#World_News
Published 12 December 2025

■ ထိုင်းနိုင်ငံသည် ကပ္ပလီပင်လယ်ပြင်အတွင်း ကမ်းလွန်ရေနံနှင့် သဘာဝဓာတ်ငွေ့ ရှာဖွေရေးအတွက် လေလံအဆိုပြုလွှာများ ဖိတ်ခေါ်သွားမည်ဖြစ်ပြီး၊ ယင်းအတွက် အစိုးရအဖွဲ့၏ အတည်ပြုချက်ကို ယခုလကုန်တွင် ရရှိရန်မျှော်လင့်ထားကြောင်း စွမ်းအင်ဝန်ကြီးဌာန အမြဲတမ်းအတွင်းဝန် Prasert Sinsukprasert က ပြောကြားခဲ့သည်။

■ ယခုပြုလုပ်မည့် (၂၆) ကြိမ်မြောက် လေလံပွဲသည် စတုရန်းကီလိုမီတာ ၆၈,၀၀၀ ကျယ်ဝန်းသည့် ရှာဖွေရေးနှင့် ထုတ်လုပ်ရေး (E&P) လုပ်ကွက်ဧရိယာ တစ်ခုတည်းကိုသာ အကျုံးဝင်မည်ဖြစ်သည်။

■ အဆိုပါတင်ဒါခေါ်ယူမှုတွင် Chevron၊ TotalEnergies၊ Eni၊ Mubadala Energy နှင့် PTT Exploration and Production (PTTEP) စသည့် ကမ္ဘာ့ထိပ်တန်းရေနံကုမ္ပဏီကြီးများက စိတ်ဝင်စားနေကြကြောင်း သူကပြောကြားခဲ့သည်။

■ ကပ္ပလီပင်လယ်ပြင်၏ ဘူမိဗေဒအနေအထားသည် ကြီးမားသော သိုက်များတွေ့ရှိထားသည့် အနီးနားရှိ အင်ဒိုနီးရှားရေပိုင်နက် ရှိဘူမိအနေအထားနှင့်တူညီမှုရှိသည်ဟု ထိုင်းစွမ်းအင်တာဝန်ရှိသူများက ယုံကြည်ထားကြသည်။

■ ၂၀၂၃ ခုနှစ်တွင် အဘူဒါဘီအခြေစိုက် Mubadala Energy ကုမ္ပဏီသည် အင်ဒိုနီးရှား နိုင်ငံ၏ တောင်ဘက် ကပ္ပလီလုပ်ကွက်တွင် သဘာဝဓာတ်ငွေ့ ကုဗပေ ၇ ထရီလီယံ တွေ့ရှိခဲ့ကြောင်း ကြေညာခဲ့သည်။

■ ရေနက်ပိုင်းရှာဖွေရေး နည်းပညာတိုးတက်လာမှုများကြောင့် မိမိတို့ပိုင်နက်အတွင်းရှိ သိုက်များကို နောက်ဆုံးတွင် ဖော်ထုတ်နိုင်လိမ့်မည်ဟု ထိုင်းနိုင်ငံတွင်းထွက်လောင်စာဌာန (DMF) က မျှော်လင့်ထားသည်။

■ ၁၉၇၁ ခုနှစ်မှ ၂၀၀၅ ခုနှစ်အကြား လိုင်စင်ပေါင်း ၁၄ ကြိမ် ချထားပေးခဲ့သော်လည်း စီးပွားဖြစ်တွေ့ရှိမှု တစ်စုံတစ်ရာမရှိခဲ့ပေ။

■ ၂၀၀၅ ခုနှစ် ဇူလိုင်လက ပြုလုပ်ခဲ့သည့် နောက်ဆုံးအကြိမ် ရှာဖွေရေးကြိုးပမ်းမှုတွင်လည်း ရေနံအစအန အနည်းငယ်သာတွေ့ရှိခဲ့ရသည်။

■ ကပ္ပလီမြစ်ဝှမ်းဒေသ တစ်ခုလုံးသည် နိုင်ငံတကာရေနံကုမ္ပဏီများ၏ အာရုံစိုက်မှုကို အသစ်တစ်ဖန် ပြန်လည် ရရှိနေသည်။

■ အိန္ဒိယနိုင်ငံတွင် နိုင်ငံပိုင် Oil and Natural Gas Corporation နှင့် Oil India တို့သည် ကပ္ပလီ ကျွန်းစုများ (Andaman Islands) တစ်ဝိုက်တွင် ကမ်းလွန်တွင်းတူးဖော်ခြင်း လုပ်ငန်းများကို လုပ်ဆောင်လျက်ရှိသည်။

■ ယင်းအတောအတွင်း မလေးရှားနိုင်ငံ၏ သက်ဆိုင်ရာဝန်ကြီးဌာနကလည်း အိမ်နီးချင်း Langkasuka မြစ်ဝှမ်း ဒေသတွင် စူးစမ်းလေ့လာခွင့်ကို Eni၊ TotalEnergies၊ BP၊ PTTEP၊ Petronas နှင့် Pertamina အပါအဝင် ကုမ္ပဏီအများအပြားအား မကြာသေးမီက ချထားပေးခဲ့သည်။

■ အခြားဖြစ်ပေါ်တိုးတက်မှုတစ်ခုအနေဖြင့် DMF သည် (၂၅) ကြိမ်မြောက် ကုန်းတွင်းပိုင်းလုပ်ကွက်လေလံပွဲ အောင်မြင်သူများကို ယခုလနှောင်းပိုင်းတွင် ကြေညာရန်ပြင်ဆင်နေသည်။

■ အဆိုပါတင်ဒါသည် အရှေ့မြောက်ပိုင်းတွင် (၇) ကွက်နှင့် အလယ်ပိုင်းဒေသတွင် (၂) ကွက် စုစုပေါင်း လုပ်ကွက် (၉) ခု ပါဝင်ပြီး စတုရန်းကီလိုမီတာ ၃၃,၀၀၀ ကျော် ကျယ်ဝန်းသည်။

■ ယခုလေလံပွဲများသည် ၂၀၀၇ ခုနှစ်နောက်ပိုင်း ထိုင်းနိုင်ငံ၏ ပထမဆုံးသော ကုန်းတွင်းပိုင်းရှာဖွေရေး လေလံပွဲများဖြစ်လာသည်။

■ နောက်ဆုံးအဆင့် လေလံဆွဲသူများတွင် Hong Kong and China Gas Co ကျောထောက် နောက်ခံပြုထားသည့် ECO Orient Companies နှင့် မလေးရှားနိုင်ငံ Dialog ပိုင်ဆိုင်သည့် Pan Orient Energy (Siam) ကဲ့သို့သော နိုင်ငံတကာကုမ္ပဏီများအပြင် CanAsia Energy နှင့် ပူးပေါင်းထားသည့် ထိုင်းနိုင်ငံမှ Sea Oil တို့လည်းပါဝင်သည်။