#Local_News
Published 18 September 2026

■ ၂၃၀ ကေဗွီ လှော်ကားပင်မဓာတ်အားခွဲရုံတွင် ချို့ယွင်းနေသည့် ဗို့အားတိုင်းတာရေးပစ္စည်းများနှင့် အပူချိန်မြင့်တက်နေသည့် ဓာတ်အားလွှတ်ကြားခံပစ္စည်းများ အစားထိုးလဲလှယ်ခြင်းလုပ်ငန်းများ ဆောင်ရွက်ရန်အတွက် စက်တင်ဘာ ၂၀ ရက်တွင် ဓာတ်အား ယာယီပိတ်ထားမည်ဖြစ်ကြောင်း လျှပ်စစ်နှင့်စွမ်းအင်ဝန်ကြီးဌာနမှ သိရသည်။

■ အဆိုပါလုပ်ငန်းများကို စက်တင်ဘာ ၂၀ ရက် မွန်းလွဲ ၁၂ နာရီမှ ညနေ ၄ နာရီအထိ ဆောင်ရွက်မည်ဖြစ်ပြီး ခွဲရုံအတွင်းရှိ ၃၃ ကေဗွီ ပင်မဖြန့်ဖြူးရေးလိုင်း (၁) ကို ဓာတ်အားပိတ်ထားမည်ဖြစ်သည်။

■ ထိုသို့ ဓာတ်အားပိတ်ထားစဉ် ရန်ကုန်တိုင်းဒေသကြီးအတွင်းရှိ မင်္ဂလာဒုံ၊ မြောက်ဥက္ကလာပ၊ ရွှေပြည်သာနှင့် လှည်းကူးမြို့နယ်တို့မှ အချို့ရပ်ကွက်နှင့် ကျေးရွာများ၊ စက်ရုံ၊ အလုပ်ရုံများနှင့် စက်မှုဇုန်များတွင် ယာယီဓာတ်အားပြတ်တောက်မှု ဖြစ်ပေါ်မည်ဖြစ်ကြောင်း သိရသည်။

■ ဓာတ်အားပြတ်တောက်မည့် ဧရိယာများမှ ဓာတ်အားသုံးစွဲသူများကို သက်ဆိုင်ရာ မြို့နယ်လျှပ်စစ်မန်နေဂျာရုံးများမှတစ်ဆင့် ကြိုတင်အသိပေးထားပြီးဖြစ်ကြောင်း ဝန်ကြီးဌာနက အသိပေးထားသည်။

■ လျှပ်စစ်နှင့်စွမ်းအင်ဝန်ကြီးဌာနအနေဖြင့် နိုင်ငံတော်ဓာတ်အားစနစ်အတွင်း ဓာတ်အားပို့လွှတ်ဖြန့်ဖြူးမှု တည်ငြိမ်စေရန်အတွက် ပင်မဓာတ်အားခွဲရုံများနှင့် ဓာတ်အားလိုင်းများကို ထိန်းသိမ်းပြုပြင်ခြင်းလုပ်ငန်းများ ဆက်လက်ဆောင်ရွက်လျက်ရှိကြောင်း သိရသည်။

#YMG/SW #Yangon_Times

#Local_News
Published 18 September 2026

■ တရုတ်ပြည်သူ့သမ္မတနိုင်ငံ၊ ကွမ်ရှီးကျွမ့်ကိုယ်ပိုင်အုပ်ချုပ်ခွင့်ရဒေသ၊ နန်နင်းမြို့ တွင် ကျင်းပလျက်ရှိသည့် 23rd China-ASEAN Expo (CAEXPO 2026) အတွင်း မြန်မာစီးပွားရေးလုပ်ငန်းရှင်အမျိုးသမီးများကွန်ရက် (Myanmar Women Entrepreneurs Network – MYANWEN) နှင့် Nanning Women Entrepreneurs Association တို့အကြား အမျိုးသမီးစီးပွားရေးလုပ်ငန်းရှင်များအတွက် အပြန်အလှန်ပူးပေါင်းဆောင်ရွက်မှုများ မြှင့်တင်နိုင်ရန် နားလည်မှုစာချွန်လွှာ (MoU) ကို ယနေ့ စက်တင်ဘာ ၁၈ ရက်တွင် လက်မှတ်ရေးထိုးခဲ့ကြောင်း သိရသည်။

■ အဆိုပါ MoU ရေးထိုးခြင်းသည် မြန်မာနိုင်ငံနှင့် တရုတ်နိုင်ငံရှိ အမျိုးသမီး စီးပွားရေး လုပ်ငန်းရှင်များအကြား စီးပွားရေးဆိုင်ရာ ချိတ်ဆက်မှုများ ပိုမိုခိုင်မာလာစေရန်နှင့် နှစ်နိုင်ငံအကြား စီးပွားရေးနှင့် ကုန်သွယ်ရေးဆိုင်ရာ အခွင့်အလမ်းများ ပိုမိုဖော်ဆောင်နိုင်ရန် ရည်ရွယ်ခြင်းဖြစ်ကြောင်း၊ MoU အရ နှစ်နိုင်ငံရှိ အမျိုးသမီးစီးပွားရေး လုပ်ငန်းရှင် များအကြား လုပ်ငန်းဆိုင်ရာ ချိတ်ဆက်မှုများတိုးမြှင့်ခြင်း၊ စီးပွားရေးနှင့်ကုန်သွယ်ရေး အခွင့်အလမ်းများ ဖော်ဆောင်ခြင်း၊ Business Networking နှင့် Business Matching လုပ်ငန်းများ ပူးပေါင်းဆောင်ရွက်ခြင်းတို့ကို ဆက်လက်အကောင်အထည်ဖော်သွားရန် ရည်ရွယ်ထားကြောင်း သိရသည်။

■ ထို့ပြင် နှစ်နိုင်ငံအမျိုးသမီးစီးပွားရေးလုပ်ငန်းရှင်များအကြား စီးပွားရေးလုပ်ငန်း အတွေ့ အကြုံများ၊ အသိပညာနှင့် လုပ်ငန်းဆိုင်ရာ အချက်အလက်များကို အပြန်အလှန် ဖလှယ်နိုင်ရေးအတွက်လည်း ပူးပေါင်းဆောင်ရွက်မှုများ တိုးမြှင့်သွားမည်ဖြစ်ကြောင်း သိရသည်။

■ အဆိုပါ ပူးပေါင်းဆောင်ရွက်မှုမှတစ်ဆင့် မြန်မာနှင့် တရုတ်နိုင်ငံရှိ အမျိုးသမီး စီးပွားရေးလုပ်ငန်းရှင်များအကြား ဆက်သွယ်ချိတ်ဆက်မှုများ ပိုမိုအားကောင်းလာပြီး စီးပွားရေးနှင့် ကုန်သွယ်ရေးဆိုင်ရာ အခွင့်အလမ်းများဖန်တီးနိုင်မည်ဟုမျှော်လင့်ထားကြောင်း သိရသည်။

■ 23rd China-ASEAN Expo (CAEXPO 2026) ကို တရုတ်ပြည်သူ့သမ္မတနိုင်ငံ၊ ကွမ်ရှီးကျွမ့်ကိုယ်ပိုင်အုပ်ချုပ်ခွင့်ရဒေသ၊ နန်နင်းမြို့တွင်ကျင်းပလျက်ရှိပြီး အဆိုပါပြပွဲသို့ အာဆီယံနိုင်ငံများအပါအဝင်နိုင်ငံနှင့်ဒေသအသီးသီးမှ စီးပွားရေးလုပ်ငန်းရှင်များ တက်ရောက်လျက်ရှိကြောင်း သိရသည်။

#YMG/SW #Yangon_Times

#Local_News
Published 18 September 2026

■ ရန်ကုန်-မန္တလေး အမြန်လမ်း မိုင်တိုင် ၁၆၇/၆ အနီးတွင် ယနေ့ စက်တင်ဘာ ၁၈ ရက် နံနက် ၀၀:၃၀ နာရီခန့်က ရန်ကုန်မှ မန္တလေးသို့ မောင်းနှင်လာသည့် Express ခရီးသည်တင်ယာဉ်တစ်စီး အရှိန်မထိန်းနိုင်ဘဲ လမ်းပုခုံးပေါ် ရောက်ရှိရပ်တန့်ခဲ့သည့် ယာဉ်မတော်တဆမှု ဖြစ်ပွားခဲ့ကြောင်း အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့၏ အသိပေးချက်အရ သိရသည်။

■ ဖြစ်စဉ်တွင်SUNLONG အမျိုးအစား ရွှေလရောင် Express ယာဉ် သည် ရန်ကုန်မှ မန္တလေးသို့ မောင်းနှင်လာစဉ် အရှိန်မထိန်းနိုင်ဘဲ အတွင်းယာဉ်ကြောနှင့် ကပ်လျက်ရှိသည့် မြေသားလမ်းပုခုံးပေါ်သို့ ရောက်ရှိရပ်တန့်ခဲ့ခြင်းဖြစ်ကြောင်း အဆိုပါယာဉ်ပေါ်တွင် ယာဉ်မောင်းအပါအဝင် အမျိုးသား ၁၂ ဦး လိုက်ပါလာပြီး ကျွဲကောသီးအိတ်များကို ခန့်မှန်းအလေးချိန် တစ်တန်ခန့် တင်ဆောင်လာခဲ့ကြောင်း ၊ယာဉ်မတော်တဆမှုကြောင့် ယာဉ်ပေါ်ပါသူများ ထိခိုက်ဒဏ်ရာရရှိမှု မရှိခဲ့ကြောင်း သိရသည်။

■ အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့က အမြန်လမ်း အသုံးပြုသည့် ခရီးသည်တင်ယာဉ်များအနေဖြင့် ကုန်ပစ္စည်းများ တင်ဆောင်မောင်း နှင်ခြင်း မပြုရန်၊ ခရီးစဉ်မစတင်မီ ယာဉ်ကြံ့ခိုင်မှုကို သေချာစွာ စစ်ဆေးရန်နှင့် သတ်မှတ်အမြန်နှုန်းထက် ကျော်လွန်မောင်းနှင်ခြင်း မပြုရန် သတိပေးထားပြီး အမြန်လမ်းပေါ်တွင် မှန်လုံခရီးသည်တင်ယာဉ်ကြီးများအနေဖြင့် အမြင့်ဆုံးအမြန်နှုန်း တစ်နာရီ ၉၀ ကီလိုမီတာ၊ လူစီးယာဉ်ငယ်များအနေဖြင့် တစ်နာရီ ၁၀၀ ကီလိုမီတာနှင့် ကုန်တင်ယာဉ်နှင့် ပစ်ကပ်ယာဉ်များအနေဖြင့် တစ်နာရီ ၆၀ ကီလိုမီတာနှုန်းထက်မကျော်လွန်ဘဲ မောင်းနှင်ကြရန်အသိပေးထားကြောင်းသိရသည်။

ဓာတ်ပုံ - အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့

#YMG/SW #Yangon_Times

စက်တင်ဘာ ၁၈၊၂၀၂၆

အမေရိကန်အစိုးရတာဝန်ရှိသူများ ပါဝင်သည့် ကိုယ်စားလှယ်အဖွဲ့တစ်ဖွဲ့သည် ယခုသီတင်းပတ်အတွင်း မြန်မာနိုင်ငံသို့ သွားရောက်ကာ ဖမ်းဆီးထိန်းသိမ်းခံထားရသည့် အမေရိကန်နိုင်ငံသား စီးပွားရေး လုပ်ငန်းရှင် Adam Castillo လွတ်မြောက်ရေးအတွက် မြန်မာအစိုးရတာဝန်ရှိသူများနှင့် တွေ့ဆုံခဲ့  ကြောင်း အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူတစ်ဦးက ပြောကြားချက်ကိုကိုးကား၍ Reuters သတင်းဌာနက စက်တင်ဘာ ၁၇ ရက်တွင် သတင်းရေးသားသည်။

Reuters ၏ ဖော်ပြချက်အရ အမေရိကန်နိုင်ငံသည် မြန်မာနိုင်ငံတွင် သံတမန်ရေးရာ ကိုယ်စားပြုမှုကို ဆက်လက်ထားရှိထားပြီး မြန်မာအစိုးရအပါအဝင် နိုင်ငံအတွင်းရှိ အဖွဲ့အစည်းအားလုံးနှင့် ထိတွေ့ ဆက်ဆံလျက်ရှိကြောင်း အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက ပြောကြားသည်။ ယင်းထိတွေ့ဆက်ဆံမှုများတွင် နေပြည်တော်ရှိ အာဏာပိုင်များနှင့် အမေရိကန်အကျိုးစီးပွားများအပေါ် သက်ရောက်မှုရှိသည့် ကိစ္စရပ်များနှင့်ပတ်သက်၍ ဆွေးနွေးမှုများလည်း ပါဝင်ကြောင်း သတင်းတွင် ဖော်ပြထားသည်။

နေပြည်တော်ရှိ အာဏာပိုင်များနှင့် တွေ့ဆုံဆွေးနွေးမှုများ ပြုလုပ်ရာတွင် အမေရိကန်နိုင်ငံအနေဖြင့် အကြမ်းဖက်မှုများရပ်တန့်ရေး၊ လူသားချင်းစာနာထောက်ထားမှုဆိုင်ရာ အကူအညီများ ဝင်ရောက်ခွင့်ပြုရေးနှင့် နိုင်ငံရေးအကျဉ်းသားများ လွှတ်ပေးရေးတို့ကို ဆက်လက်တင်ပြသွားမည်ဖြစ်ကြောင်း နိုင်ငံခြား ရေးဝန်ကြီးဌာန ပြောရေးဆိုခွင့်ရှိသူက ပြောကြားခဲ့သည်ဟု Reuters က ဆိုသည်။

အဆိုပါကိစ္စရပ်များကို ရေရှည်တည်တံ့သော ငြိမ်းချမ်းရေးအတွက် လိုအပ်သည့် အခြေအနေများ ပေါ်ပေါက်လာစေရန် ကြိုးပမ်းမှု၏ တစ်စိတ်တစ်ပိုင်းအဖြစ် ဆွေးနွေးနေခြင်းဖြစ်ကြောင်းလည်း ၎င်းက ပြောကြားသည်။

သို့သော် မြန်မာနိုင်ငံသို့ လာရောက်ခဲ့သည့် အမေရိကန်ကိုယ်စားလှယ်အဖွဲ့တွင် မည်သူများ ပါဝင်သည်၊ မြန်မာဘက်မှ မည်သည့်တာဝန်ရှိသူများနှင့် တွေ့ဆုံခဲ့သည်ဆိုသည့် အသေးစိတ်အချက်အလက်များကို အမေရိကန်နိုင်ငံခြားရေးဝန်ကြီးဌာနက ထုတ်ဖော်ပြောကြားခြင်းမရှိကြောင်း Reuters၏ သတင်းက ရေးသားထားသည်။

#World_News
Published 18 September 2026

■ ကုလသမဂ္ဂ အချက်အလက်ရှာဖွေရေးအဖွဲ့က အမေရိကန်ပြည်ထောင်စုအနေဖြင့် အီရန်နိုင်ငံမှာ စစ်ရာဇဝတ်မှုများ ကျူးလွန်ခဲ့တယ်လို့ ယုံကြည်ရတဲ့ ခိုင်လုံတဲ့ အကြောင်းပြချက်များ ရှိကြောင်း အစီရင်ခံခဲ့ပါတယ်။

■ ထိုအစီရင်ခံစာမှာ အနည်းဆုံး အရပ်သား ၁၇၈ ဦး သေဆုံးခဲ့ရတဲ့ ဖေဖော်ဝါရီလအတွင်း အမေရိကန်ရဲ့ လေကြောင်းတိုက်ခိုက်မှု နှစ်ခုကို မီးမောင်းထိုးပြထားပါတယ်။

■ တိုက်ခိုက်မှုတစ်ခုမှာ မီနပ်ဘ်မြို့ရှိ Shajareh Tayyebeh ကျောင်းကို ထိမှန်ခဲ့ပြီး အများစုမှာ ကလေးငယ်များဖြစ်ကြကာ လူပေါင်း ၁၅၀ ကျော် သေဆုံးခဲ့ပါတယ်။

■ လားမားဒ်မြို့ရှိ အားကစားရုံတစ်ခုကို ဒုတိယအကြိမ် တိုက်ခိုက်မှုကြောင့် အရပ်သား ၂၂ ဦး သေဆုံးခဲ့ပေမယ့် အမေရိကန် ဗဟိုကွပ်ကဲရေးဌာန (CENTCOM) က ပါဝင်ပတ်သက်မှုမရှိကြောင်း ငြင်းဆိုထားပါတယ်။

■ ထိုတိုက်ခိုက်မှုများဟာ ခွဲခြားမှုမရှိဘဲ အရပ်ဘက်အဆောက်အအုံများကို ပစ်မှတ်ထားခဲ့ခြင်းဖြစ်ပြီး ရိုးရိုးပေါ့ဆမှုထက် ပိုလွန်နေကြောင်း ကုလသမဂ္ဂ ကျွမ်းကျင်သူများက ကောက်ချက်ချခဲ့ကြပါတယ်။

■ အမေရိကန် နိုင်ငံခြားရေးဝန်ကြီးဌာနကမူ ပင်တဂွန်ရဲ့ စုံစမ်းစစ်ဆေးမှုများ ဆက်လက်လုပ်ဆောင်နေစဉ်မှာပင် ကုလသမဂ္ဂအဖွဲ့အစည်းကို အမေရိကန်ဆန့်ကျင်ရေးအဖွဲ့လို့ ခေါ်ဆိုကာ အစီရင်ခံစာကို ပယ်ချခဲ့ပါတယ်။

■ အဆိုပါ အစီရင်ခံစာထဲမှာပင် အီရန်အာဏာပိုင်များဟာ ပြည်တွင်းဆန္ဒပြမှုများကို ဖြိုခွဲစဉ် လူသားမျိုးနွယ်အပေါ် ကျူးလွန်တဲ့ ရာဇဝတ်မှုများကို ကျူးလွန်ခဲ့ကြောင်း စွပ်စွဲထားပါတယ်။

■ ကုလသမဂ္ဂ စုံစမ်းစစ်ဆေးသူများက အီရန်လုံခြုံရေးတပ်ဖွဲ့များရဲ့ တရားမဝင် သတ်ဖြတ်မှုများ၊ ညှဉ်းပန်းနှိပ်စက်မှုများ၊ အစုလိုက်အပြုံလိုက် ဖမ်းဆီးထိန်းသိမ်းမှုများနဲ့ အတင်းအဓမ္မ ပျောက်ကွယ်သွားစေမှုများကို ကိုးကားဖော်ပြခဲ့ကြပါတယ်။

Source: Reuters

#Local_News
Published 18 September 2026
‌
■ မဲခေါင်-လန်ချန်းပူးပေါင်းဆောင်ရွက်မှု ရန်ပုံငွေဖြင့် မဲခေါင်-လန်ချန်းဒေသတွင်း သတင်းတု၊ သတင်းမှားကင်းစင်ရေးလှုပ်ရှားမှုဖိုရမ်နှင့် အကြောင်းအရာဖန်တီးမှု Content ပြိုင်ပွဲ ဆုပေးပွဲအခမ်းအနားကို ကမ္ဘောဒီးယားနိုင်ငံ ဖနောင်ပင်မြို့၌ စက်တင်ဘာ ၁၇ ရက်က ကျင်းပရာ မြန်မာနိုင်ငံမှလူမှုအကျိုးပြုထူးချွန်ဆု ဆွတ်ခူးရရှိခဲ့ကြောင်းသိရသည်။
 
■ အဆိုပါ မဲခေါင်-လန်ချန်း ဒေသတွင်း သတင်းတု၊ သတင်းမှား ကင်းစင်ရေးဆိုင်ရာလှုပ်ရှားမှု၏ အဓိကအစိတ်အပိုင်းဖြစ်သည့် ၂၀၂၆ ခုနှစ်အတွက် သတင်းတု၊ သတင်းမှားကင်းစင်ရေးလှုပ်ရှားမှုဆိုင်ရာဖိုရမ်နှင့် အကြောင်းအရာဖန်တီးမှုပြိုင်ပွဲ (Zero Fake News Forum and Awards Contents 2026) တွင် ဒေသတွင်း ခြောက်နိုင်ငံမှ ပြိုင်ပွဲဝင်များ ဖိတ်ခေါ်၍ Best Journalism Award for Fighting Fake News ၊ Best Fact-Checking and Verification Content Award ၊ Best Creative Content Award ၊ Best Public Impact Awards နှင့် Responsible Media Practice Award ဆုများအတွက် ယှဉ်ပြိုင်ခဲ့ရာ မြန်မာနိုင်ငံကိုယ်စားပြုအနေဖြင့် ပြန်ကြားရေးဝန်ကြီးဌာန၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဦးဇင်ဦးက "Impact of Online Crimes, Fake News and Misinformation on the Socio-economic Lives of Mekong-Langcang Regional Countries" ဆောင်းပါးဖြင့် Best Public Impact Award ဆု ဆွတ်ခူးရရှိခဲ့ခြင်းဖြစ်သည်။
 
■ ယင်းပြိုင်ပွဲသို့ မဲခေါင်-လန်ချန်းဒေသတွင်းခြောက်နိုင်ငံမှ ပြိုင်ပွဲဝင် ၂၀ ကျော် ဝင်ရောက်ယှဉ်ပြိုင်ခဲ့ကြောင်း သိရသည်။

#YMG/NN #Yangon_Times

#Local_News
Published 18 September 2026

■ လာမည့် စက်တင်ဘာလ(၂၀) ရက်နေ့ ၊နေ့လည် ( ၁ )နာရီအချိန် သိမ်ဖြူလက်ဝှေ့ရုံ၌ ရွိုင်ရယ်-ဒီ ရွှေခါးပတ်ချန်ပီယံလက်‌ဝှေ့ဗိုလ်လုပွဲကြီးကို ကျင်းပသွားမည်ဖြစ်ရာစုစုပေါင်းတွဲဆိုင်း
( ၉ )ဆိုင်းထိ ပါဝင်မည်ဖြစ်ကြောင်းသိရသည်။

■ အထူးစိန်ခေါ်ပွဲ အဖြစ်တွဲဆိုင်း(၃)ခု ၊ရွှေခါးပတ်ချန်ပီယံဆုအတွက်ယှဉ်ပြိုင်မယ့် တွဲဆိုင်း(၆)ခု ထိ ပါဝင်သွားမည် ဖြစ်သည်။

■ အထူးစိန်ခေါ်ပွဲ တွဲဆိုင်း(၃)ဆိုင်းကို (၃)မိနစ် (၄)ချီ အဖြစ်ယှဉ်ပြိုင်ထိုးကြမည် ဖြစ်ပြီး
(၁) လားကပေါ(ရိုးရာကျား) VS ဇော်ဒူလ(Python တော်ဝင်ဧရာ)၊
(၂) ရွှေထီး(YMA) VS ဝူသောဒို(ရိုးရာကျား) ၊
(၃) ချမ်းမြေ့အောင်(PTC) VS ရဲမာန်သွေး(Ray) တို့ဖြစ်သည့်အပြင် ရွှေခါးပတ်ချန်ပီယံ အတွက် အပြိုင်ဆိုင်ယှဉ်ပြိုင်ကြမည့် တွဲဆိုင်း(၆)ဆိုင်း ကိုမူ(၃)မိနစ်(၅)ချီအဖြစ် ကစားကြမည် ဖြစ်ကြောင်းသိရသည်။

■ ပြီးခဲ့သည့်အကြိုဗိုလ်လုပွဲ၌ ပြိုင်ဘက်များကို အနိုင်ယူကျော်ဖြတ်ပြီး ဗိုလ်လုပွဲ ဆီတတ်လှမ်းလာသည့် ဖိုက်တာများက ချန်ပီယံခါးပတ်အတွက် အကြိတ်အနယ်ကစားကြမည်ဖြစ်ပြီး တွဲဆိုင်းအသေးစိတ်မှာ

(၁) ဆလိုင်းထန်ခွီးရှိန်း (ကျားမနိုင်) VS ဂေါဗက (ရိုးရာစွမ်းအား) ၊
(၂) အောင်ထွန်းဘို (ဒို့ရိုးရာ) VS မြလုံးချော (စိန်လက်သီး) ၊
(၃) ကျော်ဝေယံထွန်း (Top One) VS အာဖရိက (555 sports) ၊
(၄ )စီတိုး ( ခေးယုဝါး) VS သန့်ဇင် (Python တော်ဝင်ဧရာ) ၊
(၅) ထူးကညော (YKB) VS ရဲလင်းဦး (Vanguard) ၊
(၆) အဖိုးသွေး(ခေးယုဝါး)VS ကညောခွား(ဘိလပ်မြေစက်ရုံ) တို့က အသီးသီးယှဉ်ပြိုင်ကြမည် ဖြစ်ကြောင်းသိရသည်။

■ ၎င်းအပြင်အမှတ်ပေးစနစ် ပါဝင်မည်ဖြစ်ပြီး ပွဲချိန်တွင်းအနိုင်အရှုံးမပေါ်ခဲ့ပါက အမှတ်ပေးဒိုင်(၃)ယောက်၏ အမှတ်များဖြင့် အနိုင်အရှုံးဆုံးဖြတ်သွားမည်ဖြစ်ကြောင်းသိရသည်။

#YMG/NN #Yangon_Times

#World_Science
Published 18 September 2026

■ IIT Madras မှ သိပ္ပံပညာရှင်များဟာ Harita ထိုင်ခုံထုတ်လုပ်ရေးကုမ္ပဏီနဲ့ ပူးပေါင်းကာ ကားမောင်းသူများ မောပန်းခြင်း၊ အိပ်ငိုက်ခြင်းတို့ကို သိရှိနိုင်ပြီး ယာဉ်အန္တရာယ်မှ ကာကွယ်ပေးနိုင်တဲ့ IntelliSeat လို့ခေါ်တဲ့ စမတ်ယာဉ်မောင်းထိုင်ခုံကို တီထွင်ခဲ့ကြပါတယ်။

■ ဒီစနစ်ဟာ ကြိုးတွေလိုင်းတွေ ကင်မရာတွေ တပ်ဆင်ဖို့မလိုဘဲ ကားမောင်းသူ ထိုင်လိုက်တာနဲ့ ထိုင်ခုံကနေတဆင့် ခန္ဓာကိုယ်အချက်ပြမှုများကို တိုက်ရိုက်ဖတ်ရှုပေးတဲ့ နည်းပညာဖြစ်ပါတယ်။

■ ထိုင်ခုံအတွင်း မြှုပ်နှံတပ်ဆင်ထားတဲ့ အာရုံခံများက ထိုင်ဟန်အမူအရာ၊ လှုပ်ရှားမှု အပြောင်းအလဲများနဲ့ ကြွက်သားများရဲ့ လျှပ်စီးဓာတ်ပြောင်းလဲမှုများကို တိုင်းတာကာ ပင်ပန်းနွမ်းနယ်တဲ့ အစောပိုင်းလက္ခဏာများကို စစ်ဆေးသိရှိစေနိုင်ပါတယ်။

■ ခန္ဓာကိုယ်အချက်ပြမှုများကို ဖတ်ရှုခြင်း၊ ဒေတာများ ဆန်းစစ်ခြင်းနဲ့ သတိပေးချက်များ ထုတ်ပြန်ခြင်းတို့အတွက် IoT နည်းပညာအပေါ် အခြေခံကာ အလုပ်လုပ်ပါတယ်။

■ သတိပေးချက်ကို အန္တရာယ်အဆင့်ပေါ် မူတည်ပြီး အနည်းငယ်ပင်ပန်းပါက ဒက်ရှ်ဘုတ်မှာ မီးလင်းခြင်း၊ အသင့်အတင့် ပင်ပန်းပါက အသံပါထွက်လာခြင်း၊ အလွန်အမင်း ပင်ပန်းပါက ထိုင်ခုံတစ်ခုလုံး တုန်ခါခြင်းတို့ဖြင့် သတိပေးမှာ ဖြစ်ပါတယ်။

■ အလွန်အမင်း ပင်ပန်းတဲ့အဆင့်သို့ ရောက်ရှိပါက စနစ်က ယာဉ်လိုင်းမန်နေဂျာထံ သတိပေးချက် စေလွှတ်မှာဖြစ်ကာ ဘေးကင်းစွာ ကားရပ်နားရန် ညွှန်ကြားနိုင်မှာ ဖြစ်ပါတယ်။

■ လက်ရှိပြေးဆွဲနေတဲ့ ကုန်ကားတွေ ဘတ်စ်ကားတွေမှာ လွယ်ကူစွာ တပ်ဆင်နိုင်အောင် ဒီဇိုင်းထုတ်လုပ်ထားပါတယ်။

■ မိုဘိုင်းအက်ပလီကေးရှင်းမှတဆင့် ချိတ်ဆက်ထားတာကြောင့် အဆက်မပြတ်စောင့်ကြည့်နိုင်ခြင်း၊ ဘေးကင်းရေး စစ်ဆေးနိုင်ခြင်းတို့ကြောင့် လမ်းအန္တရာယ်များကို သိသိသာသာ လျှော့ချပေးနိုင်မှာ ဖြစ်ပါတယ်။

Source: India Today

#Daily_News
Published 17 September 2026

၁။‌ ဗီယက်နမ်- မြန်မာနှစ်နိုင်ငံ ကုန်သွယ်မှုနှင့်ရင်းနှီးမြှုပ်နှံမှုမြှင့်တင်နိုင်ရေး နားလည်မှုစာချွန်လွှာများ လက်မှတ်ရေးထိုးခဲ့

‌‎၂။ ‌စက်သုံးဆီအရောင်းဆိုင် ၂၀ အား PO လျှော့ချ၊ ဒဏ်ကြေးနှင့်သတိပေးအရေးယူ

‎၃။‌‌‎ မြန်မာ့မော်တော်ယာဉ်နှင့်အပိုပစ္စည်းပြပွဲ ဒုတိယအကြိမ်မြောက်ကျင်းပမည်

၄။‎ ‌‌‌‌‌‌‌‌‌ဂျာဗားပင်လယ်တွင်မှောက်ခုံဖြစ်သွားသည့်ခရီးသည်တင်သင်္ဘောမှ (၁၂၉)ဦးပျောက်ဆုံး... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group