#World_News
Published 15 March 2024

သမ္မတဗလာဒီမာပူတင်ရဲ့ ရုရှားဟာ ယူကရိန်းတပ်တွေကို အနိုင်ရလာပါက ယူကရိန်းမှာတင် ရပ်တန့်သွားမှာမဟုတ်တဲ့ ပြိုင်ဘက်ရန်သူဖြစ်တယ်လို့ ပြင်သစ်သမ္မတ အီမန်နျူရယ်မက်ခရွန်က သတ်မှတ်လိုက်ပြီး ဥရောပတွေအနေနဲ့ ပျော့ညံ့မနေဘဲ တုန့်ပြန်နိုင်ရန် အသင့်ပြင်ဆင်ထားသင့်ကြောင်း တိုက်တွန်းလိုက်ပါတယ်။

အနာဂတ်မှာ ယူကရိန်းနိုင်ငံအတွင်း ပြင်သစ်တပ်များ နေရာချသွားဖို့အကြောင်းကို ထည့်မစဥ်းစားလို့မရဘူးလို့ မက်ခရွန်က ပြီးခဲ့တဲ့လမှာ အငြင်းပွားစရာ ပြောကြားခဲ့ရာ ခေါင်းဆောင်အများအပြားက ထောက်ခံခြင်းမရှိသလို အချို့ကတော့ ထောက်ခံကြောင်း ထုတ်ဖော်ခဲ့ကြပါတယ်။

ရုရှားသာ စစ်ပွဲအနိုင်ရပါက ဥရောပအပေါ် လူအများယုံကြည်မှု ရှိတော့မှာမဟုတ်ကြောင်း မက်ခရွန်က ရုပ်သံအင်တာဗျူးတစ်ခုမှာ ပြောပြသွားပါတယ်။

မက်ခရွန်က အတိုက်အခံခေါင်းဆောင်များနဲ့ အပြင်းအထန် သဘောမတူညီကြောင်း၊ ယူကရိန်းကို ထောက်ပံ့ဖို့ ကန့်ကွက်မဲပေးတာမျိုးနဲ့ ကြားနေမဲပေးခြင်းတို့ဟာ ငြိမ်းချမ်းရေးရစေမှာ မဟုတ်ဘဲ ရှုံးနိမ့်ရာလမ်းစဥ်ပဲ ဖြစ်တယ်လို့ ပြောပြသွားပါတယ်။

မက်ခရွန်အစိုးရရဲ့ လက်ယာစွန်းရောက် အဓိကအတိုက်အခံပါတီ မရင်းလီပင်က ယူကရိန်းနဲ့ လက်မှတ်ရေးထိုးတဲ့ လုံခြုံရေးသဘောတူညီချက်နဲ့ ပတ်သက်ပြီး ပါလီမန်မှာ ကြားနေမဲ ပေးခဲ့တာဖြစ်ပြီး လက်ဝဲနိုင်ငံရေး အန်ဘိုးပါတီကတော့ ဆန့်ကျင်မဲ ပေးခဲ့ပါတယ်။

ဥရောပမှာ စစ်ဖြစ်ခဲ့ရင် ရုရှားကိုအပြစ်တင်ရမှာ ဖြစ်ပေမယ့် တုန့်ပြန်ခြင်းမရှိဘဲ ပျော့ညံ့နေဖို့ ဆုံးဖြတ်မယ်ဆိုရင်တော့ အရှုံးကိုရွေးချယ်ပြီးသား ဖြစ်ကြောင်း၊ ဒီလိုမျိုး အဖြစ်မခံနိုင်ကြောင်း ဆိုလိုက်ပါတယ်။

ရုရှားက ပြင်သစ်နိုင်ငံတွင်းနဲ့ ပြင်ပတို့မှာ ပြင်သစ်အကျိုးစီးပွားတွေကို လိုက်ပြီးတိုက်ခိုက်နေပေမယ့် ပြင်သစ်ကတော့ ရုရှားကို ဘယ်တော့မှ စတင်တိုက်ခိုက်မှာ မဟုတ်ဘူးလို့လည်း ပြောပါတယ်။

နျူကလီးယား တိုက်ခိုက်မှုတွေနဲ့ ပူတင်ခြိမ်းခြောက်နေတာဟာ မသင့်လျော်ဘူးလို့ အပြစ်တင်လိုက်ပါတယ်။

ယူကရိန်းဟာ စစ်မြေပြင်မှာ အခြေအနေ ခက်ခဲနေပြီး မဟာမိတ်များထံမှ ထောက်ပံ့မှုများ ပိုမိုလိုအပ်နေပါတယ်။

ရုရှားသမ္မတနဲ့ တစ်နေ့နေ့မှာ ငြိမ်းချမ်းရေး ဆွေးနွေးနိုင်မယ်လို့ မက်ခရွန်က မျှော်လင့်နေပါတယ်။

#World_News #ယူကရိန်းကိုရုရှားအနိုင်ရ #ဥရောပအနေဖြင့်အသင့်ပြင်ထား #Source: Reuters

#World_Health
Published 15 March 2024

အမျိုးသမီးများ အသက် ၅၀ ဝန်းကျင်မှာ ဓမ္မတာဆုံးခြင်း ဖြစ်ပွားလေ့ရှိပါတယ်။

ထိုအချိန်မှာ တစ်ဦးနဲ့တစ်ဦး ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ လက္ခဏာတွေ ခံစားရတာ မတူညီကြပါဘူး။

ပုံမှန်မဟုတ် ဓမ္မတာလာခြင်း၊ မိန်းမကိုယ် ခြောက်သွေ့ခြင်း၊ စိတ်အပြောင်းအလဲဖြစ်ခြင်း၊ အသားအရေ ပူစပ်ခြင်း၊ ကိုယ်အလေးချိန်တက်ခြင်း၊ ဇီဝကမ္မဖြစ်စဥ် မကောင်းခြင်း၊ အိပ်ပျော်ရန် ခက်ခဲခြင်းတို့က အဖြစ်များတဲ့ လက္ခဏာတွေ ဖြစ်ပါတယ်။

အချို့သော အာဟာရဓာတ်များ ဖြည့်စွက်ပေးခြင်းဖြင့် ထိုလက္ခဏာများ သက်သာစေရန် အကူအညီဖြစ်စေပါတယ်။

 
(၁) ဖောလိတ်

ဓမ္မတာဆုံးတဲ့ ကာလအတွင်း ပြောင်းလဲမှုများကို ဖောလိတ်က သက်သာစေရန် အကူအညီဖြစ်စေပြီး ပူစပ်ခြင်းနဲ့ စိတ်အပြောင်းအလဲ ဖြစ်ခြင်းတို့ကို သက်သာစေပါတယ်။

 
(၂) ဗိုက်တာမင်-ဘီ၁၂

ဘီ၁၂ က အားအင်ထုတ်လုပ်ခြင်းနဲ့ အာရုံကြောလုပ်ဆောင်ချက်တို့ကို ထောက်ပံ့ပေးရာမှာ အရေးပါပြီး ဓမ္မတာဆုံးခြင်းကာလမှာ အလွန်ပင်ပန်းနွမ်းနယ်နေရင် ဘီ၁၂ ထည့်သွင်းစားသုံးသင့်ပါတယ်။

 
(၃) မဂ္ဂနီဆီယမ်

မဂ္ဂနီဆီယမ်ကြွယ်ဝတဲ့ အစားအစာတွေက အိပ်စက်ခြင်းကို ထောက်ပံ့ပေးပြီး စိတ်ကျခြင်း၊ စိတ်အပြောင်းအလဲ ဖြစ်ခြင်းတို့ကို သက်သာစေကာ နှလုံးကျန်းမာရေးကို ကောင်းမွန်စေပါတယ်။

 
(၄) ကယ်လ်စီယမ်

ဓမ္မတာဆုံးပြီးနောက် အမျိုးသမီးတွေဟာ အရိုးပွရောဂါ ခံစားရနိုင်ဖွယ်ရှိတာကြောင့် ကယ်လ်စီယမ်ကြွယ်ဝတဲ့ အစားအစာတွေကို လုံလောက်စွာ စားသုံးသင့်ပြီး အရိုးကျန်းမာရေး ကောင်းမွန်အောင် ထိန်းသိမ်းသင့်ပါတယ်။

 
(၅) ဗိုက်တာမင်-ဒီ

ဗိုက်တာမင်-ဒီက ခန္ဓာကိုယ်ထဲမှာ ကယ်လ်စီယမ်စုပ်ယူမှုကို အားကောင်းစေပြီး စိတ်ကျခြင်းတို့ကို သက်သာစေပါတယ်။

#World_Health #အမျိုးသမီးဓမ္မတာဆုံးခြင်း #သက်သာစေမည့်အာဟာရဓာတ်(၅)မျိုး #Source: DoctorNDTV

အီရန်နိုင်ငံမှသဘာဝဓာတ်ငွေ့ဖိအားတိုးမြှင့်ထုတ်လုပ်ရန် ကန်ထရိုက်တာများနှင့်ရေနံဝန်ကြီးဌာနတို့သဘောတူလက်မှတ်ရေးထိုး

အီရန်ရေနံနှင့် သဘာဝဓာတ်ငွေ့ဝန်ကြီးဌာနက ကာတာနဲ့ ပူးတွဲလုပ်ဆောင်နေတဲ့ South Pars ဓာတ်ငွေ့ကွင်းပြင်ကြီးမှာ ဖိအားတိုးမြှင့်ထုတ်လုပ်ရန်အတွက် ပြည်တွင်းကန်ထရိုက်တာများနဲ့ အဓိက သဘောတူစာချုပ်များကို တနင်္ဂနွေနေ့က လက်မှတ်ရေးထိုးခဲ့ပါတယ်။
#World_News
Published_ 14 March 2024
#အီရန်နိုင်ငံမှသဘာဝဓာတ်ငွေ့ #ကန်ထရိုက်တာများနှင့်ရေနံဝန်ကြီးဌာန
#YMG_News #Yangon_Times #Yangon_Media_Group

#Daily_News
Published_ 14 March 2024

၁။ ၂၀၂၆ ကမ္ဘာ့ဖလားခြေစစ်ပွဲမြန်မာ-ဆီးရီးယားပွဲစဥ် ရက်ပိုင်းအတွင်းကန်မည်၊ သုဝဏ္ဏကွင်းနှင့်ရုပ်သံလိုင်း၌တိုက်ရိုက်ကြည့်ရှုနိုင်

၂။ ပို့ကုန်မူဝါဒဖြေလျော့ပေးသည့်အတွက် ပြောင်းဈေးအနည်းငယ်ပြန်တက်

၃။ တညင်းကုန်းလက်ကားဈေးတွင် မကြာခင်ဖွင့်လှစ်တော့မည့် ဈေးရုံအမှတ်(၅) ရှိ ဆိုင်ခန်းနေရာများကို မတ်လ ၁၇ ရက်တွင် မဲနှိုက်ရွေးချယ်ပေးသွားမည်ဟုဆို

၄။ အီရန်နိုင်ငံမှသဘာဝဓာတ်ငွေ့ဖိအားတိုးမြှင့်ထုတ်လုပ်ရန် ကန်ထရိုက်တာများနှင့်ရေနံဝန်ကြီးဌာနတို့ သဘောတူလက်မှတ်ရေးထိုး ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

#World_News
Published 14 March 2024

နေတိုး(NATO) မဟာမိတ်အဖွဲ့ထဲသို့ ဝင်ရောက်ပူးပေါင်းလိုက်ပြီဖြစ်တဲ့ ဖင်လန်နိုင်ငံနယ်စပ်အနီးမှာ တပ်ဖွဲ့များနဲ့ တိုက်ခိုက်ရေးစနစ်များ ဖြန့်ကျက်ထားရှိသွားမယ်လို့ ရုရှားသမ္မတ ဗလာဒီမာပူတင်က ဗုဒ္ဓဟူးနေ့မှာ အခိုင်အမာပြောကြားလိုက်ကြောင်း အယ်လ်ဂျာဇီရာသတင်းဌာနက ဖော်ပြသွားပါတယ်။

ဆွီဒင်နဲ့ ဖင်လန်တို့အနေဖြင့် နေတိုးအဖွဲ့ထဲ ဝင်ရောက်ပူးပေါင်းတာဟာ ယင်းတို့အကျိုးစီးပွားရှုထောင့်အရ ကြည့်မယ်ဆိုရင် လုံးဝအဓိပ္ပာယ်မရှိတဲ့ ခြေလှမ်းတစ်ခုသာဖြစ်ပြီး ဖင်လန်နယ်စပ်အနီးမှာ ရုရှားတပ်သားများနဲ့ တိုက်ခိုက်ဖျက်ဆီးရေး စနစ်များ နေရာချသွားမယ်လို့ ပူတင်က ရုရှားနိုင်ငံသတင်းဌာန RIA နဲ့ ရိုစီယာ-၁ ရုပ်သံဌာန အင်တာဗျူးတို့မှာ ပြောကြားသွားပါတယ်။

ယခင်က ထိုနယ်စပ်မှာ တပ်သားတွေ၊ တိုက်ခိုက်ရေးစနစ်တွေ မရှိခဲ့ပေမယ့် အခုတော့ ဖြန့်ကျက်သွားတော့မယ်လို့ ပြောဆိုခဲ့ပါတယ်။

ကာလကြာရှည်စွာ ကြားနေရပ်တည်ခဲ့တဲ့ ဆွီဒင်က လွန်ခဲ့တဲ့ ၂ နှစ်ကျော် ယူကရိန်းကို ရုရှားကျူးကျော်တိုက်ခိုက်ပြီးနောက်မှာတော့ နေတိုးအဖွဲ့ထဲသို့ ကြာသပတေးနေ့မှာ ဝင်ရောက်ခဲ့ပြီး ယခုနောက်ဆုံး အဖွဲ့ဝင်အသစ် ဖြစ်လာပါတယ်။

ဆွီဒင်နိုင်ငံဟာ သဘောတူညီချက် စာရွက်စာတမ်း တင်သွင်းခဲ့ပြီးနောက်မှာ တရားဝင်အဖွဲ့ဝင် ဖြစ်လာခဲ့ပါတယ်။

အခုဆိုရင် ဆွီဒင်ဟာ နေတိုးမဟာမိတ်အဖွဲ့ရဲ့ ပိုဒ်ခွဲနံပါတ် ၅ မှာအကျုံးဝင်နေပြီဖြစ်ပြီး တိုက်ခိုက်မှုတစ်ခုခု ခံရပါက အဖွဲ့ဝင်အားလုံး အချင်းချင်းကာကွယ်ပေးသွားမှာ ဖြစ်ပါတယ်။

တရားဝင်အဖွဲ့ဝင် ထပ်တိုးလာခြင်းကို အောင်ပွဲခံတဲ့အနေဖြင့် ဘရူဆဲလ်မြို့ရှိ နေတိုးမဟာမိတ်ဌာနချုပ်မှာ မတ်လ ၁၁ ရက်နေ့က အလံလွှင့်တင်ပွဲအခမ်းအနား ပြုလုပ်ခဲ့ပါတယ်။

ဖင်လန်နိုင်ငံဟာ ယမန်နှစ် ဧပြီ ၄ ရက်နေ့က နေတိုးအဖွဲ့ဝင် ဖြစ်မြောက်ခဲ့တာ ဖြစ်ပါတယ်။

ဆွီဒင်နဲ့ ဖင်လန်တို့ ပါဝင်လာခြင်းကြောင့် နေတိုးအဖွဲ့ကြီးဟာ ဘော်လ်တိတ်ပင်လယ်တစ်ခုလုံးနီးပါး ထိန်းချုပ်ထားပြီ ဖြစ်ပါတယ်။

ဆွီဒင်နိုင်ငံမှာ လက်နက်ထုတ်လုပ်ရေး အများအပြားနဲ့ သေချာပြင်ဆင်ထားတဲ့ စစ်တပ်ရှိနေပါတယ်။

ယခုနှစ် ကာကွယ်ရေးအတွက် တိုင်းပြည် GDP ရဲ့ ၂.၁ ရာခိုင်နှုန်းကို သုံးစွဲသွားရန် ရည်မှန်းထားပြီး ၂၀၂၀ ခုနှစ်ကထက် ၂ ဆပိုများတဲ့ ပမာဏဖြစ်ပါတယ်။

#World_News #ဖင်လန်နိုင်ငံနယ်စပ်အနီး #ရုရှားတပ်များနှင့်တိုက်ခိုက်ရေးစနစ် #Source: NDTV

#World_Health
Published 14 March 2024

မိုက်ခရိုပလတ်စတစ်၊ နာနိုပလတ်စတစ်တွေဟာ နှလုံးဖောက်ခြင်း၊ လေဖြတ်ခြင်း၊ ကင်ဆာဖြစ်ခြင်းတို့နဲ့ ဆက်စပ်နေတယ်လို့ လေ့လာချက်အများအပြားမှာ တွေ့ရှိထားပါတယ်။

သွေးကြောထဲမှာ နာနိုပလတ်စတစ် ရှိနေတဲ့သူတွေဟာ နောက် ၃ နှစ်အတွင်း နှလုံးပြဿနာများ ဖြစ်နိုင်ခြေ ၂ ဆပိုများကြောင်း နယူးအင်္ဂလန် ဆေးပညာဂျာနယ်မှာ ဖော်ပြထားပါတယ်။

နှလုံးသို့ သွေးသွားတဲ့ သွေးကြောတွေထဲမှာ ကိုလက်စ်ထရောလ်အဆီတွေ စုပြုံပိတ်ဆို့လာတာကို နှလုံးအဆီပိတ်တယ်လို့ ခေါ်ပါတယ်။

ဒီလေ့လာမှုက ပလတ်စတစ်အမှုန် ကူးစက်ဝင်ရောက်ခြင်းနဲ့ လူ့ရောဂါများကြား ဆက်စပ်မှုကို ပထမဆုံးလေ့လာခြင်း ဖြစ်တယ်လို့ အီတလီနိုင်ငံ ကမ်ပါနီယာလူဂီဗန်ဗစ်တယ်လီ တက္ကသိုလ်မှ ပရော်ဖက်ဆာ ရာဖေးလ်မာဖယ်လာက ပြောပြသွားပါတယ်။

မိုက်ခရိုပလတ်စတစ်တွေဟာ ၀.၂ လက်မအောက်ရှိတဲ့ ပိုလီမာအပိုင်းအစများ ဖြစ်ပြီး ထိုထက်ပိုမိုသေးငယ်တာကို နာနိုပလတ်စတစ်လို့ ခေါ်ကာ နာနိုပလတ်စတစ်တွေက လူ့ကျန်းမာရေးကို ပိုမိုခြိမ်းခြောက်နေတယ်လို့ ပညာရှင်များ ယူဆနေကြပါတယ်။

ကြွက်တွေကို လေ့လာရာမှာ ကြွက်အမေတွေက ပလတ်စတစ်အမှုန်များကို ရှူသွင်းမိပြီးနောက် ၂၄ နာရီအတွင်းမှာပဲ သန္ဓေသားရဲ့ ဦးနှောက်၊ နှလုံး၊ အသည်း၊ ကျောက်ကပ်၊ အဆုတ်တို့မှာ ပလတ်စတစ်ဓာတု ပစ္စည်းများကို တွေ့ရှိခဲ့ပါတယ်။

လူသားတွေရဲ့ သွေး၊ အဆုတ်၊ အသည်း၊ တစ်ရှူး၊ ဆီး၊ မစင်၊ မိခင်နို့၊ အချင်းတို့မှာ နာနိုအမှုန်များ တွေ့ထားပေမယ့် ခန္ဓာကိုယ် အတွင်းအင်္ဂါများနဲ့ လုပ်ဆောင်ချက်များအပေါ် ဘယ်လိုသက်ရောက်လဲဆိုတာတော့ အထောက်အထား မရရှိသေးပါဘူး။

မိုက်ခရိုနဲ့ နာနိုပလတ်စတစ်တွေဟာ ယခင်ကယူဆထားတာထက် ဆဲလ်တွေထဲမှာ ကြာရှည်စွာ ရှင်သန်နေပါတယ်။

ဒါ့အပြင် ထိုအမှုန်တွေက ကင်ဆာဆဲလ်များ အခြားအစိတ်အပိုင်းများသို့ ကူးစက်ပျံ့နှံ့ခြင်းကို ဖြစ်စေနိုင်တယ်လို့လည်း တွေ့ရှိထားပါတယ်။

#World_Health #မိုက်ခရိုပလတ်စတစ် #နာနိုပလတ်စတစ်များ #Source: WION