#Local_News
Published 16 September 2026

■ နိုင်ငံတော်ဩဝါဒါစရိယ ရွှေကျင်နိကာယသာသနာပိုင် သီတဂူဆရာတော်ကြီးသည် နီပေါနိုင်ငံ၌ ရေဘေးနှင့်ကြုံတွေ့ခဲ့သည့် နီပေါနိုင်ငံသားများအတွက် အမေရိကန်ဒေါ်လာတစ်သောင်း လှူဒါန်းခဲ့ကြောင်း သိရသည်။
 
■ အဆိုပါပေးအပ်လှူဒါန်းပွဲကို စက်တင်ဘာ ၁၃ ရက် မွန်းလွဲပိုင်းက ရန်ကုန်တိုင်းဒေသကြီး ဒဂုံမြို့သစ် (မြောက်ပိုင်း)ရှိ သီတဂူဗုဒ္ဓတက္ကသိုလ် (ရန်ကုန်)တွင် ကျင်းပခဲ့ခြင်းဖြစ်သည်။

■ သီတဂူဆရာတော်ကြီးက ၂၀၂၆ ခုနှစ် ဩဂုတ် ၂၆ ရက်က နီပေါနိုင်ငံတွင် ဖြစ်ပွားခဲ့သည့် ရေကြီးရေလျှံမှုများကြောင့် အိုးအိမ်များပျက်စီးဆုံးရှုံးခဲ့ရသည့် နီပေါနိုင်ငံသားများအား ကူညီထောက်ပံ့နိုင်စေခြင်းအကျိုးငှာ လှူဒါန်းခဲ့ခြင်းဖြစ်ကြောင်း မိန့်ကြားခဲ့သည်။
 
■ ယင်းနောက် သီတဂူဆရာတော်ကြီးက အမေရိကန်ဒေါ်လာ တစ်သောင်းကို ပေးအပ်လှူဒါန်းရာ မြန်မာနိုင်ငံဆိုင်ရာ နီပေါသံအမတ်ကြီးက လက်ခံရယူခဲ့သည်။

■ သံအမတ်ကြီးက မိတ်ဖက်နိုင်ငံဖြစ်သည့် မြန်မာနိုင်ငံအစိုးရ၏ ကရုဏာထား လှူဒါန်းမှုများလည်းရှိပါကြောင်း၊ ယင်းအတွက်လည်း ကျေးဇူးတင်ဝမ်းမြောက်ပါကြောင်း ဆရာတော်ကြီးမှလည်း ယခုကဲ့သို့ မေတ္တာကရုဏာထားပြီး စောင့်ရှောက်လှူဒါန်းမှုပြုလုပ်ပေးသည့်အတွက်လည်း ဝမ်းမြောက်ဝမ်းသာဖြစ်ရပါကြောင်း ပြန်လည်လျှောက်ထားခဲ့ကြောင်း သိရသည်။
 
#YMG/NN #Yangon_Times

#Local_News
ပေကျင်း၊ စက်တင်ဘာ ၁၆

■ တရုတ်ပြည်သူ့လွတ်မြောက်ရေးတပ်မတော် (PLA) ရေတပ်၏ အမှတ် (၄၈) သင်္ဘောစောင့်ကြပ်ရေးတပ်ဖွဲ့ သင်္ဘောအုပ်စု သည် အေဒင်ပင်လယ်ကွေ့၌ တာဝန်ထမ်းဆောင်မှုများ ပြီးဆုံး၍ တရုတ်နိုင်ငံသို့ ပြန်လည်ထွက်ခွာလာရာ အပြန်ခရီးစဉ်အတွင်း မြန်မာနိုင်ငံသို့ လာရောက်မည်ဖြစ်ကြောင်း တရုတ်အမျိုးသားကာကွယ်ရေးဝန်ကြီးဌာနက ထုတ်ပြန်ချက်ကိုကိုးကး၍ ဆင်ဟွာ သတင်းတွင်ရေးသားသည်။

■ တရုတ်ရေတပ်တပ်ဖွဲ့သည် မြန်မာနိုင်ငံအပြင် ဘင်္ဂလားဒေ့ရှ်နှင့် မလေးရှားနိုင်ငံတို့သို့လည်း သွားရောက်မည်ဖြစ်ကြောင်း တရုတ်အမျိုးသားကာကွယ်ရေးဝန်ကြီးဌာန ပြောရေးဆိုခွင့်ရှိသူ ကျန်းပင်က တနင်္လာနေ့ သတင်းစာရှင်းလင်းပွဲတွင် ပြောကြားသည်။

■ မြန်မာနိုင်ငံသို့ လာရောက်စဉ် တရုတ်ရေတပ်နှင့် မြန်မာဘက်မှ သက်ဆိုင်ရာအဖွဲ့အစည်းများအကြား ကျွမ်းကျင်မှုဆိုင်ရာ အပြန်အလှန်ဖလှယ်မှုများ ပြုလုပ်မည်ဖြစ်ပြီး ရေတပ်သင်္ဘောများကို အများပြည်သူ လေ့လာကြည့်ရှုနိုင်မည့် အစီအစဉ်များလည်း ပါဝင်မည်ဖြစ်သည်။

■ သို့သော် မြန်မာနိုင်ငံသို့ ရောက်ရှိမည့်ရက်၊ ဆိုက်ကပ်မည့်ဆိပ်ကမ်းနှင့် ခရီးစဉ်ကြာမြင့်ချိန်တို့ကို ထုတ်ပြန်ချက်တွင် ဖော်ပြထားခြင်းမရှိသေးပေ။

■ အဆိုပါခရီးစဉ်များမှတစ်ဆင့် တရုတ်နိုင်ငံနှင့် သက်ဆိုင်ရာနိုင်ငံများအကြား ကာလရှည်ကြာ ချစ်ကြည်ရင်းနှီးမှုနှင့် မဟာဗျူဟာမြောက် အပြန်အလှန်ယုံကြည်မှုတို့ကို ပိုမိုမြှင့်တင်ရန် ရည်ရွယ်ကြောင်း ကျန်းပင်က ပြောသည်။

■ အိမ်နီးချင်းနိုင်ငံများနှင့် မျှဝေအနာဂတ်အသိုက်အဝန်း တည်ဆောက်ရေးကိုလည်း အထောက်အကူပြုမည်ဟု ၎င်းက ဆိုသည်။

■ မြန်မာနိုင်ငံသို့ လာရောက်မည့် အမှတ် (၄၈) သင်္ဘောစောင့်ကြပ်ရေးတပ်ဖွဲ့တွင် ပဲ့ထိန်းဒုံးကျည်တပ် ဖျက်သင်္ဘော Tangshan၊ ပဲ့ထိန်းဒုံးကျည်တပ် ဖရီးဂိတ်စစ်သင်္ဘော Daqing နှင့် ဘက်စုံထောက်ပံ့ရေးသင်္ဘော Taihu တို့ ပါဝင်သည်။

■ အဆိုပါ ရေတပ်သင်္ဘောသုံးစင်းသည် ၂၀၂၅ ခုနှစ် အောက်တိုဘာ ၁၁ ရက်တွင် အေဒင်ပင်လယ်ကွေ့နှင့် ဆိုမာလီယာကမ်းလွန်ရေပြင်၌ သင်္ဘောစောင့်ကြပ်ရေးတာဝန်များ ထမ်းဆောင်ရန် ထွက်ခွာခဲ့ခြင်းဖြစ်သည်။

■ တရုတ် PLA ရေတပ်သည် အေဒင်ပင်လယ်ကွေ့နှင့် ဆိုမာလီယာကမ်းလွန်ရေပြင်တို့၌ သင်္ဘောစောင့်ကြပ်ရေးတာဝန်များကို ၂၀၀၈ ခုနှစ် ဒီဇင်ဘာလမှစ၍ ဆောင်ရွက်လာခဲ့သည်။

#YMG #Yangon_Times #Yangon_Media_Group

#Local_News
ရန်ကုန်၊ စက်တင်ဘာ ၁၆

■ မြန်မာနိုင်ငံသည် လေကြောင်းခရီးဖြင့် ဝင်ရောက်လာသည့် တရုတ်နှင့် အိန္ဒိယနိုင်ငံသား ခရီးသွားများအတွက် ဆိုက်ရောက်ဗီဇာ (Visa on Arrival) ခွင့်ပြုသည့် စမ်းသပ်အစီအစဉ်ကို တတိယအကြိမ်အဖြစ် တစ်နှစ်ထပ်မံတိုးမြှင့်လိုက်ကြောင်း ယဉ်ကျေးမှု၊ ဟိုတယ်နှင့် ခရီးသွားလာရေးဝန်ကြီးဌာနက စက်တင်ဘာ ၁၅ ရက်တွင် ထုတ်ပြန်သည်။

■ အစီအစဉ်သက်တမ်းတိုးကာလသည် ၂၀၂၆ ခုနှစ် ဩဂုတ် ၃၀ ရက်မှ ၂၀၂၇ ခုနှစ် ဩဂုတ် ၂၉ ရက်အထိ တစ်နှစ်ကြာ အကျုံးဝင်မည်ဖြစ်ကြောင်း ဝန်ကြီးဌာန၏ ထုတ်ပြန်ချက်တွင် ဖော်ပြထားသည်။

■ မြန်မာနိုင်ငံသို့ ၂၀၂၆ ခုနှစ် ပထမရှစ်လအတွင်း နိုင်ငံခြားခရီးသွား ၇၀၁,၁၄၁ ဦး ဝင်ရောက်ခဲ့ပြီး ယင်းကာလအတွင်း ထိုင်းနှင့် တရုတ်နိုင်ငံတို့မှ လာရောက်သူ အများဆုံးဖြစ်ကြောင်း ဝန်ကြီးဌာန၏ အချက်အလက်များအရ သိရသည်။

■ ယမန်နှစ် အလားတူကာလတွင် နိုင်ငံခြားခရီးသွား ၆၅၃,၉၅၂ ဦး ဝင်ရောက်ခဲ့သဖြင့် ယခုနှစ် ပထမရှစ်လအတွင်း ခရီးသွားဝင်ရောက်မှုသည် ယမန်နှစ်ထက် ၄၇,၁၈၉ ဦး၊ ခန့်မှန်းအားဖြင့် ၇.၂ ရာခိုင်နှုန်း တိုးလာခဲ့သည်။

■ တရုတ်နှင့် အိန္ဒိယခရီးသွားများအတွက် လေကြောင်းမှတစ်ဆင့် ဆိုက်ရောက်ဗီဇာခွင့်ပြုမှုကို တစ်နှစ်ထပ်မံသက်တမ်းတိုးခြင်းသည် အဆိုပါနှစ်နိုင်ငံမှ ခရီးသွားများအနေဖြင့် ၂၀၂၇ ခုနှစ် ဩဂုတ် ၂၉ ရက်အထိ ယင်းအစီအစဉ်အောက်တွင် မြန်မာနိုင်ငံသို့ လာရောက်နိုင်မည်ဖြစ်ကြောင်း ဝန်ကြီးဌာန၏ ထုတ်ပြန်ချက်အရသိရသည်။

#YMG #Yangon_Times #Yangon_Media_Group

#World_News
Published 16 Setember 2026

■ စီအိုင်အေ(CIA) အရာရှိဟောင်း ဒေးဗစ်ရပ်ရှ်ဟာ အမေရိကန်ဒေါ်လာသန်း ၄၀ တန်ဖိုးရှိ ရွှေခိုးယူ‌ဖောက်ထွင်းမှုဖြင့် ပြီးခဲ့တဲ့ မေလက ဖမ်းဆီးခံခဲ့ရပါတယ်။

■ FBI ရှာဖွေရာမှာ သူ့ရဲ့နေအိမ်မှ ရွှေချောင်း ၃၀၃ ချောင်း၊ အမေရိကန်ဒေါ်လာ ၂ သန်းနဲ့ တန်ဖိုးကြီး လက်ပတ်နာရီ ၃၅ လုံးတို့ကို သိမ်းဆည်းရမိခဲ့ပါတယ်။

■ ရပ်ရှ်ဟာ ၂၀၂၅ ခုနှစ် နိုဝင်ဘာလမှ ၂၀၂၆ ခုနှစ် မတ်လအတွင်း လျှို့ဝှက်လုပ်ငန်းသုံး စရိတ်များအဖြစ် ထိုရွှေနဲ့ ငွေကြေးများကို လက်ခံရရှိခဲ့ခြင်း ဖြစ်ပါတယ်။

■ CIA အနေဖြင့် သူ့ရဲ့ အလွန်လျှို့ဝှက်တဲ့ စီမံကိန်းအတွက် ခွဲဝေပေးထားတဲ့ ငွေတွေအသုံးချမှုကို သေချာ မစောင့်ကြည့်နိုင်ခဲ့ပါဘူး။

■ ရပ်ရှ်က သူ့ရဲ့ ပညာအရည်အချင်းနဲ့ ပတ်သက်ပြီး ဆယ်စုနှစ်များစွာ လိမ်လည်ခဲ့ကာ စစ်ဘက်ဆိုင်ရာ လေကြောင်းစစ်သည် ဖြစ်တယ်လို့လည်း မမှန်မကန် လိမ်လည်ပြောဆိုခဲ့ကြောင်း စုံစမ်းစစ်ဆေးသူများ တွေ့ရှိခဲ့ကြပါတယ်။

■ ဖမ်းဆီးခံရပြီး ၄ လအကြာမှာ ရပ်ရှ်ဟာ အမေရိကန် ဖက်ဒရယ် တရားလိုရှေ့နေများနဲ့ ယာယီ အပြစ်ဝန်ခံချက် သဘောတူညီမှု ရရှိခဲ့ပါတယ်။

■ တရားလိုရှေ့နေများအနေဖြင့် လျှို့ဝှက်ထားတဲ့ အချက်အလက်များကို ပွင့်လင်းမြင်သာတဲ့ တရားခွင်မှာ အငြင်းပွားဖွင့်ဟရမှာကို ရှောင်ရှားရန်အတွက် ထိုသဘောတူညီမှုကို ရွေးချယ်ခဲ့ကြခြင်းဖြစ်ပါတယ်။

■ ဒီအမှုဟာ လျှို့ဝှက်ဆန်းကြယ်ပြီး တန်ဖိုးကြီးမားတဲ့ လှုပ်ရှားမှုများနဲ့ တရားဥပဒေစိုးမိုးရေး စနစ်တို့ ရင်ဆိုင်ရတဲ့အခါ ကြုံတွေ့ရနိုင်တဲ့ ဘေးအန္တရာယ်များကို မီးမောင်းထိုးပြနေပါတယ်။

Source: WION

#Local_News
လော့စ်အိန်ဂျလိစ်၊ အမေရိကန် | ၂၀၂၆ ခုနှစ် စက်တင်ဘာ ၁၆ ရက်

■ ကယ်လီဖိုးနီးယားပြည်နယ် လော့စ်အိန်ဂျလိစ်မြို့ရှိ Chatsworth ရပ်ကွက်တွင် NBC Los Angeles ၏ သတင်းရဟတ်ယာဉ်တစ်စင်း ပျက်ကျမီးလောင်ခဲ့ရာ အနည်းဆုံး ၃ ဦး သေဆုံးပြီး ၁ ဦး ဆေးရုံတင်ထားရကြောင်း မီးသတ်ဌာနက ပြောကြားသည်။

■ အဆိုပါရဟတ်ယာဉ်သည် အနီးအနားတွင် အားကစားသုံးယာဉ်တစ်စီးနှင့် မြို့တွင်းဘတ်စ်ကားတစ်စီး တိုက်မိခဲ့သည့် ဖြစ်ရပ်ကို သတင်းယူနေစဉ် ပျက်ကျခဲ့ခြင်းဖြစ်သည်။

■ ရဟတ်ယာဉ်ပျက်ကျမှုကြောင့် မြေပြင်ရှိ ကားများနှင့် ပစ္စည်းသိုလှောင်ရုံများ မီးလောင်ခဲ့သော်လည်း မီးသတ်သမားများက မီးကို ထိန်းချုပ်နိုင်ခဲ့သည်။

■ အစောပိုင်း ဘတ်စ်ကားတိုက်မှုတွင်လည်း ၂ ဦး သေဆုံးပြီး ၆ ဦး ဒဏ်ရာရရှိခဲ့သည်။

■ ရဟတ်ယာဉ်ပျက်ကျရသည့် အကြောင်းရင်းကို မသိရသေးဘဲ အမေရိကန် အမျိုးသားသယ်ယူပို့ဆောင်ရေး လုံခြုံရေးဘုတ်အဖွဲ့ (NTSB) နှင့် လေကြောင်းအုပ်ချုပ်ရေးအဖွဲ့ (FAA) တို့က စုံစမ်းစစ်ဆေးမည်ဖြစ်သည်။

Source: WION / Reuters / AP

#World_Health
Published 16 September 2026

■ ကျောက်ကပ်တွေက ဗိုက်တာမင်များနဲ့ အာဟာရဖြည့်စွက်စာများ အပါအဝင် စားသောက်သမျှ အရာအားလုံးကနေ ဘေးထွက်စွန့်ပစ်ပစ္စည်းများကို စစ်ထုတ်ပေးပါတယ်။

■ အာဟာရဖြည့်စွက်စာအချို့ကို ပမာဏအလွန်အကျွံ သောက်သုံးခြင်းက ကျောက်ကပ်လုပ်ဆောင်ချက်ကို ဝန်ပိစေနိုင်ပြီး ကျောက်ကပ်အဆိပ်သင့်မှု ဖြစ်စေနိုင်ပါတယ်။

■ ဗိုက်တာမင်-စီလိုမျိုး ရေမှာပျော်ဝင်တဲ့ ဗိုက်တာမင်များကို ပမာဏအမြောက်အများ သောက်သုံးပါက ကျောက်ကပ်ကျောက်တည်စေနိုင်ပြီး ဗိုက်တာမင်-ဒီ ပမာဏလွန်ကဲပါက ကယ်စီယံဓာတ် လွန်ကဲမှုဖြစ်စေနိုင်ပါတယ်။

■ ကျောက်ကပ်လုပ်ဆောင် အားနည်းပါက ပိုတက်စီယံ၊ ဖော့စ်ဖရပ်စ်၊ ဆိုဒီယံတို့လို သတ္တုဓာတ်များကို ပမာဏအများအပြား သောက်သုံးခြင်းဖြင့် သွေးတွင်းလျင်မြန်စွာ စုပြုံလာနိုင်ပါတယ်။

■ အချို့သော သဘာဝသစ်ဥသစ်ဖုဆေးများနဲ့ စံချိန်စံညွှန်းမမီတဲ့ ဖြည့်စွက်စာတွေမှာ ကျောက်ကပ်တစ်ရှူးများကို တိုက်ရိုက်ပျက်စီးစေနိုင်တဲ့ ပုန်းကွယ်နေတဲ့ အဆိပ်အတောက် ဒါမှမဟုတ် သတ္တဓာတ်ကြီးများ ပါဝင်နေနိုင်ပါတယ်။

■ ဆရာဝန်ညွှန်ကြားထားတဲ့ ဆေးများနဲ့အတူ ဖြည့်စွက်ဆေးအမျိုးမျိုးကို တွဲဖက်သောက်သုံးခြင်းက ကျောက်ကပ်အလုပ်ပိုလုပ်ရစေပြီး ဆေးဝါးချင်းတုံ့ပြန်မှုများ ဖြစ်စေနိုင်ပါတယ်။

■ အာဟာရပညာရှင်များက လိုအပ်တဲ့ အာဟာရများကို ပြင်းအားမြင့်ဆေးပြားများထက် အဓိကအားဖြင့် မျှတတဲ့ အစားအစာများမှ ရယူရန် အကြံပြုထားပါတယ်။

■ ဖြည့်စွက်စာအသစ်များ မသောက်သုံးမီ ကျောက်ကပ်အခြေအနေကို ဆရာဝန်များနဲ့ အမြဲတမ်းတိုင်ပင်သင့်ပါတယ်။

Source: Eating Well

#World_Science
Published 16 September 2026

■ ပန်းဂေါ်ဖီ ၁၀၀ ဂရမ်မှာ ၂၅ ကယ်လိုရီပဲ ပါဝင်တာကြောင့် ကယ်လိုရီအရမ်းမတိုးစေဘဲ ဗိုက်ပြည့်လွယ်စေပါတယ်။

■ အမျှင်ဓာတ် ကြွယ်ဝစွာ ပါဝင်တာကြောင့် အစာခြေစနစ်ကို ထောက်ကူပေးရုံတင်မက ဗိုက်ပြည့်စေပြီး သွေးတွင်းသကြားဓာတ် စုပ်ယူမှုကိုလည်း ဖြည်းဖြည်းချင်း ထိန်းညှိပေးပါတယ်။

■ ဗိုက်တာမင်-စီ ကြွယ်ဝစွာ ပါဝင်တာကြောင့် ကိုယ်ခံအားစနစ်၊ ကော်လာဂျင်ထုတ်လုပ်မှုနဲ့ အပင်မှရတဲ့ သံဓာတ်စုပ်ယူမှုကို အားပေးပါတယ်။

■ သွေးခဲမှုနဲ့ အရိုးကျန်းမာရေးအတွက် ဗိုက်တာမင်-ကေ ပါဝင်သလို ဆဲလ်ကွဲပွားမှု ဖြစ်စဉ်များအတွက် လိုအပ်တဲ့ ဖောလစ်အက်ဆစ်လည်း ပါဝင်ပါတယ်။

■ မုန်လာမျိုးနွယ်ဝင် ဟင်းရွက်ဖြစ်တာနဲ့အမျှ ဆဲလ်များကို ကာကွယ်ပေးပြီး အသည်းအဆိပ်အတောက် ပြယ်စေတဲ့ဖြစ်စဉ်ကို ထောက်ပံ့ပေးတဲ့ Glucosinolates ၊ Isothiocyanates ၊ Indoles ဒြပ်ပေါင်းများ ပါဝင်ပါတယ်။

■ မုန်လာမျိုးနွယ်များကို အစိမ်းစားပါက အိုင်အိုဒင်းစုပ်ယူမှုကို အနည်းငယ် နှောင့်ယှက်နိုင်တယ်ဆိုပေမယ့် ပုံမှန်စားသုံးခြင်းက ကျန်းမာရေးကောင်းသူတွေအတွက်တော့ ဘာပြဿနာမှ မရှိပါဘူး။

■ ချက်ပြုတ်စားသုံးခြင်းဖြင့် အိုင်အိုဒင်းစုပ်ယူမှုနှောင့်ယှက်တဲ့ ဓာတ်များကို လျှော့ချပေးနိုင်ပြီး အပူကြောင့်ပျက်စီးလွယ်တဲ့ အာဟာရများကိုလည်း ထိန်းသိမ်းပေးနိုင်ပါတယ်။

■ ပန်းဂေါ်ဖီကို ထမင်း၊ အာလူးထောင်းစသဖြင့် အစားအစာတွေများနဲ့တွဲကာ အာဟာရပြည့်ပြီး ကာဗိုဟိုက်ဒရိတ်နည်းတဲ့ အစားထိုးစားစရာအဖြစ် စားသုံးနိုင်ပါတယ်။

Source: The Jerusalem Post