#Local_News
Published 26 March 2026

▪️ မင်္ဂလာဒုံစက်မှုဇုန်ဝန်း၌ယနေ့ ညသန်းခေါင်အချိန်၌ မီးလောင်မှူဖြစ်ပွားရာသုံးနာရီကျော်ကြာငြိမ်းသတ်ခဲ့ရကြောင်းသိရသည်။

▪️ မတ်လ၂၆ ရက်နေ့၊ ည၁၂နာရီ ၁၀ မိနစ်အချိန်ခန့်က ရန်ကုန်တိုင်းဒေသကြီး၊ မင်္ဂလာဒုံမြို့နယ်၊ အမှတ်(၃)လမ်းမကြီး၊မင်္ဂလာဒုံစက်မှုဇုန်ဝန်းတွင် မီးလောင်မှုဖြစ်ပွားခဲ့ကြောင်း သိရသည်။

▪️ အဆိုပါ သတင်းရရှိသဖြင့် မင်္ဂလာဒုံမြို့နယ်မီးသတ်စခန်းမှ ယာဉ်အုပ်စုများ ထွက်ခွာ ည၁၂နာရီ ၁၅ မိနစ် အချိန် Level 1 ယာဉ်အုပ်စုများ ထွက်ခွာလျက်ရှိပြီး ည၁၂နာရီ ၅၀ မိနစ်အချိန်တွင် Level 2 ယာဉ်အုပ်စုများ ထွက်ခွာငြိမ်းသတ်ခဲ့ရာ မနက်၂ နာရီ၂၈မိနစ် အချိန် ၌ မီးထိန်းနိုင်ခဲ့ပြီး ၃ နာရီ ၃၃ မိနစ်အချိန်၌ မီးငြိမ်းနိုင်ခဲ့ကြောင်းသိရသည်။

▪️ အဆိုပါ စက်မှုဇုန်ဝင်း၌ မီးလောင်မှုဖြစ်စဉ်မှာ ဓာတ်အားခွဲရုံ လောင်ကျွမ်းပေါက်ကွဲမှု အသေးစားဖြစ်ပွားပြီး ကိုက် ၁၀၀ ပတ်လည်အတွင်းရှိ မှန်ဘီလူးထုတ်လုပ်သည့် စက်ရုံစီ ဂိုဒေါင်မှ စတင်ကာ ကူးစက်လောင်ကျွမ်းခဲ့ခြင်းဖြစ်ကာ ပျက်စီးဆုံးရှုံးမှုတန်ဖိုးကိုဆက်လက်စုံစမ်းနေကြောင်းသိရသည်။

#YMG/NN #Yangon_Times

#World_News
Published 26 March 2026

■ ဒူဘိုင်း/တယ်လ်အဗစ်၊ မတ် ၂၅ (ရိုက်တာ) - ပင်လယ်ကွေ့စစ်ပွဲကို အဆုံးသတ်ရန် အမေရိကန်၏ အဆိုပြုချက်ကို အီရန်က ပြန်လည်သုံးသပ်နေသော်လည်း ပိုမိုကျယ်ပြန့်လာသော အရှေ့အလယ်ပိုင်းပဋိပက္ခကို လျှော့ချရန်အတွက် ဆွေးနွေးပွဲများပြုလုပ်ရန် ရည်ရွယ်ချက်မရှိကြောင်း အီရန်နိုင်ငံခြားရေးဝန်ကြီးက ဗုဒ္ဓဟူးနေ့တွင် ပြောကြားခဲ့သည်။

■ အီရန်အရာရှိများက အမေရိကန်နှင့် မည်သည့်ညှိနှိုင်းမှုမျိုးကိုမဆို လူသိရှင်ကြား လှောင်ပြောင်ပယ်ချခဲ့သဖြင့် အစောပိုင်းတုံ့ပြန်မှုများမှာ အနုတ်လက္ခဏာဆောင်ခဲ့သော်လည်း၊ နိုင်ငံခြားရေးဝန်ကြီး Abbas Araqchi ၏ မှတ်ချက်များအရ တီဟီရန်အနေဖြင့် ၎င်းတို့၏ တောင်းဆိုချက်များ ပြည့်ဝပါက စစ်ပွဲအဆုံးသတ်ရန် ညှိနှိုင်းလိုသည့် ဆန္ဒအချို့ရှိနေကြောင်း ဖော်ပြနေသည်။

■ ကြားခံများမှတစ်ဆင့် သတင်းစကားများ ဖလှယ်ခြင်းသည် "အမေရိကန်နှင့် ညှိနှိုင်းနေခြင်းကို မဆိုလိုပါ" ဟု Araqchi က နိုင်ငံပိုင်ရုပ်မြင်သံကြားတွင် ပြောကြားခဲ့သည်။ "သူတို့ရဲ့ သတင်းစကားတွေထဲမှာ အကြံပြုချက်တွေကို တင်ပြထားပြီး ဒါတွေကို အဆင့်မြင့်အာဏာပိုင်တွေဆီ ပေးပို့ထားပါတယ်။ လိုအပ်ရင်တော့ သူတို့ဘက်က ရပ်တည်ချက်တစ်ခု ထုတ်ပြန်ပါလိမ့်မယ်" ဟု သူကပြောသည်။

■ ထို့အပြင် အမေရိကန်၊ အစ္စရေးတို့နှင့် ပြုလုပ်မည့် မည်သည့်အပစ်အခတ်ရပ်စဲရေး သဘောတူညီချက်တွင်မဆို လက်ဘနွန်နိုင်ငံ ပါဝင်ရမည်ဟု အီရန်က ကြားခံများကို ပြောကြားထားကြောင်း အီရန်၏ ရပ်တည်ချက်ကို သိရှိသည့် ဒေသတွင်းသတင်းရင်းမြစ် ခြောက်ခုက ပြောသည်။

■ အမေရိကန်သမ္မတ ဒေါ်နယ်ထရမ့်က ဝါရှင်တန်တွင် ဗုဒ္ဓဟူးနေ့ညက ပြုလုပ်သည့် အခမ်းအနားတစ်ခုတွင် ပြောကြားရာ၌ အီရန်ခေါင်းဆောင်များသည် "တကယ်တော့ ညှိနှိုင်းနေကြတာပါ၊ သူတို့ သဘောတူညီချက်တစ်ခုရဖို့ အရမ်းလိုလားနေကြပေမယ့် ဒါကိုထုတ်ပြောဖို့ ကြောက်နေကြတာ။ ဘာလို့လဲဆိုတော့ သူတို့လူမျိုးတွေရဲ့ သတ်တာခံရမှာစိုးလို့ပါ။ နောက်ပြီး ကျွန်တော်တို့ရဲ့ သတ်တာခံရမှာကိုလည်း သူတို့ ကြောက်နေကြတယ်" ဟု ပြောသည်။

■ ပါကစ္စတန်မှတစ်ဆင့် ပေးပို့ခဲ့သည့် ထရမ့်၏ အချက် ၁၅ ချက်ပါ အဆိုပြုချက်တွင် အီရန်၏ သန့်စင်ပြီး ယူရေနီယံလက်ကျန်များကို ဖယ်ရှားရန်၊ ယူရေနီယံသန့်စင်မှုကို ရပ်တန့်ရန်၊ ဘောလစ်စတစ်ဒုံးကျည်အစီအစဉ်ကို ထိန်းချုပ်ရန်နှင့် ဒေသတွင်း မဟာမိတ်များအတွက် ရန်ပုံငွေထောက်ပံ့မှုများကို ဖြတ်တောက်ရန် တောင်းဆိုထားကြောင်း အဆိုပါအစီအစဉ်ကို သိရှိသည့် အစ္စရေးအစိုးရအဖွဲ့ သတင်းရင်းမြစ် သုံးခုအရ သိရသည်။

■ အိမ်ဖြူတော်ကမူ အဆိုပြုချက်၏ အသေးစိတ်အချက်အလက်များကို ထုတ်ဖော်ပြောကြားရန် ငြင်းဆိုခဲ့ပြီး တိုက်ခိုက်မှုများကို အရှိန်မြှင့်မည်ဟု ခြိမ်းခြောက်ခဲ့သည်။ "သူတို့ဟာ စစ်ရေးအရ ရှုံးနိမ့်သွားပြီဆိုတာကို နားမလည်ဘူးဆိုရင်၊ သမ္မတထရမ့်က သူတို့ကို အရင်ကထက် ပိုပြင်းထန်တဲ့ ထိုးနှက်ချက်တွေ ကြုံရအောင် လုပ်ဆောင်သွားမှာပါ" ဟု အိမ်ဖြူတော် ပြောရေးဆိုခွင့်ရှိသူ Karoline Leavitt က သတင်းထောက်များကို ပြောကြားခဲ့သည်။

■ အဆင့်မြင့် အစ္စရေးကာကွယ်ရေးအရာရှိတစ်ဦးကမူ အီရန်အနေဖြင့် ဤစည်းကမ်းချက်များကို သဘောတူမည့်အပေါ် သံသယရှိကြောင်းနှင့် အမေရိကန်ညှိနှိုင်းရေးမှူးများက လိုက်လျောမှုများ ပြုလုပ်သွားမည်ကို အစ္စရေးက စိုးရိမ်နေကြောင်း ပြောကြားခဲ့သည်။ အစ္စရေးအနေဖြင့် မည်သည့်သဘောတူညီချက်တွင်မဆို မိမိဘက်မှ ကြိုတင်ကာကွယ်သည့်အနေဖြင့် တိုက်ခိုက်နိုင်ခွင့် (pre-emptive strikes) ကို ဆက်လက်ထိန်းသိမ်းထားလိုကြောင်း ဒုတိယသတင်းရင်းမြစ်တစ်ခုက ဆိုသည်။

■ အရှေ့အလယ်ပိုင်းရှိ အမေရိကန်တပ်ဖွဲ့များကို ဦးဆောင်နေသည့် ဗဟိုစစ်ဌာနချုပ် အကြီးအကဲ ရေတပ်ဗိုလ်ချုပ်ကြီး Brad Cooper က ဗီဒီယိုသတင်းစာရှင်းလင်းပွဲတွင် ပြောကြားရာ၌ အမေရိကန်သည် အီရန်နိုင်ငံအတွင်းရှိ ပစ်မှတ်ပေါင်း ၁၀,၀၀၀ ကျော်ကို တိုက်ခိုက်ခဲ့ပြီး အီရန်၏ နယ်စပ်ပြင်ပသို့ သြဇာချဲ့ထွင်နိုင်စွမ်းကို ကန့်သတ်စေသည့် လမ်းကြောင်းပေါ်တွင် ရှိနေကြောင်း ပြောကြားခဲ့သည်။

■ အီရန်၏ အကြီးဆုံးရေတပ်သင်္ဘော ၉၂ ရာခိုင်နှုန်းကို ဖျက်ဆီးနိုင်ခဲ့ပြီး ဒရုန်းနှင့် ဒုံးကျည်ပစ်လွှတ်မှုနှုန်းမှာ ၉၀ ရာခိုင်နှုန်းကျော် ကျဆင်းသွားကြောင်း Cooper က ဆိုသည်။ အမေရိကန်နှင့် အစ္စရေးတို့သည် အီရန်၏ ဒုံးကျည်၊ ဒရုန်းနှင့် ရေတပ်ထုတ်လုပ်ရေး စက်ရုံများနှင့် သင်္ဘောကျင်း သုံးပုံနှစ်ပုံကို ပျက်စီးစေခဲ့ သို့မဟုတ် ဖျက်ဆီးနိုင်ခဲ့သည်ဟု Cooper က ပြောကြားခဲ့သည်။

■ သို့သော်လည်း အီရန်အပေါ် လေကြောင်းတိုက်ခိုက်မှုများမှာ လျော့ပါးသွားခြင်းမရှိဘဲ စစ်ပွဲမှာ ဆက်လက်ပြင်းထန်နေဆဲဖြစ်သလို၊ အီရန်ဘက်မှလည်း အစ္စရေးနှင့် အမေရိကန်မဟာမိတ်များအပေါ် ဒရုန်းနှင့် ဒုံးကျည်များဖြင့် ပြန်လည်တိုက်ခိုက်လျက်ရှိသည်။

■ အစ္စရေးစစ်တပ်က ဗုဒ္ဓဟူးနေ့တွင် အီရန်အပေါ် တစ်နေ့တာအတွင်း တိုက်ခိုက်မှုအသစ်များစွာ ပြုလုပ်ခဲ့ကြောင်း ပြောကြားခဲ့ပြီး၊ ယင်းတွင် အီရန်၏ သင်္ဘောနှင့် ရေငုပ်သင်္ဘော တည်ဆောက်ရေးလုပ်ငန်းကို တိုက်ခိုက်မှုလည်း ပါဝင်သည်။ အီရန် SNN သတင်းဌာနက တီဟီရန်ရှိ လူနေရပ်ကွက်တစ်ခု ထိမှန်ခဲ့ပြီး ကယ်ဆယ်ရေးသမားများက အပျက်အစီးများကြားတွင် ရှာဖွေနေကြောင်း ဖော်ပြသည်။ ကူဝိတ်နှင့် ဆော်ဒီအာရေးဗီးယားတို့ကလည်း ဒရုန်းတိုက်ခိုက်မှုအသစ်များကို တွန်းလှန်နိုင်ခဲ့ကြောင်း ပြောကြားခဲ့သည်။

■ စျေးကွက်များက အဆိုပြုချက်အပေါ် အကောင်းမြင်တုံ့ပြန်

■ ဝါရှင်တန်က အီရန်ထံ အဆိုပြုချက်ပေးပို့ခဲ့သည်ဟူသော သတင်းများထွက်ပေါ်လာပြီးနောက် ဗုဒ္ဓဟူးနေ့တွင် ကမ္ဘာလုံးဆိုင်ရာ ရှယ်ယာစျေးကွက်များ အနည်းငယ်ပြန်လည်ဦးမော့လာပြီး ရေနံစျေးနှုန်းများ ကျဆင်းသွားခဲ့သည်။ ကမ္ဘာလုံးဆိုင်ရာ စွမ်းအင်ထောက်ပံ့မှုကို အနှောင့်အယှက်ဖြစ်စေပြီး ငွေကြေးဖောင်းပွမှုကို မြင့်တက်စေသည့် စစ်ပွဲအဆုံးသတ်တော့မည်ဟု ရင်းနှီးမြှုပ်နှံသူများက မျှော်လင့်နေကြသည်။

■ တစ်ချိန်တည်းမှာပင် ပင်တဂွန်စစ်ဌာနချုပ်သည် သမ္မတထရမ့်အား မြေပြင်ထိုးစစ်ဆင်ရန် ရွေးချယ်စရာများ ပိုမိုပေးနိုင်ရန်အတွက် လေထီးတပ်သား ထောင်ပေါင်းများစွာကို ပင်လယ်ကွေ့သို့ စေလွှတ်ရန် စီစဉ်နေကြောင်း၊ ယခုအခါ လမ်းခရီးတွင်ရှိနေသည့် မရိန်းတပ်ရင်း နှစ်ခုအပြင် ထပ်မံဖြည့်တင်းခြင်းဖြစ်ကြောင်း သတင်းရင်းမြစ်များက ရိုက်တာသို့ ပြောကြားခဲ့သည်။ ပထမဆုံး မရိန်းတပ်ဖွဲ့သည် ဧရာမ ကုန်းရေနှစ်သွယ်သွား တိုက်ခိုက်ရေးသင်္ဘောကြီးဖြင့် လကုန်ပိုင်းခန့်တွင် ရောက်ရှိလာနိုင်သည်။

■ အကယ်၍ အီရန်ပိုင်နက်အတွင်း တိုက်ခိုက်မှုများ ပြုလုပ်လာပါက ပင်လယ်နီဝအနီးတွင် စစ်မျက်နှာအသစ်တစ်ခု ဖွင့်နိုင်ကြောင်း အီရန်၏ တာ့စ်နင် (Tasnim) သတင်းဌာနက အမည်မဖော်လိုသူ စစ်ဘက်သတင်းရင်းမြစ်တစ်ခုကို ကိုးကား၍ ဗုဒ္ဓဟူးနေ့တွင် ဖော်ပြခဲ့သည်။ ယီမင်နှင့် ဂျီဘူတီနိုင်ငံကြားရှိ Bab al-Mandab ရေလက်ကြားတွင် အီရန်အနေဖြင့် "ယုံကြည်စိတ်ချရသော ခြိမ်းခြောက်မှု" တစ်ခု ပေးနိုင်စွမ်းရှိသည်ဟု အဆိုပါသတင်းရင်းမြစ်က ဆိုသည်။

■ အီရန်၏ ကျွန်းတစ်ကျွန်းကို သိမ်းပိုက်ရန် "ရန်သူများ" ၏ ကြိုးပမ်းအားထုတ်မှုတွင် ပူးပေါင်းပါဝင်ပါက အမည်မဖော်လိုသည့် အိမ်နီးချင်းနိုင်ငံကို တိုက်ခိုက်သွားမည်ဟု အီရန်လွှတ်တော်ဥက္ကဋ္ဌ Mohammad Baqer Qalibaf က ပြောကြားခဲ့သည်။

■ အမေရိကန်က "Operation Epic Fury" ဟုခေါ်ဆိုသည့် စစ်ဆင်ရေးစတင်ကတည်းက အီရန်သည် အမေရိကန်အခြေစိုက်စခန်းများရှိသည့် နိုင်ငံများကို တိုက်ခိုက်ခဲ့ပြီး၊ ကမ္ဘာ့ရေနံနှင့် သဘာဝဓာတ်ငွေ့ ငါးပုံတစ်ပုံ ဖြတ်သန်းရာ ဟော်မုဇ် (Hormuz) ရေလက်ကြားကို ထိရောက်စွာ ပိတ်ဆို့ထားခဲ့သည်။

Source: Reuters

#Local_News
Published 26 March 2026

▪️ မန္တလေးတိုင်းဒေသကြီးရှိမိတ္ထီလာမြို့စက်မှုဇုန်(၂)လမ်းနှင့် မန္တလေးမြို့ မဟာအောင်မြေမြို့နယ်၊ ၈၇ လမ်း၊ ၃၇ လမ်းကြားတွင် ယနေ့မနက်ပိုင်းတွင်မီးလောင်မှု နှစ်ကြိမ်ဖြစ်ပွားခဲ့ကြောင်းသိရသည်။

▪️ မတ်လ၂၆ ရက်နေ့၊ မနက်၄ နာရီ၅၇မိနစ် အချိန်ခန့်က မန္တလေးတိုင်းဒေသကြီး၊ မိတ္ထီလာမြို့၊ စက်မှုဇုန်(၂)လမ်းတွင် မီးလောင်မှုဖြစ်ပွားကြောင်း သတင်းရရှိသဖြင့် မိတ္ထီလာမြို့နယ်မီးသတ်စခန်းမှ အထောက်အကူပြုယာဉ်(၁)စီး၊ မီးငြှိမ်းသတ်ယာဉ် (၂)စီး၊ မီးသတ်ရေသယ်ယာဉ်(၁)စီး၊ နယ်မြေ(၁) အရန်မီးသတ်စခန်းမှ မီးငြှိမ်းသတ်ယာဉ်(၁)စီး၊ မီးသတ် ရေသယ်ယာဉ်(၁)စီး၊ နယ်မြေ(၂) အရန် မီးသတ်စခန်းမှ မီးငြှိမ်းသတ်ယာဉ်(၁)စီး၊ စက်မှုဇုန်အရန်မီးသတ်စခန်းမှ မီးသတ် ရေသယ်ယာဉ်(၁)စီး၊ ဈေးအရန်မီးသတ်စခန်းမှ မီးငြှိမ်းသတ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့် ထွက်ခွာငြှိမ်းသတ်ခဲ့ရာ မနက်၅ နာရီ၃၁မိနစ် အချိန်၌ မီးငြိမ်းခဲ့ကြောင်းသိရသည်။

▪️ ထို့အပြင် မတ်လ ၂၆ ရက်နေ့၊ မနက်၉ နာရီ ၃၀မိနစ် အချိန်က မန္တလေးတိုင်းဒေသကြီး၊ မဟာအောင်မြေမြို့နယ်၊ ၈၇ လမ်း၊ ၃၇ လမ်းကြားတွင် နေအိမ်မီးလောင်မှုဖြစ်ပွားကြောင်း သတင်းရရှိသဖြင့် မဟာအောင်မြေမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ အရန်မီးသတ်စခန်းမှ မီးငြှိမ်းသတ်ယာဉ်(၃)စီး ထွက်ခွာငြှိမ်းသတ်ခဲ့ရာ ၉ နာရီ ၅၅ မိနစ်အချိန်၌ မီးငြိမ်းနိုင်ခဲ့ကြောင်းသိရသည်။

#YMG/NN #Yangon_Times

#Local_News
Published 26 March 2026

■ မန္တလေးတိုင်းဒေသကြီး၊ ရမည်းသင်းမြို့နယ်အတွင်း ငွေကျပ် ၃ ဘီလီယံခန့်တန်ဖိုးရှိ မူးယစ်ဆေးဝါးများဖမ်းဆီးရမိကြောင်း သိရသည်။

■ လုံခြုံရေးဆောင်ရွက်နေသည့် ပူးပေါင်းအဖွဲ့က မတ်လ ၂၄ ရက် နံနက် ၂ နာရီခွဲခန့်တွင် တပ်ကုန်း-ကျောက်ဆည်ခရိုင်ချင်းဆက်လမ်းပေါ်ရှိ နန်းလုံကျေးရွာနှင့် ကျည်စုကျေးရွာကြား၌ ပင်လောင်းမြို့နယ်ဘက်မှ ဆာလာအိတ်များ တင်ဆောင်လာသည့် Shayan အမျိုးအစား ဆိုင်ကယ် ၂ စီးနှင့် Kenbo အမျိုးအစား ဆိုင်ကယ် ၁ စီးတို့ကို စစ်ဆေး ရှာဖွေခြင်းများ ဆောင်ရွက်ရန် တားဆီးစဉ် ရပ်တန့်ပေးခြင်းမရှိသဖြင့် လိုက်လံ ဖမ်းဆီးခဲ့ရာ ခွန်လိမ္မာ ၊ ၄၀ နှစ်၊ (ဘ) ဦးထွန်းလှိုင်၊ ရှမ်းပြည်နယ်(တောင်ပိုင်း)၊ ပင်လောင်းမြို့နယ်၊ လူဖဲခြမ်းကျေးရွာနေသူအား ဆိုင်ကယ် ၃ စီးနှင့်အတူ ဖမ်းဆီးရမိခဲ့ကြောင်းသိရသည်။

■ အဆိုပါ ဆိုင်ကယ်များပေါ်တွင် တင်ဆောင်ထားသည့် ဆာလာအိတ်များကို ရှာဖွေ စစ်ဆေးခဲ့ရာတွင်လည်း ဆာလာအိတ် ၆ အိတ်အတွင်းမှ ငွေကျပ် ၃ ဘီလီယံခန့်တန်ဖိုးရှိ စိတ်ကြွ ရူးသွပ်ဆေးပြား ၂,၀၀၀,၀၀၀ ပြားတို့အား တွေ့ရှိသိမ်းဆည်းရမိခဲ့ကြောင်း သိရသည်။

■ အဆိုပါ မူးယစ်ဆေးဝါးများနှင့်အတူ ဖမ်းဆီးရမိသူအား ဥပဒေအရ ထိရောက်စွာအရေးယူဆောင်ရွက်နိုင်ရေး သက်ဆိုင်ရာနယ်မြေရဲစခန်းသို့ စနစ်တကျလွှဲပြောင်းအပ်နှံပြီး အမှုဖွင့်ဆောင်ရွက်ထားရှိကာ ဆက်စပ်တရားခံများအား ဖော်ထုတ်ဖမ်းဆီးရမိရေး ဆောင်ရွက်လျက်ရှိကြောင်း သိရသည်။

#YMG/PP #Yangon_Times

#World_Science
Published 26 March 2026

■ လော်ဆန်တက္ကသိုလ်မှ သိပ္ပံပညာရှင်တွေက ကင်ဆာအကျိတ်ဆဲလ်တွေ ဗိုက်တာမင်-ဘီ၇ ချို့တဲ့တဲ့အခါ အားနည်းချက်ပေါ်ပေါက်လာတဲ့ ဆဲလ်ဖြစ်စဉ်တစ်ခုကို ရှာတွေ့ခဲ့ပါတယ်။

■ အချို့သောဆဲလ်တွေက အမိုင်နိုအက်ဆစ် ဂလူတမင်းကို အတော်လေး မှီခိုနေရပါတယ်။

■ ဂလူတမင်းက ပရိုတိန်းနဲ့ DNA ဆောက်လုပ်ဖို့ လိုအပ်တဲ့ အရေးကြီးပစ္စည်းတွေကို ထောက်ပံ့ပေးကာ ဂလူတမင်းမရှိပါက ဆဲလ်တွေ ဆက်ပြီးမကွဲနိုင်တော့ပါဘူး။

■ ကင်ဆာဆဲလ်တွေဆိုရင် ဂလူတမင်းအပေါ် မှီခိုနေရကာ အားနည်းချက် ဖြစ်နေပါတယ်။

■ ဒါတောင်မှ အကျိတ်တွေဟာ ဒီမှီခိုရမှုကို ကျော်လွှားနိုင်တဲ့ နည်းလမ်းတွေ ရှိနေပါသေးတယ်။

■ ပိုင်ရူဗိတ်ကာဘောက်ဆလေ့စ်လို့ခေါ်တဲ့ မိုင်တိုခွန်ဒရီယယ်အင်ဇိုင်းဟာ အလုပ်လုပ်ဖို့အတွက် ဗိုက်တာမင်-ဘီ၇ (ဘိုင်အိုတင်)နဲ့ ပေါင်းစပ်ရပြီး ဘီ၇မရှိရင် အင်ဇိုင်းအလုပ်မလုပ်တော့ဘဲ ဆဲလ်ကြီးထွားမှု ရပ်တန့်သွားပါတယ်။

■ ဒါကြောင့် ပိုင်ရူဗိတ်တွေ ဆဲလ်လမ်းကြောင်းထဲဝင်စေနိုင်ဖို့ ဘိုင်အိုတင်က ခွင့်ပြုရသလို ဖြစ်နေပါတယ်။

■ ကင်ဆာအမျိုးမျိုးနဲ့ ဆက်စပ်နေတဲ့ FBXW7 လုပ်ဆောင်ချက်ကိုလည်း တွေ့ရှိထားပါတယ်။

■ FBXW7 ဗီဇပြောင်းတဲ့အခါ ပိုင်ရူဗိတ် မသုံးနိုင်တော့ဘဲ ဆဲလ်တွေက ဂလူတမင်းကို မှီခိုလာရပါတယ်။

■ လူနာတွေမှာ FBXW7 ဗီဇပြောင်းလဲခြင်းက ဒီလိုမျိုး မှီခိုမှုကို တိုက်ရိုက်ဖြစ်စေပါတယ်။

■ ဒီလေ့လာချက်တွေကနေ သိရတာက ဂလူတမင်းဖြစ်စဉ်ကို ဟန့်တားရုံဖြင့် အောင်မြင်မှုမရဘဲ ကင်ဆာဆဲလ်တွေက အခြားနည်းလမ်းဖြင့် အသက်ရှင်နိုင်တာ ဖြစ်ပါတယ်။

■ ရေရှည်မှာ ကင်ဆာတွေရဲ့ အားနည်းချက်တွေကို ပိုမိုသိရှိလာနိုင်ပြီး ကုသမှုနည်းလမ်းသစ်တွေ ဖန်တီးလာနိုင်မယ်လို့ ယုံကြည်နေကြပါတယ်။

Source: SciTechDaily.

#World_Science
Published 26 March 2026

■ မကြာသေးမီ လေ့လာချက်တစ်ခုအရ တရားထိုင်နည်းပုံစံအမျိုးမျိုးကနေ ဦးနှောက်လှိုင်းတွေရဲ့ ဖွဲ့စည်းမှုပုံစံတွေ၊ နောက်ခံဆူညံသံ ပြောင်းလဲမှုကြီးတွေ ဖြစ်စေတာကို တွေ့ရှိထားပါတယ်။

■ ဗုဒ္ဓဘာသာဘုန်းကြီးတွေရဲ့ ဦးနှောက်တွေကို ဓာတ်မှန်ရိုက်ခဲ့ရာမှာ တရားထိုင်ခြင်း အခြေအနေကြောင့် ဦးနှောက်လှုပ်ရှားနိုင်စွမ်း ပိုမိုမြင့်မားလာကာ ယခင်လှုပ်ရှားပုံတွေနဲ့ သိပ်မတူတော့ပါဘူး။

■ ဦးနှောက်ဓာတ်မှန်ရိုက် ကိရိယာတွေဖြင့် တရားထိုင်စဉ်အတွင်း လှုပ်ရှားသွားတဲ့ ဦးနှောက်အစိတ်အပိုင်းတွေကို ချိတ်ဆက်ပေးနိုင်ခဲ့ပါတယ်။

■ ဒီဖြစ်စဉ်တွေက စိတ်အခြေအနေတွေကနေ သတိအသိစိတ် ပြောင်းလဲစေတဲ့အကြောင်း သုတေသီတွေ နားလည်ဖို့ ကြိုးစားနေကြဆဲဖြစ်ပါတယ်။

■ သမထကျင့်စဉ်ဆိုရင် အကြောင်းအရာတစ်ခုထဲကို အာရုံစူးစိုက်ရတာဖြစ်ပြီး ဝိပဿနာကျင့်စဉ်ကတော့ ဝင်လာသမျှ အတွေးတွေ အာရုံခံစားမှုတွေကို ဖြစ်ပျက်သဘောရှုရတဲ့ နည်းလမ်းဖြစ်ပါတယ်။

■ သုတေသီတွေက MEG နည်းပညာဖြင့် ဦးနှောက်လှုပ်ရှားမှုကို တိုင်းတာကာ တရားထိုင်စဉ်အတွင်း စည်းချက်ညီဂမ်မာလှိုင်းတွေ လျော့နည်းသွားတာ တွေ့ရပါတယ်။

■ တရားထိုင်ခြင်းက ဦးနှောက်အချက်ပြလုပ်ဆောင်ချက်တွေ တိုးတက်စေပြီး စိတ်အခြေအနေ သဟဇာတပိုဖြစ်စေနိုင်တာကို တွေ့ရပါတယ်။

■ ဝါရင့်ဘုန်းကြီးတွေရဲ့ ဦးနှောက်တွေက တရားထိုင်စဉ်မှာ ဦးနှောက်ရွေ့လျားမှုကို တွေ့ရပြီး အနားယူစဉ်အခြေအနေတွေရဲ့ ဆင်တူကာ ရေရှည်ကျင့်ကြံပါက အခြေခံဦးနှောက်အပြုအမူ ပြောင်းလဲစေနိုင်ပါတယ်။

■ ဒီလေ့လာချက်က လူအနည်းစုသာ ပါဝင်ပြီး နှိုင်းယှဉ်ခံလူတွေလည်း မပါဝင်ပါဘူး။

■ ဒါပေမဲ့ အနာဂတ်မှာ စိတ်ကျန်းမာရေး အခြေအနေတွေအတွက် တရားထိုင်နည်းလမ်းတွေ ရှာဖွေလာနိုင်မယ်လို့ ယူဆနေကြပါတယ်။

Source: PsyPost

ပေကျင်းမှ လူသားပုံသဏ္ဍာန်စက်ရုပ် အချက်အလက်လေ့ကျင့်ရေးစင်တာက မတ်လကုန်လောက်မှာ စက်ရုပ်များ ထိတွေ့မှုအာရုံခံလေ့ကျင့်သင်ယူခြင်း တတိယအဆင့် စတင်သွားဖိုရှိပြီး လုပ်ငန်းကဏ္ဍအမျိုးမျိုးမှာ လက်တွေ့အသုံးချသွားဖို ရည်မှန်းထားပါတယ်။

#Asia_Technology
Published 25 March 2026
#ပေကျင်း #လူသားပုံသဏ္ဍာန်စက်ရုပ်
#YMG #Yangon_Times #Yangon_Media_Group

#Local_News
Published 25 March 2026

▪️ လယ်ဝေးမြို့နယ်၌ ဇမ္ဗူသမဝါယမအသင်း၏ ကြက်ကောင်ရေ ၁၈၀,၀၀၀ မွေးမြူနိုင်သည့် Pullet House နှစ်ရုံနှင့် Layer House ခြောက်ရုံပါဝင်သည့် အကြီးစားစီးပွားဖြစ် မွေးမြူရေး စီမံကိန်းကိုပြုလုပ်နေကြောင်း သိရသည်။

▪️ အဆိုပါ လယ်ဝေးမြို့နယ် မျိုးဇမ္ဗူသမဝါယမအသင်း၏ ခေတ်မီနည်းပညာသုံး မဟာနွယ် ဥစားကြက် မွေးမြူရေးခြံဖွင့်ပွဲကို ယမာန် နေ့ မနက်ပိုင်းက ကျင်းပရာ သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ဒုတိယဝန်ကြီး ဦးသိုက်စိုးသည် နေပြည်တော်ကောင်စီအဖွဲ့ဝင်များ၊ သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ညွှန်ကြားရေးမှူးချုပ်နှင့် သမဝါယမအသင်းအဆင့်အဆင့်မှ တာဝန်ရှိသူများ၊ မျိုးဇမ္ဗူသမဝါယမအသင်းမှ ဥက္ကဋ္ဌနှင့် သမဝါယမအသင်းသား အသင်းသူများ၊ သမဝါယမဦးစီးဌာနမှ တာဝန်ရှိသူများနှင့်အတူ တက်ရောက်သည်။

▪️ ဒုတိယဝန်ကြီးက မျိုးဇမ္ဗူသမဝါယမအသင်း၏ ခေတ်မီနည်းပညာသုံး မဟာနွယ် ဥစားကြက်မွေးမြူရေးခြံကို ဖဲကြိုးဖြတ်ဖွင့်လှစ်ပေးပြီး မွေးမြူရေးခြံများကိုလှည့်လည်ကြည့်ရှုသည်။

▪️ ယင်းနောက် ဒုတိယဝန်ကြီးက ယနေ့ဖွင့်လှစ်လိုက်သည့် မျိုးဇမ္ဗူသမဝါယမအသင်း မဟာနွယ် ဥစားကြက်မွေးမြူရေး စီမံကိန်းအနေဖြင့် မြေဧရိယာ ၂၄ ဧကပေါ်တွင် စုစုပေါင်း ကြက်ကောင်ရေ ၁၈၀၀၀၀ မွေးမြူနိုင်သည့် Pullet House နှစ်ရုံနှင့် Layer House ခြောက်ရုံပါဝင်သည့် အကြီးစားစီးပွားဖြစ် မွေးမြူရေး စီမံကိန်းဖြစ်ပါကြောင်း၊ စီမံကိန်း အပြည့်အဝ လည်ပတ်မည်ဆိုလျှင် တစ်နေ့ ကြက်ဥ ၁၈၀၀၀၀ ခန့် ထုတ်လုပ်နိုင်မည်ဖြစ်ပြီး ပြည်တွင်းဈေးကွက်တွင် ဈေးနှုန်းတည်ငြိမ်စွာ အရည်အသွေးမြင့် ကြက်ဥများကို ထုတ်လုပ်ပေးနိုင်မည်ဖြစ်ပါကြောင်း၊ ထိုကဲ့သို့ သော စီမံကိန်းများသည် နိုင်ငံတော်၏ စားနပ်ရိက္ခာလုံခြုံမှုကို အထောက်အကူပြုသော အရေးပါသည့်လုပ်ငန်းများဖြစ်ပါကြောင်း၊ ဤစီမံကိန်းတွင် ခေတ်မီ Closed-House System ကို အသုံးပြုထားသည့်အတွက် Biosecurity စနစ်မြင့်မားခြင်း၊ ထုတ်လုပ်မှုစွမ်းဆောင်ရည် တိုးတက်ခြင်း၊ အရည်အသွေး ထိန်းချုပ်နိုင်ခြင်းတို့ကို အထောက်အကူပြုနိုင်မည်ဖြစ်ပါကြောင်း၊ယခုကဲ့သို့ ဥစားကြက်မွေးမြူရေးစီမံကိန်းကို တည်ထောင်ခြင်းဖြင့် ဒေသခံပြည်သူများကိုလည်း အလုပ်အကိုင်အခွင့်အလမ်းများ ဖန်တီးပေးနိုင်မည်ဖြစ်သလို ဒေသဆိုင်ရာစီးပွားရေးလုပ်ငန်းများ တိုးတက်လာစေမည်ဖြစ်သည့်အပြင် မွေးမြူရေးကဏ္ဍ တိုးတက်ရေးအတွက် နမူနာကောင်းတစ်ခုလည်း ဖြစ်လာနိုင်သဖြင့် အထူးအရေးပါသည့် စီမံကိန်းတစ်ခုဖြစ်ပါကြောင်း၊ ယနေ့နိုင်ငံတော်တွင် လူဦးရေတိုးလာသည်နှင့်အမျှ အသားစားသုံးမှုလည်း တိုးလာသကဲ့သို့ ဥစားသုံးမှုနှုန်းလည်း မြင့်တက်လာပါကြောင်း၊ ဥစားကြက်မွေးမြူရေးသည် စနစ်တကျလုပ်ကိုင်မည်ဆိုလျှင် နေ့စဉ်ဝင်ငွေရရှိစေသော တွက်ခြေကိုက်သည့် လုပ်ငန်းတစ်ခုဖြစ်ပါကြောင်း၊ ဥစားကြက်များသည် အစာနှင့်ဆေးကောင်းလျှင် အကောင်ကြီးထွားနှုန်း၊ ဖြစ်ထွန်းမှုနှုန်းမြန်ပါကြောင်း၊ အစာနှင့်ရေကို အချိန်မှန်မှန်အထူးဂရုစိုက် တိုက်ကျွေး၍ ရောဂါကာကွယ်ဆေးများ တိုက်ကျွေးခြင်း၊ ထိုးနှံခြင်းများပြုလုပ်ပေးရမည်ဖြစ်ပါကြောင်း ပြောကြားသည်။

▪️ ထို့နောက် မျိုးဇမ္ဗူသမဝါယမအသင်း၏ တာဝန် ရှိသူက ဥစားကြက်မွေးမြူရေးလုပ်ငန်းအကြောင်းကို ရှင်းလင်းတင်ပြခဲ့ကြောင်း သိရသည်။

#YMG/NN #Yangon_Times

#Local_News
Published 25 March 2026

▪️ ၂၀၀ ကျပ်တန် မြန်မာ့ကော်ဖီခင်းပုံ အထူးထုတ် စာပို့တံဆိပ်ခေါင်းသစ်တစ်မျိုးကို ယခုလ ၂၇ရက်မှစတင်ကာ ရောင်းချပေးသွားမည်ဖြစ်ကြောင်းပို့ဆောင်ရေးနှင့် ဆက်သွယ်ရေးဝန်ကြီးဌာန၊ မြန်မာ့စာတိုက်လုပ်ငန်းမှ သိရသည်။

▪️ အဆိုပါ အထူးထုတ် စာပို့တံဆိပ်ခေါင်းသစ်ကို မြန်မာနိုင်ငံတွင် စိုက်ပျိုးထုတ်လုပ်သည့် မြန်မာ့ကော်ဖီကို ဂုဏ်ပြုသောအားဖြင့် ရောင်းချပေးခြင်းဖြစ်ပြီး
မတ်လ ၂၇ရက်နေ့တွင် နံနက် ၉ နာရီခွဲမှစတင်၍ နေပြည်တော်ဗဟိုစာတိုက်ကြီး၊ ရန်ကုန်စာတိုက်ကြီး၊ မန္တလေးစာတိုက်ကြီးတို့နှင့် တိုင်းဒေသကြီး/ပြည်နယ်များရှိ စာတိုက်ကြီးများတွင် တစ်ပြိုင်တည်း ရောင်းချပေးသွားမည်ဖြစ်ကြောင်း သိရသည်။

▪️ ထို့အပြင် အထူးအစီအစဉ်တစ်ရပ်အနေဖြင့် နေပြည်တော်ဗဟိုစာတိုက်ကြီး၊ ရန်ကုန်စာတိုက်ကြီးနှင့် မန္တလေးစာတိုက်ကြီးတို့တွင် ၂၀၂၆ ခုနှစ်၊ မတ် (၂၇)ရက် (သောကြာနေ့) တွင် ဝယ်ယူသော စာပို့တံဆိပ်ခေါင်းများနှင့် ပထမနေ့စာအိတ် (Firstday Cover) များပေါ်တွင် နေ့စွဲအမှတ်အသားတံဆိပ် ရိုက်နှိပ်ပေးသွားမည်ဖြစ်ကြောင်း သိရသည်။

#YMG/SW #Yangon_Times

#Local_News
Published 25 March 2026

▪️ ယမန်နေ့ညပိုင်းက ရန်ကုန်-မန္တလေးအမြန်လမ်းတွင်ဆီဘောက်ဆာယာဉ်နှင့် Light Truckယာဉ်တိုက်မှုဖြစ်ပွားပြီး လူညှပ်လျှက်ရှိရာ အဆိုပါလူကိုအသက်ရှင်လျှက် ကယ်ထုတ်နိုင်ခဲ့ကြောင်း မြန်မာနိုင်ငံမီးသတ်တပ်ဖွဲ့မှသိရသည်။

▪️ ၂၄.၃.၂၀၂၆ ရက်နေ့၊ ည၇နာရီ၅၀ မိနစ်အချိန်က နေပြည်တော်၊ လယ်ဝေးမြို့နယ်၊ အေလာနယ်မြေ၊ အောင်းကုန်းကျေးရွာအနီး ရန်ကုန်-မန္တလေးအမြန်လမ်းမကြီးတွင် Light Truck ယာဉ်မှ ဆီဘောက်ဆာယာဉ်အား အနောက်မှဝင်တိုက်မိရာ Light Truck ယာဉ်အား မောင်းနှင်သူ ကျား(၁)ဦး ညပ်နေကြောင်း သတင်းရရှိသဖြင့် လယ်ဝေးမြို့နယ်မီးသတ်စခန်းမှ မီးသတ်ယာဉ်(၁)စီး၊ အေလာနယ်မြေမီးသတ်စခန်းမှ မီးသတ်ယာဉ်(၁)စီးတို့ဖြင့် ရှာဖွေကယ်ဆယ်ရေးလုပ်ငန်းအား သွားရောက်ဆောင်ရွက်ပေးခဲ့ကြောင်း သိရသည်။

▪️ ထိုသို့ဆောင်ရွက်ပေးပြီးနောက် ည၈နာရီ ၃၃ မိနစ်အချိန်တွင် ကျား(၁)ဦးအား အသက်ရှင်လျက် ကယ်ထုတ်နိုင်ခဲ့‌ကြောင်းသိရသည်။

#YMG/SW #Yangon_Times

ဒုတိယအကြိမ်မြောက်တိုင်း၊ခရိုင်၊မြို့နယ်ယဉ်ကျေးလိမ္မာစာမေးပွဲ၌ ထူးချွန်စွာအောင်မြင်သူတွေအတွက် ဆု‌ပေးပွဲအခမ်းအနားကို လာမယ့် မေလအတွင်းမှာ ကျင်းပသွားမယ်လို့ ရန်ကုန်တိုင်းသာသနာ့နုဂ္ဂဟအသင်းကသိရပါတယ်။

#Local_News
Published 25 March 2026
#ယဉ်ကျေးလိမ္မာစာမေးပွဲ #ဆု‌ပေးပွဲ
#YMG/NN #Yangon_Times

ပြည်တွင်းလေကြောင်းခရီးစဉ်များ အားလုံးယနေ့ပုံမှန်အတိုင်းပြန်လည်ပြေးဆွဲပြီဖြစ်တယ်လို့ သိရပါတယ်။

#Local_News
Published 25 March 2026
#ပြည်တွင်းလေကြောင်း
#YMG/SW #Yangon_Times