိရှိစေနိုင်မှာ ဖြစ်ပါတယ်။

Source: NDTV

မကြာသေးမီက ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင်၏ ဗီယက်နမ် ဆိုရှယ်လစ်သမ္မတနိုင်ငံသို့ သွားရောက်ခဲ့သည့် တရားဝင်ခရီးစဉ်သည် မြန်မာ-ဗီယက်နမ် နှစ်နိုင်ငံ ဆက်ဆံရေးတွင် စာမျက်နှာသစ်တစ်ရပ် ဖွင့်လှစ်နိုင်ခြင်း၏ ပြယုဂ်ဖြစ်သည်။ ဤခရီးစဉ်သည် သမိုင်း အစဉ်အလာကြီးမားသည့် ချစ်ကြည်ရင်းနှီးမှုကို အခြေခံကာ အနာဂတ်ကာလအတွက် ခိုင်မာသော နိုင်ငံရေးယုံကြည်မှုအပြင် စီးပွားရေးနှင့် နည်းပညာစင်္ကြံများကို ပိုမိုကျယ်ပြန့်လာစေရန် မဟာဗျူဟာ မြောက် လမ်းစဖော်ပေးလိုက်ခြင်းဖြစ်ကြောင်း သုံးသပ်ရမည်ဖြစ်သည်။ 

သမိုင်းအစဉ်အလာနှင့် ခိုင်မာသည့် နိုင်ငံရေးယုံကြည်မှု

မြန်မာနှင့် ဗီယက်နမ်နိုင်ငံတို့သည် လွတ်လပ်ရေးကြိုးပမ်းမှု သမိုင်းကြောင်းများ တူညီကြပြီး အခက်အခဲများစွာကို အတူတကွ ဖြတ်သန်းခဲ့ကြသည့် နိုင်ငံများဖြစ်သည်။ 

၁၉၅၄ ခုနှစ်တွင် မြန်မာနိုင်ငံ ဝန်ကြီးချုပ် ဦးနုသည် ဗီယက်နမ်သို့ လာရောက်ခဲ့သည်။  ၁၉၅၈ ခုနှစ် ဖေဖော်ဝါရီလတွင် ဗီယက်နမ်ဥက္ကဋ္ဌ ဟိုချီမင်းသည် မြန်မာနိုင်ငံသို့ လာရောက်ခဲ့ပြီး ရန်ကုန်တက္ကသိုလ်က ၎င်းကို ဥပဒေဆိုင်ရာ ဂုဏ်ထူးဆောင်ပါရဂူဘွဲ့ ချီးမြှင့်နိုင်ခဲ့သည်အထိ နှစ်နိုင်ငံချစ်ကြည်ရေး အခြေခံ  အုတ်မြစ် ခိုင်မာခဲ့သည်။ 

လက်ရှိတွင် နှစ်နိုင်ငံ သံတမန်ဆက်ဆံမှုသည် နှစ် (၅၀) ပြည့် ရွှေရတုတိုင်ခဲ့ပြီဖြစ်ကာ ၂၀၁၇ ခုနှစ်က တည်ထောင်ခဲ့သည့် ဘက်စုံပူးပေါင်းဆောင်ရွက်မှု မိတ်ဖက်ဆက်ဆံရေး (Comprehensive Cooperative Partnership) သည်လည်း ၂၀၂၇ ခုနှစ်တွင် (၁၀) နှစ် ပြည့်မြောက်တော့မည်ဖြစ်သည်။ 

ယခုခရီးစဉ်အတွင်း ခေါင်းဆောင်များ၏ ပြောကြားချက်များသည် နှစ်နိုင်ငံအကြား နိုင်ငံရေးယုံကြည်မှုကို ပိုမိုပီပြင်ခိုင်မာစေခဲ့သည်။ ဗီယက်နမ်သမ္မတ မစ္စတာ တိုလန်းက "အဆွေတော်သမ္မတကြီး၏ ယခုခရီးစဉ်သည် နှစ်နိုင်ငံချစ်ကြည်ရင်းနှီးမှု၊ ဘက်စုံပူးပေါင်းဆောင်ရွက်မှုနှင့် မိတ်ဖက်ဆက်ဆံရေးကို ပိုမိုခိုင်မာစေမည့် ခရီးစဉ်တစ်ခုဖြစ်ပြီး ရှေ့လာမည့်ကာလများအတွင်း ဗီယက်နမ်-မြန်မာ ဆက်ဆံရေးကို ပိုမိုနက်ရှိုင်းခိုင်မာပြီး ထိထိရောက်ရောက် ဖွံ့ဖြိုးတိုးတက်စေရန် လက်တွေ့ကျသော အကျိုး ရလာဒ်များစွာကို ဖော်ဆောင်ပေးနိုင်မည်ဖြစ်ပါကြောင်း" ဟု ပြောကြားခဲ့သည်။ 

ဗီယက်နမ်ဝန်ကြီးချုပ် မစ္စတာ လေမင်ဟုန်ကလည်း "အဆွေတော် သမ္မတကြီး၏ ယခုခရီးစဉ်သည် နှစ်နိုင်ငံအကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများကို ပိုမိုတိုးမြှင့်ခိုင်မာစေမည်ဟု ယုံကြည်ပါကြောင်း" ထည့်သွင်းပြောကြားခဲ့သည်။ 

မြန်မာနိုင်ငံတော်သမ္မတကလည်း "ဗီယက်နမ်နိုင်ငံအနေဖြင့် စစ်ပွဲဒဏ်နှင့် အရေးယူပိတ်ဆို့ ကန့်သတ် မှုများကို ဆယ်စုနှစ်ပေါင်းများစွာ ကြုံတွေ့ခဲ့ရသည့်ကြားမှ ယခုကဲ့သို့ ဘက်ပေါင်းစုံ ဖွံ့ဖြိုးတိုးတက်  လာသည့် နိုင်ငံတော်တစ်ခုကို တည်ဆောက်နိုင်ခဲ့မှုအပေါ် ဗီယက်နမ်နိုင်ငံ၏ နိုင်ငံ့ခေါင်းဆောင် အဆက်ဆက်ကို လေးစားဂုဏ်ယူပါကြောင်း" ပြန်လည်ပြောကြားခဲ့သည်။ ဤပြောကြားချက်များသည် တစ်နိုင်ငံ၏ ခက်ခဲသော ဖြတ်သန်းမှုနှင့် ကြိုးပမ်းအောင်မြင်မှုများကို အခြားတစ်နိုင်ငံက အပြန်အလှန် အသိအမှတ်ပြုသည့် ခိုင်မာသော နိုင်ငံရေးယုံကြည်မှုကို ပြသနေခြင်းဖြစ်သည်။ 

ပိုမိုကျယ်ပြန့်လာမည့် နည်းပညာစင်္ကြံနှင့် စက်မှုပူးပေါင်းဆောင်ရွက်မှု

ခိုင်မာသည့် နိုင်ငံရေးယုံကြည်မှုအပေါ် အခြေခံ၍ နှစ်နိုင်ငံစီးပွားရေးနှင့် နည်းပညာပူးပေါင်းဆောင် ရွက်မှုများသည် ပိုမိုကျယ်ပြန့်လာခဲ့သည်။ ထို့ပြင် မြန်မာနိုင်ငံအနေဖြင့် ဗီယက်နမ်နိုင်ငံမှ နှစ်ပေါင်း ၄၀ ခန့် အကောင်အထည်ဖော်ခဲ့သည့် "ဒွိုင်မွိုင်း" (Doi Moi) စီးပွားရေးပြုပြင်ပြောင်းလဲမှု အတွေ့အကြုံ  များကို မျှဝေပေးရန်လည်း တောင်းဆိုထားရာ ဤသည်မှာ မြန်မာ့စီးပွားရေး ပြုပြင်ပြောင်းလဲမှုအတွက် မဟာဗျူဟာမြောက် ခြေလှမ်းတစ်ရပ်ဖြစ်သည်။ 

နည်းပညာနှင့် စက်မှုကဏ္ဍတွင်လည်း အလားအလာကောင်းများကို တွေ့မြင်ရသည်။

🔳၂၀၁၈ ခုနှစ်တွင် စတင်ခဲ့သည့် Mytel ဆက်သွယ်ရေးလုပ်ငန်းသည် နှစ်နိုင်ငံ ရင်းနှီးမြှုပ်နှံမှုနှင့် နည်းပညာပူးပေါင်းဆောင်ရွက်မှု၏ စံနမူနာကောင်းဖြစ်ပြီး ယင်းအမည်ကို နိုင်ငံတော်သမ္မတကိုယ်တိုင် ရွေးချယ်ပေးအပ်ခဲ့ခြင်းဖြစ်သည်။ 

🔳မြန်မာနိုင်ငံအနေဖြင့် ရတနာပုံဆိုက်ဘာစီးတီးအပါအဝင် နည်းပညာအထူးဇုန်များတွင် Viettel မှ လာရောက်ရင်းနှီးမြှုပ်နှံပြီး ဒီဂျစ်တယ်နှင့် နည်းပညာဆိုင်ရာပစ္စည်းများ ထုတ်လုပ်ရန် ဖိတ်ခေါ်ထား သည်။ 

🔳ထို့အပြင် ဧရိယာစတုရန်းမီတာ ၅၀၀,၀၀၀ ကျော်ကျယ်ဝန်းပြီး ၂၁ လအတွင်း အပြီးတည်ဆောက်  နိုင်ခဲ့သည့် Vinfast လျှပ်စစ်မော်တော်ယာဉ်ထုတ်လုပ်ရေးစက်ရုံသို့ သွားရောက်လေ့လာခဲ့ခြင်းက အနာဂတ်မော်တော်ယာဉ်နှင့် အဆင့်မြင့်စက်မှုထုတ်လုပ်ရေးကဏ္ဍတွင် ပူးပေါင်းဆောင်ရွက်မှုများ ကျယ်ပြန့်လာနိုင်ကြောင်း ညွှန်ပြနေသည်။ 

မဟာဗျူဟာမြောက် စီးပွားရေးစင်္ကြံလမ်းများ ချိတ်ဆက်ခြင်း

ကုန်သွယ်မှုနှင့် အခြေခံအဆောက်အအုံ ချိတ်ဆက်မှုတွင် မြန်မာနှင့် ဗီယက်နမ်တို့သည် ဒေသတွင်း စီးပွားရေးစင်္ကြံလမ်းများကို အသုံးချရန် အလေးထားလာကြသည်။

🔳မြန်မာနိုင်ငံရှိ သီလဝါစီးပွားရေးဇုန်သည် မြန်မာ (မြဝတီ) - ထိုင်း - လာအို - ဗီယက်နမ် (ဒါနန်း) ချိတ်ဆက်မည့် အရှေ့-အနောက် စီးပွားရေးစင်္ကြံ (East-West Economic Corridor) နှင့် ချိတ်ဆက်သွားမည်ဖြစ်သည်။ 

🔳ထားဝယ်ရေနက်ဆိပ်ကမ်းသည်လည်း တောင်ပိုင်းစီးပွားရေးစင်္ကြံ (Southern Economic Corridor) ဖြစ်သည့် မြန်မာ (ထားဝယ်) - ဗန်ကောက် - လွန်ပရာဘမ် - ဗီယက်နမ် (ဒါနန်း) လမ်းကြောင်းနှင့် ချိတ်ဆက်နိုင်မည်ဖြစ်သည်။ 

🔳ထို့အပြင် မြန်မာ-အိန္ဒိယ-ထိုင်း သုံးနိုင်ငံ အဝေးပြေးလမ်းမကြီးစီမံကိန်းကို အကောင်အထည်  ဖော်လျက်ရှိပြီး ယင်းလမ်းနှင့်ချိတ်ဆက်ကာ ဗီယက်နမ်မှသည် တောင်အာရှဈေးကွက်သို့လည်းကောင်း၊ မြန်မာမှသည် လာအို၊ ဗီယက်နမ်တို့မှတစ်ဆင့် အရှေ့အာရှဈေးကွက်သို့လည်းကောင်း အပြန်အလှန် ဝင်ရောက်နိုင်မည်ဖြစ်သည်။ 

နိဂုံး

အချုပ်အားဖြင့် သုံးသပ်ရလျှင် မြန်မာ-ဗီယက်နမ် ဆက်ဆံရေးသည် သမိုင်းဝင် ချစ်ကြည်ရင်းနှီးမှုမှသည် လက်တွေ့ကျသော မဟာဗျူဟာမြောက် မိတ်ဖက်ဆက်ဆံရေးအဆင့်သို့ ကူးပြောင်းရောက်ရှိ လာပြီဖြစ် သည်။ နိုင်ငံတော်သမ္မတက “တစ်ဦးတည်းဆိုပါက လျင်မြန်စွာသွားနိုင်သော်လည်း အတူတကွပူးပေါင်းမှ  သာလျှင် ဝေးဝေးသို့ ရောက်နိုင်သည်” ဟု စီးပွားရေးဖိုရမ်တွင် ပြောကြားခဲ့သည့်အတိုင်း ကမ္ဘာလုံး ဆိုင်ရာ စီးပွားရေးမရေရာမှုများကို ရင်ဆိုင်ရာတွင် နှစ်နိုင်ငံပူးပေါင်းဆောင်ရွက်မှုသည် အရေးပါလှသည်။ ခိုင်မာသော နိုင်ငံရေးယုံကြည်မှုကို အုတ်မြစ်ချလျက် ဒစ်ဂျစ်တယ်နှင့် နည်းပညာစင်္ကြံများ၊ အရှေ့-အနောက်နှင့် တောင်ပိုင်း စီးပွားရေးစင်္ကြံလမ်းများကို ပေါင်းကူးချိတ်ဆက်ခြင်းဖြင့် မြန်မာ-ဗီယက်နမ် နှစ်နိုင်ငံ၏ အနာဂတ်သည် ပိုမိုကျယ်ပြန့်တောက်ပလာမည်ဖြစ်ကြောင်းသုံးသပ်ရေးသားရပါသည်။

#Local_News
Published 07 September 2026

■ ငမိုးရိပ်ဆည် ရေပိုလွှဲမှရေကျော်နေသော်လည်း ၎င်းရေကျော်ကျသည့် ပမာဏမှာတဖြည်းဖြည်း နည်းပါးကျဆင်းလာမည် ဖြစ်ကြောင်းသိရသည်။

■ ယနေ့ မနက်(၆)နာရီအချိန်တိုင်းထွာချက်များအရ ငမိုးရိပ်တမံရေပိုလွှဲမှ​ ရေ ၂ ဒဿမ ၂၅ ပေ ကျော်​နေသော်လည်း ယမန်နေ့ကတာတမံများတွင် ​မိုးရွာသွန်းမှု နည်းခဲ့ရာတမံအောက်ဖက်​ချောင်း​ရေများလည်း​​ လျော့လာကြောင်းစိုက်ပျိုးရေး၊ မွေးမြူ‌ရေးနှင့်ဆည်မြောင်းဦးစီးဌာနမှ
သိရသည်။

■ ထို့အပြင် စက်တင်ဘာ ၆ ရက်မှ ၁၂ ရက်အတွင်း ဆည်ရေဝေဒေသများဖြစ်သည့် လှည်းကူး၊ တိုက်ကြီးတို့တွင် ၇ ရက် စုစုပေါင်း ခန့်မှန်းမိုးရေချိန် 33mm မှ 66mm (၁.၃ လက်မ မှ ၂.၆ လက်မခန့်)သာ ရရှိတော့မည်ဖြစ်ကြောင်း ပြင်ပမိုးလေဝသပညာရှင်ဦးဝင်းနိုင်က ‌သုံးသပ်ထားသည်။

■ ဒေသတွင်း မိုးရွာသွန်းမှုလျော့နည်းသွားမည်ဖြစ်ရာ ငမိုးရိပ်ဆည်အတွင်းသို့ ရေအသစ်စီးဝင်မှု လျော့ကျသွားမည်ဖြစ်ပြီး ရေပိုလွှဲမှရေကျော်ကျသည့် ပမာဏမှာတဖြည်းဖြည်းနည်းပါးကျဆင်းလာမည်ဖြစ်ကြောင်း သိရသည်။

■ ထို့အပြင် မြောက်ဥက္ကလာပ၊ ဒဂုံမြို့သစ် (အရှေ့/မြောက်) နှင့် ငမိုးရိပ်ချောင်းရိုးတစ်လျှောက်ရှိ မြေနိမ့်ပိုင်းများတွင် ဒီရေတက်ချိန်နှင့် ဆည်ရေကျော်ကျမှု ပေါင်းစပ်ပါက စိုးရိမ်ရသည့်ရေအမြင့်တွင် ခေတ္တ တည်ရှိနေနိုင်သေးသဖြင့် သတိထားစောင့်ကြည့်ရန်လိုအပ်ကြောင်း ၎င်းကဆိုထားသည်။

■ ရန်ကုန်တိုင်း တောင်ပိုင်း/ကမ်းရိုးတန်း ခရိုင်များ (ကျောက်တန်း၊ သံလျင်၊ ကွမ်းခြံကုန်း) - ကမ်းရိုးတန်းအနီး တည်ရှိမှုကြောင့် ၇ ရက်အတွင်း စုစုပေါင်း မိုးရေချိန် 42mm မှ 82mm ခန့် (၁.၆၅ လက်မ မှ ၃.၂၃ လက်မ ခန့်) ရရှိနိုင်ပြီး ပင်လယ်ဒီရေမြင့်တက်ချိန်များတွင် ရေချို/ရေငန် ရောနှော၍ ကမ်းစပ်မြေနိမ့်ပိုင်းများ၌ ရေခေတ္တဝင်နိုင်သော်လည်း ဒေသအလိုက် မိုးရွာသွန်းမှု ပါးသွားမည်ဖြစ်၍ ကြီးမားသော ရေကြီးရေလွှမ်းမိုးမှု အန္တရာယ် ဖြစ်ပေါ်နိုင်ခြေ မရှိနိုင်ကြောင်း ၊မြို့ပြဗဟို မြို့နယ်များဖြစ်သည့်အနောက်ပိုင်းခရိုင်တွင် နေ့စဉ်မိုးရွာသွန်းမှု ပမာဏ 2mm မှ 10mm ခန့် (၀.၀၈ လက်မ မှ ၀.၃၉ လက်မခန့်)သာ ရှိမည်ဖြစ်ရာ မိုးခတ္တခဏမျှသာ ရွာသွန်းနိုင်မည် ဖြစ်ပြီး လျှပ်တပြက်မြို့ပြရေလျှံမှု အခြေအနေများ မရှိတော့ဘဲ မြို့ပြရေစီးရေလာ ပုံမှန်အခြေအနေသို့ ပြန်လည်ရောက်ရှိ သက်သာလာမည်ဖြစ်ကြောင်းသိရသည်။

#YMG/NN #Yangon_Times

#Local_News
Published 07 September 2026

■ မြန်မာ့မီးရထားအနေဖြင့် ရထားစီးခရီးသွားပြည်သူများ ပိုမိုအဆင်ပြေစိတ်ချစွာ သွားလာနိုင်ရေးအတွက် ခေတ်မီလေအေးပေးစက်ပါ DEMU တွဲဆိုင်းသစ်များဖြင့် လူစီးအမြန်ရထားများ ပြေးဆွဲပေးလျက်ရှိရာ DEMU အမြန်ရထားအား ခဲဖြင့်ပစ်ပေါက်ခဲ့သူတစ်ဦးကို ဖမ်းဆီးအရေးယူထားကြောင်း သိရသည်။

■ စက်တင်ဘာ ၅ ရက် ညနေ ၅ နာရီ ၄၁ မိနစ်တွင် အမှတ် (၈) အစုန် နေပြည်တော်-ရန်ကုန် DEMU လူစီးအမြန်ရထားသည် ရန်ကုန်ဘူတာကြီးသို့ ရောက်ရှိခဲ့ပြီး ညနေ ၅ နာရီ ၅၅ မိနစ်တွင် ရထားတွဲဆိုင်းသိမ်းယူရန် မြို့ပတ်ဒီဇယ်စက်ခေါင်းရုံ (အင်းစိန်) သို့ ထွက်ခွာခဲ့သည်။

■ ထိုသို့ ထွက်ခွာလာစဉ် ညနေ ၆ နာရီ ၁၀ မိနစ်ခန့်တွင် ကြည့်မြင်တိုင်ဘူတာအဝင် မိုင်တိုင် ၃/၁၀ နှင့် ၃/၁၁ အကြား ဘုန်းကြီးကျောင်းလမ်းကူးအနီး ရထားဖြတ်သန်းချိန်၌ အမည်မသိအမျိုးသားတစ်ဦးက ရထားအား ခဲဖြင့်ပစ်ပေါက်ခဲ့သဖြင့် အထက်တန်းတွဲ DEMU (U) 5020 ရှိ ခုံအမှတ် 3A နှင့် 3B အကြား ပြတင်းတံခါးဘေး လေကာမှန်မှာ နှစ်လက်မခန့် ပေါက်ထွက်ကြေမွကွဲအက်ခဲ့ကြောင်း သိရသည်။

■ အခင်းဖြစ်ပွားရာနေရာကို စစ်ဆေးပြီး တရားခံဖမ်းဆီးရမိရေးအတွက် CCTV မှတ်တမ်းများအရ လှည့်ကင်း၊ ဝပ်ကင်းများဖြင့် ရထားသံလမ်းတစ်လျှောက် ဝိုင်းပတ်ပိတ်ဆို့ရှာဖွေခဲ့ရာ ယနေ့နံနက် ၃ နာရီတွင် စမ်းချောင်းမြို့နယ်၊ သီရိခေမာရပ်ကွက်၊ ခတ္တာလမ်းရှိ ရထားလမ်းဘေးတွင် အိပ်နေသူ အသက် ၄၁ နှစ်အရွယ် တင်ထွန်း (ခ) ဂနေးစားကို ဖမ်းဆီးရမိခဲ့ကြောင်း သိရသည်။

■ CCTV မှတ်တမ်းများဖြင့် တိုက်ဆိုင်စစ်ဆေးရာ ကိုက်ညီမှုရှိသဖြင့် ဖမ်းဆီးခေါ်ဆောင်၍ စမ်းချောင်းမြို့မရဲစခန်းတွင် (ပ)၃၆၁/၂၀၂၆၊ ရထားပို့ဆောင်ရေးလုပ်ငန်းဥပဒေ ပုဒ်မ ၈၄ ဖြင့် အမှုဖွင့်အရေးယူထားကြောင်း သိရသည်။

■ ထပ်မံစစ်ဆေးရာ စက်တင်ဘာ ၄ ရက်ကလည်း အမှတ် (၈) အစုန် DEMU ရထား၏ ပထမတန်းတွဲအား ခဲဖြင့်ပစ်ပေါက်ခဲ့သည့် အလားတူဖြစ်စဉ်တွင်ပါဝင်ခဲ့ကြောင်း ထပ်မံပေါ်ပေါက်ခဲ့သည်။

■ ရထားကို တစ်စုံတစ်ရာဖြင့် ပစ်ပေါက်ခြင်း သို့မဟုတ် ရထား၏ လုံခြုံမှုကို ထိခိုက်စေသည့် ပြုလုပ်မှုများအတွက် ရထားပို့ဆောင်ရေးလုပ်ငန်းဥပဒေအရ ထောင်ဒဏ် ၅ နှစ်မှ အနှစ် ၂၀ အထိ ချမှတ်နိုင်သည့်အပြင် ငွေဒဏ်လည်းချမှတ်နိုင်ကြောင်း သိရသည်။

■ မြန်မာ့မီးရထားအနေဖြင့် ရထားခရီးစဉ်များ ပိုမိုလုံခြုံကောင်းမွန်စေရေး ဆောင်ရွက်လျက်ရှိသည့်အပြင် ရထားများအား ပစ်ပေါက်ခြင်းကဲ့သို့ အများပြည်သူ၏ အသက်အန္တရာယ်နှင့် ရထားပိုင်ပစ္စည်းများ ထိခိုက်ပျက်စီးစေနိုင်သည့် လုပ်ရပ်များ မဖြစ်ပွားစေရေး ပြည်သူများအနေဖြင့်လည်း ဝိုင်းဝန်းပူးပေါင်းထိန်းသိမ်းပေးရန် လိုအပ်ကြောင်း သိရသည်။

#YMG/SW #Yangon_Times

#World_News
Published 07 September 2026

■ Amazon Prime Air ကုန်တင်လေယာဉ်တစ်စီးဟာ စက်တင်ဘာ ၆ ရက်နေ့ တနင်္ဂနွေနေ့က မိုင်ယာမီ နိုင်ငံတကာလေဆိပ်သို့ ဆင်းသက်စဉ် လေယာဉ်ပြေးလမ်းကျော်လွန်ကာ ပျက်ကျခဲ့တာကြောင့် အနည်းဆုံးလူ ၅ ဦး သေဆုံးခဲ့ကြောင်း ဒေသဆိုင်ရာ တာဝန်ရှိသူများ ပြောကြားခဲ့ပါတယ်။

■ 21 Air လေကြောင်းလိုင်းရဲ့ ခရီးစဉ်အမှတ် 7598 ဖြစ်ပြီး ပွာတိုရီကို ဆန်ဟွာရှိ လူးဝစ်မူနော့ဇ်မာရင် အပြည်ပြည်ဆိုင်ရာလေဆိပ်မှ ထွက်ခွာလာခြင်း ဖြစ်ပါတယ်။

■ အရှေ့ပိုင်းစံတော်ချိန် မွန်းလွဲ ၂ နာရီခန့် ဆင်းသက်စဉ် လေယာဉ်မှာ သတ်မှတ်ထားတဲ့ လေဆိပ်နယ်နိမိတ်အတွင်း မရပ်တန့်နိုင်ခဲ့ပါဘူး။

■ လေယာဉ်ဟာ လေဆိပ်စည်းရိုးကို ထိုးဖောက်ကာ အနီးအနားလမ်းပေါ်သို့ ရောက်ရှိသွားပြီး မော်တော်ယာဉ်များနဲ့ ဝင်တိုက်ခဲ့ပါတယ်။

■ ထိုကနေ မီးလောင်ကျွမ်းမှု ဖြစ်ပွားခဲ့ပြီး ကောင်းကင်သို့ မီးခိုးလုံးကြီးများ လွင့်ပျံသွားခဲ့ပါတယ်။

■ မီးငြှိမ်းသတ်ရန်နဲ့ ရှာဖွေကယ်ဆယ်ရေးလုပ်ငန်းများ ဆောင်ရွက်ရန်အတွက် Miami-Dade မီးသတ်နဲ့ ကယ်ဆယ်ရေးတပ်ဖွဲ့ဝင် ၆၀ ကျော် လာရောက်ခဲ့ကြပါတယ်။

■ အခင်းဖြစ်ပွားရာနေရာမှာ ထိခိုက်ဒဏ်ရာရရှိသူများနဲ့ သေဆုံးသူများရှိကြောင်း ဒေသဆိုင်ရာ တာဝန်ရှိသူများ အတည်ပြုခဲ့ပြီး ထိခိုက်ဒဏ်ရာရသူ အများအပြားကို အနီးရှိဆေးရုံများသို့ ပို့ဆောင်ပေးခဲ့ပါတယ်။

■ အမေရိကန် ဖက်ဒရယ်လေကြောင်း စီမံခန့်ခွဲရေးဦးစီးဌာနနဲ့ အမျိုးသားပို့ဆောင်ဆက်သွယ်ရေး လုံခြုံရေးဘုတ်အဖွဲ့တို့က မတော်တဆဖြစ်ပွားရတဲ့ အကြောင်းအရင်းကို ချက်ချင်းစုံစမ်းစစ်ဆေးနေပြီး ဒီဖြစ်စဉ်ကြောင့် မိုင်ယာမီလေဆိပ် လေယာဉ်ခရီးစဉ်များ ခေတ္တရပ်ဆိုင်းသွားခဲ့ပါတယ်။

Source: Reuters

#World_Science
Published 07 September 2026

■ အချိုစားချင်တဲ့စိတ်က လူသားဦးနှောက် ဆင့်ကဲပြောင်းလဲခြင်းအတွက် အခြေအနေဖန်တီးပေးခဲ့ဖွယ် ရှိပါတယ်။

■ လူသားတို့ရဲ့ ဦးနှောက်အရွယ်အစားဟာ နှစ်ပေါင်း ၄ သန်းကျော်အတွင်း ဆင့်ကဲပြောင်းလဲခဲ့ရာမှာ ၃၀၀ ဂရမ်ကနေ ၁,၅၀၀ ဂရမ်အထိ ကြီးထွားလာခဲ့ပါတယ်။

■ ဒီလိုကြီးထွားလာရခြင်းမှာ အသားစားသုံးမှုကြောင့်လို့ အရင်ကယူဆခဲ့ကြပေမယ့် အချိုတွေကလည်း အရေးပါတဲ့ကဏ္ဍက ပါဝင်ခဲ့ပါတယ်။

■ ရှေးဦးလူသားမျိုးနွယ်တို့ မီးနဲ့ သစ်ဥသစ်ဖုများကို ချက်ပြုတ်စားသောက်ခြင်း မတတ်မြောက်မီ အချိန်တည်းက ဦးနှောက်အရွယ်အစား ကြီးထွားမှု ဖြစ်ပေါ်ခဲ့ခြင်း ဖြစ်ပါတယ်။

■ အစားအစာ တွက်ချက်မှုများအရ မျောက်ဝံများနဲ့ ရှေးဦးလူသားများဟာ စွမ်းအင် ၃ ပုံ ၂ ပုံကျော်ကို သစ်သီးဝလံတွေကနေ ရရှိခဲ့ကြောင်း တွေ့ရှိရပါတယ်။

■ သစ်သီးများနဲ့ ပျားရည်မှရရှိတဲ့ ရိုးရိုးကာဗိုဟိုက်ဒရိတ်တွေဟာ ကြီးထွားလာတဲ့ ဦးနှောက်အတွက် လိုအပ်တဲ့ စွမ်းအင်များများကို မပြတ်ရရှိစေပါတယ်။

■ သစ်သီးများ ဘယ်နေရာ ဘယ်အချိန်မှာ မှည့်လဲဆိုတာကို မှတ်သားရခြင်းက မှတ်ဉာဏ်နဲ့ အသိဉာဏ် ဖွံ့ဖြိုးတိုးတက်မှုကို အားပေးကူညီခဲ့ပုံ ရပါတယ်။

■ ရှေးဦးလူသားတို့ရဲ့ သွားရုပ်ကြွင်းတွေမှာ သွားဆွေးတဲ့ အထောက်အထားများ တွေ့ရခြင်းက အချိုဓာတ်များတဲ့ အစာများကို စားသုံးခဲ့ကြောင်း အတည်ပြုနေပါတယ်။

■ ဦးနှောက်ကြီးထွားလာခြင်းမှာ သကြားဓာတ်နဲ့ အသားစားသုံးမှု နှစ်ခုစလုံး ယှဉ်တွဲပါဝင်ခဲ့တဲ့ အဓိကအကြောင်းအရင်းများဖြစ်ကြောင်း သုတေသီများ ထောက်ပြထားကြပါတယ်။

Source: Science News

#World_Health
Published 07 September 2026

■ ခရမ်းချဉ်သီးက ဈေးချိုသာပြီး အာဟာရဓာတ်နဲ့ ဓာတ်တိုးဆန့်ကျင်ပစ္စည်းများစွာ ပါဝင်တဲ့ အစားအစာတစ်ခု ဖြစ်ပါတယ်။

■ ခရမ်းချဉ်သီးမှာ ပါဝင်တဲ့ လိုင်ကိုပင်း ဓာတ်တိုးဆန့်ကျင်ပစ္စည်းက အနီရင့်ရောင် ဖြစ်ပေါ်စေပြီး ဆဲလ်တွေကို ပျက်စီးစေတဲ့ ဓာတ်တိုးပစ္စည်းများရန်မှ ကာကွယ်ပေးပါတယ်။

■ လိုင်ကိုပင်း မှန်မှန်စားသုံးပေးခြင်းဖြင့် နှလုံးနဲ့ သွေးကြောကျန်းမာရေး ထောက်ပံ့ပေးကာ သွေးဖိအားလျော့ကျစေတဲ့အပြင် အသားအရေ ကျန်းမာရေးကိုလည်း မြှင့်တင်ပေးပါတယ်။

■ ပိုမှည့်ပြီး အနီရောင်ပိုရင့်တဲ့ ခရမ်းချဉ်သီးတွေမှာ လိုင်ကိုပင်းပါဝင်မှု ပိုမိုမြင့်မားပါတယ်။

■ အပူပေးလိုက်ခြင်းက ခရမ်းချဉ်သီးရဲ့ ဆဲလ်နံရံများ ကျိုးပျက်စေပြီး ခန္ဓာကိုယ်ကနေ လိုင်ကိုပင်းဓာတ်ကို ပိုမိုလွယ်ကူစွာ စုပ်ယူနိုင်စေပါတယ်။

■ ခရမ်းချဉ်သီးကို သံလွင်ဆီ ဒါမှမဟုတ် နှမ်းဖတ်ဆီတို့လို ကျန်းမာရေးနဲ့ ညီညွတ်တဲ့ အဆီများနဲ့ တွဲဖက်စားသုံးခြင်းက လိုင်ကိုပင်းစုပ်ယူမှုကို သိသိသာသာ တိုးတက်စေပါတယ်။

■ အစိမ်းအတိုင်း စားသုံးတဲ့ ခရမ်းချဉ်သီးများဟာလည်း ဗိုက်တာမင်-စီ၊ ပိုတက်စီယံ၊ အမျှင်ဓာတ်နဲ့ ရေဓာတ်တို့အပါအဝင် အရေးပါတဲ့ အာဟာရဓာတ်များ ပေးစွမ်းနိုင်ဆဲ ဖြစ်ပါတယ်။

■ အာဟာရဖြည့်စွက်ဆေးများ မလိုအပ်ဘဲ ခရမ်းချဉ်သီးကို ဟင်းလျာတွေထဲကနေ ကျန်းမာရေးအကျိုးကျေးဇူးများ အပြည့်အဝ ရရှိနိုင်ပါတယ်။

Source: The Jerusalem Post

#World_Science
Published 06 September 2026

■ မုန်တိုင်းမလာခင် ပြင်းအားဘယ်လောက်ရှိနိုင်လဲဆိုတာ ခန့်မှန်းဖို့အတွက် အမေရိကန်သုတေသီများက CTD Tag ပစ္စည်းများတပ်ဆင်ကာ ငါးမန်းတွေကို အချိန်နဲ့တပြေးညီ လေ့လာစောင့်ကြည့်သူများအဖြစ် အသုံးပြုခဲ့ကြပါတယ်။

■ သိပ္ပံပညာရှင်တွေက ရေရဲ့ငန်နှုန်းကို တိုင်းတာဖို့အတွက် အပူချိန်၊ အနက်နဲ့ လျှပ်စစ်စီးဆင်းနိုင်စွမ်းတို့ကို တိုင်းတာပေးတဲ့ သေးငယ်ကျစ်လစ်တဲ့ CTD တံဆိပ်များ တပ်ဆင်ပေးတာ ဖြစ်ပါတယ်။

■ စုဆောင်းရရှိတဲ့ အချက်အလက်များဟာ ဟာရီကိန်းမုန်တိုင်းရဲ့ ပြင်းအားကို အဓိကတွန်းအားပေးတဲ့ ပင်လယ်ရေမျက်နှာပြင် အထက်ပိုင်း အပူချိန်စွမ်းအင်ကို တိုင်းတာပေးပါတယ်။

■ ငါးမန်းများဟာ ကာကွယ်စောင့်ရှောက်ပေးတဲ့ ရေသတ္တဝါများနဲ့ယှဉ်ရင် အရေအတွက်များပြားပြီး ရှာဖွေရလွယ်တကူကာ နေရာအနှံ့အပြား ပေါများစွာ တွေ့ရှိနိုင်ပါတယ်။

■ မြောက်အတ္တလန္တိတ်သမုဒ္ဒရာမှ လေ့လာဖို့ရွေးချယ်ထားတဲ့ ငါးမန်းမျိုးစိတ်တွေက Shortfin Mako ၊ Blue Shark ၊ Smooth hammerhead နဲ့ Great white ငါးမန်းငယ်များ ဖြစ်ကြပါတယ်။

■ ရွေးချယ်ထားတဲ့ မျိုးစိတ်များဟာ ရေမျက်နှာပြင်ပေါ်သို့ ခဏခဏတက်လာတဲ့အတွက် ကျောဆူးတောင်ပေါ်မှာ တပ်ဆင်ထားတဲ့ ပစ္စည်းတွေကနေ အချက်အလက်များကို ဂြိုဟ်တုများထံ တိုက်ရိုပေးပို့မှာ ဖြစ်ပါတယ်။

■ ရွှေ့ပြောင်းငါးမန်းများ ကမ်းရိုးတန်းသို့ နီးကပ်လာချိန် မေလဆန်းပိုင်းက ကမ်းလွန်မိုင် ၃၀ မှ ၄၀ အကွာမှာ အစာချိတ်ထားတဲ့ ငါးမျှားကြိုးများ အသုံးပြုပြီး ငါးမန်းတွေမှာ အမှတ်အသားပစ္စည်း တပ်ဆင်တဲ့လုပ်ငန်းများ စတင်ခဲ့ပါတယ်။

■ ပင်လယ်သမုဒ္ဒရာရဲ့ အချိန်နဲ့တပြေးညီ တိုင်းတာချက်တွေဟာ မုန်တိုင်းကုန်းတွင်းသို့ မဝင်ရောက်မီ ပြင်းအားကို ခန့်မှန်းရာမှာ ကူညီပေးနိုင်ရန် လေထုနဲ့ ရာသီဥတုဆိုင်ရာ မော်ဒယ်များသို့ တိုက်ရိုက်ပေးပို့သွားမှာ ဖြစ်ပါတယ်။

Source: WION

#World_Health
Published 06 September 2026

■ မဂ္ဂနီဆီယံဓာတ်က သွေးကြောနံရံများကို ပြေလျော့စေပြီး သွေးကြောကျုံ့ခြင်းကို ထိန်းညှိပေးတာကြောင့် သွေးလှည့်ပတ်မှုချောမွေ့စေကာ သွေးတိုးခြင်းကို လျှော့ချပေးပါတယ်။

■ အစိမ်းရင့်ရောင် ဟင်းသီးဟင်းရွက်များ၊ အစေ့အဆန်များ၊ ပဲအမျိုးမျိုးနဲ့ ချောကလက်မည်းတို့လို သဘာဝအစာအာဟာရတွေကနေ မဂ္ဂနီဆီယံ အဓိကရနိုင်ပါတယ်။

■ အမျိုးသားများအတွက် တစ်နေ့ကို သတ်မှတ်ထားတဲ့ လိုအပ်ချက်ပမာဏက ၄၀၀-၄၂၀ မီလီဂရမ်ဝန်းကျင်ဖြစ်ပါတယ်။

■ သွေးဖိအားထိန်းညှိရန်အတွက် သောက်ဆေးအဖြစ် သုံးစွဲမယ်ဆိုပါက ခန္ဓာကိုယ်မှ စုပ်ယူရလွယ်ကူတဲ့ မဂ္ဂနီဆီယံဂလိုင်ဆီနိတ် ဒါမှမဟုတ် မဂ္ဂနီဆီယံဆစ်ထရိတ် အမျိုးအစားများကို ရွေးချယ်သုံးစွဲသင့်ပါတယ်။

■ မဂ္ဂနီဆီယံက စိတ်ဖိစီးမှုတုံ့ပြန်မှုကို ထိန်းညှိပေးတာကြောင့် စိတ်ဖိစီးမှု လျှော့ချခြင်းဖြင့် ကော်တီဆောဟော်မုန်း အလွန်အကျွံ ထွက်ရှိခြင်းနဲ့ ဓာတ်သတ္တုများ လျင်မြန်စွာ ကုန်ခမ်းခြင်းတို့ကို ကာကွယ်ပေးပါတယ်။

■ အစာအိမ်နဲ့ အူလမ်းကြောင်း ဘေးထွက်ဆိုးကျိုးများ မဖြစ်စေရန် ဆရာဝန်ညွှန်ကြားချက်မပါဘဲ ဖြည့်စွက်ဆေးပမာဏကို တစ်နေ့လျှင် ၃၅၀ မီလီဂရမ်နဲ့အောက်သာ သုံးစွဲသင့်ပါတယ်။

■ မဂ္ဂနီဆီယံက သွေးဖိအားကို အသင့်အတင့်သာ လျှော့ချပေးနိုင်တဲ့ အထောက်အကူပြု သတ္တုဓာတ်တစ်ခု ဖြစ်တာကြောင့် ကျန်းမာတဲ့ လူနေမှုဘဝပုံစံကို အစားမထိုးနိုင်ဘဲ အားဖြည့်ပေးရုံသာ ဆောင်ရွက်ပေးပါတယ်။

■ အထူးသဖြင့် သွေးတိုးရောဂါဆေးများ သောက်သုံးနေရသူ ဒါမှမဟုတ် ကျောက်ကပ်ရောဂါ ရှိသူများအနေဖြင့် ဖြည့်စွက်ဆေးများ မသုံးစွဲမီ ကျန်းမာရေးစောင့်ရှောက်သူနဲ့ မဖြစ်မနေ တိုင်ပင်ဆွေးနွေးရပါမယ်။

Source: GQ