#World_News
Published 13 November 2023
ဟားမတ်စ်စစ်သွေးကြွများ အုပ်စိုးထားတဲ့ ဂါဇာကမ်းမြောင်ကို အစ္စရေးလ်တို့ ဆက်လက်တိုက်ခိုက်နေရာ ဂါဇာရှိ အကြီးဆုံးဆေးရုံကြီး လည်ပတ်မှုရပ်ဆိုင်းသွားပြီး လူနာများ သေဆုံးမှုနှုန်း မြင့်တက်နေကြောင်း WHO အကြီးအကဲက ပြောကြားလိုက်ပါတယ်။
ပါလက်စ်တိုင်း ဂါဇာမြောက်ပိုင်းရှိ ဆေးရုံများနဲ့ အယ်ရှီဖာအိမ်ရာတို့ကို အစ္စရေးလ်တပ်များ ဝန်းရံပိတ်ဆို့ထားပြီး ပြင်းထန်တဲ့ တိုက်ခိုက်မှုများကြား ဆေးရုံအထဲမှလူများကို မစောင့်ရှောက်နိုင်ဘဲ ဖြစ်နေကာ ရှီဖာမှာ မွေးကင်းစကလေး ၃ ဦးသေဆုံးပြီး လျှပ်စစ်ဓာတ်အား ပြတ်တောက်ခြင်းပြဿနာ ပိုမိုဆိုးရွားနေကြောင်း ဆေးဘက်ဆိုင်ရာ ဝန်ထမ်းတစ်ဦးက ဆိုပါတယ်။
အောက်တိုဘာ ၇ ရက်နေ့ အစ္စရေးလ်တောင်ပိုင်းကို ဝင်ရောက်တိုက်ခိုက်သွားတဲ့ ဟားမတ်စ်စစ်သွေးကြွတွေကို ချေမှုန်းနေတာဖြစ်ပြီး စစ်သွေးကြွတွေက ဆေးရုံအနီးနားနဲ့ အဆောက်အအုံအောက်တွေမှာ စစ်ဌာနစခန်းတွေ ထားရှိထားတယ်လို့ အစ္စရေးလ်တို့က ဆိုပါတယ်။
WHO က ရှီဖာမှ ကျန်းမာရေးပညာရှင်များနဲ့ စကားပြောခွင့်ရခဲ့ရာမှာ အဆက်မပြတ် တိုက်ခိုက်မှုများက လက်ရှိအခြေအနေကို ပိုမိုဆိုးရွားစေတယ်လို့ WHO အထွေထွေညွှန်ကြားရေးမှူး တက်ဒရိုစ်အက်ဒါနွမ်ဂေဘရီယဲဆပ်စ်က ပြောပြသွားပါတယ်။
ချက်ချင်းအပစ်အခတ်ရပ်စဲရန် အခြားကုလသမဂ္ဂ ထိပ်သီးအရာရှိများနည်းတူ တက်ဒရိုစ်ကလည်း တောင်းဆိုလိုက်ကာ ဆေးရုံတွေမှာ သေကြေပျက်စီးမှု ဖြစ်နေရတာကို ကမ္ဘာက နှုတ်ဆိတ်မနေသင့်ကြောင်း ပြောပြခဲ့ပါတယ်။
အောက်တိုဘာ ၇ ရက်နေ့က ဟားမတ်စ်စစ်သွေးကြွများ ဖမ်းဆီးခေါ်ဆောင်သွားတဲ့ ဓားစာခံ ၂၀၀ ကျော် လွတ်မြောက်နိုင်ရန် ကြိုးပမ်းနေကြောင်း အစ္စရေးလ်ဘက်က ဆိုပါတယ်။
ဂါဇာမှာ ဆေးရုံတွေနဲ့ အရပ်သားတွေကို လူသားဒိုင်းအဖြစ် အသုံးချနေတဲ့ ဟားမတ်စ်တွေကို ဥရောပသမဂ္ဂက ရှုတ်ချလိုက်ကာ အရပ်သားများ မထိခိုက်အောင် အတတ်နိုင်ဆုံး ထိန်းသိမ်းပေးဖို့ အစ္စရေးလ်ကို တိုက်တွန်းနေပါတယ်။
ဟားမတ်စ်တို့ ဆေးရုံတွေနဲ့ လူနေအရပ်တွေမှာ တိုက်ခိုက်ရေးသမားတွေ လက်နက်တွေ ထားရှိတာဟာ စစ်ပွဲဥပဒေကို ချိုးဖောက်ရာကျတယ်လို့ အိမ်ဖြူတော် အမျိုးသားလုံခြုံရေး အကြံပေး ဂျိတ်ခ်ဆာလီဗန်က ပြောပါတယ်။
အပြစ်မရှိတဲ့ အရပ်သားတွေ ဆေးကုသမှုခံယူနေတဲ့ ဆေးရုံတွေ ပစ်ခတ်ခံရပြီး ပျက်စီးနေကြတာကို အမေရိကန်က မမြင်ချင်တာကြောင့် အစ္စရေးလ် ကာကွယ်ရေးတပ်များနဲ့ တိုင်ပင်ဆွေးနွေးနေတယ်လို့ ပြောပြခဲ့ပါတယ်။
မွေးကင်းစကလေးတွေကို ရွှေ့ပြောင်းရန်နဲ့ ရှီဖာဝင်ပေါက်မှာ လောင်စာဆီ ၃၀၀ လီတာ ထားရှိဖို့ကို ဟားမတ်စ်တို့က ပိတ်ပင်ခဲ့တယ်လို့ အစ္စရေးလ်စစ်တပ်ဘက်က ဆိုပါတယ်။
ဓာတ်အားမလုံလောက်တာကြောင့် ကလေးတွေကို ဖန်ပေါင်းအိမ်ထဲမှာ မထားနိုင်ဘဲ သာမန်အိပ်ရာတွေမှာပဲ ထားနေရကာ နေ့စဥ်နဲ့အမျှ သေဆုံးမှုတွေ ပိုမိုမြင်တွေ့ရနိုင်တယ်လို့ ဆရာဝန်တစ်ဦးက ပြောပြသွားပါတယ်။
#World_News #အစ္စရေးလ်တိုက်ခိုက်မှု #ဂါဇာ၏အကြီးဆုံးဆေးရုံ #Source: Reuters
#World_Health
Published 13 November 2023
ကလေးတွေ မျက်မှန်တပ်ဖို့ လိုအပ်ပြီလားဆိုတာကို သိရဖို့ လက္ခဏာ ၈ ရပ်ကို မျက်လုံးပညာရှင်တစ်ဦးက ဖော်ပြသွားပါတယ်။
ကလေးတွေ မျက်လုံးပြဿနာ မတွေ့ရဘူးဆိုရင် မျက်စိစစ်ဆေးဖို့ မလိုအပ်ဘူးလို့ မိဘတွေ ထင်နေကြပေမယ့် အစောပိုင်းအရွယ်ကတည်းက စစ်ဆေးသင့်ပါပြီ။
လူတွေရဲ့ လေ့လာသင်ယူနိုင်စွမ်း၊ ဦးနှောက်စွမ်းရည်၊ ပေါင်းသင်းဆက်ဆံရေးတို့ရဲ့ ၈၀ ရာခိုင်နှုန်းလောက်ဟာ အမြင်အာရုံကနေ လုပ်ဆောင်ကြတယ်လို့ ဂျီလက်စ်အက်ဒ်မန်က ဆိုပါတယ်။
အချို့သော မျက်လုံးပြဿနာတွေက စောစီးစွာသိရှိပါက ထိရောက်စွာ ကုသနိုင်မှာဖြစ်တယ်လို့ ဆိုပါတယ်။
ဒါကြောင့် ကလေးတွေမှာ မျက်လုံးပြဿနာဖြစ်နေပြီဆိုတာကို အရိပ်အကဲသိနိုင်မယ့် နည်းလမ်းကို ၈ မျိုးကို ဖော်ပြလိုက်ပါတယ်။
(၁) မျက်လုံးပွတ်ခြင်းဟာ မျက်စိညောင်းညာနေပြီဆိုတာကို ဖော်ပြနေပြီး တစ်ခုခုကို အာရုံစိုက်ကြည့်နေရင်း အမြင်အာရုံ လွဲမှားတာမျိုးကြောင့် ဖြစ်နိုင်ပါတယ်။
(၂) စာဖတ်ရာမှာ မနည်းအားယူပြီး ဖတ်နေရတယ်ဆိုရင် မျက်လုံးပြဿနာအမျိုးမျိုး ဖြစ်နိုင်ကာ ကြည့်ရှုစရာတွေကို မျက်လုံးနဲ့ အနည်းငယ်ဝေးကွာတဲ့ အနေအထားမှာထားပြီး ဖတ်ခြင်းက သက်သာစေနိုင်ပါတယ်။
(၃) တစ်ခုခုကို ကြည့်ရှုရာမှာ အားစိုက်ပြီး ကြည့်နေရတာဟာ မျက်လုံးမှာ ပြဿနာဖြစ်နေတာကို ညွှန်ပြနေပါတယ်။
(၄) စာဖတ်တဲ့အခါ မျက်လုံးနားတဝိုက်က ကြွက်သားတွေ ပင်ပန်းစေပြီး ခေါင်းကိုက်တာမျိုး ဖြစ်တတ်ပါတယ်။
(၅) ကလေးဟာ တီဗီအနီးကိုသွားပြီး ကြည့်နေတယ်ဆိုရင် အတိအကျမမြင်ရတာကြောင့် ဖြစ်ပြီး ဒီလိုကြည့်ခြင်းဟာ မျက်လုံးပိုမိုအားစိုက်ရပါတယ်။
(၆) စာဖတ်ရာမှာ ခေါင်းစောင်းပြီး ဖတ်လေ့ရှိတယ်ဆိုရင် အမြင်အာရုံမှာ ပြဿနာရှိနေပါပြီ။
(၇) စာသင်ခန်းရဲ့ ရှေ့ဆုံးတန်းမှာ ထိုင်ခြင်းက သေချာမမြင်ရလို့ ထိုင်ရတာဖြစ်ပါတယ်။
(၈) မျက်လုံးတစ်ဖက်ပိတ်လေ့ရှိတယ်ဆိုရင် ကလေးတွေမှာ အမြင်အာရုံ ပြဿနာဖြစ်နေတာကို ညွှန်ပြပါတယ်။
#World_Health #သင့်ကလေးမျက်မှန်တပ်ရန် #လက္ခဏာများ #Source: New York Post
#World_Science
Published 13 November 2023
၁၉၇၈ နောက်ပိုင်းကတည်းက ဂရင်းလန်းရေခဲကျောက်ဆောင်တွေဟာ ၃ ပုံ ၁ ပုံကျော်တဲ့အထိ ပျောက်ကွယ်လာကြောင်း သုတေသီများ ဖော်ပြခဲ့ကြပါတယ်။
သမုဒ္ဒရာရေများ ပူနွေးလာခြင်းကြောင့် ရေခဲကျောက်ဆောင် အောက်ခြေကနေ အရည်ပျော်လာပြီး ပြိုကျလာကာ ရေခဲကျောက်ဆောင်တွေ အရှိန်အဟုန်မြန်မြန်ဖြင့် ပျက်စီးလာတာ ဖြစ်ပါတယ်။
ဂရင်းလန်းမြောက်ပိုင်း ရေခဲမြစ်များကို ထောက်ပံ့ထားတဲ့ ရေခဲကျောက်ဆောင် ၈ ခုထဲက ၃ ခုဟာ လုံးဝပြိုလဲသွားပြီဖြစ်ပြီး ကျန်တဲ့ ၅ ခုဟာလည်း အလျင်အမြန် အရည်ပျော်နေပါတယ်။
သမုဒ္ဒရာရေများ ပူနွေးလာခြင်းကြောင့် ရေခဲကျောက်ဆောင်များ အလျင်အမြန် အရည်ပျော်လာပြီး ကမ္ဘာ့ပင်လယ်ရေမျက်နှာပြင် မြင့်တက်လာမယ့် အန္တရာယ်ရှိနေပါတယ်။
ပြင်သစ် သိပ္ပံသုတေသန စင်တာမှ ပညာရှင်များ ပြောပုံအရ အဆိုပါ ရေခဲကျောက်ဆောင်အားလုံး လုံးဝအရည်ပျော် ပျောက်ကွယ်သွားပါက ကမ္ဘာ့ပင်လယ်ရေမျက်နှာပြင် ၆.၈ ပေ မြင့်တက်လာနိုင်ဖွယ် ရှိနေပါတယ်။
ဒါတွေဟာ ဂရင်းလန်းရဲ့ အကြီးဆုံးရေခဲမြစ်များ ဖြစ်ပြီး အရေးကြီးဆုံး ရေခဲပြင်တွေထဲမှာ ပါဝင်ကြောင်း ဂရီနိုဘယ်အဲ့ပ်စ်တက္ကသိုလ်မှ ရေခဲမြစ်ပညာရှင် ရိုမိန်းမီလန်က CNN ကို ပြောပြခဲ့ပါတယ်။
ရေခဲကျောက်ဆောင်တွေ ယခင်နဲ့ ယခုပြောင်းလဲမှုတွေအကြောင်း ပိုမိုသိရှိစေရန် မီလန်နဲ့အဖွဲ့က ဂြိုဟ်တုပုံရိပ်များ၊ ကွင်းပြင်နဲ့ ရာသီဥတုပုံစံ အတိုင်းအတာများကို အသုံးပြုခဲ့ပါတယ်။
၁၉၇၈ နောက်ပိုင်း ဂရင်းလန်းမြောက်ပိုင်း ရေခဲမြစ်များကို ထောက်ပံ့ထားတဲ့ ရေခဲကျောက်ဆောင် စုစုပေါင်းထုထည်ရဲ့ ၃၅ ရာခိုင်နှုန်းကျော်ဟာ အရည်ပျော်လာပါတယ်။
#World_Science #ဂရင်းလန်း #ရေခဲကျောက်ဆောင် #(၃)ခုပြိုလဲ #Source: WION
၁၂ နိုဝင်ဘာ ၂၀၂၃
ဟားမာ့စ်ရဲ့ ဒုံးကျည်တွေကို ကြားဖြတ်ဟန့်တားနိုင်ဖို့ အစ္စရေးက ယင်းရဲ့နိုင်ငံတောင်ပိုင်းမှာ “ သံမဏိလိပ်ခုံး” လို့ အမည်ပေးထားတဲ့ ဒုံးကျည်ဖျက်စနစ်ကို ယာယီတပ်ဆင်နေရာချထားလိုက်ပါတယ်။
ဒုံးကျည်တိုက်ဖျက်ရေးစနစ်တပ်ဆင်ထားတဲ့နေရာဟာ ဂါဇာကမ်းမြောင်မှ ၁၅ ကီလိုမီတာခန့်အကွာမှာရှိပါတယ်။ အဆိုပါ ဒုံးကျည်ဖျက်စနစ်ကို ဒေါင်လိုက်တပ်ဆင်ထားတာဖြစ်ပါတယ်။ “သံမဏိလိပ်ခုံး” ရဲ့ ရေဒါစနစ်ကိုတော့ အနီးက ထရပ်တစ်စီးအပေါ်မှာ တပ်ဆင်ထားပါတယ်။
#World_Health
Published 12 November 2023
ဆီးချိုရောဂါ ဒုတိယအမျိုးအစား ဖြစ်လာမှာကို စိုးရိမ်နေတဲ့သူတွေ အနေနဲ့ သကြားကိုသာ စိတ်ပူသင့်တာ မဟုတ်ပါဘူး။
ဆားအလွန်အကျွံ စားသုံးတာကလည်း ဆီးချိုရောဂါ ဖြစ်လာနိုင်ခြေကို မြင့်မားစေကြောင်း လေ့လာချက်တစ်ခုမှာ တွေ့ရှိထားပါတယ်။
ဗြိတိန်ဘိုင်အိုဘဏ်မှာ စာရင်းသွင်းထားတဲ့ လူပေါင်း ၄ သိန်းကျော်မှာ ဆားစားသုံးမှုနဲ့ ပတ်သက်ပြီး စစ်တမ်းကောက်ယူ လေ့လာခဲ့ပါတယ်။
အချိန် ၁၁.၈ နှစ်ကြာ လေ့လာခဲ့ရာမှာ ဆီးချိုဖြစ်ပွားသူ ၁၃,၀၀၀ ကျော်ရှိခဲ့ပါတယ်။
ဆားကို တစ်ခါတရံ၊ များသောအားဖြင့်၊ အမြဲတမ်း စားသုံးလေ့ရှိသူတွေဟာ ဆားကို မစားတဲ့သူတွေနဲ့ယှဥ်ရင် ဆီးချိုဖြစ်နိုင်ခြေ ၁၃၊ ၂၀ ၊ ၃၉ ရာခိုင်နှုန်း အသီးသီး ပိုများနေပါတယ်။
ဆားကို လျှော့ချစားသုံးပါက နှလုံးသွေးကြောရောဂါနဲ့ သွေးတိုးရောဂါတို့ ဖြစ်နိုင်ခြေနည်းစေတာကို သိရှိထားပြီးဖြစ်ပေမယ့် ဆီးချိုရောဂါနဲ့လည်း ဆက်စပ်နေတာကိုတော့ ပထမဆုံးအကြိမ် တွေ့ရှိခဲ့တာဖြစ်ကြောင်း တူလိန်းတက္ကသိုလ်မှ သုတေသနပြုစုသူ ဒေါက်တာလုကျီက ပြောပြသွားပါတယ်။
ဆားအများအပြား စားသုံးခြင်းက ဆီးချိုရောဂါ ဖြစ်နိုင်ခြေနဲ့ တိုက်ရိုက်ဆက်စပ်နေတာကို ထပ်မံလေ့လာဖို့ လိုအပ်သေးပေမယ့် ဆားပါတဲ့အခါ စားစရာကို များစွာစားမိကာ အဝလွန်ခြင်းနဲ့ ရောင်ရမ်းခြင်းတို့ ဖြစ်လာနိုင်စေပါတယ်။
မကြာခဏ ဆားစားသုံးခြင်းနဲ့ BMI ၊ ခါးမှတင်အတိုင်းအတာအချိုးတို့ကြား ဆက်စပ်မှုကို တွေ့ရှိထားပါတယ်။
ဆားသုံးစွဲမှု လျှော့ချရန် လက်တွေ့စမ်းသပ်မှုများ ပြုလုပ်ဖို့ အရေးကြီးကြောင်းကိုလည်း ဒေါက်တာလုကျီက ပြောပြသွားပါတယ်။
လူတွေအနေနဲ့ ဆားအစားထိုးပစ္စည်းများဖြင့် အနံ့အရသာ ဖန်တီးဖို့ကြိုးစားရန် အကြံပြုလိုက်ပါတယ်။
ရိုးရှင်းစွာ ပြောင်းလဲအသုံးပြုရုံဖြင့် ကျန်းမာရေးအပေါ် သိသာစွာ အကျိုးပြုနိုင်မှာ ဖြစ်ပါတယ်။
#World_Health #ဆီးချိုရောဂါ #သကြားအပြင်အခြားပစ္စည်းတစ်မျိုး #Source: India Today
#World_Health
Published 12 November 2023
နေ့စဥ်သုံး ကိုယ်ဝန်တားဆေးတွေဟာ ဆုံးဖြတ်ချက်ချခြင်းနဲ့ စိတ်ထိန်းချုပ်ခြင်းတို့ကို ဆောင်ရွက်ပေးတဲ့ ဦးနှောက် အစိတ်အပိုင်းတွေကို ပါးလွှာစေနိုင်ကြောင်း ကနေဒါမှ သုတေသနအသစ်မှာ တွေ့ရှိထားပါတယ်။
အသက် ၁၅ နှစ်မှ ၄၉ နှစ်ကြား အမေရိကန်အမျိုးသမီးများရဲ့ ၃ ပုံ ၂ ပုံခန့်သုံးစွဲနေကြတဲ့ ကိုယ်ဝန်တားဆေးများရဲ့ ဦးနှောက်အပေါ် သက်ရောက်မှုများကို လေ့လာခဲ့ကြတာ ဖြစ်ပါတယ်။
သဘာဝအရရော ဓာတုနည်းလမ်းများအရ ထုတ်လုပ်ထားတဲ့ ဟော်မုန်းတွေရဲ့ အခန်းကဏ္ဍကို မွန်ထရီယယ်တက္ကသိုလ်မှ သုတေသီများက စူးစမ်းရှာဖွေခဲ့ကြပါတယ်။
တားဆေးသောက်သုံးနေခဲ့ပြီး ရပ်တန့်လိုက်တဲ့ အမျိုးသမီးများ၊ လုံးဝမသောက်သုံးဖူးသူများ ပါဝင်တဲ့ အသက် ၂၃ နှစ်မှ ၃၅ နှစ်ကြားအမျိုးသမီး ၁၃၉ ဦးကို အမျိုးသား ၄၁ ဦးနဲ့ နှိုင်းယှဥ်ခဲ့ကြပါတယ်။
ထိုအခါမှာ တားဆေးအသုံးပြုတဲ့ အမျိုးသမီးများက စိတ်ခံစားချက် ထိန်းချုပ်မှုအပိုင်းကို လုပ်ဆောင်ပေးတဲ့ ဦးနှောက် အစိတ်အပိုင်းနေရာမှာ ပိုမိုပါးလွှာနေကြောင်း သုတေသန ပြုစုသူ အဲလက်ဇန်ဒရာဘရိုင်လဒ်က ပြောပြသွားပါတယ်။
ဦးနှောက် အစိတ်အပိုင်း ပါးလွှာတဲ့အခါ စိတ်ခံစားမှုထိန်းချုပ်တဲ့အပိုင်း ချို့ယွင်းလာတာလို့ မှတ်ချက်ပြုထားပါတယ်။
ဒါပေမဲ့ တားဆေးအသုံးပြုခြင်း ရပ်တန့်လိုက်တဲ့အခါ ပါးလွှာခြင်းက ပုံမှန်ပြန်ဖြစ်သွားပါတယ်။
သုတေသနရဲ့ ရည်ရွယ်ချက်က ဆေးရဲ့သက်ရောက်မှုကို တန်ပြန်ရန်မဟုတ်ဘဲ ဦးနှောက်အပေါ် သက်ရောက်မှုကို သိရှိနားလည်ရန် အရေးကြီးကြောင်းကို ဖော်ပြချင်တာ ဖြစ်တယ်လို့ ဆိုပါတယ်။
အမျိုးသမီးတွေရဲ့ ကျန်းမာရေးမှာ သိပ္ပံနည်းကျ စိတ်ဝင်စားမှုများလာစေရန်၊ အသက်ငယ်ရွယ်ချိန်မှာ ကိုယ်ဝန်တားဆေး အသုံးပြုခြင်းနဲ့ ဦးနှောက်ဖွံ့ဖြိုးမှုတို့အကြောင်း သိရှိစေရန် ဖြစ်ပါတယ်လို့ ဆိုပါတယ်။
ဆယ်ကျော်သက်အရွယ်မှာ တားဆေးစတင်အသုံးပြုတဲ့ မိန်းကလေးတွေမှာ စိတ်ဓာတ်ကျဝေဒနာ ဖြစ်နိုင်ခြေများတယ်လို့လည်း ယခင်သုတေသနမှာ တွေ့ရှိဖူးပါတယ်။
ဆေးအသုံးပြုခြင်း ရပ်ဆိုင်းလိုက်တာနဲ့ သူတို့ရဲ့ မိတ်ဖက်ကြိုက်နှစ်သက်ပုံတွေ၊ စိတ်ဝင်စားမှုတွေ ပြောင်းလဲသွားတယ်လို့ သိရပါတယ်။
မူးဝေအော့အန်ခြင်း၊ ကိုယ်အလေးချိန်တက်ခြင်း၊ စိတ်ပြောင်းလဲခြင်းတို့ ဖြစ်တတ်တယ်ဆိုတာကို သိရှိကြပေမယ့် စိတ်ခံစားချက်များနဲ့ လိုအင်ဆန္ဒများအပေါ် သက်ရောက်တယ်ဆိုတာတော့ မသိခဲ့ကြပါဘူး။
#World_Health #ကိုယ်ဝန်တားဆေး #ဦးနှောက်ကိုပြောင်းလဲစေနိုင် #Source: New York Post
အရှေ့တောင်အာရှရဲ့ အကြီးဆုံးရေပေါ် ဆိုလာစက်ရုံကြီးကို အင်ဒိုနီးရှားသမ္မတ ဂျိုကိုဝီဒိုဒိုက ကြာသပတေးနေ့မှာ ဖွင့်ပွဲကျင်းပခဲ့ပါတယ်။
#Asia_Development
Published_ 11 November 2023
#အင်ဒိုနီးရှားသမ္မတ #ဆိုလာစက်ရုံဖွင့်ပွဲ
Page 270 of 826
