Published 6 Jan 2023

အာရှပစိဖိတ်ရဲ့အနာဂတ်ကို ဒေသတွင်းနိုင်ငံတွေကပဲ ကိုယ်တိုင်ဆုံးဖြတ်ရလိမ့်မှာဖြစ်ပြီး အခြားပြင်ပအဖွဲ့တွေ ဆုံးဖြတ်လို့ မရဘူးလို့ ဖိလစ်ပိုင်သမ္မတ ဖာဒီနန်ရိုမူအာဒက် မားကိုစ်ဂျုနီယာက ပြောပါတယ်။ ဗုဒ္ဓဟူးနေ့က  တရုတ် ရုပ်သံ CGTN နှင့် အင်တာဗျူးအစီအစဉ်မှာ ဖိလစ်ပိုင်သမ္မတက ပြောဆိုခဲ့ခြင်းဖြစ်ပါတယ်။

သမ္မတမားကိုစ့်ဟာ တရုတ်သမ္မတ ရှီကျင့်ဖျင်ရဲ့ ဖိတ်ကြားချက်အရ တရုတ်နိုင်ငံကို အင်္ဂါနေ့မှကြာသပတေးနေ့အထိ (၃)ရက်ကြာ လာရောက်ခဲ့တဲ့ ခရီးစဉ်အတွင်း ဘေဂျင်းမြို့မှာ ရုပ်သံအင်တာဗျူးရိုက်ကူးခဲ့တာပါ။

Source CCTV+

#Philippines_China

#Ferdinand_Romualdez_Marcos_Jr

#Asia_Pacific_Politics

#DailyNews
Published_ 6 January 2023

၁။ ပြည်ပသို့ ပို့ကုန်တင်ပို့မှုမှ အမေရိကန်ဒေါ်လာ ၁ ဘီလီယံကျော်ပိုမိုရရှိထား

၂။ ကြက်သွန်နီဈေးနှုန်း အနည်းငယ်ပြန်တက်လာ

၃။ ရွှေစက်တော် ဘုရားပွဲတော်ကာလအတွင်း မင်းဘူး-ရွှေစက်တော် ခရီးသည်တင်မော်တော်ယာဉ်လိုင်း ပြေးဆွဲမည်

၄။ ပန်ဒါကြီးများအတွက် ပထမဆုံး DNA စစ်ဆေးကိရိယာအား တရုတ်တီထွင် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_News
Published 6 January 2023

ဗြိတိန်မှ အိန္ဒိယသို့ပျံသန်းလာတဲ့ လေယာဉ်ပေါ်မှာ နှစ်ကြိမ်တိုင်တိုင် နှလုံးရပ်သွားခဲ့တဲ့ခရီးသည်တစ်ဦးကို ဆရာဝန်တစ်ယောက်က အချိန် ၅ နာရီမျှကြာမြင့်တဲ့အထိ ကြိုးကြိုးစားစား ကယ်တင်ပေးခဲ့ပါတယ်။

ဒေါက်တာ'ဗစ်ရှ်ဝါရာဂျ်ဗီမယ်လာ'က သူ့အမေနဲ့အတူ ဘန်ဂလိုမြို့သို့ Air India လေကြောင်းလေယာဉ်ဖြင့် သွားနေစဉ် ခရီးသည်တစ်ဦးက လဲကျပြီး အသက်ရှူရပ်သွားခဲ့ပါတယ်။

ဘာမင်ဂမ်တက္ကသိုလ်ဆေးရုံမှ သွေးရောဂါအထူးကုအတိုင်ပင်ခံလည်းဖြစ်တဲ့ ဒေါက်တာက အသက် ၄၃ နှစ်အရွယ်အမျိုးသားကို ပြန်ပြီးအသက်ဝင်လာအောင် စတင်ကြိုးပမ်းခဲ့ပါတယ်။

"သူအသက်ပြန်ဝင်မလာခင် တစ်နာရီလောက်ကယ်ဆယ်ပြုစုလိုက်ရပါတယ်၊ လေယာဉ်ဝန်ထမ်းတွေမှာ ဆေးတွေဘာတွေရှိလားဆိုပြီး မေးမြန်းခဲ့ပါတယ်၊ ကံကောင်းစွာနဲ့ သူတို့မှာ အရေးပေါ်ဆေးပစ္စည်းရှိခဲ့ပြီး အသက်ပြန်ရှူလာအောင် ထောက်ပံ့ပေးနိုင်တဲ့ ပစ္စည်းတွေပါဝင်ခဲ့ပါတယ်" လို့ ပြောပြခဲ့ပါတယ်။

အောက်ဆီဂျင်နဲ့ အလိုအလျောက်နှလုံးဆွပေးတဲ့စက်သာရှိတာကြောင့် ခရီးသည်တွေဆီမှာ အထောက်အပံ့ပေးနိုင်မယ့်ပစ္စည်းရှိ/မရှိ မေးမြန်းခဲ့ပါတယ်။

အဲဒီမှာတော့ နှလုံးခုန်နှုန်းစောင့်ကြည့်စက်၊ သွေးပေါင်ချိန်တိုင်းကိရိယာ၊ နှလုံးခုန်နှုန်းတိုင်းတာစက်၊ ဂလူးကို့စ်မီတာတို့ဖြင့် လူနာရဲ့အရေးကြီးလက္ခဏာများကို စောင့်ကြည့်နိုင်ခဲ့ပါတယ်။

နောက်ထပ်တစ်ကြိမ် နှလုံးဖောက်ခဲ့ရာမှာတော့ ဒုတိယအကြိမ်ကယ်ဆယ်ဖို့ အချိန်ပိုပြီးကြာမြင့်ခဲ့ရပါတယ်။

"လေယာဉ်ပေါ်မှာ ၂ နာရီလောက်အထိ နှလုံးခုန်နှုန်း၊ သွေးပေါင်ချိန် ပုံမှန်မဟုတ်ဘဲဖြစ်နေပါတယ်၊ လေယာဉ်ဝန်ထမ်းတွေကပါ သူ့ကိုကယ်တင်ဖို့ ၅ နာရီလောက်ကြိုးစားခဲ့ကြပါတယ်၊ ခရီးသည်တွေလည်း အတော်ထိတ်လန့်ခဲ့ရပြီး ခံစားခဲ့ရပါတယ်" လို့ ပြောပြခဲ့ပါတယ်။

လေယာဉ်မှူးက ပါကစ္စတန်လေဆိပ်တစ်ခုမှာ ဆင်းသက်ဖို့ခွင့်တောင်းခဲ့ပေမယ့် ငြင်းပယ်ခံလိုက်ရပါတယ်။

ဒါကြောင့် မွမ်ဘိုင်းမှာဆင်းသက်ခဲ့ရပြီး အရေးပေါ်ကယ်ဆယ်ရေးဝန်ထမ်းများက အသင့်စောင့်ဆိုင်းနေကြပါတယ်။

"လေယာဉ်ဆိုက်တဲ့အချိန်မှာ ခရီးသည်လူနာက အသက်ပြန်ရှူလာနိုင်ပြီး ကျွန်တော်နဲ့စကားပြောနိုင်ပါပြီ၊ ဘယ်လိုပဲဖြစ်ဖြစ် ဆေးရုံကိုသွားပြီးစစ်ဆေးဖို့ တိုက်တွန်းခဲ့ပါတယ်" လို့ ဆိုပါတယ်။

"လူနာက မျက်ရည်တွေဝဲပြီး ကျေးဇူးတင်ကြောင်းပြောပါတယ်၊ အသက်ကယ်ပေးခဲ့တဲ့အတွက် အသက်ကြွေးတင်သွားပြီလို့ သူကပြောပါတယ်" လို့ ပြောပြပါတယ်။

"ဆေးပညာလေ့ကျင့်သင်ယူတုန်းက နှလုံးရပ်တာမျိုးကို စမ်းသပ်ပြုလုပ်ဖူးပေမယ့် အမြင့်ပေ ၄ သောင်းလောက်မှာတော့ တစ်ခါမှ မလုပ်ဖူးပါဘူး၊ တိုင်ပင်ခံတစ်ယောက်အနေနဲ့ ၇ နှစ်သက်တမ်းရှိလာတဲ့အချိန်မှာမှ ကျွန်တော်အသက်ကယ်နေတာကို အမေမျက်မြင်တွေ့ခဲ့ရတာဖြစ်ပြီး သူမအလွန်ငိုကြွေးရတဲ့အထိ ခံစားခဲ့ရပါတယ်"

Air India ကတော့ ဒီကိစ္စနဲ့ပတ်သက်ပြီး မှတ်ချက်မပြုသေးပါဘူး။

Source: South China Morning Post
#Yangon_Media_Group

#World_Health
Published 6 January 2023

အမျိုးသမီးတွေဟာ ကျား/မခွဲခြားမှုကိုသာကြုံတွေ့နေရတာ မဟုတ်ဘဲ စိတ်ဓာတ်ကျခြင်းပြဿနာမှာလည်း ကွာခြားနေပါသေးတယ်။

အမျိုးသမီးတွေက အကူအညီပိုပြီးလိုအပ်လေ့ရှိသလို အကြောင်းအမျိုးမျိုးကြောင့် စိတ်ဓာတ်ကျခြင်း ၂ ဆလောက်ပိုပြီးခံစားရတတ်ပါတယ်။
ဒီလိုဖြစ်ရတဲ့ အကြောင်းအရင်း ၇ မျိုးလောက်ရှိပါတယ်။

(၁) အမျိုးသမီးတွေက ဟော်မုန်းအပြောင်းအလဲများခြင်း
ယောကျ်ားဟော်မုန်း တက်စ်တိုစတီရုန်းက သိပ်ပြီးမပြောင်းလဲတတ်ပေမယ့် အမျိုးသမီးတွေကတော့ အပျိုဖော်ဝင်စအချိန်ကစပြီး အီစထရိုဂျင်နဲ့ ပရိုဂျက်စတီရုန်းဟော်မုန်းတွေ အပြောင်းအလဲများပါတယ်။

ကိုယ်ဝန်ဆောင်ချိန်အတွင်းနဲ့ ဆောင်ချိန်အပြီး ဟော်မုန်းနဲ့ပတ်သက်တဲ့ စိတ်ကျန်းမာရေးပြဿနာများ ခံစားရတာဖြစ်ပါတယ်။
ခံစားရပုံကို ချရေးခြင်းက အီစထရိုဂျင်ကဲ့သို့ဟော်မုန်းများတက်လာခြင်းနဲ့ ကျဆင်းခြင်းများ အဘယ်ကြောင့်ခံစားရနိုင်သလဲဆိုတာကို နားလည်ရန်အကူအညီဖြစ်စေပါတယ်။

(၂) မီးယပ်သွေးဆုံးခြင်းဖြင့် အကျိုးပြုဟော်မုန်းများကျဆင်းခြင်း
သွေးဆုံးချိန်မှာ အမျိုးသမီးတွေရဲ့ အီစထရိုဂျင်ဟော်မုန်းပမာဏက အတက်အကျကြမ်းပြီး ဓမ္မတာရပ်သွားချိန်မှာ လုံးဝရပ်တန့်သွားတတ်ပါတယ်။

အမျိုးသမီးတွေမှာ မိုနိုအေမင်းအောက်ဆီဒေ့စ်လို့ခေါ်တဲ့ ဦးနှောက်ပရိုတိန်းမြင့်တက်လာကာ ကောင်းကျိုးပြုဆယ်ရိုတိုနင်များ ပြိုကွဲကုန်ကာ စိတ်အခြေအနေထိန်းချုပ်ရခက်ခဲပါတယ်။

ဟော်မုန်းအစားထိုးကုထုံးဖြင့် အီစထရိုဂျင်နဲ့ ပရိုဂျက်စတီရုန်းပမာဏကို ထိန်းပေးပြီး ခံစားရသက်သာစေမှာ ဖြစ်ပါတယ်။

(၃) မှောင်လာသည့်အခါ စိတ်ဓာတ်ကျတတ်ခြင်း
ဆောင်းရာသီလိုမျိုးကာလတွေမှာ မှောင်လာတာနဲ့အမျှ အမျိုးသမီးတွေဟာ အမျိုးသားတွေထက် စိတ်ဓာတ်ကျခြင်းဖြစ်နိုင်ချေ ၄ ဆပိုများပါတယ်။

နေရောင်က ကောင်းကျိုးပြုဆယ်ရိုတိုနင် ပစ္စည်းထွက်ရှိစေကာ အမျိုးသမီးတွေမှာ ထိုပစ္စည်းနည်းပါးလေ့ရှိပါတယ်။

အပြင်ထွက်ခြင်းဖြင့် အလင်းရောင်ထိတွေ့စေကာ စိတ်ခံစားချက်ကောင်းမွန်စေမှာ ဖြစ်ပါတယ်။

(၄) အမျိုးသမီးများက ကောင်းစွာအိပ်မပျော်တတ်ခြင်း
အမျိုးသမီးတွေဟာ အမျိုးသားတွေထက် အိပ်မပျော်တဲ့အခြေအနေ ၄၀ ရာခိုင်နှုန်းပိုဖြစ်တတ်ပါတယ်။

ဒီအကြောင်းအရင်းတွေထဲမှာ အမျိုးသမီးဟော်မုန်းအတက်အကျဖြစ်ခြင်း၊ ဘေးကလူဟောက်ခြင်း၊ ညဘက်ကလေးတွေနိုးခြင်းတို့ကြောင့် ဖြစ်တတ်ပါတယ်။

(၅) အမျိုးသမီးများဟာ အားအင်ကုန်ခမ်းခြင်းပိုဖြစ်နိုင်ချေရှိခြင်း

အခုခေတ်မှာ အမျိုးသမီးတွေက အလုပ်ထွက်လုပ်တဲ့အပြင် ကလေးထိန်းခြင်း၊ အိမ်အလုပ်လုပ်ခြင်းတို့ပါ လုပ်လာကြရပါတယ်။

အလုပ်လုပ်တဲ့အခါ အမျိုးသားတွေလောက် အားအင်မရရှိဘဲ အလွယ်တကူစိတ်ပျက်လွယ်ခြင်း၊ ကူကယ်ရာမဲ့ခြင်းတို့ဖြစ်တတ်ကာ အားအင်ကုန်ခမ်းတတ်ကြပါတယ်။

(၆) အမျိုးသမီးများသည် ရောင်ရမ်းမှုပိုဖြစ်ခြင်း

ဦးနှောက်အစိတ်အပိုင်းအချို့ ရောင်ရမ်းကာ စိတ်ဓာတ်ကျခြင်းဖြစ်နိုင်ချေရှိပါတယ်။

သန့်စင်ထားတဲ့ဂျုံတွေ၊ ဈေးသက်သာတဲ့ဆီတွေ၊ သကြား၊ ကစီဓာတ်များစားသုံးခြင်းဖြင့် ရောင်ရမ်းခြင်းကိုဖြစ်စေပါတယ်။

ဒါကြောင့် လမ်းဘေးစာများစားသုံးခြင်းမပြုဘဲ အမျှင်ဓာတ်များများစားခြင်းဖြင့် ရောင်ရမ်းခြင်းကိုလျှော့ချပေးနိုင်မှာဖြစ်ပါတယ်။

(၇) အမျိုးသမီးများက မိမိကိုယ်ကိုစိတ်ပူတတ်ခြင်းနှင့် အပြစ်တင်တတ်ခြင်း

အမျိုးသားတွေက မကျေနပ်တဲ့အခါ အပြင်ဘက်မှာထုတ်ပြတတ်ပေမယ့် အမျိုးသမီးတွေကတော့ စိတ်ထဲမှာသာအောင်းနေတတ်ပါတယ်။
ကိုယ့်ကိုယ်ကိုအပြစ်မြင်ပြီးတော့ ဒီလိုကနေ စိတ်ဓာတ်ကျခြင်းဖြစ်လာတာ ဖြစ်ပါတယ်။

မိမိရဲ့စိတ်ကျန်းမာရေးကို စိတ်ပူနေတယ်ဆိုရင် ဆရာဝန်နဲ့ပြသသင့်ပါတယ်။

Source: The Sun Tomorrow
#Yangon_Media_Group

#World_Health
Published 6 January 2023

ခံတွင်းနှင့်သွားကျန်းမာရေးမှာ ဖလိုရိုက်က အလွန်အရေးပါပြီး ယနေ့ခေတ်အသုံးပြုတဲ့ ရေတွေကနေ ကလေးတွေအတွက် ဖလိုရိုက်မရရှိဘဲ ဖြစ်နေပါတယ်။

ကျန်းမာရေးဝန်ကြီးဌာနတွေကနေ ညွှန်ကြားနေပေမယ့် ကလေးတွေအတွက် သွားတိုက်ဆေးတွေမှာ သွားကိုကာကွယ်နိုင်လောက်တဲ့ ဖလိုရိုက်တွေ လုံလောက်စွာမပါဝင်ပါဘူး။

ကလေးတွေကို သွားကျန်းမာစေချင်တယ်ဆိုရင် တစ်နေ့သွား ၂ ခါတိုက်ရုံ၊ အချိုလျှော့စားခိုင်းရုံနဲ့ မလုံလောက်ပါဘူး။

ဖလိုရိုက်က သွားအပြင်ဘက်ဆုံးရှိ ကြွေလွှာပေါ်မှာ သတ္တုဓာတ်တွေစုပြုံလာခြင်းမှ ကာကွယ်ပေးပြီး ဘက်တီးရီးယားတွေကို တားဆီးပေးပါတယ်။

သောက်သုံးရေကနေတဆင့် ဖလိုရိုက်က ခန္ဓာကိုယ်ထဲ ဝင်ရောက်လာကာ သွားဖွံ့ဖြိုးနေချိန်ကနေစပြီး ကြွေလွှာကိုအားဖြည့်ပေးပါတယ်။

နောက်ပိုင်းမှာတော့ တံတွေးထဲမှာ ဖလိုရိုက်ထုတ်လုပ်ပြီး လုံလောက်စွာရှိတဲ့အခါ သွားတွေကိုဆက်ပြီးကာကွယ်ပေးပါတယ်။

သောက်သုံးရေတွေမှာ ဖလိုရိုက်ခပ်မယ်ဆိုရင် ကလေးတွေမှာ ခံတွင်းပြဿနာလျော့နည်းလာမှာဖြစ်ပါတယ်။

ကြွေလွှာတွေထိခိုက်တဲ့အခါ သွားပိုးစားခြင်းများပိုဖြစ်စေကာ မိသားစုအတွက် ကုသစရိတ်ပိုမိုကုန်ကျစေမှာ ဖြစ်ပါတယ်။

လေ့လာချက်များအရ သွားတိုက်ဆေးထဲမှာ ဖလိုရိုက်ပါဝင်မှု ၁,၀၀၀ PPM ထက်နည်းပါက သွားကျန်းမာရေးအတွက် မသင့်လျော်ပါဘူး။

ကလေးတွေမှာ ပထမဆုံးသွားစထွက်ကတည်းက ဖလိုရိုက် ၁,၀၀၀ PPM ပါဝင်တဲ့ သွားတိုက်ဆေးနဲ့ တိုက်လို့ရပါပြီ။

အသက် ၆ နှစ်အရွယ်ကျော်လာရင်တော့ ဖလိုရိုက် ၁,၄၀၀ PPM ပါဝင်တဲ့ သွားတိုက်ဆေးပြောင်းတိုက်သင့်ပါပြီ။

ညွှန်ကြားချက်များထုတ်ပြန်ထားပေမယ့် ထုတ်လုပ်တဲ့ကုမ္ပဏီတွေက ဖလိုရိုက်လုံလောက်စွာ မထည့်ကြပါဘူး။

သောက်သုံးရေထဲမှာ ဖလိုရိုက်မပါဝင်ဘူးဆိုရင် မိဘတွေအနေနဲ့ ကလေးတွေရဲ့သွားကိုကာကွယ်ဖို့အတွက် တစ်နေ့သွား ၂ ခါတိုက်ပေးပြီး ဖလိုရိုက်လုံလောက်စွာပါဝင်တဲ့ သွားတိုက်ဆေးတွေကို ဝယ်ယူသင့်ပါတယ်လို့ အကြံပြုလိုက်ပါတယ်။

Source: The Jerusalem Post
#Yangon_Media_Group

#World_Industry
Published 5 January 2023

မော်ရိုကိုနိုင်ငံမှ အာဂန်ဆီကို အလှကုန်လုပ်ငန်းတွေမှာ အလွန်တန်ဖိုးထားပေမယ့် အခုဆိုရင် သက်ကြီးရွယ်အိုလုပ်သားအများစုကသာ ထုတ်လုပ်နေကြတာကြောင့် ဘယ်လောက်ကြာအောင် ဆက်လက်ထုတ်လုပ်နိုင်မလဲဆိုတာ မေးခွန်းထုတ်စရာဖြစ်လာပါတယ်။

#Yangon_Media_Group