အွန်လိုင်းငွေလိမ်လည်မှုလုပ်ငန်း (ကျားဖြန့်)တွေနဲ့ ဂျပန်လူမျိုးတွေကိုသာမကဂျပန်ဘာသာစကားတတ်ကျွမ်းတဲ့ မြန်မာလူမျိုး‌တွေကိုပါ အသုံးချဖို့ ရည်ရွယ်လာနိုင်ခြေရှိတယ်လို့ ြမန်မာနိုင်ငံဆိုင်ရာ ဂျပန်သံရုံးက ယမန်နေ့က ထုတ်ပြန်ခဲ့တဲ့အွန်လိုင်းငွေလိမ်လည်မှုလုပ်ငန်း (ကျားဖြန့်) နဲ့ပတ်သက်တဲ့ သတိပြုရန် အသိပေးစာမှာ ဖော်ပြထားပါတယ်။
#Local_News
Published 1 March 2025
#အွန်လိုင်းငွေလိမ်လည်မှုလုပ်ငန်း #ဂျပန်ဘာသာစကားတတ်ကျွမ်း
#YMG/SW #Yangon_Times

ရန်ကုန်ဈေးကွက်မှာ ဓာတ်ဆီဈေးတွေဆက်တက်‌လာပြီး ဒီဇယ် ဈေးကတော့ ဒီတစ်ပတ်မှာအနည်းငယ်ပြန်ကျလာတယ်လို့ စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်
ရေးကော်မတီက သိရပါတယ်။
#Local_News
Published 1 March 2025
#ဓာတ်ဆီဈေးတက် #ဒီဇယ်ဈေးပြန်ကျ
#YMG/NN #Yangon_Times

အခုမတ်လအတွက် စားသုံးသူရေးရာဦးစီးဌာနက ထုတ်ပြန်တဲ့ ပြည်ပတင်ပို့တာနဲ့ ပြည်တွင်းစားသုံးကြတဲ့ ဆန်ကြမ်း၊ ဆန်‌ချောတွေရဲ့ ရည်ညွှန်းဈေးတွေ အမျိုးအစားအလိုက်တစ်အိတ်ကို၂၀၀၀ကနေ ၅၀၀၀ ကျပ်အထိ ကျဆင်းလာတယ်လို့
စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ စားသုံးသူရေးရာဦးစီးဌာနက သိရပါတယ်။
#Local_News
Published 1 March 2025
#ဆန်‌ချောနှင့်ဆန်ကြမ်း #ရည်ညွှန်းဈေးကျဆင်း
#YMG/NN #Yangon_Times

အီဂျစ်နိုင်ငံရဲ့ ဝါစိုက်ပျိုးထုတ်လုပ်မှုဆိုင်ရာ နည်းပညာတွေနဲ့ စိုက်ပျိုးမှုနည်းလမ်းတွေကို မြန်မာနိုင်ငံသို့ မျှဝေပံ့ပိုးပေးသွားဖို့ရှိတယ်လို့ သိရပါတယ်။
#Local_News
Published 1 March 2025
#ပြည်တွင်းဝါစိုက်ပျိုးမှု #အီဂျစ်ကပံ့ပိုးပေး
#YMG/SW #Yangon_Times

#Local_News
Published 1 March 2025

▪️ ရုရှားဖက်ဒရေးရှင်းနိုင်ငံ၊ မော်စကိုမြို့၌ မေလ ၅ ရက်မှ ၇ ရက်အထိ ကျင်းပမည့် နိုင်ငံတကာစိုက်ပျိုးရေးပြပွဲနှင့်ဖိုရမ်သို့  မြန်မာလုပ်ငန်းရှင်များ တက်ရောက်မည်ဖြစ်ကြောင်း မြန်မာကုန်သွယ်မှုမြှင့်တင်ရေးအဖွဲ့၊ ကုန်သွယ်မှုဖွံ့ဖြိုးရေးဌာနခွဲမှ သိရသည်။

▪️ အဆိုပါပြပွဲကို စားနပ်ရိက္ခာဖူလုံမှုနှင့် ရေရှည်တည်တံ့သော စိုက်ပျိုးရေးဖွံ့ဖြိုးတိုးတက်မှု ခေါင်းစဉ်ဖြင့် ကျင်းပမည်ဖြစ်ပြီး တက်ရောက်သူများအကြား ပူးပေါင်းဆောင်ရွက်နိုင်ရေး အပြန်အလှန် မဟာဗျူဟာများ ရေးဆွဲနိုင်ရန်နှင့် ဟန်ချက်ညီ၍ နှစ်ရှည်အကျိုးဖြစ်ထွန်းစေမည့် သဘောတူစာချုပ်များ ချုပ်ဆိုနိုင်ရန် ရည်ရွယ်ကျင်းပသွားမည်ဖြစ်ကြောင်း၊ ပြပွဲနှင့်ဖိုရမ်သို့ ရုရှားဖက်ဒရေးရှင်းနိုင်ငံမှ ထိပ်တန်းအရာရှိများနှင့် ပြပွဲလေ့လာသူပေါင်း ၁၅,၀၀၀ ကျော် လာရောက်မည်ဖြစ်ပြီး ရုရှားစီးပွားရေးကုမ္ပဏီပေါင်း ၅၀၀ ကျော် ပါဝင်ပြသမည်ဖြစ်‌ကြောင်း သိရသည်။

▪️ ပြပွဲတွင် မြေဆီလွှာအသုံးချမှုနှင့် စိုက်ပျိုးသီးနှံထုတ်လုပ်မှုအနေဖြင့် အပင်ပိုးမွှားကာကွယ်သည့် ပိုးသတ်ဆေးနှင့်ထုတ်ကုန်များ၊ ဓာတ်မြေသြဇာများ၊ အော်ဂဲနစ်မြေဩဇာများ၊ မွေးမြူရေးကုန်ထုတ်လုပ်ငန်းများအနေဖြင့် မွေးမြူရေးလုပ်ငန်းသုံးစက်ပစ္စည်းကိရိယာများ၊ အသင့်စား အသားထုတ်ကုန်များ ထုတ်လုပ်ရာတွင် အသုံးပြုသည့် စက်ကိရိယာများ၊ ရေဆိုးသန့်စင်စက်ရုံနှင့် လေဝင်လေထွက်စနစ်များ၊ စီးပွားဖြစ် ငါးမွေးမြူရေးလုပ်ငန်းသုံး စက်ကိရိယာများ၊ သီးနှံထုတ်လုပ်ခြင်းနှင့် သိမ်းဆည်းခြင်းနည်းစနစ်များ၊ စွန့်ပစ်အမှိုက်များကို ဇီဝလောင်စာနှင့် အော်ဂဲနစ်မြေဩဇာ ပြောင်းလဲခြင်း နည်းစနစ်များ၊ သစ်သီးဝလံနှင့်ဟင်းသီးဟင်းရွက်များ၊ နို့နှင့်နို့ထွက်ပစ္စည်းများ၊ တိရိစ္ဆာန်အစားအစာ၊ အစေ့အဆန်များနှင့် ဖြည့်စွက်ပစ္စည်းများ ပေါင်းစပ်ဒီဇိုင်းထုတ်ထားသော တိရိစ္ဆာန်ဒြပ်ပေါင်း အစားအစာထုတ်ကုန်များ စသည်တို့ကို ပြသသွားမည်ဖြစ်‌ေကြာင်း သိရသည်။

#YMG/SW #Yangon_Times

#Local_News
Published 1 March 2025

▪️ ပဲခူးတိုင်းဒေသကြီး၊ ပြည်မြို့ရှိ သရေခေတ္တရာ မြို့ဟောင်းတစ်ခုလုံးကို အပေါ်စီးမှ ကြည့်ရှုနိုင်မည့် ရှုခင်းကြည့် မျှော်စင်တည်ဆောက်လျှက်ရှိရာ လတ်တလောတွင် RC လုပ်ငန်းပိုင်း ပြီးစီးနေပြီဖြစ်ကြောင်း ကမ္ဘာ့အမွေအနှစ်ဒေသများဌာနခွဲ၊ သရေခေတ္တရာ ဌာနမှ သိရသည်။

▪️ အဆိုပါရှုခင်းကြည့်မျှော်စင်ကို ဆောက်လုပ်ရေးဝန်ကြီးဌာနမှ၂၀၂၄-၂၀၂၅ ဘဏ္ဍာနှစ်အတွင်းတာဝန်ယူ၍ ပြည်မြို့ရှိ သရေခေတ္တရာမြို့ဟောင်း၏ အနောက်ဘက် ကြက်တူရွေးတောင် နေရာတွင် အမြင့် ပေ ၄၂ ပေ အထိတည်ဆောက်နေခြင်းဖြစ်သည်။  

▪️ ယင်းရှုခင်းကြည့်မျှော်စင်တွင် စုစုပေါင်း အဆင့် ၃ ဆင့်ပါဝင်ပြီး ၁၂ ပေအမြင့်ရှိ အဆင့် ၂ ဆင့်နှင့် ၁၀ ပေအမြင့်ရှိ တစ်ဆင့်တို့ပါဝင်ကြောင်း သိရသည်။

▪️ အဆိုပါ မျှော်စင်ကို ၂၀၂၄ ခုနှစ် နိုဝင်ဘာလဆန်းပိုင်းတွင် စတင်တည်ဆောက်ခဲ့ခြင်းဖြစ်ကာ လက်ရှိတွင် ၇၀ ရာခိုင်နှုန်းခန့်ပြီးစီးနေပြီဖြစ်ကြောင်း၊ ကျန်ရှိအပိုင်းများမှာ မြန်မာမှုအမွှန်းပန်းလက်ရာများ တပ်ဆင်ရန်သာကျန်ရှိနေကြောင်း သိရသည်။

▪️ ၎င်းမျှော်စင်ကို အမြင့်ဆုံးနေရာတွင် တည်ဆောက်ထား၍  သရေခေတ္တရာမြို့ဟောင်း တစ်ခုလုံးကို တွေ့မြင်ရနိုင်မည့် အပြင် မြို့ဟောင်းအတွင်းရှိ အထင်ကရ စေတီပုထိုးများ၊ တောင်၏အနောက်ဘက်ခြမ်းရှိ ပြည်မြို့၊ မင်းကြီးတောင်၊ ဧရာဝတီမြစ်ကမ်းအထိ မြင်ရနိုင်ကြောင်း သိရသည်။

▪️ ထို့အပြင် တောင်ခြေမှမျှော်စင်အထိတက်နိုင်မည့် လမ်းများကို ဘဏ္ဍာနှစ်အလိုက် ဆက်လက်ဖော်ဆောင်သွားရန်ရှိပြီး ကားဖြင့်လာရောက်သူများအတွက်ကိုလည်း ကားရပ်နားနိုင်မည့် ရပ်နားစခန်းများ၊ နားနေရန် ဈေးဆိုင်ခန်းများစသည်တို့ကိုဖော်ဆောင်သွားရန်ရှိကြောင်း သိရသည်။

#YMG/NN #Yangon_Times

#Local_News
Published 1 March 2025

ပဲခူးတိုင်းဒေသကြီး၊ တောင်ငူမြို့၊ ကေတုမတီမြိုသစ်ရှိ သီတဂူကေတုမတီအာယုဒါနဆေးရုံတော် ၌ အာခေါင်ကွဲ၊ နှုတ်ခမ်းကွဲနှင့် သွားခံတွင်းဆိုင်ရာ လူနာများအားကုသပေးခဲ့ကြောင်း သိရသည်။

အဆိုပါ  သီတဂူကေတုမတီအာယုဒါနဆေးရုံတော်တွင် ပထမဆုံးအကြိမ်အဖြစ် အာခေါင်ကွဲ၊ နှုတ်ခမ်းကွဲနှင့် သွားခံတွင်းဆိုင်ရာလူနာများကို  ဖေဖေါ်ဝါရီ ၂၇ ရက်နေ့တွင်စတင်ကုသပေးခဲ့ကြောင်း သိရသည်။

ထို့အပြင် သွားခံတွင်းဆိုင်ရာရောဂါများကို ဖေဖေါ်ဝါရီ ၂၈ရက်နေ့ နံနက် ၈ နာရီအချိန်ခန့်တွင် စတင်၍ ကုသပေးခဲ့ကြောင်း သိရသည်။

အဆိုပါ ဆေးရုံကြီးရပ်ဝေးရပ်နီးမှာ လူနာများလာရောက်ကုသလျှက်ရှိရာညအိပ်လာရောက်ရမည့် ရပ်ဝေးဝေဒနာရှင်များသည်  မိမိတို့၏ တစ်ကိုယ်ရေတစ်ကာယအသုံးအဆောင်များကို တပါတည်း ယူဆောင်လာကြပြီး  ‌အခမဲ့ ဆေးကုသမှုခံယူ လေ့ရှိ ကြကြောင်း သိရသည်။

#YMG/NN #Yangon_Times

#World_News
Published 01 March 2025

▪️ မကြာသေးမီက အမေရိကန်သမ္မတ ဒေါ်နယ်ထရမ့် ထုတ်ပြန်လိုက်တဲ့ သမ္မတအမိန့်တစ်ရပ်ဟာ လွတ်လပ်တဲ့ ဖက်ဒရယ်ရွေးကောက်ပွဲကော်မရှင်အပေါ် ထရမ့်ရဲ့အာဏာသက်ရောက်လွန်းကာ ပြည်ထောင်စုရွေးကောက်ပွဲဥပဒေကို ချိုးဖောက်ရာကျတယ်ဆိုပြီး ဒီမိုကရက်တစ်ပါတီက သောကြာနေ့မှာ ထရမ့်ကို တရားစွဲဆိုလိုက်ပါတယ်။

▪️ အမျိုးသား ဒီမိုကရက်တစ်ကော်မတီ ၃ ခုက ဝါရှင်တန်ဒီစီ ပြည်ထောင်စုတရားရုံးမှာ တရားစွဲဆိုချက် တင်ခဲ့တာဖြစ်ပြီး ဒေါ်နယ်ထရမ့် ဒုတိယအကြိမ် သမ္မတဖြစ်စဉ်ကာလအတွင်း ပထမဆုံးအကြိမ် တရားစွဲဆိုတာ ဖြစ်ပါတယ်။

▪️ ကွန်ဂရက်လွှတ်တော်မှာ လူအင်အား အတော်လေးလျော့နည်းနေတဲ့ ဒီမိုကရက်တွေက ထရမ့်သမ္မတပြန်ဖြစ်လာစဉ် အစွန်းရောက်ပြုပြင်မှုများကို ထိရောက်စွာတန်ပြန်နိုင်ဖို့ ကြိုးပမ်းလာကြပြီး အစိုးရကြီးကြပ်ခွင့်တွေ လျှော့ချဖို့၊ အတွင်းရေး သဘောထားကွဲလွဲမှုတွေ ဖယ်ရှားဖို့ စီစဉ်လာကြပါတယ်။

▪️ ဇန်နဝါရီ ၂၀ ရက်နေ့ ဒေါ်နယ်ထရမ့် သမ္မတကျမ်းသစ္စာဆိုပြီးနောက်ပိုင်း အခြားကိစ္စရပ်များနဲ့ ပတ်သက်လို့ တရားစွဲဆိုချက် ဒါဇင်နဲ့ချီပြီး ရှိထားပါတယ်။

▪️ သောကြာနေ့ တရားစွဲဆိုချက်ထဲမှာ ဖေဖော်ဝါရီ ၁၈ ရက်နေ့အမိန့်က ရွေးကောက်ပွဲကော်မရှင်၊ အမျိုးသားအလုပ်သမား ဆက်ဆံရေးဘုတ်အဖွဲ့၊ လုံခြုံရေးနဲ့ ဖလှယ်ရေးကော်မရှင်၊ အခြားသော လွတ်လပ်တဲ့အေဂျင်စီတွေအပေါ် အိမ်ဖြူတော်မှ ပိုမိုထိန်းချုပ်ခွင့်ရရှိစေတယ်လို့ ဖော်ပြထားပါတယ်။

▪️ ဝေဖန်ရေးတွေက ဒီအမိန့်ဟာ အာဏာချုပ်ကိုင်တဲ့သဘောလို့ ပြောနေကြပါတယ်။

▪️ ဒီလိုကျင့်သုံးပါက နှစ်ဖက်ပါတီ ရွေးကောက်ပွဲကော်မရှင်ရဲ့ ရွေးကောက်ပွဲဆိုင်ရာ အငြင်းပွားမှုတွေမှာ ထရမ့်ရဲ့သဘော ဝင်ရောက်လာမှာဖြစ်ပြီး သူ့ဆန္ဒအတိုင်း ရလဒ်ထွက်ပေါ်စေလိမ့်မယ်လို့ ဒီမိုကရက်တွေ ဆိုပါတယ်။

▪️ အမေရိကန် တရားစီရင်ရေးဌာနကတော့ သမ္မတထရမ့်ရဲ့ လမ်းစဉ်ကို အပြင်းအထန်ခုခံဖို့ တရားရုံးမှာ ကြိုးပမ်းနေပြီဖြစ်ကာ ဆက်လက်ကြိုးပမ်းသွားမှာဖြစ်တယ်လို့ ပြောရေးဆိုခွင့်ရှိသူတစ်ဦးက အီးမေးလ်မှာ ပြောထားပါတယ်။

▪️ တရားစွဲဆိုချက်ထဲမှာ ရွေးကောက်ပွဲကော်မရှင်ကို သမ္မတအကျပ်ကိုင်ထိန်းချုပ်ခြင်းမှ ကာကွယ်ပေးနေတဲ့ ဖက်ဒရယ်ဥပဒေဟာ အခြေခံဥပဒေသက်ရောက်တယ်လို့ ထုတ်ပြန်ပြီး ဖေဖော်ဝါရီ ၁၈ ရက်နေ့က ထရမ့်ရဲ့အမိန့်ကို တားဆီးဖို့ ကြိုးပမ်းတာ ဖြစ်ပါတယ်။

#Source: Reuters

#Local_News
Published_1 March 2025

▪️ ကျောက်ဖြူ ရေနက်ဆိပ်ကမ်းအမြန်တည်ဆောက်နိုင်ရေးမြန်မာ-တရုတ်အကြား Development Plan ကို ခေတ်စနစ်နှင့်အညီရေးဆွဲသင့်ကြောင်း မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့ဥက္ကဋ္ဌ ရင်းနှီး မြှုပ်နှံမှုနှင့်နိုင်ငံခြား စီးပွားဆက်သွယ်ရေး ဝန်ကြီးဌာန ပြည်ထောင်စုဝန်ကြီး ဒေါက်တာကံဇော်က ပြောသည်။

▪️ ယမန်နေ့ ဖေဖော်ဝါရီလ ၂၈ ရက်က နေပြည်တော် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန အစည်း အဝေးခန်းမ- ၁ ၌ ကျင်းပသည့် ကျောက်ဖြူအထူးစီးပွားရေးဇုန် ရေနက်ဆိပ်ကမ်းစီမံကိန်း အောင်မြင်စွာ အကောင် အထည်ဖော်ဆောင်ရွက် နိုင်ရေး မြန်မာဘက်နှင့် CITIC ဘက်မှ နှစ်ဖက်ကြိုတင်ဖြည့်ဆည်း ရမည့် အချက်များ (Conditions Precedent)နှင့်စပ်လျဉ်းသည့် လုပ်ငန်းညှိနှိုင်းအစည်းအဝေးအတွင်း ယင်းက အထက်ပါအတိုင်း ပြောကြားခြင်း ဖြစ်သည်။

▪️ ယင်းအပြင်မြန်မာအထူးစီးပွားရေးဇုန်ဆိုင်ရာဗဟိုလုပ်ငန်းအဖွဲ့ ဒုတိယဥက္ကဋ္ဌ စီးပွားရေးနှင့်ကူးသန်းရောင်း ဝယ်ရေးဝန်ကြီးဌာန ပြည်ထောင်စုဝန်ကြီး ဦးထွန်းအုံက ကျောက်ဖြူအထူးစီးပွားရေးဇုန် ရေနက်ဆိပ်ကမ်းစီမံ ကိန်းသည် မြန်မာနိုင်ငံအတွက် အရေးကြီးသကဲ့သို့ တရုတ်နိုင်ငံအတွက်လည်း မဟာဗျူဟာကျကြောင်း ထည့်သွင်းပြောကြားခဲ့သည်။

▪️ ယင်းမြန်မာ-တရုတ်စီးပွားရေးစင်္ကြံ ပူးပေါင်းဆောင်ရွက်မှုစီမံကိန်းကို အကောင်အထည်ဖော်ဆောင်ရွက် ခြင်း ကြောင့်နှစ်နိုင်ငံအကြား ကုန်သွယ်မှုနှင့်ရင်းနှီးမြှုပ်နှံမှုများကို ပိုမိုမြှင့်တင်စေနိုင်မည်ဖြစ်ကြောင်းနှင့် သတ် မှတ်ကာလအတွင်း အောင်မြင်စွာအကောင်အထည်ဖော်ဆောင် ရွက်နိုင်စေရေး ဆောင်ရွက်ရမည့်လုပ် ငန်း များကို Timeline ချမှတ်လုပ်ဆောင်နေကြောင်းလည်း ၎င်းကပြောကြားခဲ့ကြောင်း သိရသည်။

#Yangon_Times/PP

#Local_News
Published_1 March 2025

▪️ တိုင်းဒေသကြီး၊ ပြည်နယ်များတွင် တရားမဝင်ကုန်သွယ်မှုကို နေ့ရောညပါ အရှောင်တခင်စစ်ဆေးဖမ်းဆီးခြင်းရန် စီစဉ်နေကြောင်း တရားမဝင် ကုန်သွယ်မှုတိုက်ဖျက်ရေး ဦးဆောင်ကော်မတီက သိရသည်။

▪️ ၃ နှစ်အတွင်း တရားမဝင်ကုန်သွယ်မှု ခန့်မှန်းတန်ဖိုးကျပ် ၄၅၈ ဘီလီယံကျော် ဖမ်းဆီးရမိခဲ့သော်လည်းအိမ်နီး ချင်း ကုန်သွယ်ဖက်နိုင်ငံများနှင့်ကုန်သွယ်မှု ကွာခြားချက်စာရင်းအရ လျော့နည်းနေသေးကြောင်း အဆိုပါ ကော်မတီ၏ စာရင်းများအရ သိရသည်။

▪️ ၂၀၂၂ ခုနှစ် ဇန်နဝါရီလမှ ၂၀၂၅ ခုနှစ် ဇန်နဝါရီလထိ (၃) နှစ်နှင့် (၁) လတာကာလအတွင်း တရားမဝင်ကုန် သွယ်မှု အမှုတွဲ ၁၉၀၀၀ ကျော်၊ ခန့်မှန်းတန်ဖိုးကျပ် ၄၅၈ ဘီလီယံကျော် ဖမ်းဆီးရမိခဲ့သော်လည်းအိမ်နီးချင်း ကုန်သွယ်ဖက်နိုင်ငံများနှင့် နှစ်နိုင်ငံကုန်သွယ်မှု ကွာခြားချက်စာရင်းများကို နှိုင်းယှဉ်ရာတွင် ဖမ်းဆီးရမိမှုပမာဏ သည် လွန်စွာလျော့နည်းနေသေးကြောင်း ယင်းကြောင့် ပိုမိုတိုးတက်ဖမ်းဆီးနိုင်ရေး ဆောင်ရွက်ရန်လိုပြီး တိုင်း ဒေသကြီး၊ ပြည်နယ်တရားမဝင်ကုန်သွယ်မှုတိုက်ဖျက်ရေးအထူးအဖွဲ့များကနယ်မြေအတွင်းရှိလမ်းကြောင်းများတွင် ပုံမှန်ဖမ်းဆီးမှု၊ ရှောင်တခင်စစ်ဆေးတားဆီးဖမ်းဆီးခြင်းများကို နေ့ညမပြတ်ဆောင်ရွက်ရန် ကော်မတီဥက္ကဌ၊ နိုင်ငံတော်စီမံအုပ်ချုပ်ရေးကောင်စီ ဒုတိယဥက္ကဋ္ဌ ဒုတိယဝန်ကြီးချုပ်စိုးဝင်းက တရားမဝင် ကုန်သွယ်မှု တိုက် ဖျက်ရေး ဦးဆောင်ကော်မတီလုပ်ငန်းညှိနှိုင်းအစည်းအဝေး (၁/ ၂၀၂၅)တွင် ပြောကြားခဲ့သည်။

▪️ အလားတူ“လိုင်စင်မဲ့မော်တော်ယာဉ်များ စိစစ်ဖော်ထုတ်ရာ၌ ဖမ်းဆီးရမိသူများအပြင် ပါဝင်ပတ်သက်နေသည့် အုပ်ချုပ်ရေးနှင့် လုံခြုံရေးပိုင်းဆိုင်ရာ တာဝန်ရှိသူများကိုလည်း အဆင့်ဆင့် စိစစ်ဖော်ထုတ်အရေးယူသွားရန် ၊ တရားမဝင် မော်တော်ဆိုင်ကယ်များကိုလည်း စိစစ်ဖော်ထုတ်အရေးယူသွားရန် ပြောကြားခဲ့ကြောင်း သိရသည်။

▪️ ၂၀၂၄ ခုနှစ် ဒီဇင်ဘာလနှင့် ၂၀၂၅ ခုနှစ် ဇန်နဝါရီလအတွင်း ဖမ်းဆီးရရှိမှုများတွင် အကောက်ခွန်ဦးစီးဌာနက အများဆုံးဖမ်းဆီးရမိခဲ့ပြီး နေပြည်တော်ကောင်စီအပါအဝင် တိုင်းဒေသကြီး၊ ပြည်နယ်အလိုက် ဖမ်းဆီးရရှိမှုများ တွင် စစ်ကိုင်းတိုင်းဒေသကြီးက အများဆုံး၊ မန္တလေးတိုင်းဒေသကြီးက ဒုတိယအများဆုံးနှင့် ရန်ကုန်တိုင်းဒေသကြီးက တတိယအများဆုံး ဖမ်းဆီးရမိခဲ့ကြောင်း၊ ကုန်ပစ္စည်းအုပ်စုအလိုက် ဖမ်းဆီးရရှိမှုများကို စိစစ်ရာတွင် လိုင်စင်မဲ့မော်တော်ယာဉ်နှင့် တရားမဝင်ကုန်စည်တင် မော်တော်ယာဉ်ဖမ်းဆီးရရှိမှုများက အများဆုံးဖြစ်ပြီး လုပ်ငန်းသုံးကုန်ကြမ်းပစ္စည်းများက ဒုတိယအများဆုံးနှင့် တတိယအများဆုံးက ရင်းနှီးမြှုပ်နှံမှုကုန်ပစ္စည်းများဖြစ်ကြောင်းလည်း ၎င်းက ဆိုသည်။

▪️ ၂၀၂၄ ခုနှစ် တစ်နှစ်တာအတွင်း ဖမ်းဆီးရမိမှုများကိုကြည့်ပါက ဒီဇင်ဘာလတွင် ငွေကျပ် ၄၄ ဒသမ ၁၈၃ ဘီလီယံနှင့် အများဆုံးဖမ်းဆီးရမိခဲ့သည်ကို တွေ့ရပြီး နှစ်အလိုက်ဖမ်းဆီးရမိမှုများကို နှိုင်းယှဉ်ကြည့်ပါက ၂၀၂၂ ခုနှစ်တွင် ဖမ်းဆီးရမိမှုတန်ဖိုးကျပ် ၆၅ ဘီလီယံ၊ ၂၀၂၃ ခုနှစ်တွင် ငွေကျပ် ၁၃၅ ဘီလီယံကျော်၊ ၂၀၂၄ ခုနှစ်တွင် ငွေကျပ် ၂၂၃ ဘီလီယံ တိုးတက်ဖမ်းဆီးနိုင်ခဲ့သော်လည်း အိမ်နီးချင်းနိုင်ငံ၏ ကုန်သွယ်မှုပို့ကုန်၊ သွင်းကုန်ခြားနားချက်များကို ကြည့်မည်ဆိုပါကများစွာ ဖမ်းဆီးရန် လိုအပ်နေသေးကြောင်း၊ ပို့ကုန်၊ သွင်းကုန်တန် ဖိုးနှင့် ညီမျှသည့် ဖမ်းဆီးရမိမှုရှိစေရန်သက်ဆိုင်ရာဝန် ထမ်းများအနေဖြင့်ပိုမိုထိရောက်သည့်ဖမ်းဆီးမှုများ၊ တိကျသည့်အရေးယူမှုများ တိုးမြှင့်ဆောင်ရွက်သွားရန် လိုကြောင်းလည်း ပြောကြားခဲ့ကြောင်း သိရသည်။

▪️ ရှည်လျားသည့် နယ်စပ်မျဉ်းတစ်လျှောက်တွင်ရှိသည့် တရားမဝင်ဝင်ထွက်ပေါက်များကို ထိန်းချုပ်ရန်ခက် ခဲသည့်အပြင် တရားမဝင်မှောင်ခိုရှောင်ကွင်းလမ်းများမှ ဝင်ရောက်လာမှုများလည်းရှိ၍ ယင်းတို့ကိုပိတ်ဆို့ ရန်အခက်အခဲများစွာရှိသော်လည်း နယ်စပ်တစ်လျှောက်မှ ဝင်ပေါက်များကို ထိန်းချုပ်နိုင်သည့် အဓိကကျသောလမ်းကြောင်း၊ နေရာများတွင် တာဝန်ကျဝန်ထမ်းများက နိုင်ငံ၏ စီးပွားရေးကို အထောက်အကူပြုမည်ဆိုသည့် စိတ်ဖြင့် ဆောင်ရွက်ပါက ပိုမိုဖမ်းဆီးနိုင်မည်ဖြစ်ကြောင်း၊ တရားမဝင်ကုန်ပစ္စည်းများကို နယ်စပ်ဂိတ်များမှ တစ်ဆင့်တင်ပို့ခြင်းအပြင် နယ်စပ်ဂိတ်များ အနီးရှိ ဂိုဒေါင်များတွင် သိမ်းဆည်း၍ ဖြန့်ချိခြင်းများလည်းရှိ သော ကြောင့် ကြောင်းသက်ဆိုင်ရာတာဝန်ရှိ သူများက ဖော်ထုတ်ဖမ်းဆီး၍ အရေးယူရန်လိုကြောင်းလည်း ၎င်းက ပြောကြားခဲ့ကြောင်း သိရသည်။

#Yangon_Times/PP

#World_Health
Published 1 March 2025

▪️ အဆီချအချိုရည်များ၊ ပီကေများ၊ သကြားနည်းတဲ့ ဒိန်ချဉ်တို့မှာ ပါဝင်တဲ့ သကြားအစားထိုးပစ္စည်းတစ်မျိုးဟာ တိရိစ္ဆာန်တွေမှာ အင်ဆူလင်ပမာဏ မြင့်တက်စေပြီး အချိန်ကြာလာတာနဲ့အမျှ နှလုံးဖောက်ခြင်း၊ လေဖြတ်ခြင်းတို့ ဖြစ်နိုင်ခြေ များစေနိုင်ကြောင်း ဆွီဒင်လေ့လာချက်တစ်ခုမှာ ဖော်ပြထားပါတယ်။

▪️ သုတေသနအချို့အရ သကြားအစားထိုးပစ္စည်းတွေ ကြာရှည်အသုံးပြုပါက လေဖြတ်ခြင်း၊ နှလုံးရောဂါ၊ အရွယ်မတိုင်ခင် သေဆုံးခြင်းတို့ပင် မြင့်မားနိုင်တယ်လို့ ဆိုထားပါတယ်။

▪️ သကြားအစားထိုးပစ္စည်း aspartameက ဘယ်လိုမျိုး ဘေးဖြစ်နိုင်လဲဆိုတာကို သုတေသီအဖွဲ့က လေ့လာချင်ခဲ့ပါတယ်။

▪️ သကြားထက် အဆ ၂၀၀ လောက်ပိုချိုတဲ့ aspartame ကို Nutrasweet, Equal နဲ့ Sugar Twinဆိုတဲ့ အမှတ်တံဆိပ်များဖြင့် ရောင်းချပါတယ်။
၂၀၂၃ မှာ WHOက aspartameကို လူတွေအတွက် ကင်ဆာဖြစ်စေနိုင်တဲ့ပစ္စည်းလို့ သတ်မှတ်ခဲ့ပါတယ်။

▪️ စမ်းသပ်ချက်အတွက် aspartame ၀.၁၅ ရာခိုင်နှုန်းပါတဲ့ အစာကို ကြွက်တွေမှာ ၁၂ ပတ်ကြာအောင် ကျွေးခဲ့ပါတယ်။

▪️ ထိုကြွက်တွေရဲ့ သွေးကြောတွေမှာ အဆီများ ပိုမိုစုပြုံလာပြီး နှလုံးရောဂါဖြစ်စေမယ့် ရောင်ရမ်းခြင်းမျိုး ခံစားလာရပါတယ်။

▪️ သွေးကြောအဆီပိတ်လာရခြင်းအတွက် အင်ဆူလင်များပြားလာခြင်းက အကြောင်းအရင်းဖြစ်တယ်လို့ ဆိုပါတယ်။

▪️ အင်ဆူလင်ထွက်ပေါ်တဲ့အခါ CX3CL1 ဖြစ်ပေါ်စေပြီး သွေးကြောတွေရဲ့ အတွင်းနံရံတွေမှာ ကပ်ညိပြီးတော့ ဖြတ်သွားတဲ့ ကိုယ်ခံအားဆဲလ်တွေကို ဖမ်းယူလိုက်ပါတယ်။

▪️ CX3CL1ကို ဖယ်ရှားလိုက်တဲ့အခါမှာတော့ စုပြုံပိတ်ဆို့ခြင်း မဖြစ်တော့ပါဘူး။

▪️ နော့သ်ဝဲလ်ဟန်တင်တန်ဆေးရုံမှ အာဟာရပညာရှင် စတက်ဖာနီရှစ်ဖ်က အစားအစာတွေထဲမှာ ပါဝင်တဲ့ သကြားအစားထိုးပစ္စည်းများနဲ့ သကြားတို့ကို ရှောင်ရှားသင့်တယ်လို့ အကြံပြုထားပါတယ်။

#Source: New York Post

#World_Health
Published 1 March 2025

▪️ အာဟာရဓာတ်လိုအပ်ချက်အတွက် ဖြည့်စွက်အားဆေးများ အသုံးပြုလာကြရာမှာ ၂၀၂၄ စစ်တမ်းအရ အမေရိကန်မှာ ဖြည့်စွက်ဆေးအသုံးပြုသူ ၇၅ ရာခိုင်နှုန်း ရှိနေပါတယ်။

▪️ ဆေးဖက်ဝင်နဲ့ ဖြည့်စွက်ဆေးတွေကြောင့် အသည်းပျက်စီးခြင်းမျိုးက ၁၉၉၅ ခုနှစ်ကနေ ၂၀၂၀ အထိ ရှစ်ဆပိုများလာတယ်လို့ ၂၀၂၂ လေ့လာချက်မှာ ဖော်ပြထားပါတယ်။

▪️ အမေရိကန်တဝှမ်းမှာ အသည်းအဆိပ်သင့်ခြင်းရဲ့ ဖြစ်ရပ် ၂၀ ရာခိုင်နှုန်းလောက်က အဆိုပါ ဖြည့်စွက်ဆေးတွေနဲ့ ပတ်သက်နေပါတယ်။

▪️ အမေရိကန်တွေ စားသုံးနေတဲ့အထဲမှာမှ အသည်းထိခိုက်ခြင်းနဲ့ ဆက်စပ်နေတဲ့ အစားအစာတွေထဲမှာ နနွင်း၊ လက်ဖက်စိမ်း၊ အိန္ဒိယဂျင်ဆင်း၊ မက်လင်၊ တစေးနီထမင်း၊ Black cohoshတို့ ပါဝင်နေတယ်လို့ မီချီဂန်တက္ကသိုလ်မှ သုတေသီများ ဆိုထားပါတယ်။

▪️ ယခင်လေ့လာချက်တစ်ခုမှာ ဖြည့်စွက်ဆေးတွေမှာ စာကပ်ဖော်ပြထားတဲ့ အရာတွေနဲ့ တကယ်ပါဝင်တဲ့အရာတွေ ကွဲလွဲနေတာ တွေ့ခဲ့ကြတယ်လို့ မီချီဂန်မက်ဒီဆင်မှ အသည်းအထူးကု ဒေါက်တာ ရောဘတ်ဖွန်တာနာက ပြောပါတယ်။

▪️ ဒါ့အပြင် အချို့ဖြည့်စွက်ဆေးတွေထဲမှာ အဆိပ်သင့်သတ္တုဓာတ်များ ပါဝင်နေတယ်လို့လည်း လေ့လာချက်တွေမှာ ယူဆထားပါတယ်။

▪️ FDAက ယင်းတို့ကို ဆေးဝါးအနေနဲ့မဟုတ်ဘဲ စားစရာအဖြစ်နဲ့သာ ကွပ်ကဲစီမံရပြီး ဘေးကင်းစိတ်ချရမှု၊ အရည်အသွေး၊ ထိရောက်မှုတို့အတွက်တော့ မစစ်ဆေးကြပါဘူး။

▪️ ဒါကြောင့် ထုတ်လုပ်သူတွေက သူတို့ရဲ့ထုတ်ကုန်တွေမှာ အညွှန်းကိုသေချာရေးသားရမှာ ဖြစ်ပါတယ်။

▪️ ဖြည့်စွက်ဆေးတွေထဲက ပါဝင်ပစ္စည်းတွေက ခန္ဓာကိုယ်ထဲမှာ သက်ရောက်မှုကြီးမားနိုင်သဖြင့် ကျန်းမာရေးပညာရှင်ကနေ သင့်တော်မယ့်ဖြည့်စွက်ဆေးကို ဆုံးဖြတ်ခိုင်းသင့်တယ်လို့ FDAက ပြောထားပါတယ်။

▪️ ကျန်းမာရေးနဲ့ ပတ်သက်လို့ ဖြည့်စွက်ဆေးတွေကို ကွဲကွဲပြားပြားမသိဘဲ အသုံးပြုပါက ကောင်းခြင်းထက် ဆိုးခြင်းက ပိုများနိုင်ပါတယ်။

#Source: Times of India