#Local_News
Published 12 March 2026

▪️ မကူးစက်နိုင်သော ရောဂါများ ကြောင့် နှစ်စဉ် လူဦးရေ ၄၃ သန်းကျော် သေဆုံးနေကြောင်း
ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်းကပြောသည်။

▪️ မြန်မာနိုင်ငံတွင် မကူးစက်နိုင်သောရောဂါများ ဖြစ်ပွားနိုင်ခြေများကို လေ့လာခြင်း သုတေသနအစီရင်ခံစာ အသိပေးတင်ပြခြင်းအခမ်းအနားကို ယမာန်နေ့နံနက်ပိုင်းတွင် ကျန်းမာရေးဝန်ကြီးဌာန Meeting Hall ၌ ကျင်းပသည်။

▪️ အခမ်းအနားတွင် ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်းက
ကမ္ဘာ့ကျန်းမာရေးအဖွဲ့၏ အချက်အလက်များအရ ကမ္ဘာတစ်ဝန်းတွင် နှလုံးသွေးကြောရောဂါ၊ ဆီးချို သွေးချိုရောဂါ၊ လေဖြတ်လေငန်းရောဂါ၊ ကင်ဆာရောဂါအစရှိသည့် မကူးစက်နိုင်သော ရောဂါများ ကြောင့် နှစ်စဉ် လူဦးရေ ၄၃ သန်းကျော် သေဆုံးနေရပါကြောင်း ပြောကြားသည်။

▪️ အဆိုပါသေဆုံးမှုများ၏ ၈၀ ရာခိုင် နှုန်းကျော်သည် ဖွံ့ဖြိုးဆဲနိုင်ငံများမှ ဖြစ်ပါကြောင်း၊ ကျန်းမာရေးနှင့် မညီညွတ်သည့် အစားအသောက်များ စားသုံးခြင်း၊ ကိုယ်လက်လှုပ်ရှားမှုနည်းပါးခြင်း၊ ဆေးလိပ်နှင့် ဆေးရွက်ကြီး ထွက်ပစ္စည်းများသုံးစွဲခြင်း၊ အရက်အလွန်အကျွံ သောက်သုံးခြင်း စသည့် အကြောင်းရင်းများကြောင့် သွေးပေါင်ချိန်တက်ခြင်း၊ သွေးတွင်းအချိုဓာတ်နှင့် အဆီဓာတ်များခြင်း၊ အဝလွန်ခြင်းကဲ့သို့သော ရောဂါဖြစ်ပွားနိုင်ခြေများ မြင့်မားလာစေပါကြောင်း၊ရောဂါဖြစ်ပွားလာပါက ကုသစရိတ်အတွက် နိုင်ငံတော်ဘဏ္ဍာငွေ အမြောက်အမြား ကျခံသုံးစွဲရခြင်း၊ ရောဂါကြောင့် အရွယ်မတိုင်မီ သေဆုံးရခြင်းများကြောင့် လူ့စွမ်းအားအရင်းအမြစ်များ ဆုံးရှုံးပြီး တိုင်းပြည်ဖွံ့ဖြိုးတိုးတက်မှုကို များစွာအဟန့်အတားဖြစ်စေပါကြောင်း၊ မြန်မာနိုင်ငံအပါအဝင် ကမ္ဘာ့နိုင်ငံအများအပြားတွင် မကူးစက်နိုင်သော ရောဂါများ ဖြစ်ပွားသေဆုံးမှု မြင့်တက်လာ ခြင်းသည် ပြည်သူ့ကျန်းမာရေးနှင့် ကျန်းမာရေးစောင့်ရှောက်မှုစနစ်အတွက် အဓိကစိန်ခေါ်မှုတစ်ရပ် ဖြစ်လာပါကြောင်း၊ ဗဟိုအဆင့်ဆေးရုံကြီးများမှ ကျေးလက်ကျန်းမာရေး ဌာနခွဲများအထိ ရောဂါဖြစ်ပွားမှုကို စောစီးစွာသိရှိနိုင်ရေးအတွက် ရောဂါစစ်ဆေးပေးခြင်းနှင့် ရောဂါဖြစ်ပွားပါက ထိရောက်သော ကုသမှုပေးခြင်းကို ပြည်သူလူထုတစ်ရပ်လုံး လက်လှမ်းမီနိုင်စေရန်နှင့် ပြည်သူများ စိုက်ထုတ်ကျခံသုံးစွဲရမှု လျော့နည်းစေရေးနိုင်ငံတော်မှ အထူးအလေးထား စီစဉ်ဆောင်ရွက်ပေးလျက်ရှိပါကြောင်း ၎င်းကဆိုသည်။

▪️ ထို့အပြင် မကူးစက်နိုင်သောရောဂါများ ဖြစ်ပွားနိုင်ခြေများကို STEPs Survey နည်းလမ်းဖြင့် လေ့လာခြင်း သုတေသနကို မြန်မာနိုင်ငံတွင် ၂၀၀၃ ခုနှစ်၊ ၂၀၀၉ ခုနှစ်၊ ၂၀၁၄ ခုနှစ်တို့တွင် ဆောင်ရွက်ခဲ့ပြီး ၂၀၂၄ ခုနှစ်တွင် စတင်၍ ၂၀၂၅ ခုနှစ်တွင် ပြီးစီးခဲ့သည့် သုတေသနအပါအဝင် စုစုပေါင်း လေးကြိမ်ဆောင်ရွက်ပြီး ဖြစ်ပါကြောင်း၊ ပြီးခဲ့သည့် ၂၀၁၄ ခုနှစ် သုတေသနရလဒ်များနှင့် နှိုင်းယှဉ်သည့်အခါ သွေးတိုးရောဂါ ဖြစ်ပွားမှုနှင့်ဆေးလိပ်နှင့် ဆေးရွက်ကြီးသုံးစွဲမှုတို့မှာ အနည်းငယ်လျော့ကျလာပြီး ပြည်သူလူထုအတွင်း အခြေခံဆေးဝါးများရရှိမှုအခြေအနေ တိုးတက်မြင့်မားလာသည်ကို တွေ့ရှိရသော်လည်း သွေးတွင်းသကြားဓာတ်နှင့် သွေးတွင်းအဆီ ဓာတ်များခြင်း၊ ခန္ဓာကိုယ်အလေး ချိန်များခြင်းကဲ့သို့သော ရောဂါဖြစ်ပွားနိုင်ခြေအများစုသည် ပိုမိုမြင့်တက်လာသည်ကို တွေ့ရှိရပါကြောင်း၊၂၀၃၀ ပြည့်နှစ် စဉ်ဆက်မပြတ် ဖွံ့ဖြိုးမှုပန်းတိုင်များနှင့် ပတ်သက်၍ ကျန်းမာရေးကဏ္ဍအနေဖြင့် အကောင်အထည်ဖော် ဆောင်ရွက်ရမည့် ဖွံ့ဖြိုးမှုပန်းတိုင်များ ပြည့်မီနိုင်ရေးကိုလည်း ကြိုးပမ်းဆောင်ရွက်လျက်ရှိပါကြောင်း၊ ထို့ပြင် မြန်မာနိုင်ငံတွင် လူတိုင်းလက်လှမ်းမီ လွှမ်းခြုံနိုင်သည့် အရည်အသွေးပြည့်ဝသော ကျန်းမာရေးစောင့်ရှောက်မှုကို သက္ကရာဇ် ၂၀၃၀ တွင် ပြည့်မီရန်ရည်မှန်းထားသည့်အတွက် ဝန်ကြီးဌာနအနေဖြင့် ပြည်သူလူထုမှ လိုအပ်လျက်ရှိသည့် လူမှုစီးပွားဘဝ ထိခိုက်လာသည်အထိ ကျန်းမာရေးအတွက် ငွေကြေးစိုက်ထုတ်သုံးစွဲရမှု ကုန်ကျစရိတ်များကို ကာကွယ်နိုင်ရန် တစ်နိုင်ငံလုံး လွှမ်းခြုံနိုင်ရေး စီစဉ်ဆောင်ရွက်လျက်ရှိပါကြောင်း ပြောကြားသည်။

▪️ အဆိုပါအခမ်းအနားသို့ ကျန်းမာရေးဝန်ကြီးဌာန ဒုတိယဝန်ကြီး၊ ဦးစီးဌာနများမှ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များနှင့် တာဝန်ရှိသူများ၊ ပြည်သူ့ကျန်းမာရေးတက္ကသိုလ် ပါမောက္ခချုပ်၊ စီမံချက်မန်နေဂျာများ၊ မြန်မာနိုင်ငံ မိခင်နှင့်ကလေးစောင့်ရှောက်ရေးအသင်း၊ မြန်မာနိုင်ငံအမျိုးသမီးရေးရာအဖွဲ့ချုပ်၊ မြန်မာနိုင်ငံ ကြက်ခြေနီအသင်း၊ မြန်မာနိုင်ငံဆရာဝန်အသင်း၊ ပြည်သူ့ကျန်းမာရေး ဖောင်ဒေးရှင်းတို့မှဥက္ကဋ္ဌနှင့် ကိုယ်စားလှယ်များတက်ရောက်ကြကြောင်း သိရသည်။

#YMG/NN #Yangon_Times

#Local_News
Published 12 March 2026

▪️ နေပြည်တော်ရှိ အမျိုးသာပြတိုက်ကို ပြန်လည်ဖွင့်လှစ်ပြသနေပြီဖြစ်ကြောင်း သိရသည်။
မန္တလေးငလျင်ဒဏ်ကြောင့် အမျိုးသားပြတိုက်(နေပြည်တော်)၏ အဆောက်အအုံပိုင်းများ ထိခိုက်ပျက်စီးခဲ့၍ ခေတ္တပိတ်ထားခဲ့ရသော်လည်း ယခုအခါ အဆောင် A နှင့် B ကို ပြန်လည်ပြုပြင်မွမ်းမံပြီးဖြစ်သဖြင့် ပရိုင်းမိတ်နှင့် ကျောက်ဖြစ်ရုပ်ကြွင်းပြခန်း၊ သမိုင်းမတင်မီခေတ်ပြခန်း၊ သမိုင်းတင်ခေတ်ဦး (ဘီစီ ၂ ရာစုမှ အေဒီ ၉ ရာစု) ပြခန်း၊ သမိုင်းတင်ခေတ် (အေဒီ ၁၁ ရာစု - ၁၄ ရာစု) ပြခန်း၊ မြန်မာ့ပန်းချီပြခန်း၊ မြန်မာ့အနု သုခုမပြခန်းနှင့် လက်ဆောင်ပစ္စည်းများပြခန်း စုစုပေါင်းပြခန်း ခုနစ်ခန်းကို အများပြည်သူကြည့်ရှု လေ့လာနိုင်ရန်အတွက် မတ် ၁၀ ရက်မှစတင်၍ တနင်္လာနေ့နှင့် ပြန်တမ်းဝင် ရုံးပိတ်ရက်များမှ လွဲ၍ နံနက် ၉ နာရီခွဲမှ ညနေ ၄ နာရီခွဲအထိ နေ့စဉ်ဖွင့်လှစ်ပြသသွားမည်ဖြစ်သည်။

▪️ အဆိုပါ ပြတိုက် ပြန်လည်ဖွင့်လှစ်ပြသသည့် အထိမ်းအမှတ်အဖြစ် မတ် ၁၀ ရက်မှ ၁၂ ရက်အထိ အခမဲ့ဖွင့်လှစ်ပြသသွားမည်ဖြစ်ပြီး အမျိုးသားပြတိုက် (နေပြည်တော်) ပြန်လည်ဖွင့်လှစ်သည့် မတ် ၁၀ ရက်တွင် လာရောက်လေ့လာ ကြည့်ရှုသူများကို ပြတိုက်ဝန်ထမ်းများက ပြခန်းအလိုက် ရှင်းလင်းပြသခဲ့ကြောင်းသိရသည်။

#YMG/NN #Yangon_Times

#World_Science
Published 12 March 2026

■ ဂြိုဟ်တုတွေ၊ ရေဒါတွေ၊ မိုးလေဝသခန့်မှန်းချက်စနစ်တွေ မပေါ်ခင်တုန်းက လူတွေက တိရိစ္ဆာန်တွေကိုကြည့်ပြီး ရာသီဥတု အပြောင်းအလဲလက္ခဏာတွေ စောင့်ကြည့်ခဲ့ကြပါတယ်။
သိပ္ပံနည်းကျ ဟုတ်ဟုတ်မဟုတ်ဟုတ် ပတ်ဝန်းကျင်အာရုံခံမှုတွေကနေ တိရိစ္ဆာန်အပြုအမူတွေ ဖြစ်ပေါ်တတ်ပါတယ်။

■ (၁) မိုးခန့်မှန်းနိုင်သော ဖား
ဒေသအများအပြားမှာ မိုးမရွာခင် ဖားအော်သံတွေ ပိုမိုကျယ်လောင်လာတတ်ပြီး လေထုဖိအား ပြောင်းလဲခြင်းနဲ့ စိုစွတ်မှု မြင့်တက်လာခြင်းတို့ကို ဖားတွေတုံ့ပြန်တာ ဖြစ်ပါတယ်။

■ (၂) တိမ်ကောင်းကင်အကြောင်းသတိပေးနိုင်သော ငှက်များ
ပျံလွှားငှက်တွေ အနိမ့်ပျံရင် မိုးရွာအံ့ဆဲဆဲဖြစ်နိုင်ပြီး ရုတ်တရက်ငြိမ်သက်သွားရင်တော့ မုန်တိုင်းနီးကပ်လာတဲ့သဘော ဖြစ်ကာ ဒါဟာငှက်တွေက လေဖိအားနဲ့ လေဦးတည်ချက်တို့ကို သိနိုင်စွမ်း အလွန်မြင့်မားတာကြောင့် ဖြစ်ပါတယ်။

■ (၃) မုန်တိုင်းအာရုံခံနိုင်သော ကြောင်
ကြောင်တွေက မုန်တိုင်းတို့ မိုးတို့နီးစပ်လာရင် ကဏာမငြိမ်၊ ပုံးကွယ်တတ်တဲ့သဘော မြင်တွေ့ရပြီး ဒါဟာ သူတို့ရဲ့ နှုတ်ခမ်းမွှေးတွေက သေးငယ်လှတဲ့ လေဖိအားအပြောင်းအလဲကို အာရုံခံနိုင်သလို ပတ်ဝန်းကျင်က ငြိမ်သက်လျှပ်စီးဓာတ်ကိုလည်း အလွန်အာရုံခံနိုင်တာကြောင့် ဖြစ်ပါတယ်။

■ (၄) မိုးရွာခြင်းကို ငြိမ်သက်စွာပြုမူသော နွားများ
မိုးမရွာခင် နွားတွေ လဲနေတတ်တယ်လို့ ယူဆဖူးကြပြီး စိုစွတ်မှုမြင့်မားကာ လေဖိအားအေးလာပြီဆိုရင် မြက်တွေစိုစွတ်လာတာကြောင့် နွားတွေက နွေးထွေးခြောက်သွေ့အောင် လဲနေတဲ့သဘော ဖြစ်ပါတယ်။

■ (၅) မိုးကြီးခြင်းကိုခန့်မှန်းနိုင်သော ပုရွက်ဆိတ်
မုန်တိုင်း၊ မိုးများမလာခင်မှာ ပုရွက်ဆိတ်တွေ အများအပြား ပေါ်လာတတ်တာဟာ လေထုဖိအားကျဆင်းခြင်းကို အာရုံခံနိုင်ပြီး ရေကြီးခြင်းမှကာကွယ်ဖို့ အသိုက်ပြောင်းရွှေ့ကြတာ ဖြစ်ပါတယ်။

■ (၆) ဖိအားကျဆင်းကိုသိရှိသော ငါးမန်း
မုန်တိုင်း ဟာရီကိန်းတို့မလာခင် သမုဒ္ဒရာထဲမှာ ငါးမန်းတွေဟာ ရေနက်ထဲ သွားကြတာကို သိရှိထားပြီး ဒါဟာ သူတို့ရဲ့ အာရုံခံအင်္ဂါတွေက ရေထဲက လျှပ်စီးနဲ့ ဖိအားပြောင်းလဲမှုကို သိရှိနိုင်တာကြောင့် ရှောင်ရှားတဲ့သဘော ဖြစ်ပါတယ်။

■ (၇) ရာသီဥတုညွှန်ပြသည့် ပျား
ပျားတွေ ပျားအုံနားရှိနေခြင်း အနိမ့်ပျံနေခြင်းတို့ဆိုရင် မိုးလာတဲ့သဘောဖြစ်ပြီး သူတို့ရဲ့ နေထိုင်ပုံက စိုစွတ်မှုအပေါ် မူတည်နေပါတယ်။

Source: Indian Express

#World_Health
Published 12 March 2026

■ အယ်ဇိုင်းမားရောဂါမှာ ပါဝင်တဲ့ ပရိုတိန်းတစ်ခုကို စစ်ဆေးတဲ့ သွေးစစ်ဆေးချက်များဖြင့် ရောဂါလက္ခဏာ မပေါ်ခင်မှာပင် ဘယ်အသက်အရွယ်မှာ ရောဂါဖြစ်နိုင်လဲဆိုတာကို ကူညီခန့်မှန်းပေးနိုင်ဖွယ်ရှိပါတယ်။

■ ဒါပေမဲ့ ဒီစစ်ဆေးနည်းတွေရဲ့ တိကျမှုနဲ့ မရေရာမှုအပေါ် မေးခွန်းထုတ်စရာများ ရှိနေပါတယ်။

■ လေ့လာမှုရလဒ်တွေက အားကိုးစရာဖြစ်ပေမယ့် လူနာတစ်ဦးချင်းစီအတွက် ထင်ရှားတဲ့ အကျိုးကျေးဇူးအဆင့်မှာ မရှိသေးသလို အယ်ဇိုင်းမားရောဂါဆိုတာက ရှုပ်ထွေးလှပြီး တစ်ဦးနဲ့တစ်ဦး ဖြစ်ပျက်ပုံတွေ ကွဲပြားတယ်လို့ ဗန်ဒါဘစ်ဆေးတက္ကသိုလ်မှ အာရုံကြောစိတ်ပညာရှင် ကိုရီဘော်လ်တန်က ပြောပါတယ်။

■ ဦးနှောက်အသိဉာဏ် ချို့ယွင်းခြင်းမရှိတဲ့ အသက် ၆၂ နှစ်မှ ၇၈ နှစ်ကြား လူပေါင်း ၆၀၀ ကျော်ကို သွေးစစ်ဆေးမှုများ ပြုလုပ်ခဲ့ကြကာ ပုံစံတစ်မျိုးဖြင့် စမ်းသပ်ခဲ့ကြပါတယ်။

■ ဒီရောဂါဟာ ဦးနှောက်ထဲမှာ အမိုင်လွိုက်ပရိုတိန်းအနည်တွေ၊ tau ပရိုတိန်းတွေ စုပြုံလာတာဖြစ်ပြီး လက္ခဏာမသိသာခင်အထိ ဆယ်စုနှစ်ကြာအောင် ရောဂါတိုးလာပါတယ်။

■ သွေးစစ်ဆေးနည်းတွေဟာ ရောဂါနဲ့ ဇီဝလက္ခဏာများကို ရှာဖွေရာမှာ အသုံးများလာပါတယ်။

■ အမေရိကန်မှာ အယ်ဇိုင်းမားလက္ခဏာရှိသူတွေအတွက် အသိအမှတ်ပြုထားတဲ့ စစ်ဆေးနည်း ၂ မျိုးကတော့ Lumipulse နဲ့ Elecsys တို့ဖြစ်ပါတယ်။

■ အဝလွန်ခြင်း၊ ကျောက်ကပ်ရောဂါတို့လို ရှိရင်းစွဲရောဂါအခြေအနေတွေကြောင့် စစ်ဆေးချက်ရလဒ် အပြောင်းအလဲ ဖြစ်နိုင်ပါတယ်။

■ ဒီလေ့လာချက်တွေ အတည်ပြုနိုင်ဖို့အတွက်ဆိုရင် ကွဲပြားတဲ့လူမျိုးတွေမှာ နောက်ထပ်လေ့လာသွားဖို့ လိုအပ်နေကြောင်း သုတေသီတွေ ပြောသွားပါတယ်။

Source: ScientificAmerican

စက်သုံးဆီမပြတ်လပ်စေရန်နှင့် အမှန်တကယ်လိုအပ်သူများ အဆင်ပြေစွာဝယ်ယူနိုင်ရန် စက်သုံးဆီအရောင်းဆိုင်များတွင် မတ်လ ၁၂ရက်နေ့မှစ၍ Barcode  နှင့် QR Code များကို Application ဖြင့် အလို အလျောက်စစ်ဆေးသည့်နည်းလမ်းဖြင့် စိစစ်ရောင်းချပေးသွားမည်ဖြစ်ကြောင်း စွမ်းအင်ဝန်ကြီးဌာနက ယနေ့သတင်းထုတ်ပြန်ပါတယ်။  ထုတ်ပြန်ချက်အပြည့်အစုံကို အောက်ပါအတိုင်းဖော်ပြပါတယ်။

စက်သုံးဆီရောင်းချမှုများအပေါ် စိစစ်ကြပ်မတ်နိုင်ရေးဆောင်ရွက်သွားမည့်အစီအမံ အသိပေးထုတ်ပြန်ခြင်း

၂၀၂၆ ခုနှစ်၊ မတ်လ ၁၁ ရက်

စက်သုံးဆီမပြတ်လပ်စေရန်နှင့် စက်သုံးဆီအမှန်တကယ်လိုအပ်သူများ အဆင်ပြေချောမွေ့စွာ ဝယ်ယူရရှိနိုင်စေရန်ရည်ရွယ်၍ အရောင်းဆိုင်များတွင် တစ်ရက်အတွင်း ၂ ကြိမ် (သို့မဟုတ်) ၃ ကြိမ် တန်းစီ ဝယ်ယူမှုများလျော့နည်းပပျောက်စေရေးအတွက် အရောင်းဆိုင်များအနေဖြင့် တယ်လီဖုန်း Application ကို အသုံးပြုပြီး စိစစ်ရောင်းချမှုများဆောင်ရွက်သွားမည်ဖြစ်ပါသည်။

         ယင်းသို့ဆောင်ရွက်ရာတွင် အများပြည်သူဝန်ထုပ်ဝန်ပိုးမဖြစ်စေရေးနှင့် ပိုမိုရိုးရှင်းလွယ်ကူစွာ ဆောင်ရွက်နိုင်ရေးအတွက် ယာဉ်ပိုင်ရှင်များမှ Application အသုံးပြုရန်နှင့် Registration ပြုလုပ်ရန် လုံးဝ မလိုအပ်ဘဲ အရောင်းဆိုင်အခြေပြုစိစစ်သည့်နည်းလမ်းဖြင့်ဆောင်ရွက်သွားမည်ဖြစ်ပါသည်။ မော်တော် ယာဉ်များအတွက် Wheel Tax ၏ Barcode ကိုလည်းကောင်း၊ မော်တော်ဆိုင်ကယ်များအတွက် Wheel Tax ပါအချက်အလက်များကို အသုံးပြုပြီး QR Code ထုတ်ပေး၍လည်းကောင်း Application ဖြင့် အလို အလျောက်စစ်ဆေးသည့်နည်းလမ်းဖြင့် စိစစ်ရောင်းချပေးသွားမည်ဖြစ်ပါသည်။

မော်တော်ယာဉ်များအတွက် Wheel Tax တွင်ပါရှိသော Barcode အား ဆိုင်ဝန်ထမ်းမှ Scan ဖတ်၍ စနစ်မှ အလိုအလျောက်စစ်ဆေးပြီး တစ်ရက်အတွင်း တစ်ကြိမ်မျှ စက်သုံးဆီဝယ်ယူထားခြင်းမရှိသေးပါက စက်သုံးဆီများဆက်လက်ရောင်းချပေးမည်ဖြစ်ပါသည်။ အကယ်၍  တစ်ရက်အတွင်း နောက်တစ်ကြိမ် ထပ်မံ ဝယ်ယူရန် မည်သည့်ဆိုင်တွင်မဆို Scan ဖတ်ပါက ၎င်းရက်အတွင်း ပထမအကြိမ်ဝယ်ယူခဲ့မှုကို ဖော်ပြပေး မည်ဖြစ်ကာ ဆီဝယ်ယူခွင့်ရရှိမည်မဟုတ်ဘဲ နောက်တစ်ရက်တွင်မှသာ ထပ်မံဝယ် ယူခွင့် ရရှိမည်ဖြစ်ပါသည်။ တစ်ရက်အတွင်း တစ်ကြိမ်ဝယ်ယူပြီးနောက် ထပ်မံတန်းစီဝယ်ယူမှုများမရှိစေရေး စိစစ်တားမြစ် သွားမည်ဖြစ်ပါသည်။

မော်တော်ဆိုင်ကယ်များ၏ Wheel Tax တွင် Barcode မပါရှိသည့်အတွက် အရောင်းဆိုင်တွင် QR Code များထုတ်ယူရမည်ဖြစ်ပါသည်။ ယင်းသို့ ထုတ်ယူနိုင်ရေးအတွက် ယာဉ်ပိုင်ရှင်များအနေဖြင့် ဆိုင်ကယ်၏ Wheel Tax အား အရောင်းဆိုင်ဝန်ထမ်းသို့ပေးအပ်ပြီး ဝန်ထမ်းမှ Application တွင် ယာဉ် နံပါတ်နှင့် သက်တမ်းကုန်ဆုံးရက်များဖြည့်သွင်းကာ QR Code ထုတ်ပေးမည်ဖြစ်ပါသည်။ ယင်း QR Code ကို ပိုင်ရှင်အနေဖြင့် ဖုန်းဖြင့် ဓာတ်ပုံရိုက်ယူခြင်း သို့မဟုတ် အရောင်းဆိုင်မှ Print ထုတ်ပေးခြင်းဖြင့် ရယူသိမ်းဆည်းထားရှိရန် လိုအပ်မည်ဖြစ်ပါသည်။ စက်သုံးဆီဝယ်ယူသည့်အခါတိုင်း ၎င်း QR Code အား အရောင်းဆိုင်ဝန်ထမ်းသို့ပြသဝယ်ယူနိုင်မည်ဖြစ်ပြီး  မော်တော်ယာဉ်များတွင် စိစစ်သကဲ့သို့ တစ်ရက်အတွင်း ၂ ကြိမ် (သို့မဟုတ်) ၃ ကြိမ်ဝယ်ယူမှုမရှိစေရေး စနစ်မှအလိုအလျောက်စစ်ဆေးရောင်းချပေးသွားမည်ဖြစ်ပါသည်။

အရောင်းဆိုင်များမှ စက်သုံးဆီများစိစစ်ရောင်းချရာတွင် နိုင်ငံတော်မှ ထုတ်ပြန်ထားရှိသည့် မူဝါဒ များနှင့်အညီ ယာဉ်အသုံးပြုခွင့် ခွင့်ပြုထားမှုအလိုက် စက်သုံးဆီရောင်းချနိုင်ရေးကိုလည်း တစ်ပါတည်း စစ်ဆေးမည်ဖြစ်ပါသဖြင့် မိမိယာဉ်အသုံးပြုခွင့်ရှိသည့်ရက်များအတွက်သာ စက်သုံးဆီဝယ်ယူခွင့်ရရှိမည် ဖြစ်ပါကြောင်း အသိပေးအပ်ပါသည်။

နေပြည်တော်ကောင်စီနယ်မြေ ၊ ရန်ကုန်မြို့၊ မန္တလေးမြို့နှင့် တောင်ကြီးမြို့တို့တွင် ၁၂-၃-၂၀၂၆ ရက်နေ့မှစတင်၍ စက်သုံးဆီအရောင်းဆိုင်များ၌ Application ဖြင့် အလိုအလျောက်စစ်ဆေးသည့် နည်းလမ်းကို စမ်းသပ်အသုံးပြုသွားမည်ဖြစ်ပြီး စနစ်အား လိုအပ်သောစစ်ဆေးပြုပြင်မှုများဆောင်ရွက် ပြီးပါက ကျန်မြို့ကြီးများတွင်လည်း ဆက်လက်၍ Application ကို အသုံးပြုသွားမည်ဖြစ်ပါသည်။

ပြည်သူများ၏ပူးပေါင်းပါဝင်ကူညီဆောင်ရွက်ပေးမှုများကြောင့် စက်သုံးဆီအရောင်းဆိုင်များတွင် ယာဉ်တန်းစီမှုများလျော့ကျသွားပြီး ပုံမှန်ဖြန့်ဖြူးရောင်းချနိုင်သည့်အခြေအနေသို့ပြန်လည်ရောက်ရှိခဲ့ပါသည်။ စွမ်းအင်ဝန်ကြီးဌာနအနေဖြင့်လည်း နေပြည်တော်ရှိ ရေနံထွက်ပစ္စည်းကြီးကြပ်စစ်ဆေးရေးဦးစီးဌာန၏ Online Monitoring Center တွင် စက်သုံးဆီတင်သွင်း၊ သိုလှောင်၊ ဖြန့်ဖြူးရောင်းချခြင်းလုပ်ငန်းစဉ် (Supply Chain) တစ်လျှောက်ကို အချိန်နှင့်တပြေးညီစောင့်ကြည့်ကြပ်မတ်လျက်ရှိခြင်း၊ စက်သုံးဆီရောင်းချမှု များနှင့်ပတ်သက်၍ မြို့ကြီးများရှိ စက်သုံးဆီအရောင်းဆိုင်များတွင် ရောင်းချပေးသည့် ယာဉ်အမျိုးအစား နှင့်ယာဉ်နံပါတ်၊ ဆီအမျိုးအစားနှင့်ပမာဏ၊ ရောင်းချပေးသည့်ဈေးနှုန်း စသည်တို့ကိုလည်း   အချိန်နှင့်တပြေးညီ စောင့်ကြည့်ကြပ်မတ်လျက်ရှိခြင်းတို့အပြင် ပြည်တွင်းစက်သုံးဆီဖူလုံမှုရှိစေရေးကိုလည်း အစီအမံအတိုင်း အထူးအလေးထားဆောင်ရွက်လျက်ရှိပါကြောင်း အသိပေးထုတ်ပြန်အပ်ပါသည်။

စွမ်းအင်ဝန်ကြီးဌာန

တရုတ်သမ္မတရှီကျင့်ဖျင်က တပ်မတော်အတွင်း သစ္စာစောင့်သိမှုမြှင့်တင်ရေးရဲ့ အားသာချက်တွေကို အပြည့်အဝအသုံးချရန် စနေနေ့က အလေးထားပြောကြားလိုက်ကာ အမျိုးသားကာကွယ်ရေးနဲ့ လက်နက်ကိုင်တပ်ဖွဲများ ရေရှည်တည်တံ့ရေး အနေအထားဖြင့် ခေတ်မီတိုးတက်ရေးမြှင့်တင်သွားရန် ပူးပေါင်းအားထုတ်ကြဖို့ တိုက်တွန်းလိုက်ပါတယ်။

#Asia_Politics
Published 11 March 2026
#တရုတ်သမ္မတရှီကျင့်ဖျင် #တရုတ်အမျိုးသားပြည်သူ့ကွန်ဂရက်
#YMG #Yangon_Times #Yangon_Media_Group

မြန်မာနိုင်ငံမှာ ပထမဆုံးအဖြစ်ကျင်းပမယ့် ၂၀၂၆မြန်မာပိုက်ကျော်ခြင်း လိဂ် (MSL)ပြိုင်ပွဲကိုအခုလအတွင်း စတင်ပြုလုပ်သွားမှာဖြစ်ပြီး ယင်းပြိုင်ပွဲမှာဆုကြေး‌ငွေအပြင် ခပ်ကြေးငွေကျပ်သိန်း၈၀၀ကျော်ကိုပါချီးမြှင့်သွားမယ်လို့ သိရပါတယ်။

#Local_News
Published 11 March 2026
#မြန်မာပိုက်ကျော်ခြင်းလိဂ် #MSL
#YMG/NN #Yangon_Times

အင်ဒိုနီးရှားနိုင်ငံ၊ဂျာကာတာမှာပြုလုပ်မယ့် အထည်အလိပ်ပြပွဲကို တက်ရောက်မယ့်မြန်မာအထည်အလိပ်လုပ်ငန်းရှင်တွေအနေနဲ့ တည်းခိုစရိတ်ကျခံရန်မလိုဘဲ မြန်မာနိုင်ငံအထည်ချုပ်လုပ်ငန်းရှင်များအသင်းကကျခံပေးသွားမယ်လို့ သိရပါတယ်။

#Local_News
Published 11 March 2026
#ဂျာကာတာ #အထည်အလိပ်ပြပွဲ
#YMG/SW #Yangon_Times

#Daily_News
Published 11 March 2026

၁။‌ ‎ခပ်ကြေးငွေသိန်း၈၀၀ကျော်ချီးမြှင့်မည့် ပထမဆုံး မြန်မာပိုက်ကျော်ခြင်းလိဂ် ပြိုင်ပွဲကျင်းပမည်

‌‎၂။ ‌‌‌‌‌‌‌‌‌‌‌‎ဂျာကာတာတွင်ပြုလုပ်မည့် အထည်အလိပ်ပြပွဲသို့တက်ရောက်မည့်သူများ တည်းခိုစရိတ်ကျခံရန်မလို

‎၃။‌‌‎ ‌‌‌‌‌‌‌‌‌‎မြန်မာရိုးရာသနပ်ခါးသင်္ကြန်ပါ၀င်ရန်ဆွေးနွေးနေ

‎၄။‎ ‌‌‌‌‌‌‌‌‌(၁၄)ကြိမ်မြောက် တရုတ်အမျိုးသားပြည်သူ့ကွန်ဂရက်နှစ်စဉ်အစည်းအဝေး၌ တရုတ်သမ္မတရှီကျင့်ဖျင်မိန့်ခွန်းပြော... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

ရှမ်းပြည်နယ်၌ မြန်မာရိုးရာသင်္ကြန်ကာလအတွင်းသနပ်ခါးသင်္ကြန် ပါ၀င်ရန် ဆွေးနွေးနေတယ်လို့သိရပါတယ်။

#Local_News
Published 11 March 2026
#မြန်မာရိုးရာသနပ်ခါးသင်္ကြန် #ရှမ်းပြည်နယ်
#YMG/NN #Yangon_Times

အွန်လိုင်းမှ တဆင့်ရထားလက်မှတ်ဝယ်ယူခြင်းအချိန်ကန့်သတ်ချက်အား ရထားမထွက်ခွာမီ (၁၀) မိနစ်အထိ ပြင်ဆင်သတ်မှတ်လိုက်တယ်လို့
မြန်မာ့မီရထားမှ သိရပါတယ်။

#Local_News
Published 11 March 2026
#မြန်မာ့မီရထား #အွန်လိုင်း
#YMG/SW #Yangon_Times

#World_Health
Published 11 March 2026

■ ဆီးချိုရောဂါ၊ ဆီးချိုဖြစ်နိုင်ခြေရှိခြင်းနဲ့ ကိုယ်အလေးချိန် တက်ခြင်းတို့ကို ထိန်းသိမ်းဖို့အတွက် အာလူးစားသင့်လား ကန်စွန်းဥစားသင့်လားဆိုတာ မေးစရာရှိပါတယ်။

■ နှစ်မျိုးစလုံးက ဗိုက်ပြည့်ဝစေပြီး သက်သာစွာ ဝယ်ယူနိုင်ပေမယ့် သွေးတွင်းသကြားဓာတ် ထိန်းသိမ်းဖို့နဲ့ ပတ်သက်ရင်တော့ ကွဲပြားသွားပါတယ်။

■ အာလူးက အချိုဓာတ်မြင့်တက်စေပြီး ကိုယ်အလေးချိန် တက်စေတယ်လို့ သိထားပါတယ်။

■ တကယ်တမ်းတော့ သွေးတွင်းသကြားဓာတ် ထိန်းချုပ်ခြင်းက အာလူးအမျိုးအစားသာမက ဘယ်လိုချက်တယ် ဘယ်လောက်စားတယ် ဘာနဲ့တွဲစားလဲဆိုတာတွေလည်း သက်ဆိုင်နေပါတယ်။

■ အာလူးပြုတ်တွေမှာ သွေးတွင်းသကြားဓာတ်မြင့်တက်နှုန်း(GI) အသင့်အတင့်ရှိပြီး အာလူးထောင်း အာလူးဖုတ်တို့ကတော့ GI မြင့်မားပါတယ်။

■ ကန်စွန်းဥက ပြုတ်စားမယ်ဆိုရင် GI အသင့်အတင့်ကနေ အနည်းငယ်သာ ရှိပြီး သာမန်အာလူးတွေထက် သွေးတွင်းသကြားဓာတ် မြင့်တက်နှုန်း နှေးစေနိုင်ပါတယ်။

■ အမျှင်ဓာတ်ပါဝင်မှုက အစာခြေနှုန်းကို နှေးစေပြီး သွေးတွင်းသကြားဓာတ် ရုတ်တရက်မြင့်တက်ခြင်းကို ကာကွယ်ပေးကာ ကန်စွန်းဥက အခွံပါစားမယ်ဆိုရင် အမျှင်ပိုပါဝင်ပါတယ်။

■ နှစ်မျိုးစလုံးက ကာဗိုဟိုက်ဒရိတ် ကြွယ်ဝပြီး ခွန်အားပေးနိုင်ပေမယ့် ကွာခြားချက်က ဒီကာဗိုဟိုက်ဒရိတ်တွေ သွေးထဲမှာ ဂလူးကို့စ်အဖြစ် ဘယ်လောက်မြန်မြန် ပြောင်းလဲသလဲဆိုတာပါပဲ။

■ အာလူးနဲ့ ကန်စွန်းဥတို့ကို ပြုတ်စားခြင်းက ကစီဓာတ်ရစေပြီး သွေးတွင်းသကြားဓာတ် ထိန်းစေနိုင်ပါတယ်။

■ အာလူးကြော်နဲ့ ကန်စွန်းဥကြော်တို့ဆိုရင်တော့ သကြားဓာတ်မြင့်တက်စေပြီး ဆိုးကျိုးပြုဆီတွေလည်း ပါဝင်ပါတယ်။

■ နှစ်မျိုးစလုံးကို အသင့်အတင့်ပမာဏဖြင့် ပရိုတိန်း၊ အမျှင်ဓာတ်တို့နဲ့ တွဲစားပါက အာဟာရမျှတမှုရနိုင်ပါတယ်။

Source: India Today